1．边个可以话俾我哋知崇拜上帝嘅正确方式？

大多数宗教自称信奉真神，倡导真理。佢哋会唔会都系啱嘅呢？关于边个系真神，我哋应该点样崇拜佢，唔同嘅宗教各有主张。我哋点知边种崇拜上帝嘅方式系正确嘅呢？只有耶和华可以话俾我哋知。

2．你可以通过乜嘢知道崇拜上帝嘅正确方式？

² 圣经系耶和华赐俾我哋嘅。我哋通过圣经就可以知道点样崇拜上帝先至正确。你研读圣经，用耶和华教导嘅方式崇拜佢，就一定会从中得益。（以赛亚书48:17）

3．我哋想蒙上帝悦纳，就应该点做？

³ 有啲人以为所有宗教都系上帝认可嘅，不过耶稣唔系噉讲。佢话：“唔系每个同我讲‘主啊，主啊’嘅人，都可以进入天上嘅王国，唯独遵行我天父旨意嘅人，先可以入去。”所以，我哋一定要知道上帝嘅旨意系乜嘢，然后将所学到嘅实践出嚟。噉样做非常重要，因为耶稣将嗰啲唔遵行上帝旨意嘅人同罪犯相提并论，话佢哋系“行事不法嘅人”。（马太福音7:21-23）

4．关于遵行上帝嘅旨意，耶稣点讲？

⁴ 耶稣指出，遵行上帝旨意嘅人会面对唔少挑战。佢话：“你哋要入窄门。因为通向灭亡嘅路又宽又阔，入去嘅人好多；通往生命嘅门系窄嘅，路系狭隘嘅，揾到嘅人亦都少。”（马太福音7:13,14）人以正确嘅方式崇拜上帝，就系行紧通向永生嘅窄路。相反，人用错误嘅方式崇拜上帝，就好似行紧又宽又阔嘅路，不过结果通向灭亡。但系，耶和华唔想任何人死亡，佢俾机会每个人认识佢。（彼得后书3:9）

崇拜上帝嘅正确方式

5．你可以点样认出边啲人正确噉崇拜上帝？

⁵ 耶稣话，我哋能够认出边啲人先至系正确崇拜上帝嘅，方法就系通过佢哋嘅信仰同行为。佢话：“你哋凭佢哋嘅果实，就可以认出佢哋。……凡好树都结好果实”。（马太福音7:16,17）耶稣嘅意思唔系话崇拜上帝嘅人都系完美嘅。不过，佢哋会尽力做正确嘅事。而家我哋睇吓，应该以点样嘅方式崇拜上帝。

6,7．我哋嘅教导点解要有圣经根据？我哋从耶稣嘅榜样学到乜嘢？

⁶ 我哋嘅教导应该有圣经根据。圣经话：“圣经全部都系上帝用圣灵启示嘅，对于教导、责备、纠正、按正义施行管教，都系有益嘅，使敬神嘅人可以完全胜任，装备齐全，做各样善工。”（提摩太后书3:16,17）使徒保罗对基督徒同工讲：“我哋将上帝嘅话语传俾你哋，你哋听见就接纳嘞，唔认为系人嘅话语，而认为系上帝嘅话语。呢个真真正正系上帝嘅话语”。（帖撒罗尼迦前书2:13）由此可见，正确嘅崇拜只会以上帝嘅话语圣经为依据，而唔系人嘅主张、传统习俗等等。

⁷ 耶稣所教嘅都系基于上帝嘅话语。（请读约翰福音17:17）佢经常引用经文。（马太福音4:4,7,10）真正崇拜上帝嘅人会效法耶稣嘅榜样，根据圣经教导人。

8．关于对耶和华嘅崇拜，耶稣点讲？

⁸ 我哋应该唯独崇拜耶和华。诗篇83:18话：“你嘅名系耶和华，唯有你系统治全地嘅至高者”。耶稣想人知道边个先至系真神，所以佢教导人认识真神嘅名。（请读约翰福音17:6）耶稣话：“要崇拜耶和华你嘅上帝，单要敬奉佢”。（马太福音4:10）身为上帝嘅仆人，我哋应该效法耶稣嘅榜样，唯独崇拜耶和华。我哋唔单止自己使用上帝嘅名，仲会教导人认识佢嘅名，以及佢对人类嘅旨意。

