1,2． （甲）世界历史上发生咗乜嘢前所未有嘅重大事件？（乙）人睇唔到呢件大事发生，点解系好平常嘅呢？

你有冇谂过，生活喺历史上一个重大嘅转折时期系点嘅呢？唔少人都曾经谂过。就算你真系生活喺噉样嘅时期，又有冇机会亲眼睇到，嗰啲促成世界改变嘅重大事件呢？可能未必。历史记载咗好多改朝换代、政权更替嘅内容，但系促成呢啲改变嘅事件，往往都系喺幕后策划嘅。换言之，历史上好多事都发生喺宫廷、密室、政府机关等等呢啲唔系一般人可以随便出入嘅地方，呢啲事好多人都唔知道，但系就会影响到千万人嘅生活。

² 噉世界历史上发生咗一件前所未有嘅重大事件，你又知唔知呢？呢件大事系人睇唔到嘅，不过就会影响到千万人嘅生活。系乜嘢大事呢？就系上帝嘅王国喺天上诞生咗。呢个王国系上帝喺好耐之前就应许嘅弥赛亚政府，好快就会将撒但世界嘅整个制度彻底毁灭。（请读但以理书2:34,35,44,45）既然人睇唔到上帝王国嘅诞生，噉系咪话，耶和华唔想俾人知道呢件事呢？定系佢喺事前已经帮助佢嘅忠贞子民做好准备，迎接上帝王国嘅诞生呢？等我哋嚟睇吓。

“我要差我嘅使者出去，佢会喺我面前修直道路”

3-5． （甲）玛拉基书3:1提到嘅“立约使者”系边个？（乙）“立约使者”嚟视察圣殿之前，有乜嘢事发生？

³ 耶和华喺古代就定意佢嘅子民做好准备，迎接弥赛亚王国嘅诞生。点解噉讲？请睇吓玛拉基书3:1嘅预言：“睇吓！我要差我嘅使者出去，佢会喺我面前修直道路。你哋所寻求嘅主宰必会忽然嚟到自己嘅殿，你哋所喜爱嘅立约使者亦会一齐嚟。”

⁴ 喺现代，至高主宰耶和华几时嚟视察喺属灵圣殿地上院子里面敬奉佢嘅人呢？玛拉基嘅预言指出，耶和华会同“立约使者”一齐嚟。呢位“立约使者”系边个呢？就系上帝应许嘅弥赛亚君王耶稣基督。（路加福音1:68-73）佢登基作王之后，就嚟视察同埋熬炼上帝喺地上嘅子民。（彼得前书4:17）

⁵ 玛拉基书3:1一开始提到嘅“使者”又系边个呢？喺弥赛亚君王临在之前，呢位使者所预表嘅人早就已经出现咗。1914年之前几十年，有冇人喺弥赛亚君王面前“修直道路”呢？

6． 玛拉基预告有一位“使者”会先嚟帮上帝嘅子民做好准备，应付前头要发生嘅事。呢位“使者”指嘅系边啲人？

⁶ 呢本书讲述耶和华嘅子民振奋人心嘅现代历史。我哋回顾呢段历史，就可以揾到以上问题嘅答案。19世纪嘅下半世纪，有名无实嘅基督徒为数众多。但有一小群人忠于上帝，佢哋所做嘅事表明自己系唯一嘅一群真基督徒。呢群人后来叫做圣经研究者，当中带头嘅系查尔斯·罗素同佢嘅同工。呢啲带头嘅弟兄就好似玛拉基预告嘅“使者”，为上帝嘅子民提供属灵嘅指引，帮助佢哋做好准备，应付前头要发生嘅事。下文会讲吓，玛拉基预告嘅“使者”喺四方面帮助上帝嘅子民准备妥当。

按真理崇拜上帝

7,8． （甲）喺19世纪，边啲人开始揭露灵魂不死嘅教义系错误嘅呢？（乙）罗素同佢嘅同工仲揭露咗边啲错误嘅道理？

⁷ 圣经研究者努力研读圣经，祷告求上帝指引；佢哋辨明圣经嘅真理，得出一致嘅结论，就记录落嚟，然后出版。千百年来，一般教会一直处于属灵嘅黑暗当中，佢哋嘅主张大部分都源自异教。一个典型嘅例子就系灵魂不死嘅教义。到咗19世纪，经过仔细查考，几个诚心研究圣经嘅人睇出灵魂不死嘅教义冇圣经根据。亨利·格鲁、乔治·斯特森同埋乔治·斯托尔斯都写咗好多文章，亦都发表过一啲演讲，大胆揭露灵魂不死嘅教义系撒但所讲嘅大话！a佢哋嘅研究对罗素同佢嘅同工产生咗深远嘅影响。

⁸ 呢一小群圣经研究者发现，同灵魂不死有关嘅其他教义，例如话好人上天堂，坏人落地狱；上帝用地狱永火嚟折磨坏人嘅呢啲讲法，唔单止好难理解，而且系错误嘅。罗素同佢嘅同工通过文章、传单、书本、小册子同埋喺报章上面发表嘅传道演讲，大胆噉揭穿呢啲谎言。

9． 关于三位一体嘅教义，《锡安嘅守望台》点样讲？

⁹ 圣经研究者仲指出，一般教会所推崇嘅三位一体教义，唔系以圣经为依据嘅。1887年，英语版《锡安嘅守望台》话：“圣经清楚表明，耶和华同我哋嘅主耶稣唔系同一个个体，佢哋各自存在。圣经亦都明确噉指出耶和华同耶稣系乜嘢关系。”文章接住讲：“三一神论（意思系一神共有三位、三位共为一神）竟然备受推崇，而且广为大众接纳，真系不可思议。呢一切表明乜嘢呢？表明教会瞓得好淰，连自己俾仇敌用错误主张，好似锁链噉锁住，都完全唔知道。”

10． 点解《守望台》话1914年系个重要嘅年份？

¹⁰ 通过杂志嘅全名《锡安嘅守望台与基督临在嘅先声》可以睇出，呢本杂志着重讲有关基督临在嘅预言。编写文章嘅忠心受膏基督徒睇出，但以理预告嘅“七期”，系同上帝将会喺咩时候实现佢对弥赛亚王国所定嘅旨意有关嘅。喺19世纪70年代，佢哋早就已经指出“七期”会喺1914年结束。（但以理书4:25；路加福音21:24）嗰时，我哋嘅弟兄虽然未完全明白呢个重要年份嘅意义，但依然将自己所知道嘅圣经真理广传开去，对后来嘅人影响深远。

11,12． （甲）罗素弟兄对圣经真理有清晰嘅了解，佢将功劳归俾边个？（乙）1914年之前几十年，罗素弟兄同佢嘅同工所成就嘅事有几重要？

¹¹ 罗素同呢啲忠心嘅同工一齐钻研圣经，发现咗上面提到嘅重要真理，而且对呢啲真理有清晰嘅了解，但系佢哋从来都冇将功劳归俾自己。罗素将功劳归俾嗰啲喺佢之前寻求真理嘅人。最重要嘅系，佢将功劳归俾耶和华上帝，因为上帝知道应该喺乜嘢时候，将佢子民需要认识嘅真理教导佢哋。罗素同佢嘅同工努力将真理同谬误区分开嚟，显然得到耶和华嘅赐福。随住时间过去，佢哋同一般教会嘅差异越来越明显。

¹² 1914年之前嘅几十年，呢啲忠心嘅男子一直努力捍卫真理，佢哋所成就嘅事，真系令人钦佩。回顾以往，英语版《守望台与基督临在嘅先声》1917年11月1日刊话：“好多人因为相信地狱永火同埋其他错误嘅道理，觉得好惊，而家佢哋已经摆脱咗恐惧嘞。……四十几年前，真理好似潮水噉不断上涨，越涨越高，直到弥漫全地。反对者企图阻止真理传遍大地，就好似用扫把将涌过嚟嘅海浪扫翻落大海噉，简直就系白费心机！”

13,14． （甲）玛拉基预告嘅“使者”点样为弥赛亚王国嘅君王修直道路？（乙）从呢啲生活喺百几年之前嘅弟兄身上，我哋学到乜嘢呢？

¹³ 请谂一下：喺上帝嘅子民当中，有啲人连耶稣同佢天父耶和华嘅身份都分唔清；有啲人以为不死嘅生命系所有人自然就会得到嘅，而唔系上帝赐俾少数受膏基督徒嘅宝贵礼物；有啲人相信上帝用地狱永火嚟折磨人，落入地狱嘅人永远都得唔到解脱。如果上帝嘅子民继续俾呢啲错误嘅道理蒙蔽，到咗基督开始临在嗰时又点可以做好准备呢？当然冇可能。玛拉基预告嘅“使者”的确为弥赛亚君王修直咗道路，呢一点系毫无疑问嘅。

¹⁴ 噉我哋呢？从呢啲生活喺百几年之前嘅弟兄身上，我哋学到乜嘢呢？就好似佢哋噉，我哋要喜爱阅读圣经，努力钻研上帝嘅话语。（约翰福音17:3）呢个世界注重物质享受，喺属灵方面越来越贫乏，但愿我哋唔会受世界嘅影响，对灵粮嘅热爱有增无减！（请读提摩太前书4:15）

“我嘅子民啊……要从佢里面出嚟”

15． 圣经研究者慢慢睇出乜嘢呢？（另见脚注）

¹⁵ 圣经研究者教导话，真基督徒必须脱离所有同世界友好嘅教会。1879年，英语版《守望台》提到嘅“巴比伦教会”，指嘅系乜嘢呢？系历代教宗，定系罗马天主教会？几百年来，基督新教嘅唔同教派一直认为，圣经预言提到嘅“巴比伦”系天主教会。但系，圣经研究者慢慢睇出，现代嘅“巴比伦”包括所有鼓吹错误道理嘅教会。点解噉讲呢？因为呢啲教会都用上文提到嘅谎言作为教义。b一段时间之后，上帝组织嘅出版物越来越明确噉指出，“巴比伦教会”里面诚心正意嘅人应该点样做。

16,17． （甲）《千禧年黎明》第3卷同《守望台》提出乜嘢劝告，促请人同错误嘅宗教断绝关系？（乙）点解呢个劝告初时唔系咁有效？（见脚注）

¹⁶ 就以1891年出版嘅《千禧年黎明》（英语）第3卷作为例子，呢本书提到上帝会舍弃现代嘅“巴比伦”，话：“呢个复杂混乱嘅宗教制度会全部被舍弃。”跟住仲话，“凡系唔认同‘巴比伦’嘅错误主张同宗教习俗嘅，而家就要离开佢”。

¹⁷ 当时，有啲人嘅名仲系留喺教会嘅名册上面，佢哋为自己辩解话：“我完全认同真理，亦都冇点去教堂嘞。”英语版《守望台》1900年1月刊提出劝告：“呢种‘一脚踏两船’嘅做法系咪啱嘅呢？上帝所要求嘅服从系咪只系噉呢？……上帝会唔会接受同钟意噉嘅行为呢？当然唔会。试谂吓，一个人加入某个教会，就等于公开同嗰个教会订立咗一个约。佢应该遵守呢个约嘅全部规定，直到佢……公开噉声明自己退出教会为止。”随住时间嘅过去，呢个劝告嘅措辞越来越强烈。c耶和华嘅仆人一定要同错误嘅宗教断绝一切关系。

18． 点解人一定要从“大巴比伦”里面出嚟？

¹⁸ 请谂吓，如果当时冇人经常发出警告，促请人离开“大巴比伦”，又点会有一群受膏嘅基督徒喺地上做好准备，为啱啱登基嘅君王基督效劳呢？基督徒一定要摆脱“大巴比伦”嘅枷锁，先至可以按灵同真理崇拜耶和华。（约翰福音4:24）同样，今日我哋有冇决心唔俾错误嘅宗教玷污自己呢？愿我哋时刻服从上帝嘅命令：“我嘅子民啊……要从佢里面出嚟”。（请读启示录18:4）

聚集起嚟崇拜耶和华

19,20． 《守望台》点样鼓励上帝嘅子民聚集起嚟崇拜耶和华？

¹⁹ 圣经研究者教导话，真基督徒一有机会就应该聚集起嚟崇拜耶和华。 真基督徒唔单止要脱离错误嘅宗教，仲要用正确嘅方式嚟崇拜上帝。《守望台》从一开始就鼓励读者聚集起嚟崇拜耶和华。例如，喺英语版《守望台》1880年7月刊，罗素弟兄提到佢嘅一次巡回演讲，佢话自己参加过嘅聚会非常鼓舞人心。佢鼓励读者将自己参加聚会嘅经历写喺卡片上面寄俾《守望台》，其中一啲经历会登出嚟。点解噉做呢？“我哋想知道……主点样祝福你哋，亦都想知道你哋有冇继续同信仰一致嘅人聚集起嚟。”

²⁰ 1882年，英语版《守望台》刊登咗一篇叫《齐聚一堂》嘅文章。呢篇文章强调基督徒要聚集喺一齐，“互相交流，彼此鼓励同强化”。文章话：“有冇学识或者才能并唔重要，重要嘅系出席聚会。每个人要带自己嘅圣经、纸同笔，如果有参考书，例如《圣经词语索引》，亦都可以带埋嚟。首先拣一个课题；跟住祷告求上帝赐圣灵指引我哋明白探讨嘅资料；然后阅读、思考、对比经文。噉样，你哋就一定可以明白真理。”

21． 关于聚会同牧养工作，我哋可以点样效法美国宾夕法尼亚州阿勒格尼市嘅会众？

²¹ 圣经研究者嘅总部办事处设喺美国宾夕法尼亚州嘅阿勒格尼市，喺嗰度工作嘅弟兄听从圣经嘅吩咐聚集起嚟，系我哋学习嘅好榜样。（请读希伯来书10:24,25）一位年长嘅弟兄查尔斯·卡彭，细个嗰阵参加过呢啲聚会。好多年之后，佢回忆话：“我仲记得当时大会堂嘅墙上面写住一节经文，‘只有一位系你哋嘅老师，就系基督；你哋全部都系兄弟’。呢节经文经常喺我嘅脑海里面回响——耶和华嘅子民当中确实冇教士同平信徒嘅分别。”（马太福音23:8）卡彭弟兄又话，聚会嘅内容发人深省，弟兄姊妹深受鼓励，罗素弟兄仲付出好大嘅努力去牧养会众嘅每个成员。

22． （甲）圣经鼓励基督徒举行聚会，忠心嘅基督徒有乜嘢反应？（乙）我哋从佢哋身上学到乜嘢？

²² 忠心嘅基督徒效法总部嘅弟兄，听从指引聚集起嚟。喺美国嘅俄亥俄州、密歇根州同其他州，会众陆续成立。后来，喺成个北美洲以至其他国家都成立咗会众。试谂吓：当时忠心嘅基督徒如果冇受到教导，听从圣经嘅吩咐聚集起嚟崇拜耶和华，真系可以为基督嘅临在做好准备咩？当然唔可以。噉我哋呢？我哋亦都应该下定决心，唔错过聚会，尽己所能同弟兄姊妹一齐崇拜耶和华，喺属灵方面互相鼓励。

热心传道

23． 《守望台》点样清楚指出，所有受膏基督徒都一定要传讲圣经嘅真理？

²³ 圣经研究者教导话，所有受膏基督徒都必须传讲圣经真理。1885年，英语版《守望台》话：“每个受膏基督徒都应该谨记，自己受膏系要向人传道（以赛亚书61:1），亦即系蒙召去传讲好消息。”1888年，英语版《守望台》劝勉话：“我哋嘅使命非常清楚……如果我哋忽视自己嘅使命，揾借口推托，就系懒惰嘅仆人，表明自己唔配受上帝膏立。”

24,25． （甲）罗素同佢嘅亲密同工唔单止鼓励人传道，佢哋仲点样做呢？（乙）汽车仲未普及嘅时候，派书者点样向人传道呢？

²⁴ 罗素弟兄同佢嘅亲密同工唔单止鼓励人传道，仲开始印制《圣经研究者传单》（英语），后来叫做《旧神学季刊》。《守望台》嘅读者收到传单之后，免费向公众分发。

²⁵ 喺嗰个年代，投身全时服务嘅人称为派书者。上文提过嘅查尔斯·卡彭就系其中一位。佢回忆当年话：“我嘅传道地区喺宾夕法尼亚州。为咗接触地区里面嘅每户人家，我照住美国地质调查局印制嘅地图，就可以行匀县市嘅每一条路。我会用三日时间喺乡间传道，请人预订《圣经嘅研讨》（英语）呢套书。之后，我会请一架马车将书送过去。我经常喺农夫嘅屋企过夜。嗰时汽车仲未普及。”

26． （甲）点解上帝嘅子民一定要传道先可以为基督嘅统治做好准备？（乙）我哋应该要认真谂吓乜嘢问题？

²⁶ 要向人传道，早期嘅圣经研究者一定要有热心同勇气先至得。如果当时嘅真基督徒冇受到教导，明白传道工作非常重要，又点可以为基督嘅统治做好准备呢？事实上，传道工作就系基督临在嘅一个重要特征。（马太福音24:14）传道工作可以拯救生命，上帝嘅子民要做好准备，就一定要以呢件工作为生活嘅重心。今日，我哋应该认真噉谂吓：“传道工作系唔系我生活嘅重心呢？我愿唔愿意作出牺牲，全力参与呢件工作呢？”

上帝嘅王国诞生嘞！

27,28． （甲）使徒约翰喺异象里面睇到乜嘢？（乙）上帝嘅王国诞生之后，撒但同邪灵有点样嘅反应？

²⁷ 1914——意义重大嘅一年终于到嘞。呢一章开头提到，嗰一年喺天上发生嘅大事，世上嘅人根本睇唔到。不过上帝就通过异象，俾使徒约翰睇到喺天上发生嘅事，呢啲事有象征嘅意义。约翰睇到“天上出现一个大异象”。呢个异象里面嘅“女人”怀孕，“生咗个男孩”。呢个“女人”就系上帝天上嘅组织，由灵体构成。异象里面嘅呢个“男孩”将要“攞铁杖当牧杖管辖所有国族”。不过，呢个孩子一出世，就“被提到上帝同佢嘅宝座嗰度”。天上有大声音话：“我哋上帝嘅救恩、力量、王国，仲有佢所立嘅基督嘅权柄，而家都实现咗”。（启示录12:1,5,10）

²⁸ 毫无疑问，约翰喺异象当中睇到弥赛亚王国嘅诞生。呢个的确系一件辉煌嘅大事，但系撒但同邪灵好唔开心。佢哋同米迦勒（基督）所率领嘅忠心天使争战。结果点样呢？圣经话：“大龙被掟咗落去。大龙就系最初嘅蛇，叫做魔鬼，又叫撒但，迷惑咗普天下嘅人。佢被掟落地上，佢嘅天使亦都同佢一齐被掟落去。”（启示录12:7,9）

29,30． （甲）弥赛亚王国诞生之后，地上嘅情况有乜嘢改变？（乙）天上嘅情况又有乜嘢改变？

²⁹ 喺1914年之前几十年，圣经研究者早就指出，从嗰一年开始，世界嘅局势会变得动荡不安。不过，佢哋从来都冇谂过自己嘅推测会咁准确。正如约翰嘅异象显示，撒但会变本加厉危害人类社会：“地同海有祸嘞，因为魔鬼知道自己时日无多，就非常愤怒，落到你哋嗰度。”（启示录12:12）1914年，第一次世界大战爆发，基督临在执掌王权嘅征象开始喺全球应验。呢个制度亦都到咗“最后嘅日子”。（提摩太后书3:1）

³⁰ 不过，天上就充满喜乐，因为撒但同邪灵以后都冇办法再返翻天上。约翰记述：“所以，天同住喺天上嘅，你哋都欢欣啦！”（启示录12:12）天上洁净之后，上帝喺地上嘅子民会点样呢？弥赛亚王国嘅君王耶稣又会采取乜嘢行动呢？呢一章开头提到，“立约使者”基督会做嘅第一件事，就系熬炼上帝喺地上嘅仆人。点样熬炼呢？

考验时期

31． （甲）关于上帝子民所受嘅熬炼，玛拉基预告咗乜嘢？（乙）呢个预言几时开始应验？（另见脚注）

³¹ 上帝嘅子民要经受嘅熬炼绝对唔容易忍受。玛拉基预告：“佢来临之日，边个能够受得住呢？佢出现之时，边个能够企得稳呢？佢会好似冶金工人嘅炉火，像洗衣工人嘅肥皂。”（玛拉基书3:2）玛拉基讲得好啱！从1914年开始，上帝喺地上嘅子民接二连三噉遇到好大嘅考验同困难。第一次世界大战期间，圣经研究者当中有啲遭受到残酷嘅迫害，有啲仲俾人韫咗入监。d

32． 1916年之后，上帝嘅组织内部发生咗乜嘢冲突？

³² 上帝嘅组织内部亦都发生咗冲突。1916年，罗素弟兄去世，嗰时佢只有64岁。上帝嘅子民当中，好多人接受唔到呢个事实。有啲人将过多嘅注意力集中喺一个模范人物身上，几乎到咗崇拜佢嘅地步。但系，罗素弟兄从来都唔希望其他人崇拜佢。唔少人以为，罗素去世之后，上帝就唔会再启示人明白真理嘞。有啲人甚至心生怨恨，唔肯跟随上帝嘅组织一齐前进。呢种唔合作嘅态度引起分裂，导致叛道。

33． 上帝子民所期望嘅事冇实现到，佢哋有乜嘢反应呢？

³³ 圣经研究者面对嘅另一个考验系，佢哋所期望嘅事冇实现。虽然《守望台》确切指出外邦人时期会喺1914年结束，不过啲弟兄就唔清楚嗰一年到底会有乜嘢事发生。（路加福音21:24）佢哋以为，基督会喺1914年接佢嘅受膏“新娘”去天上，同佢一齐作王。佢哋嘅期望落空咗。1917年年底，《守望台》指出，历时四十年嘅收割时期会喺1918年嘅春季结束。不过，传道工作并冇停落嚟。1918年春季过咗之后，传道工作继续扩展。《守望台》话，收割时期确实结束咗，接落嚟，会系拾取遗落庄稼嘅时期，属灵嘅工作会继续落去。虽然系噉，好多人仲系大失所望，唔再事奉耶和华。

34． （甲）1918年，上帝嘅子民面对边啲极大嘅考验？（乙）点解啲教士以为上帝嘅子民已经“死咗”？

³⁴ 1918年，上帝嘅子民要面对一个极大嘅考验。接替罗素带领上帝子民嘅卢述福，同埋另外七个担任重要职责嘅弟兄，俾当局拘捕。佢哋受到唔公平嘅审讯，被判长期徒刑，韫喺美国佐治亚州亚特兰大市嘅联邦监狱里面。有一段时间，上帝子民嘅工作似乎完全停止咗。啲教士高兴到不得了，心谂：“带头嘅”已经俾人捉咗，布鲁克林嘅总部又关门，传道工作喺美洲同欧洲到处受到攻击，嗰啲乞人憎嘅圣经研究者已经“死咗”，威胁解除嘞。（启示录11:3,7-10）呢啲教士真系大错特错！

复兴时期

35． （甲）耶稣点解容许门徒经受磨难？（乙）耶稣点样帮助佢哋？

³⁵ 敌视真理嘅人根本唔知道，耶稣之所以容许门徒经受磨难，系因为耶和华要“好似炼净银子嘅人”噉样熬炼佢哋。（玛拉基书3:3）耶和华同耶稣深信，忠心嘅人一定经得起火一样嘅考验而得到炼净，可以更好噉为君王效劳。事实表明，从1919年初期开始，上帝嘅灵所成就嘅一切，系敌人点都谂唔到嘅。忠于上帝嘅人竟然“企起身”，好似翻生一样！（启示录11:11）嗰时，基督委任咗“忠信睿智嘅奴隶”（由一小群受膏男子组成）负责带领上帝嘅子民，喺适当嘅时候分发灵粮。噉样，末世征象嘅一个重要特征就应验咗嘞。（马太福音24:45-47）

36． 有乜嘢表明上帝嘅子民喺灵性上好似翻生一样？

³⁶ 1919年3月26日，卢述福弟兄同几个同工获得释放，佢哋一离开监狱，好快就安排喺同一年嘅9月举行大会。佢哋仲计划出版第二本杂志，叫做《黄金时代》（英语）。呢本杂志系为咗传道而设计嘅，会同《守望台》一齐分发。e喺同一年，上帝嘅组织亦都出版咗《通报》（英语），就系今日嘅《传道与生活聚会手册》。呢份刊物从第一期开始就强调要多啲向人传道。的确，自从1919年以来，上帝嘅组织越来越重视逐户传道工作，鼓励弟兄姊妹亲自去宣扬上帝嘅王国。

37． 1919年之后，有啲人做咗咩事表明佢哋叛离上帝嘅组织？

³⁷ 基督继续通过传道工作熬炼佢嘅仆人。对高傲自大嘅人嚟讲，传道系卑微嘅工作，有失身份。唔肯去传道嘅人最后就离开忠心嘅弟兄姊妹，大家各行各路。1919年之后，一啲叛离上帝组织嘅人心怀怨恨，不惜诽谤同埋中伤耶和华嘅忠仆，甚至同反对者联手迫害佢哋。

38． 基督嘅门徒可以跨过难关，获得胜利，表明咗乜嘢呢？

³⁸ 基督嘅门徒虽然遭受攻击，但继续喺灵性上进步，人数越来越多。佢哋跨过嘅每一个难关，获得嘅每一次胜利，都系确凿嘅证据，表明上帝嘅王国真系喺度统治紧。如果唔系上帝通过佢嘅儿子同弥赛亚王国，大力支持佢地上嘅仆人，而且赐福俾佢哋，净系靠呢一小群唔完美嘅人，又点可以一次又一次噉战胜撒但同呢个邪恶嘅制度呢？（请读以赛亚书54:17）

39,40． （甲）呢本书有乜嘢特色？（乙）研读呢本书对你有乜嘢益处？

³⁹ 喺接落嚟嘅篇章里面，我哋会睇吓上帝嘅王国喺天上建立之后嘅一百年期间，喺地上成就咗啲乜嘢。呢本书嘅每一篇会讲吓上帝嘅王国喺某方面已经成就或者将要成就嘅事。每一章都有个温习栏，俾大家可以谂一谂，上帝嘅王国对自己嚟讲有几真实。好快，上帝嘅王国就会嚟到，将恶人恶事铲除，使地球成为乐园。最后两章会讲吓到时有啲乜嘢事会发生。噉研读呢本书对你有乜嘢益处呢？

⁴⁰ 撒但千方百计要削弱你嘅信心。但系，耶和华要加强你对上帝王国嘅信心。你有信心，就可以抵挡得住撒但嘅攻击，亦都可以坚定不移。（以弗所书6:16）所以，我哋鼓励你用心研读呢本书，时不时问吓自己：“对我嚟讲，上帝嘅王国系唔系真实嘅呢？”终有一日，所有活着嘅人都会睇到上帝嘅王国统治天下。如果你相信上帝嘅王国系真实嘅，就会忠心耿耿、竭尽全力为呢个王国服务。你对王国嘅信心越大，就越有机会得享王国嘅福分。

1,2． 耶和华点样透露佢对人类嘅旨意？

仁爱嘅父母商量家事嘅时候，会俾仔女加入讨论。至于同仔女讲几多，父母自有分寸。佢哋净系会讲一啲仔女可以明白嘅细节。

² 同样，耶和华逐步透露佢对人类家庭嘅旨意，不过只系会喺适当嘅时候噉样做。等我哋回顾吓历史，睇睇耶和华点样将佢王国嘅真理揭示出嚟。

点解需要上帝嘅王国

3,4． 耶和华有冇预定人类嘅历史点样发展？请解释。

³ 建立弥赛亚王国本来唔系耶和华嘅旨意。点解噉讲呢？因为耶和华冇预定人类嘅历史应该点样发展。佢创造人类嘅时候，赐俾人选择嘅自由。上帝话俾亚当同夏娃知，佢嘅旨意系要人“繁衍增多，遍满地面，开拓大地”。（创世记1:28）耶和华仲要求佢哋遵守佢所定嘅善恶标准。（创世记2:16,17）亚当同夏娃本来可以选择服从上帝。如果佢哋同子孙后代都噉样做嘅话，今日成个地球都会系完美嘅人，齐心一致噉崇拜耶和华。我哋原本系唔需要基督所统治嘅王国嚟实现上帝旨意嘅。

⁴ 即使撒但、亚当同夏娃叛逆不忠，但系耶和华都冇改变原定嘅旨意，佢依然定意要完美嘅人遍满大地，四海一家。为咗实现自己嘅旨意，耶和华可以灵活变通。火车一定要喺固定嘅轨道上面行驶先至可以到达目的地，一旦遇到突发情况仲可能发生脱轨。但耶和华就唔同嘞，佢讲过要做嘅事，一定会成功，宇宙当中冇任何势力可以阻止佢实现自己嘅旨意。（请读以赛亚书55:11）如果一条路唔通，耶和华就会用另一条。a（出埃及记3:14,15）喺适当嘅时候，耶和华亦都会俾忠心嘅仆人知道，佢改用乜嘢方法实现自己嘅旨意。

5． 伊甸园嘅反叛事件发生之后，耶和华点样做呢？

⁵ 伊甸园嘅反叛事件发生咗之后，耶和华先至定意要建立一个由弥赛亚统治嘅王国。（马太福音25:34）喺人类冇晒希望嘅时候，耶和华就透露咗佢会用乜嘢方法挫败撒但夺权嘅阴谋，消除撒但造成嘅伤害，俾人类恢复完美。（创世记3:14-19）不过，耶和华冇一下子披露晒所有同呢个王国有关嘅细节。

耶和华开始揭示同王国有关嘅真理

6． （甲）耶和华应许咗乜嘢呢？（乙）但佢冇透露乜嘢？

⁶ 耶和华喺佢讲嘅第一个预言里面，应许会有一个“苗裔”打碎蛇嘅头。（请读创世记3:15）当时，耶和华冇透露呢个苗裔同蛇嘅苗裔分别系边个。耶和华讲咗呢个预言之后，有差唔多两千年嘅时间，冇进一步透露其他嘅细节。b

7． （甲）耶和华点解拣选亚伯拉罕？（乙）我哋从呢件事学到乜嘢？

⁷ 后来，耶和华拣选咗亚伯拉罕，而且应许“苗裔”会出自佢嘅世系。亚伯拉罕蒙耶和华拣选，系因为佢听从耶和华嘅话。（创世记22:18）我哋从呢件事学到乜嘢呢？耶和华净系向敬畏佢嘅人透露佢嘅旨意。（请读诗篇25:14）

8,9． 关于预言提到嘅苗裔，耶和华向亚伯拉罕同雅各透露咗乜嘢？

⁸ 耶和华通过天使向佢嘅朋友亚伯拉罕讲话，第一次透露咗佢应许嘅“苗裔”会系人类。（创世记22:15-17；雅各书2:23）呢个“苗裔”会点样打碎蛇嘅头呢？蛇指嘅系边个呢？请留意耶和华进一步透露嘅细节。

⁹ 耶和华决定，“苗裔”会出自亚伯拉罕嘅孙雅各嘅家族，因为雅各对上帝显出好大嘅信心。（创世记28:13-22）耶和华通过雅各预告，应许嘅“苗裔”会系雅各嘅仔犹大嘅后代，呢个后代会得到王权，“万民都必归顺佢”。（创世记49:1,10）耶和华通过雅各所讲嘅呢句话，表明“苗裔”会成为君王，统治万民。

10,11． 耶和华点解向大卫同但以理透露佢嘅旨意？

¹⁰ 犹大去世之后大约650年，耶和华向犹大嘅后代大卫王进一步透露自己嘅旨意。耶和华话大卫系“一个合心意嘅人”。（撒母耳记上13:14；17:12；使徒行传13:22）由于大卫有敬畏上帝嘅心，耶和华决定同佢立约，承诺佢嘅一个后代会永远作王。（撒母耳记下7:8,12-16）

¹¹ 大约500年之后，耶和华通过先知但以理披露弥赛亚（受膏者）喺地上出现嘅确切年份。（但以理书9:25）喺耶和华眼中，但以理“系极可贵嘅”。点解呢？因为但以理深深尊崇耶和华，而且恒心事奉佢。（但以理书6:16；9:22,23）

12． 天使吩咐但以理点样做？点解呢？

¹² 虽然耶和华启示但以理同其他先知写低好多同“苗裔”（弥赛亚）有关嘅细节，但系呢啲忠仆唔能够完全领悟其中嘅含意，因为耶和华所定嘅时间仲未到。举个例子，但以理睇到一个异象，同上帝王国嘅建立有关。天使吩咐佢要用印封住自己所写嘅预言，直到耶和华指定嘅时期。嗰时，“真确嘅知识就会丰富起嚟”。（但以理书12:4）

耶稣向人透露上帝嘅旨意

13． （甲）边个系上帝应许嘅苗裔？（乙）耶稣点样帮助人明白创世记3:15记载嘅预言？

¹³ 上帝清楚表明，大卫嘅后代耶稣就系上帝应许嘅苗裔，佢会永远作王。（路加福音1:30-33；3:21,22）耶稣开始传道，帮助人认识上帝嘅旨意，就好似太阳升起，照亮咗嗰啲处于属灵黑暗嘅人噉样。（马太福音4:13-17）例如，当时嘅人唔清楚创世记3:14,15提到嘅“蛇”系指边个。耶稣解开咗呢个谜，佢话魔鬼从最初就系“杀人凶手”，亦都系“谎话之父”。（约翰福音8:44）后来，耶稣向约翰传达上帝嘅启示，指出“最初嘅蛇，叫做魔鬼，又叫撒但”。c（请读启示录1:1；12:9）耶稣喺同一个启示里面亦都表明，身为上帝应许嘅苗裔，佢最终会点样铲除撒但，实现上帝喺伊甸园讲嘅预言。（启示录20:7-10）

14-16． 公元1世纪，耶稣向门徒讲解真理，门徒系咪总系能够完全领悟其中嘅含意呢？请解释。

¹⁴ 呢本书第1章讲过，耶稣经常向人谈论上帝嘅王国。不过，耶稣唔一定将门徒想知道嘅细节全部话俾佢哋知。耶稣讲解真理，就算讲得好具体好详细，门徒通常要到后来，有时甚至到千几年之后，先至可以完全领悟其中嘅含意。请睇吓以下一啲例子。

¹⁵ 公元33年，耶稣清楚表明，上帝会从地上拣选一啲人同王国嘅君王一齐统治，蒙拣选嘅人死咗之后会复活到天上成为灵体。当时门徒仲未可以领悟耶稣呢番话嘅意思。（但以理书7:18；约翰福音14:2-5）喺同一年，耶稣用比喻讲明，佢升天之后，仲要等一段好长嘅时间，上帝嘅王国先至会建立。（马太福音25:14,19；路加福音19:11,12）门徒亦都唔明白呢一点。点解噉讲呢？因为耶稣复活之后，门徒嚟问佢：“主呀，你系咪要喺呢个时候为以色列复兴王国？”当时耶稣冇进一步透露任何细节。（使徒行传1:6,7）耶稣曾经教导门徒，佢仲有“另外嘅绵羊”，呢啲“绵羊”唔属于“小群羊”，所以唔会同佢一齐作王。（约翰福音10:16；路加福音12:32）基督嘅门徒要到上帝嘅王国喺1914年建立之后好多年，先可以确切噉理解“小群羊”同“另外嘅绵羊”分别指边啲人。

¹⁶ 耶稣喺地上嗰时，其实有好多事要话俾门徒知，但佢冇噉样做，因为知道当时门徒承担唔嚟。（约翰福音16:12）的确，耶稣教导门徒认识咗唔少同王国有关嘅真理，但喺公元1世纪，关于上帝王国嘅知识仲未丰富起嚟。

真确嘅知识会喺终结时期丰富起嚟

17． （甲）为咗明白上帝王国嘅真理，我哋应该点样做？（乙）我哋仲需要边个嘅帮助呢？

¹⁷ 耶和华话俾但以理知，喺“终结嘅时期”有好多人“来往奔走”，“真确嘅知识”会丰富起嚟，人就可以深入认识上帝嘅旨意。（但以理书12:4）边个想得到呢啲知识，就要落一番功夫。一本参考书指出，译做“来往奔走”嘅希伯来语动词，有“从头到尾仔细查考”嘅意思。但唔好忘记，如果唔系耶和华提供帮助，无论我哋几咁仔细查考圣经，都唔能够确切理解上帝王国嘅真理。（请读马太福音13:11）

18． 点解话，敬畏耶和华嘅人既有信心，又好谦卑呢？

¹⁸ 1914年之前，耶和华逐步向人揭示佢王国嘅真理。喺呢个制度嘅终结时期，佢依然噉样做。呢本书第4同第5章会讲吓，过去一百年期间，上帝嘅子民唔止一次修正咗佢哋对王国真理嘅理解。噉系唔系话，佢哋冇耶和华嘅支持呢？唔系，耶和华一直喺背后支持佢哋。点解噉样讲呢？因为敬畏耶和华嘅人既有信心，又好谦卑，而信心同谦卑都系耶和华钟意嘅特质。（希伯来书11:6；雅各书4:6）耶和华嘅仆人对圣经嘅应许有信心，佢哋相信呢啲应许全部都会实现。关于圣经嘅应许点样实现，当佢哋睇出自己误解咗，就会谦卑噉承认错误，就好似英语版《守望台》1925年3月1日刊所讲：“我哋知道，主嘅话语，主自己会解释。喺指定嘅时候，主会用最好嘅方式向佢子民清楚解释佢嘅话语。”

19． 今日，耶和华令佢子民对佢嘅旨意有点样嘅理解？点解呢？

¹⁹ 上帝嘅王国喺1914年建立，当时上帝子民对于王国嘅预言点样应验只有片面嘅理解。（哥林多前书13:9,10,12）由于好想睇见上帝嘅应许实现，有时上帝嘅子民作出咗错误嘅结论。上一段提到嘅《守望台》亦都话：“要明白预言嘅含意，睇嚟最保险嘅做法系等到预言应验咗或者喺度应验紧嘅时候。”时间证明噉样做系明智嘅。目前嘅制度好快就会结束，关于上帝王国嘅预言，好多已经应验或正喺度应验紧嘞。上帝嘅子民有谦卑嘅心，甘愿受耶和华纠正。所以，耶和华就令佢哋更全面噉理解佢嘅旨意。真确嘅知识确实丰富起嚟。

新嘅理解为上帝嘅子民带嚟考验

20,21． 对于新嘅理解，公元1世纪嘅基督徒有乜嘢反应？

²⁰ 每当耶和华帮助我哋对真理有更清晰嘅理解，我哋嘅内心情况就会显露出嚟。如果我哋对上帝有信心，为人谦卑，就会乐意接受新嘅理解。公元1世纪中期，基督徒面对过噉样嘅考验。想象一下，假如你系嗰个时代嘅犹太人，已经归信基督，但仲系深深尊重摩西律法，将佢睇成系犹太民族嘅骄傲。有一日，会众读出使徒保罗喺圣灵启示下写嘅信。信嘅内容系，摩西律法废除咗嘞，耶和华已经舍弃以色列血统嘅人，转而恩待属灵嘅以色列，当中有犹太人亦都有外邦人。（罗马书10:12；11:17-24；加拉太书6:15,16；歌罗西书2:13,14）你听到呢啲信嘅内容，会有乜嘢反应呢？

²¹ 有啲基督徒谦卑噉听从保罗嘅劝告，结果蒙耶和华赐福。（使徒行传13:48）但有啲人就固执己见，点都唔愿意接受新嘅理解。（加拉太书5:7-12）如果佢哋唔肯改变自己嘅睇法，就会失去同基督一齐作王嘅机会。（彼得后书2:1）

22． 上帝帮我哋更清晰噉理解佢嘅旨意，对于呢一点你有乜嘢感觉？

²² 近几十年来，耶和华亦都帮助我哋更清晰噉理解佢嘅王国。例如话，佢帮我哋更清楚噉睇出，基督会喺几时将上帝王国嘅子民同嗰啲唔肯听从真理嘅人分开，就好似牧人将绵羊山羊分开一样。耶和华仲帮我哋明白以下真理：14万4000人会喺几时全部召集起嚟；关于上帝嘅王国，耶稣所讲嘅比喻有乜嘢含意；仲喺地上嘅受膏基督徒会喺几时被接到去天上。d耶和华帮我哋更清晰噉理解呢啲真理，对于呢一点你有乜嘢感觉呢？你嘅信心系唔系增强咗呢？新嘅理解唔系证明咗耶和华一直喺度教导佢谦卑嘅子民咩？你继续读呢本书，就会更加相信，耶和华正喺度向敬畏佢嘅人逐步透露佢嘅旨意。

