使徒行傳

14 喺以哥念，保羅同巴拿巴一齊入咗猶太人嘅會堂。佢哋嘅說話好有力，令一大班猶太人同希臘人成為信徒。 2 不過，不信嘅猶太人就煽動外族人反對啲弟兄。 3 佢哋兩個喺嗰度住咗一段時間，憑住耶和華*賜嘅權力勇敢傳道。上帝亦都通過佢哋施行神跡同奇妙嘅事*，證明關於上帝分外恩典嘅信息係可信嘅。 4 城入面嘅人分成兩派，有啲支持猶太人，有啲支持使徒。 5 外族人、猶太人同佢哋嘅首領企圖羞辱保羅同巴拿巴，想攞石頭掟佢哋。 6 佢哋知道呢個消息之後，就逃走到利考尼亞，去咗路司得、特庇同嗰一帶嘅城鎮， 7 喺嗰度繼續宣揚好消息。

8 喺路司得，有個人天生跛腳，自細就行唔到路。佢坐喺度， 9 聽保羅講說話，保羅望住佢，睇出佢好有信心，可以得到醫治， 10 就大聲話：「企起身啦！」佢就跳起，開始行路。 11 啲人見到保羅做嘅事，就用利考尼亞語大聲話：「有神明降臨，化成人形嚟到我哋呢度喇！」 12 佢哋叫巴拿巴做宙斯，叫保羅做赫耳墨斯，因為帶頭講說話嘅係保羅。 13 城門口宙斯神殿嘅祭司拉住公牛，拎住花環*嚟到城門，想同大家一齊獻祭。

14 使徒巴拿巴同使徒保羅知道佢哋想做乜嘢，就撕裂衣服*，跑入去人群嗰度，大聲話： 15 「各位，點解要噉做呢？我哋都只不過係人，同你哋一樣軟弱。我哋向你哋宣揚好消息，就係希望你哋唔好再做呢啲冇價值嘅事，希望你哋崇拜真神*，就係創造天、地、海同埋其中萬物嘅上帝。 16 以往，佢雖然容許萬國各行其是， 17 但係同時做咗好多美好嘅事，為自己作證，例如從天降雨，賜下豐收嘅時節，令你哋吃喝飽足，滿心歡喜。」 18 佢哋講完呢番說話，幾經辛苦先制止到啲人向佢哋獻祭。

19 有啲由安提阿*同以哥念嚟嘅猶太人挑撥教唆民眾，佢哋就攞石頭掟保羅，以為佢死咗，就將佢拖出城外。 20 但係門徒圍住佢嘅時候，佢竟然企起身，返番入城。第二日，佢就同巴拿巴一齊離開，去咗特庇。 21 佢哋喺特庇城宣揚好消息，幫咗好多人成為門徒，然後返去路司得、以哥念、安提阿*， 22 令嗰啲地方嘅門徒更加堅強，鼓勵佢哋持守信仰，話：「我哋進入上帝嘅王國之前，一定會經歷好多患難。」 23 另外，保羅同巴拿巴仲喺各群會眾委任長老，而且喺禁食禱告之後，將呢啲長老交託俾佢哋信從嘅耶和華*。

24 之後，佢哋兩個經皮西迪亞，去到潘菲利亞， 25 喺佩爾吉傳講上帝嘅話語，然後落去亞大利， 26 由嗰度啟航返安提阿*。當初，大家就係喺安提阿祈求上帝賜分外恩典俾佢哋執行任務，而家佢哋完成咗呢個任務嘞。

27 佢哋去到嗰度，就召集會眾嘅人，話俾大家知上帝通過佢哋做嘅好多事，同埋上帝點樣向外族人打開歸信之門。 28 之後，佢哋同門徒一齊住咗好長時間。