使徒行傳

4 彼得同約翰向民眾講說話嘅時候，祭司、守殿官同撒都該派嘅人走上前， 2 非常之嬲，因為呢兩個使徒教導民眾，公開宣揚耶穌已經死而復生。 3 於是佢哋將呢兩個人逮捕，拘留到第二日，因為當時已經係夜晚嘞。 4 不過，好多人就因為聽咗佢哋兩個人講嘅說話而成為信徒，淨係男人都有大約5000人。

5 第二日，民間嘅首領、長老同抄經士喺耶路撒冷聚集。 6 祭司長亞那，仲有該亞法、約翰、亞歷山大，同埋祭司長嘅所有親屬都在場。 7 佢哋叫彼得、約翰企喺中間，盤問話：「你哋有咩權力，奉邊個嘅名做呢件事呀？」 8 當時，彼得充滿神聖力量，同佢哋講：

「各位首領，各位長老， 9 如果我哋今日受審，係因為向呢個跛腳嘅人做咗件好事，而你哋又想查出係邊個令佢好返嘅， 10 噉我就話俾你哋所有人，仲有所有以色列人知，企喺你哋面前嘅呢個人係靠住耶穌被醫好嘅，佢係因為拿撒勒人耶穌基督嘅名而好返嘅。呢位耶穌俾你哋喺木柱度處死，但係上帝已經令佢死而復生。 11 耶穌『呢塊被你哋建造嘅人輕視嘅石頭，成為咗最重要嘅房角石*』。 12 除咗佢，冇人能夠帶嚟拯救，因為喺全天下，上帝並冇賜下其他名*，係我哋必須依靠，先至可以得救嘅。」

13 佢哋見彼得、約翰放膽發言，又知道呢兩個人係冇受過教育*嘅普通人，就好驚訝，睇出呢兩個人跟過耶穌。 14 佢哋望住企喺彼得同約翰身邊嗰個被醫好嘅人，就無話可說， 15 唯有叫佢哋出去公議會大廳外面，然後商量話： 16 「我哋應該點處置佢哋呢？佢哋真係施行咗神跡，耶路撒冷嘅居民全部都知道，我哋冇辦法否認。 17 為咗唔好俾呢件事喺民間越傳越開，我哋要警告佢哋，唔准佢哋再奉嗰個人嘅名向任何人傳講啲咩。」

18 於是佢哋叫彼得同約翰嚟，唔准佢哋再奉耶穌嘅名傳講或者教導任何嘢。 19 彼得同約翰就話：「喺上帝眼中，聽從你哋，唔聽從上帝，究竟係啱定錯，你哋自己判斷啦。 20 但係我哋見到嘅、聽到嘅，唔可以唔講。」 21 之後，佢哋再次恐嚇彼得同約翰，就釋放咗呢兩個人。因為佢哋搵唔到理由懲罰呢兩個人。佢哋亦都對民眾有所顧忌，因為民眾全部都為嗰件事讚美*上帝。 22 嗰個因為神跡*而被醫好嘅人，已經超過40歲嘞。

23 彼得同約翰被釋放之後，就去其他信徒嗰度，將祭司長同長老嘅說話講返俾大家聽。 24 大家聽完之後，就團結一心，向上帝禱告：

「至高嘅主宰，創造天、地、海同其中萬物嘅上帝啊， 25 你用神聖力量，通過我哋嘅祖先，你僕人大衛嘅口話：『萬國點解混亂不安？萬族點解諗埋啲空虛無益嘅事*呢？ 26 地上嘅君王群起，首領聚集，要對抗耶和華*，對抗佢任命嘅領袖*。』 27 希律同本丟·彼拉多，列國嘅人同以色列人，果然喺呢座城聚集，同你任命*嘅聖潔僕人耶穌對抗， 28 做出你預告嘅事。你用你嘅力量*，按照你嘅旨意，令呢一切發生。 29 耶和華*啊，求你聽吓佢哋點樣恐嚇我哋，亦都賜十足嘅膽量俾你嘅奴隸，等我哋可以不斷傳講你嘅話語。 30 求你伸手醫治人，通過你聖潔嘅僕人耶穌嘅名，施行神跡同奇妙嘅事*。」

31 佢哋懇切祈求上帝之後，聚集嘅地方就開始震動，人人都充滿神聖力量，勇敢傳講上帝嘅話語。

32 所有信徒都同心一意，大家都唔會話佢嘅財物只係屬於自己嘅，人人都共享所有嘢。 33 使徒繼續為主耶穌嘅復活作證，好有成效。人人都得到豐富嘅分外恩典。 34 大家一無所缺，因為嗰啲有田地房屋嘅人都變賣咗啲產業，然後將錢拎出嚟， 35 交俾使徒，使徒再按照各人嘅需要作出分配。 36 有個人叫做約瑟，使徒幫佢改咗另一個名，叫巴拿巴，翻譯出嚟係「安慰之子」。佢係利未族人，喺塞浦路斯出世。 37 佢賣咗自己塊地，然後將錢交俾使徒。