使徒行傳

22 「各位鄉親父老，各位兄弟，請聽吓我申辯。」 2 佢哋聽到保羅用希伯來語同佢哋講說話，就更加安靜。保羅話： 3 「我係猶太人，喺西利西亞嘅大數城出世，喺耶路撒冷接受迦瑪列嘅教育，受教導要嚴格遵守祖先嘅法典，就好似你哋而家所有人一樣熱心崇拜上帝。 4 我曾經迫害奉行主道*嘅人，置佢哋於死地。我將男女信徒都捉去坐監。 5 呢啲事大祭司同長老議會嘅所有成員都可以作證。當時我仲請佢哋出公函俾大馬士革嘅兄弟，等我可以去逮捕嗰度嘅人，帶去耶路撒冷受罰。

6 「大約中午，我就快到大馬士革嗰陣，天上突然有一道強光照射喺我身上。 7 我跌咗落地，聽到有把聲同我講：『掃羅，掃羅，點解你迫害我？』 8 我就問：『主啊，你係邊個呀？』佢話：『我就係你迫害緊嘅拿撒勒人耶穌。』 9 當時同我一齊嘅人都見到嗰道光，但係就聽唔清楚主同我講乜嘢。 10 我問：『主啊，我應該做啲乜嘢呢？』主話：『起身，入大馬士革城，喺嗰度有人會將你應該做嘅嘢，話晒俾你知。』 11 因為嗰道強光，我乜嘢都睇唔到，同行嘅人就捉住我嘅手，帶我入大馬士革。

12 「有個人叫亞拿尼亞，佢好虔誠，一向謹守法典，住喺大馬士革嘅猶太人全部都好讚賞佢。 13 佢嚟搵我，企喺我身邊話：『掃羅，弟兄，而家你睇得返嘢嘞！』當時我一岳高頭就見到佢。 14 佢話：『我哋祖先嘅上帝揀選咗你，令你知道上帝嘅旨意，見到正義嘅主，聽到佢親口講嘅說話， 15 因為你要為耶穌作證*，將你見到、聽到嘅一切講俾所有人知。 16 而家你仲等乜嘢呢？你去受浸啦！你呼求耶穌嘅名，上帝就會寬恕你嘅罪*。』

17 「我返到耶路撒冷之後，喺聖殿禱告嗰陣睇到一個異象， 18 見到主同我講：『快啲離開耶路撒冷，快啲走！因為佢哋唔會接受你為我所作嘅見證。』 19 我話：『主啊，佢哋都知道，我曾經去一個又一個會堂，監禁同拷打嗰啲相信你嘅人。 20 你嘅見證人司提反被殺害嗰陣，我都贊成，仲企喺附近為殺佢嘅人看守外衣。』 21 不過主同我講：『你去啦，因為我要派你去遠方嘅列國。』」

22 佢哋聽保羅講到呢度，就大嗌：「呢個人係抵死嘅，殺咗佢啦！」 23 佢哋喺度嗌，又除低外衣拋出去，亦都將塵土揚到空中。 24 於是將軍吩咐人帶保羅去軍營，叫人鞭打拷問佢，想知道大家點解大嗌話要殺佢。 25 士兵綁起保羅對手，準備鞭打佢嘅時候，保羅同企喺嗰度嘅軍官講：「鞭打仲未定罪*嘅羅馬公民，係合法㗎咩？」 26 軍官一聽到佢噉講，就向將軍報告：「你諗住點做呀？呢個人係羅馬公民。」 27 將軍上前問保羅：「話俾我知，你係咪羅馬公民呀？」佢話：「係。」 28 將軍話：「我使咗一大筆錢，先至買到呢個公民權。」保羅話：「我一出世就係羅馬公民。」

29 於是，嗰啲本來要嚴刑拷問保羅嘅人即刻向後褪。將軍知道保羅係羅馬公民就好驚，因為佢曾經用鎖鏈鎖過保羅。

30 第二日，將軍想知道保羅到底點解俾猶太人指控，就解開佢嘅鎖鏈，仲吩咐祭司長同成個公議會聚集一齊，然後帶保羅落嚟，叫佢企喺佢哋當中。