1．伊甸园嘅反叛事件发生后，耶和华点样为全人类带嚟希望？

耶和华系鼓励人嘅上帝。人类因为犯罪而变得唔完美之后，耶和华都一直为人带嚟安慰同鼓励。伊甸园嘅反叛事件发生后，耶和华就即刻讲出创世记3:15嘅预言，应许“最初嘅蛇”魔鬼撒但同佢嘅所有邪恶作为最终都会被毁灭。呢个为人类家庭带嚟美好嘅希望。（启示录12:9；约翰一书3:8）

耶和华鼓励古代嘅忠仆

2．耶和华点样鼓励挪亚？

² 耶和华嘅忠仆挪亚生活喺一个不敬虔嘅世界。当时，到处充斥住暴力同变态嘅性行为，而事奉耶和华嘅只有挪亚一家。呢一切可能会令挪亚变得灰心。（创世记6:4,5,11；犹大书6）不过耶和华使佢鼓起勇气，继续坚持“与上帝同行”。（创世记6:9）耶和华话俾挪亚知，佢准备要毁灭当时嘅邪恶世界，亦都讲明挪亚要采取乜嘢行动先可以保全一家人嘅性命。（创世记6:13-18）耶和华向挪亚表明，自己系鼓励人嘅上帝。

3．约书亚得到乜嘢鼓励？（请睇吓课文开头嘅图片）

³ 后来，约书亚要完成一个艰巨嘅任务，就系带领上帝嘅子民进入应许之地，征服当地嘅国家。约书亚的确有理由感到恐惧，因为呢啲国家拥有强大嘅军队。于是耶和华差派摩西去强化佢。上帝话：“你要任命约书亚，鼓励佢，强化佢，因为佢要喺民众前面过河，带领佢哋承受你所观看嘅土地。”（申命记3:28）进入应许之地之前，耶和华亲自鼓励约书亚话：“我唔系吩咐过你咩？你要勇敢坚强，唔好恐惧，亦都唔好惊慌，因为无论你去到边度，你嘅上帝耶和华都与你同在。”（约书亚记1:1,9）呢番话真系鼓舞人心！

4,5．（甲）耶和华点样鼓励佢古代嘅子民？（乙）耶和华点样鼓励佢嘅爱子？

⁴ 耶和华唔系只系鼓励个别嘅人，亦都会鼓励佢嘅全体子民。被掳到巴比伦嘅犹太人好需要得到鼓励，所以耶和华同佢哋讲：“你唔使怕，因为我与你同在。你唔需要四顾张望，因为我系你嘅上帝，我要使你坚强。我一定会帮助你，一定会用正义嘅右手扶持你。”（以赛亚书41:10）早期同今日嘅基督徒都得到上帝同样嘅保证。（请读哥林多后书1:3,4）

⁵ 耶稣自己都受到天父嘅鼓励。喺受浸嘅时候，耶稣听到天上发出声音话：“呢个系我嘅儿子，系我所爱嘅，系我所悦纳嘅。”（马太福音3:17）耶稣一定从天父所讲嘅话得到好大嘅鼓励去执行地上嘅传道工作！

耶稣点样鼓励人

6．银元嘅比喻点样鼓励人？

⁶ 耶稣效法天父嘅榜样。喺预言呢个事物制度嘅终结嗰阵，耶稣讲咗银元嘅比喻。比喻入面嘅主人称赞每一个忠心嘅奴隶话：“又良善又忠信嘅奴隶，你做得好！你喺好少嘅事上忠信。我要委派你管理好多嘅事。嚟分享你主人嘅喜乐喇。”（马太福音25:21,23）耶稣嘅话大大鼓励咗佢嘅门徒继续忠心事奉耶和华！

