1,2．（甲）为咗争取自由，世人往往会做乜嘢？（乙）结果点样？

今日，世界各地嘅人都钟意谈论平等同自由。大多数人都想摆脱压迫、歧视同贫穷。有啲人想得到言论同选择嘅自由。显然，每个地方嘅人都渴望做自己想做嘅事，过自己希望过嘅生活。

² 不过，点样实现呢啲梦想系另一回事。好多人都尝试通过抗议、示威、发动叛乱甚至革命嚟解决社会或者政治问题。呢啲反抗行为可唔可以达到预期嘅效果呢？唔可以。反抗往往导致惨剧发生，造成人员伤亡。呢一切证明咗，所罗门王受圣灵启示所讲嘅话一啲都冇错：“人辖制人，使人受害”。（传道书8:9）

3．为咗得到真正嘅幸福同满足，我哋需要做乜嘢？

³ 门徒雅各向我哋指出，人类想得到真正嘅幸福同自由就需要点样做。佢话：“人如果仔细察看自由嘅完美律法，并且恒心遵守，……就会因为实践出嚟而得福。”（雅各书1:25）耶和华赐俾我哋完美嘅律法，佢最清楚人类需要乜嘢先可以得到真正嘅幸福同满足。佢将获得幸福快乐所需要嘅一切赐俾亚当同夏娃，包括真正嘅自由。

人类曾经享有真正嘅自由

4．亚当同夏娃享有点样嘅自由？（请睇吓课文开头嘅图片）

⁴ 我哋从创世记嘅头两章可以睇出，亚当同夏娃生活得无忧无虑，唔需要担惊受怕，亦都唔会受到压迫；佢哋完全唔需要为食物同工作忧虑，唔使恐惧疾病同死亡。佢哋所享有嘅自由系今日世人梦寐以求嘅。（创世记1:27-29；2:8,9,15）噉系咪话，亚当同夏娃享有绝对嘅自由呢？等我哋嚟分析吓。

5．如果人想得到自由，就需要乜嘢？

⁵ 今日好多人都认为，真正嘅自由就系佢哋可以随意做任何自己想做嘅事，唔需要考虑后果。《世界图书百科全书》将自由定义为“作出选择同实行决定嘅能力”。呢本书话：“从法律嘅角度嚟睇，如果社会冇将唔公正、唔合理或者不必要嘅限制强加喺人民身上，人民就系自由嘅。”即系话，虽然人喺社会享有自由，但为咗使每个人都可以从中得益，定立某啲限制系必要嘅。不过问题系，边个先至有权定立公正、必要同合理嘅限制呢？

6．（甲）点解只有耶和华上帝先拥有绝对嘅自由？（乙）人类享有嘅自由系点样嘅？点解？

⁶ 讲到自由，我哋要记住嘅系，只有耶和华上帝先有绝对同无限嘅自由。因为佢系万物嘅创造主，亦都系拥有宇宙至高统治权嘅全能者。（提摩太前书1:17；启示录4:11）大卫王用优美嘅言词嚟形容耶和华嘅至高地位。（请读历代志上29:11,12）相比之下，无论天上定系地上嘅受造物所享有嘅自由只系相对嘅。佢哋必须承认，耶和华上帝拥有至高嘅权力，佢所设立嘅限制都系公正、必要同合理嘅。其实，耶和华从一开始就为人类定下界限。

7．边啲赖以维生嘅本能使我哋嘅生活更加多姿多彩？

⁷ 亚当同夏娃一开始享有好多自由，但系佢哋嘅自由系有限制嘅。有啲限制对佢哋嚟讲系必须嘅。例如，佢哋一定要呼吸、进食同瞓觉。佢哋会唔会觉得，有呢啲限制就系失去自由呢？唔会。因为呢一切都经过耶和华精心设计，可以为佢哋带嚟快乐同满足。（诗篇104:14,15；传道书3:12,13）试问边个会唔钟意呼吸清新嘅空气，品尝美味嘅食物，或者晚上舒舒服服噉瞓一觉呢？我哋做呢啲事唔会觉得有负担或者受到约束。亚当同夏娃都一定有同感。

