1．喺伊甸园，耶和华透露咗边啲同我哋仇敌有关嘅事？

亚当一定知道蛇系唔识讲话嘅。佢可能推测到，通过蛇向夏娃讲话嘅其实系一个灵体。（创世记3:1-6）虽然亚当同夏娃对呢个灵体一无所知，但系亚当仲系选择同呢个陌生灵体一齐背叛仁爱嘅天父。（提摩太前书2:14）耶和华随即透露更多同呢个邪恶灵体有关嘅信息，预告呢个仇敌最终会被毁灭。耶和华亦都预先发出警告话，呢个通过蛇讲话嘅灵体喺一段时期内会攻击所有爱耶和华嘅人。（创世记3:15）

2,3．点解喺弥赛亚嚟到之前圣经好少提及撒但？

² 耶和华从来都冇话俾人知呢个灵体叫咩名。a反叛事件发生2500几年之后，耶和华先至提到呢个仇敌系边个。（约伯记1:6）呢个仇敌被称为“撒但”，意思系“敌对者”。喺希伯来语经卷，只有历代志上、约伯记同撒迦利亚书提到呢个称谓。点解喺弥赛亚嚟到之前圣经好少谈及呢个仇敌？

³ 显然，耶和华唔想人过度关注撒但，所以喺希伯来语经卷冇用太多篇幅讨论同撒但有关嘅事。耶和华向人启示希伯来语经卷嘅主要目的系，帮助佢嘅子民认出并归向弥赛亚。（路加福音24:44；加拉太书3:24）目的达成之后，耶和华就通过耶稣同佢嘅门徒透露更多关于撒但同邪灵嘅事。b噉样做好适当，因为耶和华会运用耶稣同受膏基督徒去毁灭撒但及其跟从者。（罗马书16:20；启示录17:14；20:10）

4．点解我哋唔需要过度害怕撒但？

⁴ 使徒彼得将魔鬼撒但描述为“咆哮嘅狮子”，而约翰就称佢为“蛇”或者“大龙”。（彼得前书5:8；启示录12:9）不过，魔鬼嘅力量其实系有限嘅，我哋唔需要过度害怕。（请读雅各书4:7）耶和华、耶稣同好多忠心嘅天使会支持我哋。有佢哋嘅帮助，我哋就能够抵抗呢个邪恶嘅仇敌。我哋亦都需要知道三个重要问题嘅答案：撒但嘅影响有几大？佢试图点样影响人？边啲事系佢做唔到嘅？我哋一边讨论呢啲问题，一边谂吓从中可以学到乜嘢。

撒但嘅影响有几大？

5,6．点解世上嘅政府唔能够从根本上解决人类嘅问题？

⁵ 好多天使都加入撒但嘅反叛阵营。大洪水之前，撒但诱使一部分天使同人间女子发生违反自然嘅性行为。圣经象征性噉描述，大龙被掟落地上嗰阵拖住天上三分之一嘅星辰一齐落去。（创世记6:1-4；犹大书6；启示录12:3,4）呢啲天使离开上帝嘅大家庭之后，就成为撒但嘅手下。唔好以为呢啲反叛天使只系一班乌合之众。撒但模仿上帝嘅王国建立一个政府并自立为王，佢仲喺人睇唔见嘅灵界将邪灵组织起嚟，俾佢哋统治世界嘅权力。（以弗所书6:12）

⁶ 撒但通过佢嘅灵体组织控制所有人间政府。撒但向耶稣展示“天下万国”嗰阵所讲嘅话表明咗呢一点。撒但话：“呢一切权柄同荣耀，我都要俾你，因为呢个系交咗俾我嘅，我想俾边个就俾边个。”（路加福音4:5,6）虽然呢个世界深受撒但影响，但好多政府仲系想造益人民，而一啲统治者亦都真心想帮助人。不过，世上冇任何政府或者统治者有能力从根本上解决人类嘅问题。（诗篇146:3,4；启示录12:12）