7．耶稣点样鼓励佢嘅使徒，特别系彼得？

⁷ 耶稣嘅使徒经常争论，佢哋当中边个最大，不过耶稣耐心噉鼓励佢哋要谦卑自抑，要服事人而唔系受人服事。（路加福音22:24-26）彼得多次令耶稣失望。（马太福音16:21-23；26:31-35,75）不过耶稣冇放弃彼得，而系鼓励佢，仲吩咐佢去强化弟兄姊妹。（约翰福音21:16）

古代嘅忠仆点样鼓励人

8．希西家点样鼓励将领同犹大子民？

⁸ 耶稣喺鼓励人方面为我哋立下完美嘅榜样。其实喺佢嚟到地上之前，耶和华嘅忠仆就已经意识到鼓励人系好重要嘅。受到亚述人恐吓嘅时候，希西家召集佢嘅将领同犹大子民，鼓励佢哋。结果，“人民因［佢］嘅话都刚强起嚟”。（请读历代志下32:6-8）

9．喺鼓励人方面，我哋从约伯记学到乜嘢？

⁹ 虽然约伯自己都需要受到鼓励，不过佢亦都教导人点样鼓励其他人。佢三个朋友嘅安慰“使［约伯］苦恼”。约伯同佢哋讲，如果佢哋互换立场，佢“会开口鼓励［佢哋］，讲啲话安慰［佢哋］，减轻［佢哋］嘅痛楚”。（约伯记16:1-5）最终，约伯从以利户同耶和华嗰度得到鼓励。（约伯记33:24,25；36:1,11；42:7,10）

10,11．（甲）点解耶弗他嘅女需要受到鼓励？（乙）今日我哋可以鼓励边啲人？

¹⁰ 喺古代嘅例子当中，另一个需要鼓励嘅人就系耶弗他嘅女。同亚扪人交战之前，士师耶弗他发誓话，如果耶和华使佢获得胜利，佢就会将第一个从屋企出嚟迎接佢嘅人献俾耶和华。结果，第一个出嚟迎接耶弗他，为佢庆祝胜利嘅竟然系佢嘅独生女。耶弗他内心悲痛，但系佢信守承诺，将佢嘅女送去示罗嘅圣幕。（士师记11:30-35）

¹¹ 虽然耶弗他噉样做一啲都唔容易，但系对佢嘅女嚟讲就更加难嘞。耶弗他嘅女愿意顺从父亲嘅决定，终生喺圣幕服务。（士师记11:36,37）呢个意味住，佢要放弃结婚生子，而佢嘅家族将会后继无人。佢比任何人更需要得到安慰同鼓励。圣经记载话：“之后，喺以色列有个规例：以色列嘅女子年年都去称赞基列人耶弗他嘅女，每年四日。”（士师记11:39,40）好多独身嘅基督徒善用自己嘅恩赐，更加专心做“主嘅事”，佢哋唔系应该受到称赞同鼓励咩？（哥林多前书7:32-35）

使徒点样鼓励弟兄姊妹

12,13．彼得点样强化弟兄姊妹？

¹² 喺牺牲前嘅嗰一晚，耶稣同使徒彼得讲：“西门，西门，撒但一直要筛你哋好似筛小麦噉。但系我已经为你恳切祈求，免得你信心尽失。你回头之后，要强化你嘅弟兄。”（路加福音22:31,32）

¹³ 彼得系早期基督徒会众嘅支柱。（加拉太书2:9）佢喺五旬节以及之后所立下嘅勇敢榜样鼓励咗佢嘅弟兄姊妹。喺佢传道生涯结束之前，佢写信俾基督徒同工话：“我略略写咗一啲话俾你哋，目的系鼓励你哋，并且恳切作证呢个系上帝真正嘅分外恩典。你哋要喺呢个恩典上坚立不移”。（彼得前书5:12）彼得受圣灵启示而写嘅书信鼓励咗当时嘅基督徒。我哋而家正等待耶和华实现佢嘅应许，的确需要噉样嘅鼓励！（彼得后书3:13）

