馬可福音

1 關於上帝嘅仔耶穌基督嘅好消息係噉樣開始㗎： 2 以賽亞先知噉樣寫：「睇吓！我要派我嘅使者行喺你前面*，佢會為你預備道路*。 3 喺曠野有人大聲話：『要為耶和華*預備道路，要為佢開路！』」 4 所以，施浸者約翰喺曠野教導人，要通過受浸表明自己悔改，噉上帝就會寬恕佢哋嘅罪。 5 全猶地亞同埋耶路撒冷嘅人都嚟搵佢，喺約旦河接受佢施行嘅浸禮，公開承認自己嘅罪。 6 約翰著住駱駝毛造嘅衫，纜住皮帶，食嘅嘢係蝗蟲同埋野生蜂蜜。 7 佢教導人話：「喺我之後嚟嘅嗰一位，佢嘅能力比我大，我連彎腰幫佢解開鞋帶都唔配呀。 8 我用水為你哋施浸，而佢就會用神聖力量為你哋施浸。」

9 喺嗰段日子，耶穌由加利利嘅拿撒勒去到約旦河。喺嗰度，約翰為佢施浸。 10 耶穌一上返水，就見到個天打開，神聖力量好似鴿一樣降喺佢身上。 11 天上有聲音話：「你係我嘅仔，我深愛你，你已經得到我嘅認可*嘞。」

12 神聖力量即刻促使耶穌去到曠野。 13 佢喺曠野40日，嗰度有野獸出沒，當時佢受到撒但引誘，不過有天使嚟服侍佢。

14 約翰被捕之後，耶穌去咗加利利，傳講上帝嘅好消息， 15 佢話：「指定嘅時候已經到咗，上帝嘅王國就快到嘞。你哋要悔改，對好消息有信心。」

16 耶穌沿住加利利嘅海邊一路行嘅時候，見到西門同埋佢嘅兄弟安得烈喺度撒漁網落個海。佢哋係漁夫。 17 耶穌同佢哋講：「嚟跟從我啦，我會令你哋成為另一種漁夫*。不過，你哋嘅收獲唔係魚，而係人。」 18 佢哋即刻揼低漁網跟從佢。 19 耶穌行前少少，見到兩兄弟，佢哋係西庇太嘅仔雅各同埋約翰，佢哋喺船上面補緊漁網。 20 耶穌即刻邀請佢哋跟隨佢，佢哋就即刻落船，離開爸爸西庇太同埋啲工人，跟從耶穌。 21 後嚟，佢哋去咗迦百農。

到咗安息日，耶穌就即刻去會堂教導人。 22 啲人對耶穌嘅教導方式覺得好驚訝。因為佢嘅教導係嚟自上帝㗎，唔似得嗰啲抄經士。 23 就喺嗰個時候，會堂入面有一個受邪靈*操縱嘅人大叫話： 24 「拿撒勒人耶穌，你嚟呢度做咩呀？*你嚟消滅我哋呀？我好清楚你係邊個，你係上帝嘅聖者吖嘛！」 25 耶穌斥責邪靈話：「收聲，喺呢個人身上面出嚟！」 26 邪靈*就大聲尖叫，又令嗰個人猛烈抽搐，然後離開佢嘅身體。 27 大家都好驚訝，議論紛紛，佢哋話：「點會噉㗎？佢嘅教導方式真係與眾不同呀！*呢個人竟然有權驅逐邪靈*，而邪靈又服從佢喎。」 28 好快，關於耶穌嘅事傳開咗，成個加利利都知道。

29 離開會堂之後，耶穌、雅各仲有約翰就跟住西門同埋安得烈一齊去咗佢哋兩個人嘅屋企。 30 西門嘅外母當時瞓喺度，發緊燒，佢哋就即刻話俾耶穌知。 31 耶穌行埋去，捉住佢隻手，扶佢起身，佢就退咗燒，然後佢為大家準備食物。

32 到咗傍晚，日落之後，民眾開始將病人同埋受邪靈操縱嘅人，都帶去耶穌嗰度。 33 全城嘅人都聚集喺嗰間屋嘅門外。 34 耶穌醫好咗各種各樣嘅病人，又驅逐咗好多邪靈，不過佢唔俾啲邪靈講關於佢嘅嘢，因為邪靈知道佢就係基督*。

35 一朝早，天仲未光，耶穌起身，去到外面偏僻嘅地方，喺嗰度禱告。 36 西門同其他門徒四周圍去搵佢， 37 搵到耶穌之後，就同佢講：「個個都搵緊你呀。」 38 耶穌就同佢哋講：「我哋去第二度，去附近啲城鎮啦。我要去埋嗰度傳道，因為我嚟就係為咗做呢件事。」 39 佢就去勻全個加利利，喺唔同會堂傳道，又驅逐邪靈。

40 有一個痲瘋病人去到耶穌嗰度，跪低懇求佢話：「只要你願意，就可以令我好返㗎喇*。」 41 耶穌好同情佢，就伸隻手出嚟摸佢，話：「我好願意！你好返啦。」 42 佢嘅痲瘋即刻消失，完全好返。 43 嗰個人離開之前，耶穌鄭重噉吩咐佢， 44 話：「唔好話俾任何人知。不過，要去搵祭司，俾佢哋檢查吓，亦都要獻上摩西法典規定嘅祭物，證明*你已經好返。」 45 點知，佢走咗之後周圍同人講，將呢件事傳開去。結果，耶穌唯有留喺城外面偏僻嘅地方，因為佢入城嘅話會引起好多人關注。但係民眾都係繼續由唔同地方嚟到搵耶穌。

2 過咗一排，耶穌再返到去迦百農。啲人知道佢喺間屋入面，呢個消息傳開咗， 2 有好多人就嚟到聚集喺嗰度，連門外面都企滿人。耶穌向佢哋傳講上帝嘅話語。 3 有四個人抬住一個癱瘓嘅人去搵耶穌。 4 不過由於嗰度太多人，佢哋冇辦法將癱瘓嘅人抬去耶穌面前，於是拆咗耶穌上面嘅屋頂，將嗰個人連埋擔架，由個窿放落去。 5 耶穌見佢哋咁有信心，就同癱瘓嘅人講：「阿仔，你嘅罪赦免嘞。」 6 有幾個抄經士坐喺嗰度，心諗*： 7 「呢個人點可以噉樣講嘢㗎？佢喺度褻瀆上帝呀。除咗上帝，冇人可以赦罪㗎喎。」 8 耶穌即刻睇出佢哋諗*緊啲乜嘢，就話：「點解你哋內心有呢啲諗法呢？ 9 其實任何人都可以同呢個癱瘓嘅人講『你嘅罪赦免嘞』，但係有邊個可以話『起身，拎起你嘅擔架行啦』，而佢又真係行到呢？ 10 不過為咗令你哋知道，人子*喺地上有權赦罪——」耶穌同癱瘓嘅人講： 11 「起身，拎起你嘅擔架，返屋企啦。」 12 嗰個人就起身，即刻拎起擔架，喺所有人面前行出去。大家都好驚訝，讚美*上帝，話：「我哋從來冇見過噉樣嘅事呀！」

13 耶穌又去到海邊。民眾全部都去到佢嗰度，佢就教導佢哋。 14 耶穌向前行，見到亞勒腓嘅仔利未坐咗喺收稅嘅地方，就同佢講：「嚟跟隨我啦。」利未就起身，跟隨耶穌。 15 後嚟，耶穌去咗利未屋企，有好多收稅人同埋罪人同耶穌仲有佢嘅門徒一齊食飯。佢哋當中有好多人都跟隨耶穌。 16 屬於法利賽派嘅抄經士見到耶穌同罪人仲有收稅人一齊食飯，就同耶穌啲門徒講：「佢竟然同啲收稅人仲有罪人一齊食飯？」 17 耶穌聽到，就同佢哋講：「健康嘅人唔需要醫生，病咗嘅人就需要嘞。我嚟唔係叫正義嘅人悔改，而係叫罪人悔改。」

18 約翰嘅門徒同埋法利賽派都有禁食嘅習慣。有人嚟問耶穌：「約翰啲門徒仲有法利賽派嘅門徒都有禁食嘅習慣，點解你啲門徒就冇呢？」 19 耶穌就答佢哋：「新郎同啲朋友一齊嘅時候，佢啲朋友冇理由禁食吖，係咪？只要新郎仲同佢哋一齊，佢哋就唔應該禁食。 20 但係，新郎俾人帶走，離開佢哋嘅嗰段時期，一定會嚟到。到時，佢哋就會禁食嘞。 21 冇人會將新嘅布補喺舊嘅衫上面，因為新布一縮水，就會扯爛件衫，噉反而爛得更犀利。 22 亦都冇人會將新酒裝落舊皮袋裡面；因為噉會掙爆個皮袋，唔單止酒會漏出嚟，皮袋都唔用得嘞。所以，新酒係應該裝喺新皮袋入面嘅。」

23 有一次，安息日嘅時候，耶穌同啲門徒穿過麥田。門徒一路行，一路摘啲麥穗嚟食。 24 法利賽派嘅人就同佢講：「你睇！點解你啲門徒喺安息日噉樣做嘅？唔合法㗎喎！」 25 耶穌同佢哋講：「有次大衛同跟隨佢嘅人冇晒嘢食，好肚餓，當時佢點樣做，你哋冇讀過咩？ 26 根據同祭司長亞比亞他有關嘅記載，大衛入咗上帝嘅居所*，食咗呈獻嘅餅*，仲分俾佢啲手下。按照法律，呢種餅淨係得祭司可以食，其他人都唔可以食。」 27 然後，耶穌同佢哋講：「上帝設立安息日係為咗幫助人，但係佢創造人唔係為咗要人守安息日。 28 人子係安息日嘅主呀。」

3 耶穌再一次去到會堂。喺嗰度有一個人，隻手係萎縮*咗嘅。 2 法利賽派嘅人想搵耶穌嘅把柄，就一路留意住耶穌會唔會喺安息日醫好嗰個人。 3 耶穌同嗰個隻手萎縮*咗嘅人講：「起身，企喺中間。」 4 然後佢同法利賽派嘅人講：「喺安息日做啲咩事係合法㗎呢？係做好事吖，定係做壞事？係拯救生命吖？定係殺人呢？」不過佢哋冇出聲。 5 耶穌憤慨噉望住周圍嘅人，見佢哋內心麻木，就好悲傷。耶穌同嗰個人講：「伸隻手出嚟吖。」佢一伸隻手出嚟，隻手就好返嘞。 6 法利賽派嘅人離開嗰度，就即刻同希律黨徒商量點樣對付耶穌，殺死佢。

