1,2．（甲）乜嘢表明人类世界越来越分裂？（乙）呢篇课文会回答乜嘢问题？

欧洲南部嘅一个姊妹回忆话：“我自细见到嘅都系唔公平嘅事，所以我对自己国家嘅政治制度好反感。我会支持一啲极端嘅思想，而且有好多年我系一个恐怖分子嘅女朋友。”非洲南部嘅一个弟兄以前支持使用暴力，佢话：“我相信我嘅部族系最优越嘅。我加入咗一个政党，呢个政党教我哋要用枪矛杀死嗰啲敌对嘅人，即使对方系同部族嘅都唔应该放过。”一个住喺欧洲中部嘅姊妹承认：“我曾经对嗰啲同我唔同国家或者唔同信仰嘅人怀有偏见，甚至憎恨佢哋。”

² 今日，越来越多人有类似嘅谂法。以暴力争取独立嘅运动此起彼伏，政治分歧越来越大，好多人对外国人嘅敌意越来越深。正如圣经预言一样，喺最后嘅日子，大多数人都“唔愿意达成协议”。（提摩太后书3:1,3）人类世界越来越分裂，基督徒可以点样维持团结？喺耶稣嘅日子，好多人喺政治上有分歧。我哋可以学习耶稣点样面对噉样嘅情况。呢篇课文会讨论三个要点：点解耶稣拒绝参与任何独立运动？佢点样表明上帝嘅忠仆唔应该支持任何政治观点？耶稣点样教导我哋唔应该对其他人使用暴力？

耶稣对独立运动嘅态度

3,4．（甲）喺耶稣嘅日子，犹太人喺政治上期待有乜嘢事发生？（乙）乜嘢表明耶稣嘅门徒都有同样嘅谂法？

³ 1世纪有个叫犹大嘅加利利人假冒弥赛亚，误导咗好多人。犹太历史家约瑟夫斯话，呢个犹大“煽动同胞造反，指责向罗马人纳税嘅同胞系懦夫”。结果犹大被罗马人处决。（使徒行传5:37）耶稣时期有好多犹太人渴望脱离罗马，争取独立。当时有一个叫犹太奋锐党嘅极端政治党派，佢哋有好多成员都追随加利利人犹大嘅思想，经常喺民众当中煽动分裂情绪，甚至不惜使用暴力嚟达成目的。

⁴ 大多数犹太人都热切期待弥赛亚到嚟，以为弥赛亚会将佢哋从罗马嘅统治解救出嚟，再次使以色列成为一个强大嘅国家。（路加福音2:38；3:15）佢哋相信弥赛亚会喺以色列建立一个王国，噉数百万分散喺各地嘅犹太人就可以重回故土。有一次，施浸者约翰问耶稣：“你系咪‘嗰位要嚟嘅’呢？定系我哋仲要期待另一位？”（马太福音11:2,3）约翰可能想知道系咪有另一个人会实现犹太人嘅所有愿望。喺去以马乌斯嘅路上，复活咗嘅耶稣见到两个门徒喺度讨论。佢哋以为耶稣会解放以色列，所以耶稣被处死后，佢哋就觉得希望完全落空。（请读路加福音24:21）之后冇几耐，使徒亦都问耶稣：“主啊，你系咪要喺呢个时候为以色列复兴王国？”（使徒行传1:6）

5．（甲）点解加利利人想耶稣做佢哋嘅王？（乙）耶稣点样纠正佢哋嘅谂法？

⁵ 因为对弥赛亚有噉样嘅期望，所以加利利人好想耶稣做佢哋嘅王。佢哋都认为耶稣系最理想嘅领袖：佢口才出众，能医治恶疾，有能力喂饱所有饥饿嘅人。耶稣喂饱五千人之后，“知道佢哋要嚟拉住佢，叫佢作王，就再次独自退到去山上”。（约翰福音6:10-15）第二日，民众嘅情绪似乎平静咗落嚟。耶稣就喺加利利海嘅另一边向群众解释，佢嚟地上嘅真正目的，唔系喺物质上而系要喺属灵上造益呢个国族。佢同佢哋讲：“你哋唔好为必坏嘅食物工作，要为长存而带嚟永生嘅食物工作。”（约翰福音6:25-27）

