1,2．（甲）好多弟兄姊妹对培养属灵思想有乜嘢睇法？（乙）我哋会讨论边三个同属灵有关嘅主要问题？

一位加拿大嘅姊妹话：“做属灵嘅人令我更加开心，亦都帮助我成功应付每日嘅考验。”一位嚟自巴西嘅弟兄话：“我哋夫妇都努力培养属灵嘅思想，所以23年嘅婚姻生活过得好幸福。”一位菲律宾嘅弟兄亦都话：“做属灵嘅人使我享有内心安宁，帮助我同唔同文化背景嘅弟兄姊妹有更亲密嘅关系。”

² 以上呢一类嘅描述都清楚表明，做属灵嘅人可以使我哋获益良多。我哋可以问吓自己：“我点样先可以成为一个属灵嘅人，享有上述嘅福分？”回答呢个问题之前，我哋先要清楚明白，圣经点样谈及属灵或者有属灵思想嘅人。喺呢篇课文，我哋会回答三个主要问题：（1）成为属灵嘅人意味住乜嘢？（2）边啲榜样可以帮助我哋喺属灵上进步？（3）努力培养“基督嘅思想”点样帮助我哋自己成为属灵嘅人。

一个属灵嘅人系点样嘅？

3．圣经描述顺应肉体嘅人同属灵嘅人有乜嘢唔同？

³ 为咗帮助我哋明白属灵嘅人系点样嘅，使徒保罗将“属灵嘅人”同“顺应肉体嘅人”作比较。（请读哥林多前书2:14-16）两者有乜嘢唔同呢？“顺应肉体嘅人认为上帝圣灵嘅事愚不可及，唔肯接受。噉样嘅人唔能够认识呢啲事”。相反，“属灵嘅人能够了解万事”，而且“有基督嘅思想”。保罗鼓励我哋要做属灵嘅人。接住落嚟，我哋睇吓两者喺其他方面仲有边啲差异。

4,5．顺应肉体嘅人有乜嘢特征？

⁴ 首先，请睇吓顺应肉体嘅人有点样嘅态度。呢个世界流行一种只系关心自己肉体欲望嘅态度。保罗话呢种态度系“目前作用于悖逆嘅人身上嘅精神”。（以弗所书2:2）喺呢种精神嘅影响之下，大多数人都有一种普遍嘅态度——随大流。佢哋净系关心肉体嘅欲望。结果，大多数人只系做自己觉得啱嘅事，根本唔想遵守上帝嘅标准。一个顺应肉体或者有肉体思想嘅人，通常会注重名誉地位，追求金钱财富，或者坚持自己认为有权得到嘅嘢。

⁵ 仲有乜嘢可以帮助我哋睇出一个人顺应肉体？圣经话，佢哋会有“顺应肉体嘅行为”。（加拉太书5:19-21）通过保罗写俾哥林多会众嘅第一封信，我哋可以睇出顺应肉体嘅人嘅其他特征：挑拨离间、分党结派、挑起纷争、互相控告、唔尊重领导权，同埋滥食纵酒。一旦受到诱惑，顺应肉体行事嘅人就会屈服妥协。（箴言7:21,22）圣经执笔者犹大话，呢啲堕落嘅人甚至一啲都“唔明白属灵嘅事”。（犹大书18,19）

6．点样睇出一个人系咪属灵嘅人？

⁶ 成为“属灵嘅人”意味住乜嘢？一个属灵嘅人好注重自己同上帝嘅关系，力求“效法上帝”。（以弗所书5:1）即系话，佢哋会努力了解上帝对事物嘅睇法，用上帝嘅观点嚟睇事情。对佢哋嚟讲，上帝非常真实。同顺应肉体行事嘅人完全唔同嘅系，有属灵思想嘅人会努力喺生活每一方面都谨守上帝嘅标准。（诗篇119:33；143:10）佢哋唔会将精神集中喺顺应肉体嘅事上，而会尽力结出“圣灵嘅果实”。（加拉太书5:22,23）以下嘅对比可以进一步说明“有属灵思想”系乜嘢意思：一个好识得做生意嘅人，我哋会话佢有商业头脑；类似嘅系，一个渴求真理同重视正确崇拜嘅人，会被称为有属灵思想嘅人。

