监禁！

1918年5月7日，司法部获得批准，拘捕咗乔瓦尼·狄撤卡、乔治·费希尔、亚历山大·麦克米伦、罗伯特·马丁、弗雷德里克·罗比森、约瑟夫·卢述福、威廉·范安伯同埋克莱顿·伍德沃思。佢哋被控“非法而且蓄意唔服从、唔忠于［国家］，并煽动他人拒绝喺美国嘅陆海军服兵役”。佢哋嘅审讯从1918年6月3日开始，不过基本上可以肯定，佢哋会被定罪。点解？

美国司法部部长指控佢哋违反咗间谍法。呢个间谍法系一个“反宣传嘅有效武器”。1918年5月16日，国会否决咗一条法案嘅修正案，而呢条修正案本来可以保护嗰啲发行“讲事实，有良好动机，有合理目的”嘅出版物嘅人。《完成嘅奥秘》系佢哋讨论嘅焦点。关于呢一点，美国国会嘅官方记录话：“喺呢类型嘅宣传当中，其中一本最危险嘅书就系《完成嘅奥秘》。……呢本书唯一嘅作用系，令士兵质疑战争嘅原因，而且激化……对［强制性服兵役］草案嘅抵触情绪。”

1918年6月20日，陪审团认为八个弟兄喺所有指控上都有罪。第二日，法官作出咗判决。佢话：“被告大力提倡以及四处传播嘅宗教宣传……比一个师嘅德国军队构成更加大嘅危险。……应该将呢啲人判以重刑。”两个星期之后，呢八个弟兄被韫入乔治亚州亚特兰大嘅联邦监狱，刑期从10年到20年不等。

除咗热心传道之外，圣经研究者为咗解救被韫喺亚特兰大嘅弟兄而热切噉发起一项请愿行动。安娜·加德纳话：“我哋一直都有做嘢。弟兄被韫入监之后，我哋就努力揾人签名请愿。我哋逐家逐户，攞到成千上万个签名！我哋话俾啲人知，呢啲弟兄都系真正嘅基督徒，佢哋都系含冤入狱嘅。”