1,2．（甲）全人类都面对紧乜嘢重大问题？（乙）感激之心有几重要？

今日，对好多人嚟讲，钱系最重要嘅。佢哋将注意力放喺积存财富上面。有啲人就觉得家庭、健康或者个人成就系最重要嘅。

² 但系对我哋嚟讲，拥护耶和华嘅至高统治权先至系非常重要嘅。我哋要小心，千祈唔好忽视呢个至关重要嘅问题。点解噉讲呢？我哋会因为太过专注于一日又一日嘅琐碎事，或者顾住应付个人考验，就忘记咗拥护上帝至高统治权嘅重要性。相反，如果我哋满怀感激之心拥护耶和华嘅至高统治权，就可以更好噉装备自己，迎接日常生活当中嘅挑战。呢种感激之心仲可以拉近我哋同耶和华嘅关系。

点解咁重要？

3．撒但点样质疑耶和华嘅至高统治权？

³ 魔鬼撒但质疑耶和华嘅至高统治权。佢声称耶和华嘅统治唔公正，仲将最好嘅嘢收埋唔俾受造物。撒但嘅意思系，由人类嚟统治自己，先至系最好最开心嘅。（创世记3:1-5）撒但亦都暗示冇人会发自内心忠于上帝，一旦面对巨大嘅压力，任何人都会离弃上帝嘅统治。（约伯记2:4,5）对于呢个争议，耶和华俾人类足够嘅时间去证明，人冇咗耶和华嘅正义统治，系几咁悲惨！

4．点解至高统治权呢个争议需要解决？

⁴ 耶和华当然好清楚撒但喺度讲大话。噉点解耶和华俾机会撒但证明自己嘅主张呢？因为呢个牵涉到天使同全人类。（请读诗篇83:18）自从第一对夫妇离弃耶和华嘅统治之后，有好多人都步佢哋后尘。有啲人可能会谂，撒但讲嘅系咪啱嘅呢？只要呢个问题一日未解决，国族、部族、民族、家人之间都仲会有纷争。耶和华嘅至高统治权得以彰显之后，所有受造物都会永远服从佢嘅正义统治，宇宙亦会恢复和平。（以弗所书1:9,10）

5．喺拥护上帝嘅至高统治权方面，你可以点做？

⁵ 事实将会表明上帝嘅至高统治权系正当嘅，而撒但同人类嘅统治一败涂地，要被彻底铲除。上帝通过弥赛亚王国嘅统治一定会成功，对上帝保持忠贞嘅人亦会证明人类可以拥护上帝嘅统治。（以赛亚书45:23,24）喺拥护上帝嘅至高统治权方面，从古至今有好多忠贞嘅榜样，你想唔想效法佢哋呢？你一定都好想。我哋将目光集中喺至高统治权嘅争议之上，明白呢件事有几咁重要，就可以帮助我哋保持忠贞。

比得救更重要

6．拥护耶和华嘅至高统治权有几重要？

⁶ 就好似之前所讲嘅一样，对于全人类嚟讲，拥护耶和华嘅至高统治权系极其重要嘅，甚至比个人嘅快乐更加重要。噉系咪我哋嘅得救唔重要呢？抑或，耶和华唔系咁关心我哋呢？绝对唔系。点解呢？

7,8．点解耶和华实现佢嘅应许，系彰显至高统治权嘅一部分？

⁷ 耶和华深爱同珍视人类。佢乐意通过佢爱子嘅血，使我哋有机会得到永远嘅拯救。（约翰福音3:16；约翰一书4:9）如果耶和华冇实现佢嘅应许，魔鬼就有借口话耶和华讲大话，仲收埋啲好嘅嘢唔俾人类，所以佢嘅统治系唔公正嘅。亦都俾反对者有机会羞辱上帝，话：“佢应许要临在，边有实现呢？其实，自从我哋列祖长眠以来，一切始终同创世开始嗰时一模一样。”（彼得后书3:3,4）因为噉，耶和华一定会拯救嗰啲顺服佢嘅人，呢个系彰显佢嘅至高统治权嘅一部分。（请读以赛亚书55:10,11）另外，耶和华嘅统治系以爱心为基础嘅。所以我哋可以确信佢会永远关爱、珍视同赏识佢忠贞嘅仆人。（出埃及记34:6）