8．上帝俾亚当同夏娃乜嘢吩咐？为要成就乜嘢旨意？

⁸ 耶和华明确吩咐亚当同夏娃要生儿育女，好好管理地球。（创世记1:28）呢个吩咐会唔会夺去佢哋嘅自由？当然唔会。相反，人类因为呢个吩咐而有机会为耶和华嘅旨意出一分力，使佢哋完美嘅后代可以永远住喺地上嘅乐园。（以赛亚书45:18）今日，无论人选择保持独身，抑或结婚但唔打算要小朋友，都冇违反上帝嘅旨意。不过总嘅嚟讲，虽然知道会面对各种挑战，好多人仲系会选择结婚生子。（哥林多前书7:36-38）因为结婚生子通常可以带俾人快乐同满足。（诗篇127:3）如果亚当同夏娃服从上帝，就能够永远享受佢哋嘅婚姻同家庭生活。

人类点样失去真正嘅自由

9．点解上帝喺创世记2:17嘅吩咐系公正、合理同必要嘅？

⁹ 耶和华俾咗亚当同夏娃另一个吩咐，又清楚讲明唔服从会有乜嘢后果。佢话：“只系‘辨识善恶树’嘅果，你唔可以食，因为你食咗，当日你就一定死。”（创世记2:17）呢个吩咐系咪唔公正、唔合理、冇必要？系咪夺去咗亚当同夏娃嘅自由？当然唔系。其实，好多圣经学者认为上帝呢个吩咐好有智慧，而且合情合理。有一位学者提出：“从上帝［喺创世记2:16,17］嘅吩咐可以得知，只有上帝知道，对人类嚟讲乜嘢系善，乜嘢系恶。为咗可以从‘善’嘅事得益，人类必须相信同服从上帝。如果佢哋唔服从，就要靠自己去制定善恶标准。”而呢个对人类嚟讲，系一个永远都唔能够成功应付嘅重担。

10．点解我哋唔应该将有自由意志同有权决定是非标准呢两件事混为一谈？

¹⁰ 好多人觉得，耶和华嘅吩咐剥夺咗亚当嘅自由。佢哋噉样谂，就系将有自由意志，同有权决定是非对错呢两件事混为一谈。亚当同夏娃的确有自由选择服唔服从上帝。不过，只有耶和华先有权决定绝对嘅是非标准，而伊甸园入面嘅“辨识善恶树”就系象征呢个权柄。（创世记2:9）我哋唔肯定自己嘅决定会有点样嘅结果，亦都唔知每次嘅结果系咪好嘅。所以我哋经常见到，有啲人怀住好嘅动机做某件事，但系结果不尽人意，甚至导致悲剧。（箴言14:12）冇错，人类嘅能力的确非常有限。耶和华仁爱噉教导亚当同夏娃点样运用真正嘅自由。佢哋选择点样做？

11,12．点解亚当同夏娃嘅决定导致悲惨嘅后果？请用比喻说明。

¹¹ 结果，亚当同夏娃选择背叛耶和华。撒但诱惑夏娃，向佢保证话：“你哋嘅心眼就会打开，你哋会好似上帝一样，能够辨识善恶”。（创世记3:5）最终系咪好似撒但讲嘅噉，亚当同夏娃可以得到更多嘅自由？唔系。佢哋好快就知道，拒绝接受耶和华嘅指引，走自己嘅路，会导致悲惨嘅下场。（创世记3:16-19）点解？简单嚟讲，耶和华并冇授权俾人去定立是非标准。（请读箴言20:24；耶利米书10:23）

¹² 呢个就好似飞行员驾驶飞机一样。为咗安全到达目的地，飞行员通常会按照一个预先设定好嘅飞行路线。只要佢利用现代航空设备嚟导航，同空中交通管制员保持联系，就可以去到目的地。不过，如果飞行员无视指引，随意选择自己想飞嘅路线，就可能造成严重嘅后果。亚当同夏娃就好似自行其是嘅飞行员噉，无视上帝嘅指引。结果点样？佢哋嘅决定令自己同所有后代都变得唔完美，最终都要死。（罗马书5:12）亚当同夏娃想自行定立是非标准，结果并冇得到更多嘅自由，反而使佢哋失去耶和华所赐嘅真正自由。

