1．由于有遗传嘅罪，上帝嘅好多忠仆都有点样嘅感受？

“我呢个人真系苦啊！”（罗马书7:24）耶和华嘅好多忠仆都同使徒保罗有一样嘅感受。每个人都受到遗传嘅罪影响，所以每当我哋好想取悦耶和华，但又做唔到嘅时候，就会觉得好痛苦，好灰心。一啲有严重过犯嘅基督徒，甚至会觉得自己唔配得到耶和华嘅宽恕。

2．（甲）诗篇34:22点样表明上帝嘅忠仆唔需要为自己嘅罪过度自责？（乙）呢篇课文会讨论乜嘢？（请睇附栏“实用价值抑或预表意义？”）

² 不过经文向我哋保证，嗰啲向耶和华寻求庇护嘅人唔需要为自己嘅罪过度自责。（请读诗篇34:22）向耶和华寻求庇护系乜嘢意思？我哋需要采取乜嘢步骤先可以得到耶和华嘅慈悲同宽恕？我哋沉思古代以色列庇护城嘅安排，就可以知道呢啲问题嘅答案。呢个安排喺律法之约下设立，而喺公元33年嘅五旬节被取代。请记住，律法系嚟自耶和华嘅。所以，我哋从庇护城嘅安排可以学到耶和华对罪、犯过者同悔改嘅睇法。首先我哋嚟睇吓，设立庇护城嘅目的以及呢啲城嘅作用。

“设立庇护城”

3．以色列人点样处理故意杀人嘅案件？

³ 耶和华好重视喺以色列发生嘅每一单血案。受害者最亲嘅男性亲属可以将故意杀人嘅罪犯处死，呢个亲属被称为“报血仇嘅”人。（民数记35:19）将杀人犯处死就系以命偿命，弥补佢所犯嘅罪。迅速处决杀人犯可以保护应许之地免受玷污，因为耶和华吩咐：“唔可以玷污你哋所在嘅地方。［杀人流］血系玷污地嘅。”（民数记35:33,34）

4．以色列人点样处理误杀嘅案件？

⁴ 但系以色列人又点样处理误杀嘅案件？虽然误杀者唔系故意杀人嘅，不过佢的确夺去咗无辜人嘅性命。（创世记9:5）由于有仁慈嘅安排，误杀者可以逃去六个庇护城嘅其中一个，免受报血仇者嘅追杀。喺嗰度，佢可以得到庇护。误杀者一定要留喺庇护城直到大祭司去世。（民数记35:15,28）

5．庇护城嘅安排可以点样帮助我哋对耶和华有更深入嘅了解？

⁵ 将呢啲城设立为庇护城并唔系出于人嘅谂法。耶和华吩咐约书亚：“你要同以色列人讲：‘你哋要……设立庇护城’”。呢啲城被视为“神圣嘅地方”。（约书亚记20:1,2,7,8）既然系耶和华要将呢啲城分别开嚟作特别用途，我哋可能会问：“呢个安排点样帮我哋更清楚认识耶和华嘅慈悲？今日我哋可以点样向耶和华寻求庇护？”

“将事情话俾嗰个城嘅长老知”

6,7．（甲）喺审判误杀嘅案件当中，长老担任乜嘢角色？（请睇吓课文开头嘅图片）（乙）点解误杀者向长老求助系好明智嘅？

⁶ 如果一个人错手杀咗人，佢就要马上逃去庇护城，先喺城门口 “将事情话俾嗰个城嘅长老知”，而长老要仁慈收留佢。（约书亚记20:4）过咗一段时间之后，当事人要返到发生命案嘅嗰座城，接受当地长老嘅审判。（请读民数记35:24,25）唯有等到长老将命案裁定为纯属意外之后，误杀者先可以返去庇护城。

⁷ 点解要牵涉到长老？因为佢哋要保持以色列会众嘅洁净，同埋帮助误杀者从耶和华嘅慈悲得益。一个圣经学者提到，如果误杀者冇去见长老，“噉佢就系自取灭亡”。学者继续话：“因为误杀者冇好好运用上帝为佢提供嘅保护，所以后果由佢自己嚟承担。”虽然耶和华为误杀者提供咗帮助，但系佢自己都要寻求同接受呢个帮助。如果佢冇去耶和华设立嘅其中一个城寻求庇护，噉死者最亲嘅亲属就有权处死佢。

