1,2． （甲）乜嘢系我哋最宝贵嘅？（乙）我哋珍视边啲真理？点解？（请睇吓课文开头嘅图片）

你一生中最宝贵嘅系乜嘢？你愿唔愿意用佢嚟交换另一样价值冇咁高嘅嘢呢？对已经献身俾耶和华嘅人嚟讲，答案好简单。我哋所拥有嘅嘢当中，最宝贵嘅就系同耶和华嘅关系，而我哋一定唔会用佢嚟交换其他嘢。我哋好珍视圣经真理，因为圣经真理使我哋同天父有更亲密嘅关系。（歌罗西书1:9,10）

² 耶和华系伟大嘅导师，佢通过佢嘅话语圣经教导我哋好多宝贵嘅真理。佢帮助我哋认识佢各种美好嘅特质；佢向我哋透露自己名字嘅重要意义；佢深爱人类，为人类献出自己嘅爱子作为赎价；佢话俾我哋知同弥赛亚王国有关嘅事；佢使受膏基督徒有希望去天上，亦都使“另外嘅绵羊”有希望喺地上乐园享永生；（约翰福音10:16）佢仲教导我哋点样行事为人。对我哋嚟讲，呢啲真理真系好宝贵，唔单止帮助我哋亲近创造主，仲使我哋嘅人生充满意义。

3． 耶和华会唔会要求我哋俾钱买真理？

³ 耶和华系慷慨嘅上帝，佢甚至不惜牺牲自己爱子嘅生命嚟救赎人类。如果耶和华知道一个人正喺度寻求真理，佢就会伸出援手，帮助呢个人揾到真理。上帝绝对唔会要求我哋俾钱买真理。有一次，一个叫西门嘅男子俾钱使徒彼得，想买赐人圣灵嘅权柄。彼得谴责佢话：“你嘅银子同你一齐消灭喇！你居然以为上帝白白俾人嘅恩赐，系可以用钱买嘅。”（使徒行传8:18-20）既然系噉，圣经提到嘅“买真理”，究竟系乜嘢意思呢？

“买”真理系乜嘢意思？

4． 关于真理，我哋喺呢篇课文会学到乜嘢？

⁴ 请读箴言23:23。如果唔付出努力，我哋就唔能够从上帝嘅话语揾到真理。想得到真理，我哋就一定要作出必要嘅牺牲。正如箴言执笔者所讲，我哋一旦“买”真理，即系学咗“真理”，就要小心，千祈唔好“卖出”，即系放弃真理。等我哋嚟讨论吓，“买”真理系乜嘢意思，同埋我哋为咗得到真理可能要付出乜嘢代价。噉样，我哋就会对真理有更深刻嘅体会，强化自己唔会“卖出”真理嘅决心。接住落嚟，我哋会睇吓，点解耶和华嘅真理远比世上嘅任何事物更有价值。

5,6． （甲）点解话，我哋唔需要用钱买真理？请举例。（乙）真理点样造益我哋？

⁵ 即使有啲嘢系免费嘅，但系想得到嘅话，就要有所付出先至得。箴言23:23翻译成“买”嘅希伯来语词，亦都有“得到”嘅意思。呢两个词都表示，一个人为咗得到一样佢认为有价值嘅嘢，就要付出努力或者某啲代价。不过，噉样唔等于一定要俾钱。为咗明白我哋可以点样买真理，不妨谂吓一个例子。有间超市宣传话可以免费试食香蕉，不过呢啲香蕉会唔会自动出现喺我哋嘅餐台上面呢？当然唔会。要食就要去超市攞。呢啲香蕉系咪免费嘅呢？冇错，系免费嘅。不过，我哋想得到就要付出努力，花时间去超市。同样，我哋唔需要用钱买真理，但系就要付出努力先可以得到真理。

