5-7．以色列人离开埃及之后冇几耐就发生乜嘢问题？摩西点样应付当时嘅情况？

⁵ 以色列人离开埃及唔够两个月，都未去到西奈山，就发生咗一个严重嘅问题。民众开始埋怨冇水饮，又向摩西发怨言。佢哋情绪越来越激动，于是摩西向耶和华呼求话：“我应该点样应付呢班人呢？佢哋就嚟攞石头打死我嘞！”（出埃及记17:4）耶和华马上作出回应，俾摩西明确嘅指示。摩西按照耶和华嘅吩咐，用杖击打何烈山嘅岩石，结果就有水从岩石涌出嚟。经文话：“摩西就喺以色列嘅长老眼前噉样做。”以色列人有足够嘅水饮，问题就解决咗嘞。（出埃及记17:5,6）

⁶ 圣经话俾我哋知，摩西为嗰个地方起名叫玛萨（意思系“试验；考验”），又叫米利巴（意思系“争吵”）。点解呢？“因为以色列人喺嗰度争吵，又试探耶和华，话：‘耶和华真系喺我哋当中？’”（出埃及记17:7）

⁷ 耶和华对米利巴发生嘅事有乜嘢睇法？喺耶和华眼中，以色列人噉样做就等于背叛佢，挑战佢嘅权柄，而唔只系反对摩西。（请读诗篇95:8,9）以色列人所犯嘅错误非常严重。不过，当时摩西采取正确嘅行动，仰赖耶和华并听从佢嘅指引。

8．以色列人喺旷野四十年嘅流浪生活就快结束嘅时候，发生乜嘢事？

⁸ 四十年之后，同样嘅事情又再发生，呢次摩西点样做呢？以色列人就快结束喺旷野嘅流浪生活嗰阵，嚟到一个叫米利巴嘅地方。呢个米利巴喺应许之地边境嘅加低斯附近，同之前嗰个唔系同一个地方。a以色列人再次埋怨冇水饮。（民数记20:1-5）不过呢次，摩西处理问题嘅时候犯咗严重嘅错。

9．耶和华吩咐摩西乜嘢？但系摩西点样做？（请睇吓课文开头嘅图片）

⁹ 摩西点样应对呢次反叛？佢再一次向耶和华寻求指引。但耶和华今次冇叫摩西击打岩石，而系叫佢攞住杖，召集民众到岩石前面，然后向岩石讲话。（民数记20:6-8）但系摩西冇噉样做，而系好嬲噉大声同民众讲：“你哋呢啲叛徒听住！唔通一定要我哋从呢块岩石当中引水俾你哋先至得？”讲完之后，佢唔止一次，而系两次击打岩石。（民数记20:10,11）

10．耶和华对摩西所做嘅事有乜嘢反应？

¹⁰ 摩西所做嘅事使耶和华好愤怒。（申命记1:37；3:26）点解耶和华有咁强烈嘅反应？使耶和华发怒嘅原因可能有几个，而其中之一就系，摩西冇按照耶和华呢次嘅指示去做。

11．点解摩西击打岩石可能会使以色列人觉得耶和华冇施行奇迹？

¹¹ 另一个原因可能系，喺第一个米利巴，周围都系坚固嘅花岗岩。无论人点样击打呢啲岩石，正常嚟讲都唔可能有水涌出嚟。但系，第二个米利巴就好唔同，地质构成主要系石灰岩。由于石灰岩有多孔透水嘅特性，岩层下面往往储藏咗大量嘅地下水。喺呢啲地区，人只要凿开岩层就可以取水饮用。所以，如果摩西唔系对岩石讲话，而系击打岩石，噉以色列人会唔会因为呢个原因，就觉得啲水系自然涌出嘅，而唔系耶和华施行咗奇迹？b我哋唔可以肯定。

摩西违背耶和华嘅训示

12．耶和华对摩西同亚伦发怒嘅另一个原因可能系乜嘢？

¹² 耶和华对摩西同亚伦发怒可能仲有另一个原因。请留意摩西对民众所讲嘅话。佢话：“唔通一定要我哋从呢块岩石当中引水俾你哋先至得？”摩西所讲嘅“我哋”，睇嚟系指佢同亚伦。摩西噉样讲，表明佢冇将所有功劳归俾真正施行奇迹嘅耶和华，冇对耶和华表现尊重嘅态度。诗篇106:32,33所讲嘅好可能就系呢件事。经文话：“佢哋喺米利巴水边惹动怒气，结果摩西因佢哋而遭殃。佢哋使摩西苦恼气愤，于是佢嘅嘴冒失发言。”c（民数记27:14）摩西嘅行为表明，佢冇将耶和华应得嘅荣耀归俾耶和华。耶和华对摩西同亚伦讲：“你哋违背咗我嘅训示。”（民数记20:24）呢个真系一个严重嘅过犯！