7．圣经点样谈及有属灵思想嘅人？

⁷ 耶稣话，有属灵思想嘅人系有福嘅。我哋可以喺马太福音5:3读到：“自觉有属灵需要嘅人有福嘞，因为天上嘅王国系佢哋嘅。”罗马书8:6提及有属灵思想嘅人所得到嘅益处，话：“思想总系顺应圣灵，就必得生命平安。”我哋专注属灵嘅事，而家就可以同上帝享有和睦嘅关系，仲可以喺未来得到永生。

8．点解我哋要培养同保持有属灵嘅思想？

⁸ 不过，我哋生活喺一个危机四伏嘅环境入面。呢个世界充斥住顺应肉体嘅态度，所以，我哋想培养并保持有属灵嘅思想就需要付出好大嘅努力。如果我哋冇用耶和华嘅思想嚟充满自己嘅头脑，噉呢个世界就会将顺应肉体嘅精神同态度塞入我哋嘅头脑。我哋可以点样避免噉样嘅事发生？我哋点样可以变得更加属灵？

值得效法嘅榜样

9．（甲）乜嘢可以帮助我哋喺属灵上进步？（乙）我哋会睇吓边啲人嘅榜样？

⁹ 小朋友可以通过观察同模仿父母而得以进步。同样，观察同埋向灵性坚强嘅人学习可以帮助我哋喺属灵上成长。另一方面，我哋从嗰啲属肉体嘅人身上亦都学到乜嘢事唔应该做。（哥林多前书3:1-4）圣经将好嘅榜样同唔好嘅事例都记录落嚟。既然我哋嘅目标系要成为属灵嘅人，噉我哋可以特别留意嗰啲值得效法嘅榜样，例如雅各、马利亚同耶稣。

10．雅各点样表明自己系一个属灵嘅人？

¹⁰ 首先，我哋嚟睇吓雅各嘅榜样。同今日好多人一样，雅各嘅人生充满波折。佢嘅亲生哥哥以扫要杀死佢。除此之外，佢诡诈嘅岳父亦都三番四次噉利用佢。虽然身边有“顺应肉体嘅人”，不过雅各依然持有属灵嘅思想。佢坚信耶和华对亚伯拉罕所作嘅应许，亦都因为知道自己嘅家族喺成就耶和华旨意方面担任特别嘅角色，而尽心尽力照顾家人。（创世记28:10-15）雅各嘅所言所行表明佢谨记耶和华嘅标准同旨意。有一次，佢知道以扫会害佢，就向耶和华祷告话：“求你救我……你讲过：‘我必恩待你，使你嘅后代有如海边嘅沙’”。（创世记32:6-12）佢显然对耶和华嘅应许有坚定嘅信心，亦都喺行事为人方面尽力符合上帝嘅旨意。

11．乜嘢表明马利亚系一个属灵嘅人？

¹¹ 我哋而家再嚟睇吓马利亚嘅例子。点解耶和华选择马利亚做耶稣嘅母亲？一定系因为，佢系一个有属灵思想嘅人。我哋点知道呢？喺拜访亲戚撒迦利亚同伊利莎白嗰时，马利亚衷心赞美耶和华。通过呢番美丽嘅言词，我哋清楚睇出佢系一个属灵嘅人。（请读路加福音1:46-55）马利亚所讲嘅话表明佢深爱上帝嘅话语，非常熟悉希伯来语经文。（创世记30:13；撒母耳记上2:1-10；玛拉基书3:12）请留意，虽然佢同约瑟啱啱结咗婚，但喺耶稣出世之前，佢哋并冇发生性关系。噉表明乜嘢呢？呢个表明，比起满足个人嘅欲望，佢哋两个更关注嘅系耶和华嘅旨意。（马太福音1:25）喺耶稣嘅成长过程中，马利亚细心留意发生喺耶稣身上嘅事同埋佢所讲嘅话，而且“将呢一切都谨记在心”。（路加福音2:51）显然，佢好关注上帝对弥赛亚嘅应许。我哋都应该谂吓，自己可以点样效法马利亚嘅榜样，将上帝嘅旨意放喺生活嘅首位。

