1952年到1956年，马丽亚被带到俄罗斯嘅高尔基市（今日叫下诺夫哥罗德）附近嘅劳动营服役。喺劳动营，佢哋要服嘅劳役系将树连根挖出嚟，就算天寒地冻都要噉做。佢嘅健康大受影响，好在喺1956年，佢被释放，之后去到图伦市。

喺监狱，我接受审讯嘅时候，审讯员大声噉对我讲：“我哋好快会消灭晒你哋，就好似消灭啲老鼠噉！”我答佢话，“耶稣讲过，王国嘅好消息一定会传遍普天下，冇人阻止得到。”之后，审讯员改变手段，尝试说服我放弃信仰，就好似开头讲嘅噉。当威迫利诱都唔成功，我就被判去萨兰斯克市附近嘅劳动营做七年苦工。喺去劳动营途中，我知道二女奥尔加出咗世。虽然太太同两个女都离我好远，但系知道大家都忠于耶和华，我就好安慰。

马丽亚每年一次会从图伦坐火车到萨兰斯克嚟探我，来回足足要12日。每次佢都会带一对新靴俾我，仲会将近期嘅《守望台》收埋喺鞋踭嗰度。有一年，马丽亚带住两个年幼嘅女嚟探我，真系好难忘。你可以想象，当时我几咁感动！