使徒行傳

21 我哋依依不捨噉同佢哋道別之後，就順風航行，直接去到科斯，第二日抵達羅得斯，再由嗰度去咗帕大拉。 2 我哋搵到一艘開去腓尼基嘅船，就上船出發， 3 望到塞浦路斯島之後，就喺島嘅南邊駛過，向住敘利亞航行，喺泰爾上岸，因為艘船要喺嗰度卸貨。 4 我哋去搵當地嘅門徒，搵到之後，就喺嗰度住咗七日。佢哋知道神聖力量透露嘅事，就一再勸保羅唔好去耶路撒冷。 5 探訪完佢哋之後，我哋就出發繼續上路，佢哋所有人連同婦女、小朋友一齊送我哋去城外，大家喺海灘跪低禱告， 6 然後互相道別。之後我哋上咗船，佢哋亦都返屋企。

7 我哋由泰爾啟航，到咗托勒密，去問候嗰度啲弟兄，同佢哋一齊住咗一日。 8 第二日，我哋出發，到咗凱撒里亞，去咗傳福音者腓力屋企，喺嗰度留宿。腓力係嗰七個人之一， 9 有四個女，都係未婚嘅*，佢哋都喺上帝啟示下講預言*。 10 我哋住咗一段時間之後，有個叫亞迦布嘅先知喺猶地亞落嚟。 11 佢嚟見我哋嗰陣，拎起保羅嘅腰帶綁住自己嘅手腳，佢話：「上帝通過神聖力量噉樣講：『呢條腰帶係邊個嘅，邊個就會噉樣喺耶路撒冷俾猶太人綁住，交喺外族人嘅手。』」 12 我哋聽到佢噉講，就同其他在場嘅人一齊懇求保羅唔好上耶路撒冷。 13 保羅話：「你哋點解要喊，動搖我嘅決心*呢？為咗主耶穌嘅名，我唔單止準備好會俾人囚禁，就算死喺耶路撒冷都心甘情願。」 14 我哋說服唔到保羅，就冇再堅持嘞*，只係話：「願耶和華*嘅旨意實現。」

15 後嚟我哋收拾好行李，出發去耶路撒冷。 16 凱撒里亞有啲門徒都同我哋一齊去，帶我哋去塞浦路斯人拿孫屋企留宿*。拿孫喺好耐之前已經係門徒。 17 我哋去到耶路撒冷，啲弟兄好開心噉歡迎我哋。 18 第二日，保羅同我哋一齊去見雅各，當時所有長老都喺嗰度。 19 保羅問候完佢哋，就詳細講述上帝通過佢嘅傳道工作，喺列國嘅人當中所做嘅事。

20 佢哋聽完之後，讚美*上帝，但係就同保羅講：「弟兄，你睇，有成千上萬嘅猶太人成為信徒，佢哋都熱心維護摩西法典。 21 不過佢哋聽到謠言，話你教導所有住喺列國當中嘅猶太人背棄摩西法典，叫佢哋唔好為自己嘅仔施行割禮，唔使遵守慣例。 22 而家應該點做好呢？佢哋遲早都會知道你嚟咗。 23 噉啦，你按照我哋講嘅去做。我哋呢度有四個曾經許下誓願嘅人。 24 你帶佢哋去，同佢哋一齊舉行儀式令自己潔淨*，幫佢哋交錢，等佢哋可以剃頭*。噉大家就會知道，之前關於你嘅謠言都係冇根據嘅，知道你一直循規蹈矩，遵守法典。 25 至於外族信徒，我哋已經寫信將我哋嘅決定話咗俾佢哋知，就係佢哋要禁戒獻俾偶像嘅祭牲，禁戒血，禁戒勒死*嘅動物，禁戒淫亂*。」

26 第二日，保羅帶嗰幾個人去，一齊舉行潔淨嘅儀式，然後入聖殿話俾人知潔淨嘅儀式喺邊日結束，等祭司到時為佢哋每個人獻祭。

27 嗰七日就快結束嗰陣，由亞細亞行省嚟嘅猶太人見到保羅喺聖殿入面，就煽動民眾，引起騷亂。佢哋捉住保羅， 28 大嗌：「各位以色列人，快啲嚟幫手！就係呢個人四圍教唆人藐視我哋嘅族人、我哋嘅法典同埋呢個地方，佢仲帶希臘人入聖殿，玷污呢個神聖嘅地方。」 29 佢哋噉講，係因為之前見到以弗所人特羅非摩喺城入面同保羅一齊，就以為保羅帶咗佢入聖殿。 30 全城陷入騷亂，民眾一齊跑去聖殿，捉住保羅，拖佢出去，聖殿嘅門就即刻閂埋。 31 佢哋準備殺死保羅嘅時候，有人向部隊嘅將軍報告，話耶路撒冷陷入一片混亂。 32 將軍即刻帶住士兵同軍官跑落去。大家一見到將軍帶住士兵嚟到，就冇再打保羅嘞。

33 將軍上前逮捕保羅，下令用兩條鎖鏈鎖住佢，然後問佢係邊個，做咗乜嘢事。 34 當時有啲群眾嗌呢樣，有啲嗌嗰樣。將軍見場面咁混亂，查唔到真相，就吩咐人帶保羅去軍營。 35 保羅啱啱行上樓梯，啲人就湧埋嚟想傷害佢，士兵唯有將保羅掅起帶走。 36 有一班人一直跟喺後面大嗌：「殺死佢！」

37 保羅就快俾人帶入軍營嘅時候，同將軍講：「我可唔可以同你講啲嘢呀？」將軍話：「你識講希臘語？ 38 早排有個埃及人煽動叛亂、帶領4000個匕首黨徒去曠野，嗰個人係咪你呀？」 39 保羅話：「我係猶太人，喺西利西亞著名嘅大數城出世，係嗰度嘅公民。求你俾我向民眾講幾句。」 40 將軍應承咗，保羅企喺樓梯上面，向民眾做咗個手勢，大家就安靜落嚟。於是保羅用希伯來語同佢哋講：