7 耶穌同門徒離開嗰度，去咗海邊。有一大班人由加利利同埋猶地亞嚟到，跟住佢。 8 仲有一大班人甚至由耶路撒冷、以土邁、約旦河對岸、泰爾同埋西頓一帶，嚟到佢嗰度，因為佢哋聽聞佢做咗好多奇妙嘅事。 9 耶穌叫門徒幫佢準備一隻細嘅船，如果啲人擁埋嚟嘅話，佢就可以上船嘞。 10 所有患咗重病嘅人都圍住佢，想摸吓佢，因為佢醫好咗好多人。 11 邪靈*每次見到佢，都喺佢面前下拜，大嗌話：「你係上帝嘅仔。」 12 不過耶穌好嚴肅噉吩咐佢哋，唔可以透露佢嘅身分。

13 耶穌上咗山，叫咗一啲門徒嚟到佢身邊。 14 佢喺當中揀*咗12個人，稱為「使徒*」，佢哋經常同耶穌一齊，耶穌會派佢哋出去傳道， 15 亦都俾力量佢哋驅逐邪靈。

16 耶穌揀選*嘅12個人有西門（耶穌俾咗另一個名佢，叫做彼得）， 17 有西庇太嘅仔雅各同埋雅各嘅兄弟約翰（耶穌俾咗另一個名佢哋，叫做博尼格，意思係「雷霆之子」）， 18 仲有安得烈、腓力、巴多羅買、馬太、多馬、亞勒腓嘅仔雅各、達太、熱心人西門， 19 同埋後嚟出賣耶穌嘅加略人猶大。

之後，耶穌入咗一間屋， 20 又有一班人聚集喺嗰度，佢同門徒就連飯都食唔到。 21 佢嘅親人聽到發生嘅事，就出嚟想捉住佢，佢哋話：「佢癲咗呀。」 22 由耶路撒冷落嚟嘅抄經士亦都話：「佢俾魔鬼*附身喇。佢係靠住邪靈嘅首領去驅逐邪靈嘅。」 23 耶穌叫啲抄經士過嚟，用比喻回應佢哋：「撒但點可能驅逐撒但呢？ 24 如果一個國家分裂內訌，就冇辦法存留； 25 如果一個家庭分裂內訌，亦都冇辦法存留。 26 如果撒但同自己對抗，分裂內訌，都一樣冇辦法存留，好快會滅亡嘞。 27 一個人想打劫一個強壯嘅人，如果唔綁起佢先，就入唔到佢屋企搶走佢啲財物嘞。 28 我好肯定噉話俾你哋知，無論人犯咗乜嘢罪，講咗乜嘢褻瀆嘅話，都可以得到寬恕； 29 不過，褻瀆神聖力量嘅，就永遠唔會得到寬恕，反而要承擔永遠嘅罪。」 30 耶穌之所以噉講，係因為佢哋話：「佢俾邪靈*附身。」

31 耶穌嘅媽媽同啲細佬嚟到，企喺出面。佢哋請人入去叫佢。 32 當時有一班人圍住耶穌坐，佢哋同佢講：「你睇！你媽媽同埋啲細佬喺出面，想搵你噃。」 33 耶穌回答佢哋：「邊個係我嘅媽媽，邊啲係我嘅兄弟呢？」 34 佢就望住坐喺佢周圍嘅人，然後話：「睇吓，佢哋就係我啲兄弟，我嘅媽媽！ 35 邊個照上帝嘅旨意去做，邊個就係我嘅兄弟姊妹、我嘅媽媽。」

4 耶穌又去到海邊教導人。有一大班人聚集到佢嗰度，佢就上船坐低，離開岸邊，而民眾就留喺岸上面。 2 耶穌用比喻教導佢哋好多真理。佢話： 3 「你哋要留心聽！有個人出去撒種， 4 撒種嘅時候，有啲種子跌咗喺路邊，有雀仔嚟到食咗。 5 有啲跌咗喺泥土唔多嘅岩石地，因為土壤唔深，種子就即刻生長， 6 但係太陽一出嚟，幼苗就曬乾咗，加上冇扎根*，就枯萎咗嘞。 7 另外有啲種子跌咗落荊棘度，荊棘一長高就阻礙幼苗生長，幼苗就結唔到果實嘞。 8 仲有啲種子撒咗喺好嘅土壤上面，生長茂盛，結出果實，有啲30倍、有啲60倍、有啲100倍。」 9 耶穌又話：「有耳仔嘅，就應該留心聽。」

10 民眾離開咗耶穌之後，有啲門徒同埋十二使徒嚟問佢比喻嘅意思。 11 耶穌同佢哋講：「上帝王國嘅神聖祕密淨係俾你哋知道，而外人聽到嘅只係啲比喻啫。 12 噉樣，雖然佢哋睇到我做啲乜嘢，但係就唔會睇得明，聽到我講啲乜嘢，但係理解唔到，佢哋唔會回頭改過，得到寬恕。」 13 耶穌又同佢哋講：「你哋唔明白呢個比喻，又點能夠明白其他比喻呢？

14 「比喻入面嗰個人撒嘅種子，係上帝嘅話語。 15 有啲種子跌咗喺路邊，就係指人一聽到話語，撒但就嚟到，將喺佢哋心入面嘅話語攞走。 16 而種子跌咗喺岩石地，就係指人一聽到上帝嘅話語就開心噉接受。 17 不過，淨係維持咗一段時間，種子冇喺佢哋心入面扎根，後嚟佢哋因為上帝嘅話語而面對患難或者迫害，就即刻放棄信仰*嘞。 18 種子跌咗喺荊棘入面，就係指人聽到上帝嘅話語， 19 但係俾而家呢個制度*嘅憂慮、財富嘅誘惑*同埋各種慾望侵害佢嘅內心，結果妨礙咗話語嘅生長，就結唔到果實嘞。 20 種子撒喺好嘅土壤上面，就係指人聽到上帝嘅話語，樂意接受，仲結出果實，有30倍嘅，有60倍嘅，有100倍嘅。」

21 耶穌同佢哋講：「冇人會攞盞燈出嚟，然後攞個籃*冚住或者放喺床下底，反而會放喺燈台上面。 22 隱藏嘅事一定會揭露出嚟，原本小心收埋嘅嘢始終都會被公開。 23 有耳仔嘅，都應該留心聽。」

24 耶穌又同佢哋講：「我同你哋講嘅嘢，你哋要留心聽。你哋用乜嘢工具量嘢俾人，人哋亦都會用乜嘢工具量俾你哋，而且會俾更多你哋。 25 因為邊個有嘅，就要俾多啲佢；邊個冇嘅，就連佢有嘅，都要攞走埋。」

26 耶穌同民眾講：「上帝嘅王國好似一個人喺田地撒種。 27 佢夜晚瞓覺，日頭起身，喺呢段時間，種子點樣發芽生長，佢完全唔知道。 28 田地生產穀物係自然而逐漸嘅，先長出幼苗，然後有麥穗生出嚟，最後麥穗上面生滿穀粒。 29 當穀物成熟，嗰個人就用鐮刀收割，因為收成嘅時候到嘞。」

30 耶穌話：「上帝嘅王國好似啲乜嘢呢？我哋可以用乜嘢比喻去說明呢？ 31 上帝嘅王國好似一粒芥菜嘅種子*，撒喺田地嗰陣係地上所有種子當中最細嘅。 32 但係到佢長大之後，就比田園入面其他植物更加大，仲生出粗壯嘅樹枝，天上嘅雀仔都可以喺佢嘅樹蔭下棲息。」

33 耶穌根據聽眾嘅理解力，講咗好多噉樣嘅比喻，向佢哋傳講上帝嘅話語。 34 佢同佢哋講嘢嘅時候，一定會用比喻，但係佢會私下向門徒解釋呢啲比喻。

35 喺嗰日嘅傍晚時分，耶穌同門徒講：「我哋過去對面岸吖。」 36 門徒等民眾離開之後，就同耶穌坐船過去*，亦都有其他船跟住佢一齊去。 37 突然間，刮起一股非常強勁嘅暴風，海浪不斷打入船裡面，隻船幾乎入滿晒水。 38 但係耶穌就喺船尾挨住個枕頭*瞓緊覺。門徒叫醒佢，同佢講：「老師，我哋就快冇命喇，你唔在乎嘅咩？」 39 耶穌就起身，斥責風，對住個海話：「唔好出聲！靜落嚟啦！」風就停咗，周圍就即刻完全平靜落嚟嘞。 40 耶穌同佢哋講：「你哋點解咁驚呀？你哋唔相信上帝會幫你哋咩？」 41 不過佢哋都係非常之恐懼，大家都話：「呢個人到底係邊個嚟㗎？連風同海都服從佢？」

5 佢哋去到海嘅另一邊，到咗格拉森人嘅地區。 2 耶穌一落船，就有個受邪靈*操縱嘅人由墓地去到佢面前。 3 呢個人住喺墓地，從來冇人可以綁實佢，連用鎖鏈都唔得。 4 有好多次，啲人用鎖鏈鎖住佢嘅手腳，但係佢就掹斷整爛呢啲鎖鏈，冇人可以制伏到佢。 5 佢日日夜夜都喺墓地同埋山野不斷嗌，仲用石頭割傷自己。 6 佢離遠見到耶穌，就跑過去向耶穌下拜， 7 然後大聲嗌：「至高上帝嘅仔耶穌，你嚟呢度做咩呀？*我要你喺上帝面前發誓，你唔會令我受苦。」 8 邪靈噉樣講，係因為耶穌之前同佢講過：「你呢個邪靈*，喺呢個人身上出嚟！」 9 耶穌問佢：「你叫做乜嘢名呀？」佢話：「我叫軍團，因為我哋數目好多。」 10 佢再三懇求耶穌唔好趕邪靈出嗰個地區。

11 當時，有一大班豬喺山上面食緊嘢。 12 啲邪靈就懇求耶穌，話：「俾我哋去啲豬嗰度啦，噉我哋就可以附喺佢哋身上。」 13 耶穌批准邪靈*噉樣做，佢哋就喺嗰個人身上出嚟，附喺豬身上。跟住，有大約2000隻豬衝落懸崖*，跌落海嗰度浸死晒。 14 放豬嘅人就全部走晒，即刻話俾城入面同埋鄉村嘅人知道，啲人就走嚟睇吓發生咗啲咩事。 15 佢哋去到耶穌嗰度，見到嗰個原本俾軍團附身嘅人。嗰個人著咗衫坐喺度，神志清醒，啲人就好驚。 16 有啲人親眼見到受邪靈操縱嘅人經歷嘅事，又見到啲豬發生咗咩事，就話俾其他人聽。 17 佢哋就懇求耶穌離開佢哋嘅地區。

18 耶穌上緊船嘅時候，嗰個曾經受邪靈操縱嘅人懇求佢，想跟佢一齊走。 19 不過，耶穌冇應承佢，反而話：「你返屋企啦，去搵你啲親戚，話俾佢哋知耶和華*為你做嘅所有嘢，同埋佢點樣憐憫你。」 20 嗰個人就離開嗰度，喺德卡波利斯*宣揚耶穌為佢做嘅所有嘢，大家都覺得好驚訝。

