1,2．（甲）弟兄姊妹喺反應冷淡嘅地區堅持傳道，我哋從中點樣得到鼓勵？（請睇吓課文開頭嘅圖片）（乙）關於喺自己“本鄉”傳道，耶穌點樣講？（請參考腳注）

塞爾吉奧同奧琳達係美國一對八十幾歲嘅先驅夫婦。佢哋最近由於腳痛而行動不便，不過每日朝早依然會準時七點行到鎮上一個繁忙嘅廣場，幾十年如一日。佢哋喺巴士站附近一個固定嘅地方向路過嘅人介紹聖經出版物。就算好多人唔理會佢哋，佢哋仲係緊守崗位，並向經過嘅人微笑。中午時分，佢哋就慢慢行翻屋企。第二日朝早，佢哋又同樣七點到達呢個廣場。呢對忠貞嘅夫婦每個星期有6個朝早都會喺呢個廣場努力傳講王國信息，一年四季都冇中斷過。

² 世界各地有好多忠貞嘅弟兄姊妹都好似塞爾吉奧同奧琳達噉，即使自己本地嘅傳道地區反應冷淡，佢哋幾十年來都堅持傳道。如果你都有同樣嘅情況，我哋真係好想衷心稱讚你，因為你保持忍耐。a你堅定不移噉事奉耶和華，可以鼓勵到好多人，包括經驗豐富嘅信徒同工。請留意以下一啲分區監督所講嘅話。“每次同呢啲忠貞嘅弟兄姊妹一齊傳道，佢哋嘅榜樣使我更加熱心。”“佢哋嘅忠貞使我更有勇氣，堅持不懈噉做傳道工作。”“佢哋嘅榜樣深深打動我嘅心。”

3．呢篇課文會討論邊三個問題？點解？

³ 呢篇課文會討論三個問題：點解我哋有時可能會感到灰心？我哋點樣先可以結出果實？乜嘢會幫助我哋懷住忍耐結出果實？呢啲問題嘅答案可以加强我哋嘅信心，推動我哋繼續努力執行耶穌交託嘅傳道工作。

點解我哋可能會感到灰心？

4．（甲）保羅對猶太人嘅惡劣反應有乜嘢感覺？（乙）點解保羅有呢種感覺？

⁴ 如果你因為傳道地區反應冷淡而感到灰心，可能你就會更加明白使徒保羅嘅感受。喺大約30年嘅傳道生涯中，保羅幫助過好多人成為基督嘅門徒。（使徒行傳14:21；哥林多後書3:2,3）不過，有好多猶太人拒絶接受真理，有啲人甚至迫害佢。（使徒行傳14:19；17:1,4,5,13）保羅對呢啲惡劣反應有乜嘢感覺？佢坦率噉話：“我喺基督面前講嘅係真話，……我心裏真係大大憂愁，痛苦不絶”。（羅馬書9:1-3）點解保羅有噉樣嘅感覺？佢全心投入傳道工作，深切關注猶太人，向佢哋傳道。所以，保羅見到猶太人拒絶接受上帝嘅慈悲而感到痛心。

5．（甲）乜嘢推使我哋向周圍嘅人傳道？（乙）點解有時我哋感到灰心一啲都唔出奇？

⁵ 同保羅一樣，我哋向人傳道係因為我哋關心人，好想幫助人。（馬太福音22:39；哥林多前書11:1）我哋親身體驗到，事奉耶和華係最好嘅生活方式。我哋好想幫助其他人睇出，佢哋其實可以過更美好嘅生活。所以，我哋不斷鼓勵人學習耶和華嘅真理同旨意，噉樣做就好似同對方講：“我哋好想送一份寶貴嘅禮物俾你，請你接受。”如果對方拒絶呢份禮物，我哋一定會覺得好傷心。有呢種感覺唔係因為缺乏信心，而係表明我哋全心投入傳道工作。所以，就算有時感到灰心，我哋都會保持忍耐。伊琳娜做咗先驅超過25年，佢話：“做傳道工作的確唔容易，不過冇其他工作更值得我去做。”

