3．呢篇课文会分析乜嘢？点解？

³ 保罗知道呢种自私嘅爱会传染人，会危害基督徒嘅属灵健康。所以，佢警告基督徒要“避开”嗰啲表现错误嘅爱嘅人。（提摩太后书3:5）不过，我哋唔能够完全避免同呢啲人接触。噉我哋可以点样保护自己免受呢种世俗态度所影响，从而取悦我哋充满爱心嘅耶和华上帝呢？我哋比较一下上帝嘅爱同提摩太后书3:2-4所描述嘅爱有乜嘢分别，就可以帮助我哋衡量，自己有冇表现出真正使人满足同快乐嘅爱。

爱上帝抑或爱自己？

4．点解适当噉爱自己系冇错嘅？

⁴ 保罗话：“人必专爱自己”。噉系咪话爱自己系错嘅呢？唔系。爱自己系正常亦都需要嘅，因为耶和华将我哋设计成噉样。耶稣话：“要爱人如己”。（马可福音12:31）如果我哋唔爱自己，就唔会爱其他人。另一节经文话：“丈夫应该爱妻子，就好似爱自己嘅身体 噉。爱妻子就系爱自己 嘞。从来冇人恨恶自己嘅身体，只会喂养爱护”。（以弗所书5:28,29）所以，适当噉爱自己系冇错嘅。

5．你会点样形容嗰啲专爱自己嘅人？

⁵ 提摩太后书3:2提到专爱自己。呢种爱唔系一种正常、健康嘅爱，而系一种自私、被扭曲嘅爱。一个专爱自己嘅人会自视过高。（请读罗马书12:3）佢哋最关心嘅就系自己，而好少去关心其他人。出现问题嘅时候，佢哋往往会推卸责任。一个圣经评注讲到嗰啲专爱自己嘅人就好似一只“刺猬……佢会卷成一个球噉，用自己柔软嘅毛嚟取暖……但系佢嘅尖刺就会对住人。”呢啲以自我为中心嘅人唔会得到真正嘅快乐。

6．我哋爱上帝会得到乜嘢好结果？

⁶ 有啲圣经学者认为，保罗之所以先提出专爱自己，系因为呢种态度会引致之后佢所提到嘅其他态度。不过，爱上帝嘅人会结出好唔同嘅果实。圣经将爱上帝同“喜乐、和平、耐心、仁慈、良善、信心、温和、自制”呢啲特质联系埋一齐。（加拉太书5:22,23）诗篇执笔者话，“有耶和华作为上帝，噉样嘅人先算有福！”（诗篇144:15）耶和华系快乐嘅上帝，佢嘅子民都反映出呢种特质。另外，专爱自己嘅人只系会谂自己可以得到乜嘢，而耶和华嘅仆人就好乐意为其他人付出，所以佢哋好快乐。（使徒行传20:35）

7．有乜嘢问题可以帮助我哋分析自己对上帝嘅爱？

⁷ 一个人点样知道佢系咪爱自己过于爱上帝？请考虑吓腓立比书2:3,4嘅劝告：“凡事都唔好好辩争胜，唔好自命不凡，要谦卑，睇其他人比自己优越。各人唔好只系顾住自己嘅事，亦要顾及其他人嘅事。”我哋可以问吓自己：“我有冇喺生活上听从呢个劝告？我系咪尽力遵行上帝嘅旨意？我有冇主动帮助弟兄姊妹同其他人？”为其他人付出有时唔容易，因为付出系需要不断努力同自我牺牲。但系噉做能够得到宇宙至高统治者嘅认可，有乜嘢可以比呢个更能够使我哋快乐呢？

8．对上帝嘅爱推动一啲人点样做？

⁸ 由于爱上帝，一啲基督徒甘愿放弃高薪嘅职业，想为耶和华作更多服务。住喺美国嘅埃丽卡系一个医生，佢冇喺医学方面追求更大嘅成就，而系选择做正规先驱，佢同丈夫曾经去过几个国家服务。谂翻转头，佢话：“我哋喺外语地区帮手，有好多美好嘅经历，亦都结识咗好多朋友。我哋嘅生活变得多姿多彩。我依然系一个医生，但系而家我将大部分嘅时间同精力用嚟教导人认识耶和华同帮助弟兄姊妹，呢个使我嘅内心得到真正嘅喜乐同满足。”

