点样促进家庭幸福？

1,2．耶和华希望人有点样嘅家庭生活？

婚姻系耶和华上帝创立嘅。圣经话佢创造咗第一个女人，“将佢带到［亚当］面前”。亚当好开心噉话：“我骨中嘅骨、肉中嘅肉，终于出现嘞”。（创世记2:22,23）耶和华希望夫妻过幸福快乐嘅生活。

² 人人都想家庭幸福快乐，不过好多人都得唔到。但系，圣经提供好多原则帮助家庭嘅每个成员可以尽一分力，使家庭幸福快乐。（路加福音11:28）

好丈夫应该点样做

3,4．（甲）丈夫应该点样对待妻子？（乙）点解夫妻彼此乐意宽恕咁重要？

³ 圣经话一个好丈夫应该爱护同尊重妻子。请读以弗所书5:25-29。丈夫要一直仁爱噉对待妻子，仲要保护同照顾佢，唔应该做任何伤害佢嘅事。

⁴ 如果妻子做得唔好嘅话，丈夫应该点做呢？上帝吩咐做丈夫嘅要继续“爱妻子，唔好发嬲苦待佢哋”。（歌罗西书3:19）丈夫唔好忘记自己都会做错事。如果想得到上帝嘅宽恕，丈夫就一定要宽恕妻子。（马太福音6:12,14,15）夫妻彼此乐意宽恕，就能够使婚姻幸福快乐。

5．点解丈夫要尊重妻子？

⁵ 耶和华希望丈夫尊重妻子。丈夫应该顾及妻子嘅需要。丈夫噉样做好重要，如果佢冇好好对待妻子，耶和华可能唔会听佢嘅祷告。（彼得前书3:7）耶和华唔会重男轻女，佢重视嘅系人对佢嘅爱。

6．丈夫同妻子成为一体系乜嘢意思？

⁶ 耶稣话，丈夫同妻子“唔再系两个人，而系一体嘞”。（马太福音19:6）佢哋要永远忠于对方，唔应该做对配偶不忠嘅事。（箴言5:15-21；希伯来书13:4）夫妻双方应该顾及对方嘅性需要，唔好只顾自己。（哥林多前书7:3-5）丈夫应该谨记“从来冇人恨恶自己嘅身体，只会喂养爱护”，所以应该爱护妻子。而妻子最希望嘅系丈夫对佢表现仁慈同关爱。（以弗所书5:29）

好妻子应该点样做

7．点解每个家庭都需要一家之主？

⁷ 每个家庭都需要一家之主，带领家人通力合作。哥林多前书11:3话：“基督系男人嘅头，男人系女人嘅头，上帝系基督嘅头”。

8．妻子应该点样表明自己深深尊重丈夫？

⁸ 做丈夫嘅难免都会犯错。不过妻子支持丈夫嘅决定，同丈夫通力合作，就会使整个家庭得益不浅。（彼得前书3:1-6）圣经话：“妻子亦都应该深深尊敬丈夫”。（以弗所书5:33）如果丈夫同妻子嘅信仰唔一样，噉又点呢？妻子要继续深深尊重丈夫。圣经话：“你哋做妻子嘅，要顺服自己嘅丈夫。噉样，即使丈夫唔服从神圣嘅话语，你哋或者都可以通过自己嘅品行感化丈夫，唔使用一言一语，因为丈夫亲眼睇见你哋品行贞洁，而且深深尊重佢哋”。（彼得前书3:1,2）妻子嘅好品行能够帮助丈夫理解同尊重佢嘅信仰。

9．（甲）如果做妻子嘅同丈夫意见唔同，佢可以点做？（乙）妻子可以从提多书2:4,5学到乜嘢？

⁹ 如果做妻子嘅同丈夫意见唔同，佢可以点做？佢应该以尊重嘅方式表达自己嘅意见。圣经话，撒拉向亚伯拉罕提出建议，但系亚伯拉罕唔同意。不过，耶和华叫亚伯拉罕“听撒拉嘅话”。（创世记21:9-12）一般嚟讲，基督徒丈夫最终所作嘅决定都唔会违反圣经嘅原则，所以妻子应该支持丈夫。（使徒行传5:29；以弗所书5:24）好妻子会照顾家人。（请读提多书2:4,5）妻子努力照顾家人，丈夫同儿女就会更加深爱同尊重佢。（箴言31:10,28）