1,2． 《新世界译本》点样显扬上帝嘅名？

1947年12月2日星期二，一个晴朗、清凉嘅早晨，喺美国纽约市布鲁克林嘅伯特利，有一小群受膏弟兄着手执行一项艰巨嘅任务。佢哋劳心劳力，细致严谨噉工作，用咗12年嘅时间，终于喺1960年3月13日星期日完成咗整本圣经嘅翻译工作。三个月之后，1960年6月18日，喺英国曼彻斯特市嘅大会上，内森·诺尔弟兄宣布发行《圣经新世界译本》（英语）嘅最后一册，在场所有人都兴奋到不得了。诺尔弟兄讲出咗大家嘅心声：“今日的确系个欢乐嘅日子，世界各地嘅耶和华见证人都欢欣鼓舞！”《新世界译本》有个鲜明嘅特点令到耶和华嘅子民特别开心，就系：原文里面凡系有上帝圣名嘅地方，都一一翻译出嚟。

² 好多圣经译本就啱啱相反，冇将上帝嘅名翻译出嚟。撒但企图使上帝嘅名销声匿迹，但系耶和华嘅受膏仆人坚决抵抗撒但嘅奸计。当日发行嘅《新世界译本》嘅前言话，呢个译本“最主要嘅特点就系恢复上帝嘅名喺圣经里面嘅应有地位”。耶和华呢个名喺《新世界译本》里面出现咗超过7000次，呢个译本的确大大显扬天父耶和华嘅圣名！

3． （甲）我哋嘅弟兄睇出上帝嘅名有乜嘢含意？（乙）我哋应该点样理解出埃及记3:13,14嘅经文？（见附栏“上帝名字嘅含意”）

³ 早期嘅圣经研究者一直以为上帝嘅名意思系：“我是自有永有的”。（出埃及记3:14，《和合本》）所以，英语版《守望台》1926年1月1日刊话：“耶和华呢个名所代表嘅嗰位神系自有嘅……系冇开始亦都冇终结嘅。”但系，到上帝嘅子民着手翻译《新世界译本》嘅时候，上帝就帮佢哋睇出，耶和华呢个名唔单单系指，佢“系自有嘅”。上帝圣名嘅主要含意系，佢一定会采取行动实现自己嘅旨意。上帝嘅子民亦都明白，耶和华呢个名嘅字面意思系“佢使……成为”，亦即系话，佢系“成事者”。耶和华定意创造宇宙同各种活物，使其中一部分活物能够崇拜佢，呢一切都已经成事嘞。佢仲会继续实现自己嘅旨意，亦都一定会成事。上帝嘅名应该受到显扬。点解噉样做非常重要？我哋可以点样显扬上帝嘅圣名呢？

尊上帝嘅名为圣

4,5． （甲）我哋祈求上帝嘅名彰显为圣，就等于系求乜嘢？（乙）上帝会喺几时同埋点样使自己嘅名彰显为圣呢？

⁴ 耶和华要彰显自己嘅名。喺模范祷告里面，耶稣所求嘅第一件事就系：“愿你嘅名彰显为圣。”（马太福音6:9）从呢点睇出，喺上帝嘅旨意当中，最重要嘅就系使耶和华呢个名彰显为圣。噉我哋祈求上帝嘅名彰显为圣，就等于求乜嘢呢？

⁵ 呢本书第1章提过，耶稣喺模范祷告里面求咗三件同上帝旨意有关嘅事，第一件就系“愿你嘅名彰显为圣”，其余两件系：“愿你嘅王国来临”，“愿你嘅旨意喺地上实现”。（马太福音6:10）我哋既然求耶和华采取行动，使佢嘅王国来临，使佢嘅旨意喺地上实现，我哋亦都会求耶和华采取行动，使佢嘅名彰显为圣。其实，自从伊甸园嘅反叛事件以来，耶和华嘅名一直受到羞辱。我哋求耶和华彰显自己嘅名，就等于系求佢除去自己嘅名所受嘅一切羞辱。耶和华会点样回应呢个祷告呢？佢话“我要使我嘅大名彰显为圣”，“我嘅名喺列国中被人亵渎”咗。（以西结书36:23；38:23）喺哈米吉多顿大战嗰阵，耶和华会铲除一切恶人恶事，喺天地众生眼前使自己嘅名彰显为圣。

6． 我哋点样做就系尊上帝嘅名为圣？

⁶ 自古以来，耶和华嘅仆人一直有荣幸尊佢嘅名为圣。当然，无论我哋做乜嘢都唔能够令上帝嘅名更加神圣，因为上帝嘅名系绝对神圣嘅。噉我哋点样做就系尊上帝嘅名为圣呢？以赛亚话：“你哋应该尊万军之主耶和华为圣”。讲到自己嘅子民，耶和华话：“佢哋都要尊我嘅名为圣……并且敬畏以色列嘅上帝。”（以赛亚书8:13；29:23）所以，我哋尊上帝嘅名为圣嘅话，就会承认唯有上帝嘅名系至高无上嘅，亦都会尊重呢个名所代表嘅一切，仲会帮助其他人尊上帝嘅名为圣。如果我哋承认耶和华系统治者，全心服从佢，就表明自己真系敬畏上帝，尊崇佢嘅名嘞。（箴言3:1；启示录4:11）

准备好归于上帝名下，而且显扬佢嘅名

7,8． （甲）上帝嘅仆人点样先至能够成为上帝名下嘅子民？（乙）我哋接落嚟会睇吓边啲内容呢？

⁷ 从19世纪70年代开始，上帝嘅现代仆人就一直喺佢哋嘅出版物里面使用上帝嘅名。例如，英语版《锡安嘅守望台》1879年8月刊同埋同一年出版嘅诗歌集《新妇之歌》（英语），都提到上帝嘅名耶和华，但噉样做仲未够。我哋要知道，可以成为上帝名下嘅子民系莫大嘅荣幸。睇嚟，上帝要佢嘅仆人先符合一啲条件，然后至会俾佢哋采用一个包含上帝圣名嘅名称。既然系噉，耶和华点样帮助早期嘅圣经研究者做好准备，成为佢名下嘅子民呢？

⁸ 回顾19世纪末到20世纪初嘅历史，我哋可以睇出耶和华点样帮助佢嘅子民更加清楚理解同佢嘅名有关嘅重要真理。等我哋讲吓其中三点。

9,10． （甲）点解早期嘅《守望台》文章经常将注意力放喺耶稣身上？（乙）自从1919年以来有乜嘢改变？结果点样？（另见附栏“《守望台》显扬上帝嘅名”）

⁹ 第一，耶和华嘅仆人对上帝嘅名嘅重要性有咗正确嘅睇法。早期忠心嘅圣经研究者以为，基督所献嘅赎价系圣经嘅主要教义。所以，嗰时嘅《守望台》往往将注意力放喺耶稣身上。例如，第一年嘅《守望台》提到“耶稣”呢个名嘅次数比“耶和华”多好多，大概系十比一。《守望台》1976年9月15日刊指出，早期嘅圣经研究者“过度重视”耶稣。不过后来耶和华帮助佢哋睇出，圣经非常重视上帝嘅名。圣经研究者跟住点样做呢？同一篇《守望台》文章话，从1919年起，“佢哋更加尊崇弥赛亚嘅天父耶和华”。1919年之后嘅十年期间，《守望台》提到上帝嘅名超过6500次。

¹⁰ 我哋嘅弟兄都尊崇耶和华呢个名，表明佢哋爱上帝嘅名。佢哋就好似古代嘅摩西噉样，开始向人“宣告耶和华嘅名”。（申命记32:3；诗篇34:3）耶和华留意到佢嘅子民为咗佢嘅名所显嘅爱心，就恩待佢哋，好似圣经讲嘅噉样。（诗篇119:132；希伯来书6:10）

11,12． （甲）1919年之后冇几耐，上帝组织嘅出版物喺内容方面有乜嘢改变？（乙）耶和华不断提醒佢嘅仆人要点样做？点解呢？

¹¹ 第二，真基督徒对上帝所委派嘅工作有咗正确嘅理解。1919年之后冇几耐，带头嘅受膏弟兄仔细查考以赛亚嘅预言。由嗰时起，上帝组织出版嘅书刊开始将焦点更加集中喺传道工作上。点解话，呢种调整系“喺适当嘅时候”分发嘅食物呢？（马太福音24:45）

¹² 以赛亚记述耶和华嘅话：“你哋系我嘅见证人，系我拣选嘅仆人”。（请读以赛亚书43:10-12）1919年之前，《守望台》从来都冇仔细分析过呢几节经文。1919年之后冇几耐，上帝组织嘅出版物开始探讨上面提到嘅经文，鼓励所有受膏基督徒为耶和华作见证，因为呢个系耶和华委派俾佢哋嘅工作。事实上，从1925年到1931年，就有57期《守望台》分析过以赛亚书43章，而每一期都讲以赛亚嘅话所指嘅系真基督徒。好明显，喺嗰几年期间，耶和华不断提醒佢嘅仆人，要执行佢交托俾佢哋嘅工作。点解呢？系为咗等佢哋“先受试验，睇吓系咪适合”。（提摩太前书3:10）圣经研究者一定要用行动证明自己真系为耶和华作见证，然后先至有资格成为上帝名下嘅子民。（路加福音24:47,48）

13． 圣经点样将至为重要嘅真理显示出嚟？

¹³ 第三，耶和华嘅子民慢慢明白尊上帝嘅名为圣非常重要。上世纪20年代，佢哋睇出上帝嘅名彰显为圣比乜嘢都重要。圣经点样将呢个至为重要嘅真理显示出嚟呢？请睇吓以下两个例子。上帝救以色列人离开埃及嘅主要原因系乜嘢呢？耶和华话：“使我嘅名传遍全地。”（出埃及记9:16）以色列人多次反叛耶和华，点解耶和华依然向佢哋大显慈悲呢？耶和华讲明原因：“免得我嘅名喺佢哋所住嘅列国眼前被亵渎”。（以西结书20:8-10）圣经研究者从呢两个例子同其他圣经记载学到乜嘢呢？

14． （甲）到咗上个世纪20年代末，上帝嘅子民领悟到乜嘢？（乙）圣经研究者深入理解呢点之后，对传道工作有乜嘢睇法呢？（另见附栏“要去传道嘅一个重要原因”）

¹⁴ 大约2700年前，以赛亚谈及耶和华，话：“你带领你嘅子民，为你自己建立美名。”（以赛亚书63:14）到咗上个世纪20年代末，上帝嘅子民先至领悟呢句话嘅含意。佢哋明白最重要嘅系尊耶和华嘅名为圣，而唔系自己得救。（以赛亚书37:20；以西结书38:23）1929年出版嘅《预言》（英语）一书扼要噉指出：“对天地众生嚟讲，耶和华嘅名彰显为圣系最重要嘅。”圣经研究者明白呢点之后，就更加努力为耶和华作见证，免得佢嘅圣名受到诋毁。

15． （甲）到咗上个世纪30年代，我哋嘅弟兄对乜嘢事有咗正确嘅睇法？（乙）时候到咗，耶和华会点样做呢？

¹⁵ 到咗上世纪30年代初，我哋嘅弟兄对上帝嘅名嘅重要性已经有咗正确嘅睇法，对上帝所委派嘅工作亦都有咗更清晰嘅理解，而且深刻领悟到上帝嘅名彰显为圣比乜嘢都重要。而家，时候到嘞，耶和华要使佢嘅仆人称为佢名下嘅子民，呢个系莫大嘅殊荣！事情嘅经过系点样嘅呢？等我哋嚟回顾一下历史。

耶和华“选出一群归佢名下嘅子民”

16． （甲）耶和华点样彰显自己嘅名？（乙）古代边一群人最先成为上帝名下嘅子民？

¹⁶ 耶和华点样彰显自己嘅名呢？一个重要嘅方法系，拣选一群人归于佢名下，做佢嘅子民。从公元前1513年起，以色列民族就代表耶和华，佢哋系耶和华嘅子民。（以赛亚书43:12）以色列人虽然同上帝立咗约，但系冇谨守呢个约。到咗公元33年，佢哋失去咗同上帝嘅宝贵关系。冇几耐，耶和华转而“眷顾外邦人，从佢哋当中选出一群归佢名下嘅子民”。（使徒行传15:14）呢群蒙拣选嘅人嚟自唔同嘅国族，全部都系基督嘅受膏门徒，称为“上帝嘅以色列”。（加拉太书6:16）

17． 撒但嘅乜嘢阴谋得逞？

¹⁷ 公元44年前后，耶稣嘅门徒“蒙上帝指引称为基督徒”。（使徒行传11:26）一开始，“基督徒”呢个独特嘅名称，指嘅系名副其实嘅基督徒。（彼得前书4:16）但就好似小麦同毒麦嘅比喻讲嘅噉，撒但企图以假乱真，佢嘅阴谋得逞，令到“基督徒”呢个名称亦都包括埋嗰啲有名无实嘅基督徒。结果，有千几年嘅时间，真假基督徒好难分辨，直到1914年收割时期开始之后，呢种情况先至有所改变。点解呢？因为天使开始将真基督徒同假基督徒分开。（马太福音13:30,39-41）

18． 我哋嘅弟兄点样睇出需要一个新名称？

¹⁸ 忠信嘅奴隶喺1919年受主人委派。之后，耶和华帮助佢嘅子民明白，佢哋受托要执行嘅任务系乜嘢。佢哋开始逐家逐户传道，好快就睇出呢件工作使佢哋同有名无实嘅基督徒区分开嚟。过咗冇几耐，佢哋就意识到“圣经研究者”呢个名称唔够贴切，因为佢哋最重要嘅工作系要为上帝作见证，尊崇同埋显扬上帝嘅名，而唔系单单研究圣经。所以，乜嘢名称先至同佢哋所做嘅工作相符呢？1931年，答案就揭晓嘞。

19,20． （甲）1931年嘅大会提出乜嘢振奋人心嘅决议？（乙）对于新名称，我哋嘅弟兄有乜嘢反应呢？

¹⁹ 1931年7月，大约有1万5000个圣经研究者嚟到美国俄亥俄州嘅哥伦布市参加大会，睇到节目表嘅封面上面印住两个特别大嘅英文字母“JW”。呢个系乜嘢意思呢？大家都喺度估呢两个字母代表乜嘢。7月26日星期日，卢述福弟兄向在场嘅所有人提出决议，其中有句话噉讲：“我哋决定采用‘耶和华见证人’呢个名称，亦都希望其他人用呢个名称嚟称呼我哋。”全场听众终于明白，“JW”原来就系代表“耶和华见证人”，呢个名称取自以赛亚书43:10。

²⁰ 听众都大声赞同呢个决议，跟住全场掌声雷动，持续不断。通过电台广播，喺地球另一边嘅圣经研究者亦都可以感受到哥伦布大会嘅热烈气氛。喺澳大利亚嘅欧内斯特·巴伯同太太内奥米回忆话：“听到美国传过嚟嘅热烈掌声，墨尔本嘅弟兄激动到跳起嚟，亦都跟住佢哋不断鼓掌。当时嘅情景真系令我哋毕生难忘。”a

上帝嘅名喺全球受显扬

21． 新名称对传道工作起咗乜嘢作用？

²¹ 上帝嘅仆人采用咗“耶和华见证人”呢个取自圣经嘅名称，就更加落力传讲好消息。美国一对先驱夫妇爱德华·格兰姆斯同太太洁西，参加咗1931年喺哥伦布市举行嘅大会。佢哋话：“我哋去参加大会，出发嗰阵仲系圣经研究者，返嚟嗰时就已经系耶和华见证人嘞。有咗呢个名称，我哋就更加能够显扬上帝嘅名，真系好开心。”大会之后，有啲耶和华见证人用一个新方法嚟宣扬上帝嘅名。佢哋探访住户嗰时，递俾对方一张卡片，上面写住：“我系个耶和华见证人，嚟宣扬耶和华上帝嘅王国。”上帝嘅子民觉得好自豪，因为佢哋嘅名称包含上帝嘅名“耶和华”。佢哋已经准备好将上帝嘅名嘅含意传遍四方。（以赛亚书12:4）

22． 有乜嘢可以表明耶和华嘅子民具有独特嘅身份？

²² 耶和华指引受膏嘅弟兄采用“耶和华见证人”呢个独特嘅名称，到而家已经几十年嘞。咁多年来，撒但企图令人认唔出上帝嘅子民，佢有冇成功呢？撒但亦都设法令我哋同世上嘅宗教混为一体，佢有冇得逞呢？当然冇。作为上帝嘅见证人，我哋呢个独特嘅身份比以往任何时候都更加鲜明。（请读弥迦书4:5；玛拉基书3:18）我哋嘅身份同上帝嘅名系密不可分嘅。今日边个传讲上帝嘅名，其他人就好快可以睇出佢系个耶和华见证人。正确嘅宗教已经坚立，“凌驾群峰”，冇俾好似群山一样嘅各种错误宗教遮住。（以赛亚书2:2）今日，耶和华所悦纳嘅宗教同佢嘅圣名确实大受显扬。

23． 诗篇121:5话耶和华会点样做，令我哋深受鼓舞呢？

²³ 无论而家定系将来，耶和华都会保护我哋，帮助我哋能够抵抗撒但嘅攻击，知道呢一点几咁令人鼓舞！（诗篇121:5）诗篇执笔者嘅话表达咗我哋嘅心声，佢话：“以耶和华为上帝嘅国家几咁有福！蒙上帝拣选为产业嘅民族几咁有福！”（诗篇33:12）

1,2． 点解话，耶稣系最有智慧嘅向导呢？

试谂吓，一个经验丰富嘅导游带住你同其他团友去到一个城市观光，嗰度景色迷人，令人惊叹。你哋从来都未去过嗰个城市，乜嘢都觉得好新奇。所以导游讲嘅每一句话，你哋都留心听。对于嗰啲仲未见到嘅景物，你哋又好奇又兴奋，于是去问导游。但系导游话，到时你哋就知道喇。导游通常会到咗景点，先至同你哋介绍、讲解。你慢慢睇出导游好有智慧，佢会喺最适当嘅时候将你需要知道嘅讲俾你知。

² 真基督徒嘅情况同呢啲游客差唔多。不过，我哋好想认识嘅，系一座最令人惊叹嘅城，呢座“有稳确根基嘅城”就系上帝嘅王国。（希伯来书11:10）耶稣仲喺地上嗰时，亲自引导门徒深入认识上帝嘅王国。门徒提出嘅问题，耶稣有冇全部都回答晒呢？冇。佢系唔系一下子就将上帝王国嘅事全部都话俾门徒知呢？唔系。耶稣话：“我仲有好多事要话你哋知，只系你哋目前承担唔嚟。”（约翰福音16:12）耶稣系最有智慧嘅属灵向导，一直都按照门徒能够理解嘅，引导佢哋认识上帝嘅王国。

3,4． （甲）耶稣点样继续教导忠心嘅门徒认识上帝嘅王国？（乙）本章会探讨乜嘢？

³ 约翰福音16:12所记载嘅话，系耶稣喺牺牲生命之前嗰晚讲嘅。噉耶稣牺牲生命之后，会点样继续教导忠心嘅门徒认识上帝嘅王国呢？佢向使徒保证：“显示真理嘅圣灵……会引导你哋明白全部真理”。a（约翰福音16:13）耶稣会用圣灵引导门徒认识上帝嘅王国，所以圣灵亦都好似耐心嘅向导。门徒需要明白嘅，耶稣都会喺最适当嘅时候使佢哋明白。

⁴ 下文会分析，圣灵点样引导诚心跟随基督嘅人深入认识上帝嘅王国。首先讲吓，我哋点样睇出上帝嘅王国系几时开始统治嘅。跟住会探讨，边啲人会统治上帝嘅王国，边啲人会成为呢个王国嘅子民，同埋呢两群人有乜嘢唔同嘅希望。最后会睇睇，基督徒点样更加清楚明白，忠于上帝嘅王国意味住乜嘢。

明白1914年系个重要年份

5,6． （甲）关于上帝王国嘅建立同收割时期，圣经研究者有乜嘢错误嘅睇法？（乙）点解门徒理解错咗，并唔表示耶稣冇用圣灵指引佢哋？

⁵ 呢本书第2章2提到，圣经研究者用咗几十年嘅时间，向人指出1914年系个重要年份，对圣经预言嘅应验有重大意义。不过，当时佢哋以为基督嘅临在喺1874年已经开始咗，亦都以为1878年基督已经喺天上开始统治，但其实上帝嘅王国要到1914年10月先至完全建立。1874年到1914年间系收割时期，到咗收割嘅高潮，受膏基督徒会被召集到天上。事实表明，当时嘅理解系错误嘅。噉系唔系话，耶稣冇用圣灵引导佢嘅忠心门徒呢？绝对唔系！

⁶ 再睇吓文章开头嘅比喻。游客出于好奇，迫不及待噉提出问题，但系导游冇马上答佢哋。噉系唔系话导游唔够称职呢？当然唔系。上帝子民嘅情况亦都好类似。有时，圣灵引导佢哋明白耶和华旨意嘅时候仲未到，佢哋就尝试解释其中嘅一啲细节，不过耶稣继续带领住佢哋。后来，忠心嘅基督徒谦卑噉改变自己嘅睇法，表明佢哋甘愿接受纠正。（雅各书4:6）

7． 上帝嘅子民得到乜嘢属灵嘅亮光？

⁷ 1919年之后，上帝嘅子民得到越来越多属灵嘅亮光。（请读诗篇97:11）1925年，英语版《守望台》刊登咗《国家嘅诞生》呢篇深具历史意义嘅文章，解释启示录12章嘅预言。预言提到上帝喺天上嘅“女人”生咗一个儿子，呢件事象征弥赛亚王国喺天上诞生。文章亦都提出确凿嘅证据，表明呢个王国已经喺1914年建立。b文章进一步指出，第一次世界大战期间，耶和华嘅子民遭到迫害，忍受磨难，呢一点清楚显示撒但就喺嗰段时间从天上被掟落嚟。佢“知道自己时日无多，就非常愤怒”。（启示录12:12）

8,9． （甲）《守望台》点样表明上帝嘅王国非常重要？（乙）我哋会解答边啲问题？

⁸ 上帝嘅王国有几重要？喺1928年，英语版《守望台》已经强调，上帝嘅王国比人类通过赎价得救更加重要。通过弥赛亚所统治嘅王国，耶和华会使佢嘅名彰显为圣，证明佢嘅至高统治权系正当嘅，而且彻底执行佢对人类嘅旨意。

⁹ 喺上帝嘅王国里面，边啲人会同基督一齐统治呢？边啲人会成为王国嘅地上子民？基督徒应该专心做乜嘢工作呢？

收割工作着重召集受膏基督徒

10． 关于14万4000人，上帝嘅子民喺好耐之前已经睇出乜嘢？

¹⁰ 1914年之前几十年，真基督徒已经明白，会有14万4000个忠心门徒同耶稣基督一齐喺天上统治。c当时嘅圣经研究者睇出，14万4000系个实数，而且喺公元1世纪上帝已经开始召集14万4000人。

11． 有希望成为基督“新娘”嘅嗰群人，点样睇出自己喺地上有任务要执行？

¹¹ 呢群人有希望成为基督嘅“新娘”。噉佢哋仲喺地上嘅时候，要执行乜嘢任务呢？佢哋睇出，耶稣好重视传道工作，而且将呢件工作同收割时期联系起嚟。（马太福音9:37；约翰福音4:35）呢本书第2章讲过，曾经有一段时间，圣经研究者认为收割时期只系会延续40年，喺收割嘅高潮受膏基督徒会被召集到天上。但40年过去嘞，传道工作仲系继续扩展。显然，当时圣经研究者有好多事仲未完全明白。今日，我哋知道收割时期喺1914年开始咗。喺收割期间，小麦同毒麦会分开，亦即系话，忠心嘅受膏基督徒会同假基督徒区分开。系时候全力召集14万4000人嘅剩余分子嘞！

12,13． 喺十个处女嘅比喻同银元嘅比喻里面，耶稣提到嘅事点样喺最后嘅日子应验？

¹² 从1919年起，喺基督嘅引导之下，忠信睿智嘅奴隶一直强调传道工作非常重要。喺公元1世纪，基督已经差门徒去传道。（马太福音28:19,20）佢仲指出受膏门徒必须具备乜嘢特质先可以完成传道任务。我哋点知呢？喺十个处女嘅比喻里面，耶稣表明受膏门徒一定要时刻守望，喺灵性上保持警惕，先能够得到最终嘅奖赏，可以去到绵羊羔天上嘅盛大婚宴。喺呢个场合，绵羊羔基督会迎娶由14万4000个忠心受膏门徒组成嘅“新娘”。（启示录21:2）喺银元嘅比喻里面，耶稣指出受膏仆人要勤恳噉执行佢交托嘅传道任务。（马太福音25:1-30）

¹³ 过去一百年期间，受膏基督徒唔单止保持警惕，而且勤奋传道。佢哋警醒守望，一定会蒙上帝奖赏。但呢件伟大嘅收割工作所召集嘅，系唔系只有嗰啲同基督一齐作王嘅14万4000人嘅剩余分子呢？

召集王国喺地上嘅子民

14,15． 《完成嘅奥秘》提到边四群人？

¹⁴ 以前，忠心嘅基督徒一直都好想知道，启示录7:9-14提到嘅“大群人”系指边啲人。喺基督使人明白“大群人”嘅身份之前，圣经研究者关于呢个课题所发表嘅见解，大部分都复杂难明，同我哋而家学到嘅显浅真理相差好远。

¹⁵ 1917年出版嘅《完成嘅奥秘》（英语）指出，“得救到天上享永生嘅人有两群或两个阶层，得救喺地上享永生嘅人亦都有两群或两个阶层”，亦即系话，一共有四群人得救。边四群呢？先讲吓有希望到天上去嘅人。第一群就系同基督一齐作王嘅14万4000人。第二群系大群人，当时嘅圣经研究者认为，呢群人系名义上嘅基督徒，但仲未正式脱离教会。佢哋唔系冇信心，只系信心唔够坚定，喺考验之下冇紧守忠义，所以喺天上居次要地位。再讲吓有希望喺地上享永生嘅人。圣经研究者认为，第三群系古代嘅忠仆，例如亚伯拉罕、摩西等。佢哋会喺地上管理第四群人，亦即系全地嘅人。

16． 喺1923年同1932年，上帝嘅子民得到乜嘢属灵嘅亮光？

¹⁶ 今日，我哋对基督徒所怀嘅希望有咗清晰嘅理解。噉圣灵系点样引导基督徒清楚理解呢啲真理嘅呢？属灵嘅亮光一次又一次噉照耀佢哋，逐步帮助佢哋明白。早喺1923年，英语版《守望台》已经提及有一群人唔向往到天上，佢哋会喺地上生活，受基督统治。1932年，英语版《守望台》提到，约拿达支持上帝所膏立嘅以色列王耶户，愿意同佢一齐去对抗错误嘅宗教。（列王纪下10:15-17）文章指出现代有一群人好似约拿达，仲话耶和华会带领呢群人“渡过哈米吉多顿大战”继续喺地上生活。

17． （甲）1935年，上帝嘅子民得到乜嘢灿烂嘅属灵亮光？（乙）关于“大群人”，忠心嘅基督徒对新嘅理解有乜嘢反应呢？（见附栏“大大松咗一口气”）

¹⁷ 1935年，一道灿烂嘅属灵亮光照耀上帝嘅子民。喺美国首都华盛顿举行嘅大会里面，上帝嘅子民明白咗“大群人”嘅身份，佢哋就系耶稣所讲嘅绵羊山羊比喻里面嘅绵羊，有希望喺地上享永生。（马太福音25:33-40）大群人属于“另外嘅绵羊”。讲到“另外嘅绵羊”，耶稣话：“我必须将佢哋带嚟。”（约翰福音10:16）喺大会上，卢述福对在场嘅人话：“凡系希望永远喺地上生活嘅人，请企起身。”听众当中有超过一半嘅人都企咗起身，于是卢述福宣布：“睇吓！大群人！”好多人都感动到不得了，因为终于明白咗自己嘅希望系喺地上享永生。

18． （甲）基督嘅门徒全力召集边群人？（乙）结果点样呢？

¹⁸ “大群人”会安然渡过大患难。自从1935年以来，基督一直引导佢嘅门徒全力召集“大群人”。起初，大群人嘅数目唔系好多。有一次，卢述福弟兄甚至话：“圣经讲嘅‘大群人’睇嚟唔系咁大。”今日，我哋当然知道，从1935年开始，耶和华就大大赐福俾佢嘅子民，大群人嘅数目不断增多。喺耶稣同圣灵嘅引导之下，受膏基督徒同“另外嘅绵羊”已经“合成一群”，并肩工作，服从“一个牧人”，就好似耶稣预告嘅一样。

19． 我哋可以点样做，使大群人嘅数目不断增多？

¹⁹ 忠于上帝嘅人当中，绝大多数会喺地上嘅乐园里面享永生。统治佢哋嘅，除咗君王基督，仲有同基督一齐作王嘅14万4000人。圣经提出嘅希望清晰明确。沉思基督点样引导上帝嘅子民明白呢个希望，唔系好令人欣慰咩？能够向人传讲呢个希望系几咁大嘅荣幸！等我哋尽己所能，热心传道。随住大群人嘅数目增多，赞美耶和华圣名嘅声音亦都会越来越雄壮！（请读路加福音10:2）

忠于上帝嘅王国意味住乜嘢

20． （甲）撒但嘅组织包括乜嘢？（乙）要忠于上帝嘅王国，基督徒就要点样做？

²⁰ 上帝嘅子民要继续认识上帝嘅王国，亦都要完全明白忠于呢个天上政府意味住乜嘢。关于呢点，1922年，英语版《守望台》指出有两个对立嘅组织，就系耶和华嘅组织同撒但嘅组织。撒但嘅组织包括当今世界嘅商业、宗教同埋政治制度。边个忠于基督所统治嘅上帝王国，就要避免同撒但嘅组织有任何不当嘅来往，绝对唔会妥协让步。（哥林多后书6:17）呢个系乜嘢意思呢？

21． （甲）关于商业界，忠信嘅奴隶告诫上帝嘅子民要提防乜嘢？（乙）关于“大巴比伦”，1963年嘅《守望台》点样讲？

²¹ 忠信嘅奴隶喺出版嘅灵粮里面一再指出，商业界贪污腐败，充满物质至上嘅精神，告诫上帝嘅子民唔好受到呢种歪风影响。（马太福音6:24）上帝组织嘅出版物亦都经常谈论撒但组织嘅宗教制度。1963年，英语版《守望台》（汉语版1964年）清楚表明，“大巴比伦”唔单单指有名无实嘅基督教，仲包含世上所有错误嘅宗教。呢本书第10章会详细讲吓，上帝点样帮助嚟自唔同国家唔同文化背景嘅子民离开大巴比伦，弃绝错误宗教嘅一切习俗。（启示录18:2,4）

22． 第一次世界大战期间，唔少圣经研究者对于罗马书13:1嘅劝告有点样嘅理解呢？

²² 而家讲吓撒但组织嘅政治制度。真基督徒可唔可以参与战争或者国际冲突呢？第一次世界大战期间，圣经研究者普遍都明白，基督嘅门徒唔可以杀人。（马太福音26:52）但由于罗马书13:1劝人要服从“在上当权嘅”，唔少圣经研究者认为，基督徒可以参军，着军装，甚至带武器，但奉命上阵嗰时，只可以向天开枪，唔可以杀人。

23,24． （甲）第二次世界大战期间，上帝嘅子民对于罗马书13:1又有点样嘅理解呢？（乙）关于呢节经文，基督引导门徒得到乜嘢正确嘅理解？

²³ 1939年，第二次世界大战爆发之后，英语版《守望台》嘅文章深入探讨中立嘅问题，讲明基督徒绝对唔会参与撒但世界嘅战争同冲突。呢个真系适时嘅指引！基督嘅门徒听从呢个指引，就唔会好似参战国噉背负沉重嘅血债。其实，喺1929年，上帝组织嘅出版物指出，罗马书13:1所讲嘅“在上当权嘅”系指耶和华同耶稣，而唔系指世上嘅统治者，不过当时嘅理解并唔确切。

²⁴ 到咗1962年，圣灵引导基督嘅门徒得到正确嘅理解。英语版《守望台》11月15日刊同12月1日刊（汉语版1963年6月15日刊同7月1日刊）登载咗几篇深具历史意义嘅文章，详细讲解罗马书13:1-7。上帝嘅子民终于领悟到耶稣讲嘅话所蕴含嘅原则。耶稣曾经讲过：“凯撒之物要还俾凯撒，上帝之物要还俾上帝。”（路加福音20:25）从呢句至理名言，上帝嘅子民睇出基督徒要服从“在上当权嘅”，但呢种服从唔系绝对嘅。今日，真基督徒明白，“在上当权嘅”系指世上各个政府，基督徒要服从政府，但唔系绝对服从。如果世上嘅当权者要求我哋违抗耶和华上帝嘅命令，我哋就会效法古代嘅使徒，回答话：“我哋必须接受上帝嘅统治，服从上帝而唔系服从人。”（使徒行传5:29）呢本书第13同14章会讲吓，上帝嘅子民点样坚守基督徒嘅立场，严守中立。

25． 圣灵引导上帝嘅子民认识上帝嘅王国，你对呢件事有咩感觉？点解呢？

²⁵ 关于上帝嘅王国，过去一百年期间，基督嘅门徒学到乜嘢？我哋学到上帝嘅王国几时喺天上建立，亦都学到呢个王国有几重要。我哋清楚睇出，圣经话有两种唔同嘅希望，上帝嘅忠仆有啲会到天上，有啲会喺地上享永生。我哋明白忠于上帝嘅王国意味住乜嘢，亦都知道要服从世上嘅政府，但呢种服从唔系绝对嘅。不妨问吓自己：“如果唔系耶稣基督引导地上嘅忠信奴隶明白呢啲宝贵嘅真理，然后教导人认识，我又点会知道呢？”有基督同圣灵引导我哋，系几咁大嘅福分啊！

1,2． （甲）耶稣牺牲生命之前预告咗乜嘢？（乙）乜嘢问题有待解答？

政治领袖经常作出承诺，但大部分都系空头支票。有啲领袖好想兑现承诺，但往往都有心无力。令人欣慰嘅系，弥赛亚君王耶稣基督讲到做到，从来都唔会食言。

² 耶稣喺1914年登基作王之后，就准备实现自己喺1900年前预告嘅事。耶稣牺牲生命之前冇几耐，预告话：“呢个王国嘅好消息会传遍普天下”。（马太福音24:14）呢个预言系末世征象嘅一部分，预言嘅应验表明耶稣已经临在，执掌王权。但问题系：喺呢段最后嘅日子，人人都自私自利、缺乏爱心，对宗教冇兴趣，噉君王耶稣点样兴起一支甘心舍己嘅传道大军呢？（马太福音24:12；提摩太后书3:1-5）我哋一定要揾到呢个问题嘅答案，因为答案同每个真基督徒息息相关。

3． （甲）耶稣深信乜嘢？（乙）耶稣点解会有咁大嘅信心？

³ 再嚟睇吓耶稣嘅预言。“会传遍”呢几个字唔系正正显示出耶稣嘅信心咩？耶稣深信喺最后嘅日子，一定会有一群人甘心为上帝嘅王国效劳。点解耶稣会有咁大嘅信心呢？因为佢向天父学习。（约翰福音12:45；14:9）耶稣降世为人之前亲眼睇到，耶和华信任崇拜佢嘅人，深信佢哋有甘心乐意嘅精神。等我哋嚟睇吓耶和华点样表达呢种信心。

“你嘅子民要甘心献出自己”

4． （甲）耶和华请以色列人捐助乜嘢工程？（乙）以色列人有乜嘢反应？

⁴ 请回想一下耶和华吩咐摩西建造圣幕嗰时，发生咗乜嘢事。圣幕系以色列人崇拜耶和华嘅中心。耶和华通过摩西，请所有以色列人捐助呢项工程。摩西对以色列人讲：“凡甘心乐意嘅，都可以将奉献俾耶和华嘅礼物送上嚟”。结果，民众每日朝早都“不断将自愿献嘅礼物送上嚟”。送嚟嘅礼物实在太多，摩西唯有叫佢哋唔使继续奉献。（出埃及记35:5；36:3,6）以色列人确实冇辜负耶和华嘅信任。

5,6． 诗篇110:1-3预告，耶和华同耶稣相信喺最后嘅日子，真心崇拜上帝嘅人会显出点样嘅精神？

⁵ 耶和华系唔系早就相信，喺最后嘅日子崇拜佢嘅人会甘心献出自己呢？当然系啦！耶稣喺地上出生前千几年，耶和华已经启示大卫写低，弥赛亚开始统治嗰时有乜嘢事发生。（请读诗篇110:1-3）耶稣一登基作王，就受到仇敌嘅反对。不过，佢有一支拥护王国嘅大军，心甘情愿为君王效劳。连年轻人都乐意加入呢支队伍，佢哋嘅数目就好似晨曦中覆盖大地嘅露珠咁多。a

⁶ 耶稣知道，诗篇110篇嘅预言所讲嘅就系佢自己。（马太福音22:42-45）所以，耶稣完全有理由相信自己作王嗰时，一定会有一群人甘心为佢效劳，乐意将王国嘅好消息传遍世界各地。历史话俾我哋知乜嘢呢？喺最后嘅日子，君王耶稣有冇兴起一支甘心舍己嘅传道大军呢？

“宣扬呢个信息系我嘅荣幸，亦都系我嘅责任”

7． 耶稣作王之后，点样帮助门徒做好准备，迎接前头嘅任务？

⁷ 耶稣作王之后冇几耐，就帮助门徒做好准备，迎接前头重大嘅任务。呢本书第2章讲过，从1914年到1919年初期，耶稣视察同埋洁净圣殿。（玛拉基书3:1-4）1919年后期，耶稣委派忠信嘅奴隶带领佢嘅门徒。（马太福音24:45）从嗰时开始，忠信嘅奴隶就通过大会演讲同埋出版物嚟分发灵粮，反复强调每个基督徒都有责任亲自去传道。

8-10． 大会点样促进传道工作？请举例。（另见附栏“早期嘅大会促进传道工作”）

⁸ 大会演讲 1919年9月1-8日，圣经研究者喺美国俄亥俄州杉树角举行大会。呢个系第一次世界大战之后嘅第一个重要大会，大家都好想知道上帝嘅组织有乜嘢指示。大会嘅第二日，卢述福弟兄喺演讲当中明确噉话俾听众知：“基督徒喺地上嘅使命……系宣扬主嘅王国。”

⁹ 三日之后，卢述福弟兄发表咗一个题目叫做“向同工讲话”嘅演讲，将大会推向高潮。佢话：“基督徒静落嚟嗰时好自然会谂一谂：我喺地上有乜嘢使命呢？答案应该系，主仁慈噉派我做大使，劝世人同上帝和好。宣扬呢个信息系我嘅荣幸，亦都系我嘅责任。”后来，呢个演讲以《宣扬王国》作为题目，喺《守望台》刊登出嚟。

¹⁰ 喺呢个具有历史意义嘅演讲当中，卢述福弟兄宣布发行一本新杂志《黄金时代》（而家叫做《警醒！》），目的系要帮助人明白上帝嘅王国系人类唯一嘅希望。卢述福弟兄问听众：“边个愿意分发呢本杂志？”大会嘅一份报告描述当时嘅情景话：“在场嘅6000人一齐企咗起身。听众嘅反应咁热烈，真系激动人心！”b好明显，君王耶稣有一支甘心为佢效劳嘅大军，乐意传讲佢嘅王国。

11,12． 1920年有一期《守望台》指出，耶稣预告嘅传道工作会喺几时执行？

¹¹ 出版物 耶稣预告，“呢个王国嘅好消息会传遍普天下”。通过《守望台》嘅文章，我哋越来越明白传道工作嘅意义有几重大。请睇吓上个世纪20年代初嘅一啲例子。

¹² 基督嘅大军会传讲乜嘢好消息，从而应验马太福音24:14嘅预言呢？几时会传讲呢个好消息？英语版《守望台》1920年7月1日刊嘅一篇文章《王国嘅福音》解释呢节经文话：“好消息系同旧制度嘅终结以及弥赛亚王国嘅建立有关嘅。”至于几时传讲，文章接落嚟清晰噉指出：“从［第一次世界］大战直到‘大患难’，呢个好消息一定要传讲出去。……而家系时候将呢个好消息喺信奉基督嘅国家里面广传开去。”