天上嘅财宝定系地上嘅财宝？

9．点解贪爱钱财嘅人唔会真正快乐？

⁹ 保罗话人会“贪爱钱财”。若干年前，爱尔兰一位先驱同一个男子谈及上帝。呢个男子拎出佢嘅银包，攞住啲钱，举高，跟住话：“呢个就系我嘅上帝！”虽然好多人都唔承认自己爱金钱同嗰啲用钱买得到嘅嘢，但系佢哋对钱财嘅睇法同呢个男子一样。圣经警告话：“贪爱银子嘅人，有咗银子亦唔会满足；贪爱钱财嘅人，收入再多都唔会知足。”（传道书5:10）呢啲人总系想要更多钱，佢哋不断追求财富，结果将自己刺得“遍体鳞伤”。（提摩太前书6:9,10）

10．关于富有同贫穷，圣经提到乜嘢？

¹⁰ 当然，我哋人人都需要钱。因为钱可以喺某程度上保护人。（传道书7:12）但系一个人只系满足到生活嘅基本需要，佢会唔会真正快乐呢？绝对会！（请读传道书5:12）雅基嘅儿子亚古珥话：“求你使我既唔贫穷亦唔富有，等我可以开怀食分俾我嘅食物”。我哋好明白点解佢话唔想贫穷。佢继续解释话，佢担心由于贫穷就受引诱去偷窃，结果羞辱耶和华嘅名。但系点解佢唔祈求上帝使佢富有呢？佢话：“免得我饱足之后就唔认你，话：‘耶和华系边个？’”（箴言30:8,9）你可能会谂到有啲人信赖自己嘅财富过于信赖上帝。

11．关于金钱，耶稣提出乜嘢劝告？

¹¹ 一个爱金钱嘅人唔能够取悦耶和华。耶稣话：“一个人唔能够做两个主人嘅奴隶。佢唔系讨厌呢个，钟意嗰个，就系忠于呢个，轻视嗰个。你哋唔能够又做上帝嘅奴隶，又做财富嘅奴隶。”佢讲呢句之前亦都话：“你哋唔好再为自己喺地上积存财宝，地上有蛾蛀，有锈蚀，亦都有贼挖洞嚟偷。你哋要为自己喺天上积存财宝，天上冇蛾蛀，冇锈蚀，亦都冇贼挖洞嚟偷。”（马太福音6:19,20,24）

12．过简朴嘅生活点样使我哋更好噉为耶和华服务？请举例。

¹² 好多人都发现，过简朴嘅生活使佢哋更加开心，亦都使佢哋有更多时间为耶和华服务。住喺美国嘅杰克卖咗间大屋同佢盘生意，因为佢知道自己噉样做先能够同太太一齐做先驱。佢话：“我觉得真系好难去放弃一间咁靓嘅屋同喺郊区嘅物业，不过以往咁多年来，我返到屋企一谂到工作上嘅难题就觉得好烦。而我太太系一位正规先驱，佢就成日都好开心。佢同我讲，‘我嘅老板系最好嘅！’而家我都系一位先驱，我哋两个一齐为同一个老板工作，佢就系耶和华。”

13．我哋点样知道自己对金钱嘅真正睇法？

¹³ 如果想知道自己对金钱嘅真正睇法，就需要诚实噉问吓自己：“圣经提到关于金钱方面嘅原则，我系咪真系相信而且应用出嚟？揾钱系咪我一生中最重要嘅事？我重视物质多啲，定系重视同耶和华、同其他人嘅关系多啲？我系咪真系相信耶和华会照顾我？”我哋可以肯定上帝唔会令信赖佢嘅人失望。（马太福音6:33）