14,15．使徒约翰写嘅书信点样鼓励我哋？

¹⁴ 使徒约翰亦都系早期基督徒会众嘅支柱。约翰喺佢嘅福音书入面生动记载咗耶稣嘅传道事迹。从古至今，基督徒从呢啲记载得到好大嘅鼓励。只有约翰福音提到，耶稣话爱系真基督徒嘅标志。（请读约翰福音13:34,35）

¹⁵ 我哋喺约翰嘅三封书信亦都可以揾到更多嘅真理宝石。如果我哋因为犯错而感到灰心，“耶稣嘅血……除净我哋嘅所有罪”呢句话，唔系令我哋大感安舒咩？（约翰一书1:7）如果我哋仲系不断自责，读到“上帝比我哋嘅心大”呢句话嗰阵，我哋唔系对上帝充满感激之情咩？（约翰一书3:20）只有约翰写到，“上帝就系爱”。（约翰一书4:8,16）佢第二第三封书信鼓励基督徒要继续“按真理行事”。（约翰二书4；约翰三书3,4）

16,17．使徒保罗点样鼓励早期嘅基督徒？

¹⁶ 喺鼓励弟兄姊妹方面，使徒保罗系杰出嘅榜样。睇嚟喺公元1世纪，大多数使徒都依然留喺耶路撒冷——中央长老团嘅所在地。（使徒行传8:14；15:2）犹地亚嘅基督徒向嗰啲受犹太教影响而相信只有一位上帝嘅人传讲基督嘅信息。另一方面，使徒保罗就受圣灵差遣，向希腊-罗马世界嗰啲信奉多神嘅人传道。（加拉太书2:7-9；提摩太前书2:7）

¹⁷ 保罗喺相当于今日嘅土耳其、希腊同意大利嘅广大地区向非犹太人传道，亦都喺呢啲地区建立基督徒会众。呢啲新近归信嘅基督徒“喺自己同胞手中受苦”，所以好需要受到鼓励。（帖撒罗尼迦前书2:14）大约公元50年，保罗写信俾成立冇几耐嘅帖撒罗尼迦会众，话：“我哋每次喺祷告入面提到你哋所有人，都会感谢上帝，……不断记念你哋出于信心嘅行为、本住爱心嘅劳苦、对我哋主耶稣基督抱住希望而产生嘅忍耐。”（帖撒罗尼迦前书1:2,3）保罗亦都劝勉佢哋“要不断彼此鼓励，互相强化”。（帖撒罗尼迦前书5:11）

中央长老团点样鼓励人

18．公元1世纪嘅中央长老团点样鼓励腓力？

¹⁸ 公元1世纪，耶和华通过中央长老团鼓励所有基督徒，亦都包括喺会众带头嘅弟兄。传福音者腓力向撒马利亚人传讲好消息嘅时候，佢得到中央长老团嘅全力支持。中央长老团差派其中两个成员彼得同约翰，为当地嘅新信徒祷告，使佢哋得到圣灵。（使徒行传8:5,14-17）腓力同新信徒一定从中央长老团嘅支持得到好大嘅鼓励！

19．中央长老团发出嘅信点样影响早期嘅基督徒会众？

¹⁹ 后来，中央长老团需要作出一个重大决定。非犹太裔嘅基督徒系咪要同犹太人一样按照摩西律法接受割礼？（使徒行传15:1,2）喺圣灵嘅指引下，负有职责嘅弟兄根据圣经推理，决定基督徒唔需要接受割礼。之后中央长老团写信解释说明佢哋嘅决定，亦都派出代表将信送到各群会众。结果点样？“［弟兄姊妹］读到信上鼓励嘅话，非常高兴。”（使徒行传15:27-32）

20．（甲）今日嘅中央长老团点样鼓励全球嘅基督徒同工？（乙）下一篇课文会回答乜嘢问题？

²⁰ 今日，耶和华见证人嘅伯特利家庭成员、特别全时传道员乃至整个国际弟兄团体都受到中央长老团嘅鼓励。结果，好似1世纪嘅基督徒噉，弟兄姊妹都因为受到鼓励而深感喜乐！另外，为咗鼓励嗰啲离开真理嘅人重返上帝嘅组织，2015年中央长老团出版咗《回到耶和华身边》呢本册子。噉系咪只有负有职责嘅弟兄先至要效法耶和华鼓励人呢？下一篇课文会回答呢个问题。

