1．圣经通常点样提及管教？

当你听到“管教”呢个词，会谂到乜嘢？或者你马上谂到嘅系惩罚，但管教其实仲包括其他方面。圣经通常用正面嘅口吻提及管教，多次将管教同知识、智慧、爱心、生命联系埋一齐。（箴言1:2-7；4:11-13）耶和华管教我哋，系因为佢爱我哋，希望我哋得到永远嘅生命。（希伯来书12:6）虽然佢有时会惩罚人，但系佢永远都唔会用残忍嘅方式管教人。冇错，“管教”呢个词主要同教导有关，就好似父母教育自己心爱嘅儿女一样。

2,3．点解话管教包括教导同惩罚？（请睇吓课文开头嘅图片）

² 请谂吓以下嘅例子：明仔喺屋企入面玩足球。佢妈妈同佢讲：“明仔，唔好喺屋企玩足球！好容易会打烂嘢㗎。”明仔唔听妈妈话，继续玩，结果真系打烂咗个花樽。妈妈点样管教佢呢？妈妈同佢解释点解佢做错咗，亦都使佢知道服从父母系有益处嘅，而且父母所定嘅规矩系必要同合理嘅。为咗帮助明仔吸取教训，妈妈觉得需要适当噉惩罚佢，于是没收足球一段时间。明仔肯定唔开心，不过噉样做可以使佢记住，唔听父母话就要承担后果。

³ 身为基督徒，我哋系上帝大家庭嘅一分子。（提摩太前书3:15）耶和华系我哋嘅天父，佢有权定立是非标准。我哋违反佢标准嘅时候，佢会怀住爱心管教我哋。如果我哋做错事而招致恶果，耶和华嘅管教就会帮助我哋明白，听从天父有几咁重要。（加拉太书6:7）耶和华深爱我哋，唔希望我哋受苦。（彼得前书5:6,7）

4．（甲）耶和华希望我哋点样训练圣经学生？（乙）呢篇课文会讨论乜嘢？

⁴ 我哋运用圣经管教儿女或者教导圣经学生，可以帮助佢哋符合资格，成为基督嘅门徒。上帝嘅话语系我哋教导人嘅主要工具，使我哋能够“按正义施行管教”，可以帮助儿女或者圣经学生明白同遵守耶稣吩咐我哋嘅一切。（提摩太后书3:16；马太福音28:19,20）耶和华希望我哋用呢种方式嚟训练圣经学生，使佢哋都可以帮助其他人成为基督嘅门徒。（请读提多书2:11-14）呢篇课文会讨论三个重要问题：（1）上帝嘅管教点样反映出佢对我哋嘅爱？（2）我哋从耶和华管教过嘅人身上可以学到乜嘢？（3）我哋施行管教嘅时候，可以点样效法耶和华同耶稣？

上帝凭爱心施行管教

5．我哋从边啲方面可以睇出，管教反映耶和华对我哋嘅爱？

⁵ 耶和华爱我哋，所以佢纠正、教导同训练我哋，使我哋可以留喺佢嘅爱里面，继续行走永生之道。（约翰一书4:16）佢从来都唔会贬低或者侮辱我哋，使我哋觉得自己冇咩价值。（箴言12:18）相反，耶和华留意我哋好嘅特质，俾我哋自由选择嘅权利。我哋通过圣经、圣经书刊、基督徒父母或者会众长老所得到嘅管教，点样证明上帝爱我哋？例如，我哋唔小心“失足”嗰阵，长老会以仁慈温和嘅方式纠正我哋。佢哋嘅做法正系反映出耶和华对我哋嘅爱。（加拉太书6:1）

6．一个人因为受到管教而失去服务机会，呢个点样反映出耶和华嘅爱？

⁶ 有时，管教唔只系提出劝告咁简单。如果一个人犯咗严重嘅罪，佢就会失去喺会众服务嘅机会。呢种管教系耶和华爱佢嘅表现。管教可能帮助佢睇出，需要多啲做个人研读、沉思同祷告。噉样做，佢就可以强化自己同耶和华嘅关系。（诗篇19:7）一段时间之后，佢可能会重新得到服务机会。开除嘅安排亦都反映出耶和华嘅爱，因为呢个安排可以使会众避免受到不良影响。（哥林多前书5:6,7,11）另外，上帝施行嘅管教系适度嘅，可以帮助犯过者知道自己嘅罪有几严重，推动佢真心悔改。（使徒行传3:19）

