使徒行傳

27 佢哋決定俾我哋坐船去意大利，就將保羅同其他囚犯交俾奧古斯都部隊一個叫猶流嘅軍官。 2 我哋上咗一艘由亞大米田開去亞細亞行省沿岸一帶嘅船，然後就啟航嘞。帖撒羅尼迦嘅馬其頓人亞里達古亦都同我哋一齊去。 3 第二日，我哋喺西頓上岸。猶流好有人情味，批准保羅去朋友嗰度，等佢哋可以照顧佢。

4 我哋由嗰度開船，因為逆風，就沿住塞浦路斯嘅背風面航行， 5 駛過西利西亞同潘菲利亞一帶嘅大海，到咗呂基亞嘅米拉港。 6 軍官喺嗰度搵到一艘由亞歷山大開去意大利嘅船，就叫我哋上船。 7 連續好多日，船開得好慢，幾經辛苦先至嚟到尼多斯。因為逆風，我哋冇辦法前行，唯有經撒摩尼，沿住克里特嘅背風面航行。 8 我哋沿住海岸航行，終於嚟到拉西亞城附近一個叫佳港嘅地方。

9 過咗好耐，贖罪日禁食嘅嗰一日都過咗嘞。喺呢個時候航行好危險，所以保羅建議， 10 話：「各位，我認為而家繼續航行，唔單止貨物同架船會毀壞，損失慘重，就連我哋自己都性命難保。」 11 不過軍官寧願聽船長同埋船主講，都唔肯聽保羅講。 12 加上呢個港口唔適合過冬，大部分人都建議開船出發，盡快趕去菲尼斯過冬。菲尼斯係克里特嘅一個港口，一面向東北，一面向東南。

13 當時有輕輕嘅南風吹過嚟，所以佢哋以為可以照原定計劃抵達目的地，就起錨，沿住克里特嘅海岸航行。 14 點知，過咗冇幾耐，有股強勁嘅東北風*吹過嚟。 15 我哋架船俾強風吹襲，冇辦法逆風前行，唯有任由佢隨風漂流。 16 跟住，我哋沿住一個小島嘅背風面急行，呢個島叫卡烏達，我哋幾經辛苦先至保得住船尾嘅艇仔*。 17 大家將隻艇仔拉上嚟之後，就用繩索將船底綁緊，又因為擔心喺賽耳底*擱淺，就收起船帆，任由架船漂流。 18 但係風暴令到架船拋得好犀利，所以第二日，船上嘅人為咗減輕重量，就揼咗啲貨物。 19 去到第三日，佢哋連船上面嘅用具都揼埋。

20 連續好多日，我哋都睇唔到太陽同星星，仲不斷俾狂風吹襲，最後大家都覺得冇生還嘅希望。 21 船上嘅人已經好耐冇食嘢，於是保羅喺佢哋當中企起身，話：「各位，如果你哋聽我嘅勸告，冇喺克里特開船，就唔會損失慘重嘞。 22 不過，其實你哋唔使擔心*，因為你哋只會損失呢艘船，冇人會喪失生命。 23 我崇拜敬奉*嘅上帝，今晚派咗一個天使嚟，企喺我身邊， 24 話：『保羅，唔使驚。你一定會企喺凱撒面前。上帝會搭救你同埋所有同船嘅人。』 25 所以，各位唔使擔心*，我相信上帝同我講嘅事都一定會完全實現。 26 不過，我哋艘船將會喺某個島擱淺。」

27 到咗第十四日嘅夜晚，我哋架船喺阿德里亞海拋嚟拋去。午夜時分，啲水手覺得已經靠近陸地嘞， 28 就度吓水深，大約有36米*，船向前航行咗一陣，又再度一度，大約有27米*。 29 佢哋驚艘船會撞到岩石，就由船尾拋四個錨落海，好期待快啲天光。 30 後嚟啲水手想棄船逃走，就詐諦喺船頭放啲錨落去，其實係偷偷哋放隻艇仔落去。 31 保羅對軍官同埋士兵講：「呢啲人如果唔留喺船度，你哋就冇可能獲救嘞。」 32 於是士兵斬斷繩索，隻艇仔就跌咗落去。

33 就快天光嘅時候，保羅勸大家食啲嘢，佢話：「今日係第十四日嘞，你哋一直好心急想快啲脫險，乜嘢都冇食。 34 我勸你哋為自己著想，都係食啲嘢啦，因為你哋唔會有人失去一條頭髮。」 35 講完之後，保羅就拎起餅，喺大家面前感謝上帝，搣開啲餅開始食。 36 大家就唔再擔心，拎啲嘢嚟食嘞。 37 船上面一共有276人。 38 人人都食飽之後，就將船上面嘅小麥揼落海，減輕船嘅重量。

39 天光嘅時候，佢哋認唔出前面係乜嘢地方，淨係見到一個有沙灘嘅海灣，就決定盡量將船靠近海灘。 40 於是佢哋將船錨全部斬斷，等啲錨跌落海，同時將綁住舵槳*嘅繩索鬆開，拉起前帆，向住海灘順風航行。 41 點知佢哋撞到海裡面嘅沙洲，船就擱淺嘞，結果船頭棘住咗，郁唔到，船尾都俾海浪沖到爛晒。 42 士兵就決定要殺死啲囚犯，唔想有人乘機跳海逃走。 43 但係軍官為咗救保羅，就阻止佢哋噉做。佢吩咐嗰啲識游水嘅人跳落海，游上岸先， 44 其餘嘅人之後可以借助木板或者船身嘅殘骸上岸。就係噉，人人都安全上岸嘞。