1．点解使徒保罗勉励当时嘅希伯来裔基督徒更加要彼此鼓励？

点解我哋应该努力鼓励人？我哋可以喺使徒保罗写俾希伯来裔基督徒嘅书信入面揾到答案。保罗话：“要彼此关注，激发爱心，促进善行。唔好放弃聚会，好似有啲人习惯咗一样，反而要彼此鼓励。你哋既然睇见嗰个日子临近，就更加要噉样做。”（希伯来书10:24,25）不出五年，生活喺耶路撒冷嘅犹太裔基督徒就会睇出“耶和华显赫嘅大日子”迫近，亦都意识到佢哋需要逃出呢座城，就好似耶稣吩咐嘅噉。（使徒行传2:19,20；路加福音21:20-22）公元70年，罗马人喺耶路撒冷执行耶和华嘅判决，呢个表明耶和华嘅大日子到咗嘞。

2．点解我哋而家更加要彼此鼓励？

² 今日我哋可以确信，耶和华“非常可畏”嘅大日子已经临近。（约珥书2:11）西番雅先知话：“耶和华嘅大日子临近嘞，临近嘞，飞快而嚟！”（西番雅书1:14）呢个预言都适用喺我哋而家嘅日子。既然耶和华嘅日子迫在眉睫，我哋就更加“要彼此关注，激发爱心，促进善行”。（希伯来书10:24）所以，我哋应该多啲关心弟兄姊妹，喺佢哋需要嘅时候鼓励佢哋。

边啲人需要受到鼓励？

3．关于鼓励，使徒保罗点样讲？（请睇吓课文开头嘅图片）

³ “人心担忧，郁郁不乐；听见良言，心里欢喜。”（箴言12:25）我哋都好认同呢句话。好多时我哋都需要得到鼓励。保罗所讲嘅话表明，即使系有责任鼓励人嘅弟兄，佢哋自己都需要受到鼓励。佢写信俾罗马嘅基督徒话：“我好渴望见到你哋，将一啲属灵嘅恩赐分俾你哋，使你哋坚定不移。或者应该讲，我喺你哋嗰度，由于你我嘅信心彼此交流，大家就能够互相鼓励。”（罗马书1:11,12）保罗喺鼓励人方面系一个非常好嘅榜样，不过有时佢自己都需要受到强化。（请读罗马书15:30-32）

4,5．边啲人需要得到鼓励？点解？

⁴ 全时为耶和华服务嘅人都配受称赞。为咗可以从事先驱工作，好多忠心嘅弟兄姊妹喺生活上作出好大嘅牺牲，特别先驱、伯特利成员、分区监督同佢哋嘅太太，以及喺远程翻译处服务嘅弟兄姊妹都一样。佢哋所有人都甘愿过自我牺牲嘅生活，使自己有更多时间事奉耶和华。所以，我哋好应该鼓励佢哋。有啲弟兄姊妹好想继续全时为耶和华服务，但系由于某啲原因，佢哋不得不离开自己嘅岗位。佢哋亦都好需要我哋嘅鼓励。

⁵ 有啲弟兄姊妹为咗听从“要同主内嘅人结婚”呢个劝告而保持独身，佢哋都好需要受到鼓励。（哥林多前书7:39）同样，辛勤工作嘅太太都好想丈夫向佢哋表达爱意，感激自己所做嘅一切。（箴言31:28,31）嗰啲遭受迫害或者饱受疾病煎熬但依然保持忠心嘅基督徒，都好需要受到其他人嘅鼓励。（帖撒罗尼迦后书1:3-5）耶和华同基督一定会安慰呢啲忠心嘅仆人。（请读帖撒罗尼迦后书2:16,17）

