使徒行傳

1 提阿非羅啊，我喺第一卷書記錄咗耶穌做過同教過嘅所有嘢， 2 由開始直到佢被接到天上嗰一日為止嘅事，我都記錄咗。佢喺升天之前，通過神聖力量俾咗一啲指示佢揀選嘅使徒*。 3 佢受難之後，用好多令人信服嘅證據，向佢哋證明自己真係有返生命。喺40日期間，佢哋都見到佢，亦都聽到佢講關於上帝王國嘅事。 4 耶穌同佢哋見面嗰陣吩咐佢哋：「唔好離開耶路撒冷，要等我爸爸承諾嘅事實現，呢件事係我同你哋講過㗎。 5 約翰用水為人施浸，但係再過幾日，我就會用神聖力量為你哋施浸。」

6 佢哋聚集嗰陣，有人問耶穌：「主啊，你係咪會喺呢個時候復興以色列嘅王國呀？」 7 耶穌同佢哋講：「呢啲事會喺乜嘢時候、乜嘢時期發生，只有我爸爸先有權決定，你哋係唔需要知道嘅。 8 不過，神聖力量*會降臨喺你哋身上，到時你哋就會得到力量，喺耶路撒冷、全猶地亞、撒馬利亞，一直到地上最遙遠嘅地方，做我嘅見證人。」 9 佢講完呢啲說話，就喺佢哋面前升起，有雲遮住佢，佢哋就睇唔到佢嘞。 10 佢哋一直望住耶穌升上天，突然有兩個著白色衫嘅人企喺佢哋側邊， 11 同佢哋講：「加利利人啊，你哋點解企喺度望住個天呢？呢位曾經同你哋一齊嘅耶穌，被接咗上天嘞。你哋見到佢點樣去到天上，佢亦都會點樣嚟。」

12 之後，佢哋由橄欖山落返耶路撒冷，路程唔係好遠，只係1公里左右*。 13 到咗之後，佢哋就去住宿嘅地方，上咗樓上嘅一間房。嗰度有彼得、約翰、雅各、安得烈、腓力、多馬、巴多羅買、馬太、亞勒腓嘅仔雅各、熱心人西門，同埋雅各嘅仔猶大。 14 佢哋同幾個婦女、耶穌啲細佬同埋佢媽媽馬利亞一齊，大家團結一心，堅持不懈噉禱告。

15 喺嗰段時期，有一次大約有120個弟兄*聚集，彼得企起身，開口話： 16 「各位弟兄，關於帶人去逮捕耶穌嘅猶大，上帝用神聖力量通過大衛預告過佢嘅事，呢啲經文都一定要應驗。 17 佢本來係我哋嘅一分子，同我哋一齊接受呢個職務。 18 （佢用不義之財買咗塊地。後嚟，佢跌咗落去，個肚*爆開，連啲腸都流咗出嚟。 19 呢件事所有耶路撒冷嘅居民都知道，所以佢哋用本地嘅語言將嗰塊地叫做亞革大馬，意思係『血地』。） 20 其實詩篇都講過，『願佢嘅住處荒涼，願嗰度無人居住』，又話，『願佢嘅監督職位俾人取代』。 21 所以，我哋一定要揀一個人出嚟取代佢。呢個人一定要喺主耶穌同我哋一齊生活同工作*期間，都一直同我哋一齊， 22 即係由耶穌去約翰嗰度受浸開始，直到佢被接走離開我哋嘅嗰一日為止。揀出嚟嘅人要同我哋一齊為耶穌嘅復活作證。」

23 於是佢哋推薦咗兩個人，一個係稱為巴撒巴嘅約瑟，佢又叫猶士都，另一個係馬提亞。 24 佢哋禱告話：「耶和華*啊，你了解所有人嘅內心，求你令我哋睇出，你喺呢兩個人當中揀選邊一個， 25 取代猶大成為使徒，執行使徒嘅職務。因為猶大放棄咗呢一切，踏上歧途。」 26 於是，佢哋抽籤決定喺呢兩個人當中揀邊個，抽到嘅係馬提亞。佢就同嗰11個人一樣，被公認為使徒。