使徒行傳

16 保羅去咗特庇，然後到咗路司得。嗰度有個門徒叫做提摩太，媽媽係猶太人，亦都係信徒，爸爸係希臘人。 2 路司得同以哥念嘅弟兄都非常讚賞佢。 3 保羅話想帶埋提摩太一齊上路。於是，保羅叫佢接受割禮，因為嗰啲地方嘅猶太人都知道佢爸爸係希臘人。 4 佢哋經過各個城鎮，將耶路撒冷嘅使徒同長老所作嘅決定話俾門徒知，等佢哋可以遵守。 5 各群會眾嘅信心越嚟越堅強，人數日日都有增長。

6 神聖力量禁止佢哋喺亞細亞行省傳講上帝嘅話語，佢哋就經過弗里吉亞同加拉太一帶， 7 後嚟落到去密細亞，本來佢哋要入去比提尼亞*，但係耶穌通過神聖力量阻止佢哋入去。 8 於是，佢哋經過*密細亞，落去特洛阿斯。 9 到咗夜晚，保羅睇到一個異象：有個馬其頓人企喺佢面前懇求佢：「嚟馬其頓幫我哋吖。」 10 保羅睇到異象之後，我哋就即刻諗辦法去馬其頓，因為我哋睇出上帝吩咐我哋向馬其頓人宣揚好消息。

11 我哋由特洛阿斯啟航，直接去薩莫色雷斯，第二日去到尼亞波利， 12 再由嗰度去咗一個殖民地，就係馬其頓地區嘅主要城市腓立比，我哋喺呢座城住咗一段時間。 13 喺安息日，我哋出咗城，去咗河邊，因為聽講嗰度有個禱告嘅地方。我哋就坐低，向聚集喺嗰度嘅婦女傳道。 14 有一個叫做呂底亞嘅女人喺嗰度聽我哋傳道，佢嚟自推雅推拉城，係賣紫色衫同布嘅。佢一向都崇拜上帝。耶和華*幫助*佢接受保羅傳講嘅信息。 15 佢同佢一家受浸之後，呂底亞好誠懇噉話：「如果你哋覺得我對耶和華*有信心，就一定要嚟我屋企住呀。」佢好堅持，我哋就去佢屋企嘞。

16 有一日，我哋去嗰個禱告嘅地方，喺途中遇到一個俾邪靈附身嘅女僕，邪靈令佢有占卜嘅能力。佢啲主人就因為噉而賺咗好多錢。 17 佢一路跟住保羅，喺我哋後面大嗌：「呢啲人係至高上帝嘅奴隸，要話俾你哋聽點樣先至可以得救。」 18 佢連續好多日都噉樣做。保羅覺得好煩，就擰轉身同邪靈講：「我奉耶穌基督嘅名吩咐你，喺佢身上出嚟。」邪靈就即刻出嚟。

19 女僕嘅主人見俾人斷咗財路，就捉住保羅同西拉，拉佢哋去市集廣場見官員。 20 佢哋將兩個人押去民政官面前，話：「呢啲人喺我哋座城周圍搞事。佢哋係猶太人， 21 佢哋宣傳嘅規矩都係我哋羅馬人唔可以採納、唔可以遵守嘅。」 22 民眾都一齊指責佢哋。民政官下令剝咗佢哋啲衫，用棍打佢哋， 23 打完佢哋一身之後，就將佢哋韞入監，吩咐獄吏嚴密看守。 24 獄吏接到命令，就將佢哋韞喺最入嘅監倉，用枷鎖鎖住佢哋嘅腳。

25 到咗半夜，保羅同西拉一齊禱告，唱歌讚美上帝，其他囚犯都喺度聽。 26 突然之間，發生咗場大地震，令到監獄嘅地基震動，啲門即刻打開晒，所有人嘅鎖鐐都鬆開咗。 27 獄吏醒咗之後，見監倉啲門全部都打開咗，以為啲囚犯都走晒，就掹把劍出嚟想自殺。 28 保羅大聲話：「唔好傷害自己呀，我哋都喺呢度！」 29 獄吏叫人攞燈嚟，然後衝入去。佢成身震晒，跪喺保羅同西拉面前。 30 佢帶佢哋出嚟之後，就問：「兩位，我要做啲咩先至可以得救呢？」 31 佢哋答：「你同你一家要相信主耶穌，先至可以得救。」 32 佢哋就向獄吏同佢一家傳講耶和華*嘅話語。 33 嗰晚，獄吏帶佢哋去洗傷口，然後佢同佢全家都冇拖延，即刻受浸。 34 獄吏將佢哋帶返屋企，仲準備咗成枱食物俾佢哋食。佢同佢全家因為成為咗信徒，相信上帝，就非常開心。

35 天光之後，民政官派守衛去同獄吏講：「放咗嗰啲人啦。」 36 獄吏就將呢件事話俾保羅知，佢話：「民政官派人嚟放你哋走，而家你哋可以出嚟，安心離開喇。」 37 保羅同佢哋講：「我哋係羅馬公民，都未俾人定罪*，佢哋就當眾打我哋，將我哋韞入監，而家又想偷偷哋趕我哋走？唔得！叫佢哋親自嚟送我哋出去。」 38 啲守衛就將保羅講嘅嘢話俾民政官知，民政官聽到佢哋係羅馬公民，就好驚， 39 於是民政官嚟向佢哋道歉*，送佢哋出監獄，然後請佢哋離開嗰座城。 40 佢哋離開監獄之後，去咗呂底亞屋企，同啲弟兄見面，鼓勵完佢哋之後就走嘞。