长老要努力鼓励人

6．我哋从以赛亚书32:1,2睇出，长老担任点样嘅角色？

⁶ 请读以赛亚书32:1,2。我哋生活喺一个困难重重嘅时期，好容易会变得灰心沮丧。耶稣基督通过佢嘅受膏弟兄同埋属于另外绵羊嘅“众领袖”鼓励我哋。呢啲长老唔系管辖其他人信心嘅“主人”，而系使弟兄姊妹得到快乐嘅“同工”。（哥林多后书1:24）

7,8．除咗言语上嘅鼓励，长老仲可以点样强化弟兄姊妹？

⁷ 使徒保罗系值得我哋效法嘅榜样。佢写信俾帖撒罗尼迦受迫害嘅基督徒话：“我哋既然对你哋深怀温情，就唔单止乐意将上帝嘅好消息传俾你哋，连自己嘅性命都乐意俾你哋，因为你哋系我哋所疼爱嘅。”（帖撒罗尼迦前书2:8）

⁸ 只系言语上鼓励人有时系唔够嘅。保罗同以弗所嘅长老讲：“你哋都要……扶助软弱嘅人，亦要谨记主耶稣嘅话。佢讲过：‘施与比接受更快乐。’”（使徒行传20:35）保罗除咗鼓励弟兄姊妹，仲乐意为佢哋作出牺牲，“甚至牺牲一切”。（哥林多后书12:15）同样，长老唔单止需要喺言语上鼓励同安慰弟兄姊妹，仲要真诚噉向佢哋表现个人关注，使佢哋得到强化。（哥林多前书14:3）

9．长老可以点样以鼓励人嘅方式提出劝告？

⁹ 向人提出劝告都系强化人嘅一种方法。长老可以通过圣经学到点样以鼓励人嘅方式提出劝告。喺呢方面，复活后嘅耶稣为我哋立下杰出嘅榜样。佢用强烈嘅措辞向小亚细亚某啲会众提出劝告。俾劝告之前，佢先温和噉称赞以弗所、别迦摩同推雅推拉会众。（启示录2:1-5,12,13,18,19）佢同老底嘉会众讲：“我对边个有深厚嘅感情，就责备边个，管教边个。所以你要热心，亦要悔改。”（启示录3:19）长老向人提出劝告嘅时候，应该效法基督嘅榜样。

唔系只有长老先有责任鼓励人

10．我哋每一个人可以点样强化其他人？

¹⁰ 鼓励人，唔系只系长老嘅责任。保罗劝勉所有基督徒要“睇情况讲强化人嘅好话，使听见嘅人得益”。（以弗所书4:29）每一个人都应该敏于观察其他人嘅需要。保罗同希伯来裔嘅基督徒讲：“你哋要举起下垂嘅手，挺直软弱嘅膝，修平你哋所走嘅道路，使跛脚嘅唔会甩臼，反而得到医治。”（希伯来书12:12,13）我哋所有人，即使系小朋友，都可以通过鼓励嘅言词强化其他人。

11．玛尔特点样得到帮助？

¹¹ 玛尔特a姊妹曾经有一段时间患有抑郁症。佢写道：“有一日，我祈求耶和华俾我所需嘅鼓励，跟住就遇到一位年长嘅姊妹。佢向我表现温情同怜恤，呢个正系当时我非常需要嘅。佢亦都同我分享佢自己遭遇过嘅一啲考验，同我所经历嘅好相似。之后我就觉得冇咁孤独无助嘞。”呢位年长姊妹可能唔知道自己所讲嘅话为玛尔特带嚟咁大嘅帮助。