9,10．我哋应该点样对人表现爱心？

⁹ 我哋需要对人表现真正嘅爱心。耶稣教导门徒要彼此相爱。（请读约翰福音13:35）无论我哋嚟自边度，文化背景点样，贫穷抑或富裕，我哋之间嘅爱应该使我哋团结一致，组成一个大家庭。（歌罗西书3:14）所以，我哋唔会参战杀人。圣经话：“唔经常行正义嘅人，都唔系源于上帝嘅，唔爱弟兄嘅亦都一样。凭住呢一点，边个系上帝嘅儿女，边个系魔鬼嘅儿女，就显而易见嘞。”圣经仲话：“我哋应该彼此相爱。唔好学该隐，佢系源于恶者嘅，杀咗自己嘅弟弟”。（约翰一书3:10-12；4:20,21）

¹⁰ 除咗唔参战之外，我哋仲会运用自己嘅时间、精力同财物互相帮助，彼此鼓励。（希伯来书10:24,25）圣经话我哋要“对所有人行善”。（加拉太书6:10）

11．点解我哋要承认耶稣系上帝派嚟嘅救主？

¹¹ 我哋必须服从耶稣，承认佢系上帝派嚟嘅救主。圣经话：“除咗佢，边个都唔能够带嚟拯救，因为喺天下人间，冇赐下其他名，系我哋必须依靠先能够得救嘅。”（使徒行传4:12）我哋喺第5章学到，耶和华派耶稣嚟到地上献出生命作为赎价，使服从上帝嘅人可以得救。（马太福音20:28）耶和华拣选耶稣做君王统治整个地球。所以圣经话，如果我哋想得到永生，就一定要服从耶稣。（请读约翰福音3:36）

12．点解我哋唔参与政治？

¹² 我哋唔应该参与政治。耶稣喺地上嘅时候唔参与政治。佢喺罗马总督彼拉多面前受审时话：“我嘅王国唔属于呢个世界”。（请读约翰福音18:36）我哋应该同耶稣一样，效忠上帝天上嘅政府。所以，无论我哋生活喺边个国家，都唔会参与政治。不过，圣经吩咐我哋要服从“在上当权嘅”，意思系世上嘅政府。（罗马书13:1）我哋会遵守当地嘅法律。不过，如果政府嘅法律同上帝嘅律法有冲突，我哋就会效法使徒嘅榜样。佢哋话：“我哋必须接受上帝嘅统治，服从上帝而唔系服从人”。（使徒行传5:29；马可福音12:17）

13．我哋传讲关于上帝王国嘅乜嘢信息？

¹³ 我哋相信只有上帝嘅王国先至可以解决世上嘅一切难题。耶稣话 “王国嘅好消息”会传遍世界各地。（请读马太福音24:14）上帝嘅王国将会成就嘅事，系冇任何人间政府做得到嘅。（诗篇146:3）耶稣教导我哋为上帝嘅王国祷告，佢话：“愿你嘅王国来临。愿你嘅旨意喺地上实现，好似喺天上一样。”（马太福音6:10）圣经预告，上帝嘅王国会毁灭所有人间政府，而“唯独呢个王国会永远屹立”。（但以理书2:44）

14．你认为边啲人以正确嘅方式崇拜上帝？

¹⁴ 根据以上几个特征，你可以问问自己：“边啲人根据圣经教导人，并传扬上帝嘅名？边啲人彼此之间表现真正嘅爱心，同埋相信耶稣系上帝派嚟拯救我哋嘅？边啲人唔参与政治？边啲人传讲只有上帝嘅王国先至可以解决我哋嘅难题？”答案系：耶和华见证人。（以赛亚书43:10-12）

你会点做？

15．如果想上帝认可我哋嘅崇拜，我哋就一定要点做？

¹⁵ 净系信有上帝系唔够嘅。邪灵都信，不过佢哋就冇服从上帝。（雅各书2:19）如果想上帝认可我哋嘅崇拜，我哋唔单止要相信佢存在，仲一定要按照佢所讲嘅去做。

16．点解我哋必须同错误嘅宗教划清界线？

¹⁶ 如果我哋想自己嘅崇拜得到上帝认可，就必须弃绝错误嘅宗教。以赛亚先知话：“要离开嗰度，唔好接触不洁嘅嘢”。（以赛亚书52:11；哥林多后书6:17）所以我哋必须同错误嘅宗教划清界线。