爱耶和华抑或爱享乐？

14．对享乐有平衡嘅观点系乜嘢意思？

¹⁴ 圣经预言，今日好多人会“爱享乐”。我哋会以平衡、合理嘅观点睇自己同金钱。同样，我哋亦都需要以平衡嘅观点睇享乐。耶和华唔系想我哋做一个苦行者，或者避开一啲使人快乐又有益嘅活动。圣经鼓励上帝嘅忠仆话：“你即管欢欢乐乐噉食嘢，开开心心噉饮酒，因为上帝已经悦纳你所做嘅事。”（传道书9:7）

15．“爱享乐”系乜嘢意思？

¹⁵ 提摩太后书3:4提到追求享乐嘅人会弃绝上帝。请留意，经文唔系话人爱享乐多过 爱上帝，因为呢种讲法表明人多少都仲系爱上帝嘅。经文话佢哋“唔爱 上帝”。一位学者解释：“经文绝对唔系话佢哋仍然对上帝有某种程度嘅爱，而系话佢哋完全唔爱上帝。”对于嗰啲爱享乐嘅人嚟讲，呢个系好严厉嘅警告！圣经形容“爱享乐”嘅人就好似俾“享乐掳去”一样。（路加福音8:14）

16,17．喺享乐方面，耶稣立下咗乜嘢榜样？

¹⁶ 耶稣喺享乐方面有平衡嘅观点。佢参加过一个“婚宴”同一个“盛宴”。（约翰福音2:1-10；路加福音5:29）喺婚宴现场，由于冇足够嘅酒供应，耶稣就施行奇迹将水变成酒。喺另一个场合，有啲自以为义嘅人批评耶稣贪食好酒，不过耶稣清楚表明呢啲人并冇平衡嘅观点。（路加福音7:33-36）

¹⁷ 不过，耶稣并冇将享乐视为佢一生中最重要嘅事。佢将耶和华放喺首位，亦都毫无保留噉为其他人服务。为咗拯救人类，佢甘愿喺苦刑柱上痛苦死去。耶稣提到跟从佢嘅人话：“人因为我嘅缘故，侮辱你哋，迫害你哋，用各种邪恶嘅话诬蔑你哋，你哋就有福嘞。要欢喜雀跃，因为你哋喺天上嘅奖赏系大嘅。喺你哋之前嘅先知，人都系噉样迫害佢哋。”（马太福音5:11,12）

18．有边啲问题可以帮助我哋分析自己爱享乐到乜嘢程度？

¹⁸ 我哋可以点样分析自己爱享乐到乜嘢程度？我哋可以问吓自己：“对我嚟讲，娱乐系咪比聚会同传道更重要？为咗事奉耶和华，我愿唔愿意牺牲一啲自己钟意嘅娱乐？喺选择娱乐活动嘅时候，我有冇考虑耶和华嘅观点？”如果我哋真系爱上帝，就会尽力避开一啲肯定或者有可能令佢不悦嘅事。（请读马太福音22:37,38）

快乐之道

19．边啲人唔会有真正嘅快乐？

¹⁹ 人类已经经历咗六千年嘅苦难，而撒但嘅世界好快就会结束。今日地球到处都系专爱自己、贪爱钱财同爱享乐嘅人。呢啲人只会谂佢哋想得到嘅嘢，将自己嘅欲望睇得比乜嘢都重要。噉样嘅人永远都唔会有真正嘅快乐。不过，正如诗篇执笔者所讲：“边个倚靠雅各嘅上帝帮助，又仰望耶和华佢嘅上帝，边个就有福嘞！”（诗篇146:5）

20．爱上帝点样使你快乐？

²⁰ 耶和华嘅子民当中洋溢住对佢嘅爱，而且我哋人数每年都有增无减。呢个证明上帝嘅王国正施行统治，好快就会为我哋带嚟难以置信嘅福分。如果想得到长久、真正嘅快乐，我哋就要遵行上帝嘅旨意，取悦最伟大嘅耶和华。爱耶和华嘅人会永远快乐！喺下一篇课文，我哋会讨论自私嘅爱所引发嘅不良态度同特质，跟住会比较呢个同耶和华嘅仆人所表现嘅特质有乜嘢分别。

