1． 乜嘢表明耶和华系慷慨嘅上帝？

喺创造万物之前，耶和华系全宇宙唯一嘅个体。不过，佢冇只系谂住自己，反而将生命呢份宝贵嘅礼物赐俾天使同人类。耶和华系“快乐嘅上帝”，佢乐意赐人各样美善嘅恩赐。（提摩太前书1:11；雅各书1:17）佢亦都好希望我哋快乐，所以教导我哋要向人表现慷慨。（罗马书1:20）

2,3． （甲）点解我哋慷慨施与会感到快乐？（乙）呢篇课文会讨论乜嘢？

² 耶和华按照自己嘅形像创造人类。（创世记1:27）呢个意味住，我哋可以反映出佢嘅特质。耶和华设计人嘅时候，使人可以效法佢嘅榜样，并通过关心人、向人表现慷慨而得到快乐同满足。（腓立比书2:3,4；雅各书1:5）所以，我哋就算唔完美，都可以学习上帝点样慷慨待人。

³ 呢篇课文会讨论，圣经点样教导我哋向人表现慷慨。我哋会睇吓表现慷慨可以点样使上帝嘅心欢喜，同埋培养呢种特质点样帮助我哋执行上帝交托嘅工作。我哋亦都会分析慷慨同快乐有乜嘢关系，以及点解我哋要继续培养慷慨呢种特质。

令上帝嘅心欢喜

4,5． 耶和华同耶稣喺慷慨方面为我哋立下乜嘢榜样？

⁴ 耶和华希望我哋效法佢，向人表现慷慨。我哋噉样做，就可以令佢嘅心欢喜。（以弗所书5:1）耶和华奇妙噉创造人类同美丽嘅地球，呢一切表明佢好希望我哋快乐。（诗篇104:24；139:13-16）所以，我哋努力帮助人得到快乐，就可以荣耀上帝。

⁵ 耶稣基督喺表现慷慨方面立下完美嘅榜样，所以真基督徒都应该效法佢。耶稣话：“人子嚟到，唔系要受人服事，而系要服事人，并且献出生命，作为好多人嘅赎价。”（马太福音20:28）使徒保罗亦都劝勉基督徒话：“基督耶稣怀有点样嘅精神，你哋都要怀有点样嘅精神。……［佢］彻底舍弃自己，以奴隶嘅形态，成为人。”（腓立比书2:5,7）每个人都可以问吓自己：“我喺跟从耶稣方面系咪可以做得更好？”（请读彼得前书2:21）

6． 耶稣通过好心嘅撒马利亚人嘅比喻教导我哋乜嘢？（请睇吓课文开头嘅图片）

⁶ 我哋效法耶和华同耶稣嘅完美榜样，尽力关心同帮助人，就可以令耶和华嘅心欢喜。当一个犹太人问耶稣边个系佢要爱嘅人嗰时，耶稣就讲咗好心嘅撒马利亚人嘅比喻。（请读路加福音10:29-37）耶稣通过呢个比喻教导门徒，就算其他人嘅背景同自己唔同，都要尽力帮助佢哋。呢个表明，如果我哋想蒙上帝悦纳，就要效法嗰个撒马利亚人，慷慨待人。

7． 我哋点样做就表明自己确信上帝嘅做事方式系最好嘅？

⁷ 基督徒应该慷慨待人嘅另一个理由同伊甸园嘅事件有关。撒但声称，亚当同夏娃如果反叛上帝，只顾满足自己嘅私欲，就会更加快乐。撒但所讲嘅话其实亦都针对全人类。夏娃顺应自己嘅欲望行事，想变得好似上帝一样，而亚当亦都同样顺应私欲，想取悦夏娃过于取悦上帝。（创世记3:4-6）佢哋所作嘅决定造成悲惨嘅后果。呢个清楚表明，自私嘅精神唔会使人幸福快乐。我哋表现无私慷慨嘅精神，就可以表明我哋确信上帝嘅做事方式系最好嘅。

