呢本出版物系非卖品。

发行呢本出版物系全球圣经教育工作嘅一环，呢项工作靠自愿捐款提供经费

想自愿捐款，请上donate.jw.org网站

除非另外注明，所有经文引自《圣经新世界译本》

2020年5月印刷

Chinese Cantonese (Simplified) (pc-CNS)

图片鸣谢：

6页：U.S. Army Photo

耶和华上帝已经为你同家人打开幸福嘅大门，你哋好快就可以喺乐园里面永远过平安幸福嘅生活嘞！全能嘅天父耶和华深爱人类，一定会实现佢对人类嘅美好旨意。佢保证话：“同样，我的话一说出口，就不会无功而返，一定会实现我的一切旨意。”（以赛亚书55:10,11）

1-4． 好多人试图以乜嘢方式追求平安幸福？但结果点样呢？

边个唔希望幸福快乐？边个唔希望健康长寿？边个唔希望世界和平？呢啲都系人普遍嘅心愿。好可惜人生唔如意嘅事十常八九，现实往往令人失望。世上嘅天灾、人祸、战乱、疾病，罪恶同唔公平嘅事越来越多，苦难似乎冇终止嘅一日。噉点先可以得到平安幸福呢？

² 喺好多所谓讲求实际嘅人心目中，追求财富系最有价值嘅，因为佢哋认为，金钱可以带嚟保障。人有咗钱就可以衣食无忧，生活安稳。金钱确实能够为人带嚟一定嘅保障同好处，但请认真谂吓：财富系咪真系人生最重要嘅嘢？金钱可唔可以带俾人永久嘅保障呢？一旦爆发战争，遭受灾难，遇到罪行，或者生意失败，经济崩溃，财富就可能瞬间化为乌有。我哋身边唔系有好多呢啲事例咩？

³ 唔少人一心追求名誉地位，觉得有咗呢啲嘢，其他人就会对自己另眼相看。但系，无论几咁成功嘅人都必须承认，环境系会改变嘅，地位转眼间就会失去，名誉带来嘅满足感亦非常短暂。一旦生命结束，所有嘅一切都会随之消逝。

⁴ 仲有唔少人觉得，生命既然咁短暂，咁脆弱，世事又变幻无常，就抱住“今朝有酒今朝醉”嘅态度生活，想趁有生之年尽情享乐。当然，适当嘅娱乐会令人开心快乐，但系狂欢作乐带俾人嘅开心有几长久呢？热闹过后，人就唔再觉得寂寞咩？其实，好多纵情作乐嘅人仲系会感到心灵空虚，觉得人生不过如此，实在冇咩意义。

5-7． （甲）点解追求物质名利、寻欢作乐嘅人，最终仲系会感觉心灵空虚？（乙）想生活得真正有意义，人就必须了解乜嘢问题？

⁵ 所以，无论系金钱、名誉、地位，抑或娱乐同物质享受，都唔能够带俾人恒久嘅满足同快乐，亦唔能够令人生变得更有意义。点解呢？因为追求呢啲嘢嘅人，将目标集中喺错误嘅方向，行错咗路。佢哋试图满足嘅，只不过系肉体嘅欲望同对物质嘅渴求，心灵依然系空虚嘅，当然得唔到恒久嘅满足同快乐。

⁶ 人同动物最大嘅区别，就在于心灵。动物冇良知，而人就有良心；动物只要食饱就可以，而人唔会因为得到温饱就满足；动物冇心灵嘅需要，而人就有极大嘅心灵需要；动物唔识得去谂生存嘅目的，人类就希望明白人生嘅意义。所以，就算人衣食无忧，依然会寻寻觅觅，设法满足心灵嘅需要。问题系：人点样先至能够满足自己心灵嘅需要呢？

⁷ 我哋想生活得有意义，就必须先了解：人到底为咩生存喺世上？古今中外，好多钟意思考嘅人都想知：人到底系点嚟嘅？人生究竟有乜嘢意义？宇宙间有冇一位造物主？如果有嘅话，佢关唔关心人呢？佢对人有乜嘢旨意？呢啲都系重要嘅问题，不过点先可以揾到正确嘅答案呢？通过宗教信仰可唔可以揾到呢？等我哋嚟睇吓。

1-6． 西方嘅主流宗教喺历史上有乜嘢可耻嘅记录？

世上各大主流宗教拥有数目宠大嘅信众，有富丽堂皇嘅寺院、庙宇同教堂。不过，呢啲宗教有冇教导人认识真神，以正确嘅方式崇拜佢呢？有冇令人生活得更充实、更快乐？呢啲宗教嘅领袖有冇喺生活上将信仰实践出嚟呢？

² 我哋先睇吓西方嘅主流宗教。历史清楚表明，所谓嘅基督教喺上述呢啲方面都唔能够提供正确嘅指引，令人非常失望。历史上好多残酷嘅战争同屠杀，都发生喺声称信奉基督教嘅国家。11世纪至13世纪由天主教发动嘅十字军东征就系一个铁证。佢哋假借宗教嘅名义，喺战争期间残杀咗不计其数嘅无辜平民。

³ 19世纪初，各教会公开支持西方列强到所谓嘅落后地区扩张势力，大肆抢掠殖民地嘅资源。教会同政府狼狈为奸，结果令世界各地嘅人饱受极大嘅苦难。

⁴ 20世纪爆发嘅两场世界大战，参战国大多数系信奉天主教或者基督新教嘅国家。喺宗教领袖嘅支持下，喺随军教士嘅“祝福”声中，天主教徒残杀天主教徒，基督新教徒残杀基督新教徒。战后嘅情况又点呢？北爱尔兰嘅宗教仇恨一直延续到现代，天主教徒同基督新教徒彼此仇视，互相攻击，造成极大嘅伤亡。呢啲宗教声称事奉同一位神，钟意高谈和平，经常将仁爱挂喺嘴边，但历史证明咗乜嘢呢？佢哋系咪真系热爱和平，爱人如己呢？

⁵ 教会领袖同其下嘅教徒，又系咪紧守圣经嘅崇高道德标准？传播媒体唔系经常揭发教士性侵犯儿童、贪污腐败嘅丑行咩？一啲教士唔系公开赞成同性恋、婚前同婚外性行为咩？有啲地区嘅激进教士怂恿人用武力推翻佢哋认为唔合理嘅制度，甚至实际参与叛乱或游击战。

⁶ 另外，西方嘅主流宗教虽然声称信奉上帝，但系就根本冇帮助人正确噉认识上帝。佢哋提倡嘅教义主要系源于传统信仰，而唔系基于圣经嘅真理。譬如话，佢哋相信人死后灵魂会继续存在，如果人唔信上帝，佢嘅灵魂就会永远喺烈火熊熊嘅地狱里面受苦。请谂吓，宇宙嘅主宰如果系一位咁残酷不仁嘅神，你愿唔愿意亲近佢呢？（参看25页附栏）