人类点样重获真正嘅自由

13,14．我哋可以点样得到真正嘅自由？

¹³ 有啲人觉得，最好能够有更多自由。不过其实，毫无限制嘅自由系一把两刃剑。的确，自由可以带俾我哋好多益处。但系如果呢个世界完全冇限制，你可以想象到会几咁得人惊。《世界图书百科全书》提到，由于呢个原因，每个有组织性嘅社会都有复杂嘅法律。因为佢哋既要保护人民嘅自由，同时亦都要作出限制。噉样做并唔容易。所以我哋睇到人类社会有好多法律条文，而呢啲法律亦都需要好多律师同法官去解释同实施。

¹⁴ 耶稣话俾我哋知点样先可以得到真正嘅自由。佢话：“你哋时刻遵守我讲嘅话，就真系我嘅门徒喇。你哋会认识真理，真理会使你哋自由。”（约翰福音8:31,32）如果想得到真正嘅自由，我哋就需要符合两个条件：第一，接受佢教导嘅真理；第二，成为佢嘅门徒。我哋而家受到乜嘢束缚？耶稣继续解释话：“凡系犯罪嘅人，就系罪嘅奴隶。……如果儿子使你哋自由，你哋就真系自由嘞。”（约翰福音8:34,36）

15．点解耶稣承诺嘅自由系真正嘅自由？

¹⁵ 耶稣对佢门徒承诺嘅自由，比今日大部分人所渴求嘅自由好得多。耶稣话：“如果儿子使你哋自由，你哋就真系自由嘞。”耶稣所讲嘅自由系从罪嘅奴役得到释放。成为罪嘅奴隶系全人类有史以来经历过最绝望嘅事。喺罪嘅影响下，我哋好容易做错事，就算我哋尽咗最大嘅努力都好难做啱嘅事。我哋成为罪嘅奴隶，结果只会面对挫折、痛苦同死亡。（罗马书6:23）使徒保罗对呢种痛苦同无奈深有体会。（请读罗马书7:21-25）我哋完全摆脱罪嘅枷锁，先有希望得到亚当同夏娃最初享有嘅自由。

16．我哋可以点样得到真正嘅自由？

¹⁶ 耶稣话：“你哋时刻遵守我讲嘅话”。呢个表明，如果我哋想通过耶稣得释放，就需要接受佢嘅教导同要求。作为献咗身嘅基督徒，我哋要承认唔再拥有自己，而且接受佢为门徒定立嘅标准。（马太福音16:24）就好似耶稣应许嘅噉，将来赎价喺我哋身上完全发挥作用嘅时候，我哋就可以得享真正嘅自由。

17．（甲）想得到真正嘅快乐同满足，我哋就要点样做？（乙）下一篇课文会讨论乜嘢？

¹⁷ 作为耶稣嘅门徒，我哋服从佢嘅教导就可以喺生活上得到真正嘅快乐同满足，将来亦都可以从罪同死亡嘅奴役得到完全嘅释放。（请读罗马书8:1,2,20,21）下一篇课文会讨论，我哋可以点样明智噉运用自己嘅自由，永远荣耀赐人真正自由嘅上帝——耶和华。

1,2．（甲）点解使徒保罗时代嘅人关注自由同奴隶一类嘅话题？（乙）保罗指出边个系真正自由嘅源头？

早期嘅基督徒生活喺罗马帝国统治之下。当时罗马帝国嘅人都对自己嘅法律同司法制度，以及所享有嘅自由感到自豪。不过，罗马帝国大部分权力同辉煌成就都系建立喺奴隶嘅血汗之上。曾经有一段时期，罗马百分之三十嘅人口都系奴隶。当时大多数人，包括基督徒，肯定非常关注自由同奴隶呢一类嘅话题。