7．除咗世上嘅政府，撒但仲点样利用错误宗教同商业制度误导人类？（请睇吓课文开头嘅图片）

⁷ 撒但同邪灵唔单止利用世上嘅政府，亦都利用错误宗教同商业制度嚟误导“普天下嘅人”。（启示录12:9）撒但通过错误宗教诋毁耶和华，并想方设法使人唔知道上帝嘅名。（耶利米书23:26,27）结果，好多心地正直嘅人都上当受骗，佢哋以为自己崇拜上帝，但其实崇拜嘅系邪灵。（哥林多前书10:20；哥林多后书11:13-15）撒但亦通过商业制度散播谎言。例如，呢个世界经常鼓吹，只有追求金钱同拥有大量财富先可以得到快乐。（箴言18:11）相信呢个谎言嘅人会为“财富”卖命，而唔会事奉上帝。（马太福音6:24）最终，佢哋对财富嘅爱会扼杀对上帝嘅爱。（马太福音13:22；约翰一书2:15,16）

8,9．（甲）我哋可以从亚当、夏娃同埋反叛上帝嘅天使嘅事例学到乜嘢？（乙）知道撒但嘅影响力对我哋有乜嘢帮助？

⁸ 我哋从亚当、夏娃以及反叛上帝嘅天使嘅事例至少学到两个要点。第一，我哋只有两个选择，唔系忠于耶和华，就系跟从撒但。（马太福音7:13）第二，加入撒但阵营嘅人得到嘅益处非常有限。亚当同夏娃可以自行制定善恶标准，而邪灵可以控制人类政府。（创世记3:22）不过，支持撒但要付出嘅代价永远超过所得到嘅好处。（约伯记21:7-17；加拉太书6:7,8）

⁹ 知道撒但嘅影响力对我哋有乜嘢帮助？噉样可以使我哋对世上嘅政府有平衡嘅睇法，亦都激励我哋向人传讲好信息。我哋知道，耶和华要我哋尊重世上嘅政府。（彼得前书2:17）只要冇违反上帝嘅标准，耶和华都希望我哋服从人间政府嘅法律。（罗马书13:1-4）我哋亦都要保持中立，唔应该偏向任何政党或者领导人。（约翰福音17:15,16；18:36）我哋睇见撒但试图隐藏上帝嘅名，破坏耶和华嘅名声，就觉得更有必要帮助人认识上帝嘅真理。我哋有幸成为耶和华名下嘅子民，而且可以使用呢个名嚟称呼佢，真系感到非常自豪。爱耶和华比追求金钱或者其他事物更有价值。（以赛亚书43:10；提摩太前书6:6-10）

撒但点样试图影响人？

10-12．（甲）撒但用乜嘢引诱天使？（乙）我哋从天使反叛呢件事学到乜嘢？

¹⁰ 撒但成功影响咗好多人。佢引诱人使人按照佢嘅方式行事，亦都通过威迫使人屈服。

¹¹ 撒但诱惑咗好多天使。为咗引诱其他天使加入反叛嘅行列，撒但一定用咗好长时间嚟观察同研究佢哋。结果，一部分天使上钩，同地上嘅女人发生不道德嘅性行为，而佢哋所生嘅后代都系残忍嘅巨人，使地上充满暴力。（创世记6:1-4）除咗不道德嘅性行为，撒但亦都可能向不忠嘅天使承诺，佢哋可以管辖人类。撒但嘅目的就系想阻止耶和华应许嘅“女人嘅后代”出现。（创世记3:15）无论点都好，耶和华通过大洪水终止咗撒但同邪灵嘅阴谋。

¹² 我哋从呢件事可以学到乜嘢？千祈唔好低估性不道德同高傲态度嘅危险性。嗰啲加入撒但阵营嘅天使，多年来一直喺耶和华面前供职。虽然身处喺咁好嘅环境，好多天使依然容许自己嘅私欲不断滋长。同样，我哋可能已经喺上帝地上嘅组织服务多年，喺呢个洁净嘅属灵环境中，不洁嘅欲望都可能会生根发芽。（哥林多前书10:12）我哋要不断审察自己嘅内心，铲除任何不道德嘅念头同高傲嘅态度，噉样做非常重要！（加拉太书5:26；请读歌罗西书3:5）