21 耶穌又坐船過對面岸。佢仲喺海邊嗰陣，有一大班人聚集去佢嗰度。 22 有個叫做崖魯嘅會堂主管嚟到，佢一見到耶穌，就跪喺佢面前， 23 不斷懇求佢話：「我個女病得好嚴重*。求你去將雙手放喺佢身上，噉佢就會好返，唔使死㗎喇。」 24 耶穌就同佢一齊行。有一大班人喺後面逼住耶穌，跟住佢。

25 有個女人，患咗流血病症*12年嘞。 26 佢睇過好多醫生，治療嘅時候受咗好多苦，而且使晒啲錢，病情唔單止冇好轉，仲惡化咗添。 27 佢聽到關於耶穌嘅事，就混入去人群當中，然後上前，喺後面摸一摸耶穌嘅外衣。 28 佢心裡面一路諗：「只要我摸一摸佢嘅外衣，我就會好返㗎喇。」 29 就喺嗰一刻，佢就冇再流血。佢發覺呢個令佢極度痛苦嘅病好返嘞。

30 耶穌即時察覺到有力量從佢身上面出咗嚟，就喺人群當中擰轉身問：「係邊個摸我嘅外衣呀？」 31 門徒同佢講：「你都見有咁多人逼住你㗎，你仲問邊個摸你？」 32 不過佢都係望吓周圍，想知道係邊個噉樣做。 33 嗰個女人知道發生喺自己身上嘅事，就戰戰兢兢噉上前，跪喺耶穌面前，將實情講晒俾佢知。 34 耶穌同佢講：「阿女，你嘅信心令你好返嘞。唔使擔心，你平安返去啦。呢個令你咁痛苦嘅病，已經醫好嘞！」

35 耶穌仲未講完，有啲人由會堂主管嘅屋企嚟到，話「你個女死咗嘞。何必仲要麻煩老師呢？」 36 耶穌聽到佢哋講嘅嘢，就同崖魯講：「唔使驚，繼續表現信心就得㗎喇。」 37 跟住耶穌帶彼得、雅各同埋雅各嘅兄弟約翰一齊去，冇俾其他人跟住佢。

38 佢哋去到崖魯嘅屋企，耶穌見到場面好混亂，有人喺度喊，有啲仲喊得好大聲。 39 佢入去之後同嗰啲人講：「點解你哋要喊呢？點解要吵吵鬧鬧呢？個女仔冇死到呀，只係瞓著咗啫。」 40 佢哋都嘲笑耶穌。耶穌叫嗰啲人出去之後，就帶埋個女仔嘅父母同埋門徒，入去個女仔瞓喺度嘅地方。 41 耶穌捉住個女仔隻手，同佢講：「塔利塔·庫米！」呢句說話翻譯出嚟嘅意思就係：「小妹妹，我吩咐你起身！」 42 嗰個12歲嘅女仔即刻起身行。大家一見到就好激動，開心到不得了。 43 耶穌鄭重*吩咐佢哋，唔好話俾人知呢件事，又叫人拎啲嘢俾個女仔食。

6 耶穌離開嗰度，返到家鄉，門徒都跟住佢。 2 到咗安息日，佢喺會堂入面教導人，聽到嘅人大部分都覺得好詫異，佢哋話：「呢啲嘢佢喺邊度學返嚟㗎？佢點會咁有智慧，有能力施行呢啲奇跡嘅？ 3 佢唔係嗰個木匠咩？佢係馬利亞個仔，係雅各、約瑟、猶大、西門嘅阿哥吖嘛？佢啲細妹都住喺度㗎？」因為噉佢哋唔肯相信耶穌*。 4 耶穌同佢哋講：「先知通常都受人尊重嘅，但係佢喺自己家鄉同埋親人當中，反而得唔到尊重。」 5 所以佢除咗將手放喺幾個病人身上醫好佢哋之外，就冇再喺嗰度施行奇跡嘞。 6 佢哋缺乏信心，令耶穌覺得好驚訝。後嚟，佢周遊各村，喺唔同地方教導人。

7 耶穌召集十二使徒，開始派佢哋兩個兩個噉出去傳道，又俾權力佢哋制伏邪靈*。 8 佢亦都吩咐佢哋，除咗帶手杖之外，唔好帶其他嘢上路，唔好帶食物，唔好帶糧袋，唔好帶錢*， 9 亦都唔好額外帶多件衫*，淨係著好鞋就得嘞。 10 耶穌又同佢哋講：「無論你哋去到邊度，只要有人願意接待你哋，就住喺佢屋企，直到離開嗰個城鎮啦。 11 如果嗰度嘅人唔肯接待你哋，唔聽你哋講，你哋走嘅時候，就要扽走腳上面嘅泥土，噉佢哋就知道上帝警告*過佢哋嘞。」 12 於是佢哋出去傳道，勸人悔改， 13 驅逐好多邪靈，又將油搽喺好多病人身上，醫好佢哋。

14 周圍嘅人都講起關於耶穌嘅事，希律王都聽到。有啲人話：「佢就係復活咗嘅施浸者約翰呀，所以先至施行到呢啲奇跡。」 15 又有啲人話：「佢係以利亞。」仲有啲人話：「佢係個先知，同以前嗰啲先知一樣囉。」 16 而希律聽到耶穌嘅事，就話：「俾我斬頭嘅約翰復活咗呀。」 17 原來希律娶咗佢哥哥腓力嘅太太希羅底。希律為咗令呢個女人開心，就派人逮捕約翰，綁起佢，韞佢入監， 18 因為約翰唔止一次同希律講：「你娶你哥哥嘅老婆係唔合法㗎。」 19 希羅底就對約翰懷恨在心，好想殺佢，但係又冇辦法得逞， 20 因為希律一直保護佢，佢知道約翰係個正義嘅人，崇拜上帝，所以好怕佢。其實佢鍾意聽約翰講說話，只不過每次聽到約翰嘅話，佢都覺得好難做，唔知點算好。

21 希律生日嗰一日，希羅底搵到機會嘞。希律喺夜晚設宴款待手下嘅高官、將軍同埋加利利嘅顯要人物。 22 希羅底嘅女入咗嚟跳舞，令到希律同埋啲賓客好開心。王同嗰個女仔講：「你想要啲咩，即管講吖，你求嘅我都一定會俾你。」 23 佢甚至向個女仔發誓話：「無論你求我啲乜嘢，我都會俾你，就算係我王國嘅一半，我都一定俾你。」 24 個女仔出去同佢媽媽講：「我求啲咩好呢？」佢媽媽話：「噉就要施浸者約翰個頭啦。」 25 佢就即刻入去見王，請求話：「請王而家就將施浸者約翰嘅頭放喺個盤度俾我吖。」 26 王聽到之後就好苦惱，但係由於發咗誓，又有賓客在場，就唔想拒絕佢。 27 王即刻吩咐侍衛去攞約翰嘅人頭嚟。侍衛就去監獄，斬咗約翰嘅頭， 28 然後將人頭放喺個盤度，俾個女仔，個女仔再交俾佢媽媽。 29 約翰嘅門徒知道咗，就嚟領約翰嘅遺體，安放喺墓穴入面。

30 使徒返番嚟耶穌嗰度，佢哋話俾耶穌知佢哋做過啲乜嘢，教過人啲乜嘢。 31 由於來來往往嘅人好多，佢哋連食飯都冇時間。耶穌就同佢哋講：「嚟吖，我哋去一個偏僻嘅地方休息吓。」 32 所以佢哋就上咗船，諗住去一個偏僻地方，遠離人群。 33 不過有人見到佢哋離開，結果好多人都知道咗，呢啲民眾就喺唔同嘅城出嚟，跑去耶穌同門徒要去嘅地方，仲早過佢哋到添。 34 耶穌一落船，見到一大班人，就非常憐憫佢哋，因為佢哋好似冇牧人嘅綿羊一樣。耶穌就教導佢哋好多真理。

35 時候唔早嘞，門徒嚟搵耶穌，同佢講：「而家咁晏嘞，呢度又咁偏僻， 36 不如叫佢哋走，等佢哋自己去附近嘅鄉村買嘢食啦。」 37 耶穌答門徒：「你哋攞啲嘢俾佢哋食吖。」門徒話：「你想我哋去買食物俾咁多人呀？要成200銀元*㗎喎。」 38 耶穌話：「去睇吓你哋有幾多個餅吖？」佢哋睇完之後，話：「有五個餅，另外仲有兩條魚。」 39 跟住耶穌吩咐所有人一組一組噉樣坐喺草地。 40 佢哋就分組坐低，有啲100人，有啲50人。 41 耶穌拎起五個餅、兩條魚，抬頭望天，禱完告，將餅搣開，交俾門徒，門徒再分俾大家。佢又將兩條魚分俾所有人。 42 人人都有得食，而且食飽嘞。 43 佢哋將食淨嘅餅收拾好，裝滿咗12個籃，另外仲有魚淨低添。 44 食餅嘅人，男人有5000個。

45 之後耶穌即刻叫門徒上船，經伯賽大過去對面岸，而自己就留低送民眾離開。 46 民眾走咗之後，耶穌就上山禱告。 47 到咗夜晚，門徒隻船喺海中間，而耶穌就一個人喺山上面。 48 就快天光*嘅時候，耶穌見到門徒逆風航行，撐船撐得好辛苦，佢就喺海面行過去門徒嗰度，不過睇落好似要喺門徒旁邊經過噉。 49 門徒一見到佢喺海面度行，就心諗：「係幻覺，唔係真㗎嘛！」跟住佢哋就大聲嗌。 50 因為佢哋見到耶穌，都覺得好驚。耶穌就即刻同佢哋講：「放心！*係我嚟嘅，唔使驚。」 51 於是耶穌上船同佢哋一齊，風就停咗嘞。佢哋都覺得好驚訝， 52 噉係由於佢哋仲未明白之前分餅嗰個奇跡嘅意思，佢哋嘅心仍然理解唔到發生緊嘅事。

53 佢哋去到對面岸嘅革尼撒勒，將架船停喺岸邊。 54 佢哋一落船，啲人就認出耶穌。 55 於是民眾就走去將呢個消息話俾嗰一帶嘅人聽，又有人用擔架將病人抬去耶穌嗰度。 56 無論耶穌去到村莊、城鎮，定係鄉郊地方，啲人都會將病人帶去市集廣場度，求耶穌俾啲病人摸一摸佢外衣嘅穗邊。啲病人摸完之後，全部都好返晒。

7 有啲法利賽派嘅人同埋幾個抄經士由耶路撒冷嚟到，一齊去耶穌嗰度。 2 佢哋見到耶穌有啲門徒用不潔嘅手，即係冇洗過嘅手*食嘢。 3 （原來法利賽派同埋所有猶太人都緊守前人嘅傳統，洗手要洗到手踭，先可以食嘢； 4 佢哋去完市場返嚟，唔用水潔淨自己，就唔食嘢。佢哋仲有好多其他傳統要守，例如為杯、壺、仲有銅器施行浸禮。） 5 法利賽派同埋抄經士問耶穌：「你啲門徒點解唔遵守前人嘅傳統呀，竟然用不潔嘅手食嘢？」 6 耶穌話：「虛偽嘅人啊，關於你哋，以賽亞嘅預言真係講得一啲都冇錯。聖經話：『呢個民族口口聲聲話尊敬我，但係就冇將我放喺心入面。 7 佢哋繼續崇拜我都係冇用㗎，因為佢哋將人定嘅規條當成教義去教人。』 8 你哋唔理上帝嘅誡命；但係就死守人嘅傳統。」