² 使徒保罗喺佢嘅书信入面多次提及自由。虽然当时嘅人热衷追求社会或者政治嘅改革，但系呢啲并唔系保罗传道嘅目的。保罗冇倚靠世上嘅机构或统治者嚟追求自由，而系同基督徒同工一齐努力传道，向人传讲上帝王国嘅好消息，帮助人认识耶稣基督献出嘅宝贵赎价。保罗向信徒同工指出真正自由嘅源头系边个。喺写俾哥林多会众嘅第二封信入面，保罗清楚提到：“耶和华系灵。耶和华嘅灵喺边度，边度就有自由。”（哥林多后书3:17）

3,4．（甲）喺哥林多后书3:17之前，保罗谈及乜嘢？（乙）我哋想享有嚟自耶和华嘅自由，就必须点样做？

³ 保罗喺哥林多后书提到，因为摩西之前喺西奈山上企喺耶和华嘅天使面前，所以佢从山上落嚟嘅时候面上显出荣光。以色列人见到摩西面上发光就好惊，于是摩西用帕子蒙住自己嘅面。（出埃及记34:29,30,33；哥林多后书3:7,13）保罗话：“不过人归附耶和华，帕子就被除去。”（哥林多后书3:16）保罗噉样讲系咩意思呢？

⁴ 正如上一篇课文所讲，唯有创造万物嘅耶和华先至有绝对同毫无限制嘅自由。即系话，喺耶和华面前，同埋喺“耶和华嘅灵”所在之处就有自由。为咗享有呢种自由并从中得益，我哋就必须“归附耶和华”，同佢有亲密嘅关系。以色列人喺旷野嘅时候，冇用属灵嘅观点去睇耶和华为佢哋所做嘅事。佢哋嘅内心同头脑就好似俾帕子蒙住噉，结果从埃及得到释放之后，就用啱啱得到嘅自由嚟满足自己嘅欲望。（希伯来书3:8-10）

5．（甲）耶和华嘅灵带俾我哋边种自由？（乙）点解话，一个人就算被囚禁或者奴役都能够享有耶和华所赐嘅自由？（丙）我哋需要谂吓边啲问题？

⁵ 耶和华嘅灵所带嚟嘅自由，唔单止使人摆脱实际嘅奴役，仲可以成就人冇办法做到嘅事，就系摆脱罪同死亡嘅奴役，以及脱离错误宗教同习俗嘅束缚。（罗马书6:23；8:2）呢个真系无与伦比嘅自由！就算一个人被囚禁或者奴役，佢都能够享有呢种自由。（创世记39:20-23）袁迺慰姊妹同金海露弟兄由于信仰嘅缘故被监禁多年。你可以喺JW电视网听佢哋讲述自己嘅经历。（点击“访谈同经历”>“忍受逆境”）请谂吓：我哋可以点样表明自己珍视呢种自由？我哋可以点样明智运用呢种自由？

珍视上帝所赐嘅自由

6．乜嘢表明以色列人对耶和华所赐嘅自由冇感激之心？

⁶ 如果我哋知道一份贵重礼物嘅真正价值，就会向送礼嘅人表达感激之情。耶和华拯救咗以色列人，但系佢哋并冇感激为佢哋带嚟自由嘅上帝。离开埃及短短几个月之后，佢哋就开始怀念埃及嘅食物，对上帝大发怨言，甚至想返翻埃及。佢哋将“鱼……黄瓜、西瓜、韭葱、洋葱、大蒜”睇得比有自由崇拜真神耶和华更加重要。难怪耶和华对佢哋发怒。（民数记11:5,6,10；14:3,4）呢个真系我哋嘅前车之鉴！