13． 1921年，《守望台》点样鼓励受膏基督徒甘心献出自己？

¹³ 上帝嘅子民系咪迫于无奈，先至做耶稣预告嘅传道工作呢？唔系嘅。英语版《守望台》1921年3月15日刊嘅一篇文章《要刚强壮胆》鼓励受膏基督徒甘心献出自己，促请每个人谂一谂：“参与传讲好消息嘅工作，唔系无上嘅光荣咩？唔系我嘅本分咩？”文章跟住话：“主嘅话喺耶利米心里‘燃烧，困喺［佢］嘅骨头里面’，佢冇办法唔讲出嚟。当你将传道工作［睇成系殊荣］，就一定会好似耶利米噉样，忍唔住要传讲上帝嘅话语。”（耶利米书20:9）呢番鼓舞人心嘅说话，反映出耶和华同耶稣信任忠心为王国效劳嘅人。

14,15． 1922年，《守望台》劝勉受膏基督徒用乜嘢方法向人传道？

¹⁴ 真基督徒应该点样向人传讲王国嘅信息呢？英语版《守望台》1922年8月15日刊，有一篇简短有力嘅文章叫做《服务至为重要》，劝勉受膏基督徒要“主动上门探访人，向佢哋分发书刊，指出天上嘅王国临近嘞”。

¹⁵ 好明显，自从1919年以来，基督一直通过忠信睿智嘅奴隶反复强调，宣扬上帝王国嘅好消息系基督徒喺地上嘅职责，亦都系佢哋嘅殊荣。噉早期嘅圣经研究者有冇听从呢个劝勉呢？

“忠心嘅人甘愿献出自己”

16． 对于所有基督徒都应该参与传道工作，有啲被选出嚟嘅长老有乜嘢反应？

¹⁶ 上世纪二三十年代，有啲人唔同意所有受膏基督徒都应该参与传道工作。英语版《守望台》1927年11月1日刊指出当时嘅情况话：“教会［会众］里面有啲长老……唔单止唔带头传道，亦都唔肯鼓励弟兄传道。……佢哋仲藐视逐家逐户宣扬上帝、君王同王国嘅建议。”文章明确噉指出：“而家，忠心嘅弟兄要记低而且避开呢啲人，亦都要令佢哋知道，佢哋会失去长老嘅职分。”c

17,18． （甲）会众大部分人对忠信奴隶嘅指示有乜嘢反应？（乙）过去百几年期间，有好几百万人点样做？

¹⁷ 令人高兴嘅系，会众大部分人都听从忠信奴隶嘅指示，热心传讲上帝王国嘅信息，而且以呢项工作为荣。英语版《守望台》1926年3月15日刊有句话噉讲：“忠心嘅人甘愿献出自己，向人传讲上帝嘅王国。”佢哋用行动证明自己乐意为弥赛亚君王效劳，应验咗诗篇110:3嘅预言。

¹⁸ 过去百几年期间，有好几百万人乐意献出自己嚟宣扬上帝嘅王国。接落嚟嘅几章会讲吓佢哋点样传道——所用嘅方法同工具，以及传道工作有乜嘢成果。下文会先讲吓，喺呢个以自我为中心嘅世界里面，点解仲有咁多人自愿传讲上帝嘅王国。不妨一边睇，一边问吓自己：“点解我要向人传讲好消息呢？”

“要不断先追求王国”

19． 点解我哋听从耶稣嘅劝告“不断先追求王国”？

¹⁹ 耶稣劝门徒“要不断先追求王国”。（马太福音6:33）点解我哋听从耶稣嘅劝告呢？主要系因为我哋睇出上帝王国嘅重要性。上帝要实现佢嘅旨意，佢嘅王国系必不可少嘅。前一章已经讲过，圣灵逐步启示人明白振奋人心嘅王国真理。我哋俾呢啲宝贵嘅真理深深打动，自然就会先追求王国。

20． 宝藏嘅比喻点样表明，耶稣嘅门徒会听从劝告，不断先追求王国？

²⁰ 耶稣知道门徒会听从劝告，不断先追求王国。请睇睇一个关于宝藏嘅比喻。（请读马太福音13:44）耶稣喺比喻里面提到，耕田嘅人做紧平日嘅工作嗰时，偶然发现藏喺野地嘅财宝，即刻就睇出佢好有价值。耕田嘅人点做呢？“佢非常喜乐，就去卖晒一切所有嘅，买咗嗰块地。”我哋从呢个比喻学到乜嘢呢？我哋揾到上帝王国嘅真理，睇出呢啲真理非常宝贵，就乐意作出任何牺牲，务求继续将上帝嘅王国放喺应有嘅位置——我哋生活嘅首位。d

21,22． 忠于上帝王国嘅人点样表明自己先追求上帝嘅王国？请举例说明。

²¹ 点样表明自己先追求上帝嘅王国呢？忠于上帝王国嘅人唔会净系讲而唔去做。佢哋会献出自己嘅才干、财物，甚至献出一生嚟传讲上帝嘅王国。为咗参与全时服务，唔少人作出好大嘅牺牲。所有甘心乐意传道嘅人都可以凭自己嘅亲身经历作证：凡系先追求王国嘅，一定会得到耶和华嘅赐福。等我哋嚟睇吓早期嘅一个例子。

²² 上世纪20年代后期，埃弗里·布里斯托同妻子洛文娅开始喺美国南部做派书者（而家叫做先驱）。好多年之后，洛文娅回忆话：“我同埃弗里一齐做先驱好多年，度过唔少快乐嘅时光。有好多次，我哋冇钱加油或者买食物，但系耶和华一直都通过某啲方式令我哋得到生活嘅必需品。就噉样，我哋一直做先驱，从来都唔会缺衣少食。”洛文娅记得佢哋两个喺佛罗里达州彭萨科拉镇服务嗰时，有一次啲钱就快使晒，食物亦都就嚟食完。佢哋返到活动房屋车，发现有两大袋食物，仲有张纸仔，上面写住：“请接受彭萨科拉连嘅爱。”e回顾过去几十年做先驱嘅经历，洛文娅话：“耶和华从来都冇揼低我哋唔理，我哋信赖佢，佢一定唔会令我哋失望。”

23． （甲）你对自己揾到嘅王国真理有乜嘢感觉？（乙）你决心点样做呢？

²³ 我哋人人嘅情况都唔同，唔一定可以用同样多嘅时间传道。但系，每个人都可以全心全意宣扬好消息，将佢睇成系殊荣。（歌罗西书3:23）由于我哋珍视所揾到嘅宝贵嘅王国真理，好想尽心竭力为王国效劳，所以无论要牺牲乜嘢，我哋都心甘情愿，甚至毫不犹疑噉做。你系咪都有噉嘅决心呢？

24． 喺最后嘅日子，上帝王国嘅一个伟大成就系乜嘢？

²⁴ 过去一百年间，君王耶稣的确讲到做到，马太福音24:14记载嘅预言已经应验咗。点样应验呢？耶稣嘅门徒弃绝咗呢个世界以自我为中心嘅态度，献出自己传讲上帝嘅王国，但唔系出于勉强，而系甘心乐意。佢哋喺世界各地所做嘅传道工作，系上帝王国喺呢段最后日子嘅一个伟大成就，呢个清楚表明耶稣已经临在，执掌王权嘞。

1,2． （甲）耶稣用乜嘢方法令群众清楚听到佢嘅话？（乙）忠心嘅基督徒点样效法佢哋嘅主？目的系乜嘢？

民众聚集喺岸边，围住耶稣。但系，耶稣上咗一只船，船划离咗岸边。佢点解要噉样做呢？因为佢知道喺船上讲话，声音通过水面可以放大，岸上嘅群众就会听得更加清楚。（请读马可福音4:1,2）

² 上帝王国建立前后嘅几十年间，忠心嘅基督徒已经效法佢哋嘅主，用新方法将上帝王国嘅好消息传俾更多嘅人。喺君王基督嘅指导之下，上帝嘅子民继续尝试用唔同嘅方法传道。佢哋灵活变通，善用新科技，趁末日仲未嚟到，尽量接触更多嘅人。（马太福音24:14）无论人住喺边度，上帝嘅子民都会想方设法将王国信息传俾佢哋。下文会讲吓，上帝嘅子民用嘅几个方法。不妨一边睇，一边谂吓自己可以点样向早期传讲好消息嘅人学习，效法佢哋嘅信心。

令更多人认识王国

3． 上帝嘅子民通过报章传播王国真理，点解令敌视真理嘅人大受挫折呢？

³ 通过报章 罗素弟兄同佢嘅同工从1879年开始出版《守望台》，将王国嘅信息传播俾好多人。不过，1914年之前大约十年，有一连串嘅事发生咗。睇嚟，基督指引事态嘅发展，令更多人认识到上帝王国嘅好消息。先从1903年讲起。嗰一年，伊顿博士代表美国宾夕法尼亚州基督新教嘅一群牧师发言，就某啲教义嘅圣经根据，一次又一次噉要求罗素弟兄同佢辩论。伊顿写信俾罗素话：“喺一啲问题上，你同我之间有严重嘅分歧。……我希望同你公开辩论，相信公众亦都好想知道呢啲问题嘅答案。”罗素同佢嘅同工都认为公众会对呢啲问题感兴趣，于是安排喺一份主流报纸《匹兹堡新闻报》上面登载辩论嘅内容。文章见报之后深受读者欢迎，因为罗素对圣经真理嘅解释非常清晰，令人信服。结果，《匹兹堡新闻报》主动揾罗素，话每个星期都可以刊登佢嘅演讲。呢个真系令敌视真理嘅人大受挫折！

4,5． （甲）罗素表现出乜嘢特质？（乙）肩负职责嘅弟兄可以点样效法佢？

⁴ 冇几耐，有多份报纸都想刊登罗素嘅演讲。1908年，英语版《守望台》指出，“有11份报纸经常”将罗素嘅传道演讲登出嚟。有啲对报业比较在行嘅弟兄向罗素建议，如果将守望台办事处从匹兹堡搬到大城市，可能会有更多报纸愿意刊登以圣经为题材嘅文章。罗素考虑咗佢哋嘅建议，衡量过其他因素之后，喺1909年将办事处搬到纽约市布鲁克林区。结果点样呢？搬迁之后短短几个月，就有400份唔同嘅报纸刊登罗素嘅演讲，仲有越来越多嘅报纸都噉样做。到上帝嘅王国喺1914年建立嗰时，罗素嘅文章同传道演讲分别用4种语言，喺2000几份唔同嘅报纸上面刊登出嚟。

⁵ 回顾呢段历史，我哋从中学到乜嘢呢？今日，喺上帝嘅组织里面，肩负职责嘅弟兄应该好似罗素弟兄噉样谦卑自抑。喺边方面要谦卑呢？就系做重大决定之前，要考虑其他人嘅意见。（请读箴言15:22）

6． 请举例说明报纸上谈论王国真理嘅文章点样改变人嘅一生。

⁶ 报纸上面谈论王国真理嘅文章改变咗好多人嘅一生。（希伯来书4:12）1917年受浸嘅奥拉·赫策尔就系通过报纸上面嘅文章认识真理嘅。奥拉话：“我结婚之后，有一次返到明尼苏达州嘅罗切斯特探我妈妈，啱啱返到屋企就睇见妈妈喺度将报纸嘅一啲文章剪落嚟，原来系罗素嘅传道演讲。妈妈话俾我知，佢喺文章里面学到好多嘢。”奥拉睇出剪报上面讲嘅系真理，之后嘅六十年，佢一直忠心宣扬上帝嘅王国。

7． 点解带头嘅弟兄重新衡量用报章传播真理呢个方法？

⁷ 1916年发生咗两件大事，促使带头嘅弟兄重新衡量要唔要继续用报章传播上帝王国嘅好消息。第一，当时大战进行得好激烈，印刷材料非常短缺。1916年，英国分部报社联络处嘅一份报告话：“目前只有30几份报纸刊登罗素弟兄嘅传道演讲。由于纸张嘅价格暴涨，呢个数目好可能会大幅度下降。”第二，罗素弟兄喺1916年10月31日去世。英语版《守望台》1916年12月15日刊宣布：“既然罗素弟兄已经唔喺度，传道演讲亦都唔会再喺报纸上面刊登嘞。”虽然上帝嘅组织唔再借助报章传播王国嘅好消息，但会继续采用其他方法宣扬真理，例如播放《创世影剧》。呢啲方法都同样系卓有成效嘅。

8． 制作《创世影剧》要花费几多工夫？

⁸ 通过影片 罗素同佢嘅同工用咗三年时间制作嘅《创世影剧》，终于喺1914年面世嘞。（箴言21:5）《创世影剧》结合咗影片同彩色幻灯片，而且配埋声音，非常有创意。佢哋将圣经里面唔同嘅故事拍成影片，前后有几百人参与演出，连动物亦都有份。1913年嘅一份报告话：“为咗将挪亚嘅故事制作成有声电影，有间大型动物园嘅大部分动物都上咗银幕。”至于另外嘅几百张幻灯片，系由伦敦、巴黎、纽约同费城嘅画家逐一油上颜色嘅。

9． 点解要用咁多时间同金钱制作《创世影剧》呢？

⁹ 点解要用咁多时间同金钱制作《创世影剧》呢？喺1913年举行嘅一连串大会当中，参加嘅人通过咗以下决议：“美国报章利用漫画、图片嚟影响公众嘅话题同关注点，得到前所未有嘅成功，播放影片呢种方法非常灵活，而且深受观众欢迎，显示呢啲工具大有价值。我哋作为传道员同圣经研究班导师，应该要与时并进。我哋毫无保留噉赞成采用呢啲方法，而且我哋深信，用影片同幻灯片嚟传播福音同埋教人圣经系非常有效嘅。”

10． 播放《创世影剧》嘅地区有几广泛？

¹⁰ 1914年，《创世影剧》每日喺80个城市播放。喺美国同加拿大，差唔多有八百万人睇过呢部影剧。同一年，《创世影剧》亦都喺英国、丹麦、芬兰、德国、挪威、瑞典、瑞士、新西兰同埋澳大利亚放映。上帝嘅组织仲为《创世影剧》制作咗一个简化版，喺小镇度播放。呢个版本称为《尤里卡影剧》，只有幻灯片，唔包含影片，制作费比较低，运送起嚟亦都比较容易。到咗1916年，无论系《创世影剧》定系《尤里卡影剧》，都已经被译成法语、德语、希腊语、波兰语、瑞典语、意大利语、西班牙语、亚美尼亚语同埋丹麦－挪威语。

11,12． （甲）一个年轻男子睇过《创世影剧》之后，有乜嘢感受？（乙）我哋可以点样向佢学习呢？

¹¹ 18岁嘅夏尔·罗纳睇过法语版嘅《创世影剧》之后，深受感动，印象难忘。夏尔话：“呢部影剧喺我家乡法国阿尔萨斯省嘅科尔马镇播放。影剧清楚解释圣经嘅真理，一开始就打动咗我。”

¹² 夏尔后来受咗浸，仲喺1922年投身先驱工作。佢起初嘅一个任务就系喺法国播放《创世影剧》。提到呢个任务，夏尔话：“我一个人兼做几样工作：拉小提琴，做会计同埋管理书籍。节目开始之前，我仲负责请观众安静。中场休息嗰时，我哋就分发书刊。我哋将会堂分成唔同嘅区，每个区都由一个弟兄或者姊妹负责。呢啲弟兄姊妹双手捧满书，逐一向区内嘅观众分发。另外，我哋喺会堂入口都摆咗啲台，上面放满书刊。”1925年，夏尔获得邀请，到美国纽约市布鲁克林嘅伯特利服务。嗰时，WBBR电台啱啱成立，夏尔受到委派，喺电台管弦乐团做指挥。睇过罗纳弟兄嘅经历之后，不妨问吓自己：“为咗将上帝王国嘅信息传开去，我愿唔愿意接受上帝嘅组织委派嘅任何工作呢？”（请读以赛亚书6:8）

13,14． 上帝嘅组织点样运用电台传播王国嘅好消息？（另见附栏“WBBR电台嘅节目”“一个划时代嘅大会”）

¹³ 通过电台 到咗上世纪20年代，《创世影剧》嘅放映次数越来越少。随住电台广播越来越流行，上帝嘅组织开始用电台传播王国嘅好消息。1922年4月16日，喺美国宾夕法尼亚州费城嘅大都会歌剧院，卢述福弟兄用无线电广播佢嘅演讲，题目系“现今活着嘅千百万人将永远唔会死”，收听广播嘅人数估计有五万。1923年，大会嘅部分节目首次通过电台播放出去。除咗运用商营电台之外，带头嘅弟兄仲决定建立自己嘅无线电台，第一个电台设立喺美国纽约市嘅斯塔滕岛，注册为WBBR电台，喺1924年2月24日启播。

¹⁴ 英语版《守望台》1924年12月1日刊指出开办WBBR电台嘅目的：“至今用嚟传播真理嘅方法当中，我哋相信最经济、最有效嘅就系电台广播嘞。”文章又话：“如果主认为开办其他电台可以促进真理嘅传播，自然会提供需要嘅资金。”（诗篇127:1）到咗1926年，耶和华嘅子民已经拥有六个无线电台，两个设立喺美国，就系纽约嘅WBBR电台同芝加哥附近嘅WORD电台。其余四个电台设立喺加拿大嘅艾伯塔省、安大略省、萨斯喀彻温省、不列颠哥伦比亚省。

15,16． （甲）对于我哋用电台传播圣经真理，加拿大嘅教士有乜嘢反应？（乙）电台广播嘅圣经演讲同逐家逐户嘅传道工作点样相辅相成？

¹⁵ 上帝嘅子民通过电台将圣经真理广泛噉传播开去，教会啲教士又点会注意唔到呢？艾伯特·霍夫曼熟悉加拿大萨斯喀彻温省电台嘅操作，佢话：“越来越多人认识圣经研究者（而家叫做耶和华见证人）。通过电台广播，我哋为圣经真理作咗美好嘅见证，直到1928年啲教士向政府当局施压为止。结果，圣经研究者喺加拿大持有嘅全部电台执照都俾政府收翻。”

¹⁶ 虽然上帝嘅组织喺加拿大嘅电台全部都关闭咗，但圣经演讲继续通过商营电台播放出去。（马太福音10:23）为咗提高电台节目嘅收听率，令更多人得益，《守望台》同《黄金时代》（而家叫做《警醒！》）将广播圣经真理嘅商营电台一一列出嚟。噉样，传道员逐家逐户传道嗰时，就可以鼓励住户收听本地电台嘅圣经演讲嘞。结果点样呢？英语版《通报》1931年1月刊话：“电台广播大大促进咗逐家逐户嘅传道工作。总部办事处收到好多报告，话大家收听卢述福弟兄嘅演讲之后，都好乐意接受书刊。”《通报》话，电台广播同逐户探访系“主嘅组织使用嘅两大传道方法”。

17,18． 情势改变之后，电台广播点样继续发挥作用？

¹⁷ 上世纪30年代，反对我哋使用商营电台嘅声音越来越强烈。1937年后期，耶和华嘅子民针对当时嘅情势，随机应变。佢哋唔再用商营电台广播圣经演讲，反而将重点放喺逐家逐户嘅传道工作上。a虽然系噉，电台广播继续发挥重要作用，将上帝王国嘅信息传播到偏远同受限制嘅地区。举个例，从1951年到1991年，德国西柏林嘅一个电台经常播放圣经演讲，连前东德嘅居民都可以听到上帝王国嘅信息。从1961年起，有超过三十年嘅时间，喺南美洲嘅苏里南，一个国营电台每个星期都有15分钟嘅节目广播圣经真理。从1969年到1977年，上帝嘅组织为《圣经对人有益》呢个电台节目制作咗超过350个节目录音，喺美国48个州嘅291个电台播放。1996年，喺南太平洋萨摩亚嘅首都阿皮亚，一个电台每个星期都播放《回答你嘅圣经问题》呢个节目。

¹⁸ 到咗20世纪后期，电台广播唔再系传播上帝王国好消息嘅主要工具，取而代之嘅系另一种新科技。通过呢种新科技，上帝王国嘅信息可以传俾更加多嘅人，达到前所未有嘅程度。

19,20． （甲）点解耶和华嘅子民制作jw.org网站？（乙）成效有几大？（另见附栏“JW.ORG”)

¹⁹ 通过互联网 到2013年为止，上网嘅人超过27亿，差唔多占世界总人口嘅百分之40。据估计，用智能手机或者平板电脑上网嘅人大约有20亿。呢个数字喺世界各地不断上升，而增长最快嘅地区就系非洲。目前非洲有9000几万人用手机或者平板电脑上网。互联网嘅出现彻底改变咗大众接收资讯嘅方式。

²⁰ 自从1997年以来，耶和华嘅子民一直用互联网将上帝王国嘅好消息传播俾大众。2013年，耶和华见证人嘅官方网站jw.org可以用300种语言浏览，亦都有超过520种语言版本嘅圣经资料提供俾人下载。浏览呢个网站嘅人次每日超过75万。平均每个月嘅下载量，大约系300几万本书、400万本杂志同2200万个录音档案。

21． 你从西纳嘅经历睇出乜嘢？

²¹ 耶和华见证人嘅官方网站系好有效嘅工具。通过呢个网站，王国嘅好消息传遍四方，甚至传到见证工作受禁止嘅地区。例如，2013年年初，一个叫做西纳嘅男子浏览咗jw.org网站，之后打电话俾耶和华见证人喺美国嘅世界总部，表示想进一步了解圣经。呢个电话有咩特别呢？西纳住喺偏远嘅乡村，屋企人都信奉伊斯兰教。而且，喺佢嘅国家，耶和华见证人嘅工作受到禁止。虽然系噉，西纳仲系可以通过网上视频，同一位总部安排嘅美国弟兄，每个星期讨论两次圣经。

个别教导

22,23． （甲）我哋为咗接触更多人所使用嘅各种方法，可唔可以取代逐家逐户嘅传道工作呢？（乙）我哋尽力宣扬上帝嘅王国，有冇得到君王赐福呢？

²² 为咗接触更多嘅人，我哋用过唔同嘅方法，例如报章、《创世影剧》、电台广播同耶和华见证人嘅官方网站，但呢啲方法点都唔可以取代逐家逐户嘅传道工作。点解呢？因为耶和华嘅子民效法耶稣。耶稣唔单止向群众传道，仲留意每个人，个别噉帮助佢哋。（路加福音19:1-5）耶稣训练门徒噉样做，而且话俾佢哋知要传讲乜嘢信息。（请读路加福音10:1,8-11）呢本书第6章讲过，带头嘅弟兄一直鼓励耶和华嘅所有仆人逐家逐户传道，面对面同住户交谈。（使徒行传5:42；20:20）

²³ 上帝嘅王国建立一百年之后，已经有超过790万传道员努力教导人认识上帝嘅旨意。毫无疑问，我哋用嚟宣扬上帝王国嘅各种方法，一直都得到君王耶稣嘅赐福。下一章会讲吓，王国嘅君王仲提供咗唔同嘅工具，俾我哋可以向每个国族、部族、语言嘅人宣扬好消息。（启示录14:6）

1,2． （甲）公元1世纪发生咗乜嘢事，令好消息传遍成个罗马帝国？（乙）今日，有乜嘢证据表明我哋得到耶和华嘅支持？（请睇附栏“用670几种语言传播王国嘅好消息”）

从外地嚟耶路撒冷过节嘅人，听到一啲加利利人流利噉讲出唔同嘅外语，觉得非常惊讶。呢啲加利利人所讲嘅话深深吸引住在场嘅听众。呢件事发生喺公元33年五旬节，耶稣嘅门徒神奇噉得到讲外语嘅恩赐，证明佢哋有上帝嘅支持。（请读使徒行传2:1-8,12,15-17）门徒当日传讲嘅好消息打动咗唔同背景嘅人，后来甚至传遍咗成个罗马帝国。（歌罗西书1:23）

² 今日，上帝嘅仆人虽然唔会神奇噉识讲外语，但系就将王国嘅信息翻译成670几种语言，比公元1世纪嘅门徒所讲嘅外语多好多。（使徒行传2:9-11）由于上帝嘅子民以好多种语言出版咗巨量嘅书刊，使王国嘅信息可以渗入到地球每个角落。a呢一点亦都系确凿嘅证据，表明耶和华任用紧君王耶稣基督指引我哋嘅传道工作。（马太福音28:19,20）下面会讲吓，过去一百年来我哋用过嘅一啲传道工具。等我哋一边回顾历史，一边留意君王点样教导我哋关心每个人，点样鼓励我哋教人圣经。（提摩太后书2:2）

君王帮助仆人撒播真理嘅种子

3．点解我哋用唔同嘅工具嚟传播王国信息？

³ 耶稣将“王国嘅话语”比喻成种子，将人嘅内心比喻成泥土。（马太福音13:18,19）园丁会用唔同嘅工具松土，等啲种子容易种入泥土里面。同样，耶和华嘅子民亦都运用唔同嘅工具，令成千上万嘅人打开心窗，接受王国嘅信息。有啲工具一段时间内好有效，另一啲工具，例如书刊同杂志，就一直都用得上。前一章讲到，上帝嘅组织通过大众媒体将王国信息广传开去。呢一章会讲吓，上帝嘅组织提供咗乜嘢工具，帮助我哋可以面对面同人哋讨论上帝嘅王国。（使徒行传5:42；17:2,3）

4,5． （甲）上帝嘅子民点样运用留声机唱片？（乙）呢种传道工具有乜嘢不足之处？

⁴ 演讲录音 上世纪三四十年代，上帝嘅子民传道嗰时，用手提留声机播放圣经演讲嘅录音。每个演讲录音唔超过五分钟，有啲题目好简短，例如“三位一体”“炼狱”“王国”等等。呢啲演讲录音系点样向人播放嘅呢？1930年喺美国受浸嘅克莱顿·伍德沃思弟兄话：“喺嗰个年代，我攞住手提式留声机去传道。如果要播放唱片，就先要上链，然后将唱针对啱个位，放正喺唱片边缘先至得。传道嗰时，我行到住户门口，打开留声机，装好唱臂，准备好先至揿门钟。住户开门之后，我会同佢讲：‘有个重要嘅信息想你听吓。’”住户有咩反应呢？伍德沃思弟兄话：“好多住户都愿意听，当然都会有人即刻关门，有时仲有人以为我卖留声机添。”

⁵ 到1940年，上帝嘅组织已经录制咗90几个圣经演讲，制作咗超过100万张唱片。嗰时，约翰·巴尔弟兄喺英国做先驱，后来成为中央长老团成员。佢回忆话：“从1936年到1945年，留声机一直都系我嘅传道同伴，如果边日冇带，就好似少咗啲嘢噉。喺住户门口，每次听到卢述福弟兄嘅声音，我都会觉得好鼓励，就好似佢喺我身边噉。不过只系靠播放圣经演讲系唔够嘅，因为噉样做唔能够教导人，亦都培养唔到打动人心嘅技巧。”

6,7． （甲）用见证卡传道有乜嘢优点同缺点呢？（乙）耶和华点样做，好似将应该讲嘅话放入我哋嘅嘴里面？

⁶ 见证卡 从1933年开始，上帝嘅组织鼓励传道员逐户传道嗰时使用见证卡。见证卡系一张大约8厘米乘13厘米（3英寸乘5英寸）嘅卡片，上面写住一个简短嘅圣经信息，仲有两三句话向住户解释，佢哋点样可以攞到一啲圣经书刊。传道员直接将见证卡递俾住户，请对方读吓卡片上嘅内容。莉莲·卡马鲁德回忆话：“我好钟意用见证卡传道。”点解呢？佢话：“喺陌生人面前讲一个传道介绍词，唔系个个做得到嘅，见证卡帮助我学识主动向人传道。”后来，卡马鲁德姊妹喺波多黎各同阿根廷做特派传道员。

⁷ 1918年受浸嘅大卫·罗伊斯话：“好多弟兄都唔知道传道嗰时应该讲啲乜嘢，见证卡真系帮到我哋唔少。”不过，用见证卡传道亦都会引起误会。罗伊斯弟兄跟住话：“有时，住户以为我哋系哑嘅。讲真呀，嗰阵时我哋真系唔知讲咩好，但系耶和华帮我哋做好准备向人传道。冇几耐，佢就教我哋喺逐户传道嗰时使用圣经，就好似将应该讲嘅话放入我哋嘅嘴里面噉。从上个世纪40年代开始，我哋一直通过传道训练班学习点样用圣经嚟传道。”（请读耶利米书1:6-9）

8．你点样做就表明自己愿意接受基督嘅培训呢？

⁸ 书籍 自从1914年以来，耶和华嘅子民出版咗百几本书，讨论圣经嘅各种课题，其中一啲系为咗帮助传道员可以更加有效噉传道而编写嘅。丹麦嘅安娜·拉森参与传道工作足足七十年，佢话：“耶和华通过传道训练班同有关嘅书刊，帮助我哋提高传道技巧。我仲记得，第一本教我哋传道嘅书叫做《俾王国传道员嘅神治帮助》，1945年出版。第二本系1946年出版嘅《预备行各样嘅善事》。今日，我哋用嘅系《神圣教育使你得益——传道训练班课本》，2001年出版。”耶和华帮助我哋胜任传道工作，喺呢方面传道训练班同有关嘅课本确实起咗重要嘅作用。（哥林多后书3:5,6）我哋通过周中聚会，喺传道方面一直得到培训。而家，我哋每个月都会收到《传道与生活聚会手册》。你有冇积极参与呢个安排，从中得到最大嘅益处呢？如果有，就表明你自己愿意接受基督嘅培训，噉就能够更加胜任教导工作。（哥林多后书9:6；提摩太后书2:15）

9,10．喺栽种王国真理种子同淋水方面，书籍起咗乜嘢作用？

⁹ 为咗帮助我哋向人解释圣经嘅基本真理，耶和华指引佢嘅组织出版咗其他书，其中有一本非常实用，就系《导至永生的真理》。1968年，呢本书一发行就马上睇到成效。英语版《王国传道月报》1968年11月刊话：“由于《真理》书嘅需求非常大，喺啱啱过去嘅9月，布鲁克林总部嘅印刷厂夜晚唔加班都唔得。”文章仲讲：“喺8月，《真理》书嘅需求量仲试过比货存量超出150万本。”到1982年，《真理》书已经以116种语言发行，印刷咗超过1亿本。从1968年到1982年，即系《真理》书发行之后嘅14年期间，王国传道员增加咗百几万。b

¹⁰ 2005年，《辨明圣经的真理》出版咗。目前呢本书用256种语言发行，到而家已经印刷咗大约2亿本，喺帮助人学习圣经方面好有成效。有咩成效呢？从2005年到2012年，短短七年，就有120万人成为王国传道员。其间，学习圣经嘅人亦都从600万增加到870几万。无论系栽种定系淋水，我哋绝对相信为王国真理种子嘅成长所付出嘅努力，都会得到耶和华嘅赐福。（请读哥林多前书3:6,7）

11,12．请用段落里面嘅经文解释，唔同嘅杂志分别系为咗边啲人而写嘅。

¹¹ 杂志 最初，《守望台》主要系为“同得天召”嘅“小群羊”写嘅。（路加福音12:32；希伯来书3:1）1919年10月1日，上帝嘅组织发行咗一本为大众写嘅杂志。呢本杂志好受欢迎，圣经研究者同其他读者都好钟意，所以有好多年，发行量远远超过《守望台》。呢本杂志起初叫做《黄金时代》，1937年改名叫做《安慰报》，喺1946年再改名叫做《警醒！》。

¹² 咁多年来，虽然《守望台》同《警醒！》嘅写作风格同版面格式改变咗唔少，但宗旨一直都冇变过，始终系宣扬上帝嘅王国，同埋帮助人建立对圣经嘅信心。今日，《守望台》有研读版同公众版。研读版嘅写作对象系“仆役”，亦即系“小群羊”同“另外嘅绵羊”。c（马太福音24:45；约翰福音10:16）公众版系特别为嗰啲仲未认识真理，但尊重上帝同圣经嘅人写嘅。（使徒行传13:16）而《警醒！》嘅写作对象就系对圣经同耶和华上帝认识唔深嘅人。（使徒行传17:22,23）

13．你认为我哋出版嘅杂志有乜嘢出众嘅地方？（讨论附表“出版物发行量嘅世界纪录”）

¹³ 喺2014年年初，上帝嘅组织每个月出版4400几万本《警醒！》，大约4600万本《守望台》。《警醒！》用100种语言出版，《守望台》就用200几种语言出版。《警醒！》同《守望台》无论系发行量，定系语言版本数量，喺全球都系数一数二嘅。虽然成绩咁出众，但我哋唔会觉得意外，因为呢啲杂志所讲嘅信息，耶稣已经预告咗会传遍普天下。（马太福音24:14）

14．我哋热心推广乜嘢？点解噉样做？

¹⁴ 圣经 1896年，罗素弟兄同佢嘅同工将“圣经”两个字加入佢哋用嚟出版书刊嘅法人名称当中，将法人名称改为守望台圣经书社。呢个改变真系好啱，因为圣经一直系我哋用嚟传讲王国好消息嘅主要工具。（路加福音24:27）上帝嘅仆人行事同佢哋嘅法人名称一致，热心推广圣经教育，努力分发圣经，而且鼓励人阅读上帝嘅话语。例如，1926年，我哋用自己嘅印刷机印咗《双语对照强调译本》，就系由本杰明·威尔逊翻译嘅《希腊语经卷》。1942年，我哋开始印刷《英王钦定本》圣经全书，而且分发咗大约70万本。两年之后，我哋开始印刷《美国标准译本》，上帝嘅名耶和华喺呢个译本里面出现咗6823次。到1950年，我哋已经分发咗超过25万本。

15,16． （甲）《圣经新世界译本》有边啲方面系你钟意嘅？（讨论附栏“加快圣经翻译工作”）（乙）你想耶和华嘅话语打动自己嘅心，可以点样做呢？

¹⁵ 1950年，《希腊语经卷新世界译本》（英语）面世。1961年，《圣经新世界译本》（英语）全书合成一本发行。喺《希伯来语经卷》部分，凡系出现上帝嘅名耶和华嘅地方，呢个译本都译咗出嚟。至于《希腊语经卷》部分，上帝嘅圣名亦都喺呢个译本里面出现咗237次。《新世界译本》经过几次修订，最近一次喺2013年，修订嘅目的系要确保内容准确，好读易明。到2013年为止，《新世界译本》全书或部分经卷已经译成121种语言，发行量超过2亿100万本。

¹⁶ 有啲人读咗自己母语翻译嘅《新世界译本》之后，有咩感受呢？一个讲尼泊尔语嘅男子话：“我哋以往使用嘅尼泊尔语圣经系用古典语言翻译嘅，好多人都睇唔明。《新世界译本》用嘅系日常用语，易明好多。”中非共和国嘅一个女子啱啱开始读桑戈语嘅《新世界译本》，就感动到喊出嚟，佢话：“呢个真系打动我内心嘅语言啊！”我哋日日都读圣经，就能够好似呢个女子噉，使耶和华嘅话语打动我哋嘅心。（诗篇1:2；马太福音22:36,37）

感激君王提供嘅工具同培训

17． （甲）你点样做就表明自己感激耶稣提供嘅工具同培训？（乙）噉样做会带嚟乜嘢福分？

¹⁷ 君王耶稣提供咗好多工具同培训，你有冇珍惜呢？你有冇拨出时间嚟读上帝组织出版嘅书刊呢？有冇用呢啲书刊去帮助其他人？如果有嘅话，你就同奥珀儿·贝特莱尔有一样嘅感受。贝特莱尔姊妹喺1914年10月4日受浸，佢回忆话：“咁多年来，我同先生［爱德华］用过留声机同见证卡传道。后来，我哋逐家逐户向人传道，分发书刊、册子同杂志。我哋亦都参加过唔同嘅传道运动同宣传大会演讲嘅游行，分发过大会决议传单。我哋仲受到培训返去探访对圣经感兴趣嘅人，喺对方屋企讨论圣经。我哋嘅一生都过得好充实好开心。”耶稣保证，佢嘅子民将会努力撒种同收割，一齐欢欣快乐。好似奥珀儿一样，今日几百万传道员都能够作证，耶稣嘅话一句都冇落空。（请读约翰福音4:35,36）

18．我哋有荣幸做咩呢？

¹⁸ 喺好多仲未信从君王耶稣嘅人睇嚟，上帝嘅子民就好似“冇学问嘅普通人”。（使徒行传4:13）试谂吓，君王已经使呢啲普通人喺出版方面得到辉煌嘅成绩。佢哋出版嘅书刊，有啲系历史上翻译成最多种语言同埋发行量最大嘅。更重要嘅系，耶稣教导同鼓励我哋用呢啲工具，将好消息传到万国万族。我哋可以同基督一齐撒播真理嘅种子，从事收割工作，将佢嘅门徒聚集起嚟，呢个系几咁大嘅荣幸啊！

1,2． （甲）耶稣讲咗啲乜嘢，门徒唔明白？（乙）耶稣讲嘅系乜嘢收割工作？

耶稣同门徒讲：“举目睇吓啲田，已经发白，可以收割庄稼嘞。”门徒唔明呢句话，觉得好奇怪。佢哋望去耶稣指嘅方向，只系见到田里面一片绿油油，全部都系啱啱发芽嘅大麦，边度睇得到成熟嘅大麦呢？门徒可能心谂：“收割乜嘢呀？仲要等好几个月先可以收割㖞！”（约翰福音4:35）

² 不过，耶稣讲嘅唔系实际嘅收割，而系属灵嘅收割，要收嘅庄稼代表人。耶稣趁呢个机会教导门徒两个同属灵收割有关嘅重要道理。乜嘢道理呢？等我哋先嚟睇吓呢件事嘅背景。

投入工作，一定得到喜乐

3． （甲）点解耶稣对门徒讲，田地“已经发白，可以收割庄稼嘞”？（见脚注）（乙）耶稣点样帮门徒明白佢嘅意思？

³ 公元30年年底，喺撒马利亚嘅叙加城附近，耶稣同门徒讲咗上面呢番话。当时门徒入咗城，耶稣喺井边遇到一个妇人，就主动同佢讲属灵嘅事。妇人觉得好奇妙，佢好快就睇出耶稣教嘅道理非常重要。门徒返到耶稣身边嗰时，妇人就即刻赶返去叙加城，将自己学到嘅事话俾城里面嘅人知。佢嘅话引起佢哋嘅好奇心，好多人跑去井边见耶稣。可能就喺嗰阵，耶稣望去田地嗰边，睇到远处有一班撒马利亚人过紧嚟，于是同门徒讲：“睇吓啲田，已经发白，可以收割庄稼嘞。”a耶稣想门徒明白收割嘅庄稼系属灵嘅而唔系实际嘅，佢跟住话：“收割嘅人……收聚得永生嘅谷实”。（约翰福音4:5-30,36）

4． （甲）关于属灵嘅收割工作，耶稣教门徒边两个道理？（乙）我哋会讨论乜嘢问题？

⁴ 关于属灵嘅收割工作，耶稣教导门徒边两个重要道理呢？第一，收割工作系当务之急。佢话俾门徒知，田地“已经发白，可以收割庄稼嘞”，意思系叫佢哋马上投入工作。为咗令门徒紧记收割工作有几咁迫切，耶稣又话：“而家收割嘅人得到报酬”。冇错，当时嘅属灵收割工作而家已经开始咗，唔应该耽误时间！第二，工人充满喜乐噉收割庄稼。耶稣话，撒种嘅同收割嘅会“一同欢喜”。（约翰福音4:35下，36）耶稣见到好多撒马利亚人都信从佢，一定觉得好欣慰。同样，佢嘅门徒全心投入收割工作，亦都肯定充满喜乐。（约翰福音4:39-42）圣经嘅呢个记载对我哋有特别嘅意义。今日，有史以来最伟大嘅属灵收割工作正喺度进行紧。耶稣嘅话使我哋知道，呢段时期会有乜嘢事发生。现代嘅收割工作喺几时开始呢？有边啲人参与呢件工作呢？有乜嘢成果呢？

君王领导有史以来最伟大嘅收割工作

5． （甲）边个领导全球嘅收割工作？（乙）约翰睇到嘅异象点样表明，收割工作系当务之急？

⁵ 喺使徒约翰睇到嘅异象里面，耶和华透露佢委派咗耶稣去领导全球嘅属灵收割工作。（请读启示录14:14-16）异象里面嘅耶稣头戴金冠，手攞镰刀。耶稣“头戴金冠”显示佢系在位嘅君王；“手拎住锋利嘅镰刀”显示佢系收割嘅人。为咗强调收割工作系当务之急，耶和华通过天使宣布地上嘅庄稼“熟透嘞”。冇错，“收割嘅时刻到嘞”，唔可以拖延嘞！耶稣听从上帝嘅吩咐，伸出镰刀，地（指地上嘅人）就收割好嘞。呢个振奋人心嘅异象再次提醒我哋，田地“已经发白，可以收割庄稼嘞”。通过异象，我哋可唔可以睇出全球嘅收割工作喺几时开始呢？可以！

