使徒行傳

3 下晝3點*禱告嘅時候，彼得同約翰上聖殿。 2 有個天生跛腳嘅人，日日都有人將佢抬去叫做美門嘅殿門附近，向入去聖殿嘅人乞求施捨。 3 佢見彼得同約翰準備入聖殿，就求佢哋施捨。 4 彼得同約翰望實佢，然後彼得話：「你望住我哋吖。」 5 佢就眼都唔眨噉望住佢哋，期望佢哋施捨。 6 彼得話：「金銀我就冇嘞，不過我有嘅，我可以俾你。我奉拿撒勒人耶穌基督嘅名吩咐你，起身行啦！」 7 於是彼得捉住佢隻右手，扶佢起身，佢嘅腳同腳眼*就即刻好返嘞。 8 佢跳起身，開始行路，仲跟住彼得同約翰入聖殿，邊行邊跳，讚美上帝。 9 所有人都見到佢一路行一路讚美上帝。 10 大家認出佢係日日坐喺聖殿美門前面乞求施捨嘅嗰個人，就非常興奮，覺得發生喺佢身上嘅事不可思議。

11 嗰個人仲捉住彼得同約翰嘅手嗰陣，所有人都向佢哋跑過去，聚喺所羅門柱廊。大家都好驚訝。 12 彼得見到，就同佢哋講：「各位以色列人，點解你哋咁驚訝呢？點解要望實我哋呢？你哋以為我哋係靠自己嘅能力或者特別虔誠，所以能夠令呢個人行到路咩？ 13 亞伯拉罕、以撒、雅各嘅上帝，即係我哋祖先嘅上帝，已經令佢嘅僕人耶穌得到榮耀，你哋交咗俾彼拉多嘅就係呢個人。彼拉多本來決定釋放佢，但係你哋就當住彼拉多嘅面，拒絕承認佢。 14 你哋竟然要求釋放一個殺人犯，但係就拒絕承認呢個聖潔正義嘅人， 15 殺死呢位帶領人得到生命嘅領袖。不過上帝已經令佢死而復生，而我哋都可以為呢件事作證。 16 因為耶穌嘅名，亦都因為我哋對佢嘅名有信心，你哋見到同識得嘅呢個人就好返嘞。我哋對耶穌嘅信心，令呢個人喺你哋面前完全康復。 17 各位弟兄，我知道你哋同你哋嘅首領做嗰啲事*，係因為唔知道耶穌嘅真正身分。 18 不過就係因為噉，上帝通過啲先知預告佢委任嘅基督會受難嘅事，就實現嘞。

19 「所以，你哋要悔改，要回頭，噉你哋嘅罪就會被抹走，耶和華*會令你哋得到安舒*， 20 佢亦都會派出為你哋委任嘅基督，即係耶穌。 21 耶穌一定要喺天上等候，直到一切都復興嘅時代，即係上帝通過古代忠心嘅先知提到嘅時代。 22 其實摩西講過：『你嘅上帝耶和華*會喺你嘅弟兄當中，為你委任一位好似我噉樣嘅先知。佢同你哋講乜嘢，你哋都一定要聽從。 23 邊個唔聽從呢位先知，就要被鏟除。』 24 由先知撒母耳開始，所有先知都曾經明確提到呢段時期。 25 呢啲先知都提到上帝同你哋祖先訂立嘅誓約，你哋都會從呢個約得益*，因為上帝向亞伯拉罕承諾過：『地上嘅萬族都會因為你嘅後代*而得到福分。』 26 上帝委任佢嘅僕人耶穌之後，派佢嚟你哋呢度先，賜福俾你哋，幫助你哋每一位回頭，離棄惡行。」