我哋可以點樣結出果實？

6．我哋會討論乜嘢問題？

⁶ 點解可以肯定，無論我哋喺邊度都可以結出果實？為咗回答呢個重要問題，等我哋嚟分析吓耶穌喺談及“結出果實”時所講嘅兩個比喻。（馬太福音13:23）第一個比喻同葡萄樹有關。

7．（甲）“培植嘅人”、“葡萄樹”同“枝子”分别指邊個？（乙）我哋需要揾出乜嘢問題嘅答案？

⁷ 請讀約翰福音15:1-5,8。請留意，耶穌對使徒講：“你哋不斷多結果實，表明自己係我嘅門徒，我嘅父親就因此得榮耀嘞。”耶穌將耶和華比喻為“培植嘅人”，將自己比喻為“真葡萄樹”，又將佢嘅門徒比喻為“枝子”。b噉跟從基督嘅人需要結出乜嘢果實？喺呢個比喻當中，耶穌冇直接講出係乜嘢果實，但係佢提供咗一個細節幫助我哋揾出答案。

8．（甲）點解比喻所講嘅結出果實唔係指幫助人成為基督徒？（乙）點解話耶和華係仁愛嘅上帝？

⁸ 耶穌提到，“凡唔結果實嘅”枝子都會被天父剪除。換句話嚟講，我哋只有結出果實先會被耶和華視為忠僕。（馬太福音13:23；21:43）喺呢個比喻當中，結出果實唔可能係指幫助人成為門徒。（馬太福音28:19）否則，因為地區反應冷淡而冇幫到任何人成為基督徒嘅忠心弟兄姊妹，就係比喻當中冇出産嘅枝子嘞。噉樣當然唔合理！我哋唔能够强迫人成為基督徒。耶和華係仁愛嘅上帝，佢永遠都唔會叫我哋做一啲超出我哋能力範圍嘅事。佢吩咐我哋做嘅，都係我哋力所能及嘅。（申命記30:11-14）

9．（甲）我哋執行乜嘢工作就係結出果實？（乙）同結出果實有關嘅另一個比喻係乜嘢？

⁹ “結出果實”係乜嘢意思？果實指嘅顯然係我哋每個人都能做得到嘅事。耶和華吩咐佢所有嘅忠僕要執行乜嘢工作？就係傳講王國嘅好消息。c（馬太福音24:14）耶穌嘅另一個比喻可以證實呢一點。接住落嚟，我哋會討論撒種人嘅比喻。

10．（甲）種子同土壤分别指乜嘢？（乙）小麥會結出乜嘢？

¹⁰ 請讀路加福音8:5-8,11-15。喺撒種人嘅比喻當中，耶穌話種子就係“上帝嘅話語”，指嘅係王國信息。土壤代表一個人嘅内心情況。落喺好泥土上嘅種子生根發芽，茁壯成長，跟住就“結出百倍嘅果實”。如果呢棵係小麥，噉結出嘅果實係乜嘢？係咪好多細細棵嘅小麥？當然唔係。呢棵小麥只會結出新嘅種子，假以時日種子再成長為小麥。從比喻睇出，一粒種子可以結出一百粒種子。呢個同我哋嘅傳道工作有乜嘢關係？

11．（甲）撒種人嘅比喻同我哋傳道工作有乜嘢關係？（乙）我哋點樣結出新嘅王國種子？

¹¹ 多年前，我哋通過一啲見證人或者我哋嘅基督徒父母聽到上帝王國嘅信息。呢個就好比，佢哋將一粒王國種子撒喺我哋心上。佢哋好開心見到我哋接受王國信息，正如比喻中嘅種子撒喺好嘅泥土上。結果，王國信息好似種子噉生根發芽，茁壯成長，最終結出果實。小麥結出嘅係種子而唔係整棵小麥，所以我哋結出果實指嘅就係向人傳講王國信息，而唔係幫助咗幾多人成為基督徒。d我哋點樣結出新嘅王國種子？向人傳講王國信息，將我哋内心嘅種子撒播出去。（路加福音6:45；8:1）我哋不斷宣揚王國信息，就係“懷住忍耐結出果實”。