9 耶穌仲同佢哋講：「你哋為咗守自己嘅傳統，竟然用狡猾嘅方法去逃避，唔遵守上帝嘅誡命。 10 例如摩西話『要孝敬*父母』，又話『對父母講惡毒說話嘅，就要處死』。 11 但係你哋就話，任何人都可以同父母講，『我供養唔到你嘞，我有嘅嘢都獻咗俾上帝做「科珥班」嘞（「科珥班」即係奉獻俾上帝嘅禮物）』， 12 你哋令到人唔再為父母做啲乜嘢。 13 你哋噉樣做，等於用自己傳俾人嘅傳統，令到上帝嘅話語作廢。類似嘅事，你哋都做得多嘞。」 14 耶穌又叫民眾嚟，同佢哋講：「你哋所有人要聽我講，要明白意思。 15 玷污人嘅，唔係一個人放入口嘅嘢，而係佢心裡面出嚟嘅惡事。」 16 －－－*

17 耶穌離開人群，入咗間屋，門徒就問佢個比喻嘅意思。 18 耶穌同佢哋講：「你哋都好似佢哋噉樣唔明？你哋唔知道，擺入口嘅嘢，唔會玷污人咩？ 19 因為擺落口嘅，唔會入到心，而係落到肚，然後喺廁所排出嚟。」耶穌噉樣講，即係話所有食物都係潔淨嘅。 20 佢仲話：「玷污人嘅，係人心裡面出嚟嘅惡事。 21 因為從心裡面出嚟嘅，有各種邪惡嘅諗法，導致淫亂*、偷竊、凶殺、 22 通姦、貪婪、惡行、欺詐、無恥嘅行為*、眼紅人哋、褻瀆、高傲、無理。 23 呢一切惡事都係從心裡面出嚟，會玷污人㗎。」

24 耶穌離開嗰度，起程去到泰爾、西頓地區。佢入咗間屋，本來唔想俾人知道，不過都係俾人留意到。 25 有個女人，一聽到耶穌嘅事，就嚟跪喺佢面前，因為佢年幼嘅女俾邪靈*附身。 26 呢個女人係希臘人，喺敘利亞嘅腓尼基出世。佢不斷求耶穌將佢個女身上嘅邪靈趕出去。 27 耶穌同佢講：「要等仔女食飽先。攞仔女嘅餅比狗仔食係唔啱㗎。」 28 個女人就話：「主啊，你講得啱，不過枱底下面嘅狗仔，都會食仔女跌落嚟嘅餅碎吖！」 29 耶穌就同佢講：「因為呢一句說話，你可以返去嘞，邪靈已經喺你個女身上出嚟嘞。」 30 於是佢返屋企，見到個女瞓喺床上面，邪靈真係走咗嘞。

31 耶穌離開泰爾地區，經過西頓，途經德卡波利斯*地區，返番去加利利海一帶。 32 有人帶咗一個有言語障礙嘅聾人去見耶穌，懇求耶穌將手放喺個聾人身上。 33 耶穌將佢帶到遠離民眾嘅地方，將手指放入佢對耳，又吐口水摸一摸佢條脷， 34 跟住耶穌抬頭望天，深深嘆咗一口氣，同個聾人講：「厄法塔。」意思係「打開啦」。 35 聾人嘅耳仔就即刻聽到嘢，連言語障礙都冇埋，可以正常講嘢嘞。 36 耶穌吩咐大家唔好講俾其他人知。不過佢越吩咐佢哋，佢哋就越宣揚出去。 37 宣揚出去嘅人都非常驚訝，佢哋話：「佢做嘅所有嘢都好好呀。佢甚至令聾人聽到嘢，連啞嘅都講到嘢呀。」

8 喺嗰段日子，又有一大班人聚集去耶穌嗰度，由於佢哋冇晒嘢食，耶穌就叫門徒嚟，同佢哋講： 2 「佢哋同我一齊已經三日嘞，而家冇晒嘢食，我覺得佢哋好可憐呀。 3 如果我由得佢哋餓住個肚返屋企，佢哋會喺半路暈低，而且有啲人係喺好遠嘅地方嚟㗎。」 4 門徒同耶穌講：「呢度咁偏僻，去邊度搵咁多餅餵飽佢哋呀？」 5 耶穌問佢哋：「你哋有幾多個餅？」佢哋話：「七個。」 6 於是耶穌叫大家坐喺地下。佢拎起七個餅，感謝完上帝就搣開啲餅，交俾門徒去分俾民眾。 7 佢哋仲有幾條細嘅魚，耶穌禱完告之後，就叫門徒分埋俾大家。 8 大家都有食，而且食到飽。佢哋收拾好淨低嘅餅，裝滿咗七個籮。 9 當時大約有4000個男人在場。之後，耶穌就叫民眾離開。

10 耶穌即刻同門徒一齊上船，去咗達瑪努他地區。 11 法利賽派嘅人去到耶穌嗰度挑起爭論，佢哋想試探耶穌，就要求佢奉上帝嘅名施行一個神跡*。 12 耶穌深深悲嘆，話：「你哋呢一代人點解成日想睇神跡*呢？我好肯定噉同你哋講，唔會有神跡俾你哋呢一代人睇。」 13 耶穌就離開佢哋，又上船去到對面岸。

14 船上面除咗一個餅之外，就冇其他嘢食嘞，因為門徒唔記得咗帶餅。 15 耶穌明確噉警告佢哋，話：「你哋要小心*，要提防法利賽派嘅酵同埋希律嘅酵。」 16 佢哋就因為冇人帶餅而嘈起上嚟。 17 耶穌留意到，就同門徒講：「點解要因為冇帶餅而爭論呢？你哋仲未理解，仲唔明？你哋嘅心思仲係咁遲鈍？ 18 你哋『有眼但係睇唔到，有耳但係聽唔到』咩？你哋記唔記得， 19 我用5個餅餵飽5000人嗰次，你哋將淨低嘅餅裝滿咗幾多個籃呀？」佢哋答：「12個。」 20 「噉我用7個餅餵飽4000人嗰次，你哋將淨低嘅餅裝滿咗幾多個籮呢？」佢哋答：「7個。」 21 耶穌同佢哋講：「噉你哋仲未明？」

22 佢哋去到伯賽大。有人帶咗個盲人去見耶穌，懇求耶穌摸一摸佢，醫好佢。 23 耶穌捉住盲人嘅手，帶佢去村外面，然後吐口水喺佢對眼度，又將手放喺個盲人身上，問佢：「你睇到啲乜嘢呀？」 24 佢岳高頭望吓，然後話：「我諗我見到啲人呀，不過睇落好似啲樹喺度行嚟行去噉。」 25 耶穌又將手放喺佢對眼，佢就好返嘞。佢恢復咗視力，所有嘢都睇得好清晰。 26 耶穌叫嗰個人返屋企，不過同佢講：「唔好入返呢條村。」

27 耶穌同門徒離開嗰度，去凱撒里亞腓立比嘅村莊。喺路上，佢問門徒：「你哋聽到其他人話我係邊個？」 28 門徒就答：「有啲話你係施浸者約翰，有啲話係以利亞，仲有啲話你係其中一位先知。」 29 耶穌問佢哋：「噉你哋呢？你哋話我係邊個呀？」彼得話：「你係基督。」 30 耶穌鄭重噉吩咐佢哋，唔好話俾人聽佢係邊個。 31 另外，耶穌開始話俾門徒知，人子一定會受好多苦，而且俾長老、祭司長、抄經士鄙視，仲會俾人殺死，三日之後復活。 32 耶穌好坦白噉同佢哋講呢番說話，彼得就將佢拉埋一邊，開口勸阻耶穌。 33 耶穌擰轉身，望住啲門徒，斥責彼得話：「撒但，夠嘞，唔好再講嘞！因為你諗嘅，係人嘅諗法，唔係上帝嘅諗法。」

34 耶穌叫民眾同門徒一齊嚟，同佢哋講：「邊個想嚟跟從我，就唔好再為自己而活，要孭起自己嘅苦刑柱*，一直跟隨我。 35 邊個想救自己嘅生命，就會失去生命；邊個為咗我同埋好消息失去生命，就會得到生命。 36 老實講，一個人就算賺到呢個世界嘅所有嘢，但係因為噉而失去生命，又有乜嘢益處呢？ 37 人仲可以攞啲乜嘢嚟換取自己嘅生命呢？ 38 喺呢代又不忠*又有罪嘅人當中，邊個因為我同埋我嘅說話而覺得羞恥，噉人子帶住佢爸爸嘅榮耀，同埋聖天使嚟到嘅時候，都會以呢個人為恥。」

9 耶穌亦都同佢哋講：「我可以好肯定噉話俾你哋知，呢度在場嘅人當中，有啲仲未經歷死亡，就會見到上帝嘅王國統治*嘞。」 2 六日之後，耶穌淨係帶住彼得、雅各同約翰，一齊上咗一座好高嘅山。耶穌喺佢哋面前改變形貌， 3 佢件衫光潔雪白，閃耀發光，世上冇任何人*可以將件衫漂到咁白。 4 以利亞同摩西都喺佢哋面前出現，同耶穌傾偈。 5 彼得就同耶穌講：「老師*，我哋喺度真係好呀！等我哋搭三個帳幕，一個俾你，一個俾摩西，一個俾以利亞吖。」 6 其實彼得根本唔知道講咩先至好，因為佢哋都好驚。 7 之後有一嚿雲出現，籠罩住佢哋。有聲音喺雲入面發出，話：「呢個係我嘅仔，係我深愛㗎。你哋要聽從佢。」 8 突然之間，門徒望吓周圍，發現除咗耶穌之外，就見唔到其他人嘞。

9 佢哋落山嗰陣，耶穌鄭重吩咐佢哋，人子死而復生之前，唔好將佢哋見到嘅，話俾其他人知。 10 門徒將耶穌嘅吩咐緊記在心*，不過就喺度討論耶穌死而復生究竟係咩意思。 11 佢哋問耶穌：「點解啲抄經士話以利亞一定會早過基督嚟嘅？」 12 耶穌話：「以利亞一定會嚟先，而且會準備好一切，既然係噉，聖經又點解話，人子一定會受好多苦，俾人鄙視呢？ 13 我話俾你哋知，以利亞其實已經嚟咗，不過就好似聖經所講，啲人任意惡待佢。」