⁸ 虽然我哋承认耶和华嘅至高统治权非常重要，但系都唔应该觉得我哋得救嘅希望唔重要，或者我哋喺耶和华眼中冇咩价值。对统治权同得救嘅希望有正确嘅观点系好重要嘅。如果我哋想将目光集中喺至高统治权嘅重大争议上，拥护耶和华嘅正义统治，就好需要有正确嘅观点。

要有正确嘅观点

9．撒但对约伯提出乜嘢质疑？（请睇吓课文开头嘅图片）

⁹ 约伯记系圣经入面最早写成嘅书卷之一，里面清楚提到我哋需要有正确嘅观点。撒但质疑话，约伯一旦遭受猛烈嘅打击，就会离弃上帝。撒但建议耶和华亲自折磨约伯。耶和华冇噉做，但佢容许撒但去试探约伯，佢话：“［约伯］嘅一切都交喺你手上。”（请读约伯记1:7-12）之后，约伯喺短时间之内丧失咗佢嘅仆人、收入来源同埋十个心爱嘅仔女。撒但所用嘅方式令人以为约伯嘅难题系上帝造成嘅。（约伯记1:13-19）撒但跟住用痛苦嘅恶疾去折磨约伯。（约伯记2:7）约伯嘅妻子同三个所谓嘅朋友仲讲埋晒啲令人灰心沮丧嘅话，搞到佢更加绝望。（约伯记2:9；3:11；16:2）

10．（甲）约伯点做，表明佢忠于上帝？（乙）佢一时产生乜嘢错误嘅观点？

¹⁰ 结果点呢？事实证明撒但嘅质疑大错特错，因为约伯并冇背叛上帝。（约伯记27:5）不过，约伯一时产生咗错误嘅观点，佢变得过分正义，甚至仲要求上帝解释佢受苦嘅原因。（约伯记7:20；13:24）可能我哋都会觉得，约伯经历咗咁多嘅苦难之后有噉嘅谂法，系情有可原嘅。不过，耶和华睇出需要纠正佢嘅谂法。耶和华帮助佢明白啲乜嘢？

11,12．耶和华帮助约伯明白咗乜嘢？约伯点样回应呢？

¹¹ 约伯记38-41章都系上帝对约伯讲嘅话，入面冇一句提到约伯受苦嘅真正原因系乜嘢。耶和华主要想讲嘅唔系约伯点解要受苦，佢亦都唔需要为自己辩护啲乜嘢。相反，佢系想帮助约伯意识到，相对于耶和华嘅伟大作为嚟讲，人类嘅问题系几咁渺小。上帝仲帮助约伯睇出，佢需要关心更加重要嘅问题。（请读约伯记38:18-21）耶和华所讲嘅话，使约伯恢复翻正确嘅观点。

¹² 约伯遭受咁猛烈嘅打击之后，耶和华提出咁直接嘅劝告系唔系太无情呢？唔系，而且约伯都冇噉谂。虽然经历咁多苦难，但后来约伯改变态度，开始讲出感激嘅话。佢仲讲到：“我收翻自己讲过嘅话，喺尘土同灰烬中懊悔。”虽然耶和华嘅劝告好直接，但系就可以令约伯重新振作起嚟。（约伯记42:1-6）而之前，以利户亦都俾咗一啲劝告帮助约伯调整自己嘅观点。（约伯记32:5-10）由于约伯对耶和华嘅纠正作出回应，佢调整咗自己嘅观点，结果耶和华好赏识佢所表现嘅信心。（约伯记42:7,8）

13．耶和华点样祝福约伯？考验结束之后，约伯点样继续保持正确嘅观点？

¹³ 即使约伯嘅考验结束咗，耶和华俾佢嘅劝告依然继续使佢得益。约伯点样从中得益呢？圣经话：“后来耶和华赐福俾约伯，比之前更多。”毫无疑问，恢复翻以前嘅生活同埋复原身心嘅创伤系需要时间嘅。一段时间过后，佢“又有七个仔、三个女。”（约伯记42:12-14）约伯肯定好挂住之前俾撒但害死咗嘅仔女，可能佢不时都仲会回忆起一啲惨痛嘅经历。虽然佢之后更加明白自己受考验嘅原因，但系佢都可能会谂，自己受嘅苦系咪真系要到噉嘅程度呢！无论佢点谂都好，佢都可以回想翻上帝俾佢嘅劝告嚟帮助自己保持正确嘅观点，得到安慰。（诗篇94:19）

