1,2．（甲）弟兄姊妹喺反应冷淡嘅地区坚持传道，我哋从中点样得到鼓励？（请睇吓课文开头嘅图片）（乙）关于喺自己“本乡”传道，耶稣点样讲？（请参考脚注）

塞尔吉奥同奥琳达系美国一对八十几岁嘅先驱夫妇。佢哋最近由于脚痛而行动不便，不过每日朝早依然会准时七点行到镇上一个繁忙嘅广场，几十年如一日。佢哋喺巴士站附近一个固定嘅地方向路过嘅人介绍圣经出版物。就算好多人唔理会佢哋，佢哋仲系紧守岗位，并向经过嘅人微笑。中午时分，佢哋就慢慢行翻屋企。第二日朝早，佢哋又同样七点到达呢个广场。呢对忠贞嘅夫妇每个星期有6个朝早都会喺呢个广场努力传讲王国信息，一年四季都冇中断过。

² 世界各地有好多忠贞嘅弟兄姊妹都好似塞尔吉奥同奥琳达噉，即使自己本地嘅传道地区反应冷淡，佢哋几十年来都坚持传道。如果你都有同样嘅情况，我哋真系好想衷心称赞你，因为你保持忍耐。a你坚定不移噉事奉耶和华，可以鼓励到好多人，包括经验丰富嘅信徒同工。请留意以下一啲分区监督所讲嘅话。“每次同呢啲忠贞嘅弟兄姊妹一齐传道，佢哋嘅榜样使我更加热心。”“佢哋嘅忠贞使我更有勇气，坚持不懈噉做传道工作。”“佢哋嘅榜样深深打动我嘅心。”

3．呢篇课文会讨论边三个问题？点解？

³ 呢篇课文会讨论三个问题：点解我哋有时可能会感到灰心？我哋点样先可以结出果实？乜嘢会帮助我哋怀住忍耐结出果实？呢啲问题嘅答案可以加强我哋嘅信心，推动我哋继续努力执行耶稣交托嘅传道工作。

点解我哋可能会感到灰心？

4．（甲）保罗对犹太人嘅恶劣反应有乜嘢感觉？（乙）点解保罗有呢种感觉？

⁴ 如果你因为传道地区反应冷淡而感到灰心，可能你就会更加明白使徒保罗嘅感受。喺大约30年嘅传道生涯中，保罗帮助过好多人成为基督嘅门徒。（使徒行传14:21；哥林多后书3:2,3）不过，有好多犹太人拒绝接受真理，有啲人甚至迫害佢。（使徒行传14:19；17:1,4,5,13）保罗对呢啲恶劣反应有乜嘢感觉？佢坦率噉话：“我喺基督面前讲嘅系真话，……我心里真系大大忧愁，痛苦不绝”。（罗马书9:1-3）点解保罗有噉样嘅感觉？佢全心投入传道工作，深切关注犹太人，向佢哋传道。所以，保罗见到犹太人拒绝接受上帝嘅慈悲而感到痛心。

5．（甲）乜嘢推使我哋向周围嘅人传道？（乙）点解有时我哋感到灰心一啲都唔出奇？

⁵ 同保罗一样，我哋向人传道系因为我哋关心人，好想帮助人。（马太福音22:39；哥林多前书11:1）我哋亲身体验到，事奉耶和华系最好嘅生活方式。我哋好想帮助其他人睇出，佢哋其实可以过更美好嘅生活。所以，我哋不断鼓励人学习耶和华嘅真理同旨意，噉样做就好似同对方讲：“我哋好想送一份宝贵嘅礼物俾你，请你接受。”如果对方拒绝呢份礼物，我哋一定会觉得好伤心。有呢种感觉唔系因为缺乏信心，而系表明我哋全心投入传道工作。所以，就算有时感到灰心，我哋都会保持忍耐。伊琳娜做咗先驱超过25年，佢话：“做传道工作的确唔容易，不过冇其他工作更值得我去做。”

我哋可以点样结出果实？

6．我哋会讨论乜嘢问题？

⁶ 点解可以肯定，无论我哋喺边度都可以结出果实？为咗回答呢个重要问题，等我哋嚟分析吓耶稣喺谈及“结出果实”时所讲嘅两个比喻。（马太福音13:23）第一个比喻同葡萄树有关。