6．耶稣点样表明佢唔想喺地上追求政治权力？（请睇吓课文开头嘅图片）

⁶ 耶稣喺牺牲前冇几耐，留意到一啲门徒期待佢喺耶路撒冷建立一个地上王国。为咗纠正呢种谂法，佢向大家讲咗银元嘅比喻。比喻当中嘅“贵族”指嘅系耶稣自己，佢必须离开一段好长嘅时间。（路加福音19:11-13,15）耶稣亦都向罗马官员表明佢嘅中立立场。总督本丢·彼拉多担心耶稣喺自己统治期间会引起政治动乱，所以佢问耶稣：“你系咪犹太人嘅王？”（约翰福音18:33）耶稣回答话：“我嘅王国唔属于呢个世界。”（约翰福音18:36）耶稣喺地上冇参与政治，因为佢嘅王国系属于天上嘅。佢同彼拉多讲，佢嚟地上嘅目的系“为真理作见证”。（请读约翰福音18:37）

7．点解喺政治上完全保持中立可能唔容易？

⁷ 如果我哋好似耶稣一样清楚知道自己嘅委派，噉我哋喺行动上甚至喺心入面都唔会支持任何政治团体或者政治运动。噉样做可能唔容易。一个探访会众嘅监督话：“我哋地区嘅人变得越来越激进。国家主义情绪越来越高涨，好多人以为喺政治上争取独立会改善佢哋嘅生活。值得庆幸嘅系，真基督徒专注于传讲王国嘅好消息，所以弟兄姊妹之间可以维系团结和睦嘅关系。佢哋仰望上帝解决唔公平嘅事同所有难题。”

耶稣喺政治上点样保持中立？

8．1世纪嘅犹太人要承受乜嘢重担？请举例。

⁸ 人见到周围有好多唔公正嘅事，往往就想通过参与政治嚟解决问题。喺耶稣嘅时代，征税系一个热门嘅政治话题。罗马政府为咗得到更多税收，就要求犹太人登记户籍，所以加利利人犹大发动叛乱。罗马统治之下嘅人，包括当时嘅犹太人，必须缴纳好多税款，例如财产税、土地税同房屋税。收税人嘅腐败使纳税人嘅负担变得更加沉重。收税人向政府官员购买职位，使自己获取更多利益。耶利哥城嘅税务长撒该就系通过敲诈民众而致富嘅。（路加福音19:2,8）而佢只不过系其中一个典型嘅例子。

9,10．（甲）反对者点样试图诱使耶稣卷入政治？（乙）我哋从耶稣嘅回答学到乜嘢？（请睇吓课文开头嘅图片）

⁹ 反对者企图利用纳税问题嚟捉耶稣嘅把柄。佢哋提出同“人头税”有关嘅问题，即系受罗马统治嘅人都要交纳嘅一银元。（请读马太福音22:16-18）犹太人唔想受罗马人统治，所以特别憎恨呢项税收。向耶稣提出呢个问题嘅希律党徒试图诱使耶稣谴责呢项税收，然后佢哋就可以指控耶稣煽动叛乱。但如果耶稣话纳税系必要嘅，噉佢就会失去群众嘅支持。

¹⁰ 耶稣喺纳税嘅问题上严守中立，佢话“凯撒之物要还俾凯撒，上帝之物要还俾上帝”。（马太福音22:21）当然，耶稣知道收税人贪污腐败嘅情况喺当时好普遍，不过佢关注嘅始终系同上帝王国有关嘅事，因为只有上帝嘅王国先至可以真正解决人类嘅所有难题。耶稣为我哋立下榜样。无论理由睇嚟几咁正当，我哋都唔应该参与政治纷争。基督徒追求上帝嘅王国及其正义，唔会对政治上某啲唔公正嘅做法持有强烈嘅意见或者公然反对。（马太福音6:33）

