1．马大相信佢死咗嘅弟弟会有乜嘢希望？（请睇吓课文开头嘅图片）

耶稣嘅好朋友兼门徒马大正喺度悲伤痛哭。佢嘅弟弟拉撒路啱啱死咗。有乜嘢可以减轻佢嘅悲痛？耶稣向佢保证：“你嘅兄弟一定会复活。”虽然呢个未必可以完全消除马大嘅一切悲痛，但系佢对耶稣嘅保证有信心。马大话：“我知道喺最后嘅日子复活嘅时候，佢一定复活。”（约翰福音11:20-24）佢好肯定呢件事会喺将来发生。不过就喺当日，耶稣施行奇迹，复活咗拉撒路。

2．点解你想有马大噉样嘅信心？

² 今日，我哋唔会期望耶稣或者天父为我哋施行噉样嘅奇迹。但系你会唔会好似马大一样，深信去世咗嘅亲友会喺将来被复活？佢可能系你深爱嘅配偶、爸爸、妈妈、祖父母，又或者系你最痛锡嘅仔女。你一定感到好悲痛，好想再次揽实佢，同佢倾计，同佢一齐笑。好似马大一样，我哋可以好肯定噉话：“我知道我嘅亲友一定会复活。”不过，每个基督徒都应该沉思点解自己相信复活嘅希望。

3,4．耶稣所做嘅点样强化马大嘅信心？

³ 由于马大住喺耶路撒冷附近，佢可能冇机会亲眼见到耶稣喺加利利嘅拿因城复活寡妇个仔。但系，佢有可能听过呢件事。另外，耶稣亦都复活咗崖鲁嘅女。嗰啲喺崖鲁屋企嘅人都“知道个女仔已经死咗。”不过，耶稣拉住佢冰冷嘅手话：“细路女，起身！”跟住，佢就即刻起咗身。（路加福音7:11-17；8:41,42,49-55）马大同妹妹马利亚，都知道耶稣有能力医好病人。由于系噉，佢哋觉得如果耶稣当时在场，拉撒路就唔会死。但系而家拉撒路都死咗嘞，将来佢有乜嘢希望？请留意，马大提到拉撒路“喺最后嘅日子”，即系喺将来会被复活。点解马大可以咁肯定？点解你相信喺将来自己嘅亲友有机会被复活？

⁴ 我哋有充分嘅理由相信复活嘅希望一定会实现。你可能喺圣经里面揾到一啲同复活有关嘅要点，系你从来都冇谂过嘅。呢啲要点可以强化你嘅信心，使你确信可以见翻死去嘅亲友。

带嚟希望嘅例子！

5．点解马大确信拉撒路一定会复活？

⁵ 请留意，马大唔系话“我希望我弟弟复活”，而系话“我知道……佢一定复活”。马大知道喺耶稣开始传道之前同复活有关嘅一啲奇迹，所以佢对复活怀有坚定嘅信心。佢可能自细就喺屋企喺会堂学过呢啲记载，或者佢谂到圣经里面嘅三个例子。

6．以利亚施行咗乜嘢奇迹？呢个同马大有乜嘢关系？

⁶ 第一个同复活有关嘅事件发生喺先知以利亚嘅时候。当时，上帝赐力量俾佢施行奇迹。喺腓尼基嘅沿海城镇撒勒法，一个穷寡妇向以利亚表现好客精神。上帝就施行奇迹，供应寡妇油同面粉，使佢同个仔都可以继续维持生命。（列王纪上17:8-16）后来佢个仔患咗重病，冇几耐就死咗嘞。以利亚为寡妇带嚟安慰，佢伏喺细路仔身上，祷告话：“上帝啊，求你使呢个细路仔有翻生命。”真系出现咗奇迹！上帝垂听咗以利亚嘅祷告，复活咗细路仔。呢个就系圣经记载嘅第一个同复活有关嘅例子。（请读列王纪上17:17-24）马大肯定亦都知道呢个圣经记载。

7,8．（甲）请描述以利沙点样减轻妇人嘅悲痛。（乙）以利沙施行嘅奇迹，表明耶和华有能力做乜嘢？

⁷ 圣经记载嘅第二个复活系以利亚嘅继承人以利沙施行嘅。一个喺书念为人所知嘅以色列妇人慷慨对待以利沙。上帝通过先知赐咗一个仔俾呢个妇人同佢上咗年纪嘅丈夫。几年之后，佢哋个仔死咗。你可以想象到，呢个母亲几咁悲痛欲绝。佢得到丈夫嘅同意，起程去到30公里（19英里）外嘅迦密山，喺嗰度揾到以利沙。先知派侍役基哈西先返去书念，不过基哈西救唔翻呢个细路，之后以利沙同妇人亦到咗书念。（列王纪下4:8-31）