14 耶穌同三個門徒嚟到其他門徒嗰度，見到一大班人圍住佢哋，抄經士同佢哋爭論緊。 15 嗰班人一見到耶穌，就非常驚訝，跑過去同佢打招呼。 16 耶穌問：「你哋同佢哋爭論緊啲乜嘢呢？」 17 人群當中有一個人回答：「老師，我帶咗我個仔嚟見你，因為佢俾邪靈附身，邪靈令到佢啞咗呀， 18 每當邪靈襲擊佢，都會將佢撻落地，佢就係噉嘔白泡，磨牙，成身冇晒力。我試過搵你啲門徒趕邪靈出去，但係佢哋趕唔到呀。」 19 耶穌同民眾講：「呢一代冇信心嘅人啊，我仲要同你哋一齊到幾時呢？我要容忍你哋幾耐呢？帶佢嚟我呢度啦。」 20 於是佢哋帶個男仔去耶穌嗰度。邪靈一見到耶穌，就令個男仔猛烈抽搐，跌喺地碌嚟碌去，又嘔白泡。 21 耶穌問佢爸爸：「佢有呢個情況幾耐嘞？」個爸爸話：「佢自細就係噉㗎喇。 22 邪靈經常將佢掉入火，拋落水，想殺死佢。如果你做到啲乜嘢，就可憐我哋，幫吓我哋啦！」 23 耶穌同佢講：「點解你要話『如果你做到』呢？其實人有信心*嘅話，就冇嘢做唔到。」 24 個男仔嘅爸爸即刻大聲話：「我有信心㗎！求你令我有更強嘅信心吖！*」

25 耶穌見有一班人跑緊過嚟，就斥責邪靈*，同佢講：「你呢個令人又聾又啞嘅邪靈，我命令你，喺個男仔身上出嚟，唔好再入返去。」 26 邪靈就大聲叫，令到嗰個男仔持續猛烈噉抽搐先至出嚟。之後個男仔好似死咗噉，大多數人都話：「佢死咗呀！」 27 耶穌捉住佢隻手，扶佢起身，佢就企起身。 28 耶穌入屋之後，門徒私下問佢：「點解我哋趕唔走嗰個邪靈嘅？」 29 耶穌同佢哋講：「呢一類邪靈，只有靠禱告先能夠趕出去。」

30 佢哋離開嗰度，經過加利利，不過耶穌唔想俾人知道佢喺邊度。 31 因為佢想教導門徒。佢同門徒講：「人子會被出賣，落喺敵人嘅手，俾人殺死。不過，佢死咗之後三日就會復活。」 32 但係佢哋唔明白呢句話，亦都唔敢問耶穌。

33 佢哋去到迦百農，入咗一間屋，耶穌問佢哋：「你哋喺路上爭論啲乜嘢呢？」 34 佢哋都冇出聲，因為佢哋之前爭論緊邊個最大。 35 耶穌就坐低，叫十二使徒嚟，同佢哋講：「邊個想做第一，就要做所有人當中最尾嘅嗰個，要成為所有人嘅僕人。」 36 佢帶咗個小朋友嚟，叫佢企喺門徒當中，用手搭住佢膊頭，同佢哋講： 37 「邊個因為我嘅名而接待一個好似呢個小朋友噉樣嘅人，就即係接待我；邊個接待我，就唔單止係接待我，亦都係接待派我嚟嘅嗰一位。」

38 約翰同耶穌講：「老師，我哋見到有個人用你嘅名驅逐邪靈，我哋咪去阻止佢囉，因為佢都冇跟隨我哋。」 39 耶穌話：「唔好阻止佢，因為冇人會靠住我嘅名施行完奇跡，然後轉個頭又咒罵我。 40 唔反對我哋嘅，就係支持我哋嘞。 41 邊個因為你哋屬於基督就俾一杯水你哋飲，我可以好肯定噉同你哋講，佢一定會得到獎賞*。 42 呢啲卑微嘅人順從我，邊個令佢哋其中一個失足跌倒*嘅話，噉佢不如掛塊大磨石*喺自己條頸度，沉入大海好過嘞。

43 「如果你嘅一隻手令你失足跌倒，就斬佢落嚟啦！你傷殘但係得到生命，點都好過有兩隻手但係去到欣嫩谷*，去到唔會熄滅嘅火嗰度。 44 －－－* 45 如果你嘅一隻腳令你失足跌倒，就斬佢落嚟啦！你跛腳但係得到生命，點都好過有兩隻腳但係被揼去欣嫩谷嗰度。 46 －－－* 47 如果你嘅一隻眼令你失足跌倒，就揼咗佢啦！你得一隻眼但係進入上帝嘅王國，點都好過有兩隻眼但係就被揼入欣嫩谷。 48 喺嗰度蛆蟲係不死㗎，火係不滅㗎。

49 「火會降喺眾人身上，好似灑鹽一樣。 50 鹽本身係好㗎，但係如果鹽唔再鹹嘅話，點樣令佢有返鹹味呢？你哋當中要有鹽，大家和睦相處。」

10 耶穌離開嗰度，去到約旦河對岸，猶地亞嘅邊界附近。又有一班人聚集去佢嗰度，耶穌就好似之前一樣教導佢哋。 2 法利賽派嘅人嚟到想試探佢，問佢做丈夫嘅同太太離婚合唔合法。 3 耶穌答佢哋：「摩西俾你哋嘅吩咐係乜嘢呢？」 4 佢哋話：「摩西准人寫離婚文書同太太離婚㗎。」 5 耶穌同佢哋講：「摩西寫呢條誡命俾你哋，係因為你哋硬頸。 6 但係最初上帝創造嘅時候，『佢創造咗男人同女人。 7 所以人要離開父母， 8 二人合為一體』，噉夫妻就唔再係兩個人，而係一體嘞。 9 所以，上帝結合嘅*，人就唔可以分開。」 10 返番入屋之後，門徒就問耶穌呢件事。 11 耶穌同佢哋講：「邊個同太太離婚，另外娶妻，就係通姦，對太太不忠； 12 而邊個女人同丈夫離婚，另外嫁人，亦都係通姦。」

13 有人將小朋友帶去耶穌嗰度，請佢將手放喺啲小朋友身上*，不過門徒就責備嗰啲人。 14 耶穌見到，就好唔高興，同門徒講：「俾啲小朋友嚟我呢度吖，唔好阻止佢哋，因為上帝嘅王國係屬於噉樣嘅人㗎。 15 我可以好肯定噉同你哋講，邊個唔好似小朋友一樣接受上帝嘅王國，就絕對唔能夠進入呢個王國。」 16 於是耶穌攬住啲小朋友，又將手放喺佢哋身上，祝福佢哋。

17 耶穌行緊嘅時候，有個人跑過嚟，跪喺佢面前，問佢：「良善嘅老師，我要做啲乜嘢先至可以得到永遠嘅生命呢？」 18 耶穌同佢講：「你點解稱呼我做良善嘅老師呢？除咗上帝一位，冇邊個配稱為良善。 19 誡命你係知道嘅，包括唔可以殺人，唔可以通姦，唔可以偷竊，唔可以作偽證，唔可以欺詐，要孝敬*父母。」 20 佢話：「老師，所有呢啲誡命我自細就有遵守。」 21 耶穌愛佢，望住佢，同佢講：「你仲爭咗一樣。去賣晒你啲嘢，分俾窮人啦，噉你就有財寶喺天上；仲有你要做我嘅門徒。」 22 聽到耶穌噉樣講，佢好唔開心，好憂愁噉走咗，因為佢有好多財產。

23 耶穌望吓周圍啲人，然後同門徒講：「有錢人要進入上帝嘅王國，係幾咁難呀！」 24 門徒聽到耶穌噉講，覺得好驚訝。耶穌就再同佢哋講：「仔啊，一個人要進入上帝嘅王國，係幾咁難呀！ 25 駱駝穿過針眼，比有錢嘅人進入上帝嘅王國更加容易呀！」 26 佢哋就更加驚訝，同耶穌講*：「噉仲有人可以得救咩？」 27 耶穌望住佢哋話：「對人嚟講，呢個係唔可能嘅，但係上帝就唔同嘞；對上帝嚟講，乜嘢都有可能。」 28 彼得就同佢講：「我哋已經揼低晒所有嘢跟隨你嘞。」 29 耶穌話：「我可以好肯定噉話俾你哋知，任何人為咗我同好消息，揼低房屋、兄弟、姊妹、媽媽、爸爸、仔女或者田地， 30 而家都一定會得到一百倍嘅房屋、兄弟、姊妹、媽媽、仔女、田地，亦都會受迫害，喺將來嘅制度*會得到永遠嘅生命。 31 但係有好多人，而家係最先嘅，將來係最後嘅；而家係最後嘅，將來係最先嘅。」

32 喺佢哋上去耶路撒冷嘅路上。耶穌行喺前面，門徒好驚訝，而喺後面跟住嘅人都戰戰兢兢。耶穌又帶十二使徒行埋一邊，將自己一定會遭遇嘅事講俾佢哋知，佢話： 33 「而家我哋上耶路撒冷，有人會將人子交俾祭司長同抄經士。佢哋會定佢死罪，將佢交俾外族人。 34 嗰啲人會嘲笑佢，向佢吐口水，鞭打佢，殺死佢，但係三日之後佢會復活。」

35 西庇太嘅仔雅各同埋約翰嚟搵耶穌，同佢講：「老師，無論我哋求你啲咩都好，請你應承我哋吖。」 36 耶穌同佢哋講：「你哋想我為你哋做啲乜嘢？」 37 佢哋話：「喺你得到榮耀嘅時候，求你俾我哋一個坐喺你右邊，一個坐喺你左邊吖。」 38 耶穌話：「你哋根本唔知道自己求緊啲乜嘢。我飲緊嘅杯*，你哋能夠飲咩？我接受緊嘅浸禮，你哋都一樣可以接受咩？」 39 佢哋答：「我哋得呀。」耶穌就話：「我飲緊嘅杯，你哋都會飲；我接受緊嘅浸禮，你哋都會接受。 40 但係邊個坐喺我嘅右邊同左邊，唔係我可以決定㗎，而係上帝準備俾邊個就俾邊個。」

41 其餘十個人聽到呢件事，就好嬲雅各同埋約翰。 42 耶穌就叫佢哋嚟，同佢哋講：「你哋知道，喺列國當中，被視為統治者嘅人轄制百姓，大臣掌權管轄人民。 43 你哋之間千祈唔好噉樣。邊個想喺你哋當中做大嘅，就要為人服務； 44 邊個想喺你哋中間做第一，就要做大家嘅奴隸。 45 因為人子嚟到，都唔係要人為佢服務，而係嚟為人服務，而且獻出生命，作為代價救贖好多人*。」