12．（甲）耶稣喺边方面效法佢嘅天父？（乙）我哋可以点样效法耶稣嘅榜样？（请睇吓课文开头嘅图片）

¹² 喺世上生活过嘅人当中，边个喺属灵方面系最佳嘅榜样？冇错，就系耶稣。耶稣喺地上嘅一生同埋佢嘅传道工作，都充分表明佢好想效法天父耶和华。佢喺思想、感情同行为上都同耶和华非常相似，佢亦都按照上帝嘅旨意同标准生活。（约翰福音8:29；14:9；15:10）我哋不妨比较吓以赛亚书同马可福音嘅记载，睇吓耶和华同耶稣喺表现怜恤方面有乜嘢相似之处。（请读以赛亚书63:9；马可福音6:34）我哋系咪乐意效法耶稣，随时做好准备，向嗰啲需要帮助嘅人表现怜恤？我哋系咪亦都效法耶稣，献出自己，专注于传讲同教人王国好消息嘅工作？（路加福音4:43）向人表现怜恤同努力帮助人都系属灵嘅人嘅标志。

13,14．（甲）我哋从今日属灵嘅弟兄姊妹身上可以学到乜嘢？（乙）请举例。

¹³ 今日，好多有属灵思想嘅弟兄姊妹都尽力效法基督。可能你都留意到，佢哋热心传道，热情好客，满怀怜恤，仲有其他美好嘅特质。其实，佢哋同我哋一样都系唔完美嘅人，要好努力对抗自身嘅弱点，先可以培养出呢啲美好嘅属灵特质。巴西一个叫蕾切尔嘅姊妹话：“我以前好钟意跟呢个世界嘅潮流，所以我嘅衣着唔系咁端庄得体。但系，学习圣经之后，圣经真理推动我努力成为一个属灵嘅人。作出调整一啲都唔容易，不过调整之后，我变得更加开心，而且揾到人生嘅真正意义。”

¹⁴ 菲律宾嘅拉伦要面对另一种挑战。佢为咗可以出人头地，就一心追求高等教育，希望揾到一份好工作。佢话：“我嘅属灵目标变得越来越模糊。不过后来，我开始意识到自己嘅人生缺失咗啲嘢，一啲远远比我嘅工作更加重要嘅嘢。之后，我作出调整，再次将注意力集中喺事奉耶和华嘅事上。”而家，拉伦对马太福音6:33,34嘅承诺充满信心。佢话：“我可以肯定，耶和华一定会照顾我！”可能你会众入面都有类似嘅榜样。你见到佢哋努力效法基督，系咪都好想跟随佢哋忠心嘅榜样？（哥林多前书11:1；帖撒罗尼迦后书3:7）

要有“基督嘅思想”

15,16．（甲）我哋想有基督嘅思想就要点样做？（乙）我哋可以点样了解“基督嘅思想”？

¹⁵ 我哋每个人可以点样效法基督？圣经喺哥林多前书2:16提到要有“基督嘅思想”。罗马书15:5 亦都提到要有“基督耶稣嘅思想态度”。所以，我哋想有基督嘅思想，就要认识佢嘅思维模式，全面了解佢嘅品格，仲要跟随佢嘅脚踪走。耶稣最注重嘅系自己同上帝嘅关系，佢完美反映出上帝嘅美好特质，所以我哋效法佢就系效法耶和华上帝。由此睇出，学习耶稣嘅思想的确非常重要。