7-10． 华人普遍信奉乜嘢？呢啲信仰将人引到乜嘢方向？

⁷ 既然西方嘅宗教唔能够满足人心灵上嘅需要，提供正确嘅指引，更加唔能够为世人带嚟恒久嘅平安幸福，噉东方嘅宗教又点样呢？华人主要信奉儒、道、佛三教，仲有好多人崇拜祖先。噉呢啲信仰有冇为华人带嚟恒久嘅平安幸福呢？等我哋逐一睇吓。

⁸ 道教奉老子为神明，起初只系一种哲学思想而唔系宗教。据说老子不满当时世局动荡混乱，于是采取避世嘅态度，试图通过回归自然而悟得真道。不过随住时间过去，道教融合咗传统嘅神仙信仰，供奉好多男女神明，承袭法术同神仙方术。道教嘅信徒钟意求神问卜，注重风水同举行各种法事，而唔注重寻求人生嘅意义。所以，神话同法术色彩浓厚嘅道教，系冇办法满足人心灵上嘅需要嘅。

⁹ 再嚟睇吓儒教（又称孔教、儒家）。孔子系儒家嘅创始者，佢大力倡导嘅其实系道德伦理而唔系宗教。虽然孔子学说对华人嘅思想文化影响深远。但系毕竟儒家思想只系一种生活哲学，并冇解答一个重要问题：宇宙间系咪有一位主宰万物嘅真神？更加唔好话鼓励人同真神培养亲密嘅关系。所以，接受儒家思想嘅人即使喺生活上获得一啲指引同益处，仲系冇办法满足心灵嘅需要，亦得唔到恒久嘅平安幸福。

¹⁰ 至于佛教，呢种从印度传入中国嘅宗教，倡导人应该慈悲为怀，凡事宽容。佛教倡导嘅深奥哲学吸引咗好多人，不过呢种宗教有冇带领人认识宇宙嘅真神？佢又能唔能够满足人心灵嘅需要呢？《佛教入门》提到，“佛教唔承认宇宙间有任何绝对权威嘅神”“人人都可以成佛”“要离苦成佛一定要靠自己嘅努力”。由此可见，佛教嘅宗旨并唔系带领人认识宇宙嘅真神，而系鼓励人自己修行悟道，噉当然唔能够满足人心灵嘅需要。

11． 要满足心灵嘅需要，就必须明白乜嘢问题？

¹¹ 试谂吓，一个人将信心建立喺错误嘅基础上，将希望寄托喺虚无嘅对象身上，又点可以得到恒久嘅平安幸福呢？长久以嚟，华人一直深受传统信仰嘅影响，崇拜祖先同各种神明、偶像，喺日常生活里面奉行好多仪式同礼节。对佢哋嚟讲，宇宙中有一位创造万物嘅真神——上帝，而佢具有各种美好嘅特质，呢个几乎系完全陌生嘅观念。不过，正如上文所讲，我哋想得到心灵嘅满足，就必须知道人系点样嚟嘅、宇宙间有冇一位造物主。如果真系有一位造物主，噉佢到底系边个？佢对地球同人类有乜嘢旨意？人类多灾多难，佢关唔关心呢？知道答案之后，我哋努力使自己嘅生活配合造物主嘅旨意，就可以享有恒久嘅平安幸福。跟住落嚟，我哋邀请你考虑一啲造物主存在嘅证据，睇吓可唔可以帮助你揾到合理嘅答案。

1-5． （甲）一个简单嘅蛋白质分子碰巧产生嘅机会有几大？（乙）进化论冇办法解释乜嘢难题？

对于造物主系咪存在，唔同人有唔同嘅见解。有啲人话，我睇唔到造物主，冇办法相信佢存在；有啲人觉得，世上有咁多苦难同不公，当然冇可能有一位关心人嘅上帝；如果有，佢唔系早就应该将世上嘅种种苦难都消除咩？你又点睇呢？

² 无论如何，我哋都唔应该因为有苦难同可怕嘅事而妄下定论，系咪？请谂吓，如果造物主唔存在，噉地上种类繁多、设计精妙嘅生物，包括人类，又系点嚟嘅呢？相信进化论嘅人认为，生命系喺大自然当中碰巧产生嘅，然后逐渐演化成各类较复杂嘅生物。但系你有冇谂过，生命碰巧产生嘅机会究竟有几大呢？

生命能否碰巧产生？

³ 生物嘅基本单位系细胞，而细胞就由蛋白质构成。进化论者承认，一个简单嘅蛋白质分子碰巧产生嘅机会只有10¹¹³（相当于1后面有113个0）分之一。亦即系话，要尝试10¹¹³次，先有可能发生一次。数学家认为，任何事情发生嘅机率如果低于10⁵⁰（相当于1后面有50个0）分之一，就根本冇可能发生！

⁴ 请再谂吓，生命唔系单靠一个简单嘅蛋白质分子就可以嘅。要维持细胞嘅活力，至少需要两千种蛋白质。噉样，两千种蛋白质喺同一时间碰巧产生嘅机会又有几大呢？科学家估计，机会只有10^{40 000}（相当于1后面有4万个0）分之一！机会咁渺茫，你真系愿意相信进化论，以呢个作为信心嘅基础咩？

⁵ 既然碰巧产生一个细胞嘅机会已经微乎其微，噉要细胞再碰巧演化成结构复杂、种类繁多嘅生物，机会就更渺茫嘞！事实上，人同动物除咗结构上嘅差别之外，仲有好多嘅差异，例如人有良心、感情同道德观念，人亦会思考、审美，有推理能力；而动物就缺乏呢一切特质。如果人系从动物逐渐演化而嚟嘅，人同动物之间又点可能存在咁巨大嘅鸿沟呢？呢个系进化论冇办法解释嘅难题。

令人惊叹嘅宇宙同地球

6,7． 点解话，宇宙同地球系造物主存在嘅明证？

⁶ 请睇吓令人懔然生畏嘅浩瀚宇宙。根据天文学家估计，宇宙中大约有1000亿个星系，每个星系至少由1000亿颗星组成，有啲星嘅体积甚至比太阳仲要大好多倍！但星系同星系之间唔系杂乱无章嘅，而系井然有序嘅。呢个唔系表明宇宙间有一位能力高强嘅主宰咩？

⁷ 喺所有星体当中，地球呢颗行星尤其独特。地球就好似一间精心设计、样样齐备嘅房屋，具备维持生命所需嘅一切，例如水、空气、阳光、食物等等。地球非常适合人类同动物居住。想象吓，一间样样齐备嘅房屋如果冇人设计同建造，可唔可以自然产生？同样道理，比房屋复杂得多、规模大得多嘅地球同地球嘅生态系统，唔系更需要一位造物主去设计同创造咩？

