服从耶和华嘅诫命

17．我哋服从耶和华嘅原因系乜嘢？

¹⁷ 我哋服从耶和华，就可以证明撒但系讲大话嘅。乜嘢有助于我哋服从耶和华？圣经话：“你要全心、全意、全力爱耶和华你嘅上帝。”（申命记6:5）我哋服从耶和华系因为我哋爱佢。我哋越爱耶和华，就会越乐意听从佢嘅一切吩咐。使徒约翰话：“我哋遵守上帝嘅诫命，就系爱佢嘞，况且佢嘅诫命并唔系沉重嘅负担”。（约翰一书5:3）

18,19．（甲）边啲事系耶和华认为唔啱嘅呢？（乙）我哋点知道耶和华唔会要求我哋做一啲我哋做唔到嘅事？

¹⁸ 边啲事系耶和华认为唔啱嘅呢？请睇附栏“要憎恨耶和华所憎恨嘅事”。可能一开始你觉得呢啲行为睇嚟无伤大雅，不过，当你沉思经文，就会睇出服从耶和华嘅诫命系明智嘅。你可能会发觉喺生活上需要作出改变。要作出改变或者唔容易，不过你噉做，就可以成为耶和华嘅真朋友，得享真正嘅平安同快乐。（以赛亚书48:17,18）你系可以做得到嘅，点解噉讲呢？

¹⁹ 耶和华绝对唔会要求我哋做一啲我哋做唔到嘅事。（申命记30:11-14）耶和华系我哋最好嘅朋友，佢知道我哋嘅能力限度，对我哋嘅了解甚至清楚过我哋自己。（诗篇103:14）使徒保罗话：“上帝系信实嘅，一定唔会俾你哋受引诱超过你哋能够忍受嘅。喺你哋受引诱嘅时候，佢一定会打开出路，使你哋忍耐得住”。（哥林多前书10:13）我哋可以确信耶和华一定会赐俾我哋力量做啱嘅事。佢会赐俾你“超凡嘅力量”，能够使你喺困难嘅情况下都可以保持忍耐。（哥林多后书4:7）使徒保罗就曾经多次体会耶和华帮助佢应付困境，佢表达自己嘅心声话：“我靠住赐力量俾我嘅嗰位，凡事都能够应付。”（腓立比书4:13）