使徒行傳

5 有個人叫亞拿尼亞，同佢太太撒非拉一齊賣咗塊地， 2 但係佢暗中扣起一啲錢，淨係將一部分交俾使徒，佢太太都知道呢件事。 3 彼得同佢講：「亞拿尼亞，你點解要俾撒但影響你？你竟然明目張膽噉欺騙上帝嘅神聖力量，暗中將賣地得嚟嘅錢扣起一部分！ 4 塊地係你嘅，就算賣咗，啲錢點用都係由你話事㗎。點解你諗埋啲咁壞嘅事呢？你噉樣做唔係欺騙人，而係欺騙上帝。」 5 亞拿尼亞一聽到呢番說話就倒地身亡。聽到呢件事嘅人都心生敬畏。 6 有幾個年輕人嚟用布包起佢，抬出去埋葬。

7 大約三個鐘之後，亞拿尼亞嘅太太入嚟，仲未知發生咗咩事。 8 彼得同佢講：「話我知，你哋兩個賣地得到嘅錢就係咁多？」佢答：「係呀，就係咁多。」 9 彼得話：「點解你哋兩個夾埋，想欺騙耶和華*嘅神聖力量呢？你睇，埋葬你老公嘅人就喺門口，佢哋都會抬你出去。」 10 就喺嗰一刻，佢喺彼得面前倒地身亡。嗰啲年輕人入嚟，見佢死咗，就將佢抬出去，埋葬喺佢老公隔籬。 11 全會眾同所有聽到呢件事嘅人，都心生敬畏。

12 使徒繼續喺民間施行好多神跡同埋奇妙嘅事*，經常喺所羅門柱廊聚集。 13 雖然其他人都唔敢同佢哋來往，但係民眾都讚賞佢哋。 14 唔單止噉，主嘅信徒不斷增加，男男女女都有好多。 15 有啲人甚至將病人帶去大街，等佢哋瞓喺床或者蓆上面，希望彼得路過嗰陣，至少佢嘅身影可以落喺一啲人身上，令佢哋好返。 16 耶路撒冷周邊城鎮嘅人，都帶住病人同埋受邪靈*騷擾嘅人蜂擁而嚟。佢哋全部都被醫好。

17 大祭司同埋佢嗰啲撒都該派嘅同夥都好嬲，非常之妒忌。 18 佢哋去逮捕使徒，將使徒韞入城裡面嘅監獄。 19 嗰晚，耶和華*嘅天使打開監獄嘅門，帶佢哋出嚟，天使話： 20 「你哋要去聖殿，繼續將關於未來生命嘅好消息話俾民眾知。」 21 佢哋聽到天使噉講，天一光就入去聖殿教導人。

嗰時，大祭司同埋嗰啲同佢一齊嘅人召集公議會，仲有以色列長老議會嘅所有成員，然後派人去監獄將使徒帶出嚟。 22 差役去到監獄，居然搵唔到佢哋，就返去報告， 23 話：「我哋見到監獄明明鎖實咗，每道門都有守衛站崗，但係我哋一開門，裡面竟然一個人都冇。」 24 守殿官同祭司長聽到差役噉講，就好困惑，唔知道跟住會有咩事發生。 25 呢個時候，有人嚟報告：「你哋韞喺監獄嘅人，喺聖殿教導緊民眾呀！」 26 於是守殿官帶住差役去捉使徒，不過冇使用暴力，因為驚民眾用石頭掟佢哋。

27 佢哋帶使徒嚟，叫佢哋企喺公議會面前。大祭司質問佢哋： 28 「我哋明明下令，唔准你哋再奉呢個人*嘅名教導人，但喺你哋就將你哋嘅道理傳遍耶路撒冷，一心想我哋承擔殺呢個人嘅血債。」 29 彼得同其他使徒回答：「我哋一定要服從上帝嘅統治，而唔係服從人。 30 我哋祖先嘅上帝已經復活咗耶穌，就係你哋喺木柱*度處死嘅嗰位。 31 上帝已經將佢提升到自己右邊，委任佢做領袖同救主，等以色列人悔改，令佢哋嘅罪得到寬恕。 32 我哋都為呢啲事作證，神聖力量都一樣。上帝已經將呢股力量賜俾所有服從佢統治嘅人嘞。」

33 佢哋聽到呢番話就惱羞成怒*，想殺咗啲使徒。 34 公議會有一個法利賽派嘅人叫迦瑪列，佢德高望重，係摩西法典嘅導師。佢企起身，吩咐人暫時將使徒帶出去， 35 然後同大家講：「各位以色列人，你哋要諗清楚應該點處置佢哋，唔好輕舉妄動。 36 以前就有噉嘅例子，有個叫杜達嘅人自吹自擂，大約有400個男人追隨佢。佢被殺之後，呢啲人就四散，銷聲匿跡。 37 杜達死咗之後，喺登記戶籍嘅日子，又有個叫猶大嘅加利利人拉攏民眾跟從佢。後嚟呢個人都死咗，追隨佢嘅人都四散。 38 所以我同你哋講，喺而家呢個情況下，唔好理呢班人，由得佢哋啦。佢哋嘅計劃同所做嘅事，如果只係出於人，就一定會失敗。 39 如果出於上帝，你哋就肯定唔能夠破壞佢哋嘅計劃。如果你哋一意孤行，可能就係同上帝對抗嘞。」 40 佢哋就接受咗佢嘅建議，叫使徒嚟，打佢哋一餐，命令佢哋唔准再奉耶穌嘅名傳道，然後就釋放佢哋。

41 使徒離開公議會，佢哋好開心，因為有榮幸為主嘅名受到羞辱。 42 佢哋每日去聖殿，又逐家逐戶、持續不懈噉教導人，宣揚關於基督耶穌嘅好消息。