⁶ 请读以赛亚书55:1-3。耶和华通过以赛亚进一步讲明买真理嘅意思。喺呢段经文入面，耶和华将佢嘅话语比作水、奶同酒。正如一杯清凉嘅水喺夏天可以令人身心舒畅，同样，上帝嘅话语都可以令我哋重新得力。牛奶好有营养，可以促进儿童生长发育，耶和华嘅话语亦可以使我哋得到滋养，帮助我哋喺灵性上成长。耶和华嘅话语都好似酒。喺边方面呢？喺圣经入面，好多时酒同喜乐有关。（诗篇104:15）所以，耶和华叫佢嘅子民“买酒”，即系向我哋保证，我哋按照佢嘅话语生活就可以得享快乐。（诗篇19:8）耶和华用呢啲比喻嚟帮助我哋明白，我哋学习并应用圣经嘅原则可以点样得益，而我哋作出嘅努力，就系我哋买真理所付出嘅代价。而家，等我哋嚟睇吓，为咗买真理要喺边五方面作出牺牲或者调整。

你付出咗乜嘢嚟买真理？

7,8． （甲）点解我哋要用时间嚟买真理？（乙）一个年轻嘅圣经学生付出乜嘢努力？结果点样？

⁷ 时间。呢个系所有买真理嘅人都一定要付出嘅。聆听王国嘅信息、阅读圣经同圣经出版物、做个人研读、预习资料并参加会众聚会都需要花时间。我哋要做呢啲事，就要“买尽时机”，减少其他冇咁重要嘅活动。（请读以弗所书5:15,16）我哋掌握基本嘅圣经知识需要付出几多时间呢？呢个要视乎情况而定。我哋可以无限噉学习耶和华嘅智慧、作为同埋行事方式。（罗马书11:33）《守望台》嘅创刊号将真理比作“一朵小花”，又话：“请唔好只系满足于一朵小花。如果揾到一朵就满足嘅话，噉就揾唔到更多嘞。要不断噉揾，不断噉摘。”我哋可以问吓自己：“我嘅真理花束有几大扎呢？”就算我哋有无穷无尽嘅生命，都可以一直学习关于耶和华嘅知识。今日，我哋应该善用时间，情况允许嘅话就尽可能买多啲真理。我哋嚟睇吓一个渴求真理嘅人嘅例子。

⁸ 真理子a去咗美国纽约市读书。有一日，一个先驱姊妹做逐家逐户传道嗰时遇到佢。虽然佢当时已经有信仰，但仲系开始同先驱姊妹学习圣经。佢好钟意所学到嘅真理，于是向先驱姊妹提出，想一个星期学习两次。真理子一边返学一边打工，虽然生活好忙，不过佢决定即刻参加会众聚会。为咗买尽时机学习圣经真理，佢停止参加某啲社交活动。佢付出好大努力，结果喺属灵上进步得好快。唔到一年，佢就受浸。受浸六个月之后，佢就开始做先驱。当时系2006年。而家，佢仍然紧守先驱岗位，为耶和华服务。

9,10． （甲）买真理点样影响我哋对物质财富嘅睇法？（乙）一个年轻女子放弃咗乜嘢前途？佢对自己嘅选择有乜嘢睇法？

⁹ 物质财富。为咗买真理，我哋可能不得不放弃一份高收入嘅工作或者事业。彼得同安得烈原本以打渔为生，后来耶稣邀请佢哋做“得人嘅渔夫”，佢哋就即刻“揼低个网”。（马太福音4:18-20）当然，今日好多学习圣经嘅人都有责任照顾家人，唔能够马上揼低自己嘅工作，话走就走。（提摩太前书5:8）不过通常嚟讲，一个人接受真理之后就会改变对物质财富嘅睇法，调整自己嘅生活重心。耶稣清楚提到呢一点，话：“你哋唔好再为自己喺地上积存财宝，……要为自己喺天上积存财宝”。（马太福音6:19,20）我哋嚟睇吓一个年轻女子嘅榜样。