46 之後佢哋到咗耶利哥。耶穌同門徒仲有一大班人由耶利哥出嚟嘅時候，有個盲嘅乞衣坐喺路邊，佢係提邁嘅仔巴提邁。 47 佢聽到拿撒勒人耶穌經過，就大聲嗌，話：「大衛嘅子孫耶穌，可憐吓我吖！」 48 好多人鬧佢，叫佢唔好出聲，點知佢更加大聲噉嗌：「大衛嘅子孫，可憐吓我吖！」 49 耶穌就停低，話：「叫佢過嚟吖。」啲人就去叫個盲人，同佢講：「唔使驚！*起身啦，佢叫你呀。」 50 盲人就揼低外衣，跳起身，行去耶穌嗰度。 51 耶穌問佢：「你想我為你做啲乜嘢呢？」個盲人話：「老師*，求你令我睇得返嘢吖。」 52 耶穌同佢講：「返屋企啦，你嘅信心令你好返嘞。」佢即刻睇返嘢，然後就跟住耶穌上路。

11 佢哋去咗耶路撒冷附近，嚟到橄欖山上面嘅伯法其同埋伯大尼，耶穌就派兩個門徒出去， 2 同佢哋講：「你哋去前面嗰條村啦。一入到去，就會見到一隻驢仔綁咗喺嗰度，係從來冇人騎過嘅。你哋解開佢，帶佢嚟呢度吖。 3 如果有人問你哋：『點解你哋要解開隻驢仔？』你哋就話：『主需要用佢，用完就會即刻送返嚟。』」 4 佢哋去到，真係見到路邊一間屋有隻驢仔綁咗喺門口，就解開佢。 5 有啲企喺嗰度嘅人問佢哋：「點解你哋要解開隻驢仔呀？」 6 於是門徒照耶穌講嘅噉回答，嗰啲人就俾佢哋帶走隻驢仔。

7 佢哋拉隻驢仔去耶穌嗰度，然後將外衣鋪喺驢嘅背脊上面，耶穌就坐上去。 8 好多人都將自己嘅外衣鋪喺條路嗰度，亦都有人喺路邊斬啲枝葉落嚟。 9 行喺佢前後嘅人，都不斷大聲話：「上帝啊，求你施行拯救！奉耶和華*嘅名而嚟嘅嗰位係有福嘅！ 10 我哋祖先大衛嗰個將要嚟到嘅王國係得到福分嘅！祈求高天之上嘅上帝施行拯救！」 11 耶穌到咗耶路撒冷，入去聖殿睇吓嗰度嘅所有嘢。不過時候唔早嘞，佢就同十二使徒出城，去伯大尼。

12 第二日，佢哋離開伯大尼嘅時候，耶穌覺得肚餓。 13 佢離遠見到一棵無花果樹已經出咗葉，就走埋去，睇吓棵樹有冇果實。點知行到埋去，發現除咗樹葉就乜都冇，因為嗰陣時唔係結無花果嘅季節。 14 耶穌同棵樹講：「從今以後唔會再有人食你嘅果實嘞。」門徒都聽到佢噉講。

15 佢哋嚟到耶路撒冷。耶穌入咗聖殿，將喺聖殿入面做生意嘅人同埋佢哋嘅顧客趕出去，仲推冧兌換貨幣嘅商人嗰啲枱同埋賣鴿嘅人嗰啲凳， 16 亦都唔俾人將聖殿當做捷徑帶住器具穿過去。 17 耶穌教導人，同佢哋講：「聖經上面唔係寫住，『我嘅聖殿要稱為萬國禱告嘅殿』咩？你哋竟然令佢成為強盜嘅巢穴。」 18 祭司長同埋抄經士聽到，就諗辦法要殺死耶穌。由於民眾都對耶穌嘅教導非常驚嘆，祭司長同抄經士就好怕耶穌。

19 到咗黃昏，耶穌同門徒離開嗰座城。 20 佢哋喺清晨經過嗰棵無花果樹，見到棵樹連根都枯萎埋。 21 彼得諗起之前發生過嘅事，就同耶穌講：「老師*，你睇！你咀咒嘅無花果樹枯萎咗呀。」 22 於是耶穌同佢哋講：「要對上帝有信心。 23 我可以好肯定噉同你哋講，邊個吩咐呢座山『起身，去到海嗰度』，而且心裡面唔懷疑，相信自己講嘅會實現，就一定會實現。 24 所以我話俾你哋聽，凡係你哋禱告求嘅，只要有信心，睇成係已經得到嘞，就一定會得到。 25 無論邊個做咗啲乜嘢得罪你哋，你哋企喺度禱告嘅時候，都要寬恕佢，噉你哋嘅天父都會寬恕你哋嘅過錯。」 26 －－－*

27 佢哋又返到耶路撒冷。耶穌喺聖殿行緊嘅時候，祭司長、抄經士同埋長老嚟搵佢， 28 問佢：「你憑咩權力做呢啲事呀？邊個叫你噉做㗎？」 29 耶穌同佢哋講：「噉我都問你哋一個問題吖，你哋回答我，我就話俾你哋知我憑咩權力做呢啲事啦。 30 派約翰嚟施浸嘅係天上嘅上帝吖，定係人呢？你哋答我。」 31 佢哋就討論，話：「如果我哋答『係天上嘅上帝』，佢就會話：『既然係噉，點解你哋唔相信約翰呀？』 32 但係我哋又點夠膽話『係人派佢嚟』嘅呢？」原來佢哋怕咗民眾，因為啲民眾個個都認定約翰係先知。 33 佢哋就答耶穌：「我哋唔知。」耶穌就同佢哋講：「噉我都唔話俾你哋知我憑乜嘢權力做呢啲事。」

12 耶穌用比喻同佢哋講：「有個人喺佢笪地種植葡萄，喺葡萄園四面安咗圍欄，挖咗個池用嚟榨酒，又起咗座瞭望塔。佢將葡萄園租咗俾一啲農戶之後，就出咗國嘞。 2 到咗收割葡萄嘅季節，佢派一個奴隸去農戶嗰度，收取屬於佢嘅嗰部分果實。 3 但係，佢哋竟然捉住嗰個奴隸，毆打佢，等佢空手而回。 4 主人又派另一個奴隸去佢哋嗰度。點知佢哋打傷呢個奴隸嘅頭，又羞辱佢。 5 主人再派另一個人去，佢哋就殺咗呢個人。佢再派多啲人去，不過有啲俾人打，有啲俾人殺死。 6 最後葡萄園嘅主人派佢深愛嘅仔去見啲農戶，話：『佢哋會尊重我個仔嘅。』 7 不過，班農戶商量話：『呢個就係繼承人。嚟，我哋殺咗佢，噉佢將要繼承嘅產業就屬於我哋㗎喇。』 8 佢哋就捉住主人個仔，殺咗佢，拖佢出去葡萄園外面。 9 葡萄園嘅主人會點樣做呢？佢會嚟殺咗呢啲農戶，將葡萄園交俾其他人。 10 你哋從來冇讀過聖經嘅呢段說話咩？聖經話：『建造嘅人拋棄嘅石頭，成為咗最重要嘅房角石*。 11 呢塊房角石係嚟自耶和華*㗎，對我哋嚟講真係好奇妙。』」

12 佢哋睇出呢個比喻係針對佢哋講㗎，就想拘捕耶穌。不過佢哋又好驚啲民眾，就唯有離開嘞。

13 之後，佢哋派咗一啲法利賽派嘅人同埋希律黨徒去耶穌嗰度，想喺佢嘅說話當中搵把柄。 14 嗰啲人嚟到，就同佢講：「老師，我哋知道你淨係講真話，唔會去討好人，因為你唔在乎人哋嘅身分地位*；你只係會按照真理教導人認識上帝嘅旨意。噉你話俾我哋知，納人頭稅俾凱撒，啱唔啱*呢？ 15 我哋應唔應該納呢？」耶穌睇穿佢哋嘅虛偽，就同佢哋講：「點解你哋試探我呢？拎個第納流斯*錢幣嚟睇吓。」 16 佢哋攞咗過嚟。耶穌問佢哋：「呢個係邊個嘅頭像，邊個嘅名號呀？」佢哋話：「係凱撒嘅。」 17 耶穌話：「屬於凱撒嘅要俾返凱撒，屬於上帝嘅要俾返上帝。」佢哋聽到耶穌噉講覺得好驚訝。

18 撒都該派一向都話冇復活呢回事，佢哋嚟搵耶穌，問佢： 19 「老師，摩西寫低話，如果有個人佢嘅兄弟死咗，留低老婆，但係又冇仔女，噉死者嘅兄弟就應該娶咗個遺孀，幫死咗嘅兄弟傳宗接代。 20 有個家庭曾經有七兄弟，第一個娶咗老婆，冇生到仔女就死咗嘞。 21 第二個兄弟娶咗佢嘅遺孀，同樣冇生到仔女就死咗嘞；第三個都係噉。 22 七兄弟都冇仔女。最後嗰個女人都死埋。 23 噉復活嗰陣，佢係邊個嘅老婆呀？七個都娶過佢噃。」 24 耶穌同佢哋講：「你哋錯嘞，因為你哋唔了解聖經，亦都唔了解上帝嘅力量。 25 死人復活之後，唔會嫁娶，好似天上嘅天使一樣。 26 關於死人復活嘅事，你哋冇讀過摩西嘅經卷裡面，荊棘叢嘅記載咩？上帝同摩西講，『我係亞伯拉罕嘅上帝，以撒嘅上帝，雅各嘅上帝』， 27 所以佢唔係死人嘅上帝，而係活人嘅上帝。你哋大錯特錯嘞。」

28 有一個抄經士之前已經嚟咗，聽到佢哋嘅爭論，見耶穌答得咁好，就問佢：「誡命當中邊一條係最重要*嘅呢？」 29 耶穌答佢：「最重要嘅係，『以色列啊，你要聽！耶和華*我哋嘅上帝係獨一*嘅耶和華*， 30 你要全心，全意，全力，用全部生命愛耶和華*你嘅上帝』。 31 第二條誡命係『要愛人如己』。冇其他誡命比呢兩條更重要。」 32 嗰個抄經士同佢講：「老師，你講得啱，你講嘅符合真理，『上帝係獨一㗎，除咗佢，就冇其他神㗎嘞』。 33 一個人全心，全意*，全力愛佢，又愛人如己，噉樣比任何全燒祭同埋其他祭牲更有價值。」 34 耶穌見佢答得好有智慧，就同佢講：「你離上帝嘅王國唔遠嘞。」之後就冇人再夠膽問耶穌啲乜嘢嘞。

35 耶穌繼續喺聖殿教導人，佢話：「點解抄經士話基督係大衛嘅子孫呢？ 36 大衛喺神聖力量嘅指引下話：『耶和華*同我主講：「你坐喺我嘅右邊，直到我將你嘅敵人放喺你嘅腳下。」』 37 既然大衛稱呼基督做『主』，噉點解基督又會係大衛嘅子孫呢？」

嗰一大班人都好鍾意聽耶穌講嘅嘢。 38 耶穌繼續教導佢哋話：「要小心，唔好好似啲抄經士噉，佢哋鍾意著住件長袍行嚟行去，亦都鍾意人哋喺市集廣場度，恭敬噉同佢哋打招呼， 39 又鍾意會堂入面最好嘅座位*同埋晚宴當中貴賓嘅座位。 40 佢哋侵吞寡婦嘅屋*，又為咗引人注目作長篇大論嘅禱告。呢啲人會比其他人受到更嚴厲*嘅判決。」