7．（甲）“培植嘅人”、“葡萄树”同“枝子”分别指边个？（乙）我哋需要揾出乜嘢问题嘅答案？

⁷ 请读约翰福音15:1-5,8。请留意，耶稣对使徒讲：“你哋不断多结果实，表明自己系我嘅门徒，我嘅父亲就因此得荣耀嘞。”耶稣将耶和华比喻为“培植嘅人”，将自己比喻为“真葡萄树”，又将佢嘅门徒比喻为“枝子”。b噉跟从基督嘅人需要结出乜嘢果实？喺呢个比喻当中，耶稣冇直接讲出系乜嘢果实，但系佢提供咗一个细节帮助我哋揾出答案。

8．（甲）点解比喻所讲嘅结出果实唔系指帮助人成为基督徒？（乙）点解话耶和华系仁爱嘅上帝？

⁸ 耶稣提到，“凡唔结果实嘅”枝子都会被天父剪除。换句话嚟讲，我哋只有结出果实先会被耶和华视为忠仆。（马太福音13:23；21:43）喺呢个比喻当中，结出果实唔可能系指帮助人成为门徒。（马太福音28:19）否则，因为地区反应冷淡而冇帮到任何人成为基督徒嘅忠心弟兄姊妹，就系比喻当中冇出产嘅枝子嘞。噉样当然唔合理！我哋唔能够强迫人成为基督徒。耶和华系仁爱嘅上帝，佢永远都唔会叫我哋做一啲超出我哋能力范围嘅事。佢吩咐我哋做嘅，都系我哋力所能及嘅。（申命记30:11-14）

9．（甲）我哋执行乜嘢工作就系结出果实？（乙）同结出果实有关嘅另一个比喻系乜嘢？

⁹ “结出果实”系乜嘢意思？果实指嘅显然系我哋每个人都能做得到嘅事。耶和华吩咐佢所有嘅忠仆要执行乜嘢工作？就系传讲王国嘅好消息。c（马太福音24:14）耶稣嘅另一个比喻可以证实呢一点。接住落嚟，我哋会讨论撒种人嘅比喻。

10．（甲）种子同土壤分别指乜嘢？（乙）小麦会结出乜嘢？

¹⁰ 请读路加福音8:5-8,11-15。喺撒种人嘅比喻当中，耶稣话种子就系“上帝嘅话语”，指嘅系王国信息。土壤代表一个人嘅内心情况。落喺好泥土上嘅种子生根发芽，茁壮成长，跟住就“结出百倍嘅果实”。如果呢棵系小麦，噉结出嘅果实系乜嘢？系咪好多细细棵嘅小麦？当然唔系。呢棵小麦只会结出新嘅种子，假以时日种子再成长为小麦。从比喻睇出，一粒种子可以结出一百粒种子。呢个同我哋嘅传道工作有乜嘢关系？

11．（甲）撒种人嘅比喻同我哋传道工作有乜嘢关系？（乙）我哋点样结出新嘅王国种子？

¹¹ 多年前，我哋通过一啲见证人或者我哋嘅基督徒父母听到上帝王国嘅信息。呢个就好比，佢哋将一粒王国种子撒喺我哋心上。佢哋好开心见到我哋接受王国信息，正如比喻中嘅种子撒喺好嘅泥土上。结果，王国信息好似种子噉生根发芽，茁壮成长，最终结出果实。小麦结出嘅系种子而唔系整棵小麦，所以我哋结出果实指嘅就系向人传讲王国信息，而唔系帮助咗几多人成为基督徒。d我哋点样结出新嘅王国种子？向人传讲王国信息，将我哋内心嘅种子撒播出去。（路加福音6:45；8:1）我哋不断宣扬王国信息，就系“怀住忍耐结出果实”。

12．（甲）我哋通过葡萄树同撒种人嘅比喻学到乜嘢？（乙）呢啲比喻点样使你得到鼓励？

¹² 我哋通过葡萄树同撒种人呢两个比喻学到乜嘢？我哋系咪能够结出果实，唔系取决于地区嘅人对好消息嘅反应，而系取决于我哋自己嘅信心。保罗都有同样嘅睇法，佢话：“各人必照自己嘅劳苦得自己嘅奖赏。”（哥林多前书3:8）耶和华奖赏我哋所根据嘅唔系我哋嘅工作成绩，而系我哋为工作付出嘅努力。做咗20年先驱嘅玛蒂尔达话：“知道耶和华会按照我嘅努力嚟奖赏我，真系令我感到喜乐。”