从耶和华嘅管教得益

7．舍伯那系边个？佢有乜嘢唔好嘅品格？

⁷ 为咗明白管教嘅价值，我哋会睇吓两个受过耶和华管教嘅人嘅例子：生活喺希西家王时期嘅舍伯那，以及现代一位叫格雷姆嘅弟兄。舍伯那系“王宫嘅管家”，拥有好大嘅权力。（以赛亚书22:15）好可惜，佢变得骄傲自大，追求个人荣耀。佢甚至为自己建造奢华嘅墓穴，出入乘坐“华丽嘅马车”！（以赛亚书22:16-18）

8．耶和华点样管教舍伯那？结果点样？

⁸ 舍伯那追求个人荣耀，所以耶和华革除佢嘅官职，委任以利亚敬取代佢。（以赛亚书22:19-21）呢件事发生喺亚述王西拿基立准备攻打耶路撒冷嘅时候。后来，亚述王派高官率领一支大军去耶路撒冷，试图通过恐吓使犹太人同希西家投降。（列王纪下18:17-25）希西家派以利亚敬同另外两个人去见亚述高官。其中一个陪同嘅人就系舍伯那，佢当时系书记。睇嚟，舍伯那并冇因为受到管教而怨恨不满，反而愿意谦卑噉接受较低嘅职位。我哋从呢个记载可以学到乜嘢？请睇吓以下三个方面。

9-11．（甲）我哋从舍伯那嘅事例学到乜嘢？（乙）我哋施行管教嘅时候，可以点样效法耶和华？

⁹ 第一，舍伯那失去咗佢嘅职位，呢个提醒我哋，“骄傲自大系失败嘅先声，心高气傲系绊倒嘅前因”。（箴言16:18）如果你喺会众负有职责，而且受人尊敬，你会唔会努力保持谦卑？无论自己有点样嘅才干或者成就，你会唔会将功劳归俾耶和华？（哥林多前书4:7）使徒保罗劝勉我哋“唔好自视过高”，而要“务求思想健全”。（罗马书12:3）

¹⁰ 第二，耶和华严厉责备舍伯那，表明佢相信舍伯那愿意接受纠正。（箴言3:11,12）嗰啲喺会众失去职责嘅人可以从中吸取教训。与其愤愤不平，不如尽力事奉耶和华，将管教视为佢对自己所表现嘅爱。请记住，耶和华最终会奖赏嗰啲保持谦卑嘅人。（请读彼得前书5:6,7）如果我哋心里谦卑就可以成为柔软嘅陶泥，噉耶和华就会通过仁爱嘅管教嚟塑造我哋。

¹¹ 第三，我哋从耶和华管教舍伯那嘅方式学到宝贵嘅一课。我哋从耶和华嘅管教睇出，虽然佢憎恨恶事，但佢亦都关爱犯过嘅人，留意人嘅优点。如果你系基督徒父母或者长老，你愿唔愿意效法耶和华，用佢嘅方式嚟施行管教？（犹大书22,23）

12-14．（甲）有啲人对上帝嘅管教有乜嘢反应？（乙）上帝嘅话语点样改变一个弟兄嘅态度？结果点样？

¹² 好可惜，有啲人对自己受到嘅管教一直耿耿于怀，甚至离开上帝同会众。（希伯来书3:12,13）噉系咪话，呢啲人无药可救？请睇吓格雷姆嘅经历。格雷姆曾经被开除，后来重新被会众接纳，之后又停止参加聚会同传道。过咗几年，佢请一位友善嘅长老同佢讨论圣经。

¹³ 呢位长老回忆话：“格雷姆当时嘅问题系高傲。佢经常批评嗰啲决定开除佢嘅长老。所以之后嘅几次学习，我哋都讨论同高傲有关嘅经文。上帝嘅话语好似一块镜噉，帮助格雷姆睇清楚自己。佢觉得自己真系做得好唔啱！结果好奇妙！佢承认自己俾高傲呢条‘梁木’蒙蔽咗，而好批评嘅态度就系佢嘅问题。之后，佢好快就作出改变。佢开始经常参加基督徒聚会，热心研读上帝嘅话语，而且每日坚持祷告。佢亦都负起家主嘅属灵责任，令太太同三个女都觉得好欣慰。（路加福音6:41,42；雅各书1:23-25）