¹⁶ 我哋点样可以做到？门徒睇到耶稣施行嘅奇迹，听到佢打动人心嘅教导，见到佢点样对待各种各样嘅人，同埋观察到佢点样运用上帝嘅原则。佢哋话：“佢……所做嘅一切事，我哋都可以做见证人。”（使徒行传10:39）虽然我哋唔能够直接观察耶稣，但系耶和华仁爱噉提供福音书嘅记载，能够使耶稣嘅品格鲜明浮现喺我哋嘅脑海中。阅读同沉思四本福音书嘅记载，我哋可以了解更多关于基督嘅思想。噉样做，我哋就能够“紧紧跟随［基督］嘅脚踪走”，而且“用［同佢一样］嘅心志武装自己”。（彼得前书2:21；4:1）

17．基督嘅思想可以点样帮助我哋？

¹⁷ 学习耶稣嘅思想可以点样帮助我哋？富有营养嘅食物可以使我哋身体强壮，同样，基督嘅思想可以强化我哋嘅灵性。我哋不断吸收基督嘅思想，就越来越清楚耶稣喺各种情况下会点样做。噉样可以帮助我哋作出明智嘅决定，使我哋保持清白嘅良心，得蒙上帝悦纳。既然学习基督嘅思想使我哋得到咁多益处，我哋唔系有理由要“穿上主耶稣基督嘅品格”咩？（罗马书13:14）

18．你从呢篇课文学到乜嘢？

¹⁸ 喺呢篇课文，我哋讨论咗成为属灵嘅人意味住乜嘢，我哋可以从圣经入面嘅榜样学到乜嘢，同埋有“基督嘅思想”可以点样帮助我哋成为一个属灵嘅人。不过，我哋仲有几个问题需要讨论。例如，我哋点样知道自己嘅灵性有几强壮？为咗培养坚强嘅灵性，我哋仲可以做啲乜嘢？一个人嘅属灵情况点样影响佢嘅日常生活？下一篇课文会回答呢啲问题。

1,2．一个弟兄发现自己嘅灵性有乜嘢问题？佢跟住点做？

罗伯特喺青少年嘅时候就受咗浸，不过佢并冇将真理放喺生活首位。佢话：“虽然我冇犯错，但系我喺属灵嘅事上只系做吓表面工夫。我冇错过任何聚会，每年都有几个月做辅助先驱。喺人睇嚟我嘅灵性好似好健壮，但实际上仲争咗啲嘢。”

² 罗伯特喺结婚之后先发觉自己灵性有啲问题。佢同太太喺空闲时间会互相问一啲圣经问题。佢太太灵性好好，回答圣经问题对佢嚟讲冇咩难度，但系罗伯特就因为经常唔识答而觉得好尴尬。佢话：“情况就好似我乜都唔识噉。我心谂：‘我作为家主，如果想喺属灵上带头，就一定要做啲调整先得。’”之后，罗伯特就作出调整。佢话：“我认真研读圣经，睇咗好多资料。圣经嘅知识就好似一块块拼图慢慢拼埋一齐。我对圣经有咗更深嘅了解。更重要嘅系，我同耶和华之间嘅关系更加亲密。”

3．（甲）我哋从罗伯特嘅例子可以学到乜嘢？（乙）我哋会讨论边啲要点？

³ 我哋从罗伯特嘅例子可以学到重要嘅教训。我哋可能有一定嘅圣经知识，亦可能经常同弟兄姊妹交往。即使系噉，我哋都未必会成为一个属灵嘅人。又或者，我哋可能喺属灵方面已经有一定嘅进步，但系，我哋深入察验自己，就会发现自己仲有进步嘅空间。（腓立比书3:16）为咗帮助自己继续进步，我哋会喺呢篇课文回答三个主要问题：（1）乜嘢可以帮助我哋分析自己嘅属灵情况？（2）我哋可以点样成为一个属灵嘅人，而且喺属灵上不断进步？（3）喺生活上运用属灵嘅思想，可以点样帮助我哋做明智嘅决定？