执行上帝交托嘅工作

8． 亚当同夏娃从耶和华嘅吩咐可以睇出乜嘢？

⁸ 虽然一开始喺伊甸园入面只有亚当同夏娃两个人，不过，耶和华吩咐佢哋要繁衍增多，遍满地面，开拓大地。（创世记1:28）佢哋从耶和华嘅吩咐可以睇出，自己所做嘅事会影响到整个人类大家庭。耶和华希望地上所有人都享有幸福快乐嘅生活。亚当同夏娃都应该效法耶和华，为佢哋将来嘅子孙后代着想。当乐园扩展至整个地球嘅时候，全人类都可以安居其中。亚当、夏娃如果冇反叛上帝，就可以同佢哋嘅后代一齐合作，共同成就呢项规模庞大嘅工作。

9． 点解地球成为乐园可以令全人类享有幸福快乐嘅生活？

⁹ 为咗成就耶和华嘅旨意，使地球成为乐园，完美嘅人类要同耶和华一齐工作。噉样，佢哋就可以得享上帝嘅安息。（希伯来书4:11）呢个真系一项令人心满意足嘅工作！耶和华会因为佢哋无私噉献出自己造益他人而大大赐福俾佢哋。

10,11． 我哋可以点样执行传道教人嘅工作？

¹⁰ 今日，耶和华交托俾佢子民一项重要嘅工作，就系传道并帮助人成为基督徒。为咗执行呢个任务，我哋要真诚噉关心其他人。我哋只有怀住正确嘅动机，爱耶和华同其他人，先至可以坚持不懈噉执行呢项工作。

¹¹ 喺公元1世纪，保罗将自己同一啲亲密嘅朋友称为“上帝嘅同工”，因为佢哋传讲并教导人王国真理。（哥林多前书3:6,9）今日，我哋表现慷慨，通过献出自己嘅时间、精力同资财嚟执行上帝嘅传道工作，亦都可以成为“上帝嘅同工”。呢个真系好大嘅殊荣！

12,13． 帮助人成为基督徒可以带嚟乜嘢福分？

¹² 我哋慷慨噉运用自己嘅时间同精力参与传道教人嘅工作，可以得到好大嘅喜乐。好多弟兄姊妹见到圣经学生不断进步，都认为冇其他事可以比呢项工作更能够令自己深感满足。当我哋见到圣经学生受真理打动、信心不断增长、喺生活上作出改变、开始向其他人分享真理嗰时，内心感到非常喜乐。耶稣曾经差派70个门徒去向人传道。呢啲门徒因为地区反应良好，就“欢欢喜喜返到嚟”。耶稣亦都因为佢哋而得到好大嘅喜乐。（路加福音10:17-21）

¹³ 世界各地嘅传道员都好开心见到王国真理使好多人嘅生活得以改善。我哋嚟睇吓一个叫做安娜a嘅年轻独身姊妹嘅经历。佢扩大服务，搬去东欧一个需求更大嘅传道地区。佢话：“我喺呢度好开心，因为有好多机会可以揾到圣经学生。传道工作带俾我好大嘅喜乐。我返到屋企嗰时，根本冇时间去谂自己嘅难题。我谂嘅系圣经学生，以及佢哋嘅困难同忧虑。我谂办法鼓励佢哋，亦都谂吓可以点样有效噉帮助佢哋。‘施与比接受更快乐’呢句话讲得真系一啲都冇错。”（使徒行传20:35）

14． 即使传道地区嘅人对真理反应冷淡，我哋都可以点样从传道工作得到快乐？

¹⁴ 就算传道对象唔愿意听好消息，我哋都可以因为自己已经尽力传讲真理而感到快乐。喺以西结嘅日子，好多人唔听耶和华嘅警告。不过，耶和华吩咐以西结话：“无论佢哋听抑或唔听，你都要将我嘅话讲俾佢哋知。”（以西结书2:7；以赛亚书43:10）今日，耶和华亦都俾咗我哋同样嘅任务。虽然有啲人对我哋传讲嘅信息冇兴趣，但耶和华好珍视我哋付出嘅努力。（请读希伯来书6:10）一个弟兄对传道工作有好好嘅态度，佢话：“我哋栽种、淋水，而且怀住希望，祈求上帝帮助嗰啲对真理感兴趣嘅人喺属灵上不断成长。”（哥林多前书3:6）