¹⁴ 呢位长老继续话：“有一日，格雷姆讲咗啲令我好感动嘅话。佢话：‘我认识真理好多年，亦都做过先驱，不过而家我先可以真正噉话，我爱耶和华。’冇几耐，佢受委派喺聚会期间负责传递麦克风，佢好珍惜呢个殊荣。我从佢嘅经历睇出，如果人谦卑噉接受耶和华嘅管教，就会得到源源不断嘅福分！”

施行管教嘅时候效法上帝同基督

15．如果想其他人接受我哋嘅劝告，我哋就要点做？

¹⁵ 想做个好老师，首先就要做个好学生。（提摩太前书4:15,16）同样，如果耶和华通过你去管教其他人，你就要保持谦卑，并接受耶和华嘅指引。其他人见到你表现谦卑，就会更加尊重你，亦都更容易接受你提出嘅劝告。我哋可以从耶稣嘅榜样学习。

16．耶稣点样施行有效嘅管教同教导？

¹⁶ 就算喺困难嘅情况下，耶稣都依然服从天父。（马太福音26:39）佢向人表明，自己嘅智慧同教导都系嚟自天父嘅。（约翰福音5:19,30）佢谦卑同服从嘅态度使人乐意亲近佢，亦都帮助佢成为一个仁慈体贴嘅导师。（请读马太福音11:29）耶稣用仁慈嘅言语鼓励嗰啲灰心软弱嘅人。（马太福音12:20）甚至佢嘅使徒表现出自私同野心勃勃嘅精神嗰阵，佢都仁慈温和噉纠正佢哋。（马可福音9:33-37；路加福音22:24-27）

17．长老要牧养好上帝嘅羊群，就需要点样做？

¹⁷ 每当长老运用圣经原则施行管教，都需要效法基督嘅榜样。佢哋噉样做就表明自己希望得到上帝同基督嘅塑造。使徒彼得话：“务要牧养上帝嘅羊群，就系佢交俾你哋照顾嘅，唔系出于勉强，而系出于乐意；唔系因为贪爱唔正当嘅利益，而系出于热诚；亦都唔系辖制身为上帝产业嘅人，而系做羊群嘅榜样。”（彼得前书5:2-4）冇错，长老喜乐噉服从上帝同基督，就可以使自己同埋自己所照顾嘅绵羊得益。（以赛亚书32:1,2,17,18）

18．（甲）耶和华吩咐父母点样做？（乙）耶和华点样帮助父母履行佢哋嘅责任？

¹⁸ 同样嘅原则都适用于家庭。耶和华同家主讲：“唔好激怒儿女，只要照耶和华嘅意思管教佢哋，纠正佢哋嘅思想，将佢哋抚养成人。”（以弗所书6:4）呢个责任有几重要？箴言19:18 话：“趁仲有希望就要管教儿子，噉你就不致因佢嘅死而负上责任。”耶和华将管教儿女嘅责任交俾父母，如果佢哋冇好好管教儿女，就系失职！（撒母耳记上3:12-14）父母通过祷告寻求耶和华嘅帮助，又信赖圣经同圣灵嘅指引，耶和华就一定会赐父母所需嘅智慧同力量。（请读雅各书1:5）

团结和睦，得享永生

19,20．（甲）接受上帝嘅管教为我哋带嚟乜嘢福分？（乙）下一篇课文会讨论乜嘢？

¹⁹ 如果我哋接受上帝嘅管教，亦都学习耶和华同耶稣施行管教嘅方式，就会得到数之不尽嘅福分！家庭同会众充满和睦嘅气氛。每个成员都感受到爱、关怀同安舒。而将来，我哋喺新世界得享嘅福分会远远超过而家所享有嘅。（诗篇72:7）耶和华嘅管教帮助我哋做好准备，学识点样喺天父嘅大家庭里面，同其他人一齐团结和睦噉享受永远嘅生命。（请读以赛亚书11:9）如果我哋谨记呢点就会明白，管教的确系耶和华向我哋表现爱心嘅一种美妙方式。

²⁰ 下一篇课文会分析点样喺家庭同会众施行管教，亦都会讨论我哋点样自我约束，同埋点样避免一啲比管教更令人痛苦嘅事。

1．我哋可以点样得到智慧？智慧点样帮助我哋？

耶和华系智慧嘅源头，佢慷慨噉赐智慧俾人。雅各书1:5话：“上帝慷慨赐百物俾所有人，而且唔责难人，所以你哋边个缺乏智慧，就应该不断祈求上帝”。接受上帝嘅管教，就系我哋得到上帝智慧嘅一个方法。上帝嘅智慧可以保护我哋，使我哋喺道德同属灵上免受伤害。（箴言2:10-12）噉样嘅话，我哋就“可以常在上帝嘅爱里……指望得享永生”。（犹大书21）