自我分析

4．以弗所书4:23,24嘅劝勉适用于边啲人？

⁴ 我哋成为上帝子民嗰阵，就已经喺生活各方面作出调整。即使我哋受咗浸，都仲系要不断调整。圣经劝勉我哋“要继续更新［我哋］思想背后嘅动力”。（以弗所书4:23,24）因为人人都唔完美，所以我哋需要继续作出改变。就算系嗰啲已经事奉耶和华多年嘅人，都需要保持灵性健壮。（腓立比书3:12,13）

5．乜嘢问题可以帮助我哋分析自己嘅属灵情况？

⁵ 如果我哋想保持灵性健壮并且喺属灵上不断进步，就要诚实噉分析自己嘅情况。无论我哋年轻抑或年老，我哋可以问吓自己：“我嘅改变有冇表明自己正向前迈进，努力成为一个有属灵思想嘅人？我嘅品格系咪越来越似基督？我参加聚会嗰时嘅态度同行为，显示我嘅属灵情况系点样嘅？我同人交谈嘅内容表明我内心最关心嘅系乜嘢？我嘅研读习惯、衣着打扮或者对劝告嘅反应，显示我系点样嘅人？面对诱惑嗰阵，我有乜嘢反应？我系咪努力成为一个更加成熟嘅基督徒，表明自己喺属灵方面不断长大成人？”（以弗所书4:13）思考呢啲问题嘅答案，可以帮助我哋睇出自己喺属灵上进步到乜嘢程度。

6．仲有乜嘢方法可以帮助我哋分析自己嘅属灵情况？

⁶ 有时，我哋可能需要其他人帮助我哋分析自己嘅属灵状况。使徒保罗指出，顺应肉体嘅人睇唔出自己嘅生活方式得唔到上帝嘅悦纳。不过，属灵嘅人就明白上帝嘅观点，知道属肉体嘅人嘅生活方式系错嘅。（哥林多前书2:14-16；3:1-3）如果会众开始有属肉体嘅倾向，通常有基督思想嘅长老会好快察觉得到。当长老俾我哋劝告嘅时候，我哋愿唔愿意接受并且将劝告运用出嚟呢？如果我哋愿意噉做，就表明我哋渴望喺属灵上进步。（传道书7:5,9）

继续喺属灵上进步

7．点解单靠圣经知识唔能够使我哋成为一个属灵嘅人？

⁷ 请记住，单靠圣经知识唔足以令你成为一个有属灵思想嘅人。古代嘅所罗门王知道好多同耶和华有关嘅事，而且佢所讲嘅话后来亦都成为圣经嘅一部分。不过最终，佢成为一个唔属灵嘅人，对耶和华冇继续保持忠贞。（列王纪上4:29,30；11:4-6）所以，除咗圣经知识之外，仲需要乜嘢？我哋需要继续喺属灵上进步。（歌罗西书2:6,7）我哋应该点样做呢？

8,9．（甲）乜嘢会帮助我哋巩固自己嘅灵性？（乙）我哋研读同沉思嘅目标系乜嘢？（请睇吓课文开头嘅图片）

⁸ 保罗鼓励1世纪嘅基督徒喺属灵上要“迈向成熟嘅阶段”。（希伯来书6:1）为咗实践保罗嘅劝告，我哋可以点样做？要学习《常在上帝的爱里》，噉样做好重要。呢本书可以帮助你学识点样将圣经原则应用喺生活上。如果你已经学完呢本书，可以研读其他出版物，继续巩固自己嘅信心。（歌罗西书1:23）我哋亦都可以沉思自己学到嘅内容，恳求耶和华帮助我哋将呢啲知识实践出嚟。

⁹ 请谨记，我哋研读同沉思嘅时候，应该以渴望取悦耶和华同服从佢嘅律法为目标。（诗篇40:8；119:97）同时，我哋要付出努力，唔好俾任何事妨碍我哋嘅属灵成长。（提多书2:11,12）