² 喺最后嘅日子，唔爱耶和华嘅人会无视佢嘅道德标准。使徒保罗喺写俾提摩太嘅第二封信入面，提到嗰啲离弃上帝嘅人会有嘅思想态度，而且呢啲思想态度喺日后会更加显而易见。（请读提摩太后书3:1-5,13）虽然我哋可能会对大多数人表现出噉样嘅态度而感到震惊，但系周围嘅人所表现嘅行为态度都可能会影响我哋。（箴言13:20）呢篇课文会讨论喺最后嘅日子，唔事奉上帝嘅人嘅态度同特质跟上帝子民嘅特质有乜嘢分别。另外，喺教导人认识耶和华嘅时候，我哋可以点样保护自己免受呢啲有害嘅态度影响。

3．提摩太后书3:2-5描述嘅系边啲人？

³ 使徒保罗话：“到咗最后嘅日子，必定有难以应付嘅非常时期。”之后，佢列出咗呢段时期嘅人所表现嘅19种有害态度同特质。虽然呢个同保罗喺罗马书1:29-31所列出嘅好类似，但系佢喺提摩太后书所用嘅字词，冇喺希腊语经卷其他经文出现过。不过，唔系每个人 都会有呢啲不良嘅态度同特质。基督徒就有好唔同嘅特质。（请读玛拉基书3:18）

对自己嘅睇法

4．你会点样描述嗰啲骄傲自大嘅人？

⁴ 保罗提到好多人会专爱自己、贪爱钱财之后，跟住就话人会自负、高傲同骄傲自大。有呢啲思想态度嘅人往往会觉得自己嘅能力、样貌、财富或者地位都比其他人优越。呢啲人好想得到其他人嘅羡慕同敬重。一个学者讲及到骄傲嘅人话：“喺佢心入面，佢认为自己就系神。”有啲人甚至话极度骄傲嘅态度令人非常反感，因为连骄傲嘅人都唔钟意见到其他人骄傲。

5．一啲忠仆点样受到骄傲嘅态度所影响？

⁵ 耶和华将骄傲嘅态度视为可憎嘅事，佢憎恨“高傲嘅眼”。（箴言6:16,17）骄傲妨碍人亲近上帝。（诗篇10:4）事实上，骄傲系魔鬼嘅一个显著特征。（提摩太前书3:6）可惜嘅系，耶和华嘅一啲忠仆亦都受到影响而变得骄傲。犹大王乌西雅多年嚟一直表现忠贞。圣经话：“不过，佢一强盛，就心高气傲，自招败亡。佢对耶和华佢嘅上帝不忠，竟然闯入耶和华嘅殿，要喺香坛上烧香。”另外，希西家王有一段时间亦都变得高傲。（历代志下26:16；32:25,26）

6．大卫可以因为乜嘢而变得骄傲？但系点解佢能够保持谦卑？

⁶ 有啲人因为自己生得靓、受人欢迎、有音乐天分、身体强壮有力或者受人抬举而变得骄傲。大卫有齐晒以上所讲嘅，但系佢一生都保持谦卑。杀死歌利亚之后，大卫有荣幸可以做扫罗王嘅女婿。不过，大卫话：“我系边个？我嘅亲属同父家喺以色列算乜嘢？我点配做王嘅女婿呢？”（撒母耳记上18:18）乜嘢帮助大卫保持谦卑？大卫所拥有嘅特质、能力同殊荣，都系因为耶和华“纡尊降贵”，留意佢，向佢表现谦卑。（诗篇113:5-8）大卫知道呢一切都唔系出自佢自己，而系嚟自耶和华。（参考哥林多前书4:7）

7．乜嘢可以帮助我哋表现谦卑？

⁷ 好似大卫一样，今日耶和华嘅子民都尽力表现谦卑。我哋都因为耶和华嘅知识，佢喺宇宙崇高嘅地位，同佢所表现嘅谦卑，而心生敬畏。（诗篇18:35）所以我哋都好想“穿上怜恤之情、仁慈、谦卑、温和、耐心”。（歌罗西书3:12）我哋亦都知道爱“唔吹嘘，唔自大”。（哥林多前书13:4）其他人见到我哋表现谦卑，可能都好想认识耶和华。就好似妻子通过自己嘅品行，唔使用一言一语都可以感化丈夫，我哋嘅谦卑都可以吸引人亲近耶和华。（彼得前书3:1）