13．撒但诱惑人嘅另一个方法系乜嘢？我哋可以点样避免落入撒但嘅圈套？

¹³ 撒但诱惑人嘅另一个方法系，利用人对灵异事物嘅好奇心。今日，佢通过错误宗教同埋娱乐行业使人对灵界产生兴趣。电影、电子游戏同各种媒体令人觉得通灵术好刺激。我哋点样可以避免落入呢个圈套？我哋唔应该期望上帝嘅组织提供一份清单，列出边啲娱乐可以接受，边啲唔可以。我哋每个人都需要锻炼自己嘅良心，使良心同上帝嘅标准一致。（希伯来书5:14）不过，正如使徒保罗所讲，如果我哋对上帝嘅爱毫无虚伪，就可以作出明智嘅选择。（罗马书12:9）我哋可以问吓自己：“我选择嘅娱乐会唔会令人觉得我讲一套做一套？如果我嘅圣经学生或者续访对象睇到我选择嘅娱乐，佢哋会唔会认为我真系实践自己所教嘅？”我哋言行一致，就唔会咁容易落入撒但嘅圈套。（约翰一书3:18）

14．撒但可能会点样威迫我哋？我哋可以点样应付？

¹⁴ 另一方面，撒但试图通过威迫使我哋唔再忠于耶和华。例如，喺撒但嘅影响下，政府禁制我哋嘅传道工作，同学或者同事嘲笑我哋按照圣经道德标准嚟生活。（彼得前书4:4）撒但亦都可能会通过出于善意嘅家人劝阻我哋参加聚会。（马太福音10:36）我哋可以点样应付？首先，我哋要做好心理准备，知道撒但会直接攻击我哋，因为我哋同撒但之间有一场战争。（启示录2:10；12:17）另外，我哋需要明白呢啲攻击背后牵涉到一个重大嘅争议——撒但声称，我哋只会喺顺境嗰阵先至会事奉耶和华，一旦受到压力就会背叛耶和华。（约伯记1:9-11；2:4,5）最后，我哋一定要倚靠耶和华，求佢赐力量俾我哋应付呢啲情况。要记住，佢永远唔会离弃我哋。（希伯来书13:5）

边啲事撒但做唔到？

15．撒但能唔能够强迫人做一啲佢哋唔想做嘅事？请解释。

¹⁵ 撒但唔能够强迫人做一啲佢哋唔想做嘅事。（雅各书1:14）世上好多人都唔知道自己所做嘅事其实正系迎合咗撒但嘅意思。一个人学习圣经真理之后，就要决定自己事奉耶和华抑或跟从撒但。（使徒行传3:17；17:30）如果我哋决心遵行上帝嘅旨意，撒但就根本冇办法破坏我哋嘅忠义。（约伯记2:3；27:5）

16,17．（甲）仲有边啲事系撒但同邪灵做唔到嘅？（乙）点解我哋唔应该担心开声向耶和华祷告？

¹⁶ 仲有一啲事系撒但同邪灵做唔到嘅。例如，圣经只系话耶和华同耶稣能够洞悉人内心嘅谂法，但系就冇提过撒但都有呢种能力。（撒母耳记上16:7；马可福音2:8）不过，如果我哋开声祷告或者讲话又点呢？我哋应唔应该担心魔鬼或者邪灵听见我哋祷告嘅内容，并借此攻击我哋？当然唔应该。我哋唔会因为怕魔鬼睇到我哋所做嘅，就唔敢为耶和华多做善工。同样，我哋唔会因为担心魔鬼听到我哋所讲嘅，就唔敢开声祷告。圣经记载咗好多上帝忠仆大声祷告嘅例子，但系冇提到佢哋担心魔鬼听到佢哋祷告嘅内容。（列王纪上8:22,23；约翰福音11:41,42；使徒行传4:23,24）如果我哋尽最大努力喺言行方面按照耶和华嘅吩咐去做，我哋就可以确信，耶和华唔会容许魔鬼对我哋造成任何永久嘅伤害。（请读诗篇34:7）

¹⁷ 我哋要清楚认识我哋嘅仇敌，唔好俾佢吓倒。有耶和华嘅支持，即使唔完美嘅人都能够战胜撒但。（约翰一书2:14）我哋反抗魔鬼，佢就会离开我哋逃跑。（雅各书4:7；彼得前书5:9）年轻人特别容易受到撒但攻击。为咗能够喺信仰上站稳，抵抗魔鬼，佢哋可以具体做啲乜嘢？下一篇课文会讨论呢个问题。