41 耶穌喺一個望到寶庫錢箱嘅位置坐低，觀察啲民眾將錢放入錢箱。好多有錢人放咗好多錢幣入去。 42 有個窮寡婦嚟到，將兩文小錢*放入錢箱。 43 耶穌就叫啲門徒嚟，同佢哋講：「我好肯定噉話俾你哋知，呢個窮寡婦放入錢箱嘅，比其他所有人放嘅仲多。 44 人人都係喺淨低嘅錢當中攞一啲出嚟放入去，而呢個寡婦雖然好窮，但係佢將所有錢，賴以為生嘅一切放晒入去。」

13 耶穌喺聖殿出嚟嗰陣，有個門徒同佢講：「老師，你睇吓啲建築同埋大石，幾咁壯觀呀！」 2 不過耶穌同佢講：「你見到嘅呢啲宏偉建築，上面所有石頭都會被拆晒落嚟，絕對唔會有一塊石頭留喺石頭上面。」

3 耶穌坐喺橄欖山上面，面向住聖殿，彼得、雅各、約翰、安得烈私底下嚟問佢： 4 「請話俾我哋知吖，呢啲事會幾時發生呢？呢一切去到末期嗰陣，有乜嘢徵象呀？」 5 耶穌就同佢哋講：「你哋要小心，唔好俾人誤導。 6 有好多人將會冒我嘅名嚟到，聲稱話『我就係基督』，結果好多人就被誤導嘞。 7 當你哋聽到附近有戰爭嘅聲音，遠方有戰爭嘅消息，都唔使恐慌，呢啲事一定會發生，不過末日仲未到。

8 「民族會攻打民族，國家*會攻打國家，一個接一個地方有地震，仲會有糧食短缺。呢一切只係苦難*嘅開始。

9 「你哋要小心警惕！啲人會將你哋交俾地方法庭，你哋會喺會堂俾人毆打，亦都會因為我而企喺總督同埋君王面前，結果就有機會向佢哋作見證。 10 末日嚟到之前，好消息一定會先傳遍萬國萬族。 11 啲人將你哋押去受審嘅時候，你哋唔使事先擔心應該講啲乜嘢。到時神聖力量令你哋諗到乜嘢，你哋就講乜嘢，因為講說話嘅唔係你哋，而係神聖力量。 12 兄弟會交兄弟出嚟，爸爸會交仔女出嚟，令佢哋被殺；仔女會同父母作對，害死佢哋。 13 你哋會因為我嘅名俾所有人憎恨。但係，忍耐到底嘅人一定會得救。

14 「有個可憎之物會造成荒涼，你哋一見到佢企喺唔應該企嘅地方（讀呢句話嘅人要辨明含意），喺猶地亞嘅人就應該逃走上山。 15 喺屋頂度嘅，唔好落嚟，亦都唔好返入屋攞任何嘢； 16 喺田裡面嘅，唔好返去拎外衣。 17 喺嗰段時期，懷孕嘅婦女同埋餵奶嘅媽媽有禍嘞！ 18 你哋要不斷禱告，祈求呢件事唔好喺寒冬發生。 19 因為嗰段時期會有患難，噉樣嘅患難由上帝創造萬物以嚟，直到嗰個時候，從來冇發生過，以後都唔會再發生。 20 如果唔係耶和華*縮短嗰段時期，就冇人可以得救。不過為咗佢揀選嘅嗰啲人，佢會縮短嗰段時期。

21 「到時，如果有人同你哋講『睇吓！基督喺呢度』，或者話『睇吓！基督喺嗰度』，你哋唔好信。 22 因為會有假基督同埋假先知出現，佢哋會施行神跡同埋奇異嘅事誤導人，如果可以嘅話，佢哋想將上帝揀選嘅人引入歧途。 23 所以你哋要小心！我已經預先將一切話俾你哋聽。

24 「喺嗰段時期，嗰場患難之後，太陽會變黑，月亮唔會再有光芒， 25 星辰喺天上墜落，天上嘅力量都會動搖。 26 到時，啲人會睇見人子喺雲彩當中帶住強大嘅力量同埋榮耀嚟到。 27 到時，佢會派天使從四方，由地極到天邊，將被揀選嘅人聚集起嚟。

28 「用無花果樹打個比喻吖：樹開始出嫩枝，生啲新葉出嚟，你哋就知道夏天好快到嘞。 29 同樣，當你哋見到呢一切發生，就知道人子好快到嘞。 30 我可以好肯定噉同你哋講，喺呢一代人消逝之前，呢一切一定會發生。 31 天地都會消逝，但係我嘅說話絕對唔會消逝。

32 「至於幾時係嗰個日子、嗰個時刻，邊個都唔知道，天上嘅天使唔知道，上帝嘅仔亦都唔知道，淨係得我嘅爸爸知道。 33 你哋要留心，時刻警醒，因為你哋唔知道指定嘅時候幾時嚟到。 34 情形就好似一個人離開屋企出國，佢將權力交俾奴隸管理屋企嘅事，分派工作俾每個人，又吩咐守門嘅人不斷守望。 35 所以，你哋要不斷守望，因為你哋唔知道屋企嘅主人會喺幾時嚟到，可能係黃昏，半夜，黎明之前*，或者係清晨。 36 噉佢突然嚟到嗰陣，就唔會見到你哋瞓緊覺嘞。 37 我同你哋講嘅，亦都係同所有人講㗎：就係要不斷守望。」

14 過兩日就係逾越節同埋無酵節。嗰啲祭司長同抄經士諗方法用詭計拘捕耶穌，想殺死佢。 2 不過佢哋話：「唔好喺節期落手，費事引起民眾騷亂。」

3 耶穌喺伯大尼，去咗痲瘋病人西門屋企食飯*，當時有一個女人嚟咗。佢帶住一樽馨香油，係用雪花石樽裝住嘅純正甘松油，非常貴重。佢打爛雪花石樽嘅樽口，將油倒喺耶穌嘅頭上面。 4 有幾個人就好唔高興，佢哋議論話：「點解咁嘥啲馨香油呀？ 5 原本呢樽馨香油可以賣成300幾銀元*，啲錢可以分俾窮人㗎嘛！」佢哋都因為嗰個女人而覺得好激氣*。 6 不過，耶穌話：「唔好阻止佢。何必難為佢呢？佢向我做嘅係美好嘅事呀。 7 你哋身邊幾時都有窮人，想嘅話，隨時都可以向佢哋行善，但係我就唔會一直喺你哋身邊。 8 其實佢係盡力而為，預先將馨香油倒喺我身上，為安葬我做準備。 9 我好肯定噉話俾你哋知，無論好消息傳到世界邊一個地方，都會有人提到呢個女人做嘅事嚟紀念佢。」

10 十二使徒當中嘅加略人猶大去見嗰啲祭司長，想出賣耶穌，交耶穌俾佢哋。 11 佢哋聽到就好開心，應承會俾錢佢。猶大就開始搵機會出賣耶穌。

12 無酵節嘅第一日，亦即係啲人按照慣例宰殺逾越節祭牲嘅嗰日，門徒問耶穌：「你想我哋去邊度為你準備逾越節嘅晚餐呀？」 13 於是耶穌派咗兩個門徒，同佢哋講：「你哋入咗城，會遇到一個人，拎住一個水瓶，你哋要跟住佢。 14 佢入咗邊間屋，你哋就同嗰間屋嘅主人講：『老師問：「我同門徒一齊食逾越節晚餐嘅客房喺邊度呢？」』 15 佢就會帶你哋去睇樓上一個闊落嘅房間，入面家具齊全，布置整齊。你哋就喺嗰度為我哋準備啦。」 16 門徒就出去，入咗城，發現所有嘢真係同耶穌講嘅一模一樣。佢哋就準備好逾越節嘅晚餐。

17 傍晚時分，耶穌同十二使徒一齊嚟到。 18 佢哋坐低*食飯嘅時候，耶穌話：「我好肯定噉話俾你哋知，你哋當中，同我一齊食飯嘅，有一個會出賣我。」 19 佢哋就憂愁起嚟，個個都同耶穌講：「唔係我啩？」 20 耶穌同佢哋講：「係你哋十二使徒之一，呢個人同緊我一齊將手伸入同一個碗入面。 21 正如聖經所講，人子係會離開你哋㗎，但係出賣人子嘅有禍嘞！嗰個人從來冇出世仲好。」

22 佢哋仲食緊嘢嘅時候，耶穌拎起一塊餅，禱告之後搣開，遞俾佢哋，話：「你哋拎去食啦。呢個指嘅係我嘅身體。」 23 佢拎起個杯，禱告感謝上帝之後遞俾佢哋，佢哋所有人都飲咗。 24 耶穌話：「呢個指嘅係我嘅『立約之血』，係為好多人流出嚟㗎。 25 我好肯定噉話俾你哋聽，我絕對唔會再飲葡萄酒，直到我喺上帝嘅王國入面飲新酒嘅嗰一日。」 26 最後，佢哋唱歌*讚美上帝，然後離開嗰度，去橄欖山。

27 耶穌同佢哋講：「你哋所有人都會離棄我*，因為聖經話：『我會打擊牧人，綿羊就會四散。』 28 但係我復活之後，會早過你哋去到加利利，喺嗰度等你哋。」 29 不過彼得同佢講：「就算其他人個個都離棄你*，我都唔會離棄你呀。」 30 耶穌同彼得講：「我好肯定噉話俾你知，就喺今日，呢一晚，雞叫兩次之前，你會三次唔認我。」 31 彼得好堅決噉話：「就算我一定要同你一齊死，都絕對唔會唔認你。」其他門徒全部都噉樣講。

32 佢哋嚟到一個叫客西馬尼嘅地方。耶穌同門徒講：「你哋坐喺呢度，我去禱告。」 33 佢帶埋彼得、雅各、約翰一齊去。佢非常苦惱，亦都非常難過， 34 就同佢哋講：「我嘅心非常憂愁，幾乎要死。你哋要留喺呢度，不斷守望。」 35 佢行前少少，跪喺度禱告，祈求上帝如果可以嘅話，就令佢唔使經歷嗰個艱難嘅時刻。 36 佢話：「阿爸，父親啊，對你嚟講乜嘢都可能，求你為我拎走呢個杯*。不過唔好照我嘅意思去做，照你嘅意思就得嘞。」 37 佢返到嚟，見到門徒瞓著咗，就同彼得講：「西門，你點解瞓覺呢？你連守望一個鐘都做唔到？ 38 你哋要不斷守望，不斷禱告，噉先可以避免喺引誘下屈服。人嘅心好願意做啱嘅事*，不過肉體就軟弱嘞。」 39 耶穌再一次去禱告，講咗同樣嘅說話。 40 佢第二次返嚟，見到門徒又瞓著咗，門徒攰到眼都擘唔大。佢哋都唔知道點樣回答耶穌先至好。 41 佢第三次返嚟，同佢哋講：「你哋喺呢個時候，仲喺度瞓覺，仲喺度休息！夠嘞！時候到嘞！人子會俾人出賣，落喺罪人手上。 42 起身，我哋走啦。睇吓！出賣我嘅人就快到嘞。」