7．保罗嘅行动点样同哥林多后书6:1所讲嘅一致？我哋可以点样效法佢？

⁷ 使徒保罗劝勉基督徒，唔好将耶和华通过佢嘅爱子耶稣赐俾我哋嘅自由视为理所当然。（请读哥林多后书6:1）身为唔完美嘅人，保罗系罪同死亡嘅奴隶，呢个令佢嘅良心饱受煎熬。不过，佢怀住感激之情话：“感谢上帝通过我哋嘅主耶稣基督救咗我！”点解佢噉样讲？佢解释话：“因为圣灵使人享有同基督耶稣联合嘅生命，圣灵嘅律法释放咗你，令你摆脱罪同死嘅律法。”（罗马书7:24,25；8:2）同保罗一样，我哋唔应该忘记，系耶和华帮助我哋摆脱罪同死亡嘅奴役。通过赎价，我哋能够以清白嘅良心，喜乐噉事奉耶和华。（诗篇40:8）

8,9．（甲）关于点样运用自由，使徒彼得提出乜嘢劝告？（乙）有啲人点样滥用自己嘅自由？

⁸ 除咗表示感激之外，我哋都应该谨记，千祈唔好滥用自己宝贵嘅自由。使徒彼得提醒我哋，唔好用我哋嘅自由作为顺应肉体欲望嘅借口。（请读彼得前书2:16）呢个提醒令我哋谂起，以色列人喺旷野嘅下场。今日，我哋面对嘅危险可能比以色列人嘅更加多。撒但同佢嘅世界喺饮食、娱乐、衣着打扮等方面都使我哋受到好多诱惑。精明嘅广告商经常用俊男美女做宣传，令我哋觉得必须要买一啲自己根本唔需要嘅嘢。我哋好容易就会落入呢啲圈套，滥用自己嘅自由！

⁹ 彼得嘅劝告亦都适用喺生活嘅其他重要方面，例如教育、工作或事业。今日好多人都鼓励年轻人追求高等教育。外界统计嘅数据往往显示，大学毕业生嘅收入同高中毕业生嘅收入有好大差异，所以好多年轻人以为接受高等教育就可以揾到高收入、令人羡慕嘅工作。另外，佢哋考虑到自己所作嘅决定会对将来产生深远嘅影响，所以佢哋可能觉得接受高等教育系一个唔错嘅选择。佢哋同父母应该谨记乜嘢？

10．我哋运用自由为个人嘅事做决定嘅时候，应该谨记乜嘢？

¹⁰ 有啲人认为，既然呢个系个人嘅决定，只要自己良心觉得冇问题，就可以自由噉做自己想做嘅事。佢哋可能谂到，保罗喺食物呢件事上对哥林多基督徒讲嘅话，“我嘅自由何必受人哋嘅良心妄断呢？”（哥林多前书10:29）虽然，喺接受教育同就业方面我哋有自由自己做决定，但系要记住，我哋嘅自由系相对嘅。我哋所作嘅决定会带嚟唔同嘅结果。由于呢个原因，保罗话：“凡事都可以做，但唔系样样都有益处。凡事都可以做，但唔系样样都强化人。”（哥林多前书10:23）所以，我哋虽然有自由为个人嘅事做决定，不过唔应该只系考虑自己嘅意愿，仲要留意其他更重要嘅事。

明智运用自由事奉上帝

11．耶和华出于乜嘢目的使我哋得到释放？

¹¹ 彼得提醒我哋唔好滥用自由，而系要善用自由“做上帝嘅奴隶”。所以，耶和华通过耶稣使我哋得到释放，脱离罪同死嘅劳役，目的系想我哋用自己嘅一生事奉佢。

12．挪亚一家为我哋立下点样嘅榜样？

¹² 用我哋嘅时间同精力全心事奉耶和华，就系运用自由嘅最好方法。噉样我哋就会得到保护，唔会专注于追求世俗目标或者只顾满足个人欲望。（加拉太书5:16）请睇吓族长挪亚同佢家人嘅例子。佢哋生活喺一个充满暴力同不道德嘅世界。但系，佢哋并冇受周围嗰啲只顾满足自己欲望嘅人影响。佢哋善用自由，喺耶和华吩咐嘅事上保持忙碌，建造方舟、为自己同动物储存食物以及向人发出警告。“挪亚就噉样做。凡系上帝吩咐佢嘅，佢都照住做。”（创世记6:22）结果挪亚同家人能够活着渡过大洪水。（希伯来书11:7）

