以色列人就快结束喺旷野嘅流浪生活嗰阵，嚟到一个叫米利巴嘅地方。呢个米利巴喺应许之地边境嘅加低斯附近，同之前嗰个唔系同一个地方。a以色列人再次埋怨冇水饮。（民数记20:1-5）不过呢次，摩西处理问题嘅时候犯咗严重嘅错。

9．耶和华吩咐摩西乜嘢？但系摩西点样做？（请睇吓课文开头嘅图片）

⁹ 摩西点样应对呢次反叛？佢再一次向耶和华寻求指引。但耶和华今次冇叫摩西击打岩石，而系叫佢攞住杖，召集民众到岩石前面，然后向岩石讲话。（民数记20:6-8）但系摩西冇噉样做，而系好嬲噉大声同民众讲：“你哋呢啲叛徒听住！唔通一定要我哋从呢块岩石当中引水俾你哋先至得？”讲完之后，佢唔止一次，而系两次击打岩石。（民数记20:10,11）

10．耶和华对摩西所做嘅事有乜嘢反应？

¹⁰ 摩西所做嘅事使耶和华好愤怒。（申命记1:37；3:26）点解耶和华有咁强烈嘅反应？使耶和华发怒嘅原因可能有几个，而其中之一就系，摩西冇按照耶和华呢次嘅指示去做。

11．点解摩西击打岩石可能会使以色列人觉得耶和华冇施行奇迹？

¹¹ 另一个原因可能系，喺第一个米利巴，周围都系坚固嘅花岗岩。无论人点样击打呢啲岩石，正常嚟讲都唔可能有水涌出嚟。但系，第二个米利巴就好唔同，地质构成主要系石灰岩。由于石灰岩有多孔透水嘅特性，岩层下面往往储藏咗大量嘅地下水。喺呢啲地区，人只要凿开岩层就可以取水饮用。所以，如果摩西唔系对岩石讲话，而系击打岩石，噉以色列人会唔会因为呢个原因，就觉得啲水系自然涌出嘅，而唔系耶和华施行咗奇迹？b我哋唔可以肯定。

摩西违背耶和华嘅训示

12．耶和华对摩西同亚伦发怒嘅另一个原因可能系乜嘢？

¹² 耶和华对摩西同亚伦发怒可能仲有另一个原因。请留意摩西对民众所讲嘅话。佢话：“唔通一定要我哋从呢块岩石当中引水俾你哋先至得？”摩西所讲嘅“我哋”，睇嚟系指佢同亚伦。摩西噉样讲，表明佢冇将所有功劳归俾真正施行奇迹嘅耶和华，冇对耶和华表现尊重嘅态度。诗篇106:32,33所讲嘅好可能就系呢件事。经文话：“佢哋喺米利巴水边惹动怒气，结果摩西因佢哋而遭殃。佢哋使摩西苦恼气愤，于是佢嘅嘴冒失发言。”c（民数记27:14）摩西嘅行为表明，佢冇将耶和华应得嘅荣耀归俾耶和华。耶和华对摩西同亚伦讲：“你哋违背咗我嘅训示。”（民数记20:24）呢个真系一个严重嘅过犯！

13．点解耶和华对摩西嘅判决系公平合理嘅？

¹³ 摩西同亚伦身为耶和华子民嘅领袖，要承担更大嘅责任。（路加福音12:48）之前，以色列人因为反叛耶和华，结果耶和华唔允许嗰一代人进入应许之地。（民数记14:26-30,34）摩西违背耶和华嘅训示，所以耶和华亦都唔允许摩西进入应许之哋。耶和华对摩西作出同样嘅判决，系公平合理嘅。

问题嘅起因

14,15．乜嘢导致摩西违背耶和华嘅训示？

¹⁴ 乜嘢令摩西违背耶和华嘅训示？请再一次留意诗篇106:32,33：“佢哋喺米利巴水边惹动怒气，结果摩西因佢哋而遭殃。佢哋使摩西苦恼气愤，于是佢嘅嘴冒失发言。”摩西见以色列人反叛耶和华就深感怨愤，结果冇控制自己嘅情绪，讲出鲁莽嘅话。

¹⁵ 摩西受其他人影响，冇继续仰望耶和华。以色列人第一次埋怨冇水饮嗰阵，摩西用咗正确嘅方式处理问题。（出埃及记7:6）不过，可能摩西因为以色列人多年来都反叛上帝，就变得身心疲累，灰心丧气。摩西可能过度重视自己嘅感觉，而冇考虑可以点样荣耀耶和华。