6． （甲）收割时期几时开始？（乙）“地上嘅庄稼”几时开始被收割？请解释。

⁶ 根据启示录14章嘅记载，约翰喺异象里面睇到，负责收割嘅耶稣头戴金冠（14节），显然呢件事系耶稣喺1914年登基之后发生嘅。（但以理书7:13,14）过咗一段时间，耶稣奉命开始收割（15节）。事情嘅先后次序，同小麦嘅比喻里面提到嘅次序吻合。耶稣解释小麦嘅比喻嗰时，话：“收割庄稼嘅时候就系呢个制度嘅末期”。所以，收割时期同埋呢个制度嘅末期系同时开始嘅，就系1914年。（马太福音13:30,39）回顾过去，今日我哋可以睇出，收割工作实际上系耶稣登基几年之后先开始嘅。点解噉讲呢？从1914年到1919年初，耶稣先洁净佢嘅受膏门徒。（玛拉基书3:1-3；彼得前书4:17）然后喺1919年，“地上嘅庄稼”开始被收割。于是，耶稣就任用佢新委派嘅忠信奴隶，帮助啲弟兄明白传道工作系当务之急。等我哋嚟睇吓当时有咩事发生。

7． （甲）弟兄点样睇出传道工作系非常紧迫嘅？（乙）上帝嘅组织鼓励弟兄姊妹点样做？

⁷ 英语版《守望台》1920年7月刊话：“仔细查考圣经之后，我哋睇出上帝嘅子民得到一个好光荣嘅任务，就系传讲上帝嘅王国。”例如，从以赛亚嘅预言，弟兄睇出上帝王国嘅好消息一定会喺世界各地广传开去。（以赛亚书49:6；52:7；61:1-3）佢哋唔知道点样完成呢个工作，但系深信耶和华一定会打开出路。（请读以赛亚书59:1）上帝嘅组织更清楚噉睇出传道工作非常紧迫，就鼓励弟兄姊妹努力传道。佢哋有咩反应呢？

8． 喺传道工作方面，弟兄喺1921年已经领会到边两个要点？

⁸ 英语版《守望台》1921年12月刊话：“1921年系成果最好嘅一年。今年听到圣经真理嘅人比以往任何一年都要多。”杂志又话：“要做嘅工作仲有好多。……等我哋怀住喜乐嘅心去做。”请留意，关于传道工作，弟兄领会嘅两个要点，同耶稣要使徒谨记喺心里面嘅一样：传道工作系当务之急；上帝嘅仆人充满喜乐噉传道。

9． （甲）关于收割工作，1954年有一期《守望台》点样讲？点解会有噉嘅成果？（乙）过去50年，各地传道员嘅人数有乜嘢增长？（见附表“各地传道员人数嘅增长”）

⁹ 喺上个世纪30年代，弟兄明白到会有一大群“另外嘅绵羊”接受上帝王国嘅信息，就进一步加紧传道活动。（以赛亚书55:5；约翰福音10:16；启示录7:9）有咩成果呢？传讲上帝王国嘅人数大幅度上升。1934年，只有4万1000人传道；到1953年，传道员嘅数目已经增加到50万！英语版《守望台》1954年12月1日刊讲得好啱：“全靠耶和华嘅灵同佢嘅话语所发挥嘅力量，全球嘅收割工作先可以有咁丰盛嘅成果。”b（撒迦利亚书4:6）

生动嘅比喻预示收割嘅成果

10,11． 关于种子嘅生长，芥籽嘅比喻强调咗乜嘢？

¹⁰ 耶稣讲咗唔少同上帝王国有关嘅比喻，生动噉预告收割工作会有乜嘢成果。接落嚟，我哋会讲吓芥籽嘅比喻同埋酵嘅比喻，集中睇吓呢两个比喻点样喺最后嘅日子应验。

¹¹ 芥籽嘅比喻 有一个人将一粒芥籽种落田度，后来芥籽长成一棵树，连雀仔都嚟树上栖息。（请读马太福音13:31,32）关于芥籽嘅生长，呢个比喻强调乜嘢呢？（1）生长嘅速度快到令人难以想象。芥籽虽然“比地上嘅一切种子都细”，但系“生出大枝”，成为一棵大树。（马可福音4:31,32）（2）芥籽一定会生长。种子“撒下之后，长起嚟”。请留意，耶稣唔系话“可能会长大”，而系话“长起嚟”。乜嘢都唔能够阻止芥籽嘅生长。（3）呢棵生长紧嘅树吸引咗好多雀仔嚟，为佢哋提供栖息嘅地方。“天上嘅飞鸟都嚟”，“喺佢荫下栖息”。呢三点同现代嘅属灵收割工作有乜嘢关系呢？

12． 芥籽嘅比喻同今日嘅收割工作有乜嘢关系？（另见附表“圣经课程嘅数目不断增加”）

¹² （1）增长嘅速度：呢个比喻强调，上帝王国嘅信息不断传讲开去，基督徒会众嘅人数不断增多。自从1919年以来，热心嘅收割工人被召集到复兴咗嘅基督徒会众里面。当时工人嘅数目虽然少，但增长得好快。从上世纪初到今日，增长嘅速度的确令人惊叹。（以赛亚书60:22）（2）必然嘅结果：基督徒会众嘅增长，边个都阻止唔到。上帝嘅敌人蓄意迫害真基督徒，就好似将一层又一层嘅石头压喺细细粒嘅种子上面，存心要阻止种子嘅生长。即使系噉，种子都可以破土而出，继续生长。（以赛亚书54:17）（3）栖息嘅地方：“天上嘅飞鸟”喺树上栖息，象征心地正直嘅人接受上帝王国嘅好消息，成为基督徒会众嘅一分子。佢哋嚟自大约240个国家同地区，人数有好几百万。（以西结书17:23）喺基督徒会众里面，佢哋唔单止得到属灵嘅食物，亦都得到安舒同保护。（以赛亚书32:1,2；54:13）

13． 关于增长过程，酵嘅比喻强调乜嘢？

¹³ 酵嘅比喻 有个女人将酵放喺面粉里面，结果成团面都发咗起嚟。（请读马太福音13:33）关于增长嘅过程，呢个比喻强调乜嘢呢？我哋会讨论吓两点。（1）引起改变：酵使面团发起嚟，“直到成团面都发咗酵”。（2）遍布各处：将酵放落“二十升面粉”里面，使成团面全部都发起嚟。呢两点同属灵嘅收割工作有乜嘢关系呢？

14． 酵嘅比喻同今日嘅收割工作有乜嘢关系？

¹⁴ （1）改变： 酵象征上帝王国嘅信息，面团象征人类。酵加入面粉里面，使面粉发生变化。同样，人接受王国信息之后，内心情况就会发生改变。（罗马书12:2）（2）遍布各处： 发酵过程象征上帝王国信息嘅传播。就好似酵会使成团面发起嚟，王国信息亦都不断传播开去，“直到地极”。（使徒行传1:8）就算有啲国家禁止我哋嘅工作，我哋仲系会喺当地传讲上帝王国嘅信息，只系大多数人发觉唔到。

15． 以赛亚书60:5,22嘅话点样应验？（另见附栏“耶和华使凡事都可能”；附栏“微弱嘅国要变为强盛”）

¹⁵ 喺耶稣讲呢啲比喻之前大约800年，耶和华已经通过以赛亚生动噉预告，现代属灵收割工作会有几大嘅规模，所得嘅成果又会带嚟几大嘅喜乐。c耶和华指出，从远方嚟嘅人纷纷加入佢嘅组织。以赛亚书记载咗耶和华对“妇人”所讲嘅话。呢个“妇人”象征今日仲喺地上嘅受膏基督徒。耶和华话：“你睇见，就必喜形于色，心里又激动又兴奋，因为大海嘅财富必运嚟俾你，列国嘅资财亦归你所有。”（以赛亚书60:1,4,5,9）呢番话讲得一啲都冇错！今日，忠心事奉耶和华多年嘅基督徒，亲眼睇到当地嘅传道员由区区几个增加到千倍万倍，又点会唔喜形于色呢！

耶和华嘅仆人都应该开心快乐

16,17． “撒种嘅同收割嘅都一同欢喜”，其中一个原因系乜嘢？（另见附栏“两张传单打动咗两个人嘅心”）

¹⁶ 上面提到，耶稣对使徒讲：“收割嘅人……收聚得永生嘅谷实，使撒种嘅同收割嘅都一同欢喜。”（约翰福音4:36）喺全球嘅收割工作中，点解我哋应该“一同欢喜”呢？有好多理由，而家讨论吓其中三个。

¹⁷ 第一，我哋好高兴喺传道工作方面有耶和华做同工。我哋向人传讲上帝嘅王国，就系撒播王国真理嘅种子。（马太福音13:18,19）我哋帮助其他人成为基督徒，就有收成嘞。无论系撒种嘅抑或收割嘅，当我哋怀住敬畏之心去睇耶和华点样使王国真理嘅种子“发芽长高”，就会深深感到喜乐。（马可福音4:27,28）有时撒落嘅种子可能要等一段时间先会发芽生长，而收割嘅会系其他人。英国有个受浸咗六十年嘅姊妹叫琼，就有噉嘅经历。佢话：“经常有人同我讲，好多年前我曾经向佢传道，将真理种子撒喺佢心里面。后来有其他耶和华见证人教佢圣经，帮佢成为耶和华嘅仆人。起初种落嘅种子终于有咗收成，我真系好开心。”（请读哥林多前书3:6,7）你有冇类似嘅经历呢？

18． 哥林多前书3:8提到，我哋开心快乐嘅另一个原因系乜嘢？

¹⁸ 第二，我哋谨记保罗嘅话，就可以继续喜乐噉执行传道工作。保罗话：“各人必照自己嘅劳苦得自己嘅奖赏。”（哥林多前书3:8）每个人唔系照自己嘅成绩，而系照自己喺工作上所付出嘅努力得奖赏。保罗嘅话真系好鼓励人，喺反应唔好嘅地区坚守岗位嘅传道员就更加受到鼓励嘞！喺上帝眼中，每个见证人只要全心投入撒种嘅工作，就可以“多结果实”。所以，每个耶和华见证人都应该开心快乐。（约翰福音15:8；马太福音13:23）

19． （甲）马太福音24:14嘅预言同我哋嘅喜乐有乜嘢关系？（乙）就算自己仲未帮到其他人成为基督徒，我哋应该谨记乜嘢？

¹⁹ 第三，我哋因为传道工作应验咗圣经嘅预言而觉得好开心。请睇吓耶稣点样回答几位使徒嘅问题。佢哋嚟问耶稣：“你嘅临在同呢个制度嘅末期，有咩征象呢？”耶稣话俾佢哋知，末世征象嘅一个特点系全球性嘅传道工作。耶稣指嘅系咪帮助人成为基督徒嘅工作呢？唔系。耶稣讲：“呢个王国嘅好消息会传遍普天下，对所有国族作见证”。（马太福音24:3,14）所以，传讲上帝嘅王国，就系撒播王国真理嘅种子，系末世征象嘅一个特点。我哋传讲王国嘅好消息嗰时，应该谨记，就算自己仲未帮到其他人成为基督徒，亦都已经同对方做咗见证嘞。d无论其他人有乜嘢反应，我哋有份应验耶稣嘅预言，亦都有荣幸做“上帝嘅同工”，真系值得开心啊！（哥林多前书3:9）

“从日出之地到日落之处”

20,21． （甲）玛拉基书1:11嘅话点样应验？（乙）喺属灵嘅收割工作上，你决心点样做？点解？

²⁰ 公元一世纪，耶稣帮助使徒睇出，收割工作系当务之急。从1919年开始，耶稣亦都帮助现代嘅基督徒明白呢一点。所以，上帝嘅子民加紧传道活动。事实证明，无论边个都阻止唔到属灵嘅收割工作。正如玛拉基先知预告，今日“从日出之地到日落之处”都会有上帝嘅仆人执行传道工作。（玛拉基书1:11）的确，由日出到日落，即系由东到西，无论喺边度，撒种嘅同收割嘅都并肩工作，一同欢喜。由日出到日落，亦即系由朝到晚，任何时候我哋都急切噉去做属灵嘅收割工作。

²¹ 谂翻过去百几年嘅历史，我哋睇到上帝嘅一小群仆人已经增长千倍，变为强盛，心里“又激动又兴奋”，真系开心到不得了。（以赛亚书60:5,22）希望我哋每个人心里面一直都有呢种喜乐，对“庄稼嘅主人”耶和华嘅爱有增无减。噉样，我哋自然就会竭尽全力，完成有史以来最伟大嘅属灵收割工作！（路加福音10:2）

1-3．耶稣发现圣殿俾人玷污咗，就点样做？

耶稣非常尊重耶路撒冷嘅圣殿，因为佢知道圣殿代表乜嘢。呢座圣殿作为地上崇拜真神耶和华嘅中心，已经有好长时间嘞。人对圣洁嘅上帝耶和华嘅崇拜，一定要洁净同纯正。公元33年尼散月十日，当耶稣嚟到耶路撒冷嘅圣殿，发现圣殿俾人玷污咗，试谂吓佢有咩感觉呢？到底当时发生咗啲乜嘢事？（请读马太福音21:12,13）

² 崇拜耶和华嘅人嚟圣殿献祭，外邦人院子里面嘅商人同兑钱商就乘机牟取暴利。a耶稣睇到，就“将圣殿里面做买卖嘅人全部赶晒出去，又推冧兑钱商嘅台”。（参考尼希米记13:7-9）佢严厉责备嗰啲自私嘅商人将天父嘅殿变成“强盗嘅巢穴”。好明显，耶稣非常尊重圣殿同圣殿所代表嘅一切。正确嘅崇拜一定要保持洁净。

³ 千几年后，耶稣登基成为弥赛亚君王。佢再次洁净圣殿——呢座圣殿同而家想得到耶和华悦纳嘅人有关。耶稣洁净嘅系点样嘅圣殿呢？

“使利未人洁净”

4,5．（甲）从1914年到1919年初期，耶稣点样熬炼同洁净受膏基督徒？（乙）上帝嘅子民受到嘅熬炼同洁净系咪到此为止呢？请解释。

⁴ 呢本书第2章讲过，耶稣喺1914年登基之后，同天父一齐嚟视察属灵圣殿。属灵圣殿系指，耶和华为正确崇拜所作嘅安排。b君王视察圣殿之后，睇出有必要熬炼同洁净“利未人”所代表嘅受膏基督徒。（玛拉基书3:1-3）从1914年到1919年初期，耶和华容许佢嘅子民经历考验同艰辛，就好似熬炼金银噉熬炼佢哋，使佢哋洁净。值得高兴嘅系，受膏基督徒经得起好似火一样嘅考验，成为灵性洁净嘅人，好愿意为弥赛亚君王效劳！

⁵ 上帝子民所受嘅熬炼同洁净系咪到此为止呢？唔系。喺末世期间，耶和华一直任用弥赛亚君王，帮助真基督徒保持洁净，等佢哋可以继续留喺属灵圣殿里面。接落嚟两章会讲吓耶稣点样喺道德同组织方面熬炼门徒。而家先讲吓灵性上嘅洁净。耶稣做咗好多事帮助门徒保持灵性洁净。呢啲事有啲明显睇得到，有啲就睇唔见。认真谂谂耶稣所做嘅一切，可以令我哋信心大增。

“保持洁净”

6．（甲）耶和华吩咐嗰啲俾人捉咗嘅犹太人点样做？（乙）佢嘅吩咐令我哋明白，要保持灵性洁净，就要点样做？

⁶ 灵性洁净系咩意思呢？为咗回答呢个问题，等我哋先睇吓公元前537年，嗰啲俾人捉咗去巴比伦嘅犹太人，喺离开嗰度之前，耶和华对佢哋讲咗啲乜嘢。（请读以赛亚书52:11）犹太人获得释放返翻耶路撒冷，主要系为咗重建圣殿，复兴正确嘅宗教。（以斯拉记1:2-4）耶和华要佢嘅子民彻底摆脱巴比伦嘅错误宗教。请留意耶和华吩咐佢哋点样做：“唔好接触不洁嘅嘢”“应该从嗰座城出嚟”“保持洁净”。正确崇拜耶和华意味住，完全唔受错误宗教玷污。我哋可以得到乜嘢结论呢？要保持灵性洁净，就要弃绝错误宗教嘅道理同习俗。

7．耶稣通过乜嘢渠道帮助门徒保持灵性洁净？

⁷ 耶稣作王之后冇几耐，就安排咗一个明显嘅渠道嚟帮助门徒保持灵性洁净。呢个渠道就系1919年受耶稣委派嘅忠信睿智嘅奴隶。（马太福音24:45）到咗嗰一年，圣经研究者已经弃绝咗好多错误嘅宗教道理，但喺灵性上仲需要进一步受到洁净。基督通过忠信嘅奴隶帮助门徒睇出，边啲习俗同节庆活动系要彻底放弃嘅。（箴言4:18）等我哋嚟睇吓一啲例子。

基督徒应唔应该庆祝圣诞节？

8．（甲）关于圣诞节，圣经研究者早就意识到乜嘢？（乙）但系佢哋仲未睇出乜嘢？

⁸ 圣经研究者早就意识到圣诞节源自异教，耶稣唔系12月25日出世嘅。英语版《锡安嘅守望台》1881年12月刊话：“千百万信奉异教嘅人加入教会。呢个只不过系名义上嘅改变，但实际上，异教嘅祭司做咗教会嘅牧师，异教嘅节庆换咗个名，变成教会嘅节日。圣诞节就系个例子。”1883年，英语版《守望台》嘅一篇文章《耶稣系几时诞生嘅？》提出论据证明，耶稣系十月出世嘅。c虽然系噉，当时圣经研究者仲未睇出有必要停止庆祝圣诞节。佢哋照旧庆祝，连布鲁克林嘅伯特利家庭都唔例外。1926年之后，情况改变咗。点解呢？

9．关于圣诞节，圣经研究者终于明白乜嘢？

⁹ 经过仔细查考，圣经研究者终于明白咗圣诞节嘅起源同有关嘅习俗会羞辱上帝。英语版《黄金时代》1927年12月14日刊嘅一篇文章《圣诞节嘅起源》指出，圣诞节系异教节日，庆祝嘅人纵情作乐，崇拜偶像。文章说明，基督冇吩咐人庆祝圣诞节，而且喺结尾直截了当噉讲：“世界同魔鬼都鼓吹圣诞节，想呢个节日流传落去，亦都迎合咗人嘅欲望。单系呢个原因，全心事奉耶和华嘅人就应该停止庆祝圣诞节。”所以从嗰一年开始，伯特利家庭就唔再庆祝圣诞节嘞。

10．（甲）1928年12月，圣经研究者对圣诞节嘅起源有乜嘢更透彻嘅了解？（另见附栏“圣诞节——起源同目的”）（乙）关于其他节日同庆祝活动，上帝嘅子民受到乜嘢提醒？（见附栏“其他节庆嘅起源”）

¹⁰ 第二年，圣经研究者对圣诞节嘅起源有咗更透彻嘅了解。1928年12月12日，喺总部工作嘅理查德·巴伯弟兄通过电台发表演讲，详细说明圣诞节嘅起源同不洁可憎嘅事有关。上帝嘅子民对总部俾嘅明确指引有乜嘢反应呢？查尔斯·布朗德林弟兄同屋企人听从指引，停止庆祝圣诞节。佢谂翻当年，话：“我哋要揼晒嗰啲同异教有关嘅嘢，舍唔舍得？当然舍得啦！……呢个就好似将啲污糟邋遢嘅衫除落嚟，掉咗佢，唔觉得可惜。”亨利·坎特韦尔弟兄亦都有同感，佢后来从事探访嘅工作。佢回忆话：“无论要作出乜嘢牺牲，只要可以证明自己爱耶和华，我哋都好乐意去做。”忠心嘅基督徒乐意听从指引，甘愿作出改变，从此唔再参与任何不洁嘅节庆活动。d（约翰福音15:19；17:14）

11．我哋点样做就表明自己拥护弥赛亚君王？

¹¹ 忠心嘅圣经研究者的确值得我哋效法。不妨谂吓佢哋嘅好榜样，然后问吓自己：“我对上帝组织发出嘅指引有咩睇法呢？我系咪愿意接受指引，而且照住去做呢？”弥赛亚君王任用忠信嘅奴隶喺适当嘅时候分发属灵嘅食物，我哋甘愿服从忠信奴隶嘅指引，就表明自己拥护弥赛亚君王。（使徒行传16:4,5）

基督徒应唔应该用十字架？

12．有好多年嘅时间，圣经研究者对十字架有乜嘢睇法？

¹² 有好多年嘅时间，圣经研究者认为十字架系基督教嘅标志，基督徒使用十字架冇乜嘢唔妥。佢哋知道唔应该崇拜十字架，因为拜偶像系唔啱嘅。（哥林多前书10:14；约翰一书5:21）早喺1883年，英语版《守望台》就指出：“上帝憎恨形形式式嘅偶像崇拜。” 虽然系噉，圣经研究者起初唔反对人用十字架，只要用得适当就得嘞。例如，佢哋戴“十字架与王冠”胸针，觉得有呢个标志好自豪。呢个胸针对佢哋有特别嘅意义：只要至死忠心，佢哋就会获得生命嘅冠冕。从1891年开始，“十字架与王冠”胸针嘅图案都印喺《守望台》封面度。

13．关于使用十字架，基督徒得到乜嘢启发？（另见附栏“逐步明白唔应该使用十字架”）

¹³ 圣经研究者好珍视“十字架与王冠”胸针。但系，从上世纪20年代后期开始，关于使用十字架，基督徒逐步得到启发。格兰特·苏特弟兄参加咗1928年喺美国密歇根州底特律市嘅大会。佢后来做咗中央长老团嘅成员。苏特弟兄回忆话：“大会嘅节目清楚表明，我哋冇必要戴‘十字架与王冠’胸针，噉样做只会令上帝反感。”之后几年，真理嘅光越照越明亮。喺正确同洁净嘅宗教里面，十字架显然冇立足之地。

14．当上帝嘅子民明白到唔应该用十字架之后，就点样做？

¹⁴ 上帝嘅子民明白到唔应该用十字架之后点样做呢？佢哋一直都好重视“十字架与王冠”胸针，噉而家戴定唔戴呢？忠心事奉耶和华好多年嘅莱拉·罗伯特斯姊妹话：“我哋一知道十字架象征乜嘢，就即刻揼咗个胸针，唔再戴嘞。”另一个忠心嘅姊妹乌尔苏拉·谢连科讲出咗好多人嘅心声。佢话：“我哋曾经以为十字架象征主嘅牺牲同基督徒嘅忠诚，后来先至睇出自己以往珍视嘅标志原来系异教嘅象征。正如箴言4:18讲嘅，义人嘅路越照越明亮。我哋因为噉而满怀感激。”忠心嘅基督徒绝对唔会俾任何错误不洁嘅宗教习俗沾染自己。

15,16．我哋点样做，就表明自己决心使属灵圣殿嘅地上院子保持洁净？

¹⁵ 今日，我哋都有同样嘅决心。我哋承认基督一直运用一个明显嘅渠道——忠信睿智嘅奴隶，嚟帮助门徒保持灵性洁净。所以，每当忠信嘅奴隶通过灵粮提醒我哋，要弃绝嗰啲受错误宗教玷污嘅节庆同风俗习惯，我哋都会毫不犹豫噉听从。就好似嗰啲生活喺基督临在初期嘅弟兄姊妹一样，我哋决心使耶和华属灵圣殿嘅地上院子保持洁净。

¹⁶ 喺最后嘅日子，基督一直喺幕后保护耶和华子民嘅会众，避免会众嘅灵性俾不良分子玷污。佢点样保护会众呢？等我哋嚟睇睇。

“将恶人从义人当中分出嚟”

17,18．请解释喺拖网嘅比喻里面，下面嘅句子有咩含意：（甲）“拖网撒落海里面”；（乙）“收集各类嘅鱼”；（丙）“将好嘅收入器皿”；（丁）“唔啱用嘅就揼咗佢”。

¹⁷ 君王耶稣基督密切留意上帝子民喺各地会众嘅情况。基督同天使一直将恶人从义人当中分出嚟。佢哋用嘅方法，我哋唔一定察觉得到。耶稣用拖网嘅比喻嚟讲明分开恶人义人嘅工作。（请读马太福音13:47-50）呢个比喻有咩含意呢？

¹⁸ “拖网撒落海里面”。拖网象征喺人海当中传讲上帝王国嘅工作。“收集各类嘅鱼”。好消息吸引各种各样嘅人。呢啲人当中有啲接受真理成为基督徒，亦都有好多起初对真理感兴趣，但后来冇拥护正确嘅宗教。e“将好嘅收入器皿”。诚心正意嘅人会被收入好似器皿一样嘅会众里面，以洁净嘅方式崇拜耶和华。“唔啱用嘅就揼咗佢”。喺最后嘅日子，基督同天使一直“将恶人从义人当中分出嚟”。f结果，边个冇正确嘅内心情况，即系唔肯放弃错误嘅信仰同习俗，边个就唔可以加入会众，以免会众受到玷污。g

19．知道基督一直捍卫正确嘅宗教，帮助上帝嘅子民保持灵性洁净，你有咩感觉？

¹⁹ 知道君王一直保护紧佢嘅子民，我哋唔系觉得好安心咩？今日，耶稣基督依然热心捍卫正确嘅宗教，帮助真心崇拜上帝嘅人保持灵性洁净，就好似喺公元1世纪，佢为正确嘅宗教大发热心洁净圣殿一样。知道呢点，俾到我哋好大嘅安慰。基督一直都努力确保上帝嘅子民保持灵性洁净，以免正确嘅宗教受到玷污。我哋唔系应该满怀感激咩？凡系同错误宗教有关嘅事物，我哋都应该弃绝，噉样做就系用行动嚟拥护君王耶稣同佢嘅王国。

1．以西结睇到乜嘢令人望而生畏嘅异象？

等我哋返到2500年前，想象一下你就系以西结先知。一座宏伟辉煌嘅圣殿就喺你面前，你慢慢行过去，一位大能嘅天使带住你，仔细参观成座建筑物。你行上七级楼梯，嚟到外院三个门楼嘅其中一个，睇到每个门楼大约成30米高（100英尺），好自然就会望而生畏。一入门楼，就见到守卫室，入面嘅墙柱刻住精致嘅棕榈树图案。（以西结书40:1-4,10,14,16,22；41:20）

2．（甲）异象里面嘅圣殿象征乜嘢？（另见脚注）（乙）圣殿门楼嘅唔同特点使我哋学到乜嘢？

² 呢个系以西结喺异象里面睇到嘅属灵圣殿。以西结将自己睇到嘅细节详细噉记录喺佢写嘅预言书里面，就系以西结书40-48章。异象里面嘅圣殿象征耶和华为正确宗教所作嘅一切崇拜安排。圣殿嘅每个特点都有象征意义，同我哋呢啲喺最后嘅日子崇拜耶和华嘅人密切相关。a高大嘅门楼象征乜嘢呢？呢啲门楼令我哋谂起，边个想加入正确嘅宗教，就一定要按照耶和华崇高正义嘅标准生活。墙柱上面嘅棕榈树同样强调呢一点，因为圣经有时用棕榈树代表正义。（诗篇92:12）守卫室又象征乜嘢呢？好明显，边个唔尊重上帝嘅标准，就唔可以加入正确嘅宗教，失去得到永生嘅机会。（以西结书44:9）

3．点解基督徒要不断受到熬炼？

³ 以西结嘅异象有冇应验呢？呢本书第2章讲到，从1914年到1919年初期，耶和华任用耶稣熬炼佢嘅子民。上帝子民所受嘅熬炼系咪到此为止呢？当然唔系。过去一百年间，基督一直要门徒遵守耶和华所定嘅圣洁标准。门徒要有圣洁嘅品行，就要不断受到熬炼。原因系，喺呢个道德败坏嘅世界里面，虽然基督将门徒聚集起嚟，不过撒但就一心要将佢哋拉返去放纵私欲嘅泥潭里面。（请读彼得后书2:20-22）等我哋而家嚟睇吓真基督徒喺三个方面逐步受到熬炼：第一，提高道德素质；第二，保持会众洁净；第三，加强家庭关系。

逐步提高道德素质

4,5．撒但通常用乜嘢手段？结果点样？

⁴ 耶和华嘅子民一向注重贞洁正义嘅行为。每逢耶和华嘅组织发出更清晰嘅指示，佢哋都乐意听从。请睇吓下面几点。

⁵ 性 喺耶和华嘅旨意里面，夫妻间嘅性生活本来应该系美好、洁净嘅。呢份本来系耶和华赐俾夫妻嘅宝贵礼物，不过撒但诱惑上帝嘅子民，想佢哋喺婚姻关系以外寻求性满足，令到性关系变得污秽下流，以致失去上帝嘅悦纳。呢一招系撒但好钟意用嘅。喺巴兰嘅日子，佢就成功诱使上帝嘅子民犯咗淫乱嘅大罪。喺而家呢段最后嘅日子，撒但比以往任何时候更常用呢种伎俩。（民数记25:1-3,9；启示录2:14）

6．（甲）《守望台》刊登咗乜嘢誓愿？（乙）上帝嘅子民对呢个誓愿有乜嘢睇法？（另见脚注）（丙）后来，点解佢哋唔再噉样做？

⁶ 为咗抵挡撒但嘅攻击，英语版《守望台》1908年6月15日刊嘅一篇文章登载咗一个誓愿，其中包含呢个承诺：“我喺公开场合点样对待异性，私底下都会一样，唔分时间同地点。”b上帝嘅子民唔一定都要起噉样嘅誓愿，但好多人都噉做，仲将自己嘅名交俾总部办事处，喺《锡安嘅守望台》刊登出嚟。当时呢个誓愿对好多人的确起咗保护作用，但后来上帝嘅组织睇出，有啲人起呢个誓愿只系例行公事。于是，慢慢大家就冇再噉样做嘞。虽然系噉，上帝嘅组织始终坚守呢个誓愿所蕴含嘅崇高道德原则。

7．（甲）1935年嘅《守望台》坦率噉指出乜嘢问题？（乙）文章再次强调上帝嘅子民一定要遵守乜嘢标准？

⁷ 撒但对上帝子民嘅攻击变本加厉。英语版《守望台》1935年3月1日刊坦率噉指出，喺上帝嘅子民当中出现咗一种情况：有啲人以为，只要参与传道工作，喺私人生活方面就唔使遵守耶和华所定嘅道德标准。呢种情况越来越严重。《守望台》直截了当噉讲：“要记住，耶和华对我哋嘅要求，唔净系向人作见证。身为耶和华见证人，我哋唔单止代表耶和华，亦都代表佢嘅王国。我哋行事为人一定要同呢个身份相称。”文章根据圣经，就婚姻同性道德提出明确嘅指引，帮助上帝嘅子民“远避淫乱”。（哥林多前书6:18）

8．点解《守望台》一再强调译做“淫乱”嘅希腊语词嘅全部含义？

⁸近几十年嘅《守望台》一再强调，译做“淫乱”嘅希腊语词“波尼阿”嘅正确定义系乜嘢。“波尼阿”唔净系指性交，仲包括形形色色嘅不道德性行为。一般嚟讲，卖淫场所嗰啲淫荡下流嘅行为通通都系“波尼阿”。基督徒听从《守望台》嘅劝告，就得到保护，唔似而家世上好多人噉沉迷于变态嘅性行为。（请读以弗所书4:17-19）

9,10．（甲）1935年嘅《守望台》仲提到乜嘢问题？（乙）圣经对饮酒有乜嘢合理嘅观点？

⁹ 酒 英语版《守望台》1935年3月1日刊仲提到一个问题，话：“我哋都留意到，有啲人喺酒精嘅影响之下传道或者执行其他属灵职责。人因为饮酒而妨碍自己为主嘅组织所作嘅服务，噉样做啱唔啱呢？究竟喺咩情况下饮酒先唔会违反圣经嘅原则呢？”

¹⁰ 为咗解答呢啲问题，文章根据圣经，就饮酒提出合理嘅观点。圣经唔反对人适量饮酒，但系强烈谴责人醉酒。（诗篇104:14,15；哥林多前书6:9,10）关于喺酒精影响之下执行神圣职务，上帝嘅子民早就已经受到提醒，要谨记亚伦两个仔嘅教训：佢哋喺上帝嘅坛前违法献上香火，结果俾上帝处死。圣经嘅记载透露咗佢哋行为不当嘅可能成因：喺亚伦两个仔被处死之后冇几耐，上帝颁布咗一条律法，禁止所有祭司执行圣职嗰时饮酒。（利未记10:1,2,8-11）今日，基督徒亦都遵守同样嘅原则，避免喺酒精嘅影响之下执行神圣职务。

11．上帝嘅子民对饮酒成瘾嘅问题有咗进一步嘅认识，点解话呢个系福分？

¹¹ 近几十年来，基督徒对饮酒成瘾呢个问题有咗进一步嘅认识。多得上帝嘅组织提供适时嘅灵粮，唔少人得到帮助，学识正视呢个问题，慢慢戒除咗酒瘾，恢复正常嘅生活。而更多嘅人从呢啲提醒得益，对饮酒有平衡嘅睇法，可以完全避免呢个难题。我哋唔想因为纵酒而丧失尊严，破坏家庭，而最大嘅损失就系，我哋唔能够保持洁净，失去崇拜耶和华嘅殊荣。

12．末期仲未到，基督嘅仆人已经对食烟有咩睇法？

¹² 烟草 末期仲未开始，基督嘅仆人已经劝人唔好食烟。好多年前，年长嘅查尔斯·卡彭回想，佢喺19世纪后期第一次同查尔斯·泰兹·罗素见面嘅情景。当时卡彭弟兄先至13岁，仲有哥哥同两个弟弟同佢一齐。佢哋四个人就企喺宾夕法尼亚州阿勒格尼嘅圣经书屋嘅楼梯上。罗素经过，问佢哋：“你哋食紧烟呀？我闻到有烟味。”四个男仔用肯定嘅口吻话俾罗素弟兄知，佢哋冇食烟。呢件事发生之后，估计佢哋一定好清楚罗素弟兄对食烟嘅睇法。喺英语版《守望台》1895年8月1日刊，罗素弟兄提到哥林多后书7:1，话：“基督徒无论以乜嘢方式使用烟草，都唔能够为上帝增光，亦都对自己冇益。……我哋好难想象主耶稣食烟，成身烟味，或者将任何玷污身体嘅嘢放入嘴里面。”

13．1973年，上帝嘅子民点样进一步受到熬炼？

¹³ 英语版《守望台》1935年3月1日刊将烟草叫做“秽草”，指出基督徒无论食烟抑或噍烟草，都唔可以继续喺伯特利工作，亦都唔可以再做上帝组织嘅代表，例如做先驱或者从事探访工作。1973年，上帝嘅子民进一步受到熬炼。英语版《守望台》1973年6月1日刊（汉语版1973年12月1日刊）指出，使用烟草唔单止危害生命，玷污身体，亦都系缺乏爱心嘅行为。文章声明，耶和华见证人如果继续食烟或者噍烟草，喺会众里面就冇好名声。边个唔肯戒除呢种恶习，就会被开除。c基督仲喺另一个方面熬炼佢嘅门徒。

14．（甲）关于血，上帝有乜嘢命令？（乙）输血系点样普及起嚟嘅呢？

¹⁴ 血 早喺挪亚嘅日子，上帝已经话唔可以食血。佢颁布律法俾以色列人嗰时再一次讲明，任何血都唔可以食。后来，佢亦都吩咐基督徒会众“禁戒血”。（使徒行传15:20,29；创世记9:4；利未记7:26）到咗近代，撒但揾到新方法使好多人违背“禁戒血”嘅命令。19世纪，医生开始尝试同病人输血。后来，科学家知道点样将血液分为唔同类型之后，输血就逐渐普及。1937年，血液开始被收集起嚟，储存喺血库里面。第二次世界大战嘅爆发大大推动咗输血技术嘅发展。冇几耐，输血疗法就喺世界各地广泛噉流行起嚟。

15,16．（甲）耶和华见证人对输血有乜嘢立场？（乙）关于输血嘅问题，基督徒得到乜嘢帮助可以采用不输血疗法？（丙）有乜嘢成果？

¹⁵ 早喺1944年，英语版《守望台》就已经表明，接受输血同食血冇咩分别。第二年，《守望台》再次根据圣经解释，点解接受输血等于食血，强调基督徒喺呢方面要坚守立场。1951年，英语版《守望台》刊登咗一连串嘅问题同答案，使上帝嘅子民知道应该点样回答专业医护人员嘅问题。喺嗰时，世界各地忠心嘅基督徒都勇敢紧守立场，坚决唔接受输血，所以往往俾人取笑同敌视，甚至受到猛烈嘅迫害。但系基督一直带领上帝嘅组织前进，不断提供帮助。后来，上帝嘅组织经过深入仔细嘅研究，出版咗一啲同血有关嘅册子同文章。

¹⁶ 1979年，有啲长老开始去探访医院嘅医生。呢啲弟兄引用圣经，向医生解释耶和华见证人唔输血嘅立场，同时亦都帮助佢哋知道，除咗输血之外，仲有其他疗法可以用。1980年，美国有39个城市嘅长老喺呢方面受到特别培训。后来，中央长老团批准喺世界各地成立医院联络委员会。自从嗰时以来，医院联络委员会嘅工作有乜嘢进展呢？今日，数以万计嘅专业医护人员，包括外科医生、麻醉科医生同其他专科医生，都尊重耶和华见证人嘅决定，愿意同我哋合作，按照我哋嘅意愿采用不输血疗法。越来越多医院提供不输血疗法，有啲医院甚至将不输血疗法视为最高水平嘅医疗技术。撒但千方百计使基督徒受到玷污，但系耶稣用唔同嘅方法帮助门徒保持洁净。认真谂吓耶稣为我哋所做嘅一切，唔系好振奋人心咩？（请读以弗所书5:25-27）

17．基督一直熬炼门徒，噉我哋点样做就表明自己珍惜佢所做嘅一切？

¹⁷我哋应该认真谂吓：“基督一直熬炼门徒，教导我哋紧守耶和华崇高嘅道德标准，我哋有冇好好珍惜呢？”我哋要谨记，撒但想方设法使我哋唔再尊重上帝所定嘅道德标准，一心要令我哋同耶和华、耶稣嘅关系疏远。但系耶和华嘅组织出于爱心，经常告诫我哋，要提防当今世界各种不道德嘅行为，帮助我哋抗拒撒但嘅影响。愿我哋保持警惕，时刻听从呢啲有益嘅劝告。（箴言19:20）

维护会众清白嘅名声

18．如果基督徒蓄意背弃上帝嘅标准，以西结嘅异象俾我哋乜嘢清晰嘅提醒？

¹⁸ 第二方面嘅熬炼同保持会众嘅洁净有关。好多人决定按照耶和华嘅标准行事为人，而且献身事奉佢，但好可悲嘅系，唔系每个人都可以坚持到底。后来，有啲人嘅内心情况改变咗，佢哋就蓄意背弃耶和华嘅标准。会众应该点样对待噉样嘅人呢？呢一章开头提到，以西结睇到一个同属灵圣殿有关嘅异象，通过呢个异象我哋可以得到提示。仲记唔记得嗰啲高大嘅门楼呢？每个门楼里面都有守卫室。守卫有责任保护圣殿，阻止心里“冇受过割礼”嘅人入去。（以西结书44:9）呢个系清晰嘅提醒，表明我哋一定要努力按照耶和华嘅标准生活，培养圣洁嘅品行，先至可以加入正确嘅宗教。今日，我哋能够同基督徒弟兄姊妹一齐崇拜耶和华系好大嘅荣幸，但呢种荣幸唔系人人都可以享有嘅。

19,20．（甲）基督点样逐步熬炼门徒，帮助佢哋知道处理严重过犯嘅正确做法？（乙）有边三个理由会众必须将唔肯悔改嘅犯过者开除呢？

¹⁹ 早喺1892年，英语版《守望台》已经指出，“如果有人直接或者间接否认基督牺牲生命……救赎所有人，我哋就有责任开除噉样嘅人（唔再承认佢系基督徒）”。（请读约翰二书10）1904年出版嘅《新嘅受造物》（英语）表明，经常作恶嘅人危害会众嘅灵性。喺嗰个年代，如果有人犯咗严重嘅罪，整群会众都会参与所谓嘅“教会审讯”。不过，呢种情况好罕见。1944年，英语版《守望台》指出，惟独肩负职责嘅弟兄先至可以处理严重嘅过犯。1952年，英语版《守望台》登载咗一篇文章，讲明点样按照圣经原则处理司法事件，而且强调将唔肯悔改嘅人开除，主要系为咗保持会众嘅洁净。