奇妙嘅人体

8,9． 人体咁奇妙，帮助我哋睇出乜嘢事实？

⁸ 奇妙嘅人体结构亦系造物主存在嘅有力证据。等我哋睇吓微小嘅细胞。人体大约由一百万亿个细胞组成。每个细胞都非常复杂，而且功能齐全，就好似一个城市一样。喺细胞入面，有负责指挥嘅、生产能量嘅、运输嘅、抗疫嘅，各部分发挥住各自嘅功能，彼此协调一致。喺每个细胞核入面，都有复杂得难以置信嘅遗传基因——脱氧核糖核酸(DNA)。如果将一个脱氧核糖核酸所包含嘅指示全部写出嚟，相当于写1000本600页厚嘅书。呢啲指示就好似设计蓝图一样，决定咗我哋嘅肤色、身材、头发类型，同埋身体嘅其他特征同细节。既然建筑蓝图都系人精心设计出嚟嘅，噉复杂得多嘅基因蓝图又系边个设计嘅呢？

⁹ 人体有各种唔同嘅器官，呢啲器官设计精妙，结构复杂，功能非常奇特，人所造嘅任何机器都唔能够同人体呢副“机器”相比。人体最奇妙嘅就系大脑。《新大英百科全书》指出：“大脑神经系统传送信息嘅方式，比世上最大嘅电话网络系统复杂得多；人脑解决问题嘅能力，远远超过性能最强嘅电脑。”人脑嘅奇妙，连科学家都叹为观止。咁精妙复杂嘅器官，点可能碰巧产生呢？

10-12． （甲）点解相信上帝存在并唔系迷信或者唔合理？（乙）而家，你对上帝嘅存在有乜嘢睇法？

¹⁰ 以上资料可以帮助你得出乜嘢结论呢？你一定会同意，有法律就必定有立法者，有设计就必定有设计者。从微小嘅原子到浩瀚嘅宇宙都秩序井然，反映出设计嘅精妙同智慧嘅高超。既然系噉，相信有一位智慧高深、能力无穷嘅造物主，而一切都系佢设计同创造嘅，系咪好合理呢？

¹¹ 圣经讲得合情合理：“自从创世以来，上帝那些看不见的特质，就是他的永恒力量和神性，一直都清楚可见，从他所造的东西就能看出来，所以他们实在没有借口不信上帝。”（罗马书1:20）人确实睇唔到上帝，但系相信上帝存在绝对唔系迷信，亦都唔系罔顾科学。喺日常生活中，其实有好多嘢我哋都睇唔见，例如风、电力、磁场、万有引力等等。不过，呢啲事物所发挥嘅作用，我哋都能够睇得见，所以唔会怀疑呢啲事物嘅存在。同样道理，宇宙万物秩序井然，设计精妙，发挥住非凡嘅作用，我哋睇见呢一切，自然应该推断出宇宙间确实有一位伟大嘅设计者——创造万物嘅上帝。

¹² 不过你可能会谂：既然我哋睇唔见上帝，又点知道佢系一位点样嘅神呢？点样去认识佢，同佢建立友谊呢？呢啲问题我哋唔需要猜测，因为上帝早就通过两个方法俾人可以认识佢。一个方法系，人可以通过仔细观察佢创造嘅万物，去了解佢嘅智慧、能力同爱心等特质；另一个方法系，通过佢启示人写嘅一本书，去清楚认识佢同佢嘅旨意，呢本书就系圣经。

1-3． 圣经系一本点样嘅书？圣经点解值得我哋留意同重视？

一般嚟讲，无论人对圣经有乜嘢睇法，都唔会否定呢本书系经典，具有非凡嘅影响力。《新大英百科全书》话，圣经系“人类历史上最具影响力嘅丛书”，呢个评价一啲都唔夸张。而家等我哋睇吓，圣经有边啲非凡之处。

历史悠久，流传最广

² 圣经可以讲系世上现存最古老嘅书之一，喺宗教经典入面更加系最早开始写作嘅。圣经头几卷书，系以色列人摩西喺3500几年前（相当于中国嘅商朝）用古希伯来语写成嘅，而最后嘅书卷就喺公元1世纪末完成。喺长达1600几年嘅时期入面，有40几个人执笔写圣经。圣经由66卷书组成，头一卷叫创世记，记载咗地球受造嘅过程、人类嘅起源，同埋早期人类嘅历史。其他经卷包含咗历史、法律、预言、诗歌、书信、劝世箴言同好多有价值嘅资料。

³ 圣经呢本书虽然古老，而且一度被当权者试图消灭，但系圣经显示出强大嘅生命力，唔单止冇喺历史嘅洪流中湮灭，反而成为世上流传最广嘅书。其中某啲部分或整本被翻译成超过2500种语言，印刷总量达48亿。今日，全球有百分之98嘅人口能够用自己熟悉嘅母语读到圣经。请谂吓，如果上帝想用一本书同全人类沟通，呢本书唔系应该广泛流传，而且译成各种语言，等人人都可以得益咩？（提摩太前书2:4）圣经就系噉样嘅一本书。

内容最可靠

4-8． 请讲吓科学同历史方面有边啲证据表明，圣经嘅内容系准确可信嘅？

⁴ 圣经如果真系嚟自上帝，内容就应该准确无误，真实可靠。圣经有冇符合呢个标准呢？能唔能够经得起科学同历史嘅验证呢？等我哋先睇吓科学方面嘅可靠证据。

⁵ 圣经并唔系科学书籍，但所讲嘅只要涉及科学，就总系同现代已经证实嘅科学发现一致，完全唔受写作年代嗰啲错误嘅流行观点所影响。譬如话，古人相信，大地系由四只大象托住，而四只大象就企喺一只大海龟之上；但圣经就好清楚宣告：“上帝把天铺在虚空之中，把大地悬在虚空之上。”（约伯记26:7，写于公元前1473年）另外，圣经早喺2700年前就指出地球嘅形状，话：“上帝住在大地的圆圈之上”。（以赛亚书40:22）请谂吓，如果圣经唔系上帝启示嘅，当时嘅执笔者又点可能准确噉写出呢啲事实呢？

⁶ 其实圣经记载咗唔少事实，系直到科学进步，科学家提出证据之后，人先至知道嘅。举例嚟讲：宇宙系有开始嘅（创世记1:1），各类生物系按次序出现嘅（创世记第1章），生物通过遗传基因繁衍（诗篇139:16）等等。再举个例：早喺人类对细菌一无所知，卫生知识相当贫乏嘅时候，圣经就已经吩咐人要注意卫生，保持清洁。圣经规定：凡接触过尸体或粪便嘅人都要彻底清洗身体同衣服。（民数记19:11-22；申命记23:12-14）

