使徒行傳

2 五旬節嗰一日，佢哋所有人都聚集喺同一個地方。 2 佢哋坐坐吓，突然聽到天上傳嚟好似刮大風嘅聲音，充滿成間屋。 3 佢哋見到火苗一樣嘅嘢，形狀好似舌頭，分別停留喺每個人嘅頭上。 4 佢哋就充滿神聖力量，又喺神聖力量指引下開始講各種外語*。

5 當時喺耶路撒冷，有嚟自世界各地虔誠嘅猶太人。 6 聲音一傳出去，民眾就聚集起嚟。門徒用民眾各自嘅語言講說話，大家聽到都覺得好困惑， 7 非常之驚訝，佢哋話：「你哋睇，講嘢嘅人明明係加利利人嚟㗎， 8 點解佢哋識得講我哋呢度唔同人嘅母語嘅？ 9 我哋呢度有帕提亞人、米底亞人、埃蘭人，仲有嚟自美索不達米亞、猶地亞、卡帕多西亞、本都、亞細亞行省、 10 弗里吉亞、潘菲利亞、埃及同昔蘭尼附近利比亞一帶嘅居民，同埋由羅馬嚟呢度暫住嘅人，當中有猶太人，亦都有歸信猶太教嘅人， 11 另外仲有克里特人同阿拉伯人。我哋竟然聽到佢哋用我哋嘅語言，傳講上帝偉大嘅作為*。」 12 大家都好驚訝，覺得困惑，佢哋話：「發生咩事呀？」 13 不過，有啲人就笑啲門徒，話：「佢哋飲甜酒*飲多咗啫。」

14 彼得同11個使徒企起身，然後彼得大聲話：「各位猶地亞人同埋耶路撒冷嘅所有居民，請大家留心聽我講。 15 你哋以為呢啲人飲醉咗，其實唔係，而家只係朝早9點*啫。 16 其實呢個應驗咗先知約珥嘅預言： 17 『上帝話：「喺最後嘅日子*，我會將我嘅神聖力量傾注喺各種各樣嘅人身上。你哋嘅仔女會受上帝啟示發言*，你哋嘅年輕人會見到異象*，你哋嘅老年人會發奇異嘅夢。 18 喺嗰段時期，我都會將我嘅神聖力量傾注喺我嘅男僕女僕身上，啟示佢哋發言。 19 我會喺天上施行奇跡*，喺地上施行神跡：有血，有火，有濃煙。 20 太陽發黑，月亮變成血紅色，喺耶和華*輝煌嘅大日子嚟到之前，呢一切都會發生。 21 所有呼求耶和華*聖名嘅人，都會得救。」』

22 「各位以色列人，請聽我講幾句。上帝清楚表明，拿撒勒人耶穌係佢派嚟嘅，佢通過耶穌喺你哋當中施行咗各種奇妙嘅神跡*，呢啲事你哋都知道。 23 耶穌被交出嚟係上帝預先知道嘅，亦都係上帝所定嘅旨意。你哋借不法之徒嘅手喺木柱度處決咗佢。 24 不過上帝已經復活咗佢，將佢由死亡嘅痛苦*中拯救出嚟，因為死亡冇能力束縛佢。 25 關於耶穌，大衛話：『喺我眼中，耶和華*一直喺我面前，由於佢喺我右邊，我絕對唔會動搖。 26 所以我嘅心好歡樂，我嘅說話充滿歡欣，我*會安然居住，充滿希望， 27 因為你唔會將我*遺棄喺墳墓*，唔會俾你嘅忠貞僕人朽壞。 28 你令我認識生命之道，你會令我喺你面前滿心歡喜。』

29 「各位弟兄，等我坦白同你哋講，你哋都知道族長大衛已經死咗，俾人埋葬咗，而佢嘅墓地到今日仲喺呢度。 30 由於佢係先知，亦都知道上帝向佢發咗誓，要俾佢一個後代繼承佢嘅王位， 31 所以佢預先知道同埋提到基督嘅復活。佢話基督唔會被遺棄喺墳墓，身體亦都唔會朽壞*。 32 上帝已經復活咗耶穌。我哋都可以為呢件事作證。 33 佢被提升到上帝右邊，領受咗佢爸爸承諾賜俾佢嘅神聖力量，就將神聖力量傾注喺我哋身上，就好似你哋見到聽到嘅噉。 34 大衛並冇升到天上，但係佢講過：『耶和華*同我主講：「你坐喺我右邊， 35 直到我令你嘅敵人成為你嘅腳凳。」』 36 所以，願所有以色列人都確信，你哋喺木柱上處決嘅耶穌，上帝已經委任佢做基督，成為我哋嘅主嘞。」

37 當時，聽到呢番說話嘅人都心如刀割，同彼得仲有其餘嘅使徒講：「各位弟兄，我哋應該點做呢？」 38 彼得話：「你哋人人都要悔改，奉耶穌基督嘅名受浸，噉你哋嘅罪就會得到寬恕，上帝亦都會不求回報噉將神聖力量賜俾你哋， 39 因為我哋嘅上帝耶和華*承諾要賜神聖力量俾所有佢呼召嘅人，即係你哋、你哋嘅仔女，同埋所有喺遠方嘅人。」 40 彼得仲講咗好多嘢，作咗徹底嘅見證，亦都再三勸佢哋：「你哋要離開呢一代邪惡嘅人，以免遭受毀滅。」 41 樂意接受佢說話嘅人都受咗浸。嗰一日，信徒大約增加咗3000人。 42 佢哋都繼續專心接受使徒嘅教導，彼此交流*，一齊食飯，堅持不懈噉禱告。

43 使徒施行咗好多神跡，做咗好多奇妙嘅事*，人人都因為噉而敬畏上帝。 44 成為信徒嘅人經常聚埋一齊，共享一切。 45 佢哋賣咗家產財物，按照每個人嘅需要將錢分俾大家。 46 佢哋日日都團結一心噉喺聖殿聚集，喺唔同人屋企食飯，真心真意、開開心心噉分享食物， 47 讚美上帝，民眾都好鍾意佢哋。耶和華*日日都令更多得救嘅人加入佢哋，成為信徒。