⁸ 以利沙去到妇人屋企，喺细路仔身边祷告。耶和华垂听咗以利沙嘅祷告，将细路仔复活过嚟。妇人可以同个仔再次团聚，可想而知佢有几咁兴奋！（请读列王纪下4:32-37）妇人可能谂起哈拿带撒母耳去圣殿服务嗰时作嘅祷告：“耶和华……使人落到坟墓，亦都使人复活。”（撒母耳记上2:6）上帝复活呢个细路仔，表明佢有能力复活死人。

9．请解释第三个有关复活嘅事件同以利沙有乜嘢关系。

⁹ 不过，呢个唔系发生喺以利沙身上最后嘅一件奇妙事件。佢做咗50年先知，后来佢“病咗，好快就死嘞”。之后一支敌军入侵以色列，当时以利沙嘅尸体已经化为骸骨。有啲以色列人喺度埋葬紧一个死人，佢哋一见到入侵者，就将尸体掉喺埋葬以利沙嘅地方。圣经记载：“死尸一掂到以利沙嘅骸骨就复活，企咗起身。”（列王纪下13:14,20,21）可想而知，呢啲复活嘅记载对马大嚟讲，意义几咁重大！上帝的确有能力战胜死亡。你可以沉思吓，复活嘅记载对你有乜嘢意义。呢啲记载应该使你确信上帝有强大、无穷嘅力量。

发生喺公元1世纪嘅事件

10．彼得点样复活一个死咗嘅基督徒姊妹？

¹⁰ 希腊语经卷里面都记载咗一啲同复活有关嘅事件，系上帝嘅忠仆亲眼目睹嘅。耶稣喺拿因城外同埋喺崖鲁屋企都施行过奇迹，复活死咗嘅人。使徒彼得亦都复活咗基督徒女子多加（塔比莎）。彼得去到安放尸体嘅房间，喺尸体旁边祷告，之后佢话：“塔比莎，起身！”多加即刻被复活。其他基督徒都“睇见［佢］活过嚟”。因为噉，“好多人就成为主嘅信徒”。佢哋可以证实耶稣，特别系耶和华有能力复活死人。（使徒行传9:36-42）

11．根据医生路加喺使徒行传嘅记载，有乜嘢事发生喺一个年轻人身上？呢件事对其他人有乜嘢影响？

¹¹ 圣经亦都记载有好多人目击咗另一次复活。有一晚，使徒保罗参加喺特洛阿斯（而家嘅土耳其西北部）一个楼上房间举行嘅聚会。保罗发表演讲直到半夜。一个叫犹推古嘅年轻人坐喺窗口度，佢听吓听吓就瞓着咗，从三楼跌落去。路加可能系第一个去到犹推古身边嘅人。作为医生，佢根据医学判断睇出犹推古唔系昏迷，而系死咗！保罗走落楼揽住犹推古，跟住向大家宣布：“佢有翻生命嘞。”呢件事对在场嘅人产生咗深远嘅影响！亲眼见到保罗复活死咗嘅人，佢哋都“大感安慰”。（使徒行传20:7-12）

稳确嘅希望

12,13．有关复活嘅希望，我哋需要考虑乜嘢问题？

¹² 以上嘅记载必定可以使你同马大有一样嘅信心，确信生命嘅源头耶和华上帝有能力复活死咗嘅人。呢啲例子显示，喺上帝施行奇迹复活死人嘅时候，忠仆以利亚、耶稣、彼得都分别在场。但系，嗰啲喺其他时代死咗嘅人又点呢？生活喺其他时代嘅忠心仆人从来都冇见过复活嘅奇迹，噉佢哋会唔会确信上帝喺将来复活死去嘅人呢？佢哋会唔会同马大有一样嘅信心？马大话：“我知道［我弟弟］喺最后嘅日子复活嘅时候，佢一定复活。”点解佢有咁稳确嘅信心？点解你都可以呢？