10．关于分居同离婚，圣经点讲？

¹⁰ 有啲夫妻可能会随便决定分居或者离婚。不过，圣经话“妻子唔应该离开丈夫”，“丈夫亦唔应该离开妻子”。（哥林多前书7:10,11）喺某啲极端嘅情况之下，人可能考虑同配偶分居，不过佢哋唔应该轻率做决定。离婚又点呢？根据圣经嘅标准，配偶同其他人发生性关系，清白嘅一方先至可以选择离婚。（马太福音19:9）

父母应该点样做

11．儿女最需要父母点样做？

¹¹ 父母要尽量安排时间陪伴儿女。儿女好需要你，对佢哋嚟讲，你教导佢哋认识耶和华比乜嘢都重要。（申命记6:4-9）

12．父母应该点样保护儿女？

¹² 撒但嘅世界越来越邪恶，我哋嘅儿女可能会受到伤害，甚至俾人性侵犯。有啲父母觉得好难开口同儿女倾呢个话题，但系父母需要帮助儿女识得分辨边啲系坏人，同埋教导佢哋点样避开坏人。做父母嘅一定要保护儿女。a（彼得前书5:8）

13．父母应该点样教导儿女？

¹³ 父母有责任教导儿女。你可以点样做呢？你需要管教儿女，不过唔应该用粗暴嘅方式管教佢哋。（耶利米书30:11）所以，唔好喺自己发嬲嘅时候管教儿女，避免自己所讲嘅话“如刀刺人”，令儿女受到伤害。（箴言12:18）要教导儿女，使佢哋明白点解应该要服从父母。（以弗所书6:4；希伯来书12:9-11）——请睇附注30

儿女应该点样做

14,15．点解儿女应该服从父母？

¹⁴ 耶稣一直服从天父，即使喺好唔容易嘅情况下都依然噉做。（路加福音22:42；约翰福音8:28,29）耶和华希望做儿女嘅都服从父母。（以弗所书6:1-3）

¹⁵ 做儿女嘅，可能会觉得服从父母好唔容易，但系你表现服从嘅态度，就会令耶和华同父母开心。b（箴言1:8；6:20；23:22-25）

16．（甲）撒但会点样引诱年轻人犯错？（乙）点解同爱耶和华嘅人做朋友好重要？

¹⁶ 魔鬼知道同辈压力唔容易应付，所以，佢会利用你嘅朋友或者其他年轻人引诱你犯错。雅各嘅女儿底拿就系一个例子，佢同一啲唔爱耶和华嘅人做朋友，结果为自己同家人造成好多难题。（创世记34:1,2）如果你同唔爱耶和华嘅人做朋友，就可能会被引诱做耶和华憎恨嘅事，结果会为你同家人带嚟痛苦，上帝亦会好难过。（箴言17:21,25）所以，同爱耶和华嘅人做朋友真系好重要。（哥林多前书15:33）

你嘅家庭可以幸福快乐

17．每个家庭成员有乜嘢责任？

¹⁷ 如果家庭每个成员都跟从上帝嘅指引，就可以免去好多烦恼同难题。所以，如果你系丈夫，就要爱护妻子，好好对待佢。如果你系妻子，要尊重同服从你嘅丈夫，仲要效法箴言31:10-31所描述嘅贤妻。做父母嘅，要教导儿女爱上帝。（箴言22:6）做父亲嘅，有责任“善于督导自己嘅家”。（提摩太前书3:4,5；5:8）做儿女嘅，就要服从父母。（歌罗西书3:20）要记住，每个家庭成员都会犯错，所以要表现谦卑，彼此请求宽恕。确实，耶和华通过圣经向家庭每个成员提供实用嘅指引。