8,9．点解一个基督徒犯咗严重嘅罪之后，应该向长老寻求帮助？

⁸ 今日，如果一个基督徒犯咗严重嘅罪，想再次同耶和华恢复亲密嘅关系，佢就需要向会众嘅长老寻求帮助。点解呢个咁重要？第一，我哋从圣经睇出，由长老嚟处理严重过犯呢个安排系嚟自耶和华嘅。（雅各书5:14-16）第二，向长老求助可以使悔改嘅人重新得到上帝嘅悦纳，避免再次犯错。（加拉太书6:1；希伯来书12:11）第三，长老被委任同受到培训去安慰悔改嘅人，帮助佢哋减轻痛苦同罪咎感。耶和华称呢啲长老为“避暴雨之处［或译：庇护所］”。（以赛亚书32:1,2；英语《新世界译本》脚注）耶和华通过呢个安排向我哋表现慈悲。

⁹ 上帝嘅好多忠仆喺寻求同接受咗长老嘅帮助之后，都觉得如释重负。例如，一个叫丹尼尔嘅弟兄犯咗严重嘅罪，隔咗几个月都冇向长老寻求帮助。佢承认：“件事都已经过咗咁耐，我觉得长老都帮唔到我乜嘢。但系我又成日担心，几时要承担自己犯错所带嚟嘅后果。每次向耶和华祷告，我都要先为自己嘅过犯向耶和华道歉。”最后，丹尼尔决定向长老求助。佢谂翻转头话：“讲真，我去见佢哋嗰时好紧张。但系，之后我觉得成个人都轻松晒，唔使再俾啲重担压住。而家，我可以放心向耶和华坦然倾诉。”丹尼尔终于有一个清白嘅良心，而佢最近亦都受委任成为助理仆人。

“要逃到呢啲城嘅其中一座”

10．一个误杀者需要采取乜嘢行动先可以得到慈悲？

¹⁰ 一个误杀者需要采取行动先可以得到慈悲。佢要逃到最近嘅庇护城。（请读约书亚记20:4）我哋好难想象，误杀者会认为呢件事系无关重要嘅，因为佢嘅性命取决于佢有几快赶到庇护城同留喺嗰度。呢个意味到佢要作出一啲牺牲。佢要放弃以往嘅工作、离开舒适嘅屋企，亦都失去来往各地嘅自由，直到大祭司去世为止。a（民数记35:25）不过，呢啲牺牲系好值得嘅。如果误杀者要离开庇护城，就表明佢无视受害者嘅生命，而佢自己嘅生命亦都会受到威胁。

11．一个悔改嘅基督徒需要采取乜嘢行动嚟表明佢冇辜负上帝嘅慈悲？

¹¹ 今日，如果悔改嘅人想得到上帝嘅宽恕，同样都需要采取行动。佢要痛改前非，唔单止要远离严重嘅罪，亦都要避免任何不洁嘅行为。喺圣灵启示下，使徒保罗谈及哥林多悔改嘅基督徒所做嘅事，佢话：“你哋出于敬神嘅态度而伤心，呢件事激励你哋显出几咁大嘅热诚！你哋努力辩白，大发义愤、敬畏、渴望、热心，除掉污名！”（哥林多后书7:10,11）决心离弃恶行就系向耶和华表明我哋对佢嘅爱唔系无动于衷嘅，冇将佢嘅慈悲视为理所当然。

12．一个基督徒想继续得到上帝嘅慈悲，就可能需要放弃乜嘢？

¹² 如果一个基督徒想继续得到上帝嘅慈悲，佢可能需要放弃乜嘢？如果一样嘢会使佢犯罪，无论佢几咁钟意呢样嘢，都要下定决心随时放弃。（马太福音18:8,9）如果有啲朋友怂恿你做耶和华唔钟意嘅事，你会唔会同佢哋断绝关系？如果你喺饮酒方面觉得好难保持平衡，你会唔会避开使你过度饮酒嘅场合？如果你觉得好难控制性不道德嘅欲望，你会唔会避开任何可能挑起你不洁欲望嘅电影、网站或者活动？要记住，为咗服从耶和华嘅律法而付出嘅任何牺牲都系值得嘅。最痛苦嘅事莫过于耶和华离弃我哋，相反，最令人满足嘅就系感受到耶和华“永恒嘅忠贞之爱”。（以赛亚书54:7,8）

“呢啲城要庇护你哋”