1,2．（甲）点解年轻嘅基督徒能够成功对抗邪恶灵体？（请睇吓课文开头嘅图片）（乙）呢篇课文会讨论乜嘢？

使徒保罗将基督徒嘅生活比作士兵嘅格斗。当然，我哋作战嘅对象唔系人而系撒但同邪灵。虽然敌人系我哋睇唔到嘅，但系佢哋的确存在。撒但同邪灵系经验丰富、技巧纯熟嘅战士。我哋喺呢场格斗中似乎好难打赢佢哋，如果我哋系缺乏经验嘅年轻人，睇嚟就更难取胜。年轻嘅基督徒点样先可以战胜呢啲力量超凡嘅邪恶灵体？事实表明，年轻人“靠住主嘅大能大力”能够得胜，而且不断得到胜利！除咗倚靠上帝嘅力量，佢哋仲要穿上作战嘅装备。就好似受到良好训练嘅士兵噉，佢哋需要“穿戴上帝所赐嘅全副盔甲”。（请读以弗所书6:10-12）

² 保罗讲呢个比喻嘅时候，可能联想到罗马士兵嘅盔甲。（使徒行传28:16）呢篇课文会分析点解呢个比喻好贴切，亦都会讨论，年轻人为咗穿上全副属灵盔甲所面对嘅挑战同得到嘅益处。

“用真理束腰”

3,4．点解话圣经真理好似罗马士兵嘅腰带？

³ 请读以弗所书6:14。罗马士兵嘅腰带可以帮助士兵固定上半身厚重嘅盔甲。腰带上有金属片，可以保护腰部。腰带亦都有坚固嘅金属扣，用嚟扣住刀剑同匕首。士兵束紧腰带，就能够站稳，满怀信心噉投入战斗。

⁴ 我哋从上帝话语学到嘅真理就好似腰带噉，能够保护我哋免受错误教导嘅影响。（约翰福音8:31,32；约翰一书4:1）我哋对圣经真理嘅爱越深，就越容易穿上属灵嘅“胸甲”——按照上帝嘅正义标准生活。（诗篇111:7,8；约翰一书5:3）我哋对真理有清晰嘅理解，就可以满怀信心对抗我哋嘅敌人。（彼得前书3:15）

5．点解我哋应该讲真话？

⁵ 如果我哋将圣经真理好似腰带噉紧紧束上，我哋就会喺生活上努力实践圣经嘅教导，同时喺所有事上都会向人讲真话。点解我哋唔应该讲大话？因为谎言系撒但最成功嘅武器之一。谎言会令讲嘅人同埋相信嘅人都受到伤害。（约翰福音8:44）所以，即使我哋唔完美，都要尽力避免讲大话。（以弗所书4:25）噉样做并唔容易。18岁嘅亚碧嘉话：“有时讲真话似乎冇咩价值，特别系你讲一个大话就可以摆脱困境嘅时候。”噉点解佢仲系尽力讲真话？佢话：“只要我讲真话，我喺耶和华面前就有一个清白嘅良心。父母同朋友亦都会信任我。”23岁嘅维多利亚话：“你讲真话，为自己嘅信仰辩护，可能会俾人欺负。不过，你一定会得到好多益处：你越来越有自信，同耶和华嘅关系更加亲密，亦都赢得亲友嘅尊重。”冇错，任何时候都要“用真理束腰”，噉样做大有价值。

“用正义当做胸甲”

6,7．点解将正义比作胸甲？

⁶ 1世纪嘅罗马士兵所佩戴嘅胸甲系由一块块金属板条互相重叠而成嘅。呢啲板条可以按照士兵嘅身形而弯曲，并用金属钩扣固定喺皮带上。士兵上半身嘅其余部分都会用好多金属板条嚟覆盖。虽然板条甲喺某程度上会限制士兵嘅活动，而且需要士兵经常检查板条系咪牢固，但系呢种盔甲可以保护到士兵嘅心脏同其他重要部位免受刀剑或者飞箭所伤。

