使徒行傳

23 保羅望住公議會嘅人話：「各位弟兄，我喺上帝面前，一直都本住良心處事為人，無愧於心，直到今日。」 2 大祭司亞拿尼亞一聽到，就吩咐企喺側邊嘅人掌佢嘴。 3 保羅同佢講：「你呢個虛偽嘅人*，上帝要打擊你。你一邊坐喺度根據法典審判我，一邊又違反法典下令打我？」 4 企喺側邊嘅人話：「你竟然夠膽侮辱上帝委任嘅大祭司？」 5 保羅話：「各位弟兄，我唔知佢係大祭司。聖經話：『唔可以侮辱人民嘅首領。』」

6 保羅知道佢哋有啲係撒都該派嘅，有啲係法利賽派嘅，就喺公議會大聲話：「各位弟兄，我係法利賽派嘅，係法利賽派嘅子孫。我今日受審判係因為我相信死人會復活。」 7 聽到佢噉講，法利賽派同撒都該派就開始爭執，出現分歧。 8 噉係因為撒都該派一向都話冇復活，冇天使，亦都冇靈體，但係法利賽派就話三樣都有。 9 佢哋大吵大鬧，有幾個法利賽派嘅抄經士企起身，激烈爭辯，佢哋話：「我哋搵唔到呢個人做咗乜嘢錯事，話唔定有靈體或者天使同佢講咗啲咩……」 10 爭執越嚟越激烈，將軍擔心保羅會俾佢哋殺死，就派一隊士兵落去，將保羅喺人群當中救出嚟，帶去軍營。

11 當晚，主企喺保羅身邊，話：「你要鼓起勇氣！你已經喺耶路撒冷為我徹底作見證，都要喺羅馬為我作見證。」

12 天光之後，猶太人策劃陰謀，仲發毒誓*話，唔殺咗保羅先，就咩都唔食，咩都唔飲。 13 發誓同策劃呢個陰謀嘅，一共有40幾人。 14 佢哋去見祭司長同長老，話：「我哋鄭重噉發咗毒誓*，唔殺咗保羅先，就乜嘢都唔食。 15 而家你哋要同公議會一齊話俾將軍知，請佢將保羅帶嚟你哋呢度，詐諦想更加徹底噉查明佢嘅案件。我哋會準備好，喺佢嚟到之前就殺咗佢。」

16 保羅嘅外甥聽講佢哋打算埋伏，就入軍營同保羅講。 17 於是保羅叫咗一個軍官嚟，同佢講：「請你帶呢個後生仔去見將軍，佢有事稟告。」 18 軍官就帶佢去見將軍，話：「嗰個叫保羅嘅囚犯請我帶呢個後生仔嚟見你，佢有事稟告。」 19 將軍拉住佢隻手，行埋一邊，私下問佢：「你有乜嘢要同我講？」 20 佢話：「猶太人已經約定，要請你聽日帶保羅去公議會，詐諦想更加徹底噉查明佢嘅案件。 21 你千祈唔好聽佢哋講，因為有40幾個人準備好，要伏擊保羅。佢哋發咗毒誓*，唔殺咗保羅先，就咩都唔食，咩都唔飲。而家佢哋準備好晒，等你批准㗎咋。」 22 將軍吩咐佢：「唔好俾任何人知道你講咗呢啲事俾我聽。」然後，將軍就叫佢走嘞。

23 將軍召見咗兩個軍官，同佢哋講：「安排200個步兵，70個騎兵，200個長矛手，喺夜晚9點*出發去凱撒里亞。 24 另外，要為保羅準備馬匹，護送佢去總督腓力斯嗰度。」 25 將軍仲寫咗一封公函話：

26 「克勞狄·呂西亞寫信俾總督腓力斯：向大人請安！ 27 呢個人俾猶太人捉住，爭啲俾佢哋殺死。我一知道佢係羅馬公民，就即刻帶咗隊士兵趕去救佢出嚟。 28 我想知道佢哋點解指控佢，於是帶佢落去佢哋嘅公議會。 29 我查出佢俾人指控嘅，只不過係同佢哋法典有關嘅問題，根本唔係啲咩應該被處死或者囚禁嘅罪名。 30 後嚟我知道有人密謀害佢，就即刻送佢去你嗰度，又吩咐指控佢嘅人要喺你面前提出控訴。」

31 於是士兵按照吩咐接走保羅，漏夜送佢去安提帕底。 32 第二日，騎兵繼續護送保羅，其他士兵就返去軍營。 33 騎兵去到凱撒里亞，就攞封公函俾總督，將保羅交俾佢。 34 總督讀完封公函，就問保羅嚟自邊個行省，保羅話佢嚟自西利西亞。 35 總督就同佢講：「等指控你嘅人都嚟埋，我就會仔細聽你辯白。」於是佢下令將保羅拘押喺希律嘅宮殿。