快乐嘅要诀

15． 点解我哋唔应该只系向嗰啲感激我哋嘅人表现慷慨？

¹⁵ 耶稣希望我哋向人表现慷慨并从中得到快乐。佢鼓励我哋话：“要经常向人施与，你哋就必会蒙施与。人必会将十足嘅分量，连摇带按，倒入你哋嘅衫袋，直到满泻。你哋用乜嘢量器量俾人，人就会用乜嘢量器量翻俾你哋。”（路加福音6:38）当然，唔系人人都会接受我哋嘅好意，不过好多人会感激我哋慷慨对待佢哋，并受到推动向其他人表现慷慨。无论对方系咪感激我哋，我哋都应该继续慷慨待人。话唔定我哋某一次嘅慷慨举动会带嚟美好嘅结果。

16． 乜嘢推使我哋向人表现慷慨？

¹⁶ 真正慷慨嘅人唔会期望对方回报自己。耶稣话：“你设宴嘅时候，要请贫穷嘅、伤残嘅、跛脚嘅、盲眼嘅，噉样你就有福嘞，因为佢哋冇乜嘢可以报答你。”（路加福音14:13,14）圣经话：“慷慨嘅人必然蒙福”。另一节经文话：“关怀寒微人嘅人真系有福！”（箴言22:9；诗篇41:1）的确，我哋应该向人施与，因为我哋帮助人就会得到喜乐。

17． 点样嘅施与会使你快乐？

¹⁷ 耶稣讲过：“施与比接受更快乐。”当保罗引述耶稣呢番话嗰阵，佢所讲嘅唔系只系物质上嘅施与，亦都包括鼓励、指引同帮助嗰啲有需要嘅人。（使徒行传20:31-35）保罗通过自己嘅所言所行向我哋表明，付出自己嘅时间、精力去关爱其他人的确好重要。

18． 关于表现慷慨，一啲研究人员点样讲？

¹⁸ 有啲社会科学研究人员亦都发现，慷慨大方嘅人通常会更快乐。佢哋发表嘅文章指出，人主动为其他人做好事，自己都会感到开心。佢哋又提到，帮助他人嘅行为满足咗人类嘅基本需要，可以使我哋嘅人生充满意义。佢哋建议，一个人如果想更加健康、快乐，就应该多啲参与志愿服务。当然，我哋对呢啲研究结果唔会觉得出奇，因为仁爱嘅创造主耶和华好早之前就讲过，施与会使我哋更快乐。（提摩太后书3:16,17）

继续培养慷慨嘅精神

19,20． 向人表现慷慨点样使你得益？

¹⁹ 如果身边嘅人只系顾住自己，噉我哋就唔容易向佢哋表现慷慨嘞。不过耶稣话，最大嘅两条诫命系，要全心、全意、全智、全力爱耶和华同埋要爱人如己。（马可福音12:28-31）就好似呢篇课文所讲嘅，一个人如果爱耶和华，就会效法佢。耶和华同耶稣都乐意向人施与，佢哋亦都鼓励我哋噉样做，因为我哋可以从中得到真正嘅快乐。我哋尽力表现慷慨，就可以荣耀耶和华，并造益自己同其他人。

²⁰ 相信你已经尽力向人表现慷慨，特别系对我哋嘅弟兄姊妹。（加拉太书6:10）如果你继续努力噉样做，大家一定会好爱你、感激你所付出嘅一切，而你自己亦都会感到好快乐。正如箴言11:25所讲：“慷慨嘅人，必得丰盈；大方滋润人嘅，必蒙大方滋润。”下一篇课文会讨论，喺生活同传道方面，我哋可以通过边啲方式无私噉献出自己，表现慷慨嘅精神。

1． 喺边啲方面我哋可以同耶和华一齐工作？

耶和华系人类嘅创造主，佢希望完美嘅人类可以同佢合作，一齐实现佢对地球嘅旨意。虽然人类而家都唔完美，但忠于上帝嘅人仍然能够每日同耶和华一齐工作。例如，我哋做“上帝嘅同工”，传讲上帝王国嘅好消息，并帮助人成为基督嘅门徒。（哥林多前书3:5-9）试谂吓，我哋可以同宇宙全能嘅创造主合作，完成呢项伟大嘅工作，系几咁大嘅殊荣！不过，传讲好消息同帮助人成为基督徒唔系我哋同耶和华一齐做嘅唯一一项工作。呢篇课文会分析，喺帮助家人同弟兄姊妹、表现好客精神、参与志愿建筑工程同埋扩大神圣服务呢几个方面，我哋可以点样同耶和华一齐工作。（歌罗西书3:23）