¹⁰ 玛丽亚喺读书之前就已经好钟意打高尔夫球。佢喺高中嗰时，高尔夫球越打越好，结果得到大学嘅奖学金。高尔夫球系佢嘅生命，佢嘅目标就系成为一个职业高尔夫球手，通过呢个工作嚟赚大钱。后来，玛丽亚开始学习圣经。佢好钟意学习圣经，亦都运用学到嘅真理，喺生活上作出调整。佢话：“我越按照圣经嘅标准调整自己嘅态度同生活方式，就变得越快乐。”玛丽亚意识到自己好难同时追求属灵目标同物质财富。（马太福音6:24）佢之前嘅人生目标系成为职业高尔夫球手，可以名利双收。不过，最后佢选择买真理。佢而家系一个先驱，佢话而家享有嘅系“最开心、最有意义嘅生活”。

11． 买真理对我哋嘅人际关系有乜嘢影响？

¹¹ 人际关系。我哋选择按照圣经真理生活之后，我哋同亲友嘅关系就可能会发生改变。点解？耶稣为门徒祷告话：“求你用真理使佢哋成圣，你嘅话语就系真理。”（约翰福音17:17）“使佢哋成圣”亦都可以理解为“使佢哋分别开嚟”。我哋一旦接受真理，就唔再好似大多数人噉按照呢个世界嘅标准嚟行事为人，噉真理就会使我哋同世界分别开嚟。其他人觉得我哋同佢哋唔一样，因为我哋嘅价值观已经改变。我哋会按照圣经真理生活。虽然我哋唔想造成分裂，但有啲朋友或者家人可能会同我哋保持距离，甚至反对我哋嘅新信仰。呢个一啲都唔出奇，因为耶稣讲过：“人嘅仇敌就系自己嘅家人。”（马太福音10:36）耶稣亦都向我哋保证，无论我哋为真理作出几多牺牲，得到嘅回报一定远远超过我哋付出嘅。（请读马可福音10:28-30）

12． 为咗买真理，一个犹太裔男子付出咗乜嘢代价？

¹² 一个犹太裔商人叫阿伦，佢自细受到嘅教导话，上帝嘅名系唔可以读出嚟嘅。不过，阿伦渴求真理。有一日，一个见证人向佢示范，如果喺上帝嘅名嘅四个希伯来语辅音字母中加入元音，噉上帝嘅名就有可能读成“耶和华”。阿伦知道之后好兴奋，即刻去会堂话俾拉比知。不过，拉比嘅反应就令阿伦好意外。佢哋冇因为听到关于上帝圣名嘅真理而开心，反而向阿伦吐口水，将佢赶出会堂。阿伦同家人嘅关系亦都变得好紧张。不过佢无所畏惧，继续买真理。后来，阿伦成为一个耶和华见证人，决心一生忠贞事奉耶和华。就好似阿伦噉，为咗按真理行事，即使社会地位或者家庭关系可能会发生变化，我哋都愿意接受。

13,14． 为咗买真理，我哋嘅思想行为要作出点样嘅改变？请举例。

¹³ 唔敬虔嘅思想行为。为咗接受真理同埋按照圣经嘅道德标准生活，我哋要乐意调整自己嘅思想同行为。关于呢点，请留意彼得喺书信入面点讲。佢话：“你哋既然系顺从嘅孩子，就唔好再受以往无知嘅时候所怀嘅欲望所支配，仿照当时嘅样式处世为人；要……喺一切行为上圣洁。”（彼得前书1:14,15）对生活喺道德败坏嘅哥林多城嘅人嚟讲，买真理就意味住佢哋嘅生活方式要作出好大嘅调整。（哥林多前书6:9-11）同样，为咗买真理，今日好多人都弃绝咗上帝所憎恨嘅行为。彼得进一步提醒当时嘅基督徒话：“你哋过去随住列国嘅人嘅心意做事，耽于无耻嘅行为、贪欲、纵酒、狂欢、竞饮、违法拜偶像嘅事，所花嘅时间已经够嘞。”（彼得前书4:3）

