使徒行傳

15 有啲人喺猶地亞落嚟，教導弟兄話：「你哋要按照摩西法典接受割禮，如果唔係，就唔可以得救。」 2 為咗呢件事，保羅、巴拿巴同佢哋激烈噉爭拗。大家就安排保羅、巴拿巴同埋另外幾個人上耶路撒冷見使徒同長老。

3 會眾送佢哋行咗一段路之後，佢哋繼續上路，去到腓尼基同撒馬利亞。佢哋向弟兄詳細講述外族人改信嘅經過，所有人聽到都好開心。 4 佢哋一到耶路撒冷，就受到會眾、使徒同埋長老嘅接待。佢哋向大家講述上帝通過佢哋做嘅所有事。 5 不過，有幾個曾經屬於法利賽派嘅信徒企起身話：「外族人一定要接受割禮，我哋要吩咐佢哋遵守摩西法典。」

6 使徒同長老都聚集埋一齊討論呢件事。 7 經過長時間激烈嘅討論*之後，彼得企起身話：「各位弟兄，你哋清楚知道，上帝一早已經喺你哋當中揀咗我，等外族人通過我聽到好消息*，成為信徒。 8 洞察人心嘅上帝將神聖力量賜咗俾佢哋，就好似賜咗俾我哋一樣，表明佢哋已經得到接納。 9 由於佢哋有信心，上帝潔淨咗佢哋嘅心，冇再區分我哋同佢哋。 10 既然係噉，點解你哋而家挑戰*上帝，係都要門徒背負連我哋祖先同自己都承擔唔到嘅重擔*呢？ 11 我哋深信，我哋同佢哋一樣，都係靠主耶穌嘅分外恩典先至能夠得救嘅。」

12 於是所有人安靜落嚟，留心聽巴拿巴同保羅講述，上帝通過佢哋喺外族人當中施行嘅好多神跡同奇妙嘅事*。 13 佢哋講完之後，雅各就話：「各位弟兄，請聽我講。 14 西門頭先詳細講過，上帝第一次眷顧外族人嘅時候，點樣從佢哋當中揀選一群子民，歸於佢名下。 15 呢件事同先知書所講嘅完全吻合，聖經話： 16 『呢啲事之後，我會返嚟，重新搭建大衛倒塌嘅帳篷*，重建廢墟，再次豎立呢個帳篷， 17 噉剩餘嘅人同所有國族當中稱為我名下嘅人，就可以一齊懇切尋求耶和華*。呢個係耶和華*講嘅。佢要成就嘅呢啲事， 18 佢好早之前就已經決定嘞。』 19 所以我認為，唔應該為難嗰啲改信上帝嘅外族人， 20 只要寫信吩咐佢哋禁戒俾偶像玷污嘅嘢，禁戒淫亂*，禁戒勒死*嘅動物，禁戒血，就可以嘞。 21 因為自古以嚟，每逢安息日都有人喺會堂朗讀摩西嘅書，每座城都有人傳講佢嘅說話。」

22 於是使徒、長老同全會眾決定喺佢哋當中揀啲人出嚟，派佢哋同保羅仲有巴拿巴一齊去安提阿。佢哋揀咗兩個喺弟兄當中帶頭嘅人，分別係西拉同埋叫做巴撒巴嘅猶大。 23 佢哋寫咗封信，請呢幾個人帶過去。封信噉樣講：

「使徒同長老，亦即係你哋嘅弟兄，寫信俾安提阿、敘利亞同埋西利西亞嘅外族弟兄：你哋好！ 24 我哋聽到呢度有人嚟講咗啲令你哋不安嘅說話，想誤導你哋，不過呢啲說話唔係我哋吩咐佢哋講嘅。 25 所以我哋一致決定，揀啲人出嚟，同我哋親愛嘅巴拿巴仲有保羅一齊去你哋嗰度。 26 巴拿巴同保羅為咗我哋主耶穌基督嘅名，連命都可以唔要。 27 我哋派去嘅猶大同西拉，都可以親口將封信講嘅呢啲事話俾你哋知。 28 我哋靠住神聖力量作出決定，唔加重你哋嘅負擔，只有幾件事係一定要禁戒嘅， 29 就係禁戒獻俾偶像嘅祭牲，禁戒血，禁戒勒死*嘅動物，禁戒淫亂*。你哋繼續遠遠避開呢啲事，就會一切順利。祝你哋身體健康！*」

30 於是呢幾個人就離開，落去安提阿，聚集大家，然後交封信俾佢哋。 31 佢哋聽到信嘅內容，大受鼓勵，非常開心。 32 猶大同西拉都係先知，佢哋講咗好多說話鼓勵弟兄，令佢哋嘅信心更加堅定。 33 佢哋兩個喺嗰度住咗一段時間，啲弟兄就送佢哋離開，祝佢哋一路平安。佢哋就返去耶路撒冷嘞。 34 －－－* 35 而保羅同巴拿巴就留喺安提阿教導人，同好多弟兄一齊宣揚耶和華*話語嘅好消息。

36 過咗一段時間，保羅同巴拿巴講：「之前我哋喺一啲城鎮傳講過耶和華*嘅話語，我哋而家要*返去，探吓啲弟兄，睇吓佢哋嘅情況。」 37 巴拿巴堅持要帶埋約翰一齊去，約翰又叫做馬可。 38 不過保羅唔同意，因為馬可之前喺潘菲利亞離開咗佢哋，冇同佢哋一齊傳道。 39 兩個人因為噉而激烈爭執，結果就分開咗。巴拿巴帶住馬可坐船去塞浦路斯。 40 保羅揀咗西拉，啲弟兄禱告祈求耶和華*賜分外恩典俾保羅，之後佢就出發嘞。 41 佢去勻敘利亞同西利西亞，鞏固各群會眾。