¹³ 喺上帝嘅话语里面，有啲经文表明耶和华嘅忠仆相信将来一定会有复活发生。请考虑几个例子。

14．我哋从亚伯拉罕嘅记载了解到同复活有关嘅乜嘢事？

¹⁴ 上帝吩咐亚伯拉罕献上佢嘅继承人以撒，耶和华话：“请带你嘅仔，就系你深爱嘅独生仔以撒，……将佢献做全烧祭。”（创世记22:2）想象一下，亚伯拉罕听到呢个吩咐嘅时候有乜嘢感觉。耶和华曾经作出应许，所有国族都会通过亚伯拉罕嘅后代得到福分。（创世记13:14-16；18:18；罗马书4:17,18）耶和华亦都讲过福分会嚟自“以撒生嘅”后代。（创世记21:12）但系如果亚伯拉罕将以撒献做祭牲，噉福分又点可以嚟自以撒呢？保罗受圣灵启示，解释亚伯拉罕深信上帝有能力复活以撒。（请读希伯来书11:17-19）圣经冇话亚伯拉罕认为只要佢服从上帝，以撒就会喺短短几个钟，一日，或者一个星期内被复活。亚伯拉罕唔知道以撒几时会复活，不过，佢相信耶和华一定会复活以撒。

15．族长约伯怀有乜嘢希望？

¹⁵ 族长约伯亦都期待见到将来嘅复活。佢睇出如果一棵树被斩断之后，可能会再发芽而成为一棵新嘅植物。但系，人就唔得嘞。（约伯记14:7-12；19:25-27）如果一个人死咗，佢唔能够使自己从死里复活，继续生活落去。（撒母耳记下12:23；诗篇89:48）但系，呢个唔代表上帝唔可以复活人。事实上，约伯深信耶和华一定会记得佢。（请读约伯记14:13-15）约伯唔知道呢件事会喺将来几时发生，不过佢相信创造人类嘅上帝会记得佢，亦都会复活佢。

16．一个天使点样鼓励先知但以理？

¹⁶ 我哋从希伯来语经卷认识到但以理系另一个忠心嘅人。佢忠贞噉事奉上帝多年，而耶和华亦都一直支持佢。有一次，一个天使鼓励但以理呢位 “极可贵嘅人”，“要坚强”同得享“平安”。（但以理书9:22,23；10:11,18,19）

17,18．有关自己嘅未来，但以理得到乜嘢应许？

¹⁷ 但以理差唔多100岁，就嚟行完佢嘅人生旅程，好可能佢喺度思考紧自己嘅将来。但以理会唔会被复活呢？当然会！喺但以理书嘅最后一章，我哋读到上帝对佢嘅保证：“你即管去，坚持到底。你将会安息。”（但以理书12:13）年老嘅但以理知道死咗嘅人会安息，因为喺“坟墓……冇计划，冇知识，冇智慧”。但以理就快去世嘞。（传道书9:10）不过呢个唔系佢人生嘅终点，因为上帝承诺佢会有一个美好嘅未来。

¹⁸ 上帝跟住对先知但以理讲：“嗰段日子终结嘅时候，你就要起嚟，得享你嘅福分”。经文冇提到任何日期或者但以理要等几耐，不过有讲到但以理死后会得享安息，喺将来亦都会“得享［佢］嘅福分”。呢个清楚表明复活嘅应许喺“终结嘅时候”必然实现。

19,20．（甲）我哋讨论过嘅例子同马大对耶稣嘅回应有乜嘢关系？（乙）下一篇课文会讨论乜嘢？

¹⁹ 马大有充分嘅理由相信，佢忠心嘅弟弟拉撒路喺“最后嘅日子……一定复活。”耶和华对但以理作出嘅应许，加上马大对耶稣坚定嘅回答，都可以强化今日基督徒对复活嘅信心，确信将来一定会有复活。

²⁰ 以往有关复活嘅例子证明，喺将来死咗嘅人有希望复活。忠心事奉耶和华嘅男男女女都盼望将来会发生嘅复活。但系，有冇证据表明喺好耐之前应许嘅复活都会发生？如果有，噉我哋就有理由同马大一样期待将来嘅复活。但系，呢个会喺几时发生呢？下一篇课文会讨论呢啲问题。

1-3．（甲）我哋信仰嘅基本教义包括乜嘢？（乙）点解复活呢个教义咁重要？（请睇吓课文开头嘅图片）

如果有人问你：“你哋耶和华见证人相信啲乜嘢？”你会点样回答？当然你会强调耶和华系造物主，系生命嘅源头。你可能亦会提及你对耶稣基督嘅信心，因为佢牺牲咗自己嘅生命作为赎价。你可能都会好开心噉讲到，上帝嘅子民会永远生活喺未来嘅地上乐园。但系，你会唔会讲复活系你最珍视嘅基本教义之一呢？