⁷ 请谂吓，古代写圣经嘅人点可能写出呢啲同现代科学一致嘅事实呢？合理嘅结论系：圣经绝对唔系嚟自人嘅智慧，因为古代嘅人根本冇可能有呢啲知识；只有造物主先至有智慧同能力，启示执笔者写出呢啲事实。所以我哋有充分理由相信，圣经的确嚟自上帝。

⁸ 再嚟睇吓圣经嘅历史记载系咪准确可信。古代嘅书一般都含有神话传说，而且写历史嘅人往往会夸大对当权者有利嘅事，掩饰不利嘅事。圣经就截然不同嘞，既冇神话传说嘅成分，亦从来都唔会掩饰人嘅过错。圣经报道事件嗰陣，往往记低人名、地点、日期同时间等可靠资料，等后人能够加以考证。举个例，圣经提到耶稣开始传道嘅时候，同时列出咗七个统治者或地方官嘅名。你只要查吓历史文献，就知道圣经嘅记载系咪正确嘞。（路加福音3:1,2）一本书如果系喺上帝嘅指引下写成嘅，唔系应该准确噉报道史实咩？

预言最准确

9-12． （甲）圣经含有边啲预言？（乙）预言准确应验，足以证明乜嘢？

⁹ 我哋知道，冇人能够准确噉预言未来。所以，一本书如果有好多预言都应验咗，呢本书就冇可能出自人。圣经记载咗几百个预言，大多数都已经准确噉应验。例如：古代一啲强大帝国兴亡嘅先后次序；巴比伦帝国虽然睇嚟坚不可摧，但系会喺一夜之间覆亡；古代以色列人会亡国，后来会复兴等等。圣经嘅呢啲预言甚至喺事前几百年就已经发出，时间一到就果然应验。（以赛亚书13:17-19；44:26；耶利米书25:8-12；但以理书8:5-8,20-22）

¹⁰ 圣经入面关于耶稣嘅预言就更加唔寻常嘞。耶稣系公元1世纪嘅伟人。早喺耶稣出生之前一千几年，圣经嘅《希伯来语经卷》（又称《旧约全书》）就预告咗好多同耶稣有关嘅事，而呢啲预言果然一一应验。唔好忘记，预言提到唔少嘅事根本系耶稣冇办法操控嘅。譬如话，佢会生于边个部族，喺边度出世，几时出世，俾边个出卖，俾乜嘢人虐待同杀害，佢嘅尸体又会被点样处理等等，都冇可能由耶稣自己预先安排。（创世记49:10；诗篇22:7,8；34:20；以赛亚书50:6；但以理书9:25；弥迦书5:2；撒迦利亚书11:12）关于耶稣嘅预言完全应验，足以证明耶稣就系上帝派嚟嘅救主。

¹¹ 圣经唔单止准确预告古代嘅历史事件，仲准确预告我哋呢个时代嘅世事发展。你读吓马太福音24章、路加福音21章、提摩太后书3:1-5同启示录6:3-8就可以睇出，圣经嘅描述系几咁精确。现代有一段历史特别值得注意。第一次世界大战结束之后，国际联盟成立。成员国嘅领袖声称，人类已经得到惨痛嘅教训，以后一定唔会再发生世界大战。但圣经喺两千年前就预言，1914年发生嘅事只不过系“苦难嘅开始”。（马太福音24:8）圣经嘅预言同嗰啲世界嘅领袖预测嘅显然唔同。后来，第二次世界大战果然爆发，证明圣经预言非常准确，人嘅预测并唔可信。

¹² 既然圣经嘅预言大部分已经准确应验，噉唔系充分证明圣经系嚟自造物主嘅咩？只有全能嘅上帝，先可以喺事情未发生之前，就启示人写低咁精确嘅预言。（彼得后书1:21）

劝告最实用最有智慧

13-15． 点解话，圣经嘅劝告同指引非常实用而且充满智慧？

¹³ 今日呢个自私自利嘅世界充满难题同压力，唔少人俾各种问题所困扰。有啲人经历婚姻同家庭难题，有啲人忧虑金钱同经济，年轻人就对交友、性、饮酒、滥用药物呢啲问题感到困惑。如果圣经系上帝赐俾全人类嘅指南，唔系应该能够喺呢啲方面指引人，帮助人应付难题咩？

¹⁴ 圣经的确提供有益嘅指引，帮助人从根本上解决问题。事实上，圣经嘅劝告虽然同一般人嘅意见唔同，不过就远胜世人嘅忠告。譬如喺婚姻方面，每当有难题发生，专家往往提议双方分居或离婚；但圣经就指出，婚姻系严肃嘅承诺，唔应该随便离婚。圣经劝勉夫妻要互敬互爱，彼此体谅。（以弗所书5:22-28）夫妻如果实践呢啲劝告，唔单止可以防止问题恶化，仲能够促进家庭和睦。喺经济方面，好多人认为收入越高难题就越少；不过圣经劝人要知足，唔好贪心，警诫人唔好染上浪费金钱嘅恶习，例如纵酒、赌博、吸烟、吸毒等。（提摩太前书6:7-10）喺人际关系方面，好多人觉得做到良心无愧就够嘞；不过圣经话：“无论什么事，你们希望别人怎样对待你们，你们就要怎样对待别人。”（马太福音7:12）的确，无论喺社区、学校，抑或工作嘅地方，你主动关心人，就会赢得其他人嘅好感同友谊，摩擦同压力亦会减少。

¹⁵ 从以上嘅例子，你同唔同意圣经嘅劝告的确好实用呢？世界各地好多人因为听从圣经嘅劝告，结果可以逐步解决生活嘅各种难题。一本书如果系上帝赐俾人类嘅指南，唔系应该有实用嘅价值，包含超凡嘅智慧咩？圣经既然充满上帝嘅智慧，我哋听从其中嘅劝告，就一定能够揾到恒久嘅平安幸福。

造福万国万族嘅人

16-18． （甲）圣经嘅道理对华人适唔适用？（乙）你而家相唔相信圣经系一本造福全人类嘅书呢？点解？

¹⁶ 唔少东方人认为，圣经系西方人嘅书，其中嘅道理未必适合东方人。系咪真嘅呢？请谂吓，造物主既然系创造人类嘅上帝，对于所有人嘅需要，自然比边个都清楚。所以，佢启示嘅圣经能够造福全人类。无论人生活喺乜嘢政治制度之下，有点样嘅文化背景，都可以从中受益。就以中国文化为例，历代圣贤传落嚟嘅处世为人之道当中，有唔少都好有价值，将呢啲道理同圣经嘅道理比较，我哋会发觉两者好相似。以下系几个例子：