11．我哋可以点样用正确嘅方式满足自己对正义嘅渴求？

¹¹ 好多耶和华见证人都成功撇弃咗以往极端嘅政治观念。英国嘅一位姊妹话：“喺大学上完社会学课程之后，我嘅思想变得好偏激。我想为黑人争取利益，因为我哋受到太多唔公平嘅对待。虽然我擅长辩论，但就算我驳倒其他人都仲系会有挫败感。因为我冇意识到，想种族平等，就一定要彻底消除人内心嘅偏见。当我学习圣经之后就明白到，首先要改变嘅系我自己嘅内心。其实，一直以来耐心噉帮助我改变嘅系一个白人姊妹。而家我喺手语会众做先驱，继续学习点样向各种各样嘅人传道。”

“将剑收翻原处”

12．耶稣提醒门徒远离边啲人嘅“酵”？

¹² 喺耶稣嘅日子，宗教领袖经常参与政治。《基督时代嘅巴勒斯坦生活》（英语）一书指出，“犹太人嘅宗教派别多多少少都系按佢哋所支持嘅政治党派而划分嘅”。所以，耶稣提醒佢嘅门徒“要谨慎，小心法利赛派嘅酵同希律嘅酵”。（马可福音8:15）耶稣提到嘅“希律”，可能系指拥护希律嘅犹太人。喺政治上，法利赛派支持犹太人独立。马太嘅记载显示，耶稣喺呢次谈话中亦都提到撒都该派。撒都该派想维持现状，佢哋嘅好多成员喺罗马统治下享有唔少政治权力。耶稣特别提醒门徒要远离呢三个派别嘅酵，即系佢哋嘅教义。（马太福音16:6,12）有意思嘅系，耶稣呢番话系喺民众叫佢作王之后冇几耐讲嘅。

13,14．（甲）政治同宗教勾结点样引发暴力同唔公正嘅事？（乙）点解我哋即使受到唔公正嘅对待都唔应该通过暴力嚟解决问题？（请睇吓课文开头嘅图片）

¹³ 宗教同政治互相勾结往往会引发暴力。耶稣教导门徒，喺呢啲情况下一定要保持中立。呢个都系祭司长同法利赛派想杀死耶稣嘅原因之一。佢哋觉得耶稣威胁到佢哋嘅政治同宗教地位，所以将耶稣视为敌人。佢哋话：“如果由得佢噉样，人人都会信从佢，罗马人就会嚟夺取我哋嘅圣地，除灭我哋嘅民族嘞。”（约翰福音11:48）于是，大祭司该亚法带头策划杀死耶稣。（约翰福音11:49-53；18:14）

¹⁴ 该亚法等到晚黑先派士兵逮捕耶稣。耶稣知道佢哋嘅阴谋，所以喺当晚就吩咐使徒佩上剑。两把剑足以帮助使徒学到一个重要嘅教训。（路加福音22:36-38）喺嗰晚，一班暴徒嚟捉耶稣嘅时候，彼得对呢件唔公正嘅事感到好愤怒，就攞剑斩伤其中一个人。（约翰福音18:10）不过，耶稣同彼得讲：“将剑收翻原处！凡用剑嘅，都会死喺剑下。”（马太福音26:52,53）耶稣帮助门徒明白乜嘢重要教训？就系佢哋唔应该属于呢个世界，正如耶稣喺嗰晚所祷告嘅一样。（请读约翰福音17:16）只有上帝先可以完全解决世上所有唔公正嘅事。

