呢件事发生喺1932年嘅墨西哥城。一个星期之前，喺呢个人口超过一百万嘅繁忙城市，啱啱出现咗第一盏交通灯。不过而家，呢个已经唔算乜嘢新闻嘞。城市记者关注嘅系另一个新闻。佢哋喺火车站，准备好摄影机，等待紧一位特别客人嘅到来。呢位客人就系当时守望台社嘅社长约瑟夫·卢述福。卢述福弟兄嚟墨西哥城参加一个为期三日嘅全国大会，当地嘅见证人亦都在场热烈欢迎佢。

《黄金时代》描述话：“呢次大会将会成为墨西哥属灵历史上嘅一个重大事件，表明真理嘅步伐喺墨西哥继续向前迈进。”但乜嘢令呢个只有150人参加嘅大会咁值得人注意呢？

喺呢件事发生之前，墨西哥嘅王国果实只有好少嘅收成。虽然从1919年开始，墨西哥都有举办小型大会，不过会众数目就一直喺度减少。1929年，喺墨西哥城设立咗分部办事处，为当地嘅属灵发展带嚟咗希望。但系，事情发展并唔顺利。当组织指示话传道工作唔应该涉及商业活动嗰时，一个派书者（而家叫先驱）对呢个调整好不满，于是离开组织，成立自己嘅圣经研究小组。同时，分社监督（而家叫分部监督）因为做咗啲违反圣经原则嘅事而被撤换。墨西哥忠贞嘅见证人真系好需要得到鼓励。

喺探访期间，卢述福弟兄发表咗两个振奋人心嘅大会演讲，同五个有力嘅电台演讲，激励咗忠心嘅弟兄姊妹。呢个系墨西哥广播电台首次向全国播放王国嘅好消息。大会之后，新委任嘅分社监督将传道工作组织起嚟。热心嘅见证人得到耶和华嘅祝福，重新得力，向前迈进。

下一年，喺墨西哥全国，除咗墨西哥城嘅大会之外，喺韦拉克鲁斯又举办多一个大会。因为弟兄姊妹努力传道，田地开始有好嘅收成。1931年，墨西哥只有82个传道员。10年之后，传道员嘅数目就增加咗10倍！墨西哥城1941年神治大会嘅出席人数，就有成1000人。

关于墨西哥城嘅标语牌游行，《民族》杂志话：“喺［大会］嘅第一日，［见证人］受到鼓励邀请更多人参加大会。结果第二日，会场就坐满晒人。”天主教会见到见证人嘅游行带嚟咁大嘅影响就好唔开心，于是发起攻击，对付见证人。即使受到反对，弟兄姊妹依然勇敢无惧，继续喺街上传道。《民族》又报道话：“全城人都见到佢哋……有男有女，个个都变成咗‘三文治’宣传牌。”文章仲刊登咗一张弟兄喺墨西哥城街上游行嘅相。呢张相下面有个说明，写住“全城入侵”。