• 古训：尊敬长辈。圣经：“要在白发的人面前起立，要尊重老人，要敬畏你的上帝。我是耶和华。”（利未记19:32）

• 古训：孝顺父母。圣经：“要尊敬父母，这样你在耶和华你上帝赐给你的土地上就可以活得长久。”（出埃及记20:12）

• 古训：饮水思源。圣经：“在年少的日子，就要把你伟大的创造主铭记在心。”（传道书12:1）

• 古训：近朱者赤，近墨者黑。圣经：“与有智慧的人同行，就有智慧；跟愚昧的人来往，就会吃亏。”（箴言13:20）

¹⁷ 值得注意嘅系，圣经呢啲道理，早喺孔孟之道或诸子百家盛行之前，就已经写喺圣经里面。圣经的确能够造福万国万族嘅人。有咗圣经，我哋就可以明白人点解生存喺世上，知道人生应该走嘅方向。正如食物能够满足人嘅身体需要，圣经亦都能够满足人嘅心灵需要。（马太福音5:3；约翰福音4:34）我哋学习圣经，就能够亲近上帝，同佢建立亲密嘅关系。我哋同上帝嘅关系越亲密，生活就会越快乐、越满足。

¹⁸ 圣经唔单止帮助我哋而家生活得美满，仲为我哋带来美好嘅希望。圣经透露，上帝好快就会通过佢嘅王国，消除世上嘅一切罪恶同唔公平。喺呢个王国统治之下，整个地球会成为乐园，所有谦卑、正直、善良嘅人，都会永远喺地上过平安幸福嘅生活。不过，你要符合乜嘢要求先能够得享呢啲福分呢？请留意跟住落嚟嘅资料。

1-3． 点解我哋应该认识造物主？

只要细心观察大自然，并且按照通则去推理，诚实嘅人就唔难睇出，宇宙間的确有一位造物主。不过，净系相信造物主存在系唔够嘅，对人帮助唔大。好多人都相信宇宙中有一位主宰，但系就睇唔出呢个同自己有乜嘢关系。譬如话，华人由于长期受儒、道、佛思想嘅影响，一般都相信冥冥中自有上苍或神明，接受善有善报、恶有恶报嘅观念，但系又觉得呢啲都系人难以理解嘅事。又譬如话，西方嘅不可知论者虽然唔排除上帝存在嘅可能性，但就认为上帝系不可知嘅，人根本冇办法了解上帝。显然，净系相信上帝存在并唔足以帮助人亲近上帝，对佢产生真正嘅信心。

² 所以，我哋唔单止要相信上帝存在，仲必须对上帝有信心，信赖佢。圣经话：“人没有信心，就不可能赢得上帝的喜悦，因为到上帝面前来的人必须相信他存在，也相信他会奖赏恳切寻求他的人。”（希伯来书11:6）由此可见，真正嘅信心仲包括坚信上帝会“奖赏恳切寻求佢嘅人”，坚信佢唔系高高在上、对人冷漠嘅神，而系一位关心人嘅上帝，乐意帮助所有热切寻求佢嘅人，奖赏佢哋。

³ 中国有句古语：“百行孝为先”。华人向来重视孝道，觉得儿女认识、尊敬同孝顺父母系天经地义嘅事。（以弗所书6:1-3；歌罗西书3:20）噉样，对于创造人类嘅天父，我哋唔系更有义务要认识佢同佢嘅旨意咩？（传道书12:13）要认识上帝，我哋就必须要明白一啲重要嘅问题，例如上帝叫咩名？佢点解要创造人类？人生嘅意义系乜嘢？人类最后会点样？世上点解有咁多罪恶？呢啲问题，单凭逻辑推理或个人经验系冇办法揾到答案嘅，我哋需要嚟自造物主嘅启示同指导。上帝已经启示人写低圣经，等我哋可以从中揾到答案。（提摩太后书3:16,17）

4． （甲）上帝叫咩名？（乙）佢对人类同地球有乜嘢美好嘅旨意？

⁴ 圣经话俾我哋知，上帝嘅名叫耶和华；又话俾我哋知，上帝嘅旨意、观点、情感，同埋佢点样待人。圣经一开始就表明上帝创造人类嘅原因，话：“上帝按照自己的形象创造了人。上帝是按照他的形象把人创造出来的，他创造了男人和女人。上帝赐福给他们，对他们说：‘要繁衍增多，遍满地面，开拓大地，也要管理海里的鱼、天上会飞的生物和地上的各种动物。’”（创世记1:27,28）上帝将佢创造嘅第一对男女亚当同夏娃安置喺伊甸园，等佢哋喺地上过快乐嘅生活，有美好嘅生活环境，有美满幸福嘅家庭，有称心如意嘅工作，身心完美，唔会病同衰老，亦唔会死亡。佢哋会生完美嘅儿女，儿孙满堂。人人同心协力，照顾种类繁多嘅动物，好好运用地球嘅一切资源，使整个地球成为好似伊甸园一样嘅美丽乐园，布满完美嘅人类，永远享受上帝所赐嘅一切福分。呢个就系上帝对地球同人类所定嘅旨意。（以赛亚书45:18）呢一切系咪充分表明，造物主耶和华好似慈父一样，关怀同爱护人类呢？能够永远事奉咁伟大嘅上帝，人生一定会充满意义。（诗篇36:9;103:13；启示录4:11）

5-7． （甲）人类嘅始祖点样辜负咗上帝嘅美意？（乙）上帝为受苦嘅人类作出乜嘢仁爱嘅安排？

⁵ 好可惜，人类嘅始祖亚当同夏娃并冇感激上帝为佢哋所做嘅一切。佢哋冇顺服嘅心，蓄意违反上帝嘅命令，结果失去喺乐园永远享有生命嘅福分。（创世记3:1-19）更可悲嘅系，佢哋嘅反叛连累所有无辜嘅后代。圣经话：“罪通过一个人进了世间，死又通过罪而来，于是死就传给所有人，因为人人都有罪。”（罗马书5:12）今日世上咁多苦难，都系罪同不完美所造成嘅恶果。不过，上帝深爱无辜嘅人类，佢作出安排通过佢嘅爱子耶稣基督所献嘅赎价去拯救世人，等我哋可以摆脱罪同死亡嘅奴役。（约翰福音3:16；约翰一书4:9,10）上帝做咗乜嘢安排呢？

⁶ 为咗造福全人类，上帝喺天上设立咗一个王国，委任耶稣基督做王国嘅君王。（马太福音6:10）通过呢个王国，上帝会彻底解决地上嘅难题，成就佢原定嘅旨意，使人类恢复完美嘅身心，地球永远成为人类幸福嘅家园。（但以理书2:44；启示录21:3,4）耶和华上帝亲口保证：“同样，我的话一说出口，就不会无功而返，一定会实现我的一切旨意。我说过要做的事，必定成功。”（以赛亚书55:11）所以，喺上帝嘅王国统治下永远过健康、幸福嘅生活，绝对唔系梦想。上帝几咁关爱人类！愿我哋都衷心感激佢。事实上，世界各地好多嚟自唔同种族、文化背景嘅人，都被上帝嘅爱所打动，于是去认识佢，同佢建立友谊，决心事奉佢。