¹⁴ 德文同贾丝明有好多年都过住纵酒嘅生活。虽然德文系一个专业嘅簿记员，但佢因为滥用酒精而冇办法长期工作。而贾丝明系一个好容易发嬲同钟意暴力嘅人，呢个好多人都知道。有一日，贾丝明饮醉酒，喺路上遇到两个特派传道员。佢哋主动提出喺跟住嗰个星期去贾丝明住嘅地方探访佢，同佢讨论圣经。不过，当两个特派传道员去到嗰阵，贾丝明同德文都饮醉咗。佢哋冇谂到呢两个特派传道员会咁关心佢哋，居然上门探访佢哋。下一次嘅情况就唔同晒嘞。自从第一次学习以来，贾丝明同德文就好勤力学习圣经，亦都开始将所学到嘅实践出嚟。唔到三个月，佢哋就决心唔再饮酒，之后成为合法夫妻。村入面好多人都留意到贾丝明同德文嘅改变，结果佢哋亦都想学习圣经。

15． 为咗买真理，其中一样最难撇弃嘅可能系乜嘢？点解？

¹⁵ 唔敬虔嘅传统习惯。有啲人一旦知道一啲传统习惯系耶和华唔钟意嘅，就唔再做嘞。但系，对某啲人嚟讲，噉样做并唔容易，因为佢哋嘅家人、同事或者朋友对某啲传统有好强烈嘅感觉，例如同拜祭死去嘅亲人有关嘅习俗。（申命记14:1）圣经嘅一啲勇敢榜样可以帮助我哋作出改变。请睇吓以弗所早期嘅基督徒为咗取悦耶和华点样做。

16． 有啲以弗所人为咗买真理就点样做？

¹⁶ 喺古代嘅以弗所，施行魔法系好普遍嘅事。有啲曾经施行过魔法嘅人归信基督教之后点样做？圣经话：“好多惯行魔法嘅人将书带嚟，堆喺一齐，当众烧毁。佢哋计算书嘅价值，先知道总共值五万块银子。噉样，耶和华嘅话语日益兴旺，大有能力，节节得胜。”（使徒行传19:19,20）佢哋放弃嘅书的确好值钱，但佢哋忠贞嘅表现可以得到上帝无价嘅赐福。

17． （甲）为咗买真理，我哋可能要付出乜嘢代价？（乙）下一篇课文会讨论乜嘢问题？

¹⁷ 为咗买真理，你付出咗乜嘢代价？我哋所有人都要付出时间嚟收集真理之花；有啲人为咗买真理愿意放弃赚大钱嘅机会；有啲人嘅人际关系发生改变；好多人须要改变自己嘅思想行为同传统习惯。我哋相信，为咗换取圣经真理而付出嘅任何代价都系值得嘅。真理带俾我哋最宝贵嘅财产，就系同耶和华嘅亲密关系。我哋沉思自己认识真理之后得到嘅所有福分，就好难想象点解会有人居然愿意卖出真理。点解会有噉嘅事发生呢？我哋点样可以避免犯咁大嘅错误？下一篇课文会讨论呢啲问题。

1-3． （甲）我哋对圣经真理应该有点样嘅睇法？请举例。（请睇吓课文开头嘅图片）（乙）我哋会喺呢篇课文讨论乜嘢问题？

人喺商店买咗嘢之后退货，系好普遍嘅事。喺某啲国家，店铺售卖嘅商品估计有将近9%会被消费者退货。而根据某啲数据显示，网购商品嘅退货率甚至超过30%。可能消费者觉得商品唔符合佢哋嘅期望、有瑕疵又或者只系唔合心意，就提出换货或者退货。

² 虽然我哋买咗商品之后有可能会退货，不过，我哋一旦“买”到圣经知识，即系“确切认识真理”，就绝对唔会退货或者“卖出”。（请读箴言23:23；提摩太前书2:4）正如上一篇课文讨论过嘅一样，我哋为咗得到真理付出咗好多时间嚟学习。另外，为咗买真理，我哋可能放弃咗收入丰厚嘅工作，要应付人际关系嘅变化，亦都要调整自己嘅思想行为，或者弃绝耶和华唔悦纳嘅传统习惯。不过，同我哋得到嘅福分相比，我哋付出嘅代价真系好少。