14．我哋从约伯嘅经历学到乜嘢？

¹⁴ 我哋沉思约伯嘅记载，都可以培养正确嘅观点，得到安慰。而耶和华将呢啲记载保存落嚟，就系“为咗教导我哋……等我哋靠住忍耐，靠住圣经所带嚟嘅安慰，可以怀有希望。”（罗马书15:4）我哋学到乜嘢呢？主要系：我哋唔好过度关注自己嘅生活，要将目光集中喺拥护耶和华嘅至高统治权呢件重要嘅事上。另外，喺至高统治权嘅问题上，我哋系可以发挥重要作用嘅。就算喺好艰难嘅环境之下，我哋都可以好似约伯噉，继续保持忠义。

15．我哋喺考验之下保持忠贞可以达成乜嘢目的？

¹⁵ 沉思保持忠贞嘅价值，点解可以令人得到安慰呢？千祈唔好以为受考验就代表上帝唔钟意我哋，其实呢啲考验系可以达成一个目的嘅，就系使我哋有机会去表明自己支持上帝嘅至高统治权。（箴言27:11）我哋保持忍耐就可以得蒙“悦纳”，而且对未来嘅希望更有信心。（请读罗马书5:3-5）约伯嘅事例表明耶和华系“充满温情，慈悲为怀”嘅上帝。（雅各书5:11）所以我哋好肯定，佢会奖赏所有拥护佢至高统治权嘅人。知道呢一点，可以帮助我哋“凡事忍耐，怀住喜乐而坚忍”。（歌罗西书1:11）

要保持专注

16．点解我哋需要提醒自己，拥护耶和华至高统治权嘅重要性？

¹⁶ 当然，要专注于拥护耶和华嘅至高统治权，对我哋嚟讲，都可以系一种挑战。有时，我哋会觉得难题大到自己根本应付唔嚟。就算系一啲小问题，如果我哋成日谂嚟谂去，都会俾我哋谂成系大问题。所以，面对困难嗰时，我哋要经常提醒翻自己，支持上帝至高统治权嘅重要性。

17．经常做耶和华嘅工作，点样帮助我哋将目光集中喺重要嘅事上？

¹⁷ 经常做耶和华嘅工作，可以帮助我哋将目光集中喺重要嘅事上。例如，一位名叫勒妮嘅姊妹中咗风，同时又患有癌症，长期都受到病痛嘅折磨。喺唔同嘅地方接受治疗嗰阵，佢同医护人员、患者同埋嚟探病嘅人作见证。喺某一间医院，佢喺短短两个半星期里面，就用咗80个钟嚟传道。直到临死之前，勒妮姊妹都依然专注于耶和华嘅至高统治权，噉样做减轻咗佢嘅痛苦。

18．一位姊妹嘅经历点样表明拥护耶和华嘅至高统治权系大有益处嘅？

¹⁸ 冇错，我哋每一日都会面对好多压力同琐碎事，但系我哋都要将目光集中喺耶和华嘅至高统治权上。由于航班接二连三噉被取消，珍妮弗姊妹返唔到屋企，唯有喺机场等咗三日。喺噉嘅情况之下，一般人好容易会变得净系关注自己嘅困境。虽然珍妮弗觉得又攰又孤独，但佢仲系向耶和华祷告，想睇吓自己可以点样用圣经知识嚟鼓励其他人。结果点呢？佢同好多人传道，分发咗好多圣经资料。佢话：“即使喺咁艰难嘅情况下，我依然感受到耶和华帮助我，俾我足够嘅力量，有效噉宣扬佢嘅名。”珍妮弗姊妹确实将目光集中喺耶和华嘅旨意之上。

19．上帝嘅子民应该点样拥护上帝嘅至高统治权？

¹⁹ 我哋可以点样分辨正确同错误嘅宗教？关键就系，睇吓呢个宗教有冇重视耶和华嘅至高统治权。上帝嘅子民一直以来都拥护耶和华嘅统治。如果想支持纯真崇拜，我哋每一个人就要尽力保持同圣经一致嘅观点。

20．耶和华点睇你为拥护佢嘅至高统治权所作嘅努力？

²⁰ 为咗拥护耶和华嘅至高统治权，你一直忠心服务，喺考验下亦都保持坚忍。要紧记，耶和华非常珍视你所付出嘅呢一切努力。（诗篇18:25）下一篇课文会进一步分析，点解耶和华嘅统治值得我哋全心支持，同埋我哋可以点样拥护佢嘅至高统治权。

