使徒行傳

26 亞基帕同保羅講：「你可以為自己申辯嘞。」於是保羅伸出手，開始申辯：

2 「亞基帕王啊，我今日可以喺你面前，為猶太人指控我嘅事申辯，真係好榮幸， 3 特別係因為你非常熟悉猶太人嘅所有規矩同爭議。所以，求你耐心聽我講。

4 「我自細喺耶路撒冷，喺同胞當中過住點樣嘅生活， 5 識得我嘅猶太人都好清楚。只要佢哋願意作證，都可以話俾你知，我以前屬於法利賽派，即係我哋嘅宗教當中最嚴格嘅教派。 6 不過而家我就因為盼望上帝實現對我哋祖先嘅承諾，而要企喺呢度受審。 7 其實我哋12個部族日夜熱切敬奉上帝，盼望嘅就係呢個承諾能夠實現。王啊，我就係因為呢個希望而俾猶太人控告。

8 「點解你哋認為*上帝復活死人係唔可信嘅呢？ 9 我都曾經認定，一定要用各種辦法去對付嗰啲跟從拿撒勒人耶穌嘅人*， 10 我喺耶路撒冷就係噉做嘞。我得到祭司長授權之後，拉咗好多聖民去坐監。佢哋俾人處決，我亦都支持*。 11 我喺各個會堂，再三嚴懲佢哋，想迫佢哋放棄信仰。我對佢哋充滿憤恨，甚至去其他城鎮迫害佢哋。

12 「我得到祭司長授權之後，就去大馬士革執行任務。 13 王啊，我喺中午嘅時候，喺路上見到有道光，由天上照射出嚟，比陽光更加猛烈，照射喺我同埋同行嘅人身上。 14 我哋全部跌喺地下，然後我聽到有把聲用希伯來語同我講：『掃羅，掃羅，你點解迫害我呀？你不斷踢刺棒*，只會傷害自己。』 15 我話：『主啊，你係邊個？』主話：『我就係你迫害緊嘅耶穌。 16 企起身啦。我喺你面前出現，係要揀選你做我嘅僕人同見證人，為你見到嘅事同埋我將來會俾你見到嘅事作證。 17 我會搭救你免受本族人同埋外族人傷害。我派你去佢哋嗰度， 18 打開佢哋嘅眼睛，引導佢哋離開黑暗，走向光明，擺脫撒但嘅轄制，歸向上帝。噉樣，佢哋因為對我有信心，罪就會得到寬恕，亦都會同成聖*嘅人一齊得到產業。』

19 「亞基帕王啊，我見到呢個嚟自天上嘅異象，就照住做嘞。 20 我首先喺大馬士革，然後喺耶路撒冷同埋全猶地亞，最後喺列國當中向人傳揚呢個信息，勸人悔改歸向上帝，行為同悔改嘅心一致。 21 猶太人就係因為呢啲事喺聖殿捉住我，想殺死我。 22 但係我得到上帝嘅幫助，到今日仲可以繼續向所有人作見證，包括尊卑貴賤嘅人。其實我講嘅，全部都係先知同摩西嘅書預告嘅事， 23 就係基督必須受難，佢係第一個死而復生嘅，而且向本族人同埋外族人傳道，為人帶嚟光明。」

24 保羅仲申辯緊嘅時候，非斯都大聲話：「保羅，你癲咗呀！你係咪讀太多書，讀到傻咗呀？」 25 保羅話：「非斯都大人，我唔係傻嘅，我講嘅都係真話，我嘅頭腦亦都好清醒。 26 事實上，王好清楚呢啲事，所以我先至夠膽照直同王講。我深信呢啲事，王都知道，因為呢啲事都唔係暗中做嘅。 27 亞基帕王啊，你相唔相信先知嘅說話呢？我知道你係信嘅。」 28 亞基帕同保羅講：「你再講落去，睇怕好快就說服到我做基督徒嘞。」 29 保羅話：「快又好，慢又好，我向上帝求嘅，唔單止係你，仲有今日所有聽我講說話嘅人，都能夠好似我一樣成為基督徒，只不過，唔使帶住呢啲鎖鏈。」

30 於是亞基帕企起身，總督、百妮基同在座嘅人都企起身。 31 佢哋走嘅時候，喺度講：「呢個人冇做過乜嘢應該被處死或者囚禁嘅事喎！」 32 亞基帕同非斯都講：「如果呢個人唔係向凱撒上訴，本來已經可以釋放嘞。」