17,18．“大巴比伦”系指乜嘢？点解离开错误宗教系好紧急嘅事？

¹⁷ 点样嘅宗教系错误嘅？任何宗教，如果倡导嘅崇拜方式或者行为违反上帝嘅话语，就系错误嘅。圣经将所有错误嘅宗教称为“大巴比伦”。（启示录17:5）点解？喺挪亚洪水之后，好多错误嘅宗教都系喺巴比伦城兴起嘅。呢啲宗教嘅道理散布世界各地。例如，住喺巴比伦嘅人崇拜三位一体嘅神。今日，好多宗教亦都倡导上帝系三位一体嘅。不过，圣经清楚指出真神只有一位，就系耶和华，而耶稣只系佢嘅儿子。（约翰福音17:3）巴比伦人亦都相信人死后会以某种形式继续生存，仲会喺地狱受折磨。呢啲讲法都系错嘅。——请睇附注14、17同18

¹⁸ 上帝预告所有错误嘅宗教好快就会被毁灭。（启示录18:8）耶和华上帝希望你可以及时采取行动。（启示录18:4）你睇唔睇得出离开错误宗教点解系好紧急嘅事？

19．你决心事奉耶和华，可以得到乜嘢福分？

¹⁹ 你一旦决定离开错误嘅宗教事奉耶和华，有啲亲友可能唔明白你点解要噉做，佢哋嘅反应甚至会令你好难受。不过，耶和华唔会离弃你。你可以成为真基督徒大家庭嘅一分子，感受到世界各地几百万属灵弟兄姊妹真挚嘅爱，仲有喺新世界永远生活嘅希望。（马可福音10:28-30）况且，嗰啲反对你事奉耶和华嘅亲友话唔定日后会改变，愿意学习圣经。

20．点解以正确嘅方式崇拜上帝好重要？

²⁰ 上帝好快就会将恶人恶事全部铲除，而上帝嘅王国就会统治全地。（彼得后书3:9,13）到时，生活一定非常美好！每个人都会以耶和华悦纳嘅方式崇拜佢。所以，而家就要采取行动，以正确嘅方式崇拜上帝！

1,2．你需要问问自己乜嘢问题？点解噉做好重要？

通过学习圣经，你可能睇出好多人表面崇拜上帝，其实佢哋嘅言行都系上帝憎恨嘅。（哥林多后书6:17）所以，耶和华吩咐我哋要离开错误嘅宗教“大巴比伦”。（启示录18:2,4）你会点做呢？每个人都要自己做决定，我哋要问吓自己：我想按照上帝认可嘅方式崇拜佢，定系想按照自己钟意嘅方式崇拜上帝？

² 如果你已经离开咗错误嘅宗教，正式同佢哋脱离关系，噉样你做得好好。不过，我哋会唔会仲留恋一啲错误宗教嘅风俗习惯呢？我哋通过探讨一啲例子可以睇出，点解同耶和华有一致嘅观点好重要。

使用偶像同崇拜祖先

3．（甲）点解有啲人觉得崇拜嘅时候，放弃使用偶像唔容易？（乙）关于使用偶像崇拜上帝，圣经点讲？

³ 有啲人习惯喺屋企使用偶像崇拜上帝，或者喺神龛面前拜神。如果你都有呢啲习惯，可能觉得要作出改变唔容易，甚至会谂系咪真系要改变。但系要记得，应该点样崇拜上帝，只有耶和华先可以话俾我哋知。圣经清楚指出，耶和华唔想人使用偶像崇拜佢。（请读出埃及记20:4,5；诗篇115:4-8；以赛亚书42:8；约翰一书5:21）

4．（甲）点解我哋唔应该拜祖先？（乙）点解耶和华吩咐以色列人唔好试图同死者沟通？

⁴ 有啲人用好多时间同金钱安抚死去嘅祖先，以各种形式崇拜佢哋。但系我哋学过，死去嘅人唔能够帮助或者伤害我哋。佢哋并冇喺某个地方继续生存。事实上，试图同死者沟通好危险，因为任何似乎嚟自死者嘅信息，其实都系嚟自邪灵嘅。所以，耶和华吩咐以色列人唔好试图同死者沟通，或者参与其他任何形式嘅邪灵崇拜。（申命记18:10-12）——请睇附注26同31