⁷ 噉样，点先可以逐步培养对上帝嘅信心呢？唔信宗教嘅人或者认为，对神嘅信仰只不过系一种精神寄托，系心理上嘅自我安慰。你有乜嘢睇法呢？究竟点样先可以培养信心？

点样培养信心

8-13． （甲）信心系乜嘢？（乙）要培养对上帝嘅信心，就必须按步骤采取边啲行动？点解？

⁸圣经话：“信心是确知希望必然实现，是不见的事实的明证。”（希伯来书11:1）由此可见，圣经所讲嘅信心系以确切嘅知识同事实为根据嘅，绝对唔系迷信或轻信。所以，要培养对上帝嘅信心，就要实行以下三个步骤：第一，认真学习圣经；第二，沉思圣经嘅话；第三，运用学到嘅圣经知识。

⁹ 先讲吓第一个步骤。既然信心系以确切嘅知识同事实为根据嘅，要培养对上帝嘅信心，就必须认真学习圣经。喺呢方面，公元1世纪嘅比里亚人好值得我哋学习。比里亚人虽然深受犹太教同希腊文化嘅影响，不过佢哋思想开明，听过使徒保罗讲道之后，就“非常热切地接受了上帝的话语，天天用心查考圣经，要确定自己听到的是不是真的。结果他们当中许多人都成了信徒”。（使徒行传17:11,12）同样，我哋亦都要有开明嘅思想，仔细研读圣经，再三思考同求证，噉样先至能够对上帝同圣经有确切嘅认识。（约翰福音17:3；提摩太后书3:15-17）

¹⁰ 当然，噉样做并唔容易。现代人为咗谋生，每日劳劳碌碌，又忙又攰。不过，净系为咗满足物质需要而生活，系咪真系快乐呢？耶稣话：“渴望满足心灵需要的人有福了”。（马太福音5:3）假如我哋为咗谋生耗尽精力，冇几多时间照顾自己嘅心灵需要，就本末倒置，目光短浅嘞。所以，即使生活紧张忙碌，都要尽可能抽时间学习圣经。圣经劝勉我哋：“要仔细留意自己怎样行事为人，不要做愚昧的人，要做有智慧的人。要尽力善用时间，因为这个时代很险恶。”（以弗所书5:15,16）我哋听从呢个劝告，分清生活中各事嘅轻重缓急，定出一个切合实际嘅时间表嚟学习圣经，上帝就一定会赐福俾我哋。（马太福音7:7）

¹¹ 要培养对上帝嘅信心，第二个步骤系沉思圣经嘅话。沉思就好似消化食物同吸收营养嘅过程。我哋进食之后，需要消化同吸收，食物先可以对我哋产生实质嘅益处。同样，我哋读过圣经之后，一定要沉思其中嘅话，紧记在心，经文对我哋先至有实际嘅价值。你可以谂吓经文同自己以前嘅观点有乜嘢唔同，用客观、合理嘅眼光比较一下；同时，要克服个人嘅偏见或某啲先入为主嘅观念，唔好俾呢啲谂法妨碍你分辨乜嘢系真理，乜嘢值得相信。噉样，你唔单止可以睇出耶和华系点样嘅上帝，亦会对上帝更有信心，希望同佢更加亲近。

¹² 要培养对上帝嘅信心，第三个步骤系运用学到嘅圣经知识。圣经话：“没有行动的信心就是死的。”（雅各书2:17,26）换句话讲，信心系需要行动支持嘅。就好似一个唔识揸车嘅人，如果想充满信心噉揸车，就冇可能只系靠背熟驾驶手册，喺脑入面模拟一下操作嘅过程就可以揸得好。佢要喺教练嘅指导下运用学到嘅知识，反复练习，经过一段时间，先可以有信心自己一个揸车。同样，我哋想对上帝有信心，亦都要运用学到嘅知识。例如，你学习圣经，认识上帝系个灵体，系肉眼睇唔见嘅。如果你运用学到嘅呢一点，就唔会用偶像或者其他嘢去崇拜上帝，系咪？又例如，圣经话耶和华系关心人嘅天父，听人嘅祷告。你知道呢一点之后，愿唔愿意向上帝倾心吐意，通过祷告亲近佢呢？

¹³ 你愿意运用学到嘅圣经知识，就表明你真系相信上帝同圣经。你越努力喺生活中运用圣经嘅原则，对上帝就会越有信心，就越能够睇出圣经嘅实用价值。圣经鼓励我哋：“你们来尝尝主恩，就知道耶和华是良善的；向他寻求庇护的人多么有福！”（诗篇34:8）的确，我哋要运用圣经嘅原则，先可以体验主耶和华嘅恩惠，对上帝有信心，揾到恒久嘅平安幸福。

一个重要因素

14-17． （甲）边啲因素会妨碍人认识上帝嘅真理？（乙）我哋应该培养点样嘅内心情况？

¹⁴ 我哋已经提出唔少证据，证明造物主存在，证明圣经系上帝嘅话语，亦都证明上帝好希望你认识佢，希望你同佢建立亲密嘅友谊。不过，要建立真正嘅信心，唔系单单有确切嘅知识就够嘅，仲取决于一个重要因素——你嘅心。你嘅心愿唔愿意培养对上帝嘅信心呢？

¹⁵ 人必须有良好嘅内心情况，上帝嘅话语先可以喺佢心入面引起共鸣，产生真正嘅信心。但系，人如果心地刚硬，固执己见，根本就唔愿意相信，噉证据再多，亦都唔可能说服佢。人必须诚实、谦虚、渴求真理，先至可以对上帝建立真正嘅信心。喺耶稣嘅日子，虚伪自私嘅宗教领袖心地刚硬，明明睇到好多证据，但始终唔肯相信耶稣就系上帝派嚟嘅救主。不过，谦虚受教嘅民众就乐意听耶稣讲话，跟随佢。（路加福音21:37,38；约翰福音8:43-47）今日嘅情形亦都一样。

¹⁶ 点解诚实同谦虚受教咁重要？因为人如果唔愿意抛开种族、文化同宗教方面嘅成见，呢啲观念就会大大妨碍佢吸收圣经嘅确切知识。喺现实生活同工作中，人思想开明，谦虚受教，愿意吸收新知识同新经验，肯定能够提高生活同工作嘅质素。喺宗教方面又何尝唔系噉样呢？愿你有开明嘅思想，虚心学习圣经，并且从圣经嘅健全道理得益。