² 就算我哋希望自己可以渡过大患难，喺地上得享永生，我哋都有理由将复活视为我哋信仰嘅基本教义之一。使徒保罗表明点解复活系我哋信仰嘅基础，佢话：“如果真系冇死人复活呢回事，噉基督就冇复活过嘞。”如果基督冇被复活，佢就唔会成为统治我哋嘅君王，而我哋教导人认识基督嘅统治就一啲意义都冇。（请读哥林多前书15:12-19）不过，我哋知道耶稣真系被复活咗。我哋对呢件事嘅睇法同撒都该派好唔一样，佢哋完全唔信死人会复活。即使俾其他人嘲笑，我哋都会持守对复活嘅信心。（马可福音12:18；使徒行传4:2,3；17:32；23:6-8）

³ 保罗谈及“关于基督嘅初步教义”嘅时候，佢亦都提到“死人复活……嘅道理”。（希伯来书6:1,2）保罗亦都强调佢对复活有信心。（使徒行传24:10,15,24,25）虽然复活系一个初步教义，系“上帝圣言嘅基本道理”之一，但系我哋仍然需要清楚明白呢个教义。（希伯来书5:12）点解噉讲？

4．有关复活嘅乜嘢问题有待解答？

⁴ 喺开始学习圣经嗰时，大多数人都会读到古代有关复活嘅记载，例如拉撒路嘅复活。佢哋仲知道亚伯拉罕、约伯同埋但以理都确信，喺将来死去嘅人会复活。不过，假如有人问你喺圣经里面有乜嘢证据证明，喺几个世纪之前应许过嘅复活一定会实现，你会点样解释？圣经有冇讲复活会喺几时发生？呢啲问题嘅答案会强化我哋嘅信心，等我哋睇吓经文点样讲。

几百年前预告嘅复活

5．我哋首先会讨论同复活有关嘅边啲问题？

⁵ 一个啱啱死去嘅人马上被复活，可能我哋会比较容易理解。（约翰福音11:11；使徒行传20:9,10）但系，如果有一个应许话，人死去几年甚至几百年之后会被复活，你相唔相信？无论呢个应许系关于一个啱啱死去嘅人，抑或一个死咗好耐嘅人，咁耐先实现嘅应许值唔值得我哋相信呢？其实，喺几百年前就预告嘅一次复活已经应验咗，而我哋又确信呢件事发生过。边个嘅复活呢？而呢个同我哋期待喺将来发生嘅复活有咩关系？

6．点解话诗篇118篇嘅预言同耶稣有关？

⁶ 有关喺好耐之前就预告过嘅复活，请留意诗篇118篇嘅经文。呢段经文好可能系大卫写嘅，当中包括一个恳求：“耶和华啊，求你拯救！……奉耶和华之名嚟嘅人，愿佢蒙福”。喺尼散月九日，即系耶稣死之前冇几耐，当佢骑住只驴入耶路撒冷嘅时候，群众就引用咗呢节同弥赛亚有关嘅经文。（诗篇118:25,26；马太福音21:7-9）但系诗篇118篇点样预言到喺好多年后先发生嘅复活呢？请留意另一节经文点讲：“建造嘅人弃绝嘅石头，成为屋顶嘅房角石。”（诗篇118:22）

7．犹太人弃绝耶稣到乜嘢程度？

⁷ “建造嘅人”，即系犹太宗教领袖，佢哋弃绝咗弥赛亚。呢啲宗教领袖弃绝耶稣唔只系鄙视佢，唔肯承认佢系基督咁简单。事实上，好多犹太人系想杀死耶稣。（路加福音23:18-23）冇错，佢哋要对耶稣嘅死负责。

8．耶稣点样成为“房角石”？

⁸ 如果耶稣被弃绝，又被杀，噉佢仲点样可以成为“房角石”？只有佢被复活，呢件事先可以发生。耶稣通过一个比喻讲明呢点。耶稣话啲农户恶待主人派去见佢哋嘅人，就好似以色列人恶待耶和华差派嘅先知。喺比喻入面，主人最后差派佢嘅爱子，即系佢嘅继承人，去见佢哋。农户有冇接受主人嘅仔呢？完全冇。佢哋甚至将佢杀死。讲完比喻之后，耶稣就引用咗诗篇118:22所讲嘅预言。（路加福音20:9-17）当时犹太“人民嘅官长、长老、抄经士聚集喺耶路撒冷”，使徒彼得同佢哋讲话嘅时候，亦都引录咗同一节经文。佢话：“呢位［拿撒勒人］耶稣，你哋将佢处死喺木柱上，但系上帝已经使佢从死里复活。”所以彼得清楚表明：“佢就系‘你哋建造嘅人所藐视嘅石头，已经成为屋顶嘅房角石’。”（使徒行传3:15；4:5-11；彼得前书2:5-7）