12,13．我哋可以点样实践腓立比书2:1-4嘅原则？

¹² 保罗向腓立比会众嘅所有成员提出劝告：“如果你哋靠基督得到鼓励，从爱里得到安慰，享有属灵嘅交谊，心里怀有温情怜恤，就应该使我嘅喜乐完完全全。噉样，你哋要思想相同，爱心相同，齐心一意，想法一致。凡事都唔好好辩争胜，唔好自命不凡，要谦卑，睇其他人比自己优越。各人唔好只顾自己嘅事，亦要顾及其他人嘅事。”（腓立比书2:1-4）

¹³ 冇错，我哋所有人都应该尽力关心其他人，用“从爱里得到［嘅］安慰”、“属灵嘅交谊”同埋“温情怜恤”去鼓励我哋嘅弟兄姊妹。

使人得到鼓励嘅方法

14．使人得到鼓励嘅一个方法系乜嘢？

¹⁴ 知道自己喺属灵上帮助过嘅人继续保持忠贞，使我哋得到好大嘅鼓励。使徒约翰都有同样嘅感受，佢话：“我听见自己嘅儿女按真理行事，就冇乜嘢事更值得我感恩嘞。”（约翰三书4）好多先驱得知，自己多年前帮助过嘅人而家继续保持忠贞，有啲仲成为先驱，一定大受鼓励。如果有个先驱感到灰心，我哋帮助佢回想喜乐嘅经历就可以鼓励到佢。

15．我哋可以用乜嘢方法鼓励嗰啲忠贞事奉耶和华嘅人？

¹⁵ 好多分区监督都讲过，探访完会众之后，哪怕只系收到一张简单嘅感谢卡，佢哋同太太都会受到鼓励。长老、特派传道员、先驱同埋伯特利成员忠贞噉为耶和华服务。如果我哋向佢哋表示感激，佢哋一定会大受鼓励。

我哋可以点样鼓励人

16．我哋点样做就可以鼓励到人？

¹⁶ 我哋可能因为自己唔善于交谈，就觉得好难鼓励人。其实，鼓励人唔一定要做好多嘢。同对方打招呼嗰阵，话唔定只系一个微笑就可以鼓励到对方。如果佢睇嚟唔系咁开心，可能系有心事。呢个时候，我哋聆听佢讲话就可以俾到佢好大嘅安慰。（雅各书1:19）

17．一个年轻弟兄喺极度低落嘅时候点样得到帮助？

¹⁷ 一个年轻嘅弟兄叫做亨利，佢几个家人都离开咗真理。其中一个系佢爸爸，曾经系一位受人尊敬嘅长老。呢件事令亨利大受打击。一位分区监督邀请亨利去咖啡厅，耐心聆听佢表达自己心入面嘅感受。亨利受到鼓励之后，明白到只有继续保持忍耐先可以帮助家人返翻真理。佢从诗篇46篇、西番雅书3:17同马可福音10:29,30得到好大嘅安慰。

18．（甲）关于鼓励，所罗门王点讲？（乙）保罗提出乜嘢建议？

¹⁸ 玛尔特同亨利嘅例子表明，我哋可以喺弟兄姊妹需要安慰嘅时候鼓励佢哋。所罗门王话：“口善回答，自觉欢喜；讲话合时，真系美好！眼睛明亮，心就欢喜；有好消息，骨也丰润。”（箴言15:23,30）另外，阅读《守望台》或者组织嘅网站可以使情绪低落嘅人重新振作。保罗所讲嘅话表明，大家一齐唱王国诗歌系一个使人得到鼓励嘅方法。佢话：“要用诗篇、赞美上帝嘅诗歌、洋溢恩慈嘅属灵歌曲，不断彼此教导劝戒，从心底歌颂耶和华。”（歌罗西书3:16；使徒行传16:25）

19．点解我哋越来越需要互相鼓励？我哋应该点样做？

¹⁹ 随住耶和华嘅大日子“临近”，我哋更加需要互相鼓励。（希伯来书10:25）保罗话：“要不断彼此鼓励，互相强化，就好似你哋而家所做嘅噉”。（帖撒罗尼迦前书5:11）如果我哋按照保罗嘅建议去做，就会感到非常喜乐。