同其他人嘅关系

8．（甲）今日有啲人对忤逆父母有乜嘢睇法？（乙）圣经劝勉儿女要点样做？

⁸ 保罗描述，喺最后嘅日子人会点样互相对待。佢写道，喺最后嘅日子儿女会忤逆父母。今日有唔少书刊、电影同电视节目都提倡呢种反叛精神，所以有啲人觉得唔服从父母都冇问题。不过，呢种精神会破坏家庭。人好早就已经明白呢个道理。例如，喺古希腊，如果一个人打父母，佢就会失去公民权利；喺罗马法律嘅条文里面，打父亲嘅罪名就好似谋杀咁严重。希伯来语同希腊语嘅经文都劝勉儿女要孝敬父母。（出埃及记20:12；以弗所书6:1-3）

9．乜嘢可以帮助年轻人服从父母？

⁹ 儿女经常谂吓父母为自己所付出嘅，就可以避免受到反叛精神影响。另外，如果我哋明白点解天父要求我哋表现服从，就能够培养感激嘅态度。年轻人积极噉谈及自己嘅父母，就可以帮助同辈以积极嘅观点睇佢哋自己嘅父母。当然，如果父母对儿女冇表现亲情，儿女就好难真心服从佢哋。相反，如果年轻人感受到父母真挚嘅爱，佢哋喺引诱下依然会受到推动服从父母。一个叫奥斯丁嘅弟兄承认：“我经常都想逃避责任，所以父母会俾我一啲合理嘅指引，亦都会同我解释点解要制定某啲规矩，仲会以开明嘅态度同我保持良好嘅沟通。呢个帮助我甘心服从佢哋。我睇出佢哋真系好关心我，而我亦都好想令佢哋开心。”

10,11．（甲）乜嘢思想态度表明人与人之间缺乏爱心？（乙）真基督徒表现嘅爱可以到乜嘢程度？

¹⁰ 保罗列出嘅另一啲思想态度，表明人与人之间缺乏爱心。经文提到“忤逆父母”之后就系忘恩负义，呢个系好贴切嘅，因为忘恩负义嘅人唔会感激其他人为佢哋所做嘅。另外，人会唔忠贞。好多人亦都唔愿意达成协议，意思系佢哋唔想同人和睦相处。人仲会亵渎上帝、出卖其他人，讲出一啲诋毁上帝或中伤人嘅话。而有啲人就毁谤人，通过散播谣言嚟破坏其他人嘅名声。a

¹¹ 今日，同大多数缺乏爱心嘅人相反，事奉耶和华嘅人努力对人表现真挚嘅爱。耶稣话爱邻人呢种阿格配嘅爱，系摩西律法嘅第二大诫命，仅次于爱上帝。（马太福音22:38,39）耶稣亦都话，人凭住彼此相爱呢种特质，就可以分辨出边个系真基督徒。（请读约翰福音13:34,35）真基督徒甚至会爱佢哋嘅仇敌。（马太福音5:43,44）

12．耶稣点样向人表现爱心？

¹² 耶稣表明佢对人有真正嘅爱。佢逐城逐村向人传讲上帝王国嘅好消息。佢医治盲眼、耳聋、跛脚嘅人同麻风病人，亦都复活死人。（路加福音7:22）虽然好多人都憎恨耶稣，不过佢仲系愿意献出自己嘅生命拯救全人类。耶稣完美噉反映出佢父亲对人所怀嘅爱。世界各地嘅耶和华见证人都效法耶稣，对其他人表现同样嘅爱。