12．（甲）我哋通過葡萄樹同撒種人嘅比喻學到乜嘢？（乙）呢啲比喻點樣使你得到鼓勵？

¹² 我哋通過葡萄樹同撒種人呢兩個比喻學到乜嘢？我哋係咪能够結出果實，唔係取決於地區嘅人對好消息嘅反應，而係取決於我哋自己嘅信心。保羅都有同樣嘅睇法，佢話：“各人必照自己嘅勞苦得自己嘅獎賞。”（哥林多前書3:8）耶和華獎賞我哋所根據嘅唔係我哋嘅工作成績，而係我哋為工作付出嘅努力。做咗20年先驅嘅瑪蒂爾達話：“知道耶和華會按照我嘅努力嚟獎賞我，真係令我感到喜樂。”

我哋可以點樣懷住忍耐結出果實？

13,14．根據羅馬書10:1,2，點解保羅冇放棄向反應冷淡嘅人傳道？

¹³ 乜嘢可以幫助我哋懷住忍耐結出果實？請睇翻保羅嘅例子。因為猶太人對王國嘅信息反應冷淡，所以保羅曾經都有灰心嘅感覺。雖然係噉，保羅始終冇放棄向佢哋傳道。請留意，喺寫俾羅馬基督徒嘅信入面，保羅對嗰啲唔接受真理嘅猶太人有乜嘢感覺。佢話：“我心裏祝願嘅，向上帝懇切祈求嘅，就係要以色列人得救。我可以為佢哋作證，佢哋對上帝有熱心，不過唔係按照確切嘅知識。”（羅馬書10:1,2）保羅因為乜嘢原因而堅持傳道？

¹⁴ 第一，保羅受到“［佢］心裏祝願嘅”所推動。佢熱切希望猶太人可以得救。（羅馬書11:13,14）第二，保羅“［為佢哋］向上帝懇切祈求”。佢懇求上帝幫助每個以色列人接受王國嘅信息。第三，保羅知道“佢哋對上帝有熱心”。佢睇到佢哋善良嘅一面，將來佢哋可能會事奉耶和華。保羅知道，熱心嘅猶太人如果得到正確嘅引導，就可以成為熱心嘅基督徒，好似佢自己噉。

15．我哋可以點樣效法保羅？請舉例。

¹⁵ 我哋可以點樣效法保羅？第一，要繼續懷住真誠嘅態度努力尋找“秉性適宜得永生嘅人”。第二，禱告懇求耶和華打開尋求真理嘅人嘅心。（使徒行傳13:48；16:14）西爾婭娜做咗先驅差唔多30年，佢話：“我傳道之前都會向耶和華禱告，求佢幫助我對住户懷有積極嘅態度。”我哋都可以懇求耶和華差派天使指引我哋揾出嗰啲誠心正意嘅人。（馬太福音10:11-13；啟示錄14:6）做咗先驅超過30年嘅羅伯特話：“天使清楚知道住户嘅情況，同天使一齊工作真係令人興奮。”第三，要留意傳道對象嘅優點。卡爾係一位受咗浸超過50年嘅長老，佢話：“我可以從一啲迹象睇出對方係真誠嘅，例如佢面帶微笑，外表和藹可親，或者提出問題嘅時候態度誠懇。”冇錯，我哋都可以好似保羅噉懷住忍耐結出果實。

“唔好停手”