2．我哋可以点样对上帝嘅管教培养感激之心？

² 因为受唔完美嘅身心、成长背景同其他因素影响，我哋有时好难接受或者以正确嘅观点看待管教。不过，当我哋体验到上帝嘅管教所带嚟嘅益处，就会明白上帝有几咁爱我哋。箴言3:11,12话：“我儿啊，耶和华嘅管教你唔好拒绝，……因为耶和华责备佢所爱嘅人”。冇错，我哋可以确信耶和华所做嘅都系为咗我哋嘅益处着想。（请读希伯来书12:5-11）因为上帝好了解我哋，佢嘅管教总系适当嘅，而且正系我哋需要嘅。呢篇课文会分析四方面嘅管教：（1）自律，（2）父母嘅管教，（3）会众嘅管教，（4）比管教更令人痛苦嘅事。

自律就系有智慧

3．父母点样帮助儿女培养自律？请举例。

³ 自律或者自我约束嘅意思包括，为咗改善自己嘅行为同思想而加以克制自己。我哋唔系天生就识得自我约束，而系需要学习嘅。试谂吓，一个小朋友啱啱开始学踩单车嘅时候，父母会喺旁边扶住。不过，小朋友慢慢识得点样保持平衡之后，父母就会试吓放手。等到小朋友已经学识点样踩，父母就会完全放手。同样，父母“照耶和华嘅意思”不断耐心噉训练同管教儿女，就系帮助儿女培养自律同智慧。（以弗所书6:4）

4,5．（甲）点解自律系“新品格”嘅一个重要部分？（乙）点解我哋就算“跌倒七次”都唔应该放弃？

⁴ 同样嘅原则都适用于嗰啲想亲近耶和华嘅成年人。一个新近受浸嘅基督徒可能喺某程度上能够表现自律，但系佢灵性仲未成熟。佢开始穿上“新品格”，努力效法基督，就会变得更加成熟。（以弗所书4:23,24）自律系“新品格”嘅一个重要部分，可以帮助我哋学识“摒弃唔敬虔嘅心同世俗嘅欲望，喺现行嘅制度本住健全嘅思想、正义、敬虔而活”。（提多书2:12）

⁵ 我哋所有人都有犯罪嘅倾向。（传道书7:20）如果我哋做错事，噉系咪话我哋自律能力不足或者根本唔能够自律呢？唔一定。箴言24:16话：“义人跌倒七次，都必起嚟”。乜嘢可以帮助我哋重新企起嚟？唔系靠个人嘅意志力，而系倚靠上帝嘅圣灵。（请读腓立比书4:13）圣灵嘅果实包括自制呢种同自律相似嘅特质。

6．喺研读圣经方面，我哋可以点样做得更好？（请睇吓课文开头嘅图片）

⁶ 恳切祷告、研读圣经同埋沉思亦都可以帮助我哋培养自律。但系，如果你觉得学习圣经唔容易，或者唔钟意研读圣经，可以点做呢？唔好灰心。只要你愿意接受耶和华嘅帮助，佢就会帮你对佢嘅话语“养成切望之心”。（彼得前书2:2）首先，要向耶和华祷告，恳求佢帮助你表现自律，学习佢嘅话语。然后，要采取同祷告一致嘅行动。可能一开始嗰时，每次嘅研读时间唔需要好长。慢慢，研读对你嚟讲就唔再系一件咁难嘅事，而且你仲可以乐在其中！你会发现，安静噉沉思耶和华嘅宝贵思想其实系一种享受。（提摩太前书4:15）

7．自律点样帮助我哋达成属灵目标？

⁷ 自律可以帮助我哋达成属灵目标。一个弟兄发觉自己喺属灵方面冇以前咁热心，于是定立做正规先驱嘅目标。佢点样表现自律，并从中得益？佢研读同先驱有关嘅文章，而且为自己嘅目标祷告。噉样做强化咗佢嘅灵性，使佢更加渴望做先驱。情况允许嘅时候，佢就报名做辅助先驱。结果点样呢？佢冇俾任何事妨碍自己，始终将目光集中喺自己嘅属灵目标之上。过咗一段时间，佢终于成为一个正规先驱。