15,16．（甲）上帝嘅话语点样帮助基督徒避免冲突？（乙）耶和华睇到世人同佢子民有乜嘢差别？

¹⁵ 上文提到嘅欧洲南部嘅姊妹都学到同样嘅教训。佢话：“我睇出，暴力唔会带嚟公正。我见到好多人因为使用暴力而死，亦都有好多人因为暴力而变得愤世嫉俗。我好开心从圣经学到，只有上帝先能够为人类带嚟真正嘅公正。呢个就系我喺过去25年来一直传讲嘅信息。”非洲南部嘅嗰个弟兄已经将佢嘅枪矛换成“圣灵嘅剑”，即系上帝嘅话语。无论对方属于边个部族，佢都向佢哋传讲和平嘅信息。（以弗所书6:17）欧洲中部嘅姊妹成为耶和华见证人之后，同一个佢以前憎恨过嘅种族嘅弟兄结咗婚。呢三个弟兄姊妹都因为渴望效法基督而作出改变。

¹⁶ 呢啲改变真系好重要！圣经将世人比喻为波涛汹涌嘅大海。（以赛亚书17:12；57:20,21；启示录13:1）虽然政治问题会激起人嘅情绪、引起分裂、导致暴力事件发生，但系基督徒之间依然能够保持和睦团结。耶和华见到佢嘅子民喺呢个四分五裂嘅世界当中团结一致，一定感到好欣慰。（请读西番雅书3:17）

17．（甲）我哋可以点样促进基督徒团结？（乙）下一篇课文会讨论乜嘢？

¹⁷ 呢篇课文讨论咗我哋可以促进基督徒团结嘅三个方面：（1）我哋相信上帝嘅王国会解决所有唔公正嘅事；（2）我哋喺政治问题上唔会偏袒任何一方；（3）我哋唔会使用暴力。不过，有时我哋嘅团结关系可能会受人嘅偏见所影响。下一篇课文会讨论，我哋可以点样效法1世纪嘅基督徒成功应付呢个问题。

1,2．（甲）耶稣同使徒一齐祷告嗰阵提出乜嘢请求？（乙）点解耶稣咁注重团结？

耶稣喺牺牲前嘅最后一晚，好关心门徒能唔能够团结一致。佢同门徒一齐祷告嘅时候讲到，佢希望所有门徒合一，正如佢同佢父亲联合。（请读约翰福音17:20,21）佢哋嘅团结关系清楚证明，耶稣受耶和华差派，嚟地上执行上帝嘅旨意。爱系真基督徒嘅标志，有助于佢哋促进团结。（约翰福音13:34,35）

² 耶稣好注重团结。喺最后嘅晚餐期间，佢留意到使徒之间唔系咁团结。佢哋同之前一样争论“究竟佢哋边个系最大嘅”。（路加福音22:24-27；马可福音9:33,34）另一次，雅各同约翰请求耶稣，俾佢哋喺天上嘅王国坐喺佢旁边显要嘅位置。（马可福音10:35-40）

3．乜嘢因素妨碍基督嘅门徒保持团结？呢篇课文会讨论边啲问题？

³ 不过，想得到显赫嘅地位只系妨碍门徒保持团结嘅其中一个因素。当时大多数人由于怨恨同偏见产生分裂，而耶稣嘅门徒都有同样嘅问题。所以，佢哋需要消除内心嘅偏见。我哋喺呢篇课文会讨论以下嘅问题：虽然好多人都怀有偏见，不过耶稣点样做？佢点样帮助门徒学识公正待人、促进团结？佢嘅教导点样帮助我哋保持团结？

耶稣同门徒遭受歧视

4．耶稣点样受到歧视？请举例。

⁴ 耶稣自己本身都受到歧视。当腓力对拿但业讲佢揾到弥赛亚嗰阵，拿但业回答话：“拿撒勒会出咩好嘅嘢呢？”（约翰福音1:46）弥迦书5:2预告弥赛亚会喺伯利恒出世。睇嚟，因为拿但业知道呢个预言，又觉得拿撒勒系一个唔显眼嘅地方，所以佢认为拿撒勒唔可能系弥赛亚嘅家乡。由于好多犹地亚人认为加利利人低人一等，犹地亚嘅权贵就因为耶稣系加利利人而歧视佢。（约翰福音7:52）而一啲犹太人为咗羞辱耶稣，甚至话佢系撒马利亚人。（约翰福音8:48）当时嘅撒马利亚人无论种族定系宗教都同犹太人唔一样。犹地亚人同加利利人都睇唔起撒马利亚人，唔想同佢哋来往。（约翰福音4:9）