10．年轻人如果想喺属灵上进步，可以点样做？

¹⁰ 年轻人，你有冇清晰嘅属灵目标？每次参加分区大会嘅时候，一个喺伯特利服务嘅弟兄，习惯喺节目开始之前同嗰啲准备受浸嘅弟兄姊妹倾吓计。呢啲弟兄姊妹好多都系年轻人。弟兄问佢哋有乜嘢属灵目标。好多人嘅回答都表明，佢哋清楚知道自己想喺将来点样事奉耶和华。佢哋嘅目标可能系参与某种形式嘅全时服务，或者系去需求更大嘅地区传道。不过，都有啲年轻人睇嚟唔清楚自己嘅目标系乜嘢。噉系咪表明佢哋心入面仲未定立清晰嘅属灵目标？如果你系个年轻人，请问吓自己：“我参与属灵活动系咪只系因为父母要求我噉做？”当然，除咗年轻人之外，我哋每一个人都应该定立属灵目标，噉我哋就可以喺属灵上继续进步。（传道书12:1,13）

11．（甲）我哋想喺属灵上进步，就需要点样做？（乙）边个圣经人物值得我哋效法？

¹¹ 我哋一发现自己仲有可以进步嘅空间，就应该采用一啲切实可行嘅方法嚟帮助自己向前迈进。成为一个属灵嘅人非常重要，因为呢个关乎到我哋嘅生命。（罗马书8:6-8）不过，我哋想喺属灵上成熟唔等于要变得完美。耶和华嘅圣灵会帮助我哋进步，而我哋自己亦都需要付出努力。好多年前，中央长老团成员约翰·巴尔弟兄引用路加福音13:24指出：“好多人做唔到，系因为佢哋冇努力使自己坚毅刚强。”雅各同天使摔跤嗰时，佢点都唔肯放弃直至得到祝福。我哋都需要有佢噉嘅态度。（创世记32:26-28）虽然研读圣经好有乐趣，但我哋唔应该认为圣经系一本为咗娱乐而写嘅小说。我哋要努力挖掘属灵嘅宝石，使自己得益。

12,13．（甲）乜嘢帮助我哋“有基督耶稣嘅思想态度”？（乙）使徒彼得嘅例子同劝勉可以点样帮助我哋？（丙）你可以做啲乜嘢使自己喺属灵上进步？（请参考附栏“想喺属灵上进步你可以点样做”）

¹² 如果我哋喺属灵上努力进步，圣灵就会使我哋有力量调整自己嘅思想。喺圣灵嘅帮助下，我哋会逐渐学识用基督嘅思想嚟考虑问题。（罗马书15:5）另外，圣灵仲会帮助我哋铲除肉体嘅欲望，培养耶和华喜悦嘅特质。（加拉太书5:16,22,23）就算我哋有时仲系会想追求物质或者满足肉体嘅欲望，都千祈唔好向呢啲倾向屈服。我哋要继续向上帝祈求圣灵，噉耶和华就会帮助我哋作出调整，再次将注意力集中喺正确嘅事情上。（路加福音11:13）使徒彼得都曾经有几次冇用基督嘅思想嚟考虑问题。（马太福音16:22,23；路加福音22:34,54-62；加拉太书2:11-14）不过我哋要记得，佢并冇放弃。喺耶和华嘅帮助下，彼得慢慢培养出基督嘅思想。我哋都可以做得到。

¹³ 后来，彼得具体列出咗一啲我哋可以努力培养嘅特质。（请读彼得后书1:5-8）我哋“尽力”培养自制、忍耐同埋弟兄之情呢啲美好特质，就会继续向前迈进，成为一个属灵嘅人。我哋每日都可以问吓自己：“喺属灵上，我今日可以做啲乜嘢使自己进步？”

