1981年1月，米琳卜布坐巴士去当地市场嗰时，无意中听到文章开头嘅嗰句话。我太太想知多啲，就问嗰个女子叫咩名同住喺边。佢话自己叫亚普，不过就冇讲自己住边度。喺20世纪80年代，见证人仲系受到禁制，所以佢要小心谨慎。于是，佢问我太太住喺边。我太太返到屋企嗰时好兴奋。

米琳卜布话：“我听到一啲好奇妙嘅事。一个女子话俾我知，人好快就唔使再面对死亡，连野兽都会变得好温驯。”对我嚟讲，呢番话听起嚟就好似天方夜谭噉。不过，我同太太讲：“不如佢过嚟嗰时，我哋再听吓佢点讲。”

三个月之后，亚普嚟探访我哋。喺之后嘅几次探访当中，我哋有机会认识一啲吉尔吉斯族早期嘅见证人。呢啲姊妹帮助我哋认识耶和华同埋佢对人类嘅旨意。佢哋又向我哋读出《从乐园嘅失落到乐园嘅复得》呢本书嘅内容。a