³ 为咗表明王国真理嘅价值，耶稣讲咗一个寻找上好珍珠嘅商旅嘅比喻。一个商旅揾到一粒价值连城嘅珍珠，就“即刻去卖晒”自己嘅一切去买嗰粒珍珠。（马太福音13:45,46）我哋通过上帝嘅话语揾到真理嗰时，可能都有同样嘅感觉。上帝王国以及其他宝贵嘅真理，对我哋嚟讲有非凡嘅价值。所以，为咗得到呢啲真理，我哋愿意马上作出牺牲。如果我哋珍视得到嘅真理，就绝对唔会“卖出”。不过好可惜，上帝嘅一啲子民睇唔出自己拥有嘅真理有几咁大嘅价值，甚至将真理卖出去。愿呢啲事永远唔会发生喺我哋身上！为咗表明我哋非常珍视真理而且绝对唔会卖真理，我哋必须听从圣经嘅劝告，“按真理行事”。（请读约翰三书2-4）呢个意味住，我哋要将真理放喺首位，而且要实践出嚟。而家，我哋会讨论以下嘅问题：有啲人点解会“卖出”真理？点样“卖出”？我哋可以点样避免犯呢个可悲嘅错误？我哋可以点样强化自己“按真理行事”嘅决心？

有啲人点解会“卖出”真理？点样“卖出”？

4． 点解1世纪有啲人会“卖出”真理？

⁴ 喺公元1世纪，有啲人起初积极响应耶稣嘅教导，可惜佢哋冇继续按真理行事。例如，耶稣施行奇迹喂饱咗一大群人之后，呢群人就跟住耶稣去到加利利海嘅另一边。喺嗰度，耶稣对佢哋讲：“如果你哋唔食人子嘅肉，唔饮佢嘅血，就冇生命喺你哋里面。”佢哋听到耶稣嘅话就觉得好震惊。佢哋冇问耶稣呢番话系咩意思，而系话：“噉样嘅话骇人听闻，边个听得入呢？”结果，“佢门徒当中有好多人离开，耽于已经撇低嘅事，唔再与佢同行”。（约翰福音6:53-66）

5,6． （甲）点解今日有啲人冇继续持守真理？（乙）一个人可能会点样慢慢离开真理？

⁵ 好可惜，今日有啲人冇继续持守真理。有啲人可能系因为唔接受经文嘅新理解，而有啲人可能系俾一个有职责嘅弟兄嘅所言所行绊倒。亦有啲人可能因为受到嚟自圣经嘅劝告，又或者同其他基督徒同工性格不合而离开真理。仲有啲人支持叛道者同其他反对者，歪曲我哋嘅信仰。结果，有啲人就噉样“离弃”咗耶和华同会众。（希伯来书3:12-14）如果佢哋好似使徒彼得噉持守信仰，继续信赖耶稣，情况就会好好多嘞！当耶稣问使徒系咪想离开嗰时，彼得即刻回答话：“主啊，我哋仲归附边个呢？你有永生嘅话语啊。”（约翰福音6:67-69）

⁶ 有啲人好似一只逐渐远离岸边嘅船噉，不知不觉慢慢离开真理。圣经将呢种缓慢嘅变化叫做“随流漂去”。（希伯来书2:1）同嗰啲故意离弃真理嘅人唔同，随流漂去嘅人并唔系刻意噉样做嘅。不过，呢啲人可能最终会失去同耶和华亲密嘅关系。我哋可以点样避免噉样嘅悲剧发生？

我哋可以点样避免卖出真理？

7． 乜嘢可以帮助我哋唔会卖出真理？

⁷ 为咗继续按真理行事，耶和华所讲嘅一切我哋都必须接受同遵行。我哋要将真理放喺生活首位，按照圣经原则嚟生活。大卫王向耶和华祷告嘅时候话：“我要按你嘅真理而行。”（诗篇86:11）大卫决心继续坚定噉按上帝嘅真理行事，而我哋亦都必须噉样做。否则，我哋就可能会开始谂，自己为真理牺牲咗乜嘢，或者点样可以攞返曾经失去咗嘅嘢。我哋唔能够选择接受某啲真理，但系就忽略另一啲。总而言之，我哋必须按照“全部真理”嚟行事。（约翰福音16:13）上一篇课文讨论过，我哋为咗得到真理可能喺五方面付出代价。而家嚟睇吓，我哋可以点样确保自己唔再攞返呢啲已经付出嘅嘢。（马太福音6:19）