我哋可以点样怀住忍耐结出果实？

13,14．根据罗马书10:1,2，点解保罗冇放弃向反应冷淡嘅人传道？

¹³ 乜嘢可以帮助我哋怀住忍耐结出果实？请睇翻保罗嘅例子。因为犹太人对王国嘅信息反应冷淡，所以保罗曾经都有灰心嘅感觉。虽然系噉，保罗始终冇放弃向佢哋传道。请留意，喺写俾罗马基督徒嘅信入面，保罗对嗰啲唔接受真理嘅犹太人有乜嘢感觉。佢话：“我心里祝愿嘅，向上帝恳切祈求嘅，就系要以色列人得救。我可以为佢哋作证，佢哋对上帝有热心，不过唔系按照确切嘅知识。”（罗马书10:1,2）保罗因为乜嘢原因而坚持传道？

¹⁴ 第一，保罗受到“［佢］心里祝愿嘅”所推动。佢热切希望犹太人可以得救。（罗马书11:13,14）第二，保罗“［为佢哋］向上帝恳切祈求”。佢恳求上帝帮助每个以色列人接受王国嘅信息。第三，保罗知道“佢哋对上帝有热心”。佢睇到佢哋善良嘅一面，将来佢哋可能会事奉耶和华。保罗知道，热心嘅犹太人如果得到正确嘅引导，就可以成为热心嘅基督徒，好似佢自己噉。

15．我哋可以点样效法保罗？请举例。

¹⁵ 我哋可以点样效法保罗？第一，要继续怀住真诚嘅态度努力寻找“秉性适宜得永生嘅人”。第二，祷告恳求耶和华打开寻求真理嘅人嘅心。（使徒行传13:48；16:14）西尔娅娜做咗先驱差唔多30年，佢话：“我传道之前都会向耶和华祷告，求佢帮助我对住户怀有积极嘅态度。”我哋都可以恳求耶和华差派天使指引我哋揾出嗰啲诚心正意嘅人。（马太福音10:11-13；启示录14:6）做咗先驱超过30年嘅罗伯特话：“天使清楚知道住户嘅情况，同天使一齐工作真系令人兴奋。”第三，要留意传道对象嘅优点。卡尔系一位受咗浸超过50年嘅长老，佢话：“我可以从一啲迹象睇出对方系真诚嘅，例如佢面带微笑，外表和蔼可亲，或者提出问题嘅时候态度诚恳。”冇错，我哋都可以好似保罗噉怀住忍耐结出果实。

“唔好停手”

16,17．（甲）我哋从传道书11:6学到乜嘢？（乙）我哋嘅传道工作会对嗰啲留意我哋嘅人产生乜嘢影响？请举例。

¹⁶ 即使睇嚟好多人对王国信息无动于衷，我哋都唔应该低估撒种工作所带嚟嘅影响。（请读传道书11:6）好多人虽然唔接受好消息，但系会留意我哋。我哋衣着得体、言行有礼、笑容亲切，可能会令佢哋印象深刻。有时，一啲对我哋有负面睇法嘅人，后来都因为我哋嘅良好行为而改变态度。课文开头提到嘅塞尔吉奥同奥琳达，真系有过噉样嘅经历。

¹⁷ 塞尔吉奥话：“因为患病，我哋有段时间唔可以去嗰个广场。后来我哋又继续喺嗰度传道，有啲经过嘅人问我哋：‘你哋冇事呀嘛？我哋好挂住你哋呀。’”奥琳达面带微笑补充话：“巴士司机向我哋招手，有啲司机仲大声对我哋讲：‘做得好！’佢哋仲问我哋攞杂志添。”令呢对夫妇感到意外嘅系，一个男子嚟到见证手拉车旁边，送咗一扎花俾佢哋，感谢佢哋所做嘅一切。

18．点解我哋决心要“怀住忍耐结出果实”？

¹⁸ 的确，只要我哋继续撒播王国种子，“唔好停手”，就系执行“对所有国族作见证”呢项重要任务。（马太福音24:14）无论如何，我哋都可以因为自己蒙耶和华悦纳而深感喜乐。耶和华深爱嗰啲“怀住忍耐结出果实”嘅人！

1,2．（甲）耶稣喺牺牲前同使徒讲咗乜嘢？（请睇吓课文开头嘅图片）（乙）点解我哋应该谨记传道嘅理由？（丙）呢篇课文会讨论乜嘢？

耶稣喺牺牲前嘅最后一晚，同使徒倾咗好耐。谈话期间，佢向使徒强调自己深爱佢哋，亦都同佢哋讲咗上一篇课文讨论过嘅葡萄树嘅比喻。耶稣通过呢个比喻鼓励门徒要“不断多结果实”，即系喺传讲王国信息嘅工作上要保持忍耐。（约翰福音15:8）

