读者来函
喺英语《圣经新世界译本》2013年修订版，诗篇144:12-15描述嘅系上帝子民嘅情况。不过，喺之前嘅《新世界译本》，呢几节经文描述嘅系 第11节经文提到嘅邪恶外邦人嘅情况。点解要作出呢项调整？
基于对希伯来语原文嘅理解，以上嘅经文可以有两种唔同嘅译法。修订版作出调整系出于以下嘅理由：
修订版嘅译法有词汇同语法上嘅支持。想明白诗篇144:12-15同上文嘅关系，关键在于点样理解第12节经文嘅第一个希伯来语词asher。呢个希伯来语词有好多唔同嘅意思。有时asher可以做人称代词，例如“佢哋”或者“佢”。之前嘅《新世界译本》将呢个词译为“佢哋”。按照呢种译法，第12-14节经文描述嘅福分都系第11节提到嘅恶人所享有嘅。但系，asher都可以表示结果或者结论，例如译作“所以”“噉样”“结果”。英语《圣经新世界译本》2013年修订版就采用咗表示“噉样”呢个意思嘅译法。
修订版嘅译法使上下文协调一致。第12节嘅第一个单词译作“噉样”，意味住第12-14节提及嘅福分都属于第11节所讲嘅祈求耶和华释放同解救嘅义人。同样嘅情况亦都反映喺第15节。调整之后，呢节经文先后两次提及嘅“有福”，就以积极正面嘅措辞同埋互为补足嘅方式谈及同一对象，即系嗰啲“有耶和华作为上帝嘅人”。值得留意嘅系，希伯来语原文系冇标点符号嘅，例如双引号。所以喺翻译嘅时候，翻译员必须正确判断经文嘅意思，亦都要考虑希伯来语诗歌嘅风格，上下文以及其他相关经文。
修订版嘅译法同其他经文和谐一致，表明上帝会信守承诺，赐福俾佢嘅忠心子民。调整咗对asher嘅译法之后，修订版嘅经文而家就反映出执笔者大卫嘅稳确希望——上帝拯救以色列国脱离仇敌之后，会使佢嘅子民得到喜乐同幸福。（利未记26:9,10；申命记7:13；诗篇128:1-6）例如，申命记28:4亦都提到呢个希望：“你所生嘅、土地所产嘅、家畜嘅后代，无论系牛犊系羊羔，都必蒙福。”大卫嘅儿子所罗门统治期间，以色列国享有前所未有嘅和平同繁荣，预示将来弥赛亚统治下嘅情景。（列王纪上4:20,21；诗篇72:1-20）
总嘅嚟讲，诗篇144篇嘅调整唔会改变我哋对圣经真理嘅理解。不过调整之后，呢篇诗篇就更加清晰噉反映出上帝忠仆一直以来所珍视嘅希望——上帝铲除恶人之后，会使正义嘅人享有永远嘅和平同福乐。（诗篇37:10,11）