1,2．我哋每个人要确信乜嘢呢？（请睇吓课文开头嘅图片）

上一篇文章提到，魔鬼话耶和华唔配统治人类，人自己统治自己会更加好。撒但噉讲啱唔啱呢？假如人选择自己统治自己，又可以有永远嘅生命，噉佢哋系咪真系唔需要上帝嘅统治呢？假如你可以完全脱离上帝，又有永远嘅生命，系咪真系会更加开心呢？

² 呢啲问题冇人可以替你回答，我哋每个人都要自己认真谂清楚。噉样你就可以确信，耶和华嘅至高统治权系正当嘅，佢嘅统治对我哋嚟讲系最好嘅，值得我哋全心拥护。下面，我哋可以讨论吓，圣经点样提出充分嘅理由证明只有耶和华先至有权统治全宇宙。

耶和华有权统治

3．点解只有耶和华先至配得至高统治权？

³ 耶和华最有权统治全宇宙，因为佢系全能嘅上帝同创造主。（历代志上29:11；使徒行传4:24）启示录4:11提到，喺天上嘅异象入面，同基督一齐作王嘅14万4000人话：“耶和华我哋嘅上帝，你配得荣耀、尊崇、力量，因为你创造咗一切，一切都系因为你嘅旨意先至存在，先至被创造嘅。”冇错，因为耶和华创造咗一切，只有佢先至有权统治天使同全人类。

4．点解反叛上帝嘅统治就系滥用自由意志？

⁴ 撒但冇创造过任何嘢，所以佢根本冇权统治宇宙。当撒但同第一对男女反叛耶和华嘅时候，佢哋高傲自大，完全冇将耶和华放喺眼内。（耶利米书10:23）当然，人类有自由意志，能够选择脱离上帝，管理自己。但系，佢哋有冇权噉做呢？当然冇啦。有自由意志，系指人可以为日常生活嘅事做决定，但系唔等于可以反叛赐生命俾人嘅耶和华。显然，反叛耶和华就系滥用咗自由选择权呢个恩赐。我哋人类系应该服从耶和华嘅正义统治嘅。

5．点解我哋可以确信上帝嘅决定系公正嘅？

⁵ 耶和华最有权统治嘅另一个原因系，佢会完全公正噉运用佢嘅权力。佢宣布话：“认识我系耶和华，我喺地上显忠贞之爱，主持公道，伸张正义；我喜欢呢啲事。”（耶利米书9:24）耶和华唔需要靠人嘅法律嚟决定乜嘢系公平公正。反而系耶和华以佢嘅完美公正为基础，为人类制定律法。诗篇话：“正义同公正系你宝座嘅基础”。所以，我哋可以对耶和华正义嘅律法、原则同决定有信心。（诗篇89:14；119:128）撒但指控耶和华唔系一个公正嘅统治者，但系撒但自己都冇办法创造一个正义嘅世界。

6．耶和华有权管理世界嘅一个原因系乜嘢？

⁶ 另外，耶和华有权统治嘅原因系，佢有知识同智慧去管理好宇宙万物。例如，上帝使佢嘅儿子有能力医好连医生都束手无策嘅奇难杂症。（马太福音4:23,24；马可福音5:25-29）喺耶和华睇嚟，呢啲都唔算得上系奇迹。佢好清楚人体嘅运作，知道点样使人完全康复。佢亦都有能力复活死去嘅人，仲可以阻止天灾发生。

7．点解耶和华比撒但世界嘅任何人更有智慧？

⁷ 撒但统治嘅世界冇办法解决国家内外嘅难题，只有耶和华先有智慧为世界带嚟和平。（以赛亚书2:3,4；54:13）我哋继续学习耶和华嘅知识同智慧，就会同意使徒保罗所讲嘅，佢话“上帝嘅厚恩、智慧、知识几咁高深！佢嘅判决难以测透！佢嘅道路难以追寻！”（罗马书11:33）