¹⁷ 而家，世界上有一大群人正努力培养对上帝嘅信心。佢哋住喺世界各地，嚟自唔同嘅种族，讲唔同嘅语言，有唔同嘅文化背景。虽然佢哋同你一样，亦都要面对生活嘅种种难题，但系佢哋深知，认识造物主，对佢有信心，并按照佢嘅指引生活，就可以揾到恒久嘅平安幸福。呢群人就系上帝嘅子民，系上帝喺地上嘅现代组织。佢哋系边个呢？

1,2． （甲）耶和华上帝点样将以色列人组织起嚟，作为佢喺地上嘅代表？（乙）上帝点解放弃以色列国？边个取代佢哋？

从古至今，造物主都有特定嘅安排，使所有热切寻求佢嘅人都可以崇拜佢。即系话，一直以来都有一群忠心事奉耶和华嘅人，喺地上组织起嚟，作为佢嘅代表。

² 公元前16世纪，以色列人蒙耶和华拣选，喺之后嘅大约1500年，佢哋一直系上帝喺地上嘅代表。（出埃及记19:5,6）耶和华将佢哋组织成一个国家，赐下法律，安排崇拜嘅事，后来仲委任君王统治佢哋。可惜以色列人一再对上帝不忠。公元1世纪，上帝终于放弃以色列人。（马太福音23:37,38）耶稣嚟到地上嘅时候，清楚表明人归向上帝嘅方法。佢话：“我就是道路、真理、生命。要不是通过我，谁也不能到父亲那里去。”（约翰福音14:6）由嗰时开始，上帝拣选耶稣基督嘅门徒取代以色列国，喺地上代表佢。（彼得前书2:9,10）

3． 早期基督徒系一群点样嘅人？

³ 公元1世纪嘅基督徒会众系个团结合一嘅弟兄团体，致力于执行传福音嘅工作。（马太福音28:19,20）佢哋紧守圣经嘅真理，并且奉公守法，尊重官员，爱护别人。虽然噉样，佢哋仲系受到猛烈嘅反对同迫害。点解呢？因为佢哋坚信，只有上帝嘅王国先可以为人带嚟恒久嘅平安幸福，所以听从耶稣嘅吩咐，全力支持上帝嘅王国，对世事严守中立，拒绝军事服务，亦都唔干预政治。（马太福音6:33；约翰福音18:36）佢哋虽然长期被人误解，大受反对同迫害，不过仍然热心宣扬上帝嘅王国，坚定不移。保罗喺歌罗西书话：“这个好消息在全世界结出果实，成果越来越多。”1世纪嘅基督徒确实将圣经嘅好消息传遍罗马帝国。（歌罗西书1:6）

黑暗时期——假基督教兴起

4,5．天主教会系点样产生嘅？天主教会同早期基督徒会众有乜嘢分别？

⁴ 可惜，基督徒会众后来发生咗翻天覆地嘅变化。正如圣经预告，好多假基督徒暗中混入上帝嘅组织，而且形成一股不法势力，鼓吹同圣经有抵触嘅道理同习俗。（马太福音13:24-30,36-43；使徒行传20:29,30；帖撒罗尼迦后书2:6-8；提摩太前书4:1-3；提摩太后书2:16-18；彼得后书2:1-3）

⁵ 公元1世纪嘅基督徒会众本来冇阶级之分，但系到咗2世纪，会众逐渐形成主教同长老阶层，然后有教士同平信徒阶层。之后，三位一体、灵魂不死、地狱永火等等嘅异教主张相继融入基督教信仰。公元313年，罗马嘅君士坦丁大帝颁令，使变质嘅基督教成为合法嘅宗教。到咗4世纪末，所谓嘅基督教更摇身一变，成为罗马帝国嘅官方宗教，称为罗马公教或天主教。

6,7． 基督新教点样产生？点解话，基督新教各教会亦都唔系真正嘅基督教？

⁶ 16世纪，宗教改革运动爆发，为当时欧洲嘅宗教世界打开新局面。一啲宗教改革家，例如马丁·路德、乌尔里克·茨温利、约翰·加尔文等，分别喺唔同嘅问题上大力抨击天主教会，结果一个个宗教团体喺各地成立，摆脱罗马教廷嘅辖制，统称抗罗宗（反抗罗马嘅宗派）或基督新教。

⁷ 喺教会嘅组织形式方面，基督新教各教会虽然各有差异，但基本上仲系分为教士阶级同平信徒阶级；喺教义方面，仍然墨守三位一体、灵魂不死、死后永远受苦等抵触圣经嘅主张；喺政治中立方面，基督新教各教会亦好似罗马天主教会一样，继续属于世界。宗教改革运动虽然带嚟若干嘅改变，但系基督新教始终冇复兴真正嘅基督教。不过，耶稣喺比喻当中预告，到咗某个时候，真基督教就会复兴，有如小麦嘅真基督徒会好似太阳一样“明亮照耀”。（马太福音13:24-30,36-43）

上帝嘅现代组织

8． 喺近代，真基督教点样复兴？

⁸ 到咗19世纪后期，美国宾夕法尼亚州一群诚恳嘅圣经研究者，睇出当时各教会喺教义上嘅种种谬误，决心逐步钻研圣经，以求揾出真正嘅基督教信仰。冇几耐之后，佢哋开始出版杂志、书刊同传单，广泛噉传播佢哋发掘到嘅圣经真理。呢个宗教团体从一个微小嘅开始，经过100几年嘅发展，今日已经超过850万人，遍及全球240个国家同地区，称为耶和华见证人。

9,10． 乜嘢证据表明，耶和华见证人系现代嘅真基督徒呢？

⁹ 耶稣吩咐门徒：“我给你们一条新诫命，就是要你们彼此相爱。……你们要是彼此相爱，所有人就因此知道你们是我的门徒了。”（约翰福音13:34,35）所以，耶和华见证人唔会参与派系斗争同流血冲突，就算环境极其艰难亦都毫不动摇，决心彼此相爱到底。例如，喺第二次世界大战期间，佢哋为咗听从耶稣嘅吩咐，宁死不屈。喺《祖国的母亲们》一书入面，历史家克劳迪娅·孔兹曾描述纳粹德国期间嘅耶和华见证人：“从一开始，耶和华见证人就拒绝喺任何方面同纳粹政权合作……。佢哋有将近一半人（大部分系男子）被韫入集中营，其中一千人被处决，一千人喺1933年至1945年期间丧生。”由此可见，佢哋爱上帝，爱别人，就算因此而牺牲生命都在所不惜，呢个显然系真基督徒嘅表现。

