使徒行傳

11 猶地亞嘅使徒同弟兄都知道有外族人接受咗上帝嘅話語。 2 彼得到咗耶路撒冷，支持割禮嘅人就開始批評佢*， 3 話：「你竟然去冇接受割禮嘅人屋企，仲同佢哋一齊食飯。」 4 於是，彼得向佢哋詳細解釋事情嘅經過：

5 「我喺約帕城禱告嘅時候，見到一個異象。有一大塊好似麻布嘅嘢從天而降，塊布四隻角被吊住。 6 我仔細睇，見到裡面有地上各種四腳走獸、野獸、爬行動物，仲有天上嘅雀仔。 7 我亦都聽到有把聲同我講：『彼得，起身，劏嚟食啦！』 8 我就話：『主啊，絕對唔可以㗎，我從來都冇食過污穢不潔嘅嘢。』 9 嗰把聲再次從天上回應：『上帝視為潔淨嘅，你唔可以再視為污穢。』 10 嗰把聲第三次同我講說話，之後我見到嘅嗰啲嘢就被收返上天嘞。 11 就喺嗰個時候，有三個人企咗喺我哋住嗰間屋門口，佢哋係由凱撒里亞被派嚟搵我嘅。 12 上帝通過神聖力量吩咐我即管跟佢哋去，唔使猶疑。有六位弟兄同我一齊上路，之後我哋都入咗去哥尼流屋企。

13 「哥尼流話俾我哋聽，佢見到一個天使企喺佢屋企，同佢講：『派人去約帕，請一個叫西門嘅人嚟，佢又叫彼得， 14 佢會講啲嘢俾你知，令你同你一家可以得救。』 15 我一開始講說話，神聖力量就傾注喺佢哋身上，就好似當初傾注喺我哋身上一樣。 16 當時我諗起主唔止一次講過：『約翰為人施浸係用水，而你哋受浸，係會通過神聖力量嘅。』 17 既然上帝將同樣嘅恩賜送俾佢哋*，就好似俾我哋呢啲相信主耶穌基督嘅人噉，我係邊個？點可以阻止上帝做佢想做嘅事呢？」

18 大家聽到佢噉講，就冇再批評佢*。佢哋讚美*上帝話：「照噉睇，上帝都俾外族人有機會悔改而得到生命喎。」

19 司提反被殺之後，其他信徒都開始受到迫害*，分散到唔同地方。佢哋分散到腓尼基、塞浦路斯，同埋安提阿，淨係向猶太人傳講上帝嘅話語。 20 不過，佢哋當中有啲嚟自塞浦路斯同昔蘭尼嘅人去咗安提阿，向嗰啲講希臘語嘅人傳道，宣揚主耶穌嘅好消息。 21 耶和華*支持佢哋*，好多人都跟隨主，成為信徒。

22 耶路撒冷嘅會眾聽到佢哋嘅消息，就派巴拿巴去安提阿。 23 巴拿巴到咗之後，見到上帝所賜嘅分外恩典，就好開心，鼓勵大家要下定決心，繼續對主保持忠心。 24 巴拿巴係個良善嘅人，充滿神聖力量同信心。後嚟，有一大班人成為信徒。 25 於是巴拿巴去大數，周圍搵掃羅， 26 搵到之後，就帶佢去安提阿。佢哋有足足一年時間，都留喺嗰個會眾，教導咗好多人。就係喺安提阿，喺上帝指引下，門徒第一次被稱為基督徒。

27 喺嗰段時期，有啲先知由耶路撒冷落去安提阿， 28 其中有個叫亞迦布。佢靠住神聖力量，預告全天下將會發生嚴重嘅饑荒。呢件事果然喺克勞狄執政期間發生。 29 於是門徒決定，人人都可以按照自己嘅能力捐出救援物資*，送俾猶地亞嘅弟兄。 30 大家就噉樣做，通過巴拿巴同掃羅將物資送過去啲長老度。