5．点样做可以帮助你放弃使用偶像同拜祖先？

⁵ 点样做可以帮助你放弃使用偶像同拜祖先呢？你阅读圣经同沉思耶和华对呢啲事嘅睇法，就会知道耶和华“憎恶”呢啲事。（申命记27:15）为咗培养同上帝一致嘅观点，以上帝悦纳嘅方式崇拜佢，我哋就要每日向耶和华祷告。（以赛亚书55:9）你可以确信耶和华会赐俾你所需嘅力量，使你可以将生活上任何同错误宗教有关嘅事物都通通除去。

应唔应该庆祝圣诞节？

6．点解12月25日被选为庆祝耶稣诞生嘅日子？

⁶ 圣诞节系世界上其中一个最受欢迎嘅节日。好多人以为呢个节日系庆祝耶稣嘅诞生。其实，圣诞节同错误宗教有关。一本百科全书解释，罗马异教徒喺12月25日庆祝太阳嘅诞生。虽然耶稣唔系12月25日出世，不过教会领袖为咗吸引异教徒归信，就决定喺呢一日庆祝耶稣嘅诞生。（路加福音2:8-12）耶稣早期嘅门徒都唔庆祝圣诞节。一本参考书《大事圣源》（英语）话耶稣诞生之后嘅两百年内，“冇人知道耶稣出世嘅确实日期，亦都好少人关心佢喺边一日诞生。”事实上，耶稣降世之后几百年，庆祝圣诞节先开始流行。

7．点解真基督徒唔庆祝圣诞节？

⁷ 好多人都知道圣诞节同有关嘅习俗，例如举行圣诞派对同交换圣诞礼物，都系嚟自异教嘅。曾经有一段时间，英国同某啲美洲地区都禁止人庆祝圣诞节，任何人庆祝圣诞节都会受罚，因为呢个节日源自异教。不过后来，圣诞节又再开始流行。点解真基督徒唔庆祝圣诞节？因为佢哋凡事都想取悦上帝。

应唔应该庆祝生日？

8,9．点解早期基督徒唔庆祝生日？

⁸ 另一个好多人庆祝嘅节日就系生日。基督徒应唔应该庆祝生日？圣经只提到两个庆祝生日嘅事例，而庆祝嘅人都唔系崇拜耶和华嘅。（创世记40:20；马可福音6:21）由于庆祝生日同崇拜假神有关，所以《世界图书百科全书》（英语）话早期基督徒认为“庆祝任何人嘅生日都系异教习俗”。

⁹ 古代嘅罗马人同希腊人都相信，每个人出世嗰阵，都有一个精灵喺身边一直守护佢。《生日传说》（英语）话：“呢个精灵同某个神有神秘嘅关系，而精灵所守护嘅人系喺呢个神生日嗰日出世嘅。”

10．点解基督徒唔应该庆祝生日？

¹⁰ 你认为耶和华会唔会接纳同错误宗教有关嘅庆祝活动？（以赛亚书65:11,12）当然唔会。所以，我哋唔会庆祝生日或者其他同错误宗教有关嘅节日。

起源系咪真系重要？

11．有啲人庆祝节日系为咗乜嘢？你最重视嘅应该系乜嘢？

¹¹ 有啲人知道圣诞节以及其他节日同异教有关，但仲系继续庆祝，因为佢哋觉得呢个系一家团聚嘅机会。你系咪都噉谂？想同家人欢聚系好自然嘅事。家庭系耶和华创立嘅，佢想我哋同家人有融洽嘅关系。（以弗所书3:14,15）不过，我哋最重视嘅应该系同耶和华嘅关系，所以唔应该为咗取悦亲友，而庆祝同错误宗教有关嘅节日。使徒保罗话：“你哋要不断验明乜嘢先至系主所悦纳嘅。”（以弗所书5:10）