喺生活上运用圣经原则

14．基督嘅思想点样影响我哋嘅生活？

¹⁴ 基督嘅思想会影响我哋喺工作地方或者喺学校嘅言行，同埋我哋每日所作嘅决定。我哋嘅决定可以表明我哋系咪努力效法基督。作为属灵嘅人，我哋唔希望有任何事破坏我哋同天父嘅关系。面对诱惑嗰阵，如果我哋有基督嘅思想，就会即刻拒绝呢啲引诱。我哋做决定嘅时候，会停落嚟反覆仔细谂吓呢啲问题：“边啲圣经原则可以帮助我做决定？耶稣喺噉嘅情况下会点做？耶和华希望我哋作出点样嘅决定？”我哋应该培养噉样嘅思维模式。而家我哋嚟睇吓，生活上可能会遇到嘅几种情况。喺每种情况我哋都可以学到一个圣经原则，有助于我哋作明智嘅决定。

15,16．基督嘅思想喺以下两方面点样帮助我哋作出明智嘅抉择？（甲）选择配偶；（乙）结交朋友。

¹⁵ 选择配偶。相关嘅圣经原则可以参考哥林多后书6:14,15（请读）。保罗嘅话清楚表明，一个属灵嘅人同一个唔属灵嘅人有好大差异，佢哋喺好多重要嘅事情上好难有一致嘅睇法。我哋可以点样运用呢个原则嚟选择配偶？

¹⁶ 结交朋友。相关嘅圣经原则可以参考哥林多前书15:33（请读）。一个爱上帝嘅人唔会同嗰啲危害佢灵性嘅人密切来往。喺唔同情况下，你可以点样运用呢个原则？例如，你会结交点样嘅朋友？如果有陌生人邀请你一齐玩线上游戏，你应该点做？

17-19．属灵嘅思想点样帮助你 （甲）避免追求冇意义嘅事？（乙）定立人生目标？（丙）解决纷争？

¹⁷ 妨碍灵性成长嘅行为。保罗对基督徒同工所讲嘅话俾咗我哋一个提醒。（请读希伯来书6:1）我哋应该避免边啲“死嘅行为”？就系任何喺属灵上冇意义或者会使我哋灵性死去嘅行为。呢个原则可以帮助我哋喺一啲问题上作出正确嘅判断同明智嘅选择，例如：呢种行为系咪属肉体嘅呢？我系咪应该接受某个赚钱嘅机会？点解我唔应该参与呢个世界嘅改革运动？

¹⁸ 属灵目标。耶稣嘅登山宝训喺定立目标方面为我哋提供咗清晰嘅指引。（马太福音6:33）有属灵思想嘅人会将王国事务放喺生活首位。呢个原则可以帮助我哋回答类似以下嘅问题：我应唔应该追求高等教育？我系咪要接受某份工作？

¹⁹ 纷争。当我哋同其他人有争执嘅时候，保罗向罗马会众提出嘅劝告点样帮助我哋解决问题？作为基督嘅门徒，我哋应该尽力“同所有人和睦相处”。（罗马书12:18）同人发生争执嘅时候，我会有乜嘢反应？我系咪唔容易作出让步呢？抑或其他人都觉得我系个“促进和睦”嘅人？（雅各书3:18）

20．点解你想向前迈进，做一个属灵嘅人？

²⁰ 我哋运用圣经原则做决定，就表明我哋愿意受上帝圣灵指引。以上嘅例子表明，圣经原则可以帮助我哋作出明智嘅决定，使我哋嘅生活过得更加心满意足。课文开头提到嘅罗伯特话：“同耶和华有亲密嘅关系，使我成为更好嘅丈夫同父亲。而家，我生活得又满足又快乐。”如果我哋尽力做一个属灵嘅人，亦都可以好似佢噉享有各种福分。我哋唔单止而家就有更快乐更有满足感嘅人生，而且仲可以喺将来享有“真正嘅生命”。（提摩太前书6:19）