9．诗篇118:22预告咗乜嘢事？

⁹ 喺几百年之前，诗篇118:22嘅预言就表明将会有一位被复活。弥赛亚会被弃绝同死去，不过佢会被复活成为房角石。只有复活咗嘅耶稣先有资格救赎人类，所以圣经话：“喺天下人间，冇赐下其他名，系我哋必须依靠先能够得救嘅”。（使徒行传4:12；以弗所书1:20）

10．（甲）诗篇16:10预告咗乜嘢事？（乙）我哋点知道诗篇16:10唔系应验喺大卫身上？

¹⁰ 请睇吓另一节提到复活嘅经文。呢节经文系喺事件发生前千几年写成嘅。呢件事可以加强我哋嘅信心，使我哋更加坚信，就算有关复活嘅应许喺好耐之前预告，都一定会实现。喺诗篇16篇，大卫写道：“你一定唔会将我撇喺坟墓里，唔会俾你忠贞嘅仆人被弃于墓穴。”（诗篇16:10）大卫嘅意思唔系话佢永远唔会死，或者唔会被埋葬喺坟墓入面。圣经清楚提到大卫亦都经历衰老死亡。佢死咗之后，就“随列祖长眠，葬喺大卫城”。（列王纪上2:1,10）噉诗篇16:10讲嘅系乜嘢意思？

11．彼得喺几时解释诗篇16:10？

¹¹ 大卫写咗呢篇诗千几年之后，喺耶稣复活后几个星期，彼得向几千个犹太人同归信者发表演讲，解释诗篇16:10所指嘅系边个。（请读使徒行传2:29-32）佢提到大卫的确死咗又被埋葬。在场嘅听众都知道呢件事。不过，圣经冇提到当彼得话大卫“预见基督复活，又传讲呢件事”嘅时候，有任何人提出质疑。

12．诗篇16:10点样得到应验？呢个证实咗乜嘢？

¹² 彼得引用咗大卫喺诗篇110:1嘅话去支持佢嘅论点。（请读使徒行传2:33-36）彼得运用经文向听众推理，证实耶稣已经“做主做基督”。再加上，耶稣从死里复活，大家就睇出诗篇16:10已经得到应验。后来，使徒保罗喺皮西迪亚嘅安提阿，亦都用咗同样有力嘅证据向犹太人推理。佢提出嘅证据打动咗当时嘅听众，推动佢哋想了解更多。（请读使徒行传13:32-37,42）呢个亦都使我哋对圣经预言嘅复活有信心，即使呢啲预言喺几百年之后先应验，都值得我哋信赖。

复活——几时发生？

13．有啲人可能会对复活提出乜嘢问题？

¹³ 知道几百年前预告嘅复活一定会发生，呢个使我哋大受鼓励。不过，有人仲系会谂：“我系咪要等好耐，先可以见翻我深爱嘅亲友呢？我盼望嘅复活几时先会发生呢？”耶稣曾经同使徒讲，有啲事系佢哋唔知道嘅，亦都冇可能会知。有啲细节系“父亲凭自己嘅权能所定嘅时候时期，唔系你哋可以知嘅”。（使徒行传1:6,7；约翰福音16:12）不过，呢个并唔系话我哋对复活嘅时间一无所知。

14．耶稣嘅复活同发生喺佢之前嘅复活有乜嘢唔同？

¹⁴ 圣经提到最重要嘅复活就系耶稣嘅复活。如果佢冇被复活，我哋就冇希望再次见翻死去嘅亲友。嗰啲喺耶稣日子之前，例如以利亚同以利沙复活咗嘅人，都唔可以永远生活落去。佢哋再次死去，归回尘土。但系耶稣“从死里复活，就唔再死，死亡亦都唔再系佢嘅主人嘞”。之后，耶稣“永永远远”生活喺天上。（罗马书6:9；启示录1:5,18；歌罗西书1:18；彼得前书3:18）

