一个43岁叫西蒙嘅意大利弟兄，同一个37岁叫安娜嘅新西兰姊妹系一对喺缅甸服务嘅夫妇。乜嘢推动佢哋搬到缅甸呢？安娜话：“因为2013年《年鉴》对缅甸嘅记载！”西蒙话：“可以喺缅甸服务系好大嘅殊荣。呢度嘅生活好简单，所以我可以用更多时间为耶和华服务。我哋喺呢个需求更大嘅地区服务，可以体验到耶和华嘅关爱，真系令人振奋。”（诗篇121:5）安娜话：“我比以前更加快乐。我哋而家过住简朴嘅生活。我有更多时间同丈夫一齐，我哋嘅关系变得更亲密。我哋亦都揾到好多宝贵嘅新朋友。当地人对见证人冇咩偏见，而且对真理都有好好嘅反应！”喺边啲方面呢？

安娜话：“有一日，我喺市场向一个大学生作见证，而且约好时间同佢再次见面。我去续访佢嘅时候，佢同一个朋友一齐嚟。下一次见面，佢又带咗另外几个朋友。之后，佢又带咗更多人嚟。而家，我同其中五个人讨论紧圣经。”西蒙话：“当地人待人友善，有好奇心。好多人都对真理有兴趣，多到我哋冇时间去照顾。”

你能唔能够响应呼吁？

罗德尼同太太简恩系一对五十几岁嘅夫妇，嚟自澳大利亚。佢哋同仔女佐敦同达妮卡喺2010年就搬到缅甸呢个需求更大嘅地区服务。罗德尼话：“我哋见到当地人喺属灵上如饥似渴，深受感动。我极力推荐其他家庭试吓去好似缅甸噉嘅地方服务。”点解呢？“我哋全家人喺缅甸服务所得到嘅属灵益处系钱都买唔到嘅！好多年轻人关注嘅系佢哋嘅手机、汽车、工作等等，而我哋嘅仔女因为地区嘅需要就忙于学习新语言。佢哋努力学习点样同嗰啲唔熟识圣经嘅人推理，点样喺聚会嘅时候发表评论，亦都专注于其他充满意义嘅属灵活动。”

37岁嘅奥利弗弟兄嚟自美国，佢推荐呢种形式嘅服务，话：“为咗事奉耶和华而离开自己熟识嘅环境，使我大大得益。噉样做帮助我建立自信，亦都使我学识喺任何情况下信赖耶和华。同新认识嘅弟兄姊妹一齐事奉耶和华使我睇出，世上冇任何事比上帝嘅王国更重要。”今日，奥利弗同太太安娜继续热心喺中文地区服务。

52岁嘅特拉泽姊妹嚟自澳大利亚，2004年佢就已经喺缅甸服务。佢话：“如果对方嘅情况允许，我会鼓励佢哋喺需求更大嘅地区服务。我已经体验到，只要你甘愿付出努力为耶和华服务，就会得到佢嘅祝福。我从来都冇谂过自己可以过而家噉嘅生活。呢个系最有收获同最令人心满意足嘅生活方式，亦都系我梦寐以求嘅。”