16,17．（甲）我哋從傳道書11:6學到乜嘢？（乙）我哋嘅傳道工作會對嗰啲留意我哋嘅人産生乜嘢影響？請舉例。

¹⁶ 即使睇嚟好多人對王國信息無動於衷，我哋都唔應該低估撒種工作所帶嚟嘅影響。（請讀傳道書11:6）好多人雖然唔接受好消息，但係會留意我哋。我哋衣着得體、言行有禮、笑容親切，可能會令佢哋印象深刻。有時，一啲對我哋有負面睇法嘅人，後來都因為我哋嘅良好行為而改變態度。課文開頭提到嘅塞爾吉奧同奧琳達，真係有過噉樣嘅經歷。

¹⁷ 塞爾吉奧話：“因為患病，我哋有段時間唔可以去嗰個廣場。後來我哋又繼續喺嗰度傳道，有啲經過嘅人問我哋：‘你哋冇事呀嘛？我哋好掛住你哋呀。’”奧琳達面帶微笑補充話：“巴士司機向我哋招手，有啲司機仲大聲對我哋講：‘做得好！’佢哋仲問我哋攞雜誌添。”令呢對夫婦感到意外嘅係，一個男子嚟到見證手拉車旁邊，送咗一扎花俾佢哋，感謝佢哋所做嘅一切。

18．點解我哋決心要“懷住忍耐結出果實”？

¹⁸ 的確，只要我哋繼續撒播王國種子，“唔好停手”，就係執行“對所有國族作見證”呢項重要任務。（馬太福音24:14）無論如何，我哋都可以因為自己蒙耶和華悦納而深感喜樂。耶和華深愛嗰啲“懷住忍耐結出果實”嘅人！

1,2．（甲）耶穌喺犧牲前同使徒講咗乜嘢？（請睇吓課文開頭嘅圖片）（乙）點解我哋應該謹記傳道嘅理由？（丙）呢篇課文會討論乜嘢？

耶穌喺犧牲前嘅最後一晚，同使徒傾咗好耐。談話期間，佢向使徒强調自己深愛佢哋，亦都同佢哋講咗上一篇課文討論過嘅葡萄樹嘅比喻。耶穌通過呢個比喻鼓勵門徒要“不斷多結果實”，即係喺傳講王國信息嘅工作上要保持忍耐。（約翰福音15:8）

² 耶穌唔單止同門徒講要做乜嘢，亦都同佢哋講點解要噉樣做。耶穌話俾佢哋知繼續執行傳道工作嘅理由。如果我哋謹記呢啲理由，就有力量保持忍耐，“對所有國族作見證”。（馬太福音24:13,14）喺呢篇課文，我哋會討論四個嚟自聖經嘅傳道理由，亦都會分析耶和華俾咗我哋邊四個恩賜，幫助我哋懷住忍耐結出果實。

讚美耶和華

3．（甲）約翰福音15:8提到嘅傳道原因係乜嘢？（乙）耶穌所講嘅葡萄指嘅係乜嘢？點解呢個比喻好貼切？

³ 我哋參與傳道工作嘅首要原因係，喺人面前讚美耶和華同埋使耶和華嘅名彰顯為聖。（請讀約翰福音15:1,8）請留意，耶穌將天父耶和華比作一位培植葡萄嘅園丁，又將自己比作葡萄樹或樹幹，將門徒比作枝子。（約翰福音15:5）所以，比喻當中嘅葡萄代表基督徒結出嘅王國果實，亦即係佢哋執行嘅傳道工作。耶穌對使徒講：“你哋不斷多結果實，……我嘅父親就因此得榮耀嘞”。正如葡萄樹産出好葡萄可以使培植嘅人得到光彩，如果我哋努力宣揚王國信息，就可以榮耀耶和華。（馬太福音25:20-23）