5．耶稣嘅门徒点样受到歧视？

⁵ 犹太领袖同样鄙视耶稣嘅门徒。法利赛派嘅人将所有冇喺拉比学校受过教育或者唔遵守佢哋传统嘅人视为可憎同卑微嘅。（使徒行传4:13）所以喺佢哋眼中，耶稣嘅门徒系“受咀咒嘅”。（约翰福音7:47-49）耶稣同佢嘅门徒受到歧视，归根究底系因为当时嘅人觉得自己喺宗教、社会地位同种族方面比其他人优越。呢啲观念亦都影响咗耶稣嘅门徒。佢哋如果想保持团结，就要彻底改变自己嘅思想。

6．对人嘅偏见点样影响我哋？请举例说明。

⁶ 今日，世界充满歧视同偏见。我哋可能会遭受歧视，亦都可能会歧视其他人。一位澳大利亚嘅先驱姊妹话：“原住民一直以来都受到好多唔公平嘅对待。以前，我越谂呢件事就越憎恨白人，而我自己受过嘅虐待亦都加深咗呢种仇恨。”一个加拿大嘅弟兄承认：“我曾经觉得，讲法语嘅人比其他人更加优越，所以好睇唔起讲英语嘅人。”

7．喺耶稣嘅日子，虽然好多人都怀有偏见，不过耶稣点样做？

⁷ 同耶稣嘅日子一样，今日好多人内心都有难以消除嘅偏见态度。耶稣当时点样做呢？第一，佢从来都唔会对人怀有偏见。无论富人穷人，法利赛派人或者撒马利亚人，收税人抑或罪人，耶稣都乐意向佢哋传道。第二，耶稣通过言传身教向门徒表明，佢哋唔应该对人怀有偏见，随意猜疑其他人。

爱心同谦卑可以战胜偏见

8．基督徒嘅团结关系以乜嘢为基础？请解释。

⁸ 为咗讲明团结关系嘅基础系乜嘢，耶稣对门徒讲：“你哋全部都系弟兄。”（请读马太福音23:8,9）点解耶稣话门徒系“弟兄”？其中一个原因系，所有人都系亚当嘅后代。（使徒行传17:26）另外，耶稣嘅门徒都称耶和华做天父，所以彼此都系弟兄姊妹。（马太福音12:50）佢哋都属于一个用爱心同信心嚟维系团结嘅属灵大家庭。所以，使徒将信徒同工视为弟兄姊妹。（罗马书1:13；彼得前书2:17；约翰一书3:13）a

9,10．（甲）犹太人觉得自己比其他种族嘅人优越，点解呢种谂法系错嘅？（乙）耶稣点样表明呢一点？（请睇吓课文开头嘅图片）

⁹ 耶稣清楚表明佢嘅门徒都系弟兄姊妹之后，亦都强调噉样做需要谦卑嘅态度。（请读马太福音23:11,12）正如耶稣所讲，高傲嘅态度同种族优越感会喺门徒当中引起分裂。犹太人因为自己系亚伯拉罕嘅子孙就觉得自己比其他人更优越。好多犹太人都有呢种根深蒂固嘅观念，但系施浸者约翰同佢哋讲：“上帝有能力从呢啲石头为亚伯拉罕兴起子孙。”（路加福音3:8）

¹⁰ 耶稣认为，人唔应该觉得自己嘅种族比其他人嘅优越。有一次，一个抄经士问耶稣：“边个系我要爱嘅人呢？”为咗回答呢个问题，耶稣就讲咗一个故事。一个犹太人俾强盗打到重伤。有两个犹太人经过，但系都冇理会佢哋嘅同胞。后来一个撒马利亚人见到呢个受伤嘅犹太人，就心生怜悯，仁慈噉照顾佢。讲完故事之后，耶稣就同抄经士讲，佢应该效法呢个好心嘅撒马利亚人。（路加福音10:25-37）耶稣表示，即使系一个撒马利亚人都可以教导犹太人点样真挚关爱其他人。