²⁰ 从嗰时开始，基督一直熬炼门徒，帮助佢哋明白应该点样处理严重嘅过犯。基督徒长老受到培训，处理司法事件嘅时候效法耶和华，既要公正又要慈悲。今日，我哋清楚睇出至少有三个理由，会众必须将唔肯悔改嘅犯过者开除：（1）免得耶和华嘅名受到羞辱；（2）保护会众唔受到严重嘅罪腐化；（3）希望促使犯过者悔改。

21．点解开除嘅安排对上帝嘅子民有益？

²¹ 今日，你睇唔睇得出开除嘅安排对基督徒系有益嘅呢？喺古代，以色列犯过者嘅不良影响往往败坏成个国族，呢啲人嘅数目有时甚至比嗰啲爱耶和华、努力做啱嘅事嘅人仲要多。结果，以色列人经常使耶和华嘅名受到羞辱，最后失去上帝嘅悦纳。（耶利米书7:23-28）今日，耶和华唔系只同一个国族，而系同一大群嚟自唔同国族嘅人来往。呢个群体当中如果有人唔肯悔改，就会被开除，噉做系为咗将佢哋嘅坏影响降到最低。撒但亦都唔能够利用佢哋嚟进一步腐化会众，损害会众嘅名声。噉样，以整体嚟讲，我哋先至可以继续得到耶和华嘅悦纳。要谨记耶和华嘅应许：“凡为攻击你而造嘅武器，都一定会失去功用。”（以赛亚书54:17）长老肩负处理司法事件嘅沉重责任，我哋有冇忠贞噉支持佢哋呢？

要荣耀天父，因为所有家族都系靠佢得名嘅

22,23．（甲）上世纪初嘅基督徒点样做，令我哋满心感激？（乙）点解嗰个年代嘅基督徒，喺从事属灵工作同照顾家庭呢两方面需要取得平衡？

²² 基督徒喺第三方面受到嘅熬炼，涉及到婚姻同家庭生活。咁多年来，我哋对家庭关系嘅睇法有冇修正呢？有。例如话，读到上帝嘅仆人喺上世纪初表现嘅自我牺牲精神，我哋好自然就产生敬佩之心。呢啲忠仆将神圣职务放喺最优先最重要嘅位置，我哋深深感激佢哋，但亦都睇出佢哋需要喺各方面取得平衡。点解噉讲呢？

²³ 以前，弟兄奉派到离屋企比较远嘅地方传道或者从事探访嘅工作，通常一去就几个月。嗰阵时，上帝组织嘅出版物经常强调独身好过结婚，措辞有时比圣经更加强烈，而且好少讲到点样巩固基督徒嘅婚姻关系。但时至今日，呢种情况有冇改变呢？有！

24．基督点样帮助忠心嘅门徒对婚姻同家庭生活有合理嘅睇法？

²⁴ 今日，基督徒唔应该只顾做上帝嘅工作而唔顾家庭。（请读提摩太前书5:8）圣经就婚姻同家庭生活提出嘅劝告合情合理，实际有效。喺呢方面，基督一直确保忠心嘅门徒不断受到提醒。（以弗所书3:14,15）1978年，上帝嘅组织出版咗《使你的家庭生活美满幸福》（汉语版1979年出版）。大约18年后，《家庭幸福的秘诀》面世嘞。另外，《守望台》仲刊登咗好多文章，帮助夫妇实践圣经原则，巩固婚姻关系。

25-27．我哋点样睇出，耶和华嘅组织越来越关注唔同年龄嘅小朋友嘅需要？

²⁵ 噉年轻人呢？随住时间嘅过去，年轻人得到嘅关注越来越多。其实，上帝嘅组织好早就为唔同年龄嘅儿童提供有益嘅刊物。以前，专门为儿童而写嘅书刊就好似涓涓流水，时至今日已经成咗滚滚洪流。例如，从1919年到1921年，英语版《黄金时代》有个栏目叫做“少年圣经研究”。1920年，上帝嘅组织出版咗一本册子叫《黄金时代初阶》（英语），1941年又出版咗《儿童》（英语）。上世纪70年代，《聆听伟大的导师》《尽量善用你的青春》《我的圣经故事书》陆续面世。1982年，《警醒！》推出咗一个新栏目——“青年人问”。上帝嘅组织将呢个栏目里面嘅文章编写成《青少年所提出的问题——有实效的答案》，1989年出版。

²⁶ 今日，我哋为年轻人提供咗最新嘅两册《青年人问》书。“青年人问”栏目嘅文章会继续放喺jw.org网站上面。我哋亦出版咗《向伟大的导师学习》。我哋嘅网站仲有好多专为青少年同小朋友设计嘅栏目，例如“圣经人物卡”“看圣经动动脑”“儿童圣经游戏”“看图玩游戏”“圣经故事漫画”“宝宝学圣经”，同埋各种唔同嘅影片。公元1世纪，基督将小朋友召集到佢嗰度，用手揽住佢哋。（马可福音10:13-16）今日，佢一如既往，依然好关爱小朋友，好想令我哋当中嘅年轻人感受到爱，喺灵性上得到饱足。

²⁷ 耶稣亦都好想保护啲小朋友，唔想佢哋受到伤害。喺呢个腐败嘅世界里面，世人嘅道德水平越来越低，淫辱儿童嘅行为越来越普遍。针对呢啲情况，上帝嘅组织出版咗唔同嘅文章，提出清晰明确嘅指引，帮助父母保护儿女免受性侵犯。d

28．（甲）正如以西结睇见嘅圣殿异象显示，我哋要加入正确嘅宗教崇拜耶和华，就一定要点样做？（乙）你决心点样做呢？

²⁸ 基督继续熬炼门徒，教导佢哋尊重同遵守耶和华崇高嘅道德标准，从而得到益处。沉思基督为我哋做嘅呢一切，唔系好振奋人心咩？要多啲谂吓以西结喺异象里面睇到嘅圣殿，亦都要记住高大嘅门楼象征乜嘢。当然，呢座系属灵嘅圣殿而唔系实际嘅建筑物，但喺我哋心目中，呢座圣殿有几真实呢？要进入属灵嘅圣殿，唔系靠净系去参加聚会，翻开吓圣经，或者去吓传道就得嘅。呢啲事都系其他人睇得到嘅，连唔想入耶和华圣殿嗰啲虚伪嘅人都识得做嘅。所以，除咗参加聚会，研读圣经，向人传道之外，仲要遵守耶和华崇高嘅道德标准，怀住纯正嘅动机崇拜耶和华。我哋噉样做，就能够进入属灵嘅圣殿，喺最神圣嘅地方崇拜耶和华上帝。愿我哋时刻珍惜呢个宝贵嘅殊荣，亦都愿我哋努力紧守耶和华嘅正义标准，尽己所能反映佢嘅圣洁！

1,2．（甲）英语版《锡安嘅守望台》1895年1月刊有乜嘢改变？（乙）弟兄有乜嘢反应？

约翰·博内特系个热心嘅圣经研究者，佢收到英语版《锡安嘅守望台》1895年1月刊嗰阵，非常兴奋。杂志嘅封面系全新设计嘅，上面有一座灯塔，屹立喺波涛汹涌嘅大海当中，塔顶射出嘅灯光照亮夜空。呢期杂志有一篇文章介绍新封面，题目系《换上新装》。

² 博内特弟兄非常欣赏新封面，于是写信俾罗素弟兄，话：“我好开心睇到《守望台》换咗‘新装’，真系靓啊！”另一个忠心嘅圣经研究者约翰·布朗亦都写咗一封信，讲到杂志嘅新设计，话：“封面嘅灯塔喺狂风暴雨嘅吹袭同汹涌巨浪嘅冲击之下，毫不动摇噉竖立喺坚固嘅基石上，非常鲜明，引人注目！”《守望台》嘅新封面只不过系我哋嘅弟兄喺1895年见到嘅第一个改变。同一年11月，弟兄知道咗另一个重大嘅改变。好有意思嘅系，呢个再一次牵涉到波涛汹涌嘅大海。

3,4．（甲）英语版《守望台》1895年11月15日刊提到乜嘢问题？（乙）文章话会有乜嘢影响深远嘅改变？

³ 英语版《守望台》1895年11月15日刊发表咗一篇相当长嘅文章，坦率噉讲到一个问题，就系上帝组织嘅内部闹矛盾，圣经研究者之间彼此不和。弟兄经常争论会众应该由边个嚟带头，冲突越来越激烈，喺会众当中掀起咗狂风巨浪。为咗帮助弟兄睇出佢哋需要纠正呢啲引起分裂嘅竞争精神，文章将上帝嘅组织比喻成一艘船，亦直率噉指出，带领呢艘船嘅弟兄冇做好准备应付狂风巨浪。噉佢哋应该点做呢？

⁴ 文章话，称职嘅船长会确保船上面有充足嘅救生设备，船上嘅工作人员都应该准备好随时封舱，以防暴风雨袭击。同样，带领上帝组织嘅弟兄亦要确保所有会众都做好准备，抵挡暴风雨一样嘅冲击。要达到呢个目的，文章讲到一个影响深远，即时生效嘅改变，就系“每个连（会众）选出长老嚟督导羊群”。（使徒行传20:28）

5．（甲）点解选出长老呢个新安排非常合时？（乙）我哋会探讨边啲问题？

⁵ 选出长老督导羊群嘅新安排非常合时，对会众嘅组织结构起咗稳定作用。喺长老嘅督导同帮助之下，会众嘅弟兄姊妹渡过咗第一次世界大战激起嘅狂风巨浪。跟住嘅几十年期间，上帝嘅子民喺组织方面不断改进，所以能够更好噉为耶和华服务。圣经里面有乜嘢预言提及呢方面嘅进步？你睇到上帝嘅子民喺组织方面有边啲改变呢？你从中得到乜嘢益处？

“我一定会立和平做你哋嘅监督”

6,7．（甲）以赛亚书60:17嘅话系乜嘢意思？（乙）耶和华提到“监督”同“监工”，呢个表明咗乜嘢？

⁶ 呢本书第9章讲过，以赛亚预告耶和华会赐福俾佢嘅子民，使佢哋嘅数目不断增多。（以赛亚书60:22）但耶和华应许嘅唔止呢啲。喺同一个预言里面，以赛亚记述咗耶和华嘅话：“我要用金代替铜，银代替铁，铜代替木，铁代替石。我一定会立和平做你哋嘅监督，立正义做你哋嘅监工。”（以赛亚书60:17）呢个预言有乜嘢含意呢？同我哋又有乜嘢关系呢？

⁷ 以赛亚嘅预言提到用一种材料嚟代替另一种。请留意，呢种改变唔系用好嘅代替唔好嘅，而系用更加好嘅代替好嘅。用黄金代替铜系一种改进，呢个预言提到嘅其他材料都一样。通过呢个比喻，耶和华预告佢子民嘅情况会一步一步噉改进。预言指嘅系边方面嘅改进呢？耶和华提到“监督”同“监工”，呢个表明佢嘅子民喺组织方面会逐步改进，得到嘅照顾亦会越来越好。

8．（甲）以赛亚嘅预言提到嘅改进由边个嚟促成？（乙）我哋从中得到乜嘢益处？（另见附栏“佢谦卑噉接受咗纠正”）

⁸ 促成上帝嘅子民喺组织方面改进嘅系边个呢？耶和华话：“我要用金代替铜，银代替铁……。我一定会立和平做你哋嘅监督”。显然，会众喺组织方面嘅任何进步，都系耶和华嘅作为，而唔系人嘅功劳。耶稣作王之后，耶和华就通过爱子帮助佢嘅子民喺组织方面不断改进。噉我哋从中得到乜嘢益处呢？同一节经文显示，呢啲改进会带嚟“和平”（亦可以翻译为“和谐”“和睦”“平安”）同“正义”。我哋接受上帝嘅指引，努力作出改变，会众就会充满和平嘅气氛。我哋喜爱正义，就自然愿意为“赐平安嘅上帝”耶和华服务。（腓立比书4:9）

9．会众嘅秩序同团结应该以乜嘢为根基？点解呢？

⁹ 讲到耶和华，使徒保罗话：“上帝唔系要人混乱，而系要人和谐”。（哥林多前书14:33）请留意，喺保罗嘅话里面，同“混乱”相对嘅唔系“秩序”，而系“和谐”。点解呢？因为秩序唔一定会带嚟和谐平安。举个例，一支军队齐步走向前线，秩序井然，但带嚟嘅系战争而唔系和平。身为基督徒，我哋应该谨记：任何有秩序嘅组织如果唔系建基于和平，迟早都会瓦解。如果想秩序维持落去，冇咗上帝所赐嘅和平系唔得嘅。睇到“赐平安嘅上帝”不断指引佢嘅子民，熬炼佢哋，我哋唔系应该满心感激咩？（罗马书15:33）由于有上帝所赐嘅和平作为根基，世界各地嘅会众运作得井井有条，基督徒之间团结和谐，我哋实在应该加倍珍惜！（诗篇29:11）

10．（甲）上帝嘅现代子民早期喺组织方面有边啲改进？（见附栏“改进督导嘅方式”）（乙）我哋会讨论边啲问题？

¹⁰ 附栏“改进督导嘅方式”概述咗上帝嘅现代子民早期喺组织方面嘅一啲改进，使成个组织运作得井然有序。近几十年来，上帝通过君王带嚟边啲“用金代替铜”嘅改变？督导方式嘅改进，点样巩固全球所有会众嘅团结，促进会众嘅和谐呢？呢啲改变同你事奉“赐平安嘅上帝”有乜嘢关系呢？

基督点样领导会众

11．（甲）关于会众嘅组织结构，弟兄深入研究圣经之后意识到乜嘢？（乙）中央长老团嘅弟兄决心点样做？

¹¹ 1964年到1971年期间，喺中央长老团嘅督导之下，弟兄进行咗一个深入研究圣经嘅计划，探讨唔同嘅课题，其中一个同公元1世纪基督徒会众嘅运作有关。a就会众嘅组织结构嚟讲，弟兄查考圣经之后意识到，公元1世纪嘅会众唔系由一位长老（监督）而系由一个长老团嚟督导嘅。（请读腓立比书1:1；提摩太前书4:14）中央长老团明白呢点之后，睇出君王耶稣喺度指引紧佢哋，帮助佢哋知道上帝嘅子民喺组织结构方面需要改进，所以决心听从君王嘅引导。佢哋毫不犹豫噉按照圣经所定嘅标准委任长老。上世纪70年代初期，上帝嘅组织喺结构方面有边啲改进呢？

12．（甲）中央长老团有乜嘢改变？（乙）请描述而家中央长老团嘅结构。（见130页附栏“中央长老团点样管理上帝王国喺地上嘅事务”）

¹² 第一个改进同中央长老团有关。以前中央长老团由宾夕法尼亚州守望台圣经书社董事会嘅七位成员组成，佢哋都系受膏弟兄。到咗1971年，中央长老团嘅成员由七位增加到十一位，而且佢哋都唔再系董事会嘅成员。中央长老团嘅弟兄彼此平等，一视同仁。从呢一年开始，佢哋按照弟兄姓氏嘅字母顺序轮流担任中央长老团嘅主席，任期一年。

13．（甲）有40年嘅时间，会众点样受到督导？（乙）到咗1972年，中央长老团点样做？

¹³ 第二个改进同各群会众有关。从1932年到1972年，会众主要由一个弟兄督导。到1936年为止，呢个受委任嘅弟兄一直称为服务指导员，之后改称为连嘅仆人，再改为组务仆人，最后系会众监督。呢啲受委任嘅弟兄热心照顾羊群，关心佢哋嘅灵性。喺嗰个年代，会众嘅事通常由会众监督一个人做决定，佢唔使同其他仆人（而家叫做长老）商量。到咗1972年，中央长老团决定改变呢种情况，呢个改变深具历史意义。到底系乜嘢改变呢？

14．（甲）乜嘢新安排从1972年10月1日开始生效？（乙）长老团协调人点样将腓立比书2:3嘅原则运用出嚟？

¹⁴ 会众唔再由会众监督一个人督导。其他弟兄只要符合圣经所定嘅标准，亦会受委任做长老。佢哋组成长老团，共同督导会众。呢个新安排从1972年10月1日起生效。今日，长老团协调人唔会认为自己高人一等，反而“行事为人好似后辈噉”。（路加福音9:48）喺世界各地有呢啲谦卑嘅弟兄为我哋服务，系几咁大嘅福分啊！（腓立比书2:3）

15．（甲）长老团嘅安排为会众带嚟乜嘢益处？（乙）乜嘢表明君王耶稣确实有先见之明。

¹⁵ 由长老团嘅唔同弟兄分担照顾会众嘅责任，的确系一个好大嘅改进。请睇吓其中三个益处：第一，无论喺会众里面有几大嘅责任，长老团嘅所有长老都时刻谨记耶稣先至系会众嘅头。（以弗所书5:23）第二，箴言11:14话：“集思广益，就能得救。”凡系同会众灵性有关嘅事，长老都会一齐商议，听吓彼此嘅意见。噉样，佢哋所作嘅决定就能够同圣经原则一致。（箴言27:17）长老噉样做，一定会得到耶和华嘅赐福，事事亨通。第三，会众嘅数目不断增加，好需要弟兄负起督导同牧养会众嘅责任。上帝嘅组织委任更多符合资格嘅弟兄做长老，就能够满足呢方面嘅需求。（以赛亚书60:3-5）试谂吓，全球会众嘅数目从1971年嘅2万7000几群，增加到2013年嘅11万3000几群！显然，君王耶稣好有先见之明，喺适当嘅时候兴起更多牧人去照顾佢嘅门徒。（弥迦书5:5）

“做羊群嘅榜样”

16．（甲）长老有乜嘢责任？（乙）耶稣吩咐门徒“要牧养我嘅小绵羊”，圣经研究者点样睇呢个吩咐？

¹⁶ 早喺圣经研究者嘅日子，长老已经明白到自己有责任帮助羊群继续事奉上帝。（请读加拉太书6:10）1908年，英语版《守望台》有一篇文章论述耶稣吩咐门徒“要牧养我嘅小绵羊”。（约翰福音21:15-17）文章对长老讲：“主吩咐我哋牧养佢嘅羊群，我哋应该将呢个吩咐放喺心上，亦都应该将喂养同照顾羊群嘅责任睇成系殊荣。噉样做非常重要。”1925年，英语版《守望台》再次强调长老一定要负起牧人嘅责任。文章提醒长老：“教会系属于上帝嘅……凡系有荣幸为弟兄服务嘅，都要向上帝负责。”

17．耶和华嘅组织点样帮助长老提高牧养技巧？

¹⁷ 耶和华嘅组织点样帮助长老提高牧养嘅技巧，用“银代替铁”呢？就系提供培训。1959年，上帝嘅组织为长老举办咗第一届王国职务训练班。课程里面有一课系“关心每一只羊”。长老受到鼓励要“安排时间上门探访传道员”，亦都学识用唔同嘅方法喺牧养探访嗰阵强化佢哋嘅信心。1966年，王国职务训练班嘅课程更新咗，其中一课系“牧养工作十分重要”。呢课嘅重点系：带头嘅弟兄“应该照顾好上帝嘅羊群，但都唔应该忽略屋企人同传道工作”。近年来，上帝嘅组织为长老举办咗更多嘅训练班。长老不断受到培训，带嚟点样嘅结果呢？今日，喺全球嘅基督徒会众里面，有成千上万符合资格嘅弟兄做属灵嘅牧人。

18．（甲）长老要执行乜嘢重大嘅任务？（乙）点解耶和华同耶稣深爱勤奋工作嘅长老？

¹⁸ 耶和华通过君王耶稣，设立咗基督徒长老呢个安排嚟执行一件重大嘅任务。咩任务呢？就系带领上帝嘅羊群渡过人类历史上最难以应付嘅时期。（以弗所书4:11,12；提摩太后书3:1）耶和华同耶稣深爱勤奋工作嘅长老，因为佢哋听从圣经嘅劝告：“务要牧养上帝嘅羊群，……做羊群嘅榜样。”佢哋噉样做系出于乐意同热诚。（彼得前书5:2,3）基督徒嘅牧人喺各方面都做羊群嘅榜样，大大促进会众嘅和睦同喜乐，等我哋嚟睇吓其中两方面。

今日嘅长老点样牧养上帝嘅羊群

19．长老同我哋一齐传道，我哋有乜嘢感觉？

¹⁹ 第一，长老同会众嘅弟兄姊妹一齐传道。福音书嘅执笔者路加提到耶稣，话：“耶稣起程传道，逐城逐村，宣扬上帝王国嘅好消息。同佢一齐嘅有嗰十二个人”。（路加福音8:1）正如耶稣同使徒一齐传道，今日堪作模范嘅长老亦会同弟兄姊妹一齐传道。佢哋睇出，噉样做可以大大促进会众美好嘅精神。会众嘅弟兄姊妹有乜嘢感觉呢？年近九十嘅让尼娜话：“同长老一齐传道，就有机会同佢交流，更加熟悉佢嘞。”三十几岁嘅史提文话：“同长老一齐逐家逐户传道嗰时，觉得佢好想帮我。有佢帮我，真系好开心。”

20,21．长老点样做，就系效法比喻里面嘅牧人？请举例说明。（另见附栏“每个星期嘅探访得到成果”）

²⁰ 第二，耶和华嘅组织培训长老去关心嗰啲同会众停止来往嘅人。（希伯来书12:12）点解长老应该帮助呢啲同耶和华疏远嘅人？长老应该点样着手呢？读一读牧人寻找迷失绵羊嘅比喻，就知道答案嘞。（请读路加福音15:4-7）比喻里面嘅牧人发现一只羊唔见咗，就即刻去揾，好似呢只系佢惟一嘅羊噉。今日嘅基督徒长老可以点样向呢个牧人学习呢？喺牧人睇嚟，迷失嘅绵羊系非常宝贵嘅；同样，喺长老睇嚟，同上帝子民停止来往嘅人亦都系好宝贵嘅。长老将灵性软弱嘅人睇成系迷失嘅绵羊，而唔系无可救药嘅人。除此之外，牧人仲决定“去揾嗰只唔见咗嘅，直至揾到为止”，同样长老亦都主动去揾嗰啲迷失嘅人，伸出援手，帮助佢哋恢复同耶和华嘅关系。

²¹ 比喻里面嘅牧人揾到绵羊之后，点样做呢？佢温柔噉将只羊抱起嚟，“放喺膊头”，送返去羊群嗰度。同样，长老衷心关怀嗰啲同耶和华疏远嘅人，温柔和蔼噉将佢哋扶起嚟，话唔定可以帮到佢哋返翻会众。非洲一个叫维克托嘅弟兄曾经停止同会众来往。佢话：“喺我停止传道嘅八年期间，长老从来都冇放弃帮助我。”到底系乜嘢打动咗佢嘅心呢？维克托话：“有一日，约翰专程嚟睇我。佢系个长老，曾经系我嘅先驱同学。约翰俾我睇以前我哋参加先驱训练班嗰时影嘅相。呢啲旧时嘅相勾起咗好多美好嘅回忆，令我谂起以前事奉耶和华嘅快乐时光，我好想重新得到呢种喜乐。”约翰探访后冇几耐，维克托重新返到会众嘅怀抱。今日，佢再次成为先驱。基督徒长老关心弟兄姊妹，确实令我哋喜乐大增。（哥林多后书1:24）b

改进督导方式，加强上帝子民嘅团结

22．正义同和平点样促进会众嘅团结？（另见附栏“我哋真系喜出望外！”）

²² 前面讲过，耶和华预告喺佢嘅子民当中，正义同和平嘅果实会逐渐增多，能够巩固会众嘅团结。（以赛亚书60:17）先讲吓正义，“独一嘅耶和华”嘅正义标准唔会因地而异，佢对所有会众都一视同仁。（申命记6:4）耶和华嘅是非标准只有一套，独一无二，各地嘅会众都遵守呢套标准。（哥林多前书14:33）所以，会众只有按照耶和华嘅标准行事，先会兴旺。再讲吓和平点样巩固会众嘅团结。君王耶稣唔单止想我哋喺会众里面享有和平，亦都希望我哋“促进和睦”。（马太福音5:9）所以，我哋要“追求促进和睦嘅事”。一旦有分歧，就应该主动化解。（罗马书14:19）我哋噉样做就可以促进会众嘅和平同团结。（以赛亚书60:18）

23．身为耶和华嘅仆人，今日我哋享有乜嘢福分？

²³ 喺1895年11月，英语版《守望台》提到选出长老督导羊群嘅新安排嗰阵，亦都讲出咗嗰啲带头弟兄嘅愿望。乜嘢愿望呢？佢哋希望呢个新安排能够帮助上帝嘅子民“喺信仰方面加快团结嘅步伐”，而且祈求上帝赐福。回顾过去嘅百几年，我哋可以满怀感激噉讲，耶和华通过君王耶稣改进督导嘅方式，确实令我哋喺崇拜方面更加团结。（诗篇99:4）结果，今日喺世界各地，耶和华嘅子民都满心喜乐，大家“本住同样嘅精神，跟住同样嘅脚踪”，齐心一意为“赐平安嘅上帝”服务。（哥林多后书12:18；请读西番雅书3:9）

1,2．（甲）为咗阻止传道工作，宗教领袖采取乜嘢行动？（乙）使徒有乜嘢反应呢？（丙）点解使徒唔服从禁令？

公元33年五旬节过后冇几耐，撒但睇到当时耶路撒冷嘅基督徒会众只系成立咗几个星期，就趁机展开攻势。撒但想趁会众仲未强大起嚟，就将佢彻底毁灭。撒但操纵事态，好快就利用宗教领袖禁止基督徒传讲王国信息嘅工作。即使系噉，使徒仲系勇敢无惧继续传道，结果好多人都成为“主嘅信徒”。（使徒行传4:18,33；5:14）

² 反对者好嬲，又发动攻击，今次将所有使徒韫晒起嚟。但系，耶和华嘅天使喺夜晚打开监门，带佢哋出去。天一光，使徒又喺外面传道嘞！结果，使徒再次俾人拉咗，带到去有权势嘅人嗰度。呢啲人指控使徒违反禁令向人传道。使徒勇敢同佢哋讲：“我哋必须接受上帝嘅统治，服从上帝而唔系服从人。”嗰啲有权势嘅人就好火滚，“想杀死啲使徒”。喺呢个紧要关头，深受敬重嘅律法导师迦玛列就话：“你哋一定要谂清楚点样处置呢啲人。……唔好理呢啲人，由得佢哋算喇。”出乎意料嘅系，呢啲权贵竟然听迦玛列嘅话，放啲使徒走。忠心嘅使徒点样做呢？佢哋勇敢无惧，“持续不懈噉教导人，宣扬基督嘅好消息，传耶稣就系基督。”（使徒行传5:17-21,27-42；箴言21:1,30）

3,4．（甲）撒但一向用乜嘢方法攻击上帝嘅子民？（乙）呢一章同下面两章会讨论啲乜嘢？

³ 公元33年发生嘅呢件事，系基督徒会众第一次因为受到有权势嘅人反对而被告上法庭，但唔系最后一次。（使徒行传4:5-8；16:20；17:6,7）今日，撒但继续兴风作浪，利用反对正确宗教嘅人，挑动政府禁止我哋嘅传道工作。反对者以各种罪名指控我哋，例如诬告我哋系扰乱社会秩序嘅滋事分子，系煽动人反政府嘅叛乱分子，仲话我哋系从事非法贩卖活动嘅商贩。我哋嘅弟兄为咗要驳倒敌人嘅指控，曾经喺适当嘅时候向法庭提出诉讼。结果点样呢？法庭喺几十年前作出嘅裁决对你有乜嘢影响呢？等我哋嚟讨论一啲案件，睇吓呢啲诉讼点样有助于“为好消息辩护，通过法律途径确立好消息嘅工作”。（腓立比书 1:7）

⁴ 呢一章主要讲我哋点样维护传道嘅自由。下面两章会回顾一啲诉讼案件，睇吓我哋点样努力坚守唔属于世界嘅立场，同埋按照王国嘅标准生活。

滋事分子？抑或系坚决拥护上帝王国嘅人？

5．（甲）上世纪30年代后期，点解王国宣扬者被捕？（乙）嗰啲带头嘅弟兄打算采取乜嘢行动？

⁵ 上世纪30年代后期，美国各个地方政府都强迫耶和华见证人申请传道许可证。我哋嘅弟兄冇噉样做，因为佢哋知道政府有权吊销呢啲许可证，而传讲王国好消息系嚟自耶稣嘅吩咐，政府冇权阻止。（马可福音13:10）结果，几百个王国宣扬者被捕。喺组织里面带头嘅弟兄打算向法庭提出诉讼，等人睇出政府限制耶和华见证人嘅宗教自由系非法嘅。喺1938年发生嘅一件事引起咗一场诉讼，裁决影响深远。当时发生乜嘢事呢？

6,7．坎特韦尔弟兄一家人有乜嘢遭遇？

⁶ 1938年4月26日星期二嘅早上，60岁嘅纽顿·坎特韦尔同太太爱斯特，仲有佢哋嘅仔亨利、罗素同埋杰西，去康涅狄格州（康州）纽黑文市传道。佢哋五个都系特别先驱。出发之前，佢哋已经有心理准备，当日未必返到嚟。点解呢？因为佢哋俾人拉过几次，呢次可能都会。就算系噉，佢哋向人传讲王国信息嘅热心一啲都冇减少。佢哋开住两部车到咗纽黑文市。纽顿开住部车，部车放咗啲圣经书刊同手提式留声机。22岁嘅亨利开住部播音车。果然不出佢哋所料，唔够几个钟，佢哋就俾警察截停咗。

⁷ 第一个俾人拉嘅系18岁嘅罗素，跟住系纽顿同埋爱斯特。16岁嘅杰西离远睇住爸爸妈妈同埋哥哥俾警察拉咗。由于亨利当时喺市内嘅另一个地方传道，而家净翻杰西一个人。佢攞住部留声机，继续传道。有两个天主教徒听杰西播放卢述福弟兄题名为“仇敌”嘅演讲。不过，佢哋越听就越火滚，要打杰西。杰西好冷静噉行开，之后冇几耐有个警察截住佢，结果杰西都俾人韫咗起嚟。警察冇控告爱斯特，只系控告纽顿同佢两个仔，不过，当日佢哋都获准保释。

8．点解法院判杰西有罪，话佢系滋事分子？

⁸ 几个月之后，即系1938年嘅9月，纽顿同家人喺纽黑文市出庭。纽顿、罗素同埋杰西被判无牌募捐。佢哋上诉到康州最高法院，但系杰西仲系被判扰乱治安罪，话佢系滋事分子，点解呢？因为嗰两个天主教徒出庭作证，指控杰西播嘅演讲录音侮辱佢哋嘅宗教信仰，激嬲咗佢哋。为咗推翻呢个裁决，负责嘅弟兄上诉到美国最高法院。

9,10．（甲）美国最高法院对坎特韦尔弟兄一家人作出乜嘢裁决？（乙）今日我哋点样从呢个裁决得益？

⁹ 法院喺1940年3月29日开庭审理呢单案。首席大法官查尔斯·休斯同另外八位陪审官听咗耶和华见证人代表律师海登·科温顿弟兄嘅陈述。a康州政府嘅代表律师提出反驳，极力证明耶和华见证人系滋事分子。一位法官问佢：“喺耶稣嘅日子，啲人系咪唔钟意听耶稣传讲嘅信息呀？”政府嘅代表律师回答话：“系啊，如果我冇记错嘅话，圣经仲话耶稣因为传道有咩下场添。”呢句话讲得真系好有意思！佢无意中将耶和华见证人同耶稣连系埋一齐，又将政府同以往定耶稣有罪嘅人相提并论。1940年5月20日，最高法院一致裁定耶和华见证人胜诉。

¹⁰ 法院嘅呢项裁决意义重大，点解呢？因为裁决扩大咗人民享有嘅宗教自由，可以有权自由噉从事宗教活动，而联邦政府、州政府同市政府都唔可以再用法律去限制呢种自由。法庭仲判杰西嘅行为“冇对公众治安构成威胁”。所以，裁决清楚表明，耶和华见证人绝对唔系扰乱社会秩序嘅滋事分子。打赢呢场官司对耶和华嘅子民嚟讲影响真系好深远！我哋从中得到乜嘢益处呢？一位做律师嘅见证人话：“今日，我哋可以自由噉从事宗教活动，唔使担心受到唔公平嘅限制。由于有呢个权利，耶和华见证人先至可以喺所住嘅地区向人传讲带嚟希望嘅信息。”

叛乱分子？抑或系真理嘅宣扬者？

11．（甲）加拿大嘅弟兄发起一场乜嘢运动？（乙）点解佢哋噉做？

¹¹ 上世纪40年代，加拿大嘅耶和华见证人遭受激烈嘅反对。为咗俾大家知道政府侵犯咗耶和华见证人嘅崇拜自由，加拿大嘅弟兄喺1946年发起一场为期16日嘅运动，分发《魁北克仇恨上帝、基督同自由，是全加拿大的耻辱》呢份传单。呢份四页嘅传单详细披露我哋嘅弟兄喺魁北克省受到嘅恶劣对待，包括宗教领袖煽动嘅骚乱，警察嘅野蛮行为同暴民嘅袭击。传单指出：“耶和华见证人不断俾人非法拘捕。”传单仲指出：“喺蒙特利尔，控告耶和华见证人嘅案件大约有800宗。”

12．（甲）反对者对分发传单运动有乜嘢反应？（乙）当局用乜嘢罪名指控我哋嘅弟兄姊妹？（另见脚注）

¹² 魁北克省总理杜普莱西斯同罗马天主教枢机主教维尔纳夫联手反击，向耶和华见证人宣战，声明“绝对唔会手下留情”。之后，控告耶和华见证人嘅案件好快就由800宗增加到1600宗。一个先驱姊妹话：“警察拉咗我哋好多次，多到数都数唔晒。”耶和华见证人喺分发传单嗰时被捕，罪名系利用刊物煽动人反对政府。b

13．（甲）边个最先被控煽动叛乱罪？（乙）法院作出乜嘢裁决？

¹³ 1947年，艾每·鲍彻弟兄同佢两个女，18岁嘅吉塞勒同11岁嘅露西尔，系最先俾人以煽动叛乱罪告上法庭嘅人。佢哋喺魁北克市南部山区自己嘅农田附近分发《魁北克仇恨》传单。真系好难想象鲍彻弟兄系滋事分子，佢性格温和又谦卑，一向安守本分，喺自己嘅农田做嘢，间唔中会坐马车去镇嗰度。虽然系噉，佢哋一家人受到虐待，就好似传单所讲嘅一样。审理案件嘅法官好憎耶和华见证人，就算证据表明鲍彻弟兄同家人系无辜嘅，佢都系当睇唔到。法官接纳控方嘅指控，认为传单挑起敌对情绪，于是判鲍彻弟兄一家人罪名成立。法官噉做就等于话：讲出真相系一种罪！鲍彻弟兄同吉塞勒被判煽动人反对政府罪，甚至年纪细细嘅露西尔亦都坐咗两日监。后来弟兄向加拿大最高法院上诉，法院受理咗。

14．魁北克省嘅弟兄姊妹持续受到迫害，佢哋点样做？

¹⁴ 即使魁北克省嘅弟兄姊妹持续受到猛烈嘅攻击，佢哋仍然勇敢无惧传讲王国嘅信息，而且仲好有成效。1946年嘅分发传单运动之后嘅四年期间，魁北克省嘅耶和华见证人由300人增加到1000人！c

15,16．（甲）加拿大最高法院对鲍彻弟兄一案作出乜嘢裁决？（乙）呢场胜诉对弟兄姊妹同埋其他人有乜嘢影响？

¹⁵ 1950年6月，加拿大最高法院嘅9位法官都出席咗艾每·鲍彻弟兄一案嘅听证会。6个月之后，即系1950年12月18日，法院裁定我哋胜诉。点解呢？耶和华见证人嘅代表律师格伦·豪弟兄解释，法院同意我哋提出嘅理据，就系“煽动叛乱”一定要涉及到怂恿其他人使用暴力或者反叛政府。但系传单嘅内容“根本冇呢类煽动性嘅成分，所以只系言论自由嘅表现，系合法嘅”。豪弟兄仲话：“我亲眼睇到耶和华点样促成呢场胜利。”d

¹⁶ 呢项裁决其实系上帝王国嘅一场辉煌胜利。当时，仲有122宗案件等紧审理，都系指控魁北克省嘅耶和华见证人煽动反对政府嘅，但系最高法院嘅裁决成为先例，将呢啲指控全部推翻。根据呢项裁决，加拿大同其他英联邦国家嘅公民有自由向政府表达任何意见。魁北克省嘅政教势力联手发动攻击，试图限制耶和华见证人嘅宗教自由，最终系失败嘅！e

非法商贩？抑或系上帝王国嘅热心传道员？

17．有啲政府试图用乜嘢手段限制我哋嘅传道工作？

¹⁷ 早期嘅基督徒冇“贩卖上帝嘅话语”，今日耶和华嘅仆人亦都唔会噉样做。（请读哥林多后书2:17）但系，有啲政府想通过商业法嚟限制我哋嘅传道活动。法庭曾经审理过一啲案件，判决表明究竟耶和华见证人系推销商品，抑或系推广真理。请睇吓其中两单案件。

18,19．丹麦政府点样试图限制传道工作？

¹⁸ 丹麦 1932年10月1日，一条禁止无牌售卖印刷品嘅法令开始实施。弟兄冇申请任何许可证。第二日，五个传道员喺首都哥本哈根以西30公里以外嘅罗斯基勒镇，做咗一日传道之后，其中一个传道员奥古斯特·莱曼唔见咗。原来佢俾警察拉咗，话佢无牌售卖商品。

¹⁹ 1932年12月19日，奥古斯特·莱曼出庭。佢承认自己上门推广圣经书刊，但系否认售卖商品。法庭接受佢嘅解释，指出：“被告有经济能力。佢冇从呢项活动取得任何经济利益，亦冇噉嘅打算，反而要承受经济损失。”法庭支持耶和华见证人，裁定奥古斯特嘅活动“唔属于商业活动”。反对上帝子民嘅人系都唔肯罢休，誓要喺全国压制我哋嘅传道工作。（诗篇94:20）检察官一直上诉到最高法院。我哋嘅弟兄点样做呢？

20．（甲）丹麦最高法院作出乜嘢裁决？（乙）弟兄姊妹有乜嘢反应？

²⁰ 最高法院开庭之前嘅嗰个星期，丹麦全国嘅耶和华见证人都增加咗传道活动。1933年10月3日星期二，最高法院作出裁决，维持原判，裁定奥古斯特冇违反法律。呢个意味住，耶和华见证人可以继续自由传道。弟兄姊妹非常感激耶和华帮佢哋打赢呢场官司，所以更加努力传讲好消息。由嗰阵时开始，丹麦嘅弟兄姊妹一直享有传道嘅自由，再冇受到政府干扰。

21,22．美国最高法院就默多克弟兄嘅案件作出乜嘢裁决？

²¹ 美国 1940年2月25日星期日，一位先驱罗伯特·默多克同另外七个耶和华见证人，喺宾夕法尼亚州匹兹堡附近嘅珍妮特市传道嘅时候被捕。由于佢哋冇申请推广书刊嘅许可证，所以被判有罪。弟兄向美国最高法院上诉，法院受理咗。

²² 1943年5月3日，最高法院裁定耶和华见证人胜诉。法院反对当局要求人申请许可证嘅规定，因为呢个规定等于话，人“要俾钱先至可以享有联邦宪法赋予嘅权利”。最高法院认为，珍妮特市呢条法令“限制咗出版自由同宗教自由”，所以裁定法令无效。法官威廉·道格拉斯代表大多数法官发言，指出耶和华见证人嘅活动“唔单止系传道，亦都唔单止系分发宗教刊物，而系两者嘅结合”。呢位法官仲话：“呢种宗教活动，同嗰啲去教堂做礼拜，同埋喺讲坛上讲道嘅活动，同样值得尊重”。

23．1943年喺法律上取得嘅胜利，点解对我哋咁重要？

²³ 呢项裁决系上帝嘅子民取得嘅一次重大胜利，证明我哋真正嘅身份系基督徒传道员，而唔系商贩。喺1943年历史性嘅呢一日，耶和华见证人喺最高法院嘅13件案件中就有12场胜诉，包括默多克案。之后，反对者一再试图阻止我哋喺公众场所同逐家逐户传讲王国嘅信息，呢啲案例有力噉维护我哋嘅权利。

“我哋必须接受上帝嘅统治，服从上帝而唔系服从人”