2． 点解喺事奉耶和华方面，我哋唔应该同人比较？

² 讨论呢篇课文嘅时候请谨记，每个人嘅年龄、健康、环境同能力都唔一样。所以，喺事奉耶和华方面，千祈唔好同其他人比较。使徒保罗受圣灵启示话：“每个人都应该察验自己所做嘅事。噉样，人高兴系因为自己嘅成就，唔系因为同人比较。”（加拉太书6:4）

帮助家人同弟兄姊妹

3． 点解话，照顾家人就系同耶和华合作？

³ 耶和华希望佢嘅仆人照顾自己嘅家人。例如：有啲弟兄姊妹要工作养家；有啲姊妹要留喺屋企照顾年幼嘅儿女；有啲成年嘅子女要照顾体弱多病嘅父母。呢啲都系必须要做嘅事。圣经话：“人唔照顾亲属，尤其系唔照顾自己嘅家人，其实就等于否认信仰，比不信嘅人更加唔好。”（提摩太前书5:8）如果你有呢啲家庭责任，可能会觉得，自己好难抽出时间为耶和华做更多服务。请唔好灰心！你照顾好家人，耶和华都会感到开心。（哥林多前书10:31）

4． 基督徒父母可以点样表明自己将王国放喺首位？噉样做有乜嘢美好结果？

⁴ 基督徒父母帮助儿女定立目标事奉耶和华，就系同耶和华合作。好多儿女自细受到父母良好嘅教导，后来都投身全时服务，甚至去到好远嘅地方为耶和华工作。佢哋有啲做特派传道员，有啲做先驱去需求更大嘅地区帮手，有啲就从事伯特利工作。虽然儿女远离家乡，父母唔能够经常同佢哋喺一齐，不过，有自我牺牲精神嘅父母会鼓励儿女继续执行佢哋嘅委派。点解？佢哋知道儿女将王国放喺生活首位，就感到非常喜乐同满足。（约翰三书4）哈拿认为，自己嘅仔撒母耳系“借俾”耶和华嘅。可能好多基督徒父母都同哈拿有一样嘅谂法。佢哋有正确嘅观点，觉得同耶和华合作系好大嘅殊荣。（撒母耳记上1:28）

5． 你可以点样为信徒同工提供实际嘅帮助？（请睇吓课文开头嘅图片）

⁵ 如果你嘅家庭责任唔系咁多，噉你可唔可以帮助嗰啲年纪老迈、体弱多病，或者其他有需要嘅信徒同工？你可以细心留意吓自己嘅会众，睇吓边啲人需要帮助。你或者可以花一啲时间帮助一个基督徒姊妹照顾佢年老嘅父母，噉佢就可以抽身处理其他事。你亦都可以接送一啲有需要嘅弟兄姊妹参加聚会，帮佢哋购买食物或生活用品，或者陪佢哋去医院探望亲友。可能耶和华就系通过你向呢啲同工伸出援手，回应佢哋嘅祷告。（请读哥林多前书10:24）

表现好客精神

6． 表现好客意味住乜嘢？

⁶ 我哋身为上帝嘅同工，都应该有慷慨好客嘅精神。喺圣经原文，翻译为“好客”嘅希腊语词，意思系“仁慈噉对待陌生人”。（希伯来书13:2）圣经入面嘅好多记载都教导我哋用噉样嘅方式表现爱心。（创世记18:1-5）我哋能够，亦都应该经常揾机会帮助其他人，无论对方系咪我哋嘅信徒同工。（加拉太书6:10）

7． 慷慨接待全时仆人点样使自己得益？

⁷ 作为耶和华嘅同工，你愿唔愿意慷慨款待到访嘅全时仆人？（请读约翰三书5,8）我哋噉样做，就可以同弟兄姊妹“互相鼓励”。（罗马书1:11,12）请睇吓奥拉夫嘅经历。几十年前，一个独身嘅分区监督探访奥拉夫嘅会众，不过冇人能够接待佢。年轻嘅奥拉夫就问不信嘅父母，可唔可以俾分区监督住喺屋企。父母同意咗，不过奥拉夫就要自己瞓梳化。呢个牺牲系好值得嘅。奥拉夫回忆话：“嗰个星期过得真系开心！分区监督同我每日一早就起身，一边食早餐一边讨论各种有意思嘅话题。我得到好多鼓励，好想投身全时服务。”奥拉夫后来成为特派传道员，40年来喺唔同嘅国家服务。

