王國嘅應許——更新一切

你將一個香甜可口嘅蘋果從樹上摘落嚟。你聞吓呢個蘋果嘅香味，然後將佢放落一個裝滿蘋果嘅籃入面。你已經工作咗幾個鐘頭嘞，不過，你一啲都唔覺得攰，就算再做多啲都冇問題。你媽媽就喺蘋果樹旁邊，佢一邊開心噉工作，一邊同嗰啲幫手摘蘋果嘅親友交談。佢睇嚟好年輕，就同你童年記憶當中嘅媽媽一樣。你難以相信自己曾經睇住佢衰老，因為嗰個唔完美嘅世界已經永遠消逝嘞。以前，你親眼睇住媽媽因為患病而逐漸衰弱，直到佢停止呼吸嗰一刻，你都一直握住佢嘅手。之後，你喺媽媽嘅墓前，流下傷心嘅淚水。但係，佢而家就喺你面前，同好多人一樣再次得到生命，恢復完美嘅身心！

我哋清楚知道，噉樣嘅日子一定會來臨，因為上帝嘅應許永不落空。呢一篇我哋會睇吓，喺不久嘅將來，王國嘅應許喺哈米吉多頓大戰之前會點樣一一實現。我哋都會睇吓，哈米吉多頓大戰之後，有乜嘢振奮人心嘅王國應許將會實現。將來，我哋會親眼目睹上帝王國嘅統治遍及全球，更新一切。到時，我哋會幾咁開心啊！