24．如果政府禁止传道工作，我哋会点样做？

²⁴ 如果政府保障我哋喺法律上嘅权利，令我哋可以自由噉传讲王国嘅信息，我哋当然会好感激。就算政府禁止传道工作，我哋都唔会停落嚟，而系会调整一下，用任何可行嘅方法继续传道。正如使徒话：“我哋必须接受上帝嘅统治，服从上帝而唔系服从人。”（使徒行传5:29；马太福音28:19,20）同时，我哋亦都会向法院上诉，希望政府撤销禁令。请睇吓两个例子。

25,26．（甲）尼加拉瓜最高法院受理咗一单同耶和华见证人有关嘅案件，请讲吓事情嘅来龙去脉。（乙）结果点样？

²⁵ 尼加拉瓜 1952年11月19日，担任分部仆人嘅特派传道员多诺万·明斯特曼，俾人传召到位于首都马那瓜嘅移民局，同局长阿诺尔多·加西亚见面。移民局局长对多诺万讲，尼加拉瓜嘅所有耶和华见证人都“唔可以再传教同宣传宗教活动”。多诺万问佢点解，佢话耶和华见证人冇向政府申请传道许可证，仲有人指控佢哋系共产主义者。噉系边个指控耶和华见证人呢？就系罗马天主教嘅教士。

²⁶ 多诺万即刻请求宗教部门同总统安纳斯塔西奥·索摩查·加西亚撤销禁令，不过完全冇用。所以，啲弟兄作出调整，暂时关闭王国聚会所，以小组嘅形式聚会，停止做街头见证，但系佢哋仍然继续向人传讲王国嘅信息。同时，佢哋向尼加拉瓜最高法院申诉，请求法院判禁令无效。报纸广泛报道政府实施嘅禁令同埋耶和华见证人提出申诉嘅新闻。最高法院受理咗呢单案。结果点呢？1953年6月19日，最高法院嘅法官一致裁定耶和华见证人胜诉。法院认为，禁令侵犯咗宪法赋予嘅言论自由、良心自由同信仰自由。法院亦都要求尼加拉瓜政府恢复翻对待耶和华见证人原来嘅方式。

27．（甲）点解尼加拉瓜人对法院嘅裁决非常惊讶？（乙）弟兄点睇呢场胜利呢？

²⁷ 法院判耶和华见证人胜诉，令好多尼加拉瓜人非常惊讶。喺呢件案件之前，法院会避免同教士发生冲突，因为教士嘅势力实在太大。另外，政府官员有权有势，法院判案嗰时，好少会违背官员嘅意愿。我哋嘅弟兄深信，可以取得胜利，全靠天上嘅君王保护佢哋，同埋因为佢哋冇停止过传道。（使徒行传1:8）

28,29．上世纪80年代中期，扎伊尔嘅耶和华见证人面对乜嘢转变？

²⁸ 扎伊尔 上世纪80年代中期，扎伊尔（而家叫做刚果民主共和国）大约有3万5000个耶和华见证人。当时，由于王国工作不断扩展，分部为咗应付需求，正喺度加建新设施。1985年12月，首都金沙萨举行咗一个国际大会，有3万2000个代表从世界各地嚟到，坐满晒成个会场。点都估唔到，一场转变好快就会发生喺耶和华嘅仆人身上嘞。究竟系乜嘢事呢？

²⁹ 马塞尔·菲图弟兄嚟自加拿大魁北克省，曾经喺杜普莱西斯政权下受过迫害。后来，佢被派到扎伊尔做特派传道员。佢讲翻当时嘅情况，话：“1986年3月12日，负责嘅弟兄收到一封信，信上声明扎伊尔嘅耶和华见证人系非法团体。”禁令由总统蒙博托签发。

30．（甲）分部委员会要作出乜嘢重要决定？（乙）佢哋决定点样做？

³⁰ 第二日，国家电台宣布：“我哋以后喺扎伊尔唔会再听到耶和华见证人呢个名嘞。”迫害浪潮随即涌嚟。王国聚会所俾人破坏，而弟兄姊妹就俾人抢劫、拘捕、监禁、拷打，连耶和华见证人啲细路都要坐监。1988年10月12日，政府充公咗组织嘅财物，民兵团霸占咗分部嘅物业。负责嘅弟兄向总统蒙博托申诉，不过得唔到回应。呢个时候，分部委员会要作出一个重要嘅决定：“我哋应该向最高法院上诉，定系再等吓先呢？”当时担任分部委员会协调人嘅特派传道员蒂莫西·霍姆斯回忆话：“我哋向耶和华寻求智慧同指引。”分部委员会向上帝祷告同埋仔细衡量利弊之后，认为仲未系时候采取法律行动。佢哋集中精力照顾弟兄姊妹，同埋谂吓有啲乜嘢方法，可以使传道工作继续落去。

31,32．（甲）扎伊尔最高法院作出乜嘢意想唔到嘅裁决？（乙）呢个裁决对我哋嘅弟兄有乜嘢影响？

³¹ 过咗几年之后，耶和华见证人面对嘅压力少咗好多，社会亦都越来越重视人权。分部委员会认为，系时候向扎伊尔最高法院上诉嘞。谂唔到法院肯受理。喺1993年1月8日，总统下达禁令将近7年之后，法院裁定政府对耶和华见证人采取嘅行动系唔合法嘅，禁令无效。试谂吓，啲法官竟然冒生命危险，将国家总统嘅决定推翻！霍姆斯弟兄话：“诉讼期间，我哋亲眼睇到耶和华点样扭转事态。”（但以理书2:21）呢场胜利强化咗弟兄姊妹嘅信心。佢哋睇出君王耶稣一直指引佢嘅子民，喺适当嘅时候采取适当嘅行动。

³² 禁令废除之后，分部办事处获得批准，可以俾特派传道员入境，亦可以兴建新嘅分部设施，同埋将圣经书刊运入嚟。f世界各地事奉上帝嘅人都好开心，因为睇出耶和华喺属灵方面的确保护紧佢嘅子民。（以赛亚书52:10）

“有耶和华帮助我”

33．我哋可以从呢一章提到嘅诉讼睇出乜嘢？

³³ 我哋可以从以上诉讼睇出，耶稣确实兑现咗承诺，佢讲过：“我一定赐口才同智慧俾你哋，使所有反对你哋嘅人加埋一齐都挡唔住，驳唔倒。”（请读路加福音21:12-15）事实表明，耶和华有时会通过好似迦玛列噉样嘅人嚟保护佢嘅现代子民，有时会推动一啲勇敢嘅法官同律师维护公义。耶和华的确令敌人嘅武器失去作用。（请读以赛亚书54:17）任何反对都阻止唔到上帝要成就嘅事。

34．我哋喺法律上取得嘅胜利点解咁值得留意？呢啲胜诉证明咗乜嘢？（另见附栏“喺高等法院取得嘅重大胜利促进传讲王国嘅工作”）

³⁴ 点解话我哋嘅连场胜诉系咁特别嘅呢？试谂吓，耶和华见证人唔系啲有权有势嘅人，佢哋唔参与政治选举，唔支持政治运动，亦都唔会同政治人物搞关系。而且，喺高等法院出庭嘅耶和华见证人当中，喺好多人眼中佢哋系啲“冇学问嘅普通人”。（使徒行传4:13）从人嘅角度嚟睇，法院同势力强大嘅宗教以及政治领袖作对，判我哋胜诉，一啲好处都冇。但系，法院偏偏一次又一次噉企喺我哋呢边。我哋赢咗咁多场胜利，证明我哋系“蒙上帝鉴察，靠住基督”得胜嘅。（哥林多后书2:17）我哋同使徒保罗深有同感，可以勇气十足噉讲：“有耶和华帮助我，我唔会惊。”（希伯来书13:6）

1,2．（甲）从古到今，乜嘢圣经原则一直指引住耶稣嘅门徒？（乙）敌人想迫我哋点做？（丙）佢哋有冇成功呢？请解释。

耶稣企喺管治犹太人嘅最高审判官彼拉多面前，讲出一个原则，呢个原则一直指引住真正跟从佢嘅人。耶稣话：“我嘅王国唔属于呢个世界。如果我嘅王国属于呢个世界，我嘅臣下就要战斗，等我唔致于被交俾犹太人。但系，我嘅王国实在唔系源于呢个世界嘅。”（约翰福音18:36）后来，彼拉多处决咗耶稣。不过，反对者嘅胜利系好短暂嘅，因为耶稣冇几耐就复活咗。强大嘅罗马帝国企图消灭基督嘅门徒，不过，都系白费心机嘅，因为基督徒已经将王国嘅信息传遍当时嘅天下。（歌罗西书1:23）

² 上帝嘅王国喺1914年建立之后，历史上一啲最有势力嘅军事强国妄图消灭上帝嘅子民，但系冇一个成功。好多政府同政治党派试图迫我哋支持佢哋，但系我哋冇屈服而分裂。今日，上帝嘅子民几乎遍布世界唔同嘅国家。不过，我哋依然团结合一，组成咗一个名副其实嘅国际弟兄团体，喺政治方面严守中立。我哋嘅团结有力噉表明，上帝嘅王国正喺度统治紧，亦都证明君王耶稣基督一直指引我哋，不断熬炼同埋保护我哋。等我哋怀住“唔属于世界”嘅决心，一齐睇吓耶稣喺现代点样指引、熬炼同保护我哋，同时回顾一下，耶稣帮我哋得到嘅一啲振奋人心嘅胜诉。（约翰福音17:14）

眼前重大嘅争论

3,4．（甲）上帝嘅王国诞生之后发生咗咩事？（乙）对于中立嘅问题，上帝嘅子民系咪一向都有清晰嘅了解呢？请解释。

³ 上帝嘅王国诞生之后，天上跟住就爆发咗一场战争，撒但被掟到地上。（请读启示录12:7-10,12）地上亦都爆发咗战争，呢场战争考验到上帝嘅子民保持中立嘅决心，但系佢哋下定决心要跟从耶稣嘅榜样唔属于世界。不过最初，佢哋唔系好清楚应该点样做，先至系唔属于世界。

⁴ 例如，1904年出版嘅第六卷《千禧年黎明》a鼓励基督徒避免参战，但系如果一个基督徒被征召入伍，就应该尽力申请做一啲非战斗性嘅工作。如果佢申请唔成功，俾人派去打仗，都唔可以杀人。英国嘅赫伯特·西尼尔喺1905年受浸，佢讲起嗰时嘅情况话：“当时啲弟兄唔系好清楚，一个基督徒当兵，净系做非战斗性嘅工作，究竟啱唔啱呢？”

5．关于当兵嘅问题，《守望台》1915年9月1日刊（英语）点样解释？

⁵ 关于基督徒当兵，《守望台》1915年9月1日刊（英语）进一步解释咗呢个问题。就《圣经嘅研讨》提出嘅建议，呢期《守望台》指出：“基督徒当兵，就算净系做非战斗性嘅工作，噉唔算妥协咩？呢一点值得探讨。”但系，如果基督徒唔着军装，唔服兵役，就会被枪毙，佢应该点做呢？文章话：“我哋可以选择向人表明自己忠于和平嘅君王耶稣，拒绝违反佢嘅命令，亦都可以选择效忠世上嘅君主，支持佢哋，等人以为我哋离弃咗天上君王嘅教诲。其实两者嘅结果都可能系死于枪下。噉我哋宁愿选择前者，选择为忠于天上嘅君王而死。”虽然呢番话讲得好有力，但文章最后嘅结论系：“我哋只系提出建议，而唔系夹硬要人噉样做。”

6．你从赫伯特·西尼尔嘅例子学到乜嘢？

⁶ 有啲弟兄了解到应该采取咩立场，佢哋决定点都唔服兵役。前面提过嘅赫伯特·西尼尔话：“我认为，将弹药喺船上搬落嚟［非战斗性嘅工作］同上子弹冇咩分别。”（路加福音16:10）赫伯特因为良心拒绝服兵役，结果要坐监。佢同另外四个弟兄一齐韫咗喺英国嘅里士满监狱，嗰度一共有16个依良心拒服兵役嘅人，包括其他教派嘅信徒。呢啲人后来被称为“里士满十六杰”。赫伯特同其他拒绝服兵役嘅人俾人秘密送到法国前线，喺嗰度被判枪决。当佢哋排成一排准备牺牲嗰阵，行刑队冇开枪，军方仲下令将佢哋嘅刑罚减为10年有期徒刑。

7．二战爆发嗰时，上帝嘅子民已经清楚了解到乜嘢呢？

⁷ 第二次世界大战爆发嗰时，耶和华嘅子民已经清楚保持中立意味住乜嘢，同埋效法耶稣嘅榜样就应该点样做。（马太福音26:51-53；约翰福音17:14-16；彼得前书2:21）例如，1939年11月1日刊嘅《守望台》（英语）刊登咗一篇重要嘅文章，题为《中立》。文章指出：“今日，同耶和华立约嘅子民必须遵守一项规定，就系喺各国嘅战争当中严守中立。”西蒙·克拉克后来喺纽约布鲁克林总部服务，佢提到呢篇文章话：“我睇出，上帝嘅子民应该要同所有人和平共处，即使战争期间都唔例外。”呢篇文章真系好合时，帮助上帝嘅子民做好准备，面对前所未有嘅攻击嗰阵，都能够忠于上帝嘅王国。

反对嘅“河水”涌埋嚟

8,9．使徒约翰嘅预言点样应验？

⁸ 使徒约翰预告，上帝嘅王国喺1914年诞生之后，大龙魔鬼撒但会从口里吐出水嚟，好似洪水咁猛，企图消灭所有拥护上帝王国嘅人。b（请读启示录12:9,15）约翰嘅预言点样应验呢？由上世纪20年代开始，反对好似浪潮噉向上帝嘅子民涌埋嚟。第二次世界大战期间，克拉克弟兄同好多北美洲嘅弟兄一样，因为忠于上帝嘅王国而坐监。喺战争期间，因为信仰拒绝参战俾人韫喺美国联邦监狱嘅人当中，有超过三分之二系耶和华见证人。

⁹ 无论上帝王国嘅子民住喺边个国家，魔鬼同埋佢啲爪牙都谂尽办法迫佢哋舍弃忠义。无论喺非洲、欧洲定系美国，都有弟兄被告上法庭，或者俾人带到去假释裁决委员会。由于坚决保持中立，佢哋俾人捉去坐监、俾人打，或者虐待到残废。喺德国，上帝嘅子民唔肯嗌“救星希特勒万岁”，亦都拒绝参战，所以面对极大嘅压力。喺纳粹时代，估计有6000个耶和华见证人俾人韫喺集中营，超过1600个德裔同非德裔嘅耶和华见证人被虐待致死。即使系噉，魔鬼绝对冇可能对上帝嘅子民造成永久嘅伤害。（马可福音8:34,35）

“地”将“河水”吞咗

10．（甲）“地”象征乜嘢？（乙）“地”点样帮助上帝嘅子民？

¹⁰ 使徒约翰嘅预言透露，“地”会帮助上帝嘅子民，将反对嘅“河水”吞咗。“地”象征世上比较明白事理又有权势嘅人或者团体。预言点样应验呢？二战结束之后嘅几十年期间，好多时“地”会采取行动，保护忠于弥赛亚王国嘅人。（请读启示录12:16） 例如，有啲好有影响力嘅法院维护咗耶和华见证人嘅权利，容许佢哋唔服兵役，同埋唔参加国家主义有关嘅活动。关于拒绝服兵役，等我哋嚟睇吓耶和华点样帮助佢嘅子民，喺法律上得到嘅一啲重大胜利。（诗篇68:20）

11,12．（甲）西库雷拉弟兄同斯利门诺斯弟兄，要面对乜嘢考验？（乙）结果点样？

¹¹ 美国 安东尼·西库雷拉有5个兄弟姐妹，父母系耶和华见证人。佢15岁受浸，21岁嗰阵向征兵局登记自己系神职人员。两年之后，即系1950年，佢申请将登记嘅身份改为依良心拒服兵役嘅人。虽然美国联邦调查局嘅报告入面冇任何负面嘅资料，但系司法部唔接受佢重新登记嘅身份。经过一连串诉讼之后，美国最高法院受理咗西库雷拉弟兄嘅案件，而且推翻下级法院嘅裁决，判西库雷拉弟兄胜诉。呢项裁决成咗先例，使美国其他公民可以依良心拒服兵役。

¹² 希腊 1983年，雅科沃斯·斯利门诺斯因为拒绝着军装，被判违抗命令而坐监。佢获释后，申请会计师证嘅时候俾人拒绝，理由系佢有案底。佢向希腊法院申诉，但系一直败诉，于是佢上诉到欧洲人权法院。2000年，由17位法官组成嘅欧洲人权法院大法庭裁定雅科沃斯胜诉，呢单案成咗反歧视案嘅先例。之前，希腊有超过3500个弟兄因为保持中立而坐过监，留有案底。裁决作出之后，希腊通过一条法令，撤销咗对呢啲弟兄嘅刑事起诉。另外，裁决作出前几年已经通过一条法令，就系批准所有希腊公民可以选择做社会服务代替服兵役。后来希腊修改宪法，使呢条法令再次得到确立。

13,14．你从斯蒂芬诺同巴亚特扬嘅案件学到乜嘢？

¹³ 保加利亚 1994年，19岁嘅伊瓦伊洛·斯蒂芬诺被征召入伍。佢拒绝参军，亦拒绝从事军队入面嘅非战斗性工作，结果被判入狱18个月。佢向法院上诉，理由系自己有权依良心拒服兵役。结果，欧洲人权法院受理咗呢单案。2001年，欧洲人权法院开庭之前，保加利亚政府向伊瓦伊洛·斯蒂芬诺提出和解。政府撤销对伊瓦伊洛·斯蒂芬诺嘅指控，仲容许所有保加利亚公民，选择做社会服务代替服兵役。c

¹⁴ 亚美尼亚 2001年，瓦汉·巴亚特扬到咗服兵役嘅法定年龄。d佢依良心拒服兵役，结果被判入狱两年半。佢向亚美尼亚法院上诉，但系次次都失败。2002年9月，佢开始喺监狱服刑，不过10个半月之后就获释。喺服刑期间，佢向欧洲人权法院上诉，法院受理咗呢单案。但系，喺2009年10月27日，法院判佢败诉。睇嚟呢项裁决对国内面对同样情况嘅弟兄，系一个沉重嘅打击。不过，欧洲人权法院大法庭重审呢单案。2011年7月7日，大法庭判瓦汉·巴亚特扬胜诉。呢次系欧洲人权法院首次承认，基于宗教理由依良心拒服兵役嘅人享有思想、良心同宗教嘅自由，呢种权利应该受到保障。呢项裁决唔单止维护咗耶和华见证人嘅权利，亦都维护咗欧洲委员会成员国数以亿万计人民嘅人权。e

同国家主义有关嘅仪式

15．点解耶和华嘅子民唔参加任何同国家主义有关嘅仪式呢？

¹⁵ 耶和华嘅子民忠于弥赛亚王国，所以拒绝服兵役，亦都会用尊重嘅态度向人表明，我哋唔参加任何同国家主义有关嘅仪式。二战爆发之后，国家主义嘅浪潮席卷全球。好多国家都要求人民宣誓、唱国歌、向国旗敬礼，表示效忠祖国。无论如何，我哋都要专一爱戴耶和华。（出埃及记20:4,5）结果，迫害好似洪水噉向我哋涌埋嚟。但系，耶和华再次用“地”将一啲反对嘅“河水”吞咗。请睇吓耶和华通过耶稣帮助我哋喺法律上得到嘅几场重大胜利。（诗篇3:8）

16,17．（甲）莉莲同威廉面对乜嘢难题？（乙）你从佢哋嘅例子学到乜嘢？

¹⁶ 美国 1940年，关于迈纳斯维尔学区诉戈比蒂斯案，美国最高法院作出裁决，以8票对1票判耶和华见证人败诉。12岁嘅莉莲·戈比塔斯f同10岁嘅弟弟威廉为咗忠于耶和华上帝，唔肯向国旗敬礼或者宣誓效忠祖国，结果俾学校开除。呢单案件上诉到美国最高法院，法院认定学校嘅做法符合宪法，有助于“国家统一”。呢项裁决引发一场迫害嘅大风暴。耶和华见证人儿童接二连三噉俾学校开除，好多耶和华见证人都俾老板炒咗，有啲仲俾暴民袭击。《国家之荣》（英语）一书指出：“由1941年到1943年，耶和华见证人喺美国受到嘅迫害，系20世纪以来最猛烈嘅宗教迫害。”

¹⁷ 上帝嘅仇敌得到嘅胜利只系好短暂嘅。1943年，最高法院受理咗另一单同戈比蒂斯案类似嘅案件，就系西弗吉尼亚州教育局诉巴尼特案。呢次最高法院判耶和华见证人胜诉。喺美国嘅历史上，最高法院首次喺咁短时间内改变态度。呢项裁决作出之后，美国公开迫害耶和华见证人嘅行为明显减少。而且美国所有公民嘅人权，都进一步得到保障。

18,19．（甲）点解巴勃罗·巴罗斯能够紧守忠义呢？（乙）事奉耶和华嘅人可以点样效法佢嘅榜样？

¹⁸ 阿根廷 1976年，8岁嘅巴勃罗·巴罗斯同7岁嘅胡戈·巴罗斯唔肯参加升旗仪式，俾学校开除。开除之前，女校长大力噉推巴勃罗，又打佢个头，仲罚巴勃罗同埋胡戈放学之后留堂一个钟，想迫佢哋两兄弟参加升旗仪式。巴勃罗谂翻起嗰次经历，话：“如果唔系耶和华帮我，喺咁大压力下，我根本冇可能紧守忠义。”

¹⁹ 喺法庭上，法官支持校方开除巴勃罗同胡戈。案件上诉到阿根廷最高法院。1979年，最高法院推翻下级法院嘅裁决，指出：“根据宪法，人民有学习权（第14条），国家有责任向人民提供小学程度嘅教育（第5条）。校方施行嘅惩罚［开除学籍］同宪法有抵触。”呢次胜诉令大约1000个耶和华见证人儿童受益。学校唔再开除耶和华见证人儿童，有啲就恢复学籍，好似巴勃罗同胡戈噉，可以返翻学校。

20,21．罗埃尔同爱米莉嘅案件点样强化你嘅信心？

²⁰ 菲律宾 1990年，9岁嘅罗埃尔·恩布拉伦格g同10岁嘅姐姐爱米莉，仲有超过65个耶和华见证人儿童，因为唔肯向国旗敬礼而俾学校开除。佢哋嘅爸爸莱昂纳多尝试同校方解释，不过冇用。情况越来越差，于是莱昂纳多向最高法院上诉。但系，莱昂纳多冇钱请律师，成家人就向耶和华热切祷告，寻求佢嘅指引。喺嗰段日子，两个细路一直俾人嘲笑。莱昂纳多冇咩法律知识，所以佢觉得系冇可能打赢呢场官司嘅。

²¹ 后来，事情有转机，费利诺·加纳尔愿意代表呢家人出庭，佢曾经喺国内数一数二嘅律师事务所做律师。接呢单案件嗰时，加纳尔已经成为耶和华见证人，亦都冇喺以前间律师事务所度做。最高法院嘅法官一致裁定耶和华见证人胜诉，宣布学校下达嘅退学令无效。再一次，嗰啲试图迫上帝子民舍弃忠义嘅人又失败喇。

因中立而团结

22,23．（甲）点解我哋能够打赢咁多场重要嘅官司呢？（乙）我哋嘅国际弟兄团体可以团结和谐，证明咗乜嘢？

²² 点解耶和华嘅子民能够赢到咁多场重要嘅官司呢？我哋一嚟冇政治嘅影响力，二嚟又要面对势力强大嘅反对者发动嘅猛烈攻击，不过喺一个又一个国家，一个又一个法庭，都有正义感嘅法官挺身保护我哋，佢哋作出嘅裁决成为宪法嘅先例。毫无疑问，基督一直做我哋嘅后盾，帮助我哋获得胜利。（请读启示录6:2）点解我哋要打呢啲官司呢？我哋唔系为咗司法改革，而系为咗可以唔受阻碍，继续为君王耶稣基督服务。（使徒行传4:29）

²³ 政治斗争搞到成个世界都四分五裂，根深蒂固嘅仇恨扭曲咗成个人类社会。但系，君王耶稣基督一直赐福俾我哋，帮助我哋严守中立。虽然撒但千方百计要分裂我哋，使我哋屈服，但系就一败涂地。上帝嘅王国已经将几百万爱好和平嘅人召集起嚟，佢哋都“唔再学习战事”。世上竟然有一个咁团结和谐嘅国际弟兄团体，真系一个奇迹，呢个确实证明上帝嘅王国统治嘞！（以赛亚书2:4）

1,2．（甲）点样证明你系王国嘅公民？（乙）点解耶和华见证人有时一定要采取行动，争取宗教自由呢？

你系咪上帝王国嘅公民呢？既然你系耶和华见证人，当然就系上帝王国嘅公民啦。噉点样证明呢？唔系凭护照，亦都唔系凭政府签发嘅其他文件，而系在于你点样崇拜耶和华上帝。正确嘅崇拜唔单止牵涉到你信乜嘢，仲牵涉到你有冇服从上帝王国嘅律法。对我哋每个人嚟讲，崇拜上帝涉及到生活嘅每个方面，包括点样照顾家人，同埋点样处理某啲医疗问题。

² 我哋最珍视上帝王国公民嘅身份，亦都决心遵守王国嘅律法。但系，周围嘅人唔一定尊重我哋嘅选择。有啲政府试图限制，甚至完全禁止我哋嘅崇拜活动。弥赛亚君王嘅子民为咗服从君王嘅律法，有时一定要采取行动，争取自由。噉样一啲都唔出奇，因为圣经记载，古代耶和华嘅子民亦都经常要争取崇拜耶和华嘅自由。

3．喺以斯帖王后嘅日子，上帝嘅子民曾经捍卫乜嘢权利？

³ 例如，喺以斯帖王后嘅日子，上帝嘅子民曾经要捍卫生存嘅权利。点解呢？因为邪恶嘅宰相哈曼喺波斯王亚哈随鲁面前，中伤境内嘅犹太人，话佢哋嘅“法律同其他民族嘅法律唔一样”，所以要将佢哋全部消灭。（以斯帖记3:8,9,13）耶和华有冇离弃佢嘅仆人呢？冇。以斯帖同末底改向波斯王申诉，结果耶和华保护咗佢嘅子民。（以斯帖记9:20-22）

4．呢一章会讨论乜嘢？

⁴ 今日又点样呢？我哋喺前一章睇过，有啲政权曾经反对耶和华见证人。呢一章会讲吓呢啲政权试图用乜嘢手段限制我哋嘅崇拜活动。我哋会集中讨论三个方面：（一）作为合法组织，以我哋选择嘅方式崇拜上帝嘅权利；（二）根据圣经原则选择医疗方法嘅权利；（三）父母按照耶和华嘅标准教养仔女嘅权利。我哋会逐一分析，睇吓弥赛亚王国嘅忠贞子民点样鼓起勇气，奋力维护宝贵嘅王国公民身份，仲有上帝点样赐福俾佢哋。

争取法律认可同基本自由

5．真基督徒获得法律认可，有咩益处？

⁵ 我哋系咪需要得到世上政府嘅认可，先至可以崇拜耶和华呢？唔需要。但系，如果我哋获得法律认可，就可以更加顺利噉从事崇拜活动，唔使受干预，例如可以喺自己嘅王国聚会所同大会堂自由举行集会，可以印制圣经书刊或者将书刊运送入境，仲可以公开向人传讲好消息。喺好多国家，耶和华见证人都注册成为合法组织，同其他受法律认可嘅宗教组织一样，享有崇拜自由。不过，有啲政府曾经拒绝俾我哋获得法律上嘅认可，或者限制我哋嘅基本自由。请睇吓一啲事例。

6．上世纪40年代初，澳大利亚嘅耶和华见证人面对乜嘢考验？

⁶ 澳大利亚 上世纪40年代初期，澳大利亚总督认定我哋嘅信仰“妨害”国家嘅军事行动，于是下达禁令。耶和华见证人唔可以再公开集会同传道，伯特利嘅设施被关闭，王国聚会所被充公，就算只系拥有见证人出版嘅圣经书刊都算违法。有几年时间，当地嘅耶和华见证人只能秘密活动。1943年6月14日，澳大利亚高等法院宣判禁令无效。弟兄姊妹终于松咗一口气。

7,8．请讲吓俄罗斯嘅弟兄咁多年嚟点样争取崇拜自由。

⁷ 俄罗斯 耶和华见证人喺共产政权嘅禁制之下活动咗几十年，终于喺1991年注册成为合法组织。前苏联瓦解之后，我哋喺1992年获得俄罗斯联邦嘅法律认可。过咗冇几耐，反对者见我哋嘅人数快速增长，感觉受到威胁，特别系嗰啲同俄罗斯东正教会有瓜葛嘅人。1995至1998年间，佢哋对耶和华见证人提出5宗刑事诉讼，每次检察官都揾唔到任何罪证。反对者唔甘心，喺1998年提出民事诉讼。一开始，耶和华见证人打赢咗官司，但系反对者唔服，就向法院上诉。2001年5月，耶和华见证人败诉。同年10月，法院开始重审呢单案，2004年作出裁决，宣布取缔耶和华见证人喺莫斯科注册嘅法人团体，禁止我哋嘅活动。

⁸ 迫害浪潮随之而嚟。（请读提摩太后书3:12）耶和华见证人俾人骚扰同袭击。政府没收我哋嘅宗教刊物，严格限制我哋租用或者兴建崇拜场所。你可唔可以想象到，弟兄姊妹喺咁艰难嘅情况下，有咩感受呢？2001年，耶和华见证人向欧洲人权法院上诉，2004年向法院提交咗更多资料。2010年，欧洲人权法院作出裁决。法院清楚睇出，俄罗斯对耶和华见证人下达禁令，系因为宗教偏见。法院指出，冇证据表明耶和华见证人有唔正当嘅行为，所以冇理由维持俄罗斯法院嘅原判。欧洲人权法院进一步指出，禁令嘅目的系为咗剥夺耶和华见证人嘅合法权利。法院嘅裁决维护咗耶和华见证人享有宗教自由嘅权利。虽然俄罗斯有啲政府机关冇执行欧洲人权法院嘅裁决，但系呢次胜诉就大大激励咗当地上帝嘅子民，令佢哋继续勇往直前。

9-11．（甲）喺希腊，耶和华嘅子民曾经点样争取聚集起嚟崇拜上帝嘅自由？（乙）结果点样？

⁹ 希腊 1983年，蒂托斯·马努萨基斯喺克里特嘅伊拉克利翁租咗一间房，用嚟俾一小群耶和华见证人举行聚会。（希伯来书10:24,25）冇几耐，东正教教士向警察控告耶和华见证人，反对佢哋用嗰个地方嚟从事崇拜活动。理由系咩呢？理由只系耶和华见证人嘅信仰同东正教唔一样！司法机构对蒂托斯·马努萨基斯同另外三个当地嘅耶和华见证人提起刑事诉讼。佢哋被判罚款同埋入狱两个月。作为上帝王国嘅忠贞子民，佢哋认为法院嘅裁决侵犯咗佢哋嘅崇拜自由。所以佢哋向法院上诉，最后上诉到欧洲人权法院。

¹⁰ 1996年，欧洲人权法院作出一项判决，令反对正确宗教嘅人觉得好意外。法院表示，“耶和华见证人属于希腊法律之下‘国家承认嘅宗教’”，希腊法院嘅裁决“直接影响申诉人嘅宗教自由”。欧洲人权法院进一步指出，希腊政府冇权“决定某种宗教信仰或者表达信仰嘅方式系咪合法”。呢项裁决撤销咗对耶和华见证人嘅刑罚，维护咗我哋嘅宗教自由。

¹¹ 喺希腊，耶和华见证人嘅活动系咪之后就冇受干扰呢？唔系嘅。希腊嘅卡桑德里亚有一单类似嘅案件，经过将近12年嘅诉讼，案件终于喺2012年结案。事件涉及一个东正教嘅主教，佢一手策划一场反对耶和华见证人嘅行动。希腊嘅最高行政机关国家委员会作出对上帝子民有利嘅裁决，平息咗呢件事。呢项裁决再次表明希腊嘅宪法保障宗教自由。反对者三番四次指控耶和华见证人唔系国家承认嘅宗教，裁决将呢啲指控推翻。国家委员会指出：“耶和华见证人冇隐藏佢哋嘅教义，所以佢哋系国家承认嘅宗教。”卡桑德里亚嘅一小群会众，知道佢哋以后可以喺自己嘅王国聚会所里面自由举行聚会，觉得好开心。

12,13．（甲）喺法国，反对者点样“以法令谋害”上帝嘅子民？（乙）结果点样？

¹² 法国 有啲反对者“以法令谋害”上帝嘅子民。（请读诗篇94:20）例如，上世纪90年代中，法国税务局开始查核耶和华见证人协会嘅账目。耶和华见证人协会系耶和华见证人喺法国运用嘅法人团体之一。预算部长透露查账嘅真正目的，话：“呢次查账可以导致法定清算或者刑事起诉……好可能影响耶和华见证人协会嘅运作，或者迫呢个协会喺我哋境内停止活动。”虽然查账结果显示我哋冇违法，但系税务局仲系向我哋征收巨额税款。如果要交呢笔税，弟兄就要关闭分部办事处，仲要将啲物业变卖，先至可以交得起咁重嘅税。呢个简直就系一个沉重嘅打击，但系上帝嘅子民冇放弃。耶和华见证人尽力对咁唔公平嘅待遇提出抗议，最后喺2005年上诉到欧洲人权法院。

¹³ 法院喺2011年6月30日作出裁决，指出人民享有宗教自由嘅权利，除非喺极端情况下，唔应该由国家评估某个宗教信仰同表达信仰嘅方式系咪可以接受。法院亦指出：“征税会令耶和华见证人协会失去重要嘅资金来源，导致呢个协会喺各方面嘅运作受到严重影响，冇办法确保信徒自由从事崇拜活动。”法官一致裁定耶和华见证人胜诉。法国政府最终将征收咗嘅税款，连本带利俾翻耶和华见证人协会，仲按法院要求解封扣押嘅分部财产。耶和华嘅子民真系好开心啊！

14．喺争取崇拜自由方面，你可以点样出一分力？

¹⁴ 好似古代嘅以斯帖同末底改一样，为咗按照耶和华嘅吩咐崇拜佢，今日耶和华嘅子民都要争取崇拜自由。（以斯帖记4:13-16）你可以点样出一分力呢？你可以经常为嗰啲喺法律上受到唔公平对待嘅弟兄姊妹祷告。噉样嘅祷告好有效，能够帮助佢哋面对逆境同迫害。（请读雅各书5:16）耶和华会唔会回应我哋嘅祷告呢？我哋喺法律上获得嘅胜诉表明，佢一定会回应！（希伯来书13:18,19）

根据信仰选择疗法嘅自由

15．关于血嘅用途，上帝嘅子民会考虑乜嘢？

¹⁵ 今日，滥用血嘅情况非常普遍。正如本书第11章提过，上帝王国嘅公民从圣经得到清晰嘅指引，必须避免滥用血。（创世记9:5,6；利未记17:11；请读使徒行传15:28,29）虽然我哋唔接受输血，但系我哋都希望自己同家人喺可行嘅范围内得到最好嘅治疗，最重要嘅系疗法唔违反上帝嘅律法。好多国家嘅高等法院，都承认人民有权按照良心同信仰去选择接唔接受某啲疗法。不过，喺一啲国家，上帝嘅子民喺医疗问题上要面对好大嘅考验。等我哋嚟睇吓一啲例子。

16,17．（甲）一个日本姊妹接受治疗嗰时发生咩事，令佢好震惊呢？（乙）上帝点样回应佢嘅祷告？

¹⁶ 日本 武田美佐江63岁，系个家庭主妇，要做大手术。作为上帝王国嘅忠贞子民，佢向医生清楚讲明自己唔接受输血疗法。但系，过咗几个月之后，佢发现自己喺手术过程中俾人输咗血，非常震惊。佢觉得自己俾人侵犯同欺骗，于是喺1993年6月向法院控告医生同医院。朴实嘅武田姊妹讲嘢好斯文，但系佢嘅信心就好坚定。虽然佢身体好虚弱，不过喺坐满晒人嘅法庭上，佢企喺证人席嗰度足足个几钟，勇敢作证。佢直到去世前一个月，仲坚持出庭。我哋系咪好赏识佢嘅勇气同信心呢？武田姊妹话，佢经常祈求耶和华赐福俾佢，帮佢打赢官司。佢坚信耶和华一定会听佢嘅祷告。噉上帝有冇听呢？

¹⁷ 武田姊妹去世三年之后，2000年2月29日，日本最高法院判佢胜诉。法院承认，武田姊妹表明咗唔接受输血，违背佢嘅意愿帮佢输血，系错嘅。法院喺裁决嗰阵指出，病人“喺呢种情况下嘅自决权属于个人权利，必须受到尊重”。武田姊妹为咗唔违背自己受过圣经熏陶嘅良心，坚决争取选择疗法嘅自由。所以，而家日本嘅耶和华见证人接受治疗嗰阵，唔使再担心俾人迫佢哋输血嘞。

18-20．（甲）阿根廷法院点样表明，人有权通过医疗指示卡表明自己唔接受输血？（乙）我哋可以点样表明自己顺从基督嘅统治，唔滥用血？

¹⁸ 阿根廷 上帝王国嘅公民可以点样做好准备，万一自己失去知觉，都可以确保疗法会符合自己嘅意愿？我哋可以随身带一份法律文件，表明自己嘅意愿。巴勃罗·阿尔瓦拉辛尼就有噉样做，佢喺2012年5月嘅一宗抢劫案身中多枪，被送入医院嗰时已经不省人事，冇办法表明自己唔输血嘅立场。不过，佢身上有一份有效嘅医疗指示卡，系喺四年几前签咗名嘅。佢嘅情况好危急，虽然有啲医生认为一定要帮佢输血，先至可以保住生命，但系医护人员最终都系决定尊重佢嘅意愿。不过，巴勃罗嘅爸爸唔系耶和华见证人，佢得到法院嘅颁令，使医院唔需要理会巴勃罗嘅意愿。

¹⁹ 巴勃罗嘅太太即刻请律师提出上诉。唔使几个钟，上诉法院就撤销下级法院嘅命令，裁定病人喺医疗指示卡上表达嘅意愿应该受到尊重。巴勃罗嘅爸爸向阿根廷最高法院上诉。但系，最高法院表示，“［巴勃罗喺医疗指示卡上注明唔接受输血嘅意愿］系出于理智，同埋喺自愿嘅情况下表达嘅个人意愿。呢一点系无可否认嘅”。法院指出：“每个有自决能力嘅成年人都可以预先写好医疗指示，表明自己接唔接受某啲疗法。……负责嘅医生一定要按照病人嘅意愿去做。”

²⁰ 巴勃罗而家已经完全康复，佢好庆幸自己预先填写咗医疗指示，佢太太亦都好开心。呢个举动好简单，但系好重要，表明佢顺从基督喺上帝王国施行嘅统治。你同家人有冇预先噉样做呢？

21-24．（甲）关于未成年人输血问题，加拿大最高法院作出乜嘢意义重大嘅裁决？（乙）呢单案点样鼓励到事奉耶和华嘅年轻人？

²¹ 加拿大 一般情况下，法院承认父母有权决定咩疗法对仔女嚟讲先至最好。有时，法院甚至会判定一个心智成熟嘅未成年人所作嘅医疗决定，应该受到尊重。阿普丽尔·卡多雷就系一个例子。佢14岁嗰时因为严重内出血入院。几个月之前，佢已经填好《预先签署的医疗指示》卡，注明自己唔接受输血，喺紧急情况下亦都唔例外。主治医生无视阿普丽尔嘅明确意愿，请法院颁令，批准医生可以帮佢输血。医生夹硬帮佢输咗血。阿普丽尔后来话自己就好似俾人强奸咗噉。

²² 于是，阿普丽尔同父母向法院起诉，希望可以攞翻个公道。两年之后，案件上诉到加拿大最高法院。阿普丽尔声明现存嘅有关法例，侵犯咗佢嘅权利，不过最高法院裁定嗰条法例合乎宪法。虽然噉样，法院对佢作出有利嘅裁决，判佢获赔诉讼费，佢同其他心智成熟嘅未成年人，亦都有权决定自己接受乜嘢疗法。法院指出：“喺医疗方面，未满16岁嘅人亦都应该获准就某个医疗作决定，表明自己心智成熟，能够独立思考。”