8． 就算传道对象反应唔系咁好，点解我哋仲系应该表现仁慈？请举例。

⁸ 我哋可以喺好多方面向陌生人表现爱心。即使一开始对方唔接受我哋嘅好意，我哋都应该噉样做。请睇吓以下嘅例子。一个西班牙嘅姊妹帮助嚟自厄瓜多尔嘅耶茜卡学习圣经。有一次，佢哋讨论嘅时候，耶茜卡一直系噉喊，于是姊妹问佢发生咩事。耶茜卡话，佢喺搬嚟西班牙之前，生活好贫穷。有一日佢冇钱买食物，净系可以俾啲水个女饮。佢一边氹个女瞓觉，一边向上帝祷告。冇几耐，就有两个姊妹嚟探访佢。不过，耶茜卡对佢哋一啲都唔客气，仲撕烂咗佢哋送俾佢嘅杂志。佢话：“唔通呢啲杂志可以喂饱我个女咩？”两个姊妹尝试安慰佢，不过冇咩用。之后，两个姊妹将一篮食物放喺佢门口。耶茜卡被姊妹嘅仁慈举动深深打动。佢亦都感到自责，因为自己居然冇留意到上帝回应咗自己嘅祷告。而家，耶茜卡决心事奉耶和华。呢啲姊妹嘅慷慨精神，带嚟几咁美好嘅结果！（传道书11:1,6）

参与志愿服务

9,10． （甲）古代嘅以色列人通过乜嘢机会参与志愿服务？（乙）今日，基督徒男子可以喺边啲方面为会众服务？

⁹ 喺古代，以色列人有好多机会可以参与志愿服务。（出埃及记36:2；历代志上29:5；尼希米记11:2）今日，你亦都可以通过唔同方式献出自己嘅时间、资财同技能为弟兄姊妹服务。噉样做会令你得到好多喜乐同福分。

¹⁰ 上帝嘅话语鼓励会众嘅男子尽力追求善工同监督嘅职分，呢个都系同上帝一齐工作嘅一个方式。（提摩太前书3:1,8,9；彼得前书5:2,3）基督徒男子噉样做，就系想喺属灵上同实际上帮助其他人。（使徒行传6:1-4）长老有冇曾经委派你做招待员，或者请你协助管理书籍同传道地区、保养王国聚会所或者其他事情呢？好多弟兄喺呢啲方面为会众服务，从中得到好大嘅喜乐。

11． 一个姊妹参与志愿建筑工程嗰时结交咗好多朋友，佢点样从中得益？

¹¹ 参与志愿工程嘅人可以结识好多新朋友。一个叫玛吉嘅姊妹有18年嘅时间一直参与王国聚会所建筑工程。喺唔同嘅工程中，佢都关心同培训年轻嘅姊妹。佢觉得参与志愿建筑工程可以同其他弟兄姊妹互相鼓励。（罗马书1:12）每当佢喺生活上遇到困难，喺参与建筑工程嗰时结识嘅好多朋友都会俾佢好大嘅支持同帮助。你有冇曾经参与过类似嘅志愿建筑工程呢？无论你有冇特别嘅技能，都可以参与。

12． 发生灾难嘅时候，我哋可以点样帮助受灾嘅弟兄姊妹？

¹² 发生灾难嘅时候，我哋为受灾嘅弟兄姊妹提供实际嘅帮助，从而有机会同上帝一齐工作。例如，我哋可以喺经济上援助同工。（约翰福音13:34,35；使徒行传11:27-30）另一个方法就系，协助灾后嘅清理同重建工作。喺波兰，有个姊妹叫做加芙列拉，佢间屋俾洪水摧毁咗。佢好开心见到附近会众嘅弟兄姊妹过嚟帮助佢。佢回忆话：“我唔想讲自己失去咗啲乜嘢，因为嗰啲只不过系物质上嘅。反而我好想大家知道，我得到咗更多。呢次经历使我感受到，身为基督徒会众嘅一分子系好大嘅殊荣，亦都使我得到好大嘅喜乐。”好多灾后接受过帮助嘅弟兄姊妹都有同样嘅感觉。而嗰啲同耶和华一齐工作，帮助同工嘅弟兄姊妹都感到非常喜乐同满足。（请读使徒行传20:35；哥林多后书9:6,7）