13．我哋对人表现爱心点样吸引佢哋亲近耶和华？

¹³ 我哋表现爱心都可以吸引人亲近天父。例如，泰国一个男子参加区域大会，见到弟兄姊妹彼此相爱就深受感动。返到屋企之后，佢请见证人同佢一个星期讨论两次圣经。佢向所有亲戚作见证，大会之后仅仅六个月，佢就喺会众担任第一次经文朗读。我哋可以分析自己喺彼此相爱方面做得点样：“我系咪尽己所能帮助家人、弟兄姊妹同地区嘅人？我系咪尽力用耶和华嘅观点睇其他人？”

豺狼与绵羊

14,15．好多人点样表现出好似野兽一样嘅性情？但系，有啲人点样改变佢哋嘅品格？

¹⁴ 喺最后嘅日子，有啲人仲会表现其他有害嘅思想态度，所以基督徒就更应该同佢哋保持距离。例如，无视上帝嘅人唔爱良善。一啲译本将“唔爱良善”翻译为“憎恨良善嘅人”或者“与良善敌对”。佢哋会漫无自制 同凶悍。有啲人会刚愎自用，或者行事冲动鲁莽。

¹⁵ 好多人以往表现野兽一样嘅性情，不过后来都改变咗佢哋嘅品格。圣经曾经以美妙嘅比喻预言过呢种改变。（请睇以赛亚书11:6,7）喺呢段经文，我哋睇到豺狼、狮子噉样嘅猛兽，会同羊仔、牛仔呢啲家畜一齐和睦共处。请留意，呢种安宁、温馨嘅景象将会持续落去，“因为认识耶和华嘅知识必定遍满大地”。（以赛亚书11:9）既然动物唔能够学习耶和华嘅知识，噉睇嚟预言所指嘅就系人会改变品格。

16．圣经点样帮助人改变佢哋嘅品格？

¹⁶ 有啲人以往好似豺狼一样咁凶残，不过而家就可以同其他人和睦相处。你可以喺jw.org网站嘅“圣经真理改变人的一生”系列文章里面，读到好多噉样嘅经历。圣经预告一啲人有敬虔嘅形式，但系冇体现敬虔嘅力量，佢哋讲一套做一套。相反，可能有啲认识同事奉耶和华嘅人曾经凶残成性，但系而家佢哋“着上新品格。呢个新品格系按照上帝嘅旨意创造嘅，体现真实嘅正义同忠贞”。（以弗所书4:23,24）人越认识上帝，就越睇出自己需要按上帝嘅标准生活。跟住，佢哋会喺信仰、态度同行为上作出调整。要作出噉样嘅改变的确唔容易，不过喺圣灵嘅帮助下，真心想遵行上帝旨意嘅人系能够做到嘅。

“你要避开噉样嘅人”

17．我哋可以点样避免受到唔事奉上帝嘅人所影响？

¹⁷ 今日，事奉上帝同唔事奉上帝嘅人之间嘅区别越来越明显。我哋要小心，千祈唔好俾唔事奉上帝嘅人影响。我哋要听从劝告，避开 提摩太后书3:2-5谈及嘅思想态度。当然，我哋冇可能完全避开有呢啲思想态度嘅人。可能我哋要同佢哋一齐工作、一齐返学甚至一齐住，但系我哋可以避免同佢哋有一样嘅思想态度同行为。我哋可以点样做？经常研读圣经、同决心事奉耶和华嘅人来往，巩固自己同耶和华嘅关系。

18．我哋嘅言行点样帮助人认识耶和华？

¹⁸ 我哋应该努力帮助人认识上帝。留意有乜嘢机会可以向人作见证，然后祈求耶和华帮助我哋喺适当嘅时候讲适当嘅话。我哋应该俾其他人知道，我哋系耶和华见证人。噉样，我哋嘅好品行就可以荣耀耶和华，而唔系荣耀自己。耶和华教导我哋“摒弃唔敬虔嘅心同世俗嘅欲望，喺现行嘅制度怀住健全嘅思想、正义、敬虔而活”。（提多书2:11-14）如果我哋以上帝嘅方式做事，其他人就会留意到，甚至有啲人会话：“我哋要同你哋一齐去，因为我哋听讲上帝与你哋同在。”（撒迦利亚书8:23）