²³ 呢单案件意义重大，因为最高法院肯定咗心智成熟嘅未成年人，都有宪法上嘅权利。裁决之前，只要加拿大法院认为某种疗法对病人系最好嘅，就可以授权医院对未满16岁嘅人采用呢种疗法。裁决之后，未满16岁嘅人，如果法院冇俾机会佢哋表明自己系心智成熟，可以自己做决定嘅话，就唔可以授权医院采用任何违反病人意愿嘅疗法。

²⁴ 三年咁长嘅诉讼值唔值得呢？阿普丽尔话：“当然值得！”佢而家系个正规先驱，健康良好。佢话：“知道自己可以出一分力，为上帝嘅名增光，证明撒但讲大话，我真系好开心啊！”我哋从阿普丽尔嘅经历睇出，年轻人都可以勇敢坚守立场，证明自己的确系上帝王国嘅公民。（马太福音21:16）

按照耶和华嘅标准教养仔女嘅权利

25,26．夫妻离婚可能导致乜嘢情况出现？

²⁵ 耶和华将一个重要嘅责任交俾父母，就系要父母按照上帝嘅标准教养仔女。（申命记6:6-8；以弗所书6:4）要负起呢个责任唔容易，如果夫妻离婚，就更加唔容易嘞。对于点样教养仔女，父母双方嘅睇法可能有好大差异。例如，系见证人嗰一方认为一定要按照圣经嘅标准教养仔女，唔系见证人嗰一方就可能唔同意。当然，离婚会导致夫妻关系终止，但系亲子关系就冇断绝，系见证人嗰一方应该承认呢点，同埋喺仔女嘅问题上要尊重前夫或者前妻。

²⁶ 唔系见证人嗰一方可能向法院申请仔女嘅抚养权，为咗可以控制仔女所接受嘅信仰教育。有啲人喺庭上话，教导仔女成为耶和华见证人，会害咗佢。佢哋或者会话，耶和华见证人会剥夺仔女庆祝生日同其他节日嘅机会。佢哋亦可能声称，喺紧急情况下本来输血“可以救命”，但系耶和华见证人父母就唔俾仔女输血。值得高兴嘅系，大多数法院裁决嗰时，都会考虑乜嘢对小朋友系最好嘅，而唔系判断父母嘅宗教系咪有害嘅。等我哋嚟睇吓一啲例子。

27,28．一个爸爸声称，按照耶和华见证人嘅方式教养儿女系有害嘅。俄亥俄州最高法院点样驳倒呢项指控？

²⁷ 美国 1992年，俄亥俄州最高法院审理咗一单案，案件中嘅爸爸唔系耶和华见证人，佢声称如果按照耶和华见证人嘅方式教养佢个仔博比，会害咗个仔。下级法院将仔女嘅抚养权判咗俾爸爸，妈妈珍妮弗·帕泰净系有探视权。法院唔俾妈妈“用任何方式教导个仔耶和华见证人嘅信仰，或者安排佢个仔接触耶和华见证人嘅信仰”。呢条命令太苛刻，意思即系，珍妮弗连同个仔讲圣经同其中嘅道德标准都唔得！你觉得珍妮弗有咩感受呢？佢大受打击，非常伤心。但系，佢睇出要耐心等耶和华采取行动。佢话：“耶和华时刻都喺我身边。”喺耶和华组织嘅帮助下，佢嘅代表律师将案件上诉到俄亥俄州最高法院。

²⁸ 最高法院唔同意下级法院嘅裁决，指出“父母有教育仔女嘅基本权利，包括将自己嘅信仰同道德标准灌输俾仔女”。最高法院仲指出，除非证据显示耶和华见证人嘅信仰会损害仔女嘅身心，唔系嘅话，法院无权因为宗教理由剥夺父母任何一方对仔女嘅抚养权。最高法院睇唔出有任何证据表明，耶和华见证人嘅信仰对仔女嘅身心有不良影响。

29-31．（甲）点解一个丹麦姊妹起初得唔到个女嘅抚养权？（乙）丹麦最高法院作出乜嘢裁决？

²⁹ 丹麦 安妮塔·汉森姊妹面对类似嘅问题。佢前夫向法院起诉，要争取七岁嘅女阿曼达嘅抚养权。地区法院喺2000年将抚养权判俾安妮塔，佢前夫于是向高等法院上诉。高等法院推翻原判，将抚养权判俾安妮塔嘅前夫。法院提出嘅理由系，父母双方嘅信仰唔同，人生观都好唔同，由爸爸嚟处理呢啲分歧会更加好。事实上，安妮塔得唔到仔女嘅抚养权，就系因为佢系个耶和华见证人。

³⁰ 喺呢段艰难嘅日子，安妮塔有时觉得个心好烦，连祷告都唔知应该讲乜嘢。佢话：“不过，罗马书8:26，27嘅话俾咗我好大安慰。我感受到耶和华总系明白我嘅意思。佢一直关注我，同埋会随时帮我。”（请读诗篇32:8；以赛亚书41:10）

³¹ 安妮塔向丹麦最高法院上诉。法院裁决嗰时表明：“关于抚养权应该判俾边一方，应该考虑乜嘢对仔女最有益”。法院亦都指出，关于抚养权嘅裁决应该系基于父母双方处理分歧嘅方式，而唔系基于耶和华见证人嘅“教义同立场”。法院认定由安妮塔教养个女系合适嘅，所以将抚养权判咗俾佢。安妮塔终于松咗一口气。

32．欧洲人权法院作出乜嘢裁决，令身为父母嘅耶和华见证人唔使俾人歧视？

³² 欧洲国家 有啲关于抚养权嘅案件，由国家最高法院审理之后，再上诉到国际法庭。欧洲人权法院就处理过呢类案件。有两单案件，父母其中一方系耶和华见证人，另一方就唔系。欧洲人权法院指出，国家法院纯粹基于宗教理由以唔同嘅方式对待父母双方，噉样做系歧视行为。欧洲人权法院判定，“纯粹因为宗教分歧而有唔同嘅待遇，系唔可以接受嘅”。一个做妈妈嘅耶和华见证人话：“我净系想俾仔女最好嘅，就系可以按照圣经嘅原则将佢哋抚养成人。但系，我反而俾人指控，话我伤害自己嘅仔女，我真系好难受。”后来欧洲人权法院将抚养权判俾佢，佢终于安乐晒。

33．基督徒父母可以点样应用腓立比书4:5嘅原则？

³³ 基督徒为咗要按圣经标准教导仔女而面对诉讼嗰时，都会努力表现出通情达理嘅态度。（请读腓立比书4:5）佢哋当然好珍视自己按照上帝悦纳嘅方式教导仔女嘅权利，但系佢哋嘅前夫或者前妻，如果唔系耶和华见证人，但又希望分担做父母嘅责任，系见证人嗰一方都会尊重。点解耶和华见证人咁重视教养仔女嘅责任呢？

34．今日，基督徒父母可以点样效法尼希米日子嘅犹太人？

³⁴ 喺尼希米嘅日子发生嘅事好有启发性。犹太人努力修复同重建耶路撒冷嘅城墙，因为佢哋知道噉样做可以保护自己同家人，抵挡周围敌国嘅攻击。尼希米鼓励佢哋，话：“你哋要为弟兄、儿女、妻子、家园争战。”（尼希米记4:14）对于犹太人嚟讲，为家人争战系非常值得嘅。今日都系一样，为人父母嘅耶和华见证人努力按真理教养仔女。佢哋知道，无论喺社会抑或学校里面，仔女都会面对好多唔好嘅影响，不良风气甚至会通过传媒渗入屋企。你哋做父母嘅，为咗保护仔女，使佢哋可以喺属灵方面好好噉成长，就要好似古代以色列人噉，尽力抵挡外界嘅攻击。请记得，你哋付出嘅一切努力都系值得嘅。

坚信耶和华一定会支持正确崇拜

35,36．（甲）耶和华见证人努力争取法律上嘅权利，带嚟乜嘢好结果？（乙）你决心点样做？

³⁵ 今日，耶和华嘅组织努力争取崇拜自由。好明显，上帝一直赐福俾呢个组织。上帝嘅子民喺诉讼期间，经常可以向法庭嘅人同公众作有力嘅见证。（罗马书1:8）我哋打赢咗好多场官司，结果亦都维护咗好多非耶和华见证人嘅公民权。当然，我哋系上帝嘅子民，而唔系社会改革派。耶和华见证人出庭争取法律权利，最重要嘅目的唔系为咗证明自己系啱嘅，而系要使正确崇拜可以好好噉继续发展。（请读腓立比书1:7）

³⁶ 我哋嘅弟兄姊妹争取崇拜耶和华嘅自由，显出坚强嘅信心。我哋唔会将呢啲事睇作理所当然。等我哋一齐嚟效法佢哋，巩固信心，深信耶和华支持紧我哋嘅工作，亦都一定会继续赐力量俾我哋遵行佢嘅旨意。（以赛亚书54:17）

1．（甲）门徒聚集一齐嗰时，佢哋得到乜嘢？（乙）点解佢哋需要帮助呢？

耶稣复活之后冇几耐，门徒聚集起嚟互相鼓励。由于惊敌人揾到上门，所以佢哋锁实大门。突然间，耶稣喺佢哋当中显现，对佢哋讲：“领受圣灵啦。”佢哋即刻就唔惊嘞。（请读约翰福音20:19-22）后来，门徒再次聚集起嚟，耶和华将圣灵倾注喺佢哋身上。佢哋就充满力量，可以执行前头嘅传道工作！（使徒行传2:1-7）

2．（甲）耶和华点样赐力量俾我哋？（乙）点解我哋需要耶和华赐力量俾我哋？（丙）点解家庭崇拜非常重要？（另见脚注同175页嘅附栏“家庭崇拜”）

² 我哋同公元1世纪嘅基督徒面对类似嘅考验。（彼得前书5:9）有时，我哋可能好怕人。所以，我哋需要耶和华赐力量俾我哋，先至可以持续不懈噉传道。（以弗所书6:10）耶和华通过基督徒聚会加强我哋嘅力量。目前，我哋每周有两个聚会，一个系公众演讲聚会同《守望台》研究班，另一个系周中嘅传道与生活聚会。a而且，我哋每年有四项年度盛事，分别系区域大会、两个分区大会，同埋耶稣受难纪念聚会。点解参加呢啲聚会同大会系非常重要嘅呢？呢啲聚会同大会系点样发展而嚟嘅呢？我哋对呢啲活动嘅态度显示乜嘢？

点解要聚集起嚟

3,4．耶和华要求佢嘅子民点样做？请举例说明。

³ 好耐之前，耶和华就要求佢嘅子民聚集起嚟崇拜佢。比如，公元前1513年，耶和华赐一套律法俾以色列国族，规定佢哋每周要守安息日，噉样每个家庭都可以喺呢一日专心崇拜佢，同埋学习律法。（申命记5:12；6:4-9）当以色列人听从呢个吩咐嗰阵，每个家庭都受到强化，整个国家喺属灵方面系洁净、强壮嘅。但系，当佢哋唔守律法，又冇定期聚集起嚟崇拜耶和华嗰阵，就会失去上帝嘅悦纳。（利未记10:11；26:31-35；历代志下36:20,21）

⁴ 我哋亦可以谂吓耶稣嘅榜样。佢每个安息日都会去犹太会堂。（路加福音4:16）耶稣复活之后，虽然佢嘅门徒唔使按照律法守安息日，但系会定期聚会。（使徒行传1:6,12-14；2:1-4；罗马书14:5；歌罗西书2:13,14）1世纪嘅基督徒喺聚会里面唔单止得到教导，同埋可以互相鼓励，仲通过祷告、评论、唱诗歌嚟向上帝献上赞美作为祭物。（歌罗西书3:16；希伯来书13:15）

5．点解我哋要参加每个星期嘅聚会同每年嘅大会？（另见176页嘅附栏“使上帝嘅子民团结一致嘅年度盛会”）

⁵ 我哋参加每周嘅聚会同每年嘅大会，就表明自己支持紧上帝嘅王国。我哋亦可以得到圣灵受到强化，仲可以通过呢个机会，表达出自己嘅信心去鼓励其他人。更加重要嘅系，我哋可以通过祷告、评论、唱诗歌嚟崇拜耶和华。我哋嘅聚会可能同以色列人，或者1世纪基督徒嘅形式唔一样。但系，无论以前抑或而家，聚集起嚟崇拜上帝都系非常重要嘅。噉我哋今日嘅聚会系点样发展而嚟嘅呢？

每周嘅聚会“激发爱心，促进善行”

6,7．（甲）聚会嘅目的系乜嘢？（乙）有一段时间，各个小组嘅聚会有咩唔同？

⁶ 查尔斯·泰兹·罗素弟兄最初寻求圣经真理嗰时，就睇出有需要同其他寻求真理嘅人聚集起嚟。佢喺1879年噉样写：“为咗钻研圣经，我同其他人喺匹兹堡成立咗一个研经班，喺每个星期日举行。”《锡安嘅守望台》都鼓励读者要聚集起嚟。1881年，佢哋每逢星期三同星期日都喺宾夕法尼亚州嘅匹兹堡举行聚会。1895年11月刊嘅《守望台》（英语）提到，聚会嘅目的系令参加嘅人“彼此交流，培养爱心，增进基督徒嘅情谊”，亦有机会互相鼓励。（请读希伯来书10:24,25）

⁷ 有好多年时间，各个圣经研究者小组嘅聚会形式，同埋举行嘅次数都唔同。例如，1911年刊登美国一个小组嘅信，信入面话：“我哋每个礼拜至少举行5次聚会。”佢哋嘅聚会系星期一、星期三同星期五各一次，星期日两次。1914年刊登一封嚟自非洲一个小组嘅信，信入面话：“我哋每个月举行两次聚会，每次聚会星期五开始，到星期日结束。”随住时间过去，聚会嘅形式慢慢发展到今日噉。请睇吓过程系点样嘅。

8．早期嘅公众演讲有咩主题？请举例。

⁸ 公众演讲聚会 1880年，《锡安嘅守望台》出版第二年，罗素弟兄效法耶稣嘅榜样，展开咗一次传道旅程。（路加福音4:43）喺呢次旅程中，罗素弟兄为今日公众演讲聚会嘅模式奠定基础。《守望台》杂志提前向读者宣布话，罗素弟兄“好乐意发表公众演讲，题目系：‘与上帝王国有关嘅事’”。1911年，有啲班（而家叫会众）喺部分国家成立，每个班都受到鼓励，派符合资格讲者去附近嘅地区发表一系列嘅演讲。演讲一共有六个，演讲题目同审判、赎价等有关。每个演讲结束之后，会宣布下一周演讲嘅题目同讲者个名。

9．（甲）公众演讲聚会过去有乜嘢改变？（乙）你可以点样表明自己重视呢个聚会？

⁹ 1945年，《守望台》宣布喺全球开展公众演讲聚会活动，讲者会发表一系列嘅公众演讲，一共有八个演讲，题目同嗰个时期急需解决嘅难题有关。有几十年时间，受委派嘅讲者唔单止可以用忠信奴隶指定嘅题目嚟发表演讲，仲可以发表自定题目嘅演讲。不过，到咗1981年，所有讲者都要采用组织发俾会众嘅大纲。b直到1990年之前，有啲公众演讲大纲包括同听众讨论嘅环节或者示范。但系，根据组织嘅指引，由1990年开始，公众演讲只会系演讲形式。2008年1月，组织作出进一步调整，将公众演讲嘅时间由45分钟缩短到30分钟。虽然公众演讲聚会喺形式上有所改变，但系经过充分准备之后嘅演讲，一向都可以帮助人增强对上帝话语嘅信心，亦都可以帮助我哋对上帝嘅王国有更全面嘅认识。（提摩太前书4:13,16）根据圣经发表嘅演讲的确发挥重要作用。你有冇尽力邀请人嚟听呢啲演讲呢？

10-12．（甲）过去咁多年嚟，《守望台》研究班有乜嘢调整？（乙）我哋应该问吓自己乜嘢问题？

¹⁰ 《守望台》研究班 守望台社委派称为朝圣者嘅弟兄，去到各群会众发表演讲，同带头传道。1922年，佢哋提议定期举行聚会，讨论《守望台》文章。呢个提议被采纳咗。起初，《守望台》研究班喺周中或者周日举行。

¹¹ 1932年6月15日刊嘅《守望台》（英语）提出进一步嘅指引，讲明呢个聚会应该点样举行。文章指出，呢个聚会要按照伯特利家庭嘅《守望台》研究班模式举行，由一个弟兄主持，另外三个弟兄会坐喺前排，轮流读出每段内容。当时嘅文章冇提供问题，主持嘅弟兄会邀请听众根据讨论嘅内容提出问题，然后再请听众回答。如果有需要嘅话，主持人会简短扼要噉解释一下文章嘅内容。

¹² 起初，每群会众可以按照大多数人嘅意愿选择一篇文章嚟讨论。不过，1933年4月15日刊嘅《守望台》（英语）建议所有会众都用最新出版嘅《守望台》文章。1937年，组织指定呢个聚会要喺星期日举行。1942年10月1日刊嘅《守望台》（英语）提出进一步指示，将聚会嘅模式调整到好似而家噉。首先，研读文章每页嘅最下面都会列出问题，用嚟讨论。另外，聚会举行嘅时间系一个钟。文章仲鼓励参加聚会嘅人最好用自己嘅说话回答问题，而唔系将每段嘅句子照读出嚟。忠信奴隶会喺适当嘅时候提供灵粮俾我哋，而《守望台》研究班就一直系佢哋所用嘅主要渠道。（马太福音24:45）我哋人人都应该问吓自己：“我每个星期有冇预习《守望台》研究班嘅课文？我有冇尽力参与评论呢？”

13,14．（甲）会众研经班系点样发展而嚟嘅呢？（乙）点解你钟意呢个聚会呢？

¹³ 会众研经班 19世纪90年代初，《千禧年黎明》发行咗几册之后，一位叫拉恩嘅圣经研究者建议，喺佢所住嘅美国马里兰州巴尔的摩市，成立研究圣经嘅“黎明组”。开始嗰阵，呢啲聚会仲喺试验阶段，通常喺私人屋企举行。不过，1895年9月，美国好多个城市都开始有黎明组嘅聚会，而且有好好嘅成果。当月嘅《守望台》建议所有研究圣经真理嘅人都要举行噉样嘅聚会。杂志仲提出，主持聚会嘅弟兄应该有良好嘅朗读能力，佢每读完一句，要等参加聚会嘅人评论，讨论完每段之后，要翻开嗰一段嘅经文，将佢读出嚟。讨论完一篇文章之后，每个参加聚会嘅人都要概述文章嘅内容。

¹⁴ 呢个聚会嘅名称改咗几次，一开始叫圣经研究嘅庇哩亚组，因为佢哋想效法1世纪细心考查圣经嘅比里亚人（庇哩亚人）。（使徒行传17:11，《和合本》）后来，呢个聚会改为叫书籍研究班，而家叫会众研经班。聚会亦都唔再以小组嘅形式喺私人屋企举行，而喺王国聚会所举行，整群会众一齐参加。过去几十年，呢个聚会讨论过唔同嘅书、册子，仲有《守望台》文章。由一开始有呢个聚会起，每个参加嘅人就受到鼓励要发表评论。呢个聚会大大加深我哋对圣经嘅认识。你有冇经常预习会众研经班嘅资料，而且尽力喺聚会评论呢？

15．以往举办传道训练班有乜嘢目的？

¹⁵ 传道训练班 凯里·巴伯曾经喺纽约布鲁克林世界总部服务，佢回忆话：“1942年2月16日星期一晚上，布鲁克林伯特利家庭嘅所有弟兄都受到邀请，参加一个后来称为传道训练班嘅课程。”巴伯弟兄后来成为中央长老团成员，佢描述呢个训练班系“耶和华带领现代子民嘅过程中，其中一项最显著嘅进展”。呢个课程好有效，帮助弟兄提高教导同传道技巧，所以，由1943年开始，世界各地越来越多会众开始使用《神治传道训练课程》呢本册子。1943年6月1日刊嘅《守望台》（英语）话，传道训练班嘅目的系帮助上帝嘅子民“受到培训，更有效噉传讲王国嘅好消息”。（提摩太后书2:15）

16,17．过去举办嘅传道训练班，系咪只系帮人掌握技巧呢？请解释。

¹⁶ 一开始，好多人都觉得喺一大班人面前发表演讲好困难。喺1918年，克莱顿·伍德沃思弟兄嘅爸爸曾经同卢述福弟兄，仲有其他人一齐无辜入狱。伍德沃思弟兄谂翻佢喺1943年，第一次喺传道训练班发表演讲嗰时嘅感受，话：“对我嚟讲，演讲实在太难嘞。我一开口就口窒窒，又口干，讲嘢一时大声一时细声，一时快一时慢。”不过，伍德沃思弟兄嘅演讲能力不断提高，佢后来有殊荣发表好多公众演讲。呢个训练班唔单止帮佢掌握各种技巧，亦都帮佢意识到保持谦卑同信赖耶和华系好重要嘅。佢话：“我睇出，边个发表演讲唔重要，重要嘅系准备充足，全心信赖耶和华，噉嘅话，听众就会好欣赏佢嘅演讲，亦都会学到嘢。”

¹⁷ 由1959年开始，姊妹亦都可以报名参加呢个训练班。埃德娜·鲍尔姊妹讲翻起当年参加大会听到呢个宣布嗰时嘅情形，佢话：“我记得啲姊妹都好兴奋，而家佢哋都有机会受训练嘞。”咁多年嚟，好多弟兄姊妹把握机会参加传道训练班，得到耶和华嘅教导。今日，我哋都可以喺周中聚会得到噉样嘅训练。（请读以赛亚书54:13）

18,19．（甲）今日我哋点样得到实用嘅指引嚟执行传道工作？（乙）点解我哋聚会嗰时会唱诗歌呢？（另见附栏“将真理唱出嚟”）

¹⁸ 传道工作聚会 1919年，就已经有专为组织传道工作而设嘅聚会。当时，会众嘅成员唔系个个都可以参加，只有嗰啲负责分发书刊嘅传道员先可以。由1923年开始，呢个聚会每个月举行一次，所有会众成员都可以参加。到咗1928年，组织促请会众每个星期举行一次传道工作聚会。1935年，《守望台》鼓励所有会众根据《指导员》（后来叫《公报》，之后再改为叫《王国传道月报》）嚟举行聚会。过咗冇几耐，每群会众都定期举行呢个聚会。

¹⁹ 今日，我哋从周中嘅聚会得到实用嘅指引，用嚟执行传道工作。（马太福音10:5-13）如果你收到《聚会手册》，有冇仔细阅读，而且喺传道嗰时，将建议运用出嚟呢？

一年当中最重要嘅聚会

20-22．（甲）点解我哋要记念耶稣嘅死亡？（乙）参加每年嘅耶稣受难纪念聚会，可以点样使你得益呢？

²⁰ 基督徒要听从吩咐，记念耶稣嘅死亡，直到佢嚟。同逾越节一样，耶稣受难纪念聚会每年举行一次。（哥林多前书11:23-26）每年都有千百万人参加呢个聚会。受难纪念聚会提醒受膏基督徒，佢哋有殊荣同耶稣一同承受王国。（罗马书8:17）呢个聚会亦都激励另外嘅绵羊深深尊重上帝王国嘅君王，决心对佢表现忠诚。（约翰福音10:16）

²¹ 罗素弟兄同佢嘅同工意识到举行主嘅晚餐好重要，亦都睇出呢个纪念聚会每年应该净系举行一次。1880年4月刊嘅《守望台》（英语）指出：“过去几年，我哋好多人都喺匹兹堡……过逾越节［耶稣受难纪念聚会］，食象征主身体嘅饼，饮象征血嘅酒。”冇几耐，大会开始同耶稣受难纪念聚会一齐举行。第一次开始有人数记录嘅系1889年，当时有225人出席，22人受浸。

²² 今日，耶稣受难纪念聚会唔再系大会嘅一部分。不过，我哋仲系会邀请所有住喺附近嘅人，嚟聚会所或者租用嘅场所参加呢个聚会。2013年，超过1900万人参加呢个聚会，记念耶稣嘅死亡。喺一年里面呢个最重要嘅晚上，我哋唔单止可以亲自参加呢个聚会，仲可以鼓励其他人参加，呢个真系好大嘅荣幸！每年，你有冇热心噉邀请更多人嚟参加耶稣受难纪念聚会呢？

我哋嘅态度显示乜嘢

23．你哋对参加聚会同大会有乜嘢睇法？

²³ 耶和华嘅忠仆唔会将聚集起嚟崇拜上帝呢个吩咐，睇成系一个负担。（希伯来书10:24,25；约翰一书5:3）大卫王就系一个例子，大卫好钟意去耶和华嘅圣殿崇拜佢。（诗篇27:4）大卫特别钟意同爱上帝嘅人一齐崇拜上帝。（诗篇35:18）我哋都可以谂吓耶稣嘅榜样。耶稣细个嗰阵，就好渴望喺天父嘅家崇拜佢。（路加福音2:41-49）

24．点解我哋要参加聚会同大会？

²⁴ 我哋参加聚会，就表明自己爱耶和华，同埋好想鼓励信徒同工。聚会同大会系上帝教导我哋成为王国好公民嘅一个主要方式，我哋出席呢啲活动，就表明自己好想接受上帝嘅教导。另外，呢啲聚会亦都帮助我哋掌握需要嘅技巧，而且加强我哋嘅力量，使我哋可以坚持不懈噉执行传道工作，帮助人成为君王耶稣基督嘅门徒，同埋培训佢哋。呢个系上帝王国目前最重要嘅工作之一。（请读马太福音28:19,20）毫无疑问，我哋有几渴望参加聚会，就显示出我哋将上帝嘅王国睇得有几真实。愿我哋继续珍视聚会同大会！

1-3．（甲）耶稣点样扩大传道工作嘅规模？（乙）我哋跟住会解答边啲问题？

耶稣用咗大约两年嘅时间行匀加利利，向人传道。（请读马太福音9:35-38）佢去过好多城镇同乡村，传讲王国嘅好消息，又喺犹太会堂里面教导人。无论佢喺边度传道，都有一大班人围住佢。耶稣话，“庄稼的确好多”，需要多啲工人。

² 耶稣点样扩大传道工作嘅规模呢？佢差12个使徒“去传讲上帝嘅王国”。（路加福音9:1,2）耶稣曾经受到天父训练，而家佢都好乐意训练使徒。耶稣知道使徒可能唔系好清楚要点样传道，所以差使徒出去之前，先培训佢哋。

³ 你可能会问：耶稣喺天父嗰度受过乜嘢培训？佢又点样培训使徒呢？作为弥赛亚君王，今日佢有冇培训门徒执行传道工作呢？点样培训？

“我讲嘅呢啲话，同父亲教我嘅一样”

4．天父几时开始教导耶稣？喺边度教呢？

⁴ 耶稣清楚表明自己系受天父教导嘅。佢喺地上传道嗰时曾经讲过：“我讲嘅呢啲话，同父亲教我嘅一样。”（约翰福音8:28）天父几时开始教导耶稣？喺边度教呢？耶稣系上帝嘅头生子，好可能天父创造佢之后冇几耐，就开始教导佢嘞。（歌罗西书1:15）耶稣喺天上同天父相处咗无数岁月，佢嘅爸爸系“伟大导师”，佢一边观察爸爸，一边听爸爸嘅教导。（以赛亚书30:20）耶稣受到无与伦比嘅教育，认识到天父嘅特质、作为同旨意。

5．耶和华俾乜嘢指示佢个仔，教导佢喺地上执行传道工作？

⁵ 耶和华教导耶稣应该点样喺地上执行传道工作。圣经用一个预言描述伟大导师同佢头生子之间嘅关系。（请读以赛亚书50:4,5）预言话，耶和华“每日朝早”都叫醒个仔。就好似一位老师一早叫醒个学生，为咗教导佢。一本圣经参考书话：“耶和华……就好似一位老师喺学校教导学生一样，教导耶稣要传讲乜嘢信息，同埋点样传讲。”喺天上嘅“学校”，耶和华教佢个仔要“讲乜嘢，话乜嘢”。（约翰福音12:49）耶和华仲指示佢个仔应该点样教导其他人。a耶稣喺地上嗰时学以致用，除咗自己传道之外，仲培训门徒，为咗帮佢哋好好执行传道工作。

6,7．（甲）耶稣点样培训使徒？（乙）呢啲培训装备好佢哋执行乜嘢工作？（丙）今日，耶稣确保我哋得到乜嘢培训？

⁶ 本章开头提到，耶稣差使徒去传道之前先培训佢哋。系咩培训呢？马太福音第10章记载，耶稣喺传道方面提出清晰嘅指示，包括：去边度传道（第5,6节）；传讲乜嘢信息（第7节）；要信赖耶和华（第9,10节）；点样对待传道对象（第11-13节）；俾人拒绝嗰时应该点做（第14,15节）；面对迫害嗰时应该点做（第16-23节）。b耶稣具体噉指导佢嘅使徒，装备好佢哋喺1世纪做传道先锋，宣扬上帝王国嘅好消息。

⁷ 今日又点样呢？上帝王国嘅君王耶稣吩咐门徒，将王国嘅好消息“传遍普天下，对所有国族作见证”。（马太福音24:14）噉耶稣有冇培训我哋去执行呢件最重要嘅工作呢？当然有。佢喺天上指引门徒，确保我哋得到训练，帮助我哋知道应该点样喺地区里面传道，亦都知道应该点样喺会众里面履行各种职责。

培训传福音者

8,9．（甲）传道训练班嘅主要目的系乜嘢？（乙）周中聚会点样帮助你更有效噉传道？

⁸ 过去咁多年嚟，耶和华嘅组织一直通过大会同聚会，训练上帝嘅子民执行传道工作，传道工作聚会就系个例子。由上世纪40年代开始，喺总部带头嘅弟兄亦都开始举办各种训练班。

⁹ 传道训练班 正如上一章指出，呢个训练班喺1943年成立。呢个训练班嘅目的系咪只系帮助人喺会众里面提高演讲嘅质素呢？唔系嘅。佢嘅主要目的系训练耶和华嘅子民善用讲话嘅恩赐嚟赞美佢，帮助所有学员有效噉传讲王国嘅好消息。（诗篇150:6）今日，弟兄姊妹都可以从周中聚会得到噉样嘅训练。

10,11．（甲）而家边啲人可以去基列学校？（乙）基列学校课程目的系乜嘢？

¹⁰ 守望台基列圣经学校 呢个学校喺1943年2月1日星期一开始，本来系培训先驱同其他全时仆人去海外传道。但系，由2011年10月开始，只有参与特别全时服务嘅人，先至可以去基列学校受训，呢啲人包括特别先驱、探访会众嘅监督同埋佢哋嘅妻子、伯特利成员，仲有未去过基列学校嘅特派传道员。

¹¹ 基列学校课程有咩目的？一位资深嘅导师回答：“课程会帮学员通过钻研圣经嚟强化信心，帮佢哋培养需要嘅属灵特质，可以应付喺岗位上遇到嘅各种挑战。课程另一个主要目的系令学员更加热心去传福音。”（以弗所书4:11）

12,13．基列学校对全球嘅传道工作有乜嘢贡献？请举例。

¹² 基列学校对全球嘅传道工作有乜嘢贡献呢？自从1943年以来，超过8500个学员喺基列学校受训，毕业生被派到170几个国家同地区传道。c呢啲特派传道员学以致用，热心传道，仲用自己学到嘅嚟训练其他人。好多特派传道员被派去只有少数传道员甚至冇传道员嘅地区服务。

¹³ 以日本为例。第二次世界大战期间，当地嘅公开传道工作停止咗。直到1949年8月，日本嘅传道员唔够10个。但系，到咗年底，有13个受过基列学校培训嘅特派传道员喺当地努力传道，后来有更多特派传道员去到日本。起初，佢哋集中喺大城市传道，后来仲去埋其他城市。呢啲特派传道员热心鼓励圣经学生同埋其他人做先驱。佢哋嘅努力冇白费，反而得到好好嘅成果。而家，日本有超过21万6000个王国传道员，有将近百分之40嘅人做先驱！d

14．组织举办嘅训练班充分证明咗乜嘢？（另见188页附栏“培训王国传道员嘅各种训练班”）

¹⁴ 其他训练班 先驱训练班、基督徒夫妇圣经研习班，同埋独身弟兄圣经研习班，曾经帮助学员喺灵性上进步，同埋带头热心传道。e呢啲训练班充分证明，我哋嘅君王的确帮助门徒装备齐全执行任务。（提摩太后书4:5）

培训弟兄执行重任

15．有职责嘅弟兄好想点样效法耶稣？

¹⁵ 以赛亚嘅预言提到耶稣受上帝教导。耶稣喺天上嘅“学校”学识“用良言回答疲乏嘅人”。（以赛亚书50:4）佢喺地上嗰时，将所学到嘅应用出嚟，使“辛苦劳碌、担子沉重嘅人”重新得力。（马太福音11:28-30）有职责嘅弟兄好想效法耶稣，鼓励弟兄姊妹，使佢哋得到力量。为咗达到呢个目的，组织为嗰啲符合资格嘅弟兄举办唔同嘅训练班，帮助佢哋更有效噉为同工服务。

16,17．王国职务训练班嘅目的系乜嘢？（另见脚注）

¹⁶ 王国职务训练班 1959年3月9日，第一届王国职务训练班喺纽约南兰星镇举办。探访会众嘅监督同会众仆人（而家叫长老团协调人）可以参加呢个为期一个月嘅课程。起初，王国职务训练班课程净系用英语举行，后来亦都用其他语言举行，世界各地越来越多弟兄都可以受到培训。f

¹⁷ 《1962耶和华见证人年鉴》（英语）指出王国职务训练班嘅目的，话：“喺呢个忙碌嘅世界里面，耶和华见证人会众嘅监督一定要识得好好安排自己嘅生活，先可以照顾到会众每一个成员，造福佢哋。同时，监督亦都应该思想健全，唔可以因为会众嘅事务而忽略屋企人。世界各地嘅会众仆人聚埋一齐参加王国职务训练班，接受培训，就可以按照圣经嘅要求履行监督嘅职责，呢个真系一个好好嘅机会啊！”（提摩太前书3:1-7；提多书1:5-9）

18．王国职务训练班点样造福上帝嘅所有子民？

¹⁸ 上帝所有嘅子民都能够从王国职务训练班得益。点解噉讲呢？长老同助理仆人将学到嘅实践出嚟，就可以好似耶稣噉样，使同工得到力量。有冇长老或者助理仆人关心过你，对你讲过暖人心窝嘅话，听你倾诉或者探访你，使你受到鼓励呢？你系咪好感激佢哋呢？（帖撒罗尼迦前书5:11）呢啲符合资格嘅弟兄的确系会众嘅宝贵恩赐。

19．（甲）教导委员会仲督导边啲训练班？（乙）呢啲训练班嘅目的系乜嘢？

¹⁹ 其他训练班 中央长老团嘅教导委员会仲督导其他训练班，培训组织里面有职责嘅弟兄，包括会众长老、探访会众嘅监督同分部委员会成员。呢啲训练班系要帮助佢哋更有效噉履行各种职责。呢啲以圣经为根据嘅课程，鼓励弟兄要喺灵性上保持强壮，同埋运用圣经原则，去牧养耶和华交俾佢哋照顾嘅宝贵绵羊。（彼得前书5:1-3）

20．（甲）点解耶稣话我哋所有人都系“受耶和华教导”？（乙）你决心点样做？

²⁰ 事实表明，弥赛亚君王确保门徒受到良好嘅培训。耶和华首先培训佢个仔耶稣，耶稣再培训门徒，所以，佢哋得到嘅培训都系从上头嚟嘅。难怪耶稣话我哋所有人都系“受耶和华教导”。（约翰福音6:45；以赛亚书54:13）等我哋一齐下定决心，接受君王嘅培训，从中得益。同时我哋要记得，呢啲训练嘅主要目的系要帮助我哋灵性强壮，使我哋可以彻底执行职务。

1,2．（甲）有个牧师想知道圣经研究者嘅活动经费系点样嚟嘅。罗素弟兄点样回答佢呢？（乙）呢一章我哋会讨论乜嘢？

有一次，一个归正会嘅牧师行过嚟问查尔斯·罗素弟兄，圣经研究者嘅活动经费系点样嚟嘅。

罗素弟兄解释话：“我哋从来都唔向人募捐。”

牧师又问：“噉你哋嘅经费点嚟㗎？”

罗素回答话：“其实答案好简单，可能我讲你都唔会信。参加聚会嘅人唔会见到有人传个篮过嚟要佢哋捐款。但系，佢哋睇出呢一切都系需要经费嘅。佢哋心谂：‘聚会所系需要开支嘅……我可以点样捐啲钱嚟支持吓呢？’”

牧师难以置信噉望住罗素弟兄。

罗素继续话：“我同你讲嘅都系事实。佢哋真系问过我，‘我可以点样捐啲钱嚟支持呢啲活动呢？’当一个人得到上帝嘅赐福而有啲钱嗰时，佢好自然就会想捐助主嘅工作。”如果佢冇钱，点解我哋仲要逼佢捐钱呢？a

² 罗素弟兄讲嘅的确系“事实”。上帝嘅子民从古到今都通过自愿捐款嚟支持正确嘅崇拜。呢一章，我哋会睇吓圣经嘅一啲例子，同埋耶和华现代子民嘅历史。当我哋知道今日王国工作嘅经费系点样嚟嘅时候，每个人都可以问吓自己：“我可以点样表明自己支持上帝嘅王国呢？”

“凡甘心乐意嘅，都可以将奉献俾耶和华嘅礼物送上嚟”

3,4．（甲）喺捐献方面，耶和华对崇拜佢嘅人有点样嘅信心？（乙）以色列人点样表明自己支持圣幕嘅建造工程？

³ 耶和华对真正崇拜佢嘅人有信心，知道佢哋只要有机会，就会好乐意通过自愿捐献嚟表明自己爱戴佢。我哋嚟睇吓古代以色列嘅两个例子。

⁴ 以色列人离开埃及之后，耶和华指示佢哋要建造一个可以移动嘅圣幕，用嚟崇拜佢。要建造同布置呢个帐幕需要大量资财。耶和华吩咐摩西要俾以色列人机会支持呢个工程，佢通过摩西话：“凡甘心乐意嘅，都可以将奉献俾耶和华嘅礼物送上嚟”。（出埃及记35:5）冇几耐之前，以色列人仲喺埃及嘅时候，俾人用苛刻嘅手段逼佢哋服“各种各样嘅劳役”。噉而家佢哋对摩西嘅呼吁有乜嘢反应呢？（出埃及记1:14）佢哋全力支持呢项工程，自愿献上金银同其他贵重物品。呢啲财物好可能大部分都系从奴役过佢哋嘅埃及人手中得嚟嘅。（出埃及记12:35,36）以色列人捐献嘅比工程所需嘅多出好多，摩西甚至要阻止民众，使“民众唔再送上礼物”。（出埃及记36:4-7）

5．当大卫使以色列人有机会为圣殿嘅建造工程作出捐献嘅时候，佢哋点样回应？

⁵ 475年之后，大卫捐出自己“私人积蓄嘅金银财宝”作为建造圣殿嘅经费。呢座圣殿系地上第一个固定嘅正确崇拜中心。后来，大卫使佢嘅同胞都有机会作出捐献，佢问以色列人：“今日有边个甘心乐意奉献礼物俾耶和华呢？”民众纷纷响应，“全心自愿奉献俾耶和华”。（历代志上29:3-9）大卫知道所有财物其实都系嚟自耶和华嘅，佢向耶和华祷告话：“万物都从你而嚟，我哋只系将从你手上得到嘅献俾你啫。”（历代志上29:14）

6．今日，点解上帝王国嘅工作需要经费？呢个引起乜嘢值得思考嘅问题？

⁶ 摩西同大卫都唔使强迫以色列人捐献。以色列人系怀住乐意嘅心作出捐献嘅。今日又点呢？我哋清楚知道上帝王国嘅工作系需要经费嘅。出版同运送圣经以及圣经书刊，兴建同保养聚会嘅地方以及分部设施，同埋向受灾嘅信徒同工提供紧急救援，呢一切都需要庞大嘅费用。所以，呢个引起一啲值得我哋思考嘅问题：呢啲必需嘅经费系点样嚟嘅？跟从君王耶稣嘅人系咪需要受到再三敦促，先至会捐献呢？

“我哋绝对唔会向人乞求经费或者劝捐”