照耶和华嘅意思管教儿女

8-10．乜嘢帮助基督徒父母教导儿女事奉耶和华？请举例。

⁸ 基督徒父母有一个宝贵嘅殊荣，就系“照耶和华嘅意思管教”儿女，将佢哋抚养成人。（以弗所书6:4）喺今日嘅世界，呢个的确唔容易。（提摩太后书3:1-5）当然，儿女唔系一出世就识得分辨是非对错。所以，父母都需要教导同管教儿女，训练佢哋嘅良心。（罗马书2:14,15）一位圣经学者解释，译作“管教”嘅希腊语词嘅意思亦都包括“培育儿女”，即系帮助儿女成为有责任感嘅人。

⁹ 如果父母怀住爱心管教儿女，儿女就会有安全感。佢哋会明白，自由唔等于完全冇限制，自己所做嘅事会带嚟唔同嘅结果。所以，基督徒父母运用耶和华嘅智慧嚟养育儿女非常重要。唔同文化背景嘅人会用唔同嘅方法嚟教导儿女，或者佢哋嘅教导方式会随住时代而改变。不过，如果父母听从上帝嘅智慧，就唔需要只系靠自己嘅聪明或者经验。

¹⁰ 我哋可以学习挪亚嘅榜样。耶和华吩咐挪亚建造方舟嗰阵，挪亚根本唔可能倚靠自己嘅经验，因为佢从来都冇建造过方舟。佢必须倚赖耶和华，“照住”耶和华嘅指引去做。（创世记6:22）结果点样？方舟使挪亚全家得救！挪亚系一个成功嘅家主，因为佢信赖耶和华嘅智慧。佢将三个仔教得好好，又为佢哋立下好榜样。喺嗰个充满邪恶嘅时代，噉样做真系一啲都唔容易。（创世记6:5）

11．父母嘅榜样喺训练儿女方面有几重要？

¹¹ 作为父母，你可以点样“照住”做呢？就系要听从耶和华。你按照上帝嘅话语同组织嘅指引去做，就系请耶和华帮助你教导儿女。噉样，好可能儿女日后会感激你。一个弟兄话：“我非常感谢父母用耶和华嘅方式嚟教导我。佢哋尽己所能打动我嘅心。我喺属灵上嘅进步，大部分都有赖于佢哋嘅努力。”虽然父母尽力教导儿女，有啲儿女仲系可能会离开耶和华。不过，只要父母尽咗自己最大嘅努力，就可以良心无愧。佢哋可以期待，儿女有朝一日会返嚟耶和华身边。

12,13．（甲）如果儿女被开除，基督徒父母可以点样表明佢哋服从上帝？（乙）一个家庭点样因为服从耶和华而得益？

¹² 儿女被开除对某啲父母嚟讲系好大嘅考验。一个姊妹嘅女被会众开除之后离开咗屋企。呢个姊妹承认：“为咗可以同自己嘅女同埋孙女喺埋一齐，我就尝试喺组织出版物入面揾漏洞。”不过，佢先生仁慈噉帮助佢睇出，佢哋已经唔需要为自己嘅女负责，只需要继续忠于耶和华。

¹³ 后来，佢哋嘅女重新被接纳为会众成员。姊妹话：“而家个女几乎日日都打电话或者发信息俾我！而且，佢深深尊重我同先生，因为佢知道我哋服从上帝。我哋一家人嘅关系非常亲密。”如果你嘅儿女被会众开除，你会唔会“全心信赖耶和华”，而唔系“依靠自己嘅聪明”？（箴言3:5,6）要记住，耶和华嘅管教反映出佢无与伦比嘅智慧同爱心。千祈唔好忘记，耶和华为我哋所有人，包括你嘅儿女，牺牲咗佢嘅爱子。上帝唔希望任何一个人遭受毁灭。（请读彼得后书3:9）所以，基督徒父母，你哋要继续信赖耶和华嘅管教同指引。即使服从会带嚟痛苦，都要听从上帝嘅管教，唔好背道而驰。