² 耶稣唔单止同门徒讲要做乜嘢，亦都同佢哋讲点解要噉样做。耶稣话俾佢哋知继续执行传道工作嘅理由。如果我哋谨记呢啲理由，就有力量保持忍耐，“对所有国族作见证”。（马太福音24:13,14）喺呢篇课文，我哋会讨论四个嚟自圣经嘅传道理由，亦都会分析耶和华俾咗我哋边四个恩赐，帮助我哋怀住忍耐结出果实。

赞美耶和华

3．（甲）约翰福音15:8提到嘅传道原因系乜嘢？（乙）耶稣所讲嘅葡萄指嘅系乜嘢？点解呢个比喻好贴切？

³ 我哋参与传道工作嘅首要原因系，喺人面前赞美耶和华同埋使耶和华嘅名彰显为圣。（请读约翰福音15:1,8）请留意，耶稣将天父耶和华比作一位培植葡萄嘅园丁，又将自己比作葡萄树或树干，将门徒比作枝子。（约翰福音15:5）所以，比喻当中嘅葡萄代表基督徒结出嘅王国果实，亦即系佢哋执行嘅传道工作。耶稣对使徒讲：“你哋不断多结果实，……我嘅父亲就因此得荣耀嘞”。正如葡萄树产出好葡萄可以使培植嘅人得到光彩，如果我哋努力宣扬王国信息，就可以荣耀耶和华。（马太福音25:20-23）

4．（甲）我哋通过乜嘢方式可以使上帝嘅名彰显为圣？（乙）有荣幸使上帝嘅名彰显为圣，你有乜嘢感觉？

⁴ 我哋嘅传道工作以乜嘢方式使上帝嘅名彰显为圣？我哋唔能够使上帝嘅名更加神圣，因为上帝嘅名系绝对神圣同圣洁嘅。请留意先知以赛亚点样讲。佢话：“你哋应该尊万军之主耶和华为圣”。（以赛亚书8:13）我哋尊耶和华嘅名为圣，就会承认唯有上帝嘅名耶和华先至系至高无上嘅，亦都会帮助其他人尊崇呢个名。（马太福音6:9）我哋向人传讲耶和华美好嘅特质同埋佢对人类永恒不变嘅旨意，就系捍卫上帝嘅圣名，帮助人睇出撒但毁谤上帝。（创世记3:1-5）另外，我哋喺传道地区努力帮助人睇出耶和华系“配得荣耀、尊崇、力量”嘅上帝，就系使耶和华嘅名彰显为圣。（启示录4:11）做咗16年先驱嘅卢恩话：“知道自己有幸为宇宙嘅创造主作见证，我内心充满感激。呢个使我好想继续传道。”

爱耶和华同耶稣

5．（甲）约翰福音15:9,10提到嘅传道原因系乜嘢？（乙）耶稣点样强调门徒需要忍耐？

⁵ 请读约翰福音15:9,10。我哋深爱耶和华同耶稣，系我哋传讲王国信息嘅第二个重要原因。（马可福音12:30；约翰福音14:15）耶稣唔系只系要门徒喺佢嘅爱里，而系要佢哋“时刻喺［佢］嘅爱里”。佢知道门徒一直过真基督徒嘅生活需要保持忍耐，所以佢喺约翰福音15:4-10多次强调“时刻”呢个词。

6．我哋点样表明自己想时刻留喺基督嘅爱里？

⁶ 我哋点样表明，自己想时刻留喺基督嘅爱里并渴望得到佢嘅嘉许？就系要留意同服从耶稣嘅诫命。耶稣要求我哋做嘅，佢自己都会做。佢话：“正如我遵守咗父亲嘅诫命，就时刻喺佢嘅爱里。”耶稣为我哋立下咗好榜样。（约翰福音13:15）

7．服从同爱之间有乜嘢关系？

⁷ 为咗讲明服从同爱之间嘅关系，耶稣同使徒讲：“领受我诫命又遵守嘅，呢个人就系爱我嘅。”（约翰福音14:21）此外，耶稣嘅诫命反映嘅系天父嘅谂法，所以我哋听从耶稣嘅吩咐去传道，亦都表明我哋爱上帝。（马太福音17:5；约翰福音8:28）我哋爱耶和华同耶稣，就会一直留喺佢哋嘅爱里。