8． 唔明智噉使用时间会点样导致一个基督徒不知不觉噉离开真理？请举例。

⁸ 时间。为咗避免不知不觉噉离开真理，我哋必须善用时间。如果我哋唔留意，就可能会喺娱乐、爱好、浏览互联网或者喺睇电视方面耗费过多嘅时间。虽然做呢啲事唔系错嘅，但系就会占用个人研读同埋其他属灵活动嘅时间。请睇吓爱玛姊妹嘅例子。a爱玛自细就好钟意马。只要有机会，佢就会去骑马。一段时间之后，佢开始觉得自己唔应该将所有嘅时间都用喺个人爱好之上。佢想将自己嘅爱好放喺适当嘅位置，最终成功作出调整。佢亦都从表演花式马术嘅科莉·韦尔斯姊妹嘅经验得到鼓励。b爱玛而家好开心可以多啲参与属灵活动，亦都有更多时间同基督徒家人、朋友喺一齐。佢因为善用时间而感到快乐，亦都觉得同耶和华有更亲密嘅关系。

9． 追求物质财富点样使一啲人将属灵嘅事放埋一边？

⁹ 物质财富。我哋想继续按真理行事，就唔能够太过重视物质财富。我哋学习真理之后，会意识到追求属灵目标比追求物质财富更加重要。为咗追求真理，我哋好乐意放弃任何物质嘅嘢。不过，随住时间过去，我哋见到其他人买最新嘅电子产品，或者享用其他用钱买到嘅嘢，就可能觉得自己错过咗享受嘅机会，而唔再只系满足于生活嘅必需品。我哋可能为咗积存物质财富，会将属灵嘅追求放埋一边。呢个令我哋谂起底马。佢因为“贪恋呢个制度”，就唔再同使徒保罗一齐事奉上帝。（提摩太后书4:10）点解底马离开保罗？圣经冇讲，不过可能系因为佢贪恋物质嘅嘢就唔重视为上帝服务嘅机会，又或者佢唔想再同保罗一齐过自我牺牲嘅生活。我哋肯定唔希望自己对物质财富嘅欲望再次死灰复燃，以致失去对真理嘅爱。

10． 为咗按真理行事，我哋必须抵受乜嘢压力？

¹⁰ 人际关系。我哋想继续按真理行事，就绝对唔可以因为其他人嘅压力而屈服。我哋开始按真理行事，同其他非见证人以及家人嘅关系就会发生改变。可能有啲人会尊重我哋嘅新信仰，但亦都有啲人会公然反对。（彼得前书4:4）虽然我哋尽力同家人维持和睦嘅关系，仁慈噉对待佢哋，但系我哋要小心，唔好为咗取悦佢哋而喺真理上妥协。基于哥林多前书15:33提出嘅明确劝告，我哋只会同嗰啲爱耶和华嘅人有亲密嘅友谊。

11． 我哋点样可以避免唔敬虔嘅思想行为？

¹¹ 唔敬虔嘅思想行为。所有按真理行事嘅人都必须圣洁。（以赛亚书35:8；请读彼得前书1:14-16）为咗符合圣经嘅正义标准，所有认识真理嘅人都必须作出调整，有啲人甚至要作出重大嘅改变。无论喺乜嘢情况下，我哋都绝对唔会用我哋纯洁嘅生活嚟换取不道德嘅生活。乜嘢可以帮助我哋避免向不道德嘅行为屈服？我哋要沉思耶和华为咗使我哋成圣而付出嘅代价，就系佢爱子耶稣基督嘅宝血。（彼得前书1:18,19）我哋如果想喺耶和华面前保持洁净，就要谨记耶稣赎价嘅价值。

