使徒行傳

17 佢哋經過安菲波利斯、阿波羅尼亞，去到帖撒羅尼迦，嗰度有一個猶太人嘅會堂。 2 保羅按照習慣入去會堂，連續三個安息日，根據聖經同人推理， 3 一邊講解，一邊引用聖經證明基督一定要受難同埋死而復生。佢話：「我向你哋宣講嘅呢位耶穌，就係基督。」 4 有啲人就成為信徒，同保羅仲有西拉密切來往，另外有一大班崇拜上帝嘅希臘人同埋唔少有地位嘅婦女都噉樣做。

5 猶太人好妒忌，就聚集咗一班喺市集廣場游手好閒嘅惡霸，喺城入面挑起騷亂。佢哋強行闖入耶孫屋企，想將保羅同西拉捉去交俾嗰啲暴民， 6 不過搵唔到佢哋，於是將耶孫同埋一啲弟兄拉去見治城官，大聲話：「呢啲人搞到天下大亂，而家嚟埋呢度， 7 耶孫竟然接待佢哋。呢啲人違背凱撒嘅法令，話有另一個王，就係耶穌。」 8 民眾同治城官聽到佢哋噉講，就好擔心， 9 叫耶孫同其他人交出足夠嘅保釋金*，然後先至放佢哋走。

10 弟兄即刻漏夜送保羅同西拉去比里亞。佢哋一去到，就入去猶太人嘅會堂。 11 呢度嘅人比帖撒羅尼迦人開明，非常之熱切噉接受上帝嘅話語，每日用心查考聖經，要確定自己聽到嘅係唔係真嘅。 12 結果佢哋有好多人成為信徒，好多有名望嘅希臘婦女同一啲男人都成為信徒。 13 帖撒羅尼迦嘅猶太人聽講保羅亦都喺比里亞傳講上帝嘅話語，就去嗰度唆擺民眾，引起騷動。 14 啲弟兄即刻送保羅離開，將佢送去海邊，而西拉同提摩太就留喺嗰度。 15 有啲人陪保羅一齊去雅典。保羅吩咐佢哋去叫西拉同提摩太盡快嚟見佢，佢哋就離開。

16 保羅喺雅典等佢哋嘅時候，見到城入面周圍都係偶像，就好不安。 17 於是佢喺會堂同猶太人仲有其他崇拜上帝嘅人推理，亦都每日喺市集廣場同遇到嘅人推理。 18 不過，有啲伊壁鳩魯派同斯多葛派嘅哲學家嚟同佢辯論。有啲話：「呢個人囉囉唆唆，到底想講啲咩呀？」有啲就話：「睇嚟佢喺度宣傳緊啲外國神明喎。」佢哋噉樣講，係因為保羅宣揚有關耶穌同復活嘅好消息。 19 佢哋將保羅帶去亞略巴古*，佢哋話：「呢套新道理，你可唔可以講多啲俾我哋聽？ 20 你講嘅呢啲事，聽落好新奇，我哋想知道係咩意思呀。」 21 原來所有雅典人同埋喺嗰度暫住*嘅外國人，得閒嘅時候最鍾意傾吓偈，聽吓新鮮事。 22 保羅企喺亞略巴古，佢話：

「各位雅典人，我留意到你哋做嘅所有嘢都表明你哋敬畏神明，比其他人更加虔誠。 23 例如，我一路行一路觀察你哋崇拜*嘅嘢，發現有一座壇，上面寫住『獻俾未知嘅神』。而家我要向你哋宣揚嘅，其實就係你哋未認識但係崇拜緊嘅神。 24 佢係創造世界同世上萬物嘅真神，既然佢係天地嘅主，當然唔會住喺人建造嘅神殿， 25 亦都唔需要人服侍，好似缺乏咗啲咩噉，因為將生命、氣息同一切賜俾所有人嘅就係佢。 26 佢創造咗一個人，萬國萬族都出自呢個人。佢俾人喺地上生活，又定下時候時期同埋人類居住嘅疆界， 27 等佢哋可以尋求真神，只要努力去搵就會搵到，其實真神離我哋每個人都唔遠。 28 我哋有生命，有活動能力，能夠存在，都全靠佢，就好似你哋有啲詩人所講：『我哋都係佢嘅仔女*。』

29 「我哋既然係真神嘅仔女*，就唔應該以為佢好似用金、銀或者石頭造嘅偶像，又或者好似人用手藝同心思雕刻出嚟嘅嘢。 30 喺以往嘅時代，雖然世人咁無知，真神都冇追究。不過而家佢向世界各地嘅人宣告，人人都應該悔改， 31 因為佢已經定咗日子，決定通過佢委任嘅人審判全天下，伸張正義。佢已經令呢個人死而復生，作為對所有人嘅保證。」

32 有啲人聽到死人復活呢件事，就開始笑佢，另外有啲人話：「我哋下次想再聽吓你講呢件事。」 33 於是保羅離開佢哋。 34 不過都有啲人同佢來往，成為信徒，其中包括亞略巴古法庭嘅審判官丟尼修，仲有一個叫做達馬里嘅女人同埋其他人。