向人发出警告

8,9．（甲）我哋传道嘅第三个原因系乜嘢？（乙）以西结书3:18,19；18:23点样推动我哋继续传道？

⁸ 我哋不断传道嘅第三个原因系，要向人发出警告。圣经话挪亚“传讲正义”。（请读彼得后书2:5）喺大洪水之前，挪亚传讲嘅信息肯定都包括毁灭嘅警告。我哋点知道呢？耶稣话：“洪水以前嘅日子，人又饮又食，又娶又嫁，直到挪亚入方舟嗰一日。佢哋毫不理会，直到洪水嚟到，将佢哋全部冲走，人子临在嘅时候亦会系噉。”（马太福音24:38,39）即使人完全唔理会，挪亚依然忠心传讲警告信息。

⁹ 今日，我哋传讲嘅王国信息使人有机会认识上帝对人类嘅旨意。同耶和华一样，我哋衷心希望人人都接受呢啲信息而得以 “活落去”。（以西结书18:23）同时，我哋逐家逐户同埋喺公众地方传道，就系尽力向人发出警告，使佢哋知道上帝嘅王国即将到嚟，好快就会毁灭呢个邪恶世界。（以西结书3:18,19；但以理书2:44；启示录14:6,7）

爱所有人

10．（甲）马太福音22:39提到嘅第四个传道原因系乜嘢？（乙）保罗同西拉喺腓立比点样帮助一个狱卒？

¹⁰ 我哋不断传道嘅第四个原因系，我哋爱所有人。（马太福音22:39）呢种爱帮助我哋喺传道工作上保持忍耐。我哋知道，人嘅内心可能会随住情况变化而发生改变。请谂吓使徒保罗同佢嘅传道同伴西拉嘅经历。喺腓立比城，反对者将佢哋韫入监狱。到咗半夜时分，突然发生地震，监狱嘅门都打开晒。狱卒担心囚犯逃跑就想自杀。不过保罗大声呼叫话：“唔好伤害自己”！于是狱卒问：“我要做乜嘢先可以得救？”保罗同西拉就同佢讲：“要信靠主耶稣，先可以得救”。（使徒行传16:25-34）

11,12．（甲）狱卒嘅记载同我哋嘅传道工作有乜嘢关系？（乙）点解我哋要继续传道？

¹¹ 狱卒嘅记载同我哋嘅传道工作有乜嘢关系？请留意，狱卒喺地震之后内心先至发生改变，并向保罗寻求帮助。今日有啲人唔肯接受圣经信息，不过，如果佢哋嘅生活突然发生变化，佢哋嘅内心就可能会有所改变，结果愿意接受我哋嘅帮助。例如，喺我哋嘅传道地区，有啲人可能突然失业而感到迷茫，有啲人可能婚姻破裂，仲有啲人可能得知自己患咗严重嘅疾病，或者痛失亲友。当中一啲人遭遇呢啲痛苦嘅事之后，可能会开始思考以前自己冇兴趣了解嘅人生问题。佢哋或者会谂：“我要做乜嘢先可以得救？”如果呢个时候我哋向佢哋传讲得救嘅信息，佢哋或者会愿意听。

¹² 所以，只要继续忠心噉做传道工作，我哋就可以喺人愿意接受嗰阵，及时为佢哋带嚟安慰。（以赛亚书61:1）夏洛特从事全时服务38年，佢话：“今日嘅人都迷失咗方向，佢哋需要听到好消息。”有34年先驱经验嘅亚沃尔话：“今日有越来越多人感到情绪低落。我真系好想帮助佢哋，呢个推动我努力传道。”对其他人嘅爱的确系我哋继续传道嘅一个重要原因！

帮助我哋保持忍耐嘅恩赐

13,14．（甲）约翰福音15:11提到乜嘢恩赐？（乙）耶稣嘅喜乐点样成为我哋嘅喜乐？（丙）喜乐点样影响我哋嘅传道工作？

¹³ 耶稣喺牺牲前嘅最后一晚亦都提到，有四个恩赐会帮助使徒怀住忍耐结出果实。系乜嘢恩赐？我哋可以点样从中得益？

¹⁴ 喜乐嘅恩赐。听从耶稣嘅吩咐去传道系咪一个沉重嘅负担？当然唔系。耶稣讲完葡萄树嘅比喻之后话，传讲王国信息嘅人会得到喜乐。（请读约翰福音15:11）佢保证，佢嘅喜乐会成为我哋嘅喜乐。点解？之前耶稣将自己比作葡萄树，将门徒比作枝子。枝子必须依附喺葡萄树上。只要枝子同树干连喺一齐，就可以不断从葡萄树得到水分同营养。同样，我哋紧紧跟从基督嘅脚踪，同佢联合，就可以同佢一样因遵行上帝旨意而得到喜乐。（约翰福音4:34；17:13；彼得前书2:21）做咗先驱超过40年嘅汉妮话：“传道带嚟嘅喜乐激励我继续事奉耶和华。”的确，内心深处嘅喜乐使我哋得到力量，就算喺反应冷淡嘅地区都能继续传道。（马太福音5:10-12）

