使徒行傳

24 五日之後，大祭司亞拿尼亞帶住幾個長老同埋一個叫帖土羅嘅雄辯家*落嚟，向總督控告保羅。 2 佢哋叫帖土羅發言，佢就開口指控保羅：

「我哋因為大人而安享太平，我哋嘅民族亦都因為大人嘅遠見而進行咗各種改革。 3 腓力斯大人，無論幾時，無論喺邊度，我哋都因為呢一切而對你感激不盡。 4 但係我唔敢阻你太耐，只係希望大人你耐心聽我哋講幾句。 5 我哋查到呢個人周圍惹是生非*，喺全天下嘅猶太人當中煽動叛亂。佢係嗰啲拿撒勒人嘅異端教派嘅一個首領。 6 佢仲企圖褻瀆聖殿，所以我哋先至拉咗佢。 7 －－－* 8 只要大人親自審問佢，就可以查出我哋對佢所作嘅指控全部都係真嘅。」

9 猶太人都附和，仲好肯定噉話呢啲事都係真嘅。 10 總督向保羅點頭，示意佢發言，佢就話：

「我清楚知道，多年嚟我哋民族嘅事務都承蒙大人審理，所以我好樂意為自己申辯。 11 大人可以親自查證，由我上耶路撒冷崇拜上帝到而家，都唔夠12日。 12 冇人見過我喺聖殿同任何人爭執，或者聚集暴民搞事。喺會堂同城入面任何地方，我都冇做過呢啲事。 13 呢啲人亦都唔能夠向你證實佢哋而家指控我嘅事。 14 不過有一點我係要向大人承認㗎，我的確遵守佢哋所講嘅『異端教派』嘅崇拜方式，敬奉我祖先嘅上帝，因為我相信法典同先知書所寫嘅一切。 15 我同呢啲人一樣，都熱切期待上帝復活正義*嘅人同唔正義嘅人。 16 所以，無論對上帝定係對人，我都力求良心清白*。 17 我離開咗耶路撒冷好多年，今次返去係為咗將救濟物資帶俾同胞同埋獻祭。 18 我辦理呢啲事期間，佢哋見到我喺聖殿嘅時候，我已經按照法典規定令自己潔淨，並冇聚集群眾鬧事。當時，在場有啲係由亞細亞行省嚟嘅猶太人， 19 如果佢哋有嘢想告我，就應該喺你面前提出指控。 20 如果唔係，就等今日在場嘅人講吓，我企喺公議會受審嘅時候犯咗乜嘢錯。 21 如果佢哋認為我有錯，可能就只係因為我曾經企喺佢哋當中大聲話：『我今日受審判係因為我相信死人會復活！』」

22 其實腓力斯好了解同主道*有關嘅事，不過佢想拖延，就話：「等呂西亞將軍落嚟，到時我先至為你哋定奪啦。」 23 佢吩咐軍官拘留保羅，不過就俾啲自由佢，仲容許保羅嘅親友嚟照顧佢。

24 過咗一段時間，腓力斯同佢太太杜西拉一齊嚟，佢太太係猶太人。腓力斯召保羅嚟，想聽佢解釋同基督耶穌有關嘅信仰。 25 保羅一講到正義、自制，仲有同將來審判有關嘅事，腓力斯就開始驚，佢話：「而家你走啦，有機會我先再叫你嚟。」 26 不過腓力斯都不斷召見保羅，同佢傾偈，因為佢希望保羅送錢俾佢。 27 過咗兩年，波求·非斯都接任腓力斯嘅職位。腓力斯想討好猶太人，就繼續拘留保羅。