13．点解一个误杀者喺庇护城里面会感到安全同快乐？

¹³ 误杀者一入到庇护城就可以得到保护。耶和华话：“呢啲城要庇护你哋”。（约书亚记20:2,3）耶和华冇要求误杀者喺同一个案件上再次受到审判，亦都唔容许报血仇嘅人入城夺取误杀者嘅性命。误杀者唔使再担心遭受报复。喺城里面，佢会得到耶和华嘅保护，感到非常安全。呢个唔系一个庇护嘅监狱。佢喺里面可以工作、帮助其他人，同埋安心噉事奉耶和华。佢可以过又快乐又满足嘅生活！

14．一个悔改嘅基督徒可以确信乜嘢？

¹⁴ 上帝嘅一啲子民曾经犯咗严重嘅罪，悔改之后仍然俾罪咎感“韫住”，甚至觉得耶和华会因为佢哋所犯嘅罪而永远将佢哋视为不洁。如果你有同样嘅感受，请你紧记，耶和华会彻底宽恕你，所以你唔需要再感到内疚。上文提到嘅丹尼尔就体会到呢一点。佢得到长老嘅纠正同帮助之后，再次恢复清白嘅良心，佢话：“我终于可以松一口气喇。事情被适当处理之后，我唔再觉得内疚。罪一旦被宽恕咗就真系冇咗。就好似耶和华所讲嘅，佢会使你嘅过犯离你好远，远到你永远都见唔到。”喺庇护城里面，误杀者唔使再担心遭受报复。同样，一旦耶和华宽恕咗我哋嘅罪，我哋就唔使担心耶和华会揾理由翻旧账，喺同一件事上再次审判我哋。（请读诗篇103:8-12）

15,16．知道耶稣系救赎主又系大祭司，点样使你确信耶和华会向你表现慈悲？

¹⁵ 其实，我哋比以色列人有更大嘅理由要对耶和华嘅慈悲有信心。当保罗唔能够完全服从耶和华而感到痛苦嘅时候，佢感叹话：“感谢上帝通过我哋嘅主耶稣基督救咗我！”（罗马书7:25）一方面，保罗要同错误嘅欲望搏斗；另一方面，虽然保罗已经为过往嘅罪而衷心悔改，佢依然受到罪咎感所困扰。不过，佢确信耶和华已经通过耶稣嘅牺牲宽恕咗佢。作为我哋嘅救赎主，耶稣使我哋有清白嘅良心，内心得享安宁。（希伯来书9:13,14）而作为我哋嘅大祭司，“凡通过佢亲近上帝嘅人，佢都能够拯救到底，因为佢永远活着，能够为佢哋代求。”（希伯来书7:24,25）如果大祭司嘅角色系要确保以色列人嘅罪得蒙宽恕，噉我哋嘅大祭司耶稣就更加能够使我哋“可以蒙慈悲，获得分外恩典，作为合时嘅帮助”。（希伯来书4:15,16）

¹⁶ 如果想得到耶和华嘅庇护，我哋就要对耶稣嘅牺牲有信心。唔好觉得赎价只系为全人类付出嘅。相反，要相信赎价能够造益你；（加拉太书2:20,21）要相信上帝会通过赎价宽恕你嘅罪；要相信因为有赎价，所以你有永生嘅希望。耶稣嘅牺牲就系耶和华俾你嘅礼物。

17．点解你想向耶和华寻求庇护？

¹⁷ 庇护城反映出耶和华嘅慈悲。通过呢个安排，我哋睇出耶和华好重视生命，长老会点样帮助我哋，一个真正悔改嘅人需要采取乜嘢实际嘅行动，同埋点解我哋可以完全相信耶和华会宽恕人。你有冇向耶和华寻求庇护？喺佢嘅庇护之下，我哋先会感受到真正嘅安全！（诗篇91:1,2）下一篇课文会继续讨论同庇护城有关嘅安排，同埋我哋可以点样效法完美噉表现公正同慈悲嘅耶和华。

1,2．（甲）耶稣对上帝嘅律法有乜嘢感觉？（乙）抄经士同法利赛派点样歪曲律法？

耶稣喜爱摩西律法。对于呢一点，我哋唔会觉得意外，因为律法系嚟自耶稣一生当中最重要嘅嗰一位——天父耶和华。诗篇40:8嘅预言表明耶稣深爱上帝嘅律法，经文话：“我嘅上帝啊，我乐于遵行你嘅旨意，你嘅律法喺我内心深处。”耶稣通过言行向人证明上帝嘅律法系完美嘅，对人有益，而且全部都会实现。（马太福音5:17-19）