15．耶稣系“最早嘅收成”，点解呢个咁重要？

¹⁵ 耶稣系第一个被复活到天上成为灵体嘅人，而佢嘅复活系最重要嘅。（使徒行传26:23）不过，唔系只有佢有希望复活到天上。耶稣向忠心嘅使徒保证，佢哋会同佢一齐喺天上施行统治。（路加福音22:28-30）要得到奖赏，佢哋就要先死去。之后，好似基督一样，佢哋会复活成为灵体。保罗写道：“基督已经从死里复活，喺长眠嘅人当中成为最早嘅收成。”保罗指出会有其他人被复活到天上，佢话：“各人都按住次序复活。基督系最早嘅收成，然后喺佢临在期间轮到嗰啲属于基督嘅”。（哥林多前书15:20,23）

16．天上嘅复活会喺几时发生？请解释。

¹⁶ 我哋从保罗所讲嘅可以得知，天上嘅复活会喺几时发生。呢件事会喺“［耶稣］临在期间”发生。耶和华见证人喺好耐之前就已经从圣经睇出，自从1914年之后，我哋就生活喺耶稣嘅“临在”期间，亦都睇出呢个邪恶制度好快就会结束。

17,18．喺基督临在期间，有啲受膏基督徒会经历乜嘢事？

¹⁷ 关于天上嘅复活，圣经进一步提供一啲细节：“关于已经长眠嘅人，有一啲事我哋唔想你哋唔明白……我哋既然相信耶稣已经死而复生，就应该相信，靠住耶稣已经长眠嘅人，上帝亦必定会将佢哋同耶稣一齐带嚟。……主临在嘅时候，我哋仍然生存嘅人必定唔会先于已经长眠嘅人。因为主必定亲自从天而降，带住发令嘅呼唤，……嗰啲同基督联合嘅死人必定首先复活。然后我哋仍然生存嘅人，必定霎时间从云中被接上去，喺空中同主会合，同佢哋喺埋一齐。噉样，我哋就永远同主一齐喇。”（帖撒罗尼迦前书4:13-17）

¹⁸ 天上嘅复活会喺基督“临在”之后开始。大患难期间，仍然喺地上嘅受膏基督徒会“从云中被接上去”。（马太福音24:31）嗰啲“被接上去”嘅人唔会“长眠”，意思系佢哋死咗之后唔使等好耐。佢哋“人人都要改变，……喺刹那间，一眨眼，最后嘅号筒吹响嘅时候”。（哥林多前书15:51,52）

19．将来会有乜嘢“更好嘅复活”？

¹⁹ 今日，大部分忠心嘅基督徒都唔系受膏嘅，唔会同基督一齐喺天上统治。不过，佢哋期待紧呢个邪恶制度会喺“耶和华嘅日子”被毁灭。虽然冇人知道呢一日系几时，但系证据显示终结好快就嚟到。（帖撒罗尼迦前书5:1-3）之后，另一种复活会喺地上嘅乐园发生。嗰啲被复活嘅人有希望恢复身心完美，唔再受死亡威胁。比起嗰啲以往被复活又再死去嘅人嚟讲，呢个的确系“更好嘅复活”。（希伯来书11:35）

20．点解我哋相信将来嘅复活都会以有秩序嘅方式进行？

²⁰ 提到嗰啲将会复活到天上嘅人，圣经话佢哋“各人都按住次序复活”。（哥林多前书15:23）我哋相信喺地上嘅复活都会以有秩序嘅方式进行。我哋可能会问：喺基督千年统治之前冇几耐就死去嘅忠仆，会唔会先被复活，等嗰啲喺乐园里面嘅亲友可以迎接佢哋呢？嗰啲喺古代有领导能力嘅忠仆会唔会先被复活，使佢哋可以喺新世界管理上帝嘅子民呢？嗰啲从来都冇事奉耶和华嘅人又点呢？佢哋会喺几时同边度被复活呢？我哋都好想知道呢啲问题嘅答案，不过而家我哋唔需要考虑太多。只要我哋继续拭目以待，将来就会知道答案。我哋到时可以亲眼见到耶和华点样安排呢啲事，一定会好高兴！

21．你对复活有乜嘢希望？

²¹ 而家，我哋就要强化自己对耶和华嘅信心。耶和华通过耶稣向我哋保证，嗰啲留喺佢记忆当中嘅人，将来一定会被复活。（约翰福音5:28,29；11:23）耶稣曾经讲过，亚伯拉罕、以撒同雅各“喺［上帝］眼中，佢哋都系活嘅”，呢个证明耶和华有能力复活死去嘅人。（路加福音20:37,38）而家我哋都可以好似保罗一样，充满信心噉话：“我对上帝所存嘅希望……就系……人都会复活。