4．（甲）我哋通過乜嘢方式可以使上帝嘅名彰顯為聖？（乙）有榮幸使上帝嘅名彰顯為聖，你有乜嘢感覺？

⁴ 我哋嘅傳道工作以乜嘢方式使上帝嘅名彰顯為聖？我哋唔能够使上帝嘅名更加神聖，因為上帝嘅名係絶對神聖同聖潔嘅。請留意先知以賽亞點樣講。佢話：“你哋應該尊萬軍之主耶和華為聖”。（以賽亞書8:13）我哋尊耶和華嘅名為聖，就會承認唯有上帝嘅名耶和華先至係至高無上嘅，亦都會幫助其他人尊崇呢個名。（馬太福音6:9）我哋向人傳講耶和華美好嘅特質同埋佢對人類永恆不變嘅旨意，就係捍衛上帝嘅聖名，幫助人睇出撒但毁謗上帝。（創世記3:1-5）另外，我哋喺傳道地區努力幫助人睇出耶和華係“配得榮耀、尊崇、力量”嘅上帝，就係使耶和華嘅名彰顯為聖。（啟示錄4:11）做咗16年先驅嘅盧恩話：“知道自己有幸為宇宙嘅創造主作見證，我内心充滿感激。呢個使我好想繼續傳道。”

愛耶和華同耶穌

5．（甲）約翰福音15:9,10提到嘅傳道原因係乜嘢？（乙）耶穌點樣强調門徒需要忍耐？

⁵ 請讀約翰福音15:9,10。我哋深愛耶和華同耶穌，係我哋傳講王國信息嘅第二個重要原因。（馬可福音12:30；約翰福音14:15）耶穌唔係只係要門徒喺佢嘅愛里，而係要佢哋“時刻喺［佢］嘅愛里”。佢知道門徒一直過真基督徒嘅生活需要保持忍耐，所以佢喺約翰福音15:4-10多次强調“時刻”呢個詞。

6．我哋點樣表明自己想時刻留喺基督嘅愛里？

⁶ 我哋點樣表明，自己想時刻留喺基督嘅愛里並渴望得到佢嘅嘉許？就係要留意同服從耶穌嘅誡命。耶穌要求我哋做嘅，佢自己都會做。佢話：“正如我遵守咗父親嘅誡命，就時刻喺佢嘅愛里。”耶穌為我哋立下咗好榜樣。（約翰福音13:15）

7．服從同愛之間有乜嘢關係？

⁷ 為咗講明服從同愛之間嘅關係，耶穌同使徒講：“領受我誡命又遵守嘅，呢個人就係愛我嘅。”（約翰福音14:21）此外，耶穌嘅誡命反映嘅係天父嘅諗法，所以我哋聽從耶穌嘅吩咐去傳道，亦都表明我哋愛上帝。（馬太福音17:5；約翰福音8:28）我哋愛耶和華同耶穌，就會一直留喺佢哋嘅愛里。

向人發出警告

8,9．（甲）我哋傳道嘅第三個原因係乜嘢？（乙）以西結書3:18,19；18:23點樣推動我哋繼續傳道？

⁸ 我哋不斷傳道嘅第三個原因係，要向人發出警告。聖經話挪亞“傳講正義”。（請讀彼得後書2:5）喺大洪水之前，挪亞傳講嘅信息肯定都包括毁滅嘅警告。我哋點知道呢？耶穌話：“洪水以前嘅日子，人又飲又食，又娶又嫁，直到挪亞入方舟嗰一日。佢哋毫不理會，直到洪水嚟到，將佢哋全部沖走，人子臨在嘅時候亦會係噉。”（馬太福音24:38,39）即使人完全唔理會，挪亞依然忠心傳講警告信息。

⁹ 今日，我哋傳講嘅王國信息使人有機會認識上帝對人類嘅旨意。同耶和華一樣，我哋衷心希望人人都接受呢啲信息而得以 “活落去”。（以西結書18:23）同時，我哋逐家逐户同埋喺公衆地方傳道，就係盡力向人發出警告，使佢哋知道上帝嘅王國即將到嚟，好快就會毁滅呢個邪惡世界。（以西結書3:18,19；但以理書2:44；啟示錄14:6,7）