⁷ 耶和华嘅正义标准能够保护我哋嘅内心，就好似胸甲可以保护士兵嘅心脏。（箴言4:23）一个士兵唔会将制造胸甲所需要嘅优质金属换成劣质金属，同样我哋绝对唔会用自己嘅标准取代耶和华嘅正义标准。（箴言3:5,6）相反，我哋必须经常检查耶和华赐俾我哋嘅“胸甲”系咪依然坚固噉保护住我哋嘅心。

8．点解我哋要坚守耶和华嘅标准？

⁸ 你系咪有时会觉得耶和华嘅正义标准使你有压力或者限制咗你嘅自由？21岁嘅丹尼尔话：“因为我按照圣经标准生活，老师、同学就取笑我。有一段时间，我失去自信甚至感到沮丧。”佢点样恢复过嚟？佢话：“最后，我睇出按照耶和华嘅标准生活嘅益处。我嘅一啲‘朋友’开始吸毒，有啲就退学。见到佢哋嘅生活变成噉，我真系好难过。耶和华的确保护我哋。”15岁嘅麦迪逊话：“坚守耶和华嘅标准，唔去参加一啲同辈认为过瘾、刺激嘅活动，使我内心好挣扎。”佢点样做？佢话：“我提醒自己，我肩负住耶和华嘅名，呢啲诱惑只不过系撒但攻击我嘅手段。每取得一场胜利，我就更加有自信。”

“用和平嘅好消息当鞋着喺脚上，预备行路”

9-11．（甲）基督徒要着上嘅鞋系指乜嘢？（乙）乜嘢帮助我哋更容易向人作见证？

⁹ 请读以弗所书6:15。一个罗马士兵唔能够赤住脚去作战。佢哋嘅鞋系用三层皮革制成嘅，既坚固又舒服，帮助佢哋企得更稳。

¹⁰ 正如罗马士兵着上鞋先可以作战，基督徒着上比喻性嘅鞋就能够传讲和平嘅信息。（以赛亚书52:7；罗马书10:15）即使系噉，我哋把握机会向人作见证系需要勇气嘅。20岁嘅阿博话：“我以前好怕同同学作见证，觉得好尴尬。睇翻转头，我都唔知点解当时自己会噉样谂。而家我好开心自己有勇气向同辈作见证。”

¹¹ 好多年轻人都发觉，如果佢哋提前为传道做好准备，就会更容易同人分享好消息。你可以点样做准备？16岁嘅朱莉娅话：“我经常会放一啲杂志喺书包度。我耐心听同学表达佢哋嘅意见同信仰，跟住谂吓有乜嘢可以帮到佢哋。只要我做好准备，就可以同佢哋分享一啲对佢哋特别有帮助嘅资料。”23岁嘅梅肯琪话：“如果你仁慈、耐心噉聆听对方讲话，就会知道佢面对紧乜嘢难题。我尽可能睇晒组织为年轻人提供嘅资料，噉样我就可以帮助人喺圣经或者jw.org网站揾出对佢哋有用嘅资料。”正如呢啲年轻人所讲嘅，你越努力为传道做准备，你脚上嘅鞋就越稳固。

“用信心当做大盾牌”

12,13．撒但射出嘅“火箭”系指乜嘢？

¹² 请读以弗所书6:16。罗马士兵使用嘅“大盾牌”系长方形嘅，可以遮挡从肩到膝嘅部位，保护佢免受武器同飞箭袭击。

¹³ 撒但用乜嘢“火箭”攻击你？可能系一啲诬蔑耶和华嘅话。撒但好想令你觉得上帝根本唔关心你，唔爱你。19岁嘅依达要对抗自卑心理。佢话：“我经常觉得耶和华唔爱我，唔想做我嘅朋友。”佢点样应付呢种攻击？依达话：“聚会大大加强我嘅信心。以前我只系坐喺度冇发表任何评论，心谂冇人想听我嘅评论。而家我为聚会做好准备，每次都努力回答两三个问题。噉样做唔容易，不过评论之后感觉好咗好多。弟兄姊妹亦都经常鼓励我。每次聚会结束后我都觉得耶和华好爱我。”