喺会众

14．耶和华通过“忠信睿智嘅管家”所提供嘅教导，点样使我哋得益？

¹⁴ 耶和华承诺会照顾、保护、同教导基督徒会众。佢通过多种方式噉样做。例如，佢委派佢嘅爱子照顾会众，而耶稣又委派“忠信睿智嘅管家”为我哋提供适时嘅属灵食物。（路加福音12:42）呢啲属灵食物以唔同嘅形式使我哋得到有价值嘅教导同管教。有冇一个演讲或者一篇文章，帮助你改变咗自己嘅思想同行为？你会为自己所作嘅调整感到开心，因为你正接受紧耶和华嘅塑造同管教。（箴言2:1-5）

15,16．（甲）我哋喺会众可以点样通过“作为恩赐”嘅长老得益？（乙）我哋可以点样使长老工作得更加喜乐？

¹⁵ 基督亦都赐下“作为恩赐”嘅长老嚟照顾会众。佢哋会仁爱噉牧养上帝嘅羊群。（以弗所书4:8,11-13）我哋可以点样从呢啲宝贵恩赐得益？我哋可以效法长老嘅信心同榜样，而且留意佢哋基于圣经嘅劝告。（请读希伯来书13:7,17）请谨记，长老好爱我哋，希望我哋喺属灵上不断成长。如果长老留意到我哋错过聚会，或者唔再热心传道，佢哋一定会尽快嚟帮助我哋。佢哋会用心听我哋讲，然后仁爱噉鼓励我哋，根据圣经向我哋提出明智嘅劝告。你有冇将呢啲帮助视为耶和华向你表达嘅爱？

¹⁶ 长老要俾我哋劝告并唔容易。你觉得，要向企图隐瞒自己严重过犯嘅大卫王提出劝告，先知拿单会有乜嘢感觉？（撒母耳记下12:1-14）彼得系十二使徒之一，佢曾经公然装假，唔同非犹太裔嘅信徒一齐食饭。你觉得使徒保罗要纠正彼得嗰阵，又有乜嘢感觉呢？（加拉太书2:11-14）所以，你可以点样减轻会众长老嘅担子？要谦卑，使人容易亲近你，亦都要怀有感激之心。要将长老嘅帮助睇成系上帝对你嘅爱。噉样唔单止可以造益你，亦都会使长老工作得更加喜乐。

17．一个姊妹点样得到会众长老仁爱嘅帮助？

¹⁷ 一位姊妹因为以往嘅经历觉得自己好难爱耶和华，变得好抑郁。佢话：“我知道自己需要同长老倾吓。佢哋冇责备或者批评我，反而鼓励同强化我。每次聚会结束之后，无论长老几忙都好，至少会有一位过嚟关心我。过去嘅经历令我觉得自己唔配得到上帝嘅爱，不过耶和华一次又一次通过会众同长老向我表明佢嘅爱。我祈求耶和华帮助我永远留喺佢身边。”

比管教更令人痛苦嘅事

18,19．有乜嘢事比管教更令人痛苦？请举例。

¹⁸ 你可能觉得受管教系一件痛苦嘅事，不过拒绝上帝嘅管教会令自己更痛苦。（希伯来书12:11）请睇吓该隐同西底家王嘅例子。耶和华见到该隐憎恨亚伯，甚至想杀死佢，就劝告该隐话：“你点解发嬲？点解咁沮丧呢？你如果去行善，唔系可以受显扬咩？但系你如果唔去行善，罪就埋伏喺门口，要趁机捉住你。你能够制伏罪咩？”（创世记4:6,7）该隐冇接受耶和华嘅管教，杀死咗弟弟，结果余生都要承担恶果。（创世记4:11,12）如果该隐听从耶和华，就唔会经历咁大嘅痛苦。

¹⁹ 西底家系一个软弱邪恶嘅君王。佢统治期间，耶路撒冷嘅人民陷于水深火热之中。先知耶利米多次告诫西底家要离弃恶行，但系西底家拒绝呢啲管教，最终悲剧收场。（耶利米书52:8-11）耶和华一定唔希望我哋承受呢啲不必要嘅痛苦！（请读以赛亚书48:17,18）

20．接受同拒绝上帝管教嘅人分别有点样嘅未来？

²⁰ 今日，世上好多人都嘲笑甚至无视上帝嘅管教。不过好快，呢啲拒绝耶和华管教嘅人就会承受更痛苦嘅后果。（箴言1:24-31）所以，我哋“要听从管教，增长智慧”。正如箴言4:13所讲，“要持守管教，不可放松，谨守不忘，因为呢个就系你嘅生命”。