11．点解基督嘅门徒唔应该对外邦人有偏见？耶稣点样帮助佢哋明白呢一点？

¹¹ 耶稣喺升天之前吩咐门徒要喺“全犹地亚、撒马利亚，直到地极”作见证。（使徒行传1:8）为咗帮助门徒喺广大嘅地区完成传道职务，耶稣提醒佢哋要除去骄傲同偏见嘅态度，并留意外邦人嘅好品格。佢称赞一个非犹太人嘅军官有出众嘅信心。（马太福音8:5-10）耶稣喺家乡拿撒勒曾经通过撒勒法嘅腓尼基寡妇同叙利亚嘅麻风病人乃缦嘅事例，表明耶和华亦都善待外邦人。（路加福音4:25-27）耶稣唔单止向撒马利亚妇人传道，亦都为咗其他对真理有兴趣嘅撒马利亚人而喺佢哋嘅一个城镇停留咗两日。（约翰福音4:21-24,40）

1世纪嘅基督徒点样克服偏见

12,13．（甲）耶稣教导一个撒马利亚妇人嘅时候，使徒有点样嘅反应？（请睇吓课文开头嘅图片）（乙）乜嘢表明雅各同约翰未完全领会耶稣嘅意思？

¹² 使徒要克服偏见一啲都唔容易。佢哋见到耶稣教导一个撒马利亚妇人，就感到好惊讶。（约翰福音4:9,27）犹太宗教领袖唔会喺公开场合同女子交谈，更何况系一个名声唔好嘅妇人。当时，使徒劝耶稣快啲食饭，但系耶稣嘅回答表明佢好开心同呢个妇人谈论耶和华嘅真理，其实食物并唔系最重要嘅。耶稣清楚知道，天父希望所有人——哪怕系一个撒马利亚妇人——都认识真理。所以对耶稣嚟讲，传道工作就系佢嘅食物。（约翰福音4:31-34）

¹³ 当时，雅各同约翰喺呢件事上未能完全领会耶稣嘅教导。有一次，耶稣同门徒经过撒马利亚，想喺当地一个村庄过夜，但撒马利亚人就拒绝俾佢哋留宿。雅各同约翰好嬲，希望天上降火毁灭整个村庄。结果，佢哋受到耶稣严厉责备。（路加福音9:51-56）如果呢件事发生喺雅各同约翰嘅家乡加利利，佢哋会唔会有同样嘅反应呢？睇嚟，佢哋咁嬲系因为对撒马利亚人怀有偏见。后来，使徒约翰向撒马利亚人传道嘅时候，好多撒马利亚人都乐意接受真理。如果约翰谂翻起自己之前几咁鲁莽，一定会感到惭愧。（使徒行传8:14,25）

14．一个可能因为语言引起嘅问题点样得到解决？

¹⁴ 公元33年五旬节之后冇几耐，会众就因为偏见而发生问题。分配食物嘅时候，讲希腊语嘅寡妇俾人忽视。（使徒行传6:1）呢个问题可能系由于语言歧视而产生嘅。使徒迅速作出调整，委派一啲符合属灵资格嘅男子分配食物。呢啲男子都有希腊语名字，可以使嗰啲受到忽视嘅寡妇觉得舒服啲。