² 当耶稣睇见抄经士同法利赛派歪曲天父嘅律法，佢一定好痛心！佢哋净系顾住墨守律法嘅一啲细节，所以耶稣话：“你哋将薄荷、莳萝、大茴香，交纳十分之一”。呢个有乜嘢问题？耶稣跟住话：“律法上更重要嘅事，就系公正、慈悲、忠信，［你哋］反而就漠视。”（马太福音23:23）耶稣唔似嗰啲法利赛派嘅人自以为义。佢明白律法背后嘅精神，知道每一条诫命都反映出上帝嘅特质。

3．呢篇课文会讨论乜嘢问题？

³ 今日，基督徒唔需要遵守摩西律法。（罗马书7:6）但系，耶和华将律法保存喺佢嘅话语圣经里面。佢唔想我哋过度关注律法嘅细节，而系希望我哋辨明同实践“更重要嘅事”，就系诫命背后嘅原则。例如，有关庇护城嘅安排，我哋可以睇出乜嘢原则？喺上一篇课文，我哋了解到误杀者需要采取嘅步骤。喺呢篇课文，我哋可以通过庇护城嘅安排更加认识耶和华，亦都学到点样效法佢嘅特质。课文会回答三个问题：庇护城嘅安排点样反映耶和华嘅慈悲？呢个安排点样帮助我哋更清楚了解耶和华对生命嘅睇法？庇护城嘅安排点样反映出耶和华完美嘅公正？请留意，我哋可以点样喺呢三方面效法天父。（请读以弗所书5:1）

“要拣几座位置适中嘅城”——慈悲嘅表现

4,5．（甲）点解庇护城要位置适中，方便到达？（乙）我哋从中睇出耶和华系点样嘅上帝？

⁴ 呢六座庇护城位置适中，方便到达。耶和华吩咐以色列人将呢啲城平均分配喺约旦河两边，目的系使误杀者可以快速、容易寻得庇护。（民数记35:11-14）通往庇护城嘅道路畅顺，维修妥当。（申命记19:3）按照犹太人嘅传统，路上会有一啲指示牌，帮助误杀者逃到就近嘅庇护城。既然附近有庇护城，误杀者就唔使被迫逃去异地，而受异地嘅错误宗教影响。

⁵ 请谂吓：耶和华会将故意杀人嘅罪犯判处死刑，但系佢亦都俾误杀者有机会得到慈悲同保护。一个评论家写道：“上帝所设立嘅安排清晰、简单、易明，呢个就系上帝嘅仁慈之道。”耶和华唔系一个无情嘅审判官，随意惩罚佢嘅子民。相反，佢系“充满慈悲嘅”。（以弗所书2:4）

6．点解法利赛派嘅态度同上帝嘅慈悲有天渊之别？

⁶ 相比之下，法利赛派就对人非常苛刻。例如，一个人犯咗同样嘅错超过三次，按照惯例，法利赛派嘅人就唔会再宽恕佢。耶稣用咗一个比喻嚟指出佢哋错误嘅态度。喺比喻里面一个法利赛派嘅人祷告话：“上帝啊，我感谢你，我唔似其他人，敲诈、不义、通奸，亦都唔似呢个收税人。”其实，呢个收税人正喺度好谦卑噉祈求上帝对佢表现慈悲。点解法利赛派唔愿意对人表现慈悲？圣经话佢哋“睇唔起人”。（路加福音18:9-14）

7,8．（甲）如果有人得罪咗你，你可以点样效法耶和华？（乙）点解宽恕人会考验到我哋嘅谦卑？

⁷ 要效法耶和华，而唔系法利赛派嘅人。要表现慈悲同怜恤。（请读歌罗西书3:13）一个做法就系，尽量令人觉得向我哋道歉唔系一件难事。（路加福音17:3,4）可以问吓自己：“如果有人多次得罪我，我会唔会乐意宽恕佢？对于一啲伤害咗我嘅人，我会唔会渴望同佢和好如初？”

