使徒行傳
12 大約呢個時候，希律王開始迫害會眾嘅一啲人， 2 用刀劍處死咗約翰嘅兄弟雅各。 3 佢見噉樣做能夠博取猶太人嘅歡心，於是亦都去逮捕彼得，當時係無酵節。 4 希律拉咗彼得，韞佢入監，交俾四個班次嘅士兵輪流看守，每班四個人。希律打算過咗逾越節就將彼得押出嚟，當眾審問佢。 5 彼得坐緊監嘅時候，會眾嘅人都為佢向上帝懇切禱告。
6 就喺希律打算押佢出嚟嘅前一晚，彼得俾兩條鎖鏈鎖住，喺兩個士兵之間瞓覺，監獄門口都有守衛看守。 7 突然間，有道光射入佢身處嘅監倉，耶和華*嘅一個天使企咗喺嗰度。天使拍一拍彼得嘅膊頭，叫醒佢，同佢講：「快啲起身！」佢手上嘅鎖鏈就跌咗落嚟。 8 天使同佢講：「綁好腰帶，著返對鞋吖。」佢就照做。然後，天使又話：「披返件外衣，跟住我走。」 9 佢就出去，一路跟住天使行。佢唔知道天使做嘅事都係真嘅，仲以為自己見到嘅係異象。 10 佢哋過咗第一個哨站，過埋第二個，最後行到離開監獄、通往城嘅鐵門，道門就自動打開。佢哋出咗嚟之後，喺街上面行咗陣，天使就突然離開嘞。 11 呢個時候，彼得先至意識到發生咗乜嘢事，佢話：「而家我先知道，原來係耶和華*派佢嘅天使嚟救我逃出希律嘅毒手，冇俾猶太人期待嘅事發生喺我身上。」
12 佢明白發生咩事之後，就去咗約翰嘅媽媽馬利亞屋企，約翰又叫做馬可。當時佢媽媽屋企有唔少人聚集，一齊禱告。 13 彼得去到大門口敲門，有個叫羅大嘅女僕應門。 14 佢認得係彼得把聲，就興奮到唔記得咗開門，跑返去同大家講彼得企咗喺大門口。 15 大家同佢講：「你傻咗咩！」但係佢堅持話係真嘅。佢哋話：「噉嗰個一定係天使*嘞。」 16 彼得係噉敲門。佢哋開門，見係佢，就好驚訝。 17 彼得打咗個手勢，示意佢哋安靜，然後詳細話俾佢哋聽，耶和華*點樣帶佢離開監獄，又話：「你哋去將呢啲事話俾雅各同其他弟兄知吖。」之後佢就離開，去咗其他地方。
18 天光之後，啲士兵由於唔知彼得去咗邊，就方寸大亂。 19 希律四圍去搜查，但係搵唔到佢，就盤問嗰啲守衛，然後下令將佢哋拉去處罰。後嚟，希律從猶地亞落去凱撒里亞，喺嗰度住咗一段時間。
20 希律王向泰爾同西頓嘅人大發雷霆。於是嗰兩個地方嘅人一致決定去見希律，佢哋先說服王宮*總管伯拉斯都幫手，然後去向王求和。因為呢兩個地方嘅糧食供應嚟自希律轄下嘅地區。 21 喺一個特定嘅日子，希律著起王服，坐喺審判座向民眾公開演說。 22 聚集喺嗰度嘅人都大聲話：「係神嘅聲音呀，唔係人嘅聲音！」 23 希律接受咗上帝先至配受嘅讚美*，所以耶和華*嘅天使即刻打擊佢，佢俾蟲咬，最後死咗。
25 巴拿巴同掃羅喺耶路撒冷完成救濟嘅任務之後就返去嘞。佢哋仲帶埋又叫做馬可嘅約翰一齊返去。