43 耶穌都仲未講完，突然之間十二使徒之一嘅猶大嚟到。有班人帶住劍同埋棍跟住佢嚟，佢哋係祭司長、抄經士同埋長老派嚟㗎。 44 出賣耶穌嘅嗰個人事先同佢哋講好咗一個暗號，話：「我錫吓邊個，邊個就係你哋想捉嘅人嘞。你哋拘捕佢，押佢走啦。」 45 猶大直接行到耶穌面前，叫佢一聲「老師*」，然後溫柔噉親吻佢。 46 佢哋就捉住耶穌，拘捕咗佢。 47 有個企喺旁邊嘅人掹把劍出嚟，斬向大祭司嘅奴隸，削咗佢一隻耳仔落嚟。 48 耶穌同佢哋講：「唔通我係賊，需要你哋帶埋劍同埋棍嚟捉我咩？ 49 我日日喺聖殿入面教導人，同你哋一齊，又唔見你哋嚟拘捕我。不過，呢個係要應驗聖經嘅話。」

50 門徒全部都揼低佢逃走。 51 有個後生仔，跟喺耶穌後面，當時佢身上只係著住一件上等細麻衣。嗰啲人想捉住佢， 52 佢就揼低細麻衣，冇著衫*走咗。

53 佢哋押咗耶穌去大祭司嗰度，祭司長、長老、抄經士全部都聚集埋一齊。 54 彼得離遠跟住耶穌，一路去到大祭司嘅庭院，佢同啲僕人一齊坐喺火邊取暖。 55 呢個時候，嗰啲祭司長同埋成個公議會，都喺度搵人俾假證供嚟指控耶穌，想處死佢，但係就搵唔到。 56 其實有好多人作偽證誣告佢，不過佢哋嘅證供就各有出入。 57 另外有幾個人企出嚟，作偽證指控佢話： 58 「我哋聽佢講過：『我會拆咗呢座人手所造嘅聖殿，三日之內起過一座唔係人手造嘅殿。』」 59 不過關於呢一點，佢哋嘅證供都係有出入㗎。

60 大祭司喺大家面前企起身，問耶穌：「你冇嘢要回應咩？佢哋作證指控你嘅事，你聽唔到呀？」 61 不過耶穌都係冇出聲，一句都冇回應。大祭司又問佢：「你係咪配受稱頌嗰位嘅仔基督呀？」 62 耶穌話：「我係。你哋會見到人子坐喺大能者嘅右邊，帶住天雲嚟到。」 63 大祭司就撕裂身上嘅衫，話：「我哋仲需要證人咩？ 64 你哋都聽到佢褻瀆上帝啦。大家認為應該點呢？」佢哋全部都認為佢有罪，應該將佢處死。 65 有啲人向佢吐口水，蒙住佢塊面，用拳頭打佢，同佢講：「如果你係先知，話俾我哋知邊個打你吖！」差役帶佢走嗰陣仲摑佢塊面。

66 彼得喺下面嘅庭院嗰度，大祭司嘅一個女僕嚟到， 67 見到彼得喺度取暖，佢望實彼得，話：「你都係同嗰個拿撒勒人耶穌一齊㗎噃。」 68 但係彼得否認話：「我唔識佢㗎，都唔知道你講緊乜。」佢就行咗出外面嘅門廳*。 69 喺嗰度，個女僕見到佢，又同企喺旁邊嘅人講：「呢個人係同佢哋一齊㗎。」 70 彼得再一次否認。過咗一陣，企喺旁邊嘅人又同彼得講：「你肯定係同佢哋一齊嘅，因為你係個加利利人。」 71 彼得就開始發毒誓話：「我唔識你哋講嘅嗰個人哩。」 72 就喺嗰一刻，雞就叫第二次。彼得諗起耶穌同佢講過嘅說話：「雞叫兩次之前，你會三次唔認我。」佢就忍唔住痛哭起嚟。

15 天一光，嗰啲祭司長、長老同埋抄經士，亦即係成個公議會，就聚集埋一齊商量點樣對付耶穌。佢哋綁起耶穌，押去交俾彼拉多。 2 彼拉多問佢：「你係咪猶太人嘅王呀？」耶穌回答：「係，我係*。」 3 嗰啲祭司長向佢作出好多指控。 4 彼拉多再一次問佢：「佢哋指控你咁多嘢，你冇嘢要回應咩？」 5 耶穌冇再答佢，彼拉多就好驚訝。

6 每逢節期，彼拉多都會釋放一個囚犯，而呢個囚犯係民眾要求釋放㗎。 7 當時有個人叫做巴拉巴，同煽動叛亂嘅人韞埋一齊，呢啲人都喺叛亂期間殺過人。 8 民眾按照慣例去彼拉多嗰度，向佢提出請求。 9 彼拉多回應佢哋話：「你哋想唔想我釋放猶太人嘅王啊？」 10 其實彼拉多知道，祭司長係因為妒忌先至將耶穌交俾佢。 11 但係嗰啲祭司長煽動民眾，要彼拉多釋放巴拉巴而唔係耶穌。 12 彼拉多又再同佢哋講：「噉你哋叫做猶太人嘅王嘅嗰個人，我應該點樣處置佢呢？」 13 佢哋再次大聲嗌，話：「喺木柱度處死佢！」 14 彼拉多再問佢哋：「點解呀？佢做咗啲咩壞事呢？」不過民眾嗌得更加大聲，佢哋話：「喺木柱度處死佢！」 15 彼拉多想討好民眾，就釋放巴拉巴俾佢哋，又叫人鞭打耶穌，再將佢交俾士兵喺木柱度處決佢。

16 士兵將耶穌帶入去總督府嘅庭院，又召集全體士兵。 17 佢哋披咗件紫色嘅袍喺耶穌身上，用荊棘整咗個王冠俾佢戴， 18 又好大聲噉同佢講：「猶太人嘅王啊，萬歲！*」 19 佢哋仲用蘆葦打佢嘅頭，向佢吐口水，又跪低向佢下拜。 20 士兵嘲笑完佢，就同佢除低嗰件紫色嘅袍，著返原本嘅外衣，押佢去釘喺木柱度。 21 有個昔蘭尼人叫做西門，佢係亞歷山大同埋魯孚嘅爸爸。佢咁啱喺城外嚟到，經過嗰度，士兵就迫佢服役，要佢孭起耶穌嘅苦刑柱。

22 佢哋帶耶穌去一個地方，叫做各各他，翻譯出嚟嘅意思係「骷髏頭」。 23 佢哋將溝咗沒藥嘅酒*遞俾耶穌，不過耶穌唔肯飲。 24 佢哋將佢釘喺木柱，仲抽籤分佢嘅外衣，睇吓各自得到乜嘢。 25 上晝9點*，佢哋將耶穌釘喺木柱， 26 又喺上面寫明佢嘅罪狀係：「猶太人嘅王。」 27 喺佢側邊木柱上面有兩個強盜，一個喺佢右邊，一個喺佢左邊。 28 －－－* 29 路過嘅人就擰擰頭，羞辱佢，話：「哼！你話要拆咗聖殿，三日之內再起返吖嘛， 30 噉你救吓自己，喺苦刑柱度落嚟啦！」 31 嗰啲祭司長同埋抄經士都係噉樣嘲笑佢，話：「佢救到人哋，但係救唔到自己喎！ 32 等以色列嘅王基督而家喺苦刑柱度落嚟，我哋見到咪信佢囉！」就連喺耶穌兩邊木柱上面嘅人都侮辱佢。

33 中午12點*，黑暗籠罩成個地區，直到下晝3點*。 34 下晝3點嘅時候，耶穌大聲噉話：「以利，以利，拉馬·薩巴克塔尼？」翻譯出嚟，意思就係：「我嘅上帝，我嘅上帝，你點解離棄我？」 35 有啲企喺附近嘅人聽到，就話：「聽唔聽到呀，佢嗌緊以利亞！」 36 有個人跑去攞海綿浸喺啲酸酒度，再綁喺蘆葦稈上面，遞俾耶穌飲，佢話：「我哋等吓！睇睇以利亞會唔會嚟救佢囉。」 37 耶穌大聲呼喊，跟住就斷咗氣。 38 聖殿嘅帷幔*由上而下裂開兩邊。 39 有個軍官企喺度面向住耶穌，見到佢斷氣嗰陣嘅情形，就話：「呢個人真係上帝嘅仔。」

40 嗰度仲有啲婦女離遠睇住呢啲事發生，當中有末大拉人馬利亞，同埋另一個馬利亞，佢係較年輕嘅雅各同埋約西嘅媽媽，仲有撒羅米。 41 耶穌喺加利利嘅時候，佢哋一直跟隨耶穌，服侍佢。另外仲有好多同耶穌一齊上去耶路撒冷嘅婦女在場。

42 由於當日係預備日，即係安息日嘅前一日，到咗傍晚， 43 亞利馬太嘅約瑟鼓起勇氣去見彼拉多，請求領取耶穌嘅遺體。佢係公議會嘅成員，好有名望，一直等待上帝嘅王國。 44 彼拉多想知道耶穌係咪真係死咗，就召見軍官，問佢耶穌係咪已經死咗。 45 彼拉多向軍官查證之後，就將屍體俾咗約瑟。 46 約瑟買咗上等細麻布，將耶穌嘅屍體攞落嚟之後，就用上等細麻布包好，安放喺一個由岩石鑿出嚟嘅墓穴，然後將一塊石頭移過嚟，封住墓穴嘅門口。 47 末大拉人馬利亞同埋約西嘅媽媽馬利亞都一直望住安放耶穌遺體嘅地方。

16 安息日一過，末大拉人馬利亞、雅各嘅媽媽馬利亞同埋撒羅米，就買咗香料，用嚟搽喺耶穌嘅遺體。 2 跟住嗰個星期嘅第一日，一朝早，太陽一出嚟，佢哋就去到墓穴。 3 佢哋互相話：「邊個可以幫我哋移開墓穴門口嘅石頭呀？」 4 但係佢哋岳高頭一望，發現嗰塊巨大嘅石頭已經移開咗。 5 佢哋行入墓穴，見到有個著住白袍嘅年輕人坐喺右邊，就好驚訝。 6 年輕人同佢哋講：「唔使驚訝。我知道你哋想搵喺木柱上被處死嘅拿撒勒人耶穌，佢已經復活咗，唔喺呢度。睇吓，呢個就係佢哋安放佢嘅地方嘞。 7 你哋去同佢嘅門徒同埋彼得講：『佢會早過你哋去到加利利。你哋會喺嗰度見到佢，就好似佢之前同你哋講嘅噉。』」 8 啲婦女好激動，成身震晒，一出咗墓穴就走咗去，咩都冇同任何人講，因為佢哋真係好驚*。