愛所有人

10．（甲）馬太福音22:39提到嘅第四個傳道原因係乜嘢？（乙）保羅同西拉喺腓立比點樣幫助一個獄卒？

¹⁰ 我哋不斷傳道嘅第四個原因係，我哋愛所有人。（馬太福音22:39）呢種愛幫助我哋喺傳道工作上保持忍耐。我哋知道，人嘅内心可能會隨住情況變化而發生改變。請諗吓使徒保羅同佢嘅傳道同伴西拉嘅經歷。喺腓立比城，反對者將佢哋韞入監獄。到咗半夜時分，突然發生地震，監獄嘅門都打開晒。獄卒擔心囚犯逃跑就想自殺。不過保羅大聲呼叫話：“唔好傷害自己”！於是獄卒問：“我要做乜嘢先可以得救？”保羅同西拉就同佢講：“要信靠主耶穌，先可以得救”。（使徒行傳16:25-34）

11,12．（甲）獄卒嘅記載同我哋嘅傳道工作有乜嘢關係？（乙）點解我哋要繼續傳道？

¹¹ 獄卒嘅記載同我哋嘅傳道工作有乜嘢關係？請留意，獄卒喺地震之後内心先至發生改變，並向保羅尋求幫助。今日有啲人唔肯接受聖經信息，不過，如果佢哋嘅生活突然發生變化，佢哋嘅内心就可能會有所改變，結果願意接受我哋嘅幫助。例如，喺我哋嘅傳道地區，有啲人可能突然失業而感到迷茫，有啲人可能婚姻破裂，仲有啲人可能得知自己患咗嚴重嘅疾病，或者痛失親友。當中一啲人遭遇呢啲痛苦嘅事之後，可能會開始思考以前自己冇興趣了解嘅人生問題。佢哋或者會諗：“我要做乜嘢先可以得救？”如果呢個時候我哋向佢哋傳講得救嘅信息，佢哋或者會願意聽。

¹² 所以，只要繼續忠心噉做傳道工作，我哋就可以喺人願意接受嗰陣，及時為佢哋帶嚟安慰。（以賽亞書61:1）夏洛特從事全時服務38年，佢話：“今日嘅人都迷失咗方向，佢哋需要聽到好消息。”有34年先驅經驗嘅亞沃爾話：“今日有越來越多人感到情緒低落。我真係好想幫助佢哋，呢個推動我努力傳道。”對其他人嘅愛的確係我哋繼續傳道嘅一個重要原因！

幫助我哋保持忍耐嘅恩賜

13,14．（甲）約翰福音15:11提到乜嘢恩賜？（乙）耶穌嘅喜樂點樣成為我哋嘅喜樂？（丙）喜樂點樣影響我哋嘅傳道工作？

¹³ 耶穌喺犧牲前嘅最後一晚亦都提到，有四個恩賜會幫助使徒懷住忍耐結出果實。係乜嘢恩賜？我哋可以點樣從中得益？

¹⁴ 喜樂嘅恩賜。聽從耶穌嘅吩咐去傳道係咪一個沉重嘅負擔？當然唔係。耶穌講完葡萄樹嘅比喻之後話，傳講王國信息嘅人會得到喜樂。（請讀約翰福音15:11）佢保證，佢嘅喜樂會成為我哋嘅喜樂。點解？之前耶穌將自己比作葡萄樹，將門徒比作枝子。枝子必須依附喺葡萄樹上。只要枝子同樹幹連喺一齊，就可以不斷從葡萄樹得到水分同營養。同樣，我哋緊緊跟從基督嘅腳蹤，同佢聯合，就可以同佢一樣因遵行上帝旨意而得到喜樂。（約翰福音4:34；17:13；彼得前書2:21）做咗先驅超過40年嘅漢妮話：“傳道帶嚟嘅喜樂激勵我繼續事奉耶和華。”的確，内心深處嘅喜樂使我哋得到力量，就算喺反應冷淡嘅地區都能繼續傳道。（馬太福音5:10-12）