耶和华嘅统治权系最优越嘅

8．耶和华仁爱嘅统治点样深深打动你？

⁸ 圣经清楚表明耶和华嘅统治权系正当嘅，仲证明点解佢嘅统治比其他人嘅更优越。其中一个原因系，佢嘅统治基于爱心。耶和华仁爱嘅统治深深打动我哋，因为佢“系有慈悲有恩典嘅上帝，唔轻易发嬲，满怀忠贞之爱，信守真理”。（出埃及记34:6）耶和华好尊重佢嘅仆人，使佢哋有尊严。佢亦都悉心照顾我哋，仲好过我哋自己照顾自己。同魔鬼讲嘅啱啱相反，耶和华从来都冇收埋啲好嘢唔俾佢嘅忠心仆人，甚至牺牲佢嘅爱子，等我哋有希望享有永远嘅生命！（请读诗篇84:11；罗马书8:32）

9．我哋点知道耶和华好关心个别嘅人呢？

⁹ 当然，耶和华好关心佢所有嘅子民。但系，佢亦都对人表现深切嘅个人关注。请考虑一下发生喺士师时期嘅一个例子。当时有三百年嘅时间，耶和华兴起士师从外敌手中拯救以色列人。喺呢段动荡不安嘅时期，耶和华特别留意到一个叫路得嘅外族女子。路得作出好大嘅牺牲，放弃以前嘅信仰，选择事奉耶和华。后来，路得可以结婚生仔，呢啲都系耶和华嘅赐福。唔单止系噉，路得复活之后，就会知道自己个仔有幸做咗弥赛亚嘅祖先。试谂吓，将来路得发现圣经有一卷书以佢嘅名嚟命名，仲记载咗佢嘅故事，会几咁感动呢！（路得记4:13；马太福音1:5,16）

10．点解话耶和华唔系专制残暴嘅统治者？

¹⁰ 耶和华唔系一个专制残暴嘅统治者，佢嘅统治方式使人享有自由，充满喜乐。（哥林多后书3:17）大卫提到耶和华，话：“尊严同光彩喺佢嘅面前，能力同喜乐喺佢嘅圣所当中。”（历代志上16:7,27）类似嘅系，诗篇执笔者以探话：“向你欢呼嘅人民几咁有福！耶和华啊，佢哋喺你慈颜嘅光辉当中行走。佢哋因你嘅名终日喜乐，靠住你嘅正义得以高升。”（诗篇89:15,16）

11．我哋点样做就会更加确信耶和华嘅统治系最好嘅？

¹¹ 经常沉思耶和华嘅良善，令我哋确信佢嘅统治系最好嘅。我哋都认同诗篇执笔者所讲嘅：“喺你嘅院子过一日，好过喺其他地方住千日；宁愿喺我上帝嘅殿中守门口，都唔愿喺恶人嘅帐幕里面逗留。”（诗篇84:10）耶和华系仁爱嘅设计者同创造主，佢好清楚我哋需要乜嘢先会得到真正嘅快乐，佢供应俾我哋嘅远远超过我哋所需要嘅。虽然有时我哋需要作出一啲牺牲，但耶和华要求嘅一切都系为咗令我哋得到最大嘅喜乐同益处。（请读以赛亚书48:17）

12．我哋拥护耶和华至高统治权嘅主要原因系乜嘢？

¹² 圣经预言基督千年统治之后，仍然有人反叛耶和华嘅统治。（启示录20:7,8）点解佢哋会噉做呢？魔鬼被释放出嚟之后，会再次迷惑人类，挑起佢哋自私嘅欲望，就同佢一直以来所做嘅一样。撒但令人以为，唔使听从耶和华都可以得到永远嘅生命。呢个根本系冇可能嘅。不过，我哋会唔会咁容易俾撒但呃到呢？如果我哋真系爱耶和华，相信佢系良善嘅，拥护佢嘅至高统治权，坚决拒绝撒但嘅任何主张。耶和华又仁爱又公正，所以我哋只会渴望生活喺佢嘅统治之下。

忠心拥护耶和华嘅统治

13．我哋点做就表明自己支持上帝呢？

¹³ 好明显，耶和华嘅至高统治权非常值得我哋全心拥护。既然耶和华有权统治，而且佢嘅统治方式系最好嘅，我哋就应该忠于耶和华，尽己所能事奉佢，拥护佢嘅至高统治权。我哋可以点样表明自己支持耶和华呢？我哋用耶和华嘅方式行事为人，就可以表明自己爱佢同埋拥护佢嘅统治。（请读以弗所书5:1,2）