12．边啲节日系耶和华唔悦纳嘅呢？

¹² 好多人觉得节日嘅起源并唔重要，不过耶和华嘅睇法就完全唔同。任何节日如果同错误宗教、尊崇人或者尊崇国家象征物有关，都唔会得到上帝嘅悦纳。一个圣经记载讲明呢点，埃及人曾经为佢哋嘅假神设立好多庆祝节日。以色列人离开埃及之后，有一次竟然仿效埃及人，庆祝一个异教嘅节日，仲将呢个节日称为“耶和华嘅节日”，所以，耶和华就严惩佢哋。（出埃及记32:2-10）我哋应该谨记以赛亚先知所讲嘅，“唔好接触不洁嘅嘢”。（请读以赛亚书52:11）

待人接物要温和

13．当你决定唔再庆祝某啲节日，你可能会有乜嘢疑问？

¹³ 当你决定唔再庆祝某啲节日，你可能会谂：如果同事问我点解唔同佢哋一齐庆祝圣诞节，我应该点回答呢？如果有人送圣诞礼物俾我，我应该点做？如果配偶好想同我一齐庆祝某个节日又点呢？我要点样做，仔女先至唔会因为冇庆祝生日同其他节日而唔开心呢？

14,15．如果有人祝你节日快乐或者送礼物俾你，你可以点做？

¹⁴ 我哋要运用良好嘅判断力，先可以喺唔同嘅情况下识得点样处理。如果有人祝你节日快乐，你可以作出回应，例如简单答一句“多谢”。但系，如果有人想知道你点解唔庆祝节日，可能你想同佢解释一下。无论点样，你都要表现温和、机巧同尊重嘅态度。圣经话：“你哋嘅话要时刻带住恩慈，用盐调味，使你哋知道应该点样回答每个人。”（歌罗西书4:6）你可以同人解释，其实你唔反对送礼物或者参与社交活动，不过唔会因为庆祝节日而做呢啲事。

¹⁵ 如果有人喺节日送礼物俾你，你应该点做？虽然圣经冇列出一大堆规条，不过，圣经话我哋需要保持良心清白。（提摩太前书1:18,19）可能送礼物俾你嘅人唔知道你唔庆祝嗰个节日。又或者佢会同你讲：“我知道你唔庆祝呢个节日，不过我仲系想送呢份礼物俾你。”喺呢两种情况下，你接唔接受礼物系个人嘅决定。无论你决定点做，都唔应该使自己良心有愧。我哋唔想做任何事，损害自己同耶和华嘅关系。

点样对待家人

16．如果家人要庆祝节日，你应该点做？

¹⁶ 如果家人要庆祝某个节日，你应该点做？你唔需要同佢哋争论，要记住佢哋有权决定点样做。你要尊重佢哋嘅决定，同表现温和嘅态度，就好似你想佢哋尊重你一样。（请读马太福音7:12）但系如果你嘅家人想同你喺节日期间欢聚，你应该点做呢？作决定之前，你可以向耶和华祷告，求佢帮助你作明智嘅决定。预先谂谂喺嗰个场合会遇到乜嘢情况，然后搜集相关资料。要记住，无论你做乜嘢决定，都应该取悦耶和华。

17．你点样能够令儿女觉得，唔庆祝节日其实唔系损失？

¹⁷ 你点样能够令儿女觉得，唔庆祝节日其实唔系损失？你可以特别为佢哋安排一啲活动，亦都可以随时送礼物俾惊喜佢哋。其实，你俾仔女嘅时间同关怀，就系其中一份最好嘅礼物。

用行动拥护正确嘅宗教

18．点解我哋应该参加基督徒聚会？

¹⁸ 为咗取悦耶和华，我哋要舍弃错误嘅宗教同有关嘅节日习俗，仲要坚决拥护正确嘅宗教。可以点样做呢？其中一个方法系经常参加基督徒聚会。（请读希伯来书10:24,25）聚会系正确崇拜嘅一个重要部分。（诗篇22:22；122:1）我哋可以通过聚会互相鼓励。（罗马书1:12）

19．你同人分享圣经嘅真理点解好重要？

¹⁹ 拥护正确宗教嘅另一个方法系，同人分享你学到嘅圣经知识。今日，世上发生好多坏事，令人觉得痛心。你身边嘅人可能都有同感。你可以话俾佢哋知将来美好嘅希望。随住你参加基督徒聚会，同人分享圣经嘅真理，你就唔会再留恋错误嘅宗教以及相关嘅习俗。你用行动拥护正确嘅宗教，就会得到耶和华大大赐福，可以满心喜乐。（玛拉基书3:10）