和平——你点样可以得到？
我哋生活喺一个充满难题嘅世界，要付出努力先可以得到和平。即使我哋已经喺某程度上得到和平，但如果想继续保持，就要不断奋斗。上帝嘅话语点样帮助我哋揾到真正同恒久嘅和平？我哋可以点样帮助其他人得到呢种和平？
点样先可以享有真正嘅和平？
要得到真正嘅和平，我哋就需要有安全感以及平和嘅心境，亦都需要同其他人建立良好嘅关系。最重要嘅系，我哋必须同上帝培养亲密嘅关系先可以享有恒久嘅和平。我哋可以点样做？
生活上嘅忧虑使好多人失去内心嘅安宁
我哋听从耶和华正义嘅诫命同原则，就表明我哋信赖佢，好想同佢有和睦嘅关系。（耶利米书17:7,8；雅各书2:22,23）我哋噉样做，耶和华就会亲近我哋，使我哋内心得享安宁。以赛亚书32:17话：“正义嘅成果就系和平，正义嘅成效就系永恒嘅宁静与安稳。”我哋衷心服从耶和华，内心就可以得到真正嘅安宁。（以赛亚书48:18,19）
圣灵系天父赐俾我哋无与伦比嘅礼物，亦都可以帮助我哋培养和平呢种特质。（使徒行传9:31）
上帝嘅圣灵帮助我哋培养和平
和平系使徒保罗列出嘅第三种圣灵果实特质。（加拉太书5:22,23）既然和平系圣灵果实嘅其中一种特质，我哋顺应圣灵就可以培养出真正嘅和平。等我哋嚟睇吓圣灵帮助我哋得到和平嘅两个方法。
第一，上帝嘅话语系由圣灵启示嘅，经常阅读可以帮助我哋培养和平呢种特质。（诗篇1:2,3）我哋沉思圣经内容嗰阵，上帝嘅圣灵就会帮助我哋明白耶和华对各种事情嘅睇法。例如，我哋可以睇出佢点样促进和睦同埋点解佢咁重视和平。我哋喺生活上实践学到嘅圣经知识，就可以得享更多平安。（箴言3:1,2）
第二，我哋要向上帝祈求圣灵。（路加福音11:13）耶和华承诺，如果我哋向佢寻求帮助，“［佢］就一定会赐［我哋］平安，超越人所能理解嘅。呢种平安通过基督耶稣，可以守护［我哋］嘅内心同头脑”。（腓立比书4:6,7）如果我哋向耶和华祷告并仰赖佢嘅圣灵，佢就会使我哋嘅内心充满和平安宁。只有同上帝关系亲密嘅人先可以得享呢种平安。（罗马书15:13）
以下嘅例子表明，我哋实践呢个圣经原则并作出必要嘅调整，就可以使自己内心享有平安，同耶和华及其他人保持和睦嘅关系。
佢哋点样揾到恒久嘅和平
喺今日嘅基督徒会众，一啲曾经“容易发怒嘅人”而家喺待人方面变得更加温和体贴、耐心仁慈。a（箴言29:22）请留意两个传道员点样得到帮助，克服脾气暴躁嘅缺点，而且同其他人建立和睦嘅关系。
实践圣经原则；向耶和华祷告，祈求佢赐圣灵帮助我哋同其他人和睦相处
戴维嘅坏品格影响佢嘅讲话方式。喺献身俾耶和华之前，佢经常挑剔其他人，而且对家人讲话尖酸刻薄。戴维睇出自己需要作出改变，经过努力之后，佢慢慢学识同其他人和睦相处。点解佢能够培养出和平呢种特质？佢话：“我喺生活上努力实践圣经原则，结果我同家人更加彼此尊重。”
瑞秋嘅成长背景影响佢嘅行为态度。佢话：“我嘅家人经常嘈交。因为喺噉样嘅家庭环境长大，即使而家我仲系要控制自己暴躁嘅脾气。”乜嘢帮助佢变得更加平和？佢回答话：“不断祷告，信赖耶和华。”
戴维同瑞秋嘅例子表明，如果我哋实践圣经原则并倚靠上帝嘅圣灵，就能够结出和平嘅果实。就算生活喺一个充满敌意嘅世界，我哋都可以得享内心安宁。呢种和平有助于我哋同家人、弟兄姊妹和睦共处。除此之外，耶和华亦都鼓励我哋“要尽力同所有人和睦相处”。（罗马书12:18）有冇可能做到？我哋再嚟睇吓，努力促进和睦会带嚟乜嘢益处。
追求和睦
我哋向地区嘅人传道，就系帮助人从上帝王国嘅和平信息得益。（以赛亚书9:6,7；马太福音24:14）令人开心嘅系，好多人都作出响应。佢哋接受真理之后，对周围所发生嘅事唔再感到绝望或者愤怒，反而对未来嘅真正希望怀有信心，并且受推动去“寻求和睦，追求不已”。（诗篇34:14）
不过，唔系所有人一开始就会马上接受我哋传讲嘅信息。（约翰福音3:19）即使系噉，我哋都得到上帝圣灵嘅帮助，用平和、尊重嘅态度向人传讲好消息。我哋噉样做就系听从耶稣喺传道工作上嘅教导。马太福音10:11-13记录咗耶稣所讲嘅：“你哋入嗰一家嘅时候，要向家里嘅人问好。嗰一家如果系配得嘅，就愿你哋所求嘅平安临到佢哋；如果系唔配得嘅，就愿你哋所求嘅平安归于你哋。”我哋按照耶稣嘅指引去做，离开嘅时候内心依然可以保持平和，同时期望对方将来会接受好消息。
我哋以尊重嘅态度对待政府官员，包括嗰啲反对我哋工作嘅人，就可以促进和睦。例如喺非洲某个国家，政府因为偏见而唔准我哋建造王国聚会所。为咗以和平嘅方式解决呢个问题，一个曾经喺非洲做过特派传道员嘅弟兄受委派去见呢个国家驻英国伦敦嘅大使。弟兄想同大使说明，耶和华见证人喺佢国家嘅工作。呢次拜访嘅结果点样呢？
弟兄话：“去到前台嗰阵，我从接待员嘅衣着睇出佢属于某个部族。我学过佢嘅语言，于是就用佢嘅母语同佢打招呼。佢觉得好惊讶，就问我：‘你嚟呢度有乜嘢事？’我礼貌噉话俾佢知，我想同大使见面。佢打电话俾大使，之后大使就出嚟见我，用佢嘅语言同我打招呼。佢认真噉听我讲述有关见证人嘅和平活动。”
弟兄以尊重嘅态度向呢位大使作出解释，消除咗佢对我哋工作嘅误解同偏见。一段时间之后，呢个非洲国家嘅政府批准咗见证人嘅建筑申请。事情以和平嘅方式得到解决，弟兄真系感到好开心！尊重待人的确带嚟好多益处，包括和平。
永远享有和平
今日，耶和华嘅子民喺属灵乐园享有真正嘅和平。你喺生活上努力培养和平呢种特质，就可以得享更多平安。最重要嘅系，你会得到耶和华嘅悦纳，喺上帝嘅新世界得到丰富同恒久嘅和平。（彼得后书3:13,14）
a “圣灵嘅果实”系列文章将会喺日后讨论仁慈呢种特质。