14．依达嘅经历强调咗乜嘢事实？

¹⁴ 依达嘅经历强调咗一个重要事实：士兵嘅盾牌有固定嘅尺寸，但系我哋信心盾牌嘅大小就在于我哋嘅选择。（马太福音14:31；帖撒罗尼迦后书1:3）我哋强化自己嘅信心真系非常重要！

“用救恩当做头盔”

15,16．点解话得救嘅希望好似一个头盔？

¹⁵ 请读以弗所书6:17。罗马士兵佩戴嘅头盔可以保护头部、颈部同面部。有啲头盔仲有把手，方便士兵拎喺手上。

¹⁶ 正如头盔保护士兵嘅头部，“得救嘅希望”可以保护我哋嘅思想。（帖撒罗尼迦前书5:8；箴言3:21）得救嘅希望能够使我哋定睛注视上帝嘅应许，用正确嘅观点去睇问题。（诗篇27:1,14；使徒行传24:15）但系，如果我哋想自己嘅“头盔”发挥作用，就一定要戴喺头上，而唔系拎喺手上。

17,18．（甲）撒但用乜嘢方法诱使我哋除低自己嘅头盔？（乙）我哋可以点样表明自己冇被撒但嘅诡计所骗？

¹⁷ 撒但用乜嘢方法诱使我哋除低自己嘅头盔？请留意佢点样引诱耶稣。撒但肯定知道耶稣会统治全人类。不过，喺耶和华指定嘅时间到嚟之前，耶稣要一直等待，仲要喺痛苦中死去。撒但同耶稣讲，只要耶稣向佢做一个崇拜嘅举动就可以即刻成为世界嘅统治者。（路加福音4:5-7）同样撒但知道，耶和华承诺喺新世界会赐好多奇妙嘅福分俾我哋，不过我哋必须等待呢啲应许实现，其间可能会遭受好多苦难。撒但诱惑我哋，想我哋而家就专注于享受生活，先追求物质财富。撒但唔希望我哋将追求王国放喺生活嘅首位。（马太福音6:31-33）

¹⁸ 20岁嘅琪安娜同好多年轻基督徒一样并冇上当受骗。佢话：“我知道上帝嘅王国系解决我哋所有难题嘅唯一希望。”呢个稳确嘅希望点样影响佢而家嘅谂法同埋喺生活上所做嘅决定？呢个希望帮助佢谨记，呢个世界所提供嘅一切都系暂时嘅，与其喺事业上努力拼搏，不如善用时间同精力为耶和华服务。

“圣灵嘅剑，就系上帝嘅话语”

19,20．我哋可以点样更有效噉运用上帝嘅话语？

¹⁹ 1世纪嘅罗马士兵使用嘅剑大约有50厘米（20英寸）长，系为格斗而设计嘅。士兵之所以能够灵活运用手中嘅剑，系因为佢哋每日都练剑。

²⁰ 保罗将上帝嘅话语比作耶和华赐俾我哋嘅剑。无论为自己嘅信仰辩护抑或要调整自己嘅思想，我哋都必须学识有技巧噉运用上帝嘅话语。（哥林多后书10:4,5；提摩太后书2:15）你可以点样提高自己嘅技巧？21岁嘅塞巴斯蒂安话：“我阅读圣经嗰阵，读完一章就抄低一节经文。我将自己钟意嘅经文都摘录埋一齐。呢个方法使我觉得自己嘅思想更接近耶和华嘅思想。”之前提到嘅丹尼尔话：“阅读圣经嘅时候，我会抄低一啲喺传道上帮到人嘅经文。我发觉，当人睇出你对圣经充满热情，而且尽力帮助佢哋，佢哋就会有好好嘅反应。”

21．点解唔需要害怕撒但同邪灵？

²¹ 我哋可以从本文提到嘅年轻人身上学到，唔需要过度害怕撒但同邪灵。虽然佢哋确实好强大，但并唔系不可战胜嘅。佢哋唔会永远存在，喺基督千年统治期间会被囚禁，完全伤害唔到人，等到千年统治之后就会彻底被毁灭。（启示录20:1-3,7-10）我哋清楚认识仇敌嘅战略同意图，同埋喺耶和华嘅帮助下，就能够喺信仰上站稳，抵抗魔鬼！