15．（甲）约翰福音14:27提到乜嘢恩赐？（乙）点解平安呢种恩赐可以帮助我哋继续结出果实？

¹⁵ 平安嘅恩赐。（请读约翰福音14:27）耶稣喺牺牲前嘅最后一晚同佢嘅使徒讲：“［我］将我嘅平安赐俾你哋。”耶稣所讲嘅平安点样帮助我哋结出果实？我哋保持忍耐嘅时候，内心都可以享有平安，因为我哋知道自己得蒙耶和华同耶稣嘅悦纳。（诗篇149:4；罗马书5:3,4；歌罗西书3:15）从事全时服务45年嘅奥夫话：“虽然我做传道工作会感到疲倦，但系呢个工作使我得到真正嘅满足感，令我嘅人生充满意义。”我哋几咁感激耶和华使我哋内心一直享有平安！

16．（甲）约翰福音15:15提到乜嘢恩赐？（乙）使徒可以点样维系同耶稣嘅友谊？

¹⁶ 友谊嘅恩赐。耶稣表明佢希望使徒得到“完完全全”嘅喜乐。之后，佢又同佢哋讲明表现无私嘅爱有几重要。（约翰福音15:11-13）佢跟住话：“我已经将你哋叫做朋友”。我哋可以成为耶稣嘅朋友，呢个真系宝贵嘅恩赐！使徒必须点样做先可以维系同耶稣嘅友谊？佢哋一定要“去不断结出果实”。（请读约翰福音15:14-16）大约两年前，耶稣吩咐门徒话：“你哋要随走随传，话：‘天上嘅王国近嘞。’”（马太福音10:7）所以，喺耶稣牺牲前嘅嗰个晚上，佢鼓励使徒要喺传道工作上保持忍耐。（马太福音24:13；马可福音3:14）当然遵守耶稣嘅诫命唔容易，但只要佢哋噉样做，就可以一直做耶稣嘅朋友。另一个恩赐可以帮助佢哋做到呢点。

17,18．（甲）约翰福音15:16提及乜嘢恩赐？（乙）呢个恩赐点样帮助耶稣嘅门徒？（丙）呢啲恩赐嚟自边个？

¹⁷ 祷告得到回应嘅恩赐。耶稣话：“你哋奉我嘅名，无论向父亲求乜嘢，佢都会赐俾你哋。”（约翰福音15:16）呢个承诺一定带俾使徒好大嘅鼓励！a虽然佢哋当时唔知道耶稣喺地上嘅生命好快就会结束，不过耶稣嘅离去并唔代表佢哋孤立无助。耶和华会随时回应佢哋嘅祷告，使佢哋得到帮助，能够继续执行传讲王国信息嘅任务。之后冇几耐，使徒就睇出耶和华点样回应佢哋嘅祷告，俾佢哋所需嘅帮助。（使徒行传4:29,31）

¹⁸ 今日嘅情况都一样。只要我哋怀住忍耐结出果实，就可以继续同耶稣做朋友。另外，我哋确信耶和华会随时回应我哋嘅祷告，帮助我哋应付喺传讲王国好消息时遇到嘅困难。（腓立比书4:13）我哋非常感激耶和华回应我哋嘅祷告，而且好高兴可以成为耶稣嘅朋友！呢啲嚟自耶和华嘅恩赐使我哋得到强化，不断结出果实。（雅各书1:17）

19．（甲）点解我哋要不断传道？（乙）乜嘢帮助我哋完成上帝嘅工作？

¹⁹ 喺呢篇课文我哋学到，要不断传道嘅四个原因：荣耀耶和华并彰显佢嘅圣名，爱耶和华同耶稣，向人发出警告同埋爱所有人。另外，我哋亦都学到四个恩赐：喜乐、平安、同耶稣嘅友谊以及祷告得到回应。呢啲恩赐强化我哋，帮助我哋完成上帝所交托嘅工作。耶和华见到我哋努力“不断多结果实”，一定会感到好欣慰！