15．（甲）約翰福音14:27提到乜嘢恩賜？（乙）點解平安呢種恩賜可以幫助我哋繼續結出果實？

¹⁵ 平安嘅恩賜。（請讀約翰福音14:27）耶穌喺犧牲前嘅最後一晚同佢嘅使徒講：“［我］將我嘅平安賜俾你哋。”耶穌所講嘅平安點樣幫助我哋結出果實？我哋保持忍耐嘅時候，内心都可以享有平安，因為我哋知道自己得蒙耶和華同耶穌嘅悦納。（詩篇149:4；羅馬書5:3,4；歌羅西書3:15）從事全時服務45年嘅奧夫話：“雖然我做傳道工作會感到疲倦，但係呢個工作使我得到真正嘅滿足感，令我嘅人生充滿意義。”我哋幾咁感激耶和華使我哋内心一直享有平安！

16．（甲）約翰福音15:15提到乜嘢恩賜？（乙）使徒可以點樣維繫同耶穌嘅友誼？

¹⁶ 友誼嘅恩賜。耶穌表明佢希望使徒得到“完完全全”嘅喜樂。之後，佢又同佢哋講明表現無私嘅愛有幾重要。（約翰福音15:11-13）佢跟住話：“我已經將你哋叫做朋友”。我哋可以成為耶穌嘅朋友，呢個真係寶貴嘅恩賜！使徒必須點樣做先可以維繫同耶穌嘅友誼？佢哋一定要“去不斷結出果實”。（請讀約翰福音15:14-16）大約兩年前，耶穌吩咐門徒話：“你哋要隨走隨傳，話：‘天上嘅王國近嘞。’”（馬太福音10:7）所以，喺耶穌犧牲前嘅嗰個晚上，佢鼓勵使徒要喺傳道工作上保持忍耐。（馬太福音24:13；馬可福音3:14）當然遵守耶穌嘅誡命唔容易，但只要佢哋噉樣做，就可以一直做耶穌嘅朋友。另一個恩賜可以幫助佢哋做到呢點。

17,18．（甲）約翰福音15:16提及乜嘢恩賜？（乙）呢個恩賜點樣幫助耶穌嘅門徒？（丙）呢啲恩賜嚟自邊個？

¹⁷ 禱告得到回應嘅恩賜。耶穌話：“你哋奉我嘅名，無論向父親求乜嘢，佢都會賜俾你哋。”（約翰福音15:16）呢個承諾一定帶俾使徒好大嘅鼓勵！a雖然佢哋當時唔知道耶穌喺地上嘅生命好快就會結束，不過耶穌嘅離去並唔代表佢哋孤立無助。耶和華會隨時回應佢哋嘅禱告，使佢哋得到幫助，能够繼續執行傳講王國信息嘅任務。之後冇幾耐，使徒就睇出耶和華點樣回應佢哋嘅禱告，俾佢哋所需嘅幫助。（使徒行傳4:29,31）

¹⁸ 今日嘅情況都一樣。只要我哋懷住忍耐結出果實，就可以繼續同耶穌做朋友。另外，我哋確信耶和華會隨時回應我哋嘅禱告，幫助我哋應付喺傳講王國好消息時遇到嘅困難。（腓立比書4:13）我哋非常感激耶和華回應我哋嘅禱告，而且好高興可以成為耶穌嘅朋友！呢啲嚟自耶和華嘅恩賜使我哋得到强化，不斷結出果實。（雅各書1:17）

19．（甲）點解我哋要不斷傳道？（乙）乜嘢幫助我哋完成上帝嘅工作？

¹⁹ 喺呢篇課文我哋學到，要不斷傳道嘅四個原因：榮耀耶和華並彰顯佢嘅聖名，愛耶和華同耶穌，向人發出警告同埋愛所有人。另外，我哋亦都學到四個恩賜：喜樂、平安、同耶穌嘅友誼以及禱告得到回應。呢啲恩賜强化我哋，幫助我哋完成上帝所交託嘅工作。耶和華見到我哋努力“不斷多結果實”，一定會感到好欣慰！