13． 志愿服务点样强化我哋同耶和华嘅关系？请举例。

¹³ 有啲见证人因为自己嘅地区发生战争，就逃到美国避难。斯蒂芬妮同其他同工向呢啲逃难嘅弟兄姊妹伸出援手，帮助佢哋揾屋同预备家私。斯蒂芬妮话：“佢哋因为感受到世界弟兄团体嘅关爱就好喜乐，亦都满怀感激。我哋见到佢哋噉样都好感动。”佢又话：“呢啲家庭觉得我哋帮咗佢哋好多，其实我哋从佢哋嗰度得到更多。我哋大家都喺呢个过程中体验到爱心、团结、信心同埋对耶和华嘅仰赖，呢个使我哋更加爱耶和华，亦都使我哋更加珍视从上帝组织所得到嘅一切。”

扩大服务

14,15． （甲）以赛亚先知有点样嘅精神？（乙）今日嘅王国传道员可以点样效法以赛亚？

¹⁴ 你系咪想为耶和华做更多服务？你愿唔愿意搬去一个需要更多传道员嘅地区？当然，我哋事奉耶和华唔一定要离乡别井，不过好多弟兄姊妹因为情况允许，就愿意搬到其他地方扩大服务。当耶和华问“我可以差遣边个呢？边个肯为我哋去呢？”嘅时候，佢哋就表现出同以赛亚先知一样嘅精神，回答话：“我喺呢度！请差遣我！”（以赛亚书6:8）你有冇意愿扩大服务？你嘅情况允唔允许？你仲可以喺边啲方面提供帮助？

¹⁵ 关于传讲好消息同帮助人成为基督徒嘅工作，耶稣话：“庄稼的确好多，工人实在太少。所以，你哋要恳求庄稼嘅主人，差工人出去收割佢嘅庄稼。”（马太福音9:37,38）你可唔可以做先驱，或者搬去需求更大嘅地区服务，又或者你可唔可以帮助其他人噉样做？好多弟兄姊妹都觉得，向耶和华同其他人表现爱心嘅最好方式，就系投身先驱服务，去需求更大嘅地区参与收割属灵庄稼嘅工作。可能你仲有其他方法可以扩大服务，只要你尽力去做，就一定会满心喜乐。

16,17． 如果你想为耶和华扩大服务，可以把握乜嘢机会？

¹⁶ 你愿唔愿意投身伯特利服务或者协助建筑工程？无论作为临时成员抑或通勤人员，你系咪都愿意献出自己？有啲弟兄姊妹愿意为耶和华去任何地方，接受任何委派。佢哋可能掌握某啲技能，喺某方面亦都好有经验，但如果组织有特别嘅需要，佢哋都乐意接受唔同嘅委派。上帝嘅组织一直都需要呢啲甘心乐意献出自己嘅弟兄姊妹。耶和华亦都好赏识佢哋所表现嘅自我牺牲精神。（诗篇110:3）

¹⁷ 你愿唔愿意接受更多训练，从而装备好自己，使自己更有效噉为耶和华服务？如果你愿意，就可以立下目标，努力符合资格参加王国传福音者训练班。嗰啲从事全时服务、有属灵思想嘅弟兄姊妹，通过呢个训练班得到好好嘅训练，可以为上帝嘅组织做更多嘅工作。申请参加呢个训练班嘅传道员，愿意喺毕业之后接受组织嘅任何委派。你系咪都好想把握呢个机会，尽力做更多嘅服务？（哥林多前书9:23）

18． 我哋每日同耶和华一齐工作，可以得到乜嘢益处？

¹⁸ 我哋待人慷慨，就表明我哋有良善、仁慈、爱心呢啲美好嘅特质。我哋作为耶和华嘅子民，每日都应该表现慷慨嘅精神，关心其他人。噉样，我哋就可以得到喜乐、和平同幸福。（加拉太书5:22,23）无论个人情况系点，你都能够效法耶和华，向人表现慷慨，成为佢宝贵嘅同工！（箴言3:9,10）