15．彼得点样克服偏见？（请睇吓课文开头嘅图片）

¹⁵ 公元36年，耶稣嘅门徒开始向其他国族嘅人传道。在此之前，使徒彼得按照传统只系同犹太人来往。后来，上帝向彼得清楚表明基督徒唔应该偏心，彼得就向一个叫哥尼流嘅罗马士兵传道。（请读使徒行传10:28,34,35）之后，彼得同外邦信徒一齐食饭交往。不过多年后，彼得喺安提阿就避开非犹太裔嘅基督徒，唔同佢哋一齐食饭。（加拉太书2:11-14）保罗喺呢件事上责备彼得，而彼得亦都接受咗劝告。我哋点知呢？因为彼得第一次写信俾小亚细亚嘅犹太裔同外邦基督徒嘅时候，亲切噉提到爱整个弟兄团体嘅重要性。（彼得前书1:1；2:17）

16．早期嘅基督徒以乜嘢为人所知？

¹⁶ 耶稣立下榜样，帮助使徒学识爱“［各种］各样嘅人”。（约翰福音12:32；提摩太前书4:10）虽然噉样做需要时间，不过佢哋最终都调整咗自己嘅谂法。早期嘅基督徒以彼此相爱而为人所知。2世纪嘅作家德尔图良引录过一啲非基督徒所讲嘅话：“［基督徒］彼此相爱……佢哋甚至愿意为对方牺牲生命。”早期嘅基督徒都努力穿上“新品格”，用上帝嘅观点看待所有人。（歌罗西书3:10,11）

17．我哋可以点样除去内心嘅偏见？请举例。

¹⁷ 今日，我哋都需要时间除去内心嘅偏见。一个法国姊妹描述自己内心嘅挣扎话：“耶和华已经教导我乜嘢系爱，乜嘢系分享，同埋点样爱各种各样嘅人。不过，我而家仲学紧点样克服对其他人嘅偏见。噉样做一啲都唔容易，所以我经常为呢件事祷告。”一个西班牙嘅姊妹都有类似嘅感觉，佢话：“我时不时都要克制自己唔好去憎恨某族人。虽然好多时我都可以成功控制自己嘅思想，不过我知道自己都需要继续努力。我真系好感激耶和华，使我可以属于佢团结嘅属灵大家庭！”我哋每个人都应该诚实噉省察自己，好似呢两个姊妹噉努力克服内心嘅偏见。

爱能消除偏见

18,19．（甲）点解我哋应该接纳所有人？（乙）我哋可以点样做？

¹⁸ 我哋要谨记，自己曾经都系同上帝疏远嘅“外人”。（以弗所书2:12）不过，耶和华 “用爱嘅绳子”引导我哋嚟到佢身边。（何西阿书11:4；约翰福音6:44）基督亦都为我哋打开大门，使我哋可以成为上帝大家庭嘅一分子。（请读罗马书15:7）虽然我哋唔完美，但系耶稣都乐意接纳我哋。所以，我哋根本冇理由排斥任何人！

¹⁹ 随住呢个邪恶制度嘅终结临近，人与人之间产生分歧，互相怀有偏见同敌对嘅情况会变得更加严重。（加拉太书5:19-21；提摩太后书3:13）不过，身为耶和华嘅仆人，我哋寻求嘅系嚟自上帝嘅智慧。呢种智慧可以帮助我哋消除偏见，促进和睦。（雅各书3:17,18）我哋好开心可以同世界各地嘅人建立友谊，接受唔同嘅文化，甚至学习新语言。我哋噉样做，平安就会多如河水，正义亦都浩如海浪。（以赛亚书48:17,18）

20．爱可以点样塑造我哋？

²⁰ 上文提到嘅澳大利亚姊妹睇出，系圣经嘅知识改变咗佢自己。佢话：“真理嘅大门向我敞开。我嘅心同头脑就好似被重新塑造噉，所有根深蒂固嘅偏见同怨恨都慢慢从内心消失。”嗰位加拿大嘅弟兄话，佢而家意识到“无知往往系种族主义嘅源头，人嘅素质唔系在于佢哋嘅出生地”。后来，佢仲同一个讲英语嘅姊妹结婚！佢哋喺态度上发生咁大嘅转变，证明基督徒嘅爱的确能够战胜偏见。呢种爱使我哋团结一致，友谊牢不可破。（歌罗西书3:14）