使徒行傳

18 後嚟，保羅離開雅典，嚟到哥林多*， 2 遇到一個喺本都出世嘅猶太人，叫做亞居拉，佢冇幾耐之前帶住太太百姬拉由意大利過嚟，因為克勞狄下令要所有猶太人都離開羅馬。保羅去佢哋屋企， 3 同佢哋一齊住，一齊做嘢，因為佢哋嘅職業都係製造帳篷。 4 每逢安息日，保羅都去會堂演講*，勸導猶太人同希臘人相信佢傳講嘅信息。

5 西拉同提摩太由馬其頓落嚟之後，保羅就將全部精力都用嚟傳講上帝嘅話語，向猶太人證明耶穌係基督。 6 不過猶太人不斷反對佢，詆毀佢，保羅就揚一揚自己件衫*，同佢哋講：「你哋滅亡嘅話，都係咎由自取*，我係清白嘅。從今以後，我要去列國嘅人嗰度嘞。」 7 於是佢離開會堂，去咗提提奧·猶士都屋企，呢個人崇拜上帝，佢屋企就喺會堂隔籬。 8 會堂主管基利司布同佢一家都成為咗主嘅信徒。好多聽到好消息嘅哥林多人都相信，亦都受咗浸。 9 有一晚，主喺異象同保羅講：「唔使驚，即管繼續傳道啦，唔好放棄*。 10 我會同你一齊*，冇人可以傷害到你，因為我仲要喺呢座城召集好多子民。」 11 於是保羅喺嗰度住咗一年零六個月，教人學習上帝嘅話語。

12 迦流做亞該亞行省總督嘅時候，猶太人合謀攻擊保羅，押佢去審判座前面， 13 佢哋話：「呢個人教唆人用唔合法嘅方式崇拜上帝。」 14 保羅準備開口嗰陣，迦流就同猶太人講：「各位猶太人，如果有人做咗錯事或者犯咗嚴重嘅罪，我當然應該耐心聽你哋講埋先嘅。 15 但係如果你哋爭論嘅，只係一啲字眼、稱呼同埋你哋嘅法律，噉你哋就要自己處理，我唔想審理呢啲事。」 16 於是迦流趕佢哋離開嗰度。 17 佢哋就捉住會堂主管所提尼，喺審判座前面打佢。喺呢啲事上，迦流並冇插手。

18 保羅喺嗰度繼續住咗一段時間，然後同弟兄道別，啟航去敘利亞。百姬拉同亞居拉都陪佢一齊去。喺堅革里，保羅將頭髮剃短，因為佢曾經許下一個誓願。 19 到咗以弗所，佢哋留喺嗰度，而保羅就入咗會堂，同猶太人推理。 20 大家再三請求保羅住多一段時間，不過佢冇應承， 21 跟住佢向大家道別，佢話：「如果係耶和華*嘅意思，我就會再返嚟你哋呢度。」於是佢由以弗所啟航， 22 落去凱撒里亞，然後上耶路撒冷問候會眾，再落去安提阿。

23 佢喺嗰度住咗一段時間，就出發去加拉太一帶同弗里吉亞，喺一座又一座城鞏固所有門徒嘅信心。

24 有一個喺亞歷山大出世嘅猶太人叫亞波羅，去咗以弗所。佢能言善辯，非常熟悉聖經。 25 佢受過教導認識耶和華*嘅道路，充滿神聖力量，滿腔熱誠，正確噉講解同教導關於耶穌嘅事，不過佢淨係熟悉約翰嘅浸禮。 26 佢喺會堂勇敢向人傳道。百姬拉同亞居拉聽過佢講嘅嘢，就私下去搵佢，幫佢更加準確噉明白上帝嘅道路。 27 後嚟佢想去亞該亞，弟兄就寫信俾當地嘅門徒，請大家接待佢。佢去到之後，對嗰啲因為上帝嘅分外恩典而成為信徒嘅人幫助好大。 28 佢講嘢嗰陣充滿信念，公開證明猶太人嘅主張係錯嘅，亦都引用聖經證明耶穌就係基督。