⁸ 宽恕人真系会考验到我哋嘅谦卑。法利赛派嘅人完全冇表现谦卑，因为佢哋觉得自己高人一等。但系作为基督徒，我哋要谦卑，“认为其他人比自己优越”，乐于宽恕佢哋。（腓立比书2:3）你会唔会效法耶和华表现谦卑？就好似以色列人要维修好通往庇护城嘅路一样，我哋亦都要使自己嘅宽恕之“道”畅通无阻。要敏于表现慈悲，唔好轻易发嬲。（传道书7:8,9）

尊重生命，“免得……承担血债”

9．耶和华点样向以色列人强调，生命系神圣嘅？

⁹ 设立庇护城嘅一个重要目的系，要保护以色列人避免承担血债。（申命记19:10）耶和华喜爱生命，憎恨 “使无辜人丧命流血嘅手”。（箴言6:16,17）上帝系公正同圣洁嘅，就算系误杀嘅案件，佢都唔会忽视。虽然耶和华对误杀者表现慈悲，但系误杀者都要将案件交俾长老处理。如果案件被判为误杀，佢就要留喺庇护城直到大祭司去世。即系话，佢可能要一生都留喺嗰度。耶和华通过呢个安排向以色列人强调，生命系神圣嘅。为咗尊重赐人生命嘅上帝，佢哋要尽力避免任何可能会危害他人性命嘅行为。

10．根据耶稣所讲嘅，点解话抄经士同法利赛派一啲都唔重视生命？

¹⁰ 抄经士同法利赛派嘅睇法同耶和华完全相反，佢哋一啲都唔重视生命。点解？耶稣话佢哋：“你哋攞走咗知识嘅锁匙，自己唔入去，连正入紧去嘅人，你哋都阻止！”（路加福音11:52）佢哋本来应该向人清楚解释上帝话语嘅意思，帮助人行走永生嘅道路。但系，佢哋反而使人离弃“领人得生命嘅领袖”耶稣，令人走上一条导致永远灭亡嘅道路。（使徒行传3:15）抄经士同法利赛派嘅人又高傲又自私，佢哋一啲都唔重视同胞嘅生命同利益。佢哋真系好残忍，好无情！

11．（甲）使徒保罗点样表明佢对生命嘅睇法同上帝一致？（乙）喺传道方面，乜嘢可以帮助我哋怀有保罗嘅态度？

¹¹ 我哋可以点样效法耶和华嘅榜样，同时尽力避免抄经士同法利赛派嘅态度？要尊重同珍视我哋宝贵嘅生命。使徒保罗向人彻底作见证，表明佢真系重视生命。结果，佢可以话：“我……冇欠边个嘅血债。”（请读使徒行传20:26,27）不过，保罗传道并唔系出于责任感或者罪咎感。相反，佢好爱人，好珍视每个人嘅生命。（哥林多前书9:19-23）同样，我哋对生命嘅睇法都要同上帝一致。耶和华“只愿人人最终都悔改”。（彼得后书3:9）噉你呢？你可能睇出如果你培养慈悲，就会受到推动更加热心传道，内心亦都充满喜乐。

12．对上帝嘅子民嚟讲，安全点解咁重要？

¹² 如果我哋想好似耶和华一样重视生命，就需要对安全培养正确嘅态度。喺开车或者工作嘅时候，包括喺建筑、维修、来往聚会所嗰阵，都要注意安全。唔好将工作效率、经济效益，或者时间限期睇得比安全同健康更重要。我哋公正嘅上帝所做嘅一切都系适当平衡嘅。我哋好想效法佢。长老特别需要尽力留意自己同身边嘅人嘅安全。（箴言22:3）如果长老提醒你要留意安全条例同标准，就要接受劝告。（加拉太书6:1）喺看待生命方面，要同耶和华有同样嘅睇法，“免得……承担血债”。

“要按以上审判嘅条例……作出判决”

13,14．以色列嘅长老点样反映出耶和华嘅公正？

¹³ 耶和华要求以色列嘅长老效法佢嘅公正。首先，长老要了解事情嘅真相。跟住，佢哋要仔细衡量杀人犯嘅动机、态度同以往嘅行为，先至决定向唔向佢表现慈悲。为咗反映上帝嘅公正，佢哋需要判断杀人犯有冇“怀住仇恨”或者“心怀恶意”。（请读民数记35:20-24）如果有证人出嚟作证，噉最少要有两个证人嘅指控先可以裁定一个人系咪蓄意谋杀。（民数记35:30）