¹⁰ 好似早期基督徒一样，现代嘅耶和华见证人亦都奉公守法。佢哋谨记耶稣嘅话：“属于凯撒的要给凯撒，属于上帝的要给上帝。”（马太福音22:21）佢哋乐于服从“凯撒”（政府），遵守法律，履行公民义务，例如诚实报税纳税、登记人口、遵守婚姻法等。但政府嘅要求如果抵触上帝嘅要求，佢哋就会好似早期基督徒一样表明：“我们必须服从上帝的统治，而不是服从人。”（使徒行传5:29）的确，耶和华见证人喺生活同崇拜嘅各方面，都表明佢哋系现代嘅真基督徒。

而家就要归附上帝嘅组织

11． 耶和华见证人致力于乜嘢工作去帮助万国万族嘅人归附上帝？

¹¹圣经话：“上帝是不偏心的，无论哪个国族的人，只要敬畏他，做对的事，他都接纳。”（使徒行传10:34,35）上帝嘅旨意系要万国万族嘅人都认识佢，蒙佢赐福。所以，耶和华见证人出版超过900种语言嘅圣经书刊，以各种可行嘅方法宣扬圣经嘅好消息，决心将真理传遍世界各地。（马太福音24:14）佢哋提供免费嘅圣经课程，乐意同任何对圣经感兴趣嘅人讨论圣经。耶和华见证人好希望同你一齐追求恒久嘅平安幸福，你想唔想加入佢哋嘅行列呢？

12． 喺宗教方面，点解你而家就要作出正确嘅抉择？

¹² 喺过去嘅两千年，好多宗教团体或组织误传基督教，败坏上帝同基督嘅名声。上帝好快就会同佢哋算账，并铲除一切错误嘅宗教。所以，耶和华见证人促请所有真正爱戴上帝嘅人，要听从启示录18:4嘅话，离开一切错误嘅宗教。真正嘅基督教已经复兴，全球数以百万计嘅人都归向呢个宗教。（以赛亚书2:2-4）你系咪佢哋嘅一分子呢？系嘅话，你就可以展望摆喺前头嘅奇妙福分嘞。

1,2． 上帝嘅王国系指乜嘢？

耶稣教门徒祷告：“我们在天上的父亲，愿你的名彰显为圣。愿你的王国来临。愿你的旨意在地上实现，像在天上一样。”（马太福音6:9,10）我哋要恳切祈求上帝嘅王国来临。呢个王国系指乜嘢？上帝嘅王国就系耶和华设立嘅天上政府，佢委任深爱嘅儿子耶稣基督做王国嘅君王。呢个王国会为人类做啲乜嘢事呢？

² 2500年前，上帝启示先知但以理写咗一个预言：“那些君王在位的日子，天上的上帝要设立一个永不灭亡的王国。这个王国不会落在其他民族手里，反而会把那些王国全都打碎灭绝。只有这个王国会永远长存。”（但以理书2:44）预言清楚指出，上帝设立嘅王国会先将地上嘅列国彻底铲除，唔再俾任何政权令到世界四分五裂，民不聊生，然后上帝嘅王国会为人类带嚟一个永远和平嘅新世界。呢一切会喺乜嘢时候发生？我哋会唔会亲眼目睹呢？

3-5． 点解我哋可以确信，上帝嘅王国好快就会解决世上嘅所有难题？

³ 耶稣喺地上嘅时候，门徒曾经问佢：“请告诉我们，什么时候有这些事呢？将来会有什么征象显示你已经回到我们这里，显示这个制度已经是末期了？”耶稣嘅回答表明，到时地上会有大规模嘅战争，一处接一处有粮荒、地震同瘟疫；假先知会出现误导好多人；真基督徒会被人憎恨同迫害；不法嘅事会增加；大多数人嘅爱心会冷淡落嚟。另一方面，上帝王国嘅好消息会传遍天下。（马太福音24:3-14）你同唔同意呢啲正系我哋呢个时代嘅写照？好多关心世事嘅人都承认，1914年第一次世界大战爆发之后，人类就进入咗史无前例嘅非常时期。哲学家伯特兰·罗素写道：“自1914年以来，关心世局嘅人无不诚惶诚恐，因为睇嚟人类注定要走向更大嘅灾难。”丹麦历史家彼得·蒙克写道：“1914年爆发嘅大战系人类历史上一个重大嘅转捩点。……［我哋从此］踏入一个充满灾难、恐惧同仇恨嘅时代，边度都唔安全。”

⁴ 的确，自1914年以来，除咗战争之外，世界各地嘅饥荒、地震、瘟疫同不法嘅事件都不断增加，规模前所未有。虽然科技不断进步，但对于解决呢啲难题，人就往往束手无策。耶稣预言嘅征象既然喺1914年开始出现，就表明现行制度从嗰时起就进入咗末期，耶稣基督已经临在，喺天上嘅王国作王嘞！

⁵ 所以，今日我哋每个人都要面临一个生死攸关嘅抉择。乜嘢抉择呢？耶稣说明现行制度末期嘅征象嗰阵指出，佢会审判列国，将人彼此分开，就好似牧人将绵羊山羊分开一样。全力拥护上帝王国嘅人喜爱正义，性情好似绵羊一样温和善良；佢哋会渡过呢个邪恶制度嘅毁灭，永远享受上帝嘅王国为人类带嚟嘅平安幸福。（马太福音25:31,33）

6,7． （甲）上帝嘅王国会为我哋带嚟边啲福分？（乙）有乜嘢诚意嘅邀请正向你发出？

⁶ 噉样，上帝嘅王国会为人类带嚟乜嘢福分呢？呢啲福分包括：

1. 唔再有战争、罪恶同暴行。（诗篇46:8,9；以赛亚书2:4）

2. 人人平等，唔再有种族偏见同阶级歧视。（使徒行传10:35；启示录7:9,10）

3. 人人丰衣足食、安居乐业。（诗篇72:16；以赛亚书25:6；65:21,22）

4. 唔会再有疾病、残障、衰老同死亡。（以赛亚书25:8；35:5,6；启示录21:4）

5. 死去嘅人会复活。（约翰福音5:28,29；启示录20:12）

6. 整个地球会成为乐园。（路加福音23:43；诗篇98:7-9）

⁷ 耶稣话：“认识你这位独一的真神，以及你派来的耶稣基督，才能得到永远的生命。”（约翰福音17:3）所以，我哋诚意邀请你拨出时间嚟学习圣经，经常参加耶和华见证人嘅聚会。噉样，你会知道点样做就可以符合资格，喺上帝王国嘅统治下，永远喺美丽嘅乐园入面，过平安幸福嘅生活。世界各地有几百万人正怀住真正嘅信心，团结一致噉崇拜至高嘅主宰耶和华上帝。而家就系加入呢个行列嘅大好时机，系迅速采取行动嘅时候嘞！唔好犹豫不决，亦唔好半途而废。请接受圣经嘅邀请：“‘来吧！’谁渴了都可以来。谁愿意，都可以无偿享用生命水。”（启示录22:17）