13．耶稣将自己接获嘅乜嘢任务交托俾门徒？

¹³ 今日，耶和华吩咐我哋要做乜嘢？作为耶稣嘅门徒，我哋清楚知道上帝交托嘅任务就系向人传道。（请读路加福音4:18,19）今日，大多数人依然俾现行制度嘅神蒙蔽住心眼，受宗教、经济同政治制度劳役。（哥林多后书4:4）跟从耶稣嘅榜样，帮助人认识同崇拜赐人自由嘅上帝耶和华，系我哋嘅殊荣。（马太福音28:19,20）不过，做呢个工作一啲都唔容易。喺某啲地方，人对我哋传讲嘅信息冇兴趣，甚至对我哋充满敌意。既然耶和华吩咐我哋传道，噉我哋应该谂吓：“我可以点样善用自己嘅自由为耶和华作出更多服务？”

14,15．上帝嘅好多忠仆点样扩大传道服务？（请睇吓课文开头嘅图片）

¹⁴ 好多弟兄姊妹意识到而家时势紧迫，于是简化生活，参与全时传道工作，呢个的确令人大受鼓励。（哥林多前书9:19,23）佢哋有啲喺自己嘅地区服务，有啲就搬去需求更大嘅地区。喺过去五年，有超过25万个弟兄姊妹开始做正规先驱，而家全球嘅正规先驱人数已经超过110万。有咁多人善用自由事奉耶和华，真系振奋人心！（诗篇110:3）

¹⁵ 乜嘢帮助呢啲弟兄姊妹明智运用自己嘅自由？过去30年来，约翰同朱迪思喺唔同嘅国家服务过。佢哋记得，1977年先驱训练班啱啱开始嘅时候，学员都受到鼓励搬去需求更大嘅地区服务。为咗专心追求呢个目标，约翰换咗好多份工作，噉佢哋就可以保持过简单嘅生活。后来，佢哋去咗国外服务。喺国外，佢哋面对好多困难，例如要学习新语言，适应唔同嘅文化，亦都要忍受恶劣嘅气候。不过佢哋发现，只要向耶和华祷告，全心信赖佢，就可以帮助自己克服困难。佢哋对咁多年来嘅海外服务有咩感受？约翰话：“我觉得自己全心投入嘅工作系最有意义嘅。对我嚟讲，耶和华越来越真实，就好似一个仁爱嘅父亲噉。雅各书4:8话：‘你哋要亲近上帝，上帝就会亲近你哋。’而家我更加明白呢节经文嘅意思。我知道，我已经揾到自己一直梦寐以求、令人心满意足嘅生活。”

16．成千上万嘅弟兄姊妹点样明智噉运用佢哋嘅自由？

¹⁶ 好多人都好似约翰同朱迪思噉长期从事全时服务。但系，有啲人受环境所限，只能够参与短期嘅全时服务。虽然系噉，好多人都尽力参与组织喺世界各地嘅志愿建筑工作。例如，纽约沃威克建造新嘅世界总部嗰时，大概有2万7000个弟兄姊妹调整自己嘅生活嚟参与呢项工作，有啲做咗两个星期，有啲一年，有啲甚至时间更长。为咗喺沃威克工作，好多弟兄姊妹作出好大嘅牺牲。佢哋善用自己嘅自由嚟赞美同荣耀赐人自由嘅上帝耶和华，的确系我哋嘅好榜样！

17．如果我哋善用自由，将来就可以享有乜嘢福分？

¹⁷ 我哋好开心可以认识耶和华，而且享有正确崇拜所带嚟嘅自由。愿我哋所作嘅决定表明自己珍视呢种自由。我哋应该竭尽全力为耶和华服务，而唔系滥用佢赐俾我哋嘅自由。耶和华嘅预言应验嗰阵，我哋就可以得享佢应许嘅福分。佢话：“受造嘅众生都获得释放，唔再受腐败所奴役，反而得享上帝儿女荣耀嘅自由”。（罗马书8:21）