¹⁴ 了解事情嘅真相之后，长老除咗要考虑佢所犯嘅错，仲要留意佢嘅为人。佢哋需要有洞悉力，考虑事情背后嘅原因，而唔系只睇表面。更重要嘅系，佢哋需要圣灵嘅帮助去反映出耶和华嘅慈悲、公正以及洞悉力。（出埃及记34:6,7）

15．喺看待罪人方面，耶稣同法利赛派有乜嘢唔同嘅睇法？

¹⁵ 法利赛派嘅人只系留意一个人所犯嘅罪，而冇考虑佢真正嘅为人。佢哋见到耶稣去马太屋企参加筵席，就问耶稣嘅门徒：“点解你哋嘅老师同收税人、罪人一齐食饭呢？”耶稣回答话：“健康嘅人唔需要医生，有病嘅人先需要。‘我要嘅系慈悲，唔系祭牲。’你哋去学吓呢句话嘅含意啦。我嚟唔系要召义人，而系要召罪人。”（马太福音9:9-13）耶稣系咪帮嗰啲有罪嘅人揾借口？绝对唔系。事实上，耶稣通过佢传讲嘅信息叫嗰啲有罪嘅人悔改。（马太福音4:17）耶稣留意到至少有一啲“收税人同罪人”想作出改变。佢哋去马太屋企嘅目的唔系只系去食饭，而系因为“佢哋有好多人都跟随耶稣”。（马可福音2:15）可惜嘅系，喺对待人方面，大多数法利赛派嘅人同耶稣嘅睇法好唔一样。虽然法利赛派嘅人声称佢哋崇拜慈悲又公正嘅上帝，但系佢哋冇用上帝嘅观点去看待人，甚至认为平民百姓都系无药可救嘅罪人。

16．司法委员会嘅长老需要谨慎判断乜嘢事？

¹⁶ 今日，长老都要效法“喜爱公正”嘅耶和华。（诗篇37:28）首先，佢哋需要“调查、彻底追问”，确定一个人有冇犯咗严重嘅罪。如果有，佢哋就要按照圣经嘅指引去处理案件。（申命记13:12-14）司法委员会嘅长老要谨慎判断一个有严重过犯嘅基督徒系咪真心悔改。有时，真心悔改唔系咁容易睇得出，因为呢个牵涉到一个人嘅观点、态度同内心状况。（启示录3:3）如果一个犯咗罪嘅人想得到慈悲，就一定要真心悔改。a

17,18．长老可以点样判断一个人系咪真心悔改？（请睇吓课文开头嘅图片）

¹⁷ 长老同耶和华、耶稣唔一样，唔知道人内心嘅谂法。如果你系一个长老，可以点样判断一个人系咪真心悔改呢？首先，祷告祈求耶和华赐你智慧同辨识力。（列王纪上3:9）其次，查考圣经同忠信奴隶出版嘅书刊，可以帮助你睇出真诚悔改嘅人系“出于敬神嘅态度而伤心”，而唔系“为咗世俗嘅因素而伤心”。（哥林多后书7:10,11）要留意经文点样描述悔改同唔悔改嘅人，亦都要根据经文分析佢哋嘅感受、态度同行为。

¹⁸ 最后要全面睇吓犯过者，谂吓佢嘅背景、动机同情况。关于会众嘅元首耶稣，圣经预告：“佢行审判唔会单凭眼见，责备人亦唔系只凭耳闻。佢按正义审判卑微嘅人，凭正直纠正地上谦和嘅人。”（以赛亚书11:3,4）耶稣委派长老去照顾会众，亦都帮助长老以公正同慈悲施行审判。（马太福音18:18-20）我哋真系好感激仁慈嘅长老咁关心我哋，努力喺表现慈悲同公正方面立下榜样！

19．你从庇护城嘅安排学到乜嘢？你想点样将学到嘅实践出嚟？

¹⁹ 摩西律法反映出“知识同真理嘅纲领”，帮助我哋了解耶和华同佢嘅正义原则。（罗马书2:20）例如，长老可以从庇护城嘅安排学到，点样“按事实秉公审判人”；我哋可以从中学到点样 “以忠贞之爱同慈悲彼此相待”。（撒迦利亚书7:9）我哋唔需要遵守摩西律法，但系耶和华从来冇改变，对佢嚟讲，公正同仁慈依然系好重要嘅。耶和华按照佢嘅形像创造我哋，使我哋可以效法佢嘅特质，向佢寻求庇护。可以事奉咁公正慈悲嘅上帝，真系莫大嘅殊荣！