“请过嚟啦，我哋需要更多先驱！”

和浩系一个日本嘅先驱。佢几年前有一次突然癫痫病发作，失去意识，即刻被送去医院。医生同佢讲，两年之内唔可以开车。和浩大受打击，佢问自己：“噉我点样继续做我喜爱嘅先驱工作啊？”佢恳切祷告，祈求耶和华为佢打开出路，使佢可以继续从事先驱服务。

和浩话：“一个月之后，有个喺缅甸服务嘅朋友听到我嘅情况，就打电话同我讲：‘缅甸嘅基本交通工具系巴士。你喺呢度唔使开车都可以继续做传道工作！’我问医生，我嘅情况容唔容许我搬去缅甸。令我惊喜嘅系，医生话：‘啱啱好而家有一位缅甸嘅脑科专家到访日本，我可以介绍俾你识。如果你喺缅甸再次病发，佢可以帮到你。’我将医生呢番话视为耶和华嘅回应。”

和浩即刻发电邮同缅甸分部讲，佢同太太好想去嗰度做先驱。五日后，分部就回复话：“请过嚟啦，我哋需要更多先驱！”于是和浩同太太真理就卖咗佢哋嘅车，办好签证，买咗机票。而家，佢哋好开心喺曼德勒手语小组服务。和浩话：“我哋通过呢个经历更加深信诗篇37:5嘅应许：‘要将你嘅前途交托俾耶和华，倚靠佢，佢就成全你。’”

耶和华垂听祷告

好多去需求更大嘅地区服务嘅弟兄姊妹都体验过祷告嘅力量。纯平同奈央嘅经历就系其中一个例子。佢哋系一对三十几岁嘅夫妇，曾经喺日本 嘅一个手语会众服务。点解佢哋会搬到缅甸？纯平话：“一直以来，我同太太都有个目标，就系去国外需求更大嘅地区服务。我哋喺日本嘅手语会众嗰阵，一个弟兄搬咗嚟缅甸。虽然我哋嘅积蓄唔系好多，但系2010年5月我哋都搬咗过嚟。缅甸嘅弟兄姊妹热情噉欢迎我哋！”佢哋喺缅甸嘅手语地区服务有乜嘢感觉？佢继续讲：“地区嘅人有好好嘅反应。失聪嘅住户睇到手语嘅影片都好惊喜。我哋真系庆幸当初决定嚟呢度为耶和华服务！”

纯平同奈央点样维持生活？纯平话：“三年过后，我哋嘅积蓄已经用晒，冇钱俾下一年嘅租金。我同太太经常为呢件事恳切祷告。出乎意料嘅系，我哋收到分部嘅一封信，受邀请做临时特别先驱！我哋体验到，只要信赖耶和华，佢绝对唔会舍弃我哋。佢一直都用各种方式照顾我哋。”最近，纯平同奈央亦都参加咗王国传福音者训练班。

嚟自日本 嘅瑞穗话：“我同先生幸雄一直都好想喺一个需求大嘅国家服务。不过去边度好呢？睇完2013年《年鉴》关于缅甸嘅感人记载之后，我哋深受打动，于是考虑系咪可以喺缅甸服务。”幸雄又话：“我哋决定去缅甸首都仰光旅游一个星期，就好似探子去迦南地噉。呢次短期嘅实地考察使我哋下定决心搬过嚟。”