14．长老同家主可以点样效法耶和华？

¹⁴ 我哋从圣经学到，耶和华以仁爱嘅方式行使佢嘅权力。同样，爱耶和华嘅家主同长老唔会好似个皇帝噉一个人话晒事，对其他人诸多要求。反而，佢哋会效法耶和华嘅仁爱统治。喺效法上帝同耶稣方面，保罗系个好榜样。（哥林多前书11:1）保罗唔会强迫人做任何嘢，或者令佢哋尴尬，相反，佢好仁慈噉恳求佢哋做啱嘅事。（罗马书12:1；以弗所书4:1；腓利门书8-10）呢个就系耶和华嘅处事方式。如果我哋爱耶和华，拥护佢嘅统治，都应该噉做。

15．我哋可以点样表明支持耶和华嘅统治？

¹⁵ 我哋点睇领导权嘅安排呢？尊重同支持呢个安排，就表明我哋支持耶和华嘅至高统治权。就算有时我哋唔完全明白或者同意一个决定，我哋仲系好想支持上帝嘅一切安排。我哋嘅做法同世人嘅好唔一样，因为我哋接受上帝做我哋嘅统治者。（以弗所书5:22,23；6:1-3；希伯来书13:17）我哋尊重领导权嘅安排，就可以从中得益，因为上帝总系为我哋嘅益处着想。

16．我哋所做嘅决定，点样表明我哋支持耶和华嘅至高统治权？

¹⁶ 我哋做个人决定嗰时，都可以表明我哋支持上帝嘅至高统治权。耶和华冇针对每一种情况，一一规定我哋要点样做。相反，佢话俾我哋知佢嘅谂法，指引我哋做正确嘅决定。例如，佢冇俾基督徒一个详细嘅衣着清单，话乜嘢可以著，乜嘢唔可以。反而，佢希望我哋嘅衣着打扮庄重得体，符合一个基督徒嘅身份。（提摩太前书2:9,10）佢都希望我哋谂吓，自己嘅决定会唔会影响到其他人。（哥林多前书10:31-33）我哋做决定嘅时候，应该考虑耶和华嘅谂法，而唔只系自己嘅喜好，噉样就表明我哋真系爱戴同支持佢嘅统治。

17,18．基督徒夫妇可以点样支持耶和华嘅至高统治权呢？

¹⁷ 我哋嚟睇吓，基督徒夫妇可以点样支持耶和华嘅至高统治权。如果我哋嘅婚姻唔系咁理想，甚至睇嚟令人失望，我哋可以点做呢？我哋可以谂吓耶和华系点样对待以色列人嘅。佢将自己比喻成以色列嘅丈夫。（以赛亚书54:5；62:4）不过以色列人成日都令耶和华失望，维持噉嘅婚姻真系好难！即使系噉，耶和华冇轻易放弃。佢一次又一次噉宽恕以色列人，信守对佢哋嘅承诺。（请读诗篇106:43-45）耶和华嘅忠贞之爱唔系令我哋深受感动咩？

¹⁸ 所以，爱耶和华嘅夫妇即使婚姻出现问题，都会努力效法佢，唔会违反圣经原则轻易离婚。因为佢哋知道耶和华好重视婚约，希望丈夫同妻子“厮守”终生。圣经容许人离婚或再婚嘅唯一理由系，夫妇有一方淫乱。（马太福音19:5,6,9）夫妇尽力维持同改善婚姻关系，就表明佢哋支持耶和华嘅正义统治。

19．我哋做错事嘅时候，应该点样做？

¹⁹ 因为人唔完美，我哋有时会令耶和华失望。耶和华知道呢一点，所以佢好仁慈噉为我哋提供赎价嘅安排。如果我哋做错事，就应该求耶和华宽恕。（约翰一书2:1,2）与其不断自责，不如努力从错误中学习。如果我哋紧紧依附耶和华，佢就会宽恕我哋，帮助我哋康复过嚟，等我哋以后可以成功应付类似嘅问题。（诗篇103:3）

20．点解我哋而家就要支持耶和华嘅至高统治权？

²⁰ 喺新世界里面，人人都接受耶和华嘅统治，学习佢正义嘅标准。（以赛亚书11:9）其实，我哋而家就接受紧噉样嘅教育嘞。好快，唔会再有人质疑耶和华嘅统治权系唔系正当嘅。所以，我哋而家就要忠心噉事奉上帝，甘心乐意服从佢，喺一切事上都尽力去效法佢，噉样做就系全力支持耶和华嘅至高统治权嘞。