8-10． 大会点样促进传道工作？请举例。（另见附栏“早期嘅大会促进传道工作”）

⁸ 大会演讲 1919年9月1-8日，圣经研究者喺美国俄亥俄州杉树角举行大会。呢个系第一次世界大战之后嘅第一个重要大会，大家都好想知道上帝嘅组织有乜嘢指示。大会嘅第二日，卢述福弟兄喺演讲当中明确噉话俾听众知：“基督徒喺地上嘅使命……系宣扬主嘅王国。”

⁹ 三日之后，卢述福弟兄发表咗一个题目叫做“向同工讲话”嘅演讲，将大会推向高潮。佢话：“基督徒静落嚟嗰时好自然会谂一谂：我喺地上有乜嘢使命呢？答案应该系，主仁慈噉派我做大使，劝世人同上帝和好。宣扬呢个信息系我嘅荣幸，亦都系我嘅责任。”后来，呢个演讲以《宣扬王国》作为题目，喺《守望台》刊登出嚟。

¹⁰ 喺呢个具有历史意义嘅演讲当中，卢述福弟兄宣布发行一本新杂志《黄金时代》（而家叫做《警醒！》），目的系要帮助人明白上帝嘅王国系人类唯一嘅希望。卢述福弟兄问听众：“边个愿意分发呢本杂志？”大会嘅一份报告描述当时嘅情景话：“在场嘅6000人一齐企咗起身。听众嘅反应咁热烈，真系激动人心！”b好明显，君王耶稣有一支甘心为佢效劳嘅大军，乐意传讲佢嘅王国。