7,8．点解耶和华嘅子民唔会乞求经费或者劝捐？

⁷ 罗素弟兄同佢嘅同工拒绝用一般基督教会惯用嘅方法嚟筹款。《守望台》第二期（英语）有一篇题目叫做《你想唔想要〈锡安嘅守望台〉？》嘅文章。喺呢篇文章里面，罗素话：“我哋相信《锡安嘅守望台》有耶和华做后盾，所以，我哋绝对唔会向人乞求经费或者劝捐。耶和华话所有金银都属于佢。如果佢唔再提供必要嘅经费，噉我哋就知道系时候要停刊嘞。”（哈该书2:7-9）而家已经超过130年嘞，《守望台》同出版呢本杂志嘅组织依然蓬勃发展！

⁸ 耶和华嘅子民唔会向人乞求经费。佢哋唔会传递捐款盘或者向人寄信筹款，亦都唔会通过义卖、抽奖游戏或者类似嘅活动嚟筹款。佢哋一直按照《守望台》好多年前所讲嘅去做，就系“我哋从来都唔认为仿效一般教会以主嘅名义向人劝捐系适当嘅……我哋觉得以主嘅名义用各种方式乞求经费会羞辱主，唔会蒙佢悦纳，而且捐款人同捐款所成就嘅工作都唔会得到祝福。”b

“每个人要照心里所决定嘅去做”

9,10．我哋自愿捐献嘅其中一个理由系乜嘢？

⁹ 身为上帝王国嘅子民，我哋唔需要有人逼先至捐款。相反，我哋好乐意用自己嘅金钱同其他资财嚟支持王国嘅工作。点解我哋会甘心乐意捐款呢？请睇吓以下三个理由。

¹⁰ 首先，我哋自愿捐献系因为爱耶和华，想做“佢眼中喜悦嘅事”。（约翰一书3:22）耶和华确实悦纳嗰啲甘心乐意捐献嘅人。关于捐献，我哋一齐睇吓使徒保罗点样讲。（请读哥林多后书9:7）真基督徒唔应该勉强自己或者出于被迫而捐献。相反，佢作出捐献应该系照“心里所决定嘅去做”。c即系话，佢知道有捐献嘅需要以及自己可以点样帮忙之后，就采取行动作出捐献。耶和华悦纳噉样做嘅人，圣经话：“上帝喜爱捐得快乐嘅人。”另一个译本话：“上帝爱嗰啲乐意捐献嘅人。”

11．乜嘢推动我哋尽己所能，将自己最好嘅献俾耶和华？

¹¹ 第二，耶和华赐咗好多福分俾我哋，所以我哋好想通过物质捐献嚟感谢佢。一齐睇吓摩西律法嘅一条诫命，谂吓背后有乜嘢发人深省嘅原则。（请读申命记16:16,17）喺一年三次嘅节期，每个以色列男子都要“照耶和华……所赐嘅福”送上礼物。所以，佢哋喺庆祝节期之前，会细心谂谂，数算一下自己嘅福分，然后按自己嘅能力献上最好嘅礼物。同样，我哋细想耶和华所赐嘅种种福分，就会受到打动，好想将自己最好嘅献俾佢。我哋衷心献出自己嘅财物，可以反映出我哋有几咁感激耶和华赐俾我哋嘅福分。（哥林多后书8:12-15）

12,13．自愿捐献点样表明我哋爱君王耶稣基督呢？我哋应该捐几多呢？

¹² 第三，自愿捐献可以表明我哋爱君王耶稣基督。点解噉讲？请留意耶稣牺牲前嗰晚同门徒讲嘅话。（请读约翰福音14:23）佢话：“边个爱我，就会遵守我嘅话语”。耶稣嘅“话语”其中一个吩咐就系要将王国嘅好消息传遍普天下。（马太福音24:14；28:19,20）我哋遵守耶稣嘅“话语”，就会付出时间、精力同财物，尽己所能推广王国嘅传道工作。噉样做就表明我哋爱弥赛亚君王。

¹³ 的确，作为上帝王国嘅忠贞子民，我哋好想通过捐献财物嚟表明自己全心支持上帝嘅王国。我哋应该捐几多呢？呢个系个人嘅决定。每个人都可以尽全力作出捐献。其实我哋好多同工喺物质上都唔系好富有。（马太福音19:23,24；雅各书2:5）不过值得安慰嘅系，哪怕少少嘅捐献，只要系出于乐意嘅心，耶和华同耶稣都会好珍视。（马可福音12:41-44）

点样收集捐款？

14．有好多年嘅时间，耶和华见证人分发杂志嗰时会点样做？

¹⁴ 有好多年嘅时间，耶和华见证人分发圣经书刊嗰时都会向人收取捐款。见证人尽量将建议嘅额度保持到最低，等嗰啲家境唔系咁富裕嘅人都可以得到书刊。当然，如果住户睇嚟对书刊感兴趣但又冇钱捐款，传道员都会好乐意将资料留低俾佢哋。传道员好希望将书刊交到俾嗰啲感兴趣嘅人，使佢哋可以通过阅读而得益。

15,16．（甲）1990年，中央长老团作出乜嘢调整？（乙）我哋可以点样作出自愿捐献呢？（另见附栏“捐款会用喺边啲方面？”）

¹⁵ 1990年，中央长老团开始调整分发书刊时建议捐款嘅方式。从嗰年开始，喺美国分发嘅所有书刊都唔再按照指定嘅捐款额嚟收取捐款。一封俾美国所有会众嘅信话：“传道员同感兴趣嘅住户都可以得到杂志同书刊。我哋唔需要提出或者建议佢哋作出指定额度嘅捐献先可以得到刊物。……如果任何人想通过捐款嚟支持我哋嘅教育工作都可以噉样做。但系，无论佢哋有冇捐款，都可以得到书刊。”呢个安排帮助人睇出，我哋嘅工作系出于自愿嘅，系属于宗教性质嘅，而且清楚表明“我哋唔会……贩卖上帝嘅话语”。（哥林多后书2:17）后来，全球各分部都按照呢个捐献安排去做。

¹⁶ 我哋可以点样作出自愿捐献呢？喺耶和华见证人嘅王国聚会所入面，会有捐款箱放喺唔太显眼嘅地方。想捐献嘅人可以将款项放入捐款箱，或者直接捐俾耶和华见证人运用嘅其中一个法人。《守望台》每年都会刊登一篇文章解释可以点样作出捐献。

捐款嘅用途

17-19．请说明捐款点样用喺（甲）全球工作；（乙）全球王国聚会所建筑工程；（丙）本地会众开支。

¹⁷ 全球工作 呢啲款项会用嚟推广全球传道工作，包括制作喺世界各地分发嘅书刊，建造同保养分部办事处以及伯特利宿舍，开办各种唔同嘅训练班。另外，呢啲款项仲会用嚟照顾特派传道员、探访会众嘅监督同埋特别先驱嘅基本生活需要。我哋嘅捐款亦都用嚟为受灾嘅信徒同工提供紧急救援。d

¹⁸ 全球王国聚会所建筑工程 呢啲款项会用嚟帮助会众建造或改建王国聚会所。当收到嘅捐款越来越多，就会有更多资金可以资助其他有需要嘅会众。e

¹⁹ 本地会众开支 呢啲款项会用嚟支付王国聚会所嘅日常开支同保养费用。长老可以提议将部分款项捐俾分部办事处，用嚟资助全球工作。佢哋会请会众表决，如果决议通过，就会将款项捐出。每个月，管理会众账目嘅弟兄都会准备好一份会计报告。呢份报告会向会众成员读出嚟。

20．你可以点样运用自己“宝贵嘅资产”尊崇耶和华？

²⁰ 当我哋谂到喺全球传讲王国好消息同帮助人成为基督徒呢件工作所涉及嘅一切，就会受到推动，用自己“宝贵嘅资产……尊崇耶和华”。（箴言3:9,10）宝贵嘅资产包括我哋嘅精力、才干同属灵嘅恩赐。我哋的确好想献出呢啲宝贵嘅资产，全力支持王国嘅工作。除此之外，宝贵嘅资产亦都包括我哋嘅财物。愿我哋喺捐献方面尽己所能，善用我哋嘅资财嚟荣耀耶和华上帝，表明我哋支持弥赛亚王国。

1,2．（甲）一直以来，耶和华嘅子民都喜乐噉参与乜嘢工作？（乙）耶和华最重视嘅系乜嘢？

一直以来，耶和华嘅忠贞子民都喜乐噉参与建筑工作，为耶和华嘅名带嚟赞美。例如，以色列人积极参与建造圣幕嘅工作，而且慷慨捐出财物嚟支持呢项工程。（出埃及记35:30-35；36:1,4-7）

² 喺耶和华睇嚟，最能够荣耀佢嘅唔系建筑物本身，呢个亦都唔系佢最重视嘅。（马太福音23:16,17）耶和华最重视嘅系佢仆人对佢嘅崇拜，包括佢哋甘心乐意同热心为佢服务，呢个亦都系最能够荣耀佢嘅。（出埃及记35:21；马可福音12:41-44；提摩太前书6:17-19）点解呢一点好重要？因为建筑物唔系永恒嘅。例如，圣幕同圣殿已经唔再存在。虽然系噉，耶和华从来都冇忘记过佢嘅忠贞仆人为咗支持建筑工程而付出嘅辛劳同显出嘅慷慨。（请读哥林多前书15:58；希伯来书6:10）

3．我哋喺呢一章会回顾乜嘢？

³ 同样，耶和华嘅现代子民都好努力兴建崇拜场所。我哋喺君王耶稣基督嘅指引下完成咗非凡嘅工作！好明显，耶和华的确祝福我哋嘅努力。（诗篇127:1）呢一章，我哋会回顾一啲以往完成咗嘅建筑工程，同埋呢啲工程点样荣耀耶和华。我哋都会听吓一啲曾经参与建筑工程嘅弟兄姊妹嘅心声。

建造王国聚会所

4．（甲）点解我哋需要更多崇拜场所？（乙）点解唔同嘅分部会合并？（另见附栏“切合需要嘅分部建筑工程”）

⁴ 正如第16章提到，耶和华要求我哋聚集起嚟崇拜佢。（希伯来书10:25）我哋嘅聚会唔单止可以强化我哋嘅信心，而且可以使我哋更加热心传道。随住末日临近，耶和华继续加快传道工作嘅进展。每年有成千上万嘅人加入上帝嘅组织。（以赛亚书60:22）由于上帝子民数目不断增加，印刷圣经书刊嘅设施需要不断扩充，亦都需要更多嘅崇拜场所。

5．点解王国聚会所呢个名称好适合？（另见附栏“新光教堂”）

⁵ 喺耶和华子民嘅现代历史早期，圣经研究者开始睇出佢哋需要有自己聚会嘅地方。1890年，其中一个最早嘅崇拜场所喺美国西弗吉尼亚州落成。到咗20世纪30年代，耶和华嘅子民已经兴建或者装修过好多聚会所，当时呢啲聚会所仲未有特别嘅名称。1935年，卢述福弟兄探访夏威夷嘅时候，有个新嘅聚会所喺度兴建紧，呢个聚会所同新嘅分部办事处系连埋一齐嘅。有人问卢述福弟兄呢座建筑物应该叫乜嘢名，佢回答话：“既然我哋做紧传讲王国好消息嘅工作，呢度系咪应该叫做‘王国聚会所’呢？”（马太福音24:14）呢个适当嘅名称唔系只有呢个聚会所专用，冇几耐，全球耶和华见证人大部分会众嘅崇拜场所都采纳呢个名称。

6,7．快速兴建嘅王国聚会所带嚟乜嘢好结果？

⁶ 20世纪70年代，王国聚会所嘅需求迅速增长。所以，美国嘅弟兄发明咗一种快速建筑方法，可以喺几日之内起好一个又美观又实用嘅聚会所。到咗1983年，组织喺美国同加拿大兴建咗大约200个呢种聚会所。为咗完成工作，弟兄开始喺个别地区设立建筑委员会。由于呢个方法好有效，中央长老团喺1986年正式采纳呢个安排。1987年，喺美国一共成立咗60个地区建筑委员会（英语简称RBC)。a到咗1992年，喺阿根廷、澳大利亚、法国、德国、日本、墨西哥、南非同西班牙都成立咗地区建筑委员会。弟兄姊妹为咗建造王国聚会所同大会堂而辛勤工作，佢哋所做嘅工作都系神圣服务嘅一部分，的确值得我哋大力支持。

⁷ 呢啲快速兴建嘅王国聚会所喺当地作咗美好嘅见证。例如，西班牙嘅一份报纸有篇文章，标题叫做“可以移山嘅信心”。文章评论马尔托斯镇王国聚会所嘅建筑工程，话：“好难相信喺今日呢个充满自私精神嘅世界，竟然会有自愿者无私噉从［西班牙］各地嚟到马尔托斯，一齐参与一个建筑工程。而且佢哋嘅工作既迅速有效，又有组织性，兴建嘅建筑物仲好完善，简直系前所未见嘅。”点解佢哋做得到呢？文章引述一位志愿者嘅评论回答咗呢个问题：“原因好简单，我哋都系受耶和华教导嘅。”

资源有限地区嘅建筑工程

8．1999年，中央长老团批准咗乜嘢新计划？点解要噉做？

⁸ 20世纪末，喺资源有限嘅地区，好多人都纷纷加入耶和华嘅组织，所以当地会众尽力兴建聚会场所。不过喺某啲资源有限嘅国家，弟兄姊妹受到嘲笑同歧视，因为当地嘅王国聚会所同其他宗教嘅崇拜场所相比之下显得好简陋。从1999年开始，为咗加快发展中国家嘅王国聚会所嘅建筑工作，中央长老团批准咗一个新嘅计划。好多嚟自较为富裕国家嘅资金会用嚟弥补资源有限地区嘅不足，使唔同嘅地区得以“均等”。（请读哥林多后书8:13-15）而且，嚟自其他国家嘅弟兄姊妹亦都会自愿参与建筑工作。

9．乜嘢工作睇嚟好艰巨？呢项工作有乜嘢成果？

⁹ 起初，呢项工作睇嚟好艰巨。2001年嘅一份报告显示，喺88个发展中国家，需要建造嘅王国聚会所超过1万8300个。不过，有上帝嘅圣灵同君王耶稣基督嘅支持，乜嘢工作都能够成功。（马太福音19:26）喺1999年到2013年嘅15年期间，上帝嘅子民按照呢个计划已经兴建咗2万6849个王国聚会所。b因为耶和华继续祝福传道工作，所以到咗2013年，呢啲国家仍然需要大约6500个王国聚会所。而家王国聚会所每年都有数以百计嘅新增需求。

10-12．王国聚会所嘅建筑工程点样为耶和华嘅名带嚟荣耀？

¹⁰ 呢啲新王国聚会所嘅建筑工程点样为耶和华嘅名带嚟荣耀呢？津巴布韦（辛巴威）分部办事处嘅一份报告话：“通常，一个新嘅王国聚会所建造咗唔够一个月，嚟参加聚会嘅人数就会增加一倍。”喺好多国家，睇嚟有啲人本来唔想同我哋来往。不过，有咗体面嘅聚会所之后，佢哋就唔同嘞。新嘅王国聚会所起好之后，好快就坐满晒人，需要兴建另一个。不过，吸引人亲近耶和华嘅唔单止系建筑物本身。弟兄姊妹参与建筑工程所表现出嘅真挚爱心，亦都影响人对上帝组织嘅睇法。请睇吓以下几个例子。

¹¹ 印度尼西亚有个男人一直睇住啲工人点样兴建王国聚会所，发现佢哋都系志愿者，佢话：“你哋真系好犀利呀！我见到你哋每个人都做得好投入好开心，而且又唔收钱。我谂世上冇任何宗教组织会好似你哋噉！”

¹² 乌克兰有个女人每日都经过王国聚会所嘅建筑工地，佢睇得出参与兴建嘅人都系耶和华见证人，同埋佢哋起紧嘅系王国聚会所。佢话：“我听讲过耶和华见证人，因为我妹妹都系见证人。从呢项建筑工程，我睇到你哋真系好有爱心，我都决定要加入呢个属灵大家庭。”呢个女子开始学习圣经，而且喺2010年受咗浸。

13,14．（甲）有对夫妇对王国聚会所嘅建筑工程有好嘅反应，我哋从中学到乜嘢？（乙）你可以作出乜嘢贡献，使聚会所能够为耶和华嘅名带嚟荣耀？

¹³ 阿根廷有对夫妇去见负责监督王国聚会所建筑工地嘅弟兄，丈夫话：“我哋一直好留意你哋嘅建筑工程，同埋……我哋决定要喺呢个地方学习上帝嘅知识。”佢仲话：“我哋要点样做先至符合资格参加呢度嘅聚会呢？”呢对夫妇接受咗圣经课程，但系有一个条件，就系要成家人一齐学习。弟兄好开心噉应承佢。

¹⁴ 你可能冇机会参与自己王国聚会所嘅建筑工程，但你仲系可以做好多嘢，使聚会所荣耀耶和华嘅名。例如，你可以积极邀请你嘅圣经学生、续访同其他人嚟王国聚会所一齐参加聚会。你亦都有机会帮手清洁同保养王国聚会所。你仲可以做好计划，通过捐款嚟支持王国聚会所嘅开支，或者资助世界各地崇拜场所嘅建筑工作。（请读哥林多前书16:2）呢一切都可以为耶和华嘅名带嚟更多赞美。

“甘心献出自己”嘅工人

15-17．（甲）大部分参与建筑工程嘅系乜嘢人？（乙）两对夫妇参加过国际建筑工程，你可以从佢哋嘅评论学到乜嘢？

¹⁵ 王国聚会所、大会堂同分部设施嘅建筑工作大部分都系由当地嘅弟兄姊妹嚟完成嘅。不过好多时，嚟自其他国家有建筑经验嘅弟兄姊妹都会帮手。有啲志愿人员安排好个人事务，可以用好几个星期嚟参与国际建筑工程。有啲甚至作出调整，可以从事呢啲工作好多年。当一个建筑工程完咗，佢哋就去下一个。

¹⁶ 参与国际建筑工作要面对特别嘅挑战，不过都会使人得到好多福分，感到满足。例如，蒂莫同莉娜去过亚洲、欧洲同南美洲嘅好多国家建造王国聚会所、大会堂同分部。蒂莫话：“过去30年期间，平均每两年我就会有一个新委派。”莉娜同蒂莫结咗婚25年，佢话：“我同蒂莫喺10个唔同嘅国家服务过。我哋要用好多时间同精力去适应新嘅食物、新嘅气候、新嘅语言同新嘅传道地区，仲要结识新嘅朋友。”c噉样做值唔值得呢？莉娜话：“虽然我哋要面对各种挑战，但系我哋得到好大嘅福分。我哋见到弟兄姊妹表现嘅基督徒爱心同好客精神，感受到耶和华仁爱噉照顾我哋。同时，我哋亲眼见证到马可福音10:29,30里面耶稣对门徒嘅承诺应验。我哋得到百倍嘅属灵弟兄、姊妹同母亲。”蒂莫话：“见到君王嘅财物不断增加，而我哋可以出一分力，用自己嘅技能去支持呢份最有意义嘅工作，真系好有满足感。”

¹⁷ 德伦同萨拉去过非洲、亚洲、中美洲、欧洲、南美洲同南太平洋嘅地区参与建筑工程，佢哋觉得自己得到嘅比付出嘅多好多。即使佢哋要面对挑战，但系，德伦话：“我觉得好荣幸可以同嚟自世界各地嘅弟兄姊妹一齐工作。我睇出大家都好爱耶和华，而呢种爱使我哋可以团结一致，紧密相连。”萨拉话：“我喺唔同文化背景嘅弟兄姊妹身上真系学到好多嘢！见到佢哋为咗事奉耶和华而作出嘅牺牲，激励我要继续将最好嘅献俾耶和华。”

18．诗篇110:1-3嘅预言点样应验？

¹⁸ 大卫王预言过上帝王国嘅子民即使会面对各种挑战，仍然会“甘心献出自己”为王国服务。（请读诗篇110:1-3）所有参与支持王国工作嘅人都有份应验呢个预言。（哥林多前书3:9）世界各地好多分部嘅建筑物同大会堂，以及数以万计嘅王国聚会所系确凿嘅证据，证明上帝嘅王国系真实嘅，而且正喺度施行统治。耶和华配得一切嘅荣耀！我哋能够为君王耶稣基督服务，一齐参与可以荣耀耶和华嘅工作，真系好大嘅荣幸！

1,2．（甲）犹地亚嘅基督徒面对乜嘢困境？（乙）为咗帮助犹地亚嘅基督徒，其他信徒点样将爱心化作行动？

时间大约系公元46年，犹地亚正经历紧严重嘅饥荒。由于粮食短缺，物价上涨，住喺嗰度嘅犹太裔基督徒买唔起食物。佢哋冇嘢食，如果继续噉样落去就会饿死。不过，佢哋好快就会体验到耶和华点样伸出援手保护佢哋，呢个系以往嘅基督徒从未经历过嘅。跟住发生乜嘢事呢？

² 耶路撒冷同犹地亚嘅犹太裔基督徒正身受苦难。喺叙利亚嘅安提阿，犹太裔同非犹太裔嘅基督徒知道情况之后，就为佢哋筹集资金。跟住，佢哋选出巴拿巴同扫罗呢两位负责嘅弟兄，将救援物资送去耶路撒冷，交俾会众嘅长老。（请读使徒行传11:27-30；12:25）请想象一下，犹地亚处于困境嘅弟兄姊妹见到安提阿嘅弟兄姊妹向佢哋表现爱心，一定深受感动！

3．（甲）今日，上帝嘅子民点样效法公元1世纪安提阿嘅基督徒？请举例。（另见附栏“现代第一次大规模嘅救援行动”）（乙）呢一章我哋会讨论乜嘢问题？

³ 呢件发生喺公元1世纪嘅事，系圣经首次记载有基督徒将救援物资运送俾其他地方嘅基督徒。今日，我哋都效法安提阿基督徒嘅榜样。当我哋知道信徒同工喺其他地方遇到考验或者灾难嘅时候，就会援助佢哋。a为咗明白赈灾工作同基督徒嘅其他职务有乜嘢关系，等我哋嚟讨论一下同赈灾职务有关嘅三个问题：点解我哋将赈灾工作睇成系一个职务？赈灾工作嘅目的系乜嘢？我哋点样从赈灾工作得益？

点解话赈灾工作系“敬奉上帝”嘅一种方式

4．关于基督徒嘅职务，保罗同哥林多会众讲咗啲乜嘢？

⁴ 喺保罗写俾哥林多会众嘅第二封信入面，佢解释基督徒有双重职务。保罗嘅信虽然系写俾受膏基督徒嘅，但系佢所讲嘅话喺今日都适用于基督“另外嘅绵羊”。（约翰福音10:16）一方面，我哋嘅职务系“劝人同［上帝］和好嘅职务”，即系传道同教导嘅工作。（哥林多后书5:18-20；提摩太前书2:3-6）另一方面，我哋嘅职务涉及到为信徒同工所做嘅事，就系保罗提到嘅“周济嘅事”。（哥林多后书8:4）喺“劝人同［上帝］和好嘅职务”同“周济嘅事”呢两节经文里面，译成“职务”同“事”嘅词都嚟自希腊语词迪阿科尼阿。点解明白呢一点咁重要呢？

5．保罗表明赈灾工作系基督徒嘅职务，点解明白呢点好重要？

⁵ 保罗使用同一个希腊语词嚟描述呢两件事，表明当时基督徒会众嘅各种职务亦都包括赈灾工作。佢之前讲过：“职务各有唔同，但主系相同嘅。能力各有唔同，……呢一切都系同一股圣灵发挥力量嘅结果。”（哥林多前书12:4-6,11）事实上，保罗将会众里面各种各样嘅职务睇成系“敬奉上帝”b嘅一种方式。（罗马书12:1,6-8）所以佢认为用一部分时间嚟“周济圣民”系适当嘅。（罗马书15:25,26）

6．（甲）点解保罗话赈灾工作系崇拜上帝嘅一种方式？（乙）今日，我哋喺世界各地点样执行赈灾工作？（见214页附栏“灾难发生时！”）

⁶ 保罗帮助哥林多会众明白到，点解赈灾工作系佢哋职务嘅一部分，亦都系崇拜耶和华嘅一种方式。保罗又指出，基督徒提供救援系因为佢哋“顺从基督嘅好消息”。（哥林多后书9:13）由于佢哋好想将基督嘅教导实践出嚟，所以采取行动帮助信徒同工。保罗话佢哋向弟兄姊妹表现爱心，其实系因为“上帝……非凡嘅分外恩典”。（哥林多后书9:14；彼得前书4:10）关于为有需要嘅弟兄姊妹服务，包括赈灾工作，《守望台》1975年12月1日刊（英语）明确指出：“毫无疑问，耶和华上帝同佢嘅爱子耶稣基督非常重视呢种服务。”的确，赈灾工作系敬奉上帝嘅一种重要方式。（罗马书12:1,7；哥林多后书8:7；希伯来书13:16）

赈灾工作有明确嘅目的

7,8．我哋赈灾工作嘅第一个目的系乜嘢？请解释。

⁷ 我哋嘅赈灾工作有乜嘢目的呢？保罗写俾哥林多会众嘅第二封信回答咗呢个问题。（请读哥林多后书9:11-15）佢喺信中提到，通过参与“呢个周济众人嘅任务”，即系赈灾工作，可以达成三个重要嘅目的。等我哋嚟逐个分析一下。

⁸ 第一，我哋嘅赈灾工作可以荣耀耶和华。请留意，喺上一段引录嘅五节经文里面，保罗多次提到耶和华上帝。使徒保罗话，赈灾工作能够“激发人感谢上帝”，而且“多多流露对上帝嘅感谢”。（11,12节）佢提到赈灾工作点样使基督徒将“荣耀归于上帝”同赞美“上帝……非凡嘅分外恩典”。（13,14节）关于赈灾工作，保罗总结话：“愿感谢归于上帝”。（15节；彼得前书4:11）

9．赈灾工作点样有助于消除人对耶和华见证人嘅误解？请举例。

⁹ 今日，上帝嘅仆人都同保罗一样，将赈灾工作视为荣耀耶和华嘅机会，而且可以为上帝嘅教导增光。（哥林多前书10:31；提多书2:10）事实上，赈灾工作往往可以有助于消除人对耶和华同见证人嘅误解。例如：喺一个遭受飓风袭击嘅地区，有位女士喺门口贴咗张告示：“耶和华见证人，请勿探访。”后来有一日，佢见到救援人员喺佢屋企对面修复紧一间房屋。佢观察呢啲态度友善嘅救援人员一段时间之后，就去打听吓佢哋系乜嘢人。知道呢啲志愿人员系耶和华见证人之后，佢觉得好惊讶，就话：“我误会咗你哋嘞。”结果点呢？呢位女士将门口嘅告示攞翻落嚟。

10,11．（甲）有乜嘢例子表明我哋可以“大大弥补”信徒同工嘅“缺乏”？（乙）乜嘢出版物可以帮助救援人员？（另见附栏“救援人员嘅另一个工具”）

¹⁰ 第二，我哋可以“大大弥补”信徒同工嘅“缺乏”。（哥林多后书9:12上）我哋好想满足弟兄姊妹嘅急切需要，帮助佢哋减轻痛苦。点解呢？因为基督徒会众嘅成员都属于“一个身体”，所以“身体一处受苦，各处就一同受苦”。（哥林多前书12:20,26）今日，好多弟兄姊妹受到弟兄之情同怜恤之心嘅推动，一收到通知就即刻放低手头上做紧嘅事，带埋工具去受灾嘅地区，援助信徒同工。（雅各书2:15,16）例如喺2011年，一场海啸袭击日本之后，美国分部办事处发咗一封信俾美国嘅地区建筑委员会，问有冇“一啲符合资格嘅弟兄姊妹”可以去日本帮助重建王国聚会所。结果点呢？几个星期之内，就有差唔多600位志愿人员提交申请，而且仲愿意自费飞到日本！美国分部办事处话：“我哋真系估唔到有咁多人积极响应。”一个日本弟兄问一位外国嘅救援人员点解会嚟帮手嗰时，对方回答话：“我哋同日本嘅弟兄姊妹都系属于‘一个身体’，我哋对弟兄姊妹嘅痛苦感同身受。”救援人员出于无私嘅爱心，甚至有时冒住生命危险去帮助信徒同工。c（约翰一书3:16）

¹¹ 其他人都好欣赏我哋嘅赈灾工作。例如，2013年有一场灾害袭击美国阿肯色州，有份报纸报道咗见证人嘅志愿者迅速采取行动。报道话：“耶和华见证人嘅志愿者喺赈灾方面组织得井井有条，天衣无缝。”正如使徒保罗所讲嘅，我哋确实“大大弥补”咗弟兄姊妹嘅缺乏，满足佢哋嘅需要。

12-14．（甲）点解帮助受灾嘅弟兄姊妹恢复属灵常规咁重要呢？（乙）弟兄姊妹嘅心声点样强调参与属灵活动嘅重要性？

¹² 第三，我哋可以帮助受灾嘅弟兄姊妹恢复属灵常规。呢个点解咁重要呢？保罗提到嗰啲得到援助嘅人会受到感动而“多多流露对上帝嘅感谢”。（哥林多后书9:12下）如果受灾嘅弟兄姊妹想向耶和华表达感激之心，有乜嘢比尽快恢复属灵常规更好呢？（腓立比书1:10）《守望台》喺1945年指出：“保罗同意……收集捐款系因为可以帮助……有需要嘅弟兄姊妹得到一啲救援物资，噉样佢哋就可以更有力量同热心参与传道工作。”今日，我哋嘅目的都一样。当弟兄姊妹恢复传道工作嘅时候，唔单止可以帮助受灾嘅邻居，仲可以强化自己。（请读哥林多后书1:3,4）

¹³ 弟兄姊妹得到援助之后，重新开始传道工作，亦都因为噉而得到强化。等我哋嚟听吓佢哋嘅心声。一个弟兄话：“我哋成家人可以去传道真系好大嘅福分，当我哋努力去安慰其他人嘅时候，就唔会太过专注于自己嘅忧虑。”一个姊妹话：“专注属灵嘅活动会令我忘记自己处于灾难之中，俾到我安全感。”另一个姊妹话：“虽然好多嘢我哋都控制唔到，但系传道可以帮助我哋一家人专注于未来嘅希望。我哋向人传讲新世界嘅希望，可以令我哋更加坚信一切将会焕然一新。”

¹⁴ 受灾嘅信徒同工需要尽快恢复嘅另一个属灵活动，就系参加聚会。请睇吓清子姊妹嘅经历。当时清子差唔多60岁，佢喺一场海啸之后失去咗一切，除咗佢着住嘅衫同凉鞋之外就乜都冇晒。佢好迷茫，唔知可以点样生活落去。后来有位长老话俾清子知，佢安排咗大家喺佢嘅车入面照常举行聚会。清子话：“呢位长老同太太，仲有另一个姊妹同我一齐坐喺车入面。聚会虽然好简单，不过就好似一个奇迹噉，令我暂时忘记海啸，感到内心安宁。嗰次聚会使我睇出，同基督徒交往有几咁大嘅帮助。”另一个受灾嘅姊妹参加聚会之后，话：“聚会使我可以有力量生存落去！”（罗马书1:11,12；12:12）

赈灾职务带嚟恒久嘅益处

15,16．（甲）哥林多会众同其他基督徒通过参与赈灾工作得到乜嘢益处？（乙）今日，我哋参与赈灾工作同样得到乜嘢益处？

¹⁵ 当保罗提到赈灾工作嘅时候，佢亦讲到哥林多会众同其他基督徒可以通过参与呢项工作得益。佢话：“佢哋［耶路撒冷得到援助嘅犹太裔基督徒］亦因为上帝赐俾你哋非凡嘅分外恩典，就切切想念你哋，为你哋恳切祈求。”（哥林多后书9:14）冇错，由于哥林多嘅弟兄姊妹，包括非犹太裔嘅基督徒表现慷慨嘅精神，得到援助嘅犹太裔基督徒一定深受感动，为佢哋祷告，亦都更爱佢哋。

¹⁶ 《守望台》1945年12月1日刊（英语）运用保罗嘅话说明赈灾工作对我哋嘅益处，话：“请想象吓，一个地方嘅圣民去援助另一个地方嘅圣民，噉样做系几咁团结啊！”今日嘅救援人员都有同感。一位参与过水灾救援嘅长老话：“我觉得参与救援工作使我同弟兄姊妹比以往任何时候都更加亲近。”一位受到援助嘅姊妹好感激噉话：“呢种深厚嘅弟兄之情，令我觉得自己好似已经喺乐园里面一样。”（请读箴言17:17）

17．（甲）赈灾工作点样应验以赛亚书41:13嘅话？（乙）点解赈灾工作可以荣耀耶和华，而且使我哋更加团结？请举例说明。（另见附栏“世界各地嘅志愿人员参与救援工作”）

¹⁷ 当救援人员到达灾区嗰阵，受灾嘅弟兄姊妹特别感受到上帝确实履行咗佢嘅承诺：“我，就系你嘅上帝耶和华，正握住你嘅右手，同你讲：‘你唔使怕，我必定帮助你。’”（以赛亚书41:13）一个劫后余生嘅姊妹话：“睇到灾难造成嘅破坏真系令我好绝望，但系耶和华向我伸出援手，通过弟兄姊妹帮助我，呢啲系难以用言语嚟形容嘅。”两位长老喺天灾之后代表佢哋嘅会众写咗一封信，话：“地震带嚟好大嘅痛苦，但系我哋体验到耶和华通过弟兄姊妹嚟帮助我哋。以前我哋只系读过有关赈灾工作嘅资料，不过而家就亲身体验到。”

你都可以出一分力

18．如果你想参与赈灾工作，可以点做？（另见附栏“参与赈灾工作改变佢嘅一生”）

¹⁸ 你想唔想感受吓赈灾工作嘅喜乐呢？一般救援人员都系从参与建造王国聚会所嘅人当中选出嚟嘅。如果你有呢个打算，可以话俾会众嘅长老知，你想申请参加王国聚会所建筑工程。一位参与过多年赈灾工作嘅长老提醒话：“你一定要收到赈济委员会嘅正式邀请，先至可以前往灾区。”噉样，就可以使我哋嘅赈灾工作有秩序噉进行。

19．我哋嘅赈灾工作点样有力噉表明我哋系真基督徒？

¹⁹ 基督吩咐门徒要“彼此相爱”，服从呢个吩咐嘅一个好方法就系参与赈灾工作。我哋通过呢种方式表现爱心，就证明自己确实系基督嘅门徒。（约翰福音13:34,35）今日，有咁多弟兄姊妹甘心献出自己，援助嗰啲忠贞支持上帝王国嘅人，为耶和华增光。呢个对我哋嚟讲系几咁大嘅福分啊！

你同圣经学生啱啱睇完一节经文。跟住，你睇到佢双眼好似发光噉，佢似乎明白咗经文嘅意思。然之后，佢慢慢反应过嚟，问：“你嘅意思系，圣经话我哋可以喺乐园里面永远噉生活落去，乐园就喺地球度？”你嘅传道同伴微笑咗一下，对佢讲：“你啱啱睇过嘅经文系咪噉讲嘅呢？”学生好惊讶噉拧一拧头，话：“真系唔敢相信，我从来都冇听讲过！”你谂翻几个星期之前，佢学到上帝嘅名系耶和华嗰时，都系噉讲嘅。

你系咪都有过噉嘅经历呢？好多基督徒都有。睇到学生对圣经真理嘅反应咁好，我哋好自然就会谂，可以确切噉认识真理，系一份几咁宝贵嘅礼物啊！不妨停落嚟谂吓，当初你系点样收到呢份礼物嘅。喺呢一篇会讲吓呢个问题。过去一百年期间，上帝王国嘅君王耶稣基督一直积极噉教导上帝嘅子民，帮助佢哋认识真理。上帝嘅子民逐步得到属灵嘅启迪，唔系已经清晰噉证明咗上帝嘅王国系真实嘅咩？

今日你唔使返工，朝早起身，谂住去传道，但系觉得有啲攰，噉去唔去好呢？如果可以休息半日就好嘞！你向上帝祷告，之后仲系决定去。你嘅传道同伴系一位忠心嘅年长姊妹，佢坚忍不拔、和蔼仁慈嘅态度打动咗你嘅心。你哋逐家逐户传讲王国真理嗰时，你谂到全球嘅弟兄姊妹都喺度宣扬同一个信息，分发一样嘅书刊，接受同样嘅培训而得到益处。返到屋企，你精神百倍，真系庆幸自己冇留喺屋企！

今日，上帝嘅王国委派俾基督徒嘅首要任务就系传道。耶稣预告喺最后嘅日子，传道工作会不断扩展，规模之大令人惊奇。（马太福音24:14）呢个预言点样应验呢？传道工作可以令千百万人睇出，上帝嘅王国系真实嘅。呢篇会讲吓传道嘅人、传道嘅方法同埋传道嘅工具。要完成传道任务，呢三样都系非常重要嘅。

你经过隔篱屋，同邻居挥手打招呼。最近，你发觉呢个邻居一直喺度留意你哋一家人。今次佢向你招手，叫你过去，然后同你讲：“我可唔可以问你一个问题呀？点解你哋同其他人唔一样嘅？”你答佢：“你嘅意思系……”佢就话：“你哋系耶和华见证人，系咪呢！你哋同其他人好唔同，同其他宗教团体都唔一样。你哋唔庆祝节日，唔参政，唔当兵，又唔食烟。睇嚟，你同屋企人都有高尚嘅道德标准。耶和华见证人同其他人咁唔一样，点解嘅？”

答案好简单：我哋都接受上帝王国嘅统治，君王耶稣不断熬炼我哋，帮助我哋跟住佢嘅脚步行，使我哋同目前嘅邪恶世界分别开嚟。呢一篇我哋会睇吓，君王点样通过弥赛亚王国，喺属灵、道德同组织方面熬炼上帝嘅子民，为耶和华增光。

你正喺度逐家逐户传道，突然间听到有警车声，声音越嚟越大。你啱啱开口同住户讲话，你嘅同伴就睇见一架警车停低咗，有个警察落车行过嚟问：“逐家逐户同人讲圣经嘅，就系你哋两个啊？我哋接到好多投诉喎！”你好有礼貌噉回答佢，仲表明自己系耶和华见证人。接落嚟会有咩事发生呢？

结果会点样，往往同过去发生嘅事有好大关系。一直以来，你住嘅地方，当地嘅政府点样对待耶和华见证人呢？你哋有冇宗教自由呢？有嘅话，好可能系因为过去几十年来，你嘅属灵弟兄姊妹努力“为好消息辩护，通过法律途径确立好消息嘅工作”。（腓立比书1:7）无论你生活喺边度，沉思耶和华见证人喺法律上一次又一次获得嘅胜诉，你嘅信心都会大受强化。呢一篇会睇吓其中一啲获得胜诉嘅案件。连场胜诉充分证明上帝嘅王国系真实嘅，因为单凭我哋自己嘅能力，根本冇可能做得到。

你面带笑容噉望住台上嘅讲者，流露出赞赏嘅眼神。呢个年轻嘅弟兄同你属于同一群会众，呢次系佢第一次喺大会担任节目。你好欣赏佢嘅演讲，内心自然会感叹，上帝子民受到嘅培训实在系太好嘞！你仲记得佢第一次喺台上嘅情形，同而家简直好似两个人噉。佢参加先驱训练班之后进步好大，最近仲同太太参加咗王国传福音者训练班。佢嘅演讲真系好精彩，你一边鼓掌，一边望住周围嘅听众，同时谂到上帝嘅所有子民都得到优良嘅教导。

圣经预告，上帝嘅子民都会“受耶和华教导”。（以赛亚书54:13）呢个预言今日正喺度应验。耶和华嘅组织除咗通过出版物，仲通过聚会同大会教导我哋。组织亦都设立咗各种训练班，帮助我哋履行组织交托嘅各项职务。呢一篇，我哋会睇吓呢啲教导点样充分表明上帝嘅王国正喺度施行统治。

你行入王国聚会所，几乎认唔出呢个地方。你一直都因呢个王国聚会所而感到自豪。你几年前参加过呢个聚会所嘅建筑工作，可能仲留低咗美好嘅回忆。而家，你感到更加自豪，因为呢个王国聚会所临时用嚟做一个救援中心。最近嘅一场暴风引起水灾，使呢个地区受到严重嘅破坏。分部委员会迅速组织起嚟，为灾民提供食物、衣物、饮用水同其它帮助。呢啲捐助嘅救援物资摆放得好整齐。弟兄姊妹有秩序噉排队领取自己需要嘅物品，当中好多人都流下感动嘅泪水。

耶稣话，彼此相爱系佢门徒嘅显著标志。（约翰福音13:34,35）呢一篇我哋会睇吓，耶和华见证人点样通过建筑工程同赈灾工作表现出基督徒嘅爱。呢啲出于爱心嘅行动有力噉证明我哋正生活喺弥赛亚王国嘅统治之下。