12,13． （甲）点解清楚了解耶和华对节日嘅睇法好重要？（乙）接住落嚟我哋会讨论乜嘢？

¹² 唔敬虔嘅传统习惯。家人、同事、同学可能会尝试说服我哋参加佢哋嘅庆祝活动。乜嘢可以帮助我哋拒绝参加呢啲令耶和华不悦嘅习俗同节日？我哋要清楚了解耶和华对呢啲活动嘅睇法。我哋可以温习吓出版物入面关于节日起源嘅内容。我哋沉思唔参加呢啲节日嘅圣经理由，就可以确信自己系按“主所悦纳嘅”方式行事。（以弗所书5:10）只要信赖耶和华同圣经真理，我哋就唔会“战兢惧怕人”。（箴言29:25）

¹³ 按真理行事系一个持续嘅过程，系一条我哋希望永远行走嘅道路。我哋可以点样强化自己按真理行事嘅决心？以下会讨论三个方法。

强化按真理行事嘅决心

14． （甲）不断买真理点样强化我哋永远唔会卖出真理嘅决心？（乙）点解智慧、管教同悟性必不可少？

¹⁴ 第一，继续学习并沉思上帝话语嘅宝贵真理。冇错，我哋要买真理。但点样买呢？就系要经常拨出时间吸收上帝话语当中宝贵嘅真理。噉样做可以加深我哋对真理嘅体会，强化我哋永远唔会卖出真理嘅决心。除咗买真理，箴言23:23话，我哋亦都应该买“智慧、管教、悟性”。我哋净系知道圣经真理系唔够嘅，仲必须喺生活上将真理运用出嚟。悟性可以帮助我哋清楚睇出，耶和华所讲嘅一切系和谐一致嘅。而智慧会推动我哋实践所学到嘅知识。有时，真理会管教我哋，使我哋知道自己需要喺边方面作出调整。愿我哋时刻听从呢啲管教。圣经话，管教嘅价值远远超过银子。（箴言8:10）

15． 真理嘅腰带点样保护我哋？

¹⁵ 第二，每日坚定不移噉按照真理生活。圣经将真理比作士兵嘅腰带。（以弗所书6:14）喺圣经时代，腰带可以为士兵嘅腰部提供支撑力同保护。不过，腰带要束紧先至可以有效噉发挥作用。如果腰带松咗嘅话，就起唔到支持同保护嘅作用嘞。我哋属灵嘅真理腰带点样保护我哋呢？我哋将真理好似腰带噉紧紧束上，就可以免受错误嘅理论影响，同时能够作出明智嘅决定。我哋受到诱惑或者遭受考验嘅时候，圣经真理会帮助我哋坚定不移噉做正确嘅事。正如一个士兵会确保自己束紧腰带先至去作战，我哋都应该下定决心，永远唔会松开或者除低我哋真理嘅腰带，确保自己将真理应用喺生活嘅每一方面。腰带嘅另一个作用系方便士兵挂剑。接住落嚟，我哋会睇吓另一个帮助我哋继续坚定噉按真理行事嘅方法。

16． 向人分享真理点样强化我哋继续按真理行事嘅决心？

¹⁶ 第三，尽力向人分享圣经真理。呢个方法可以帮助你紧握属灵嘅剑，即系“上帝嘅话语”。（以弗所书6:17）我哋所有人都可以努力提高自己嘅教导技巧，“正确噉运用真理嘅话语”。（提摩太后书2:15）我哋用圣经帮助人买真理同埋拒绝错误道理嘅时候，就会将上帝所讲嘅刻喺自己嘅内心同头脑。噉样做，我哋继续按真理行事嘅决心就会受到强化。

17． 点解真理对你好宝贵？

¹⁷ 真理系嚟自耶和华嘅宝贵礼物。呢份礼物使我哋得到最贵重嘅财产，就系我哋同天父亲密嘅关系。我哋而家已经从耶和华嗰度学到好多知识，但呢一切都只系啱啱开始！上帝向我哋保证，佢会永远教导我哋。要珍视真理，将真理当作价值连城嘅珍珠，要继续“买真理，唔好卖出”。噉你就可以好似大卫一样，实